(1)

Fl-24 ta’ Frar 2022, ir-Russja bdiet aggressjoni militari mhux provokata u mhux ġustifikata kontra l-Ukrajna. Wara l-invażjoni tar-Russja fl-Ukrajna, sal-24 ta’ Mejju 2022 waslu madwar 6,2 miljun ruħ fl-Unjoni. L-influss ta’ persuni li qed jaħarbu mill-gwerra fl-Ukrajna joħloq sfida għall-Istati Membri kkonċernati meta jiġu biex jiżguraw li tingħata biżżejjed assistenza umanitarja u li jissodisfaw il-ħtiġijiet primarji ta’ dawk in-nies. Is-Slovakkja fis-27 ta’ Frar 2022, il-Polonja fit-28 ta’ Frar 2022, u ċ-Ċekja fil-11 ta’ Marzu 2022 talbu għall-assistenza f’konformità mal-Artikolu 15(1) tad-Deċiżjoni 1313/2013/UE tal-Parlament Ewropew u tal-Kunsill (3) fir-rigward ta’ kenn temporanju ta’ emerġenza, merkanzija ta’ akkomodazzjoni, mediċini u merkanzija mediċi, tagħmir li għandu jintuża għall-ġestjoni u l-forniment tal-ikel lill-persuni li qed jaħarbu mill-gwerra fl-Ukrajna.

(2)

Fl-24 ta’ Frar 2022, l-Ukrajna talbet assistenza f’konformità mal-Artikolu 16(1) tad-Deċiżjoni 1313/2013/UE fir-rigward tal-provvisti tal-protezzjoni ċivili.

(3)

Bħala espressjoni ta’ solidarjetà u appoġġ, l-Istati Membri u l-komunità internazzjonali wieġbu billi pprovdew merkanzija ta’ assistenza umanitarja sabiex titqassam lill-persuni li qed jaħarbu mill-gwerra u li jaslu fl-Unjoni u lill-persuni affettwati mill-gwerra fl-Ukrajna.

(4)

Fl-14 ta’ Marzu 2022, il-Kummissjoni kkonsultat mal-Istati Membri dwar il-ħtieġa ta’ Deċiżjoni tal-Kummissjoni li tipprevedi eżenzjoni mid-dazji fuq l-importazzjoni u eżenzjoni mit-taxxa fuq il-valur miżjud (“VAT”) fuq merkanzija importata għar-rilaxx għaċ-ċirkolazzjoni libera għad-distribuzzjoni jew li ssir disponibbli mingħajr ħlas għal persuni li qed jaħarbu mill-gwerra fl-Ukrajna. Wara dik l-inkjesta, tali talbiet saru mill-Awstrija, miċ-Ċekja, mill-Estonja, minn Franza, mill-Greċja, mill-Kroazja, mil-Lussemburgu, minn Malta, min-Netherlands, mill-Polonja, mir-Rumanija, mis-Slovakkja, mis-Slovenja, u mill-Ungerija fit-18 ta’ Marzu 2022, mill-Irlanda u mil-Litwanja fil-21 ta’ Marzu 2022, u mill-Finlandja u mill-Italja fit-23 ta’ Marzu 2022 (“l-Istati Membri rikjedenti”).

(5)

Peress li l-kriżi umanitarja kkawżata mill-invażjoni Russa fl-Ukrajna għandha konsegwenzi kbar mhux biss fl-Ukrajna, iżda wkoll f’għadd ta’ Stati Membri, din tikkostitwixxi diżastru li jaffettwa t-territorju ta’ għadd ta’ Stati Membri fis-sens tal-Kapitolu XVII, it-Taqsima C tar-Regolament (KE) Nru 1186/2009 u tat-Titolu VIII, il-Kapitolu 4, tad-Direttiva 2009/132/KE.

(6)

Għalhekk huwa xieraq li l-Istati Membri rikjedenti jiġu awtorizzati jagħtu eżenzjoni mid-dazji fuq l-importazzjoni li għandhom jitħallsu fuq merkanzija importata għall-iskopijiet deskritti fl-Artikolu 74 tar-Regolament (KE) Nru 1186/2009 u eżenzjoni mill-VAT li għandha titħallas fuq merkanzija importata għall-iskopijiet deskritti fl-Artikolu 51 tad-Direttiva 2009/132/KE minn organizzazzjonijiet tal-Istat, organizzazzjonijiet tal-karità jew filantropiċi approvati mill-awtoritajiet kompetenti tal-Istati Membri rikjedenti, jew f’isimhom. Meta wieħed iqis is-sitwazzjoni bla preċedent u l-ħtieġa ta’ reazzjoni rapida, huwa xieraq li l-Istati Membri rikjedenti jiġu awtorizzati jagħtu eżenzjoni mid-dazju u mill-VAT għall-merkanzija għal assistenza umanitarja importati biex tiġi rilaxxata għaċ-ċirkolazzjoni libera anki minn organizzazzjonijiet tal-Istat jew organizzazzjonijiet tal-karità jew filantropiċi oħra li huma approvati u jwettqu attivitajiet simili fi Stat Membru ieħor rikjedenti fejn il-merkanzija tkun maħsuba biex tintuża. Sabiex tingħata tweġiba għat-talbiet tal-Istati Membri biex tingħata assistenza lill-persuni li baqgħu fl-Ukrajna u li huma affettwati serjament mill-gwerra, jeħtieġ ukoll li jiġi awtorizzat aktar trasferiment ta’ dik il-merkanzija lejn organizzazzjonijiet tal-Istat Ukreni jew organizzazzjonijiet tal-karità jew filantropiċi approvati mill-awtoritajiet kompetenti Ukreni għad-distribuzzjoni mingħajr ħlas tal-merkanzija lill-persuni fil-bżonn fl-Ukrajna. Barra minn hekk, huwa xieraq li l-Istati Membri rikjedenti jiġu awtorizzati jagħtu eżenzjoni mid-dazji fuq l-importazzjoni li għandhom jitħallsu fuq il-merkanzija importata għall-finijiet deskritti fl-Artikolu 74 tar-Regolament (KE) Nru 1186/2009 u eżenzjoni mill-VAT li għandha titħallas fuq merkanzija importata għall-finijiet deskritti fl-Artikolu 51 tad-Direttiva 2009/132/KE meta dawn jiġu importati għar-rilaxx għaċ-ċirkolazzjoni libera minn l-aġenziji ta’ għajnuna f’każ ta’ diżastru, jew f’isimhom, sabiex jissodisfaw il-ħtiġijiet tagħhom matul il-perjodu li jipprovdu għajnuna f’każ ta’ diżastru lill-persuni li qed jaħarbu mill-gwerra fl-Ukrajna.

(7)

Sabiex jiġu mmonitorjati l-importazzjonijiet li għalihom jingħata l-benefiċċju tal-eżenzjoni mid-dazji jew tal-eżenzjoni mill-VAT, l-Istati Membri rikjedenti għandhom jinfurmaw lill-Kummissjoni bin-natura u bil-kwantitajiet tal-merkanzija differenti ammessa mingħajr dazji fuq l-importazzjoni u l-VAT għad-distribuzzjoni jew id-disponibbiltà mingħajr ħlas lill-persuni li qed jaħarbu mill-gwerra fl-Ukrajna, bl-organizzazzjonijiet li jkunu approvaw għad-distribuzzjoni jew għad-disponibbiltà ta’ dik il-merkanzija u bil-miżuri meħuda biex jiġi evitat li l-merkanzija tintuża għal skopijiet oħra għajr dawk li jindirizzaw il-ħtiġijiet tal-persuni li qed jaħarbu mill-gwerra fl-Ukrajna.

(8)

Sabiex tiġi żgurata l-konformità mal-kundizzjonijiet stabbiliti f’din id-Deċiżjoni, jiġu evitati l-irregolaritajiet, u jiġu protetti l-interessi finanzjarji tal-Unjoni u tal-Istati Membri, jenħtieġ li l-Istati Membri rikjedenti jiżguraw l-applikazzjoni ta’ miżuri ta’ ġestjoni tar-riskju u ta’ kontroll doganali pertinenti fir-rigward tar-rilaxx għaċ-ċirkolazzjoni u l-użu liberi u t-trasferiment sussegwenti lejn l-Ukrajna ta’ merkanzija li għaliha jingħata l-benefiċċju tal-eżenzjoni mid-dazji doganali jew mill-eżenzjoni mill-VAT. Il-miżuri meħuda għandhom jiġu rrappurtati lill-Kummissjoni qabel l-iskadenza stabbilita b’din id-Deċiżjoni.

(9)

Filwaqt li jitqiesu l-isfidi estremi li qed jiffaċċjaw l-Istati Membri rikjedenti, jenħtieġ li l-eżenzjoni mid-dazji fuq l-importazzjoni u l-eżenzjoni mill-VAT jingħataw għall-importazzjonijiet li saru mill-24 ta’ Frar 2022. Jenħtieġ li l-eżenzjoni tibqa’ fis-seħħ sat-31 ta’ Diċembru 2022.

(10)

Fid-19 ta’ April 2022, l-Istati Membri ġew ikkonsultati f’konformità mal-ewwel paragrafu tal-Artikolu 76 tar-Regolament (KE) Nru 1186/2009 u l-ewwel paragrafu tal-Artikolu 53 tad-Direttiva 2009/132/KE,