EUR-Lex Access to European Union law
This document is an excerpt from the EUR-Lex website
Document 32022D0609
Commission Implementing Decision (EU) 2022/609 of 8 April 2022 on the recognition of the ‘SURE’ voluntary scheme for demonstrating compliance with the requirements set in Directive (EU) 2018/2001 of the European Parliament and of the Council for biofuels, bioliquids, biomass fuels, renewable liquid and gaseous fuels of non-biological origin and recycled carbon fuels (Text with EEA relevance)
Deċiżjoni ta’ Implimentazzjoni tal-Kummissjoni (UE) 2022/609 tat-8 ta’ April 2022 dwar ir-rikonoxximent tal-iskema volontarja “SURE” biex tintwera l-konformità mar-rekwiżiti stabbiliti fid-Direttiva (UE) 2018/2001 tal-Parlament Ewropew u tal-Kunsill għall-bijokarburanti, il-bijolikwidi, il-karburanti mill-bijomassa, il-karburanti rinnovabbli likwidi u gassużi ta’ oriġini mhux bijoloġika u l-karburanti tal-karbonju riċiklat (Test b’rilevanza għaż-ŻEE)
Deċiżjoni ta’ Implimentazzjoni tal-Kummissjoni (UE) 2022/609 tat-8 ta’ April 2022 dwar ir-rikonoxximent tal-iskema volontarja “SURE” biex tintwera l-konformità mar-rekwiżiti stabbiliti fid-Direttiva (UE) 2018/2001 tal-Parlament Ewropew u tal-Kunsill għall-bijokarburanti, il-bijolikwidi, il-karburanti mill-bijomassa, il-karburanti rinnovabbli likwidi u gassużi ta’ oriġini mhux bijoloġika u l-karburanti tal-karbonju riċiklat (Test b’rilevanza għaż-ŻEE)
C/2022/2110
ĠU L 114, 12.4.2022, p. 203–205
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
12.4.2022 |
MT |
Il-Ġurnal Uffiċjali tal-Unjoni Ewropea |
L 114/203 |
DEĊIŻJONI TA’ IMPLIMENTAZZJONI TAL-KUMMISSJONI (UE) 2022/609
tat-8 ta’ April 2022
dwar ir-rikonoxximent tal-iskema volontarja “SURE” biex tintwera l-konformità mar-rekwiżiti stabbiliti fid-Direttiva (UE) 2018/2001 tal-Parlament Ewropew u tal-Kunsill għall-bijokarburanti, il-bijolikwidi, il-karburanti mill-bijomassa, il-karburanti rinnovabbli likwidi u gassużi ta’ oriġini mhux bijoloġika u l-karburanti tal-karbonju riċiklat
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva (UE) 2018/2001 tal-Parlament Ewropew u tal-Kunsill tal-11 ta’ Diċembru 2018 dwar il-promozzjoni tal-użu tal-enerġija minn sorsi rinnovabbli (1), u b’mod partikolari l-Artikolu 30(4) tagħha,
Billi:
(1) |
Id-Direttiva (UE) 2018/2001 tistabbilixxi rekwiżiti għal ċerti karburanti, b’mod partikolari l-bijokarburanti, il-bijolikwidi, il-karburanti mill-bijomassa, il-karburanti rinnovabbli likwidi u gassużi ta’ oriġini mhux bijoloġika u l-karburanti tal-karbonju riċiklat, sabiex jiġi żgurat li jkunu jistgħu jingħaddu lejn il-miri stabbiliti fid-Direttiva jekk dawn ikunu ġew prodotti b’mod sostenibbli u jiffrankaw emissjonijiet sinifikanti ta’ gassijiet serra meta mqabbla mal-karburanti fossili. L-ewwel nett, l-Artikolu 29 tad-Direttiva jistabbilixxi kriterji tas-sostenibbiltà u l-iffrankar tal-emissjonijiet tal-gassijiet serra għall-bijokarburanti, il-bijolikwidi u l-karburanti mill-bijomassa u l-Artikolu 26 tad-Direttiva u r-Regolament Delegat tal-Kummissjoni (UE) 2019/807 (2) jistabbilixxi l-kriterji biex jiġi ddeterminat liema materja prima għall-bijokarburanti, il-bijolikwidi u l-karburanti mill-bijomassa għandha riskju għoli ta’ bidla indiretta fl-użu tal-art, minn naħa waħda, u min-naħa l-oħra liema bijokarburanti, bijolikwidi jew karburanti mill-bijomassa għandhom riskju baxx ta’ bidla indiretta fl-użu tal-art. It-tieni, l-Artikolu 25(2) tad-Direttiva jistabbilixxi kriterji għall-iffrankar tal-emissjonijiet ta’ gassijiet serra għall-karburanti rinnovabbli likwidi u gassużi ta’ oriġini mhux bijoloġika u l-karburanti tal-karbonju riċiklat li jintużaw fit-trasport. It-tielet, l-Artikolu 28(2) tad-Direttiva jirrikjedi lill-operaturi ekonomiċi jdaħħlu informazzjoni f’bażi tad-data tal-Unjoni dwar it-tranżazzjonijiet magħmula u l-karatteristiċi sostenibbli ta’ għadd ta’ karburanti rinnovabbli (il-bijokarburanti, il-bijogass u l-karburanti rinnovabbli u gassużi ta’ oriġini mhux bijoloġika) u l-karburanti tal-karbonju riċiklat użati fit-trasport. |
(2) |
Id-Direttiva tipprevedi wkoll regoli dwar kif jiġi kkalkulat il-kontribut tal-elettriku rinnovabbli għall-miri tat-trasport. B’mod partikolari, l-Artikolu 27(3) tad-Direttiva jipprevedi regoli biex isir dan il-kalkolu, kemm meta l-elettriku jintuża direttament biex jagħti l-enerġija lill-vetturi elettriċi u kif ukoll meta jintuża biex jiġu prodotti karburanti rinnovabbli likwidi u gassużi ta’ oriġini mhux bijoloġika li jintużaw fit-trasport. |
(3) |
Sabiex jiġi vverifikat li tinkiseb il-konformità mar-regoli għall-bijokarburanti, il-bijolikwidi, il-karburanti mill-bijomassa u l-karburanti rinnovabbli likwidi u gassużi ta’ oriġini mhux bijoloġika u l-karburanti mill-karbonju riċiklat, l-Istati Membri jistgħu jużaw skemi volontarji. L-iskemi volontarji kellhom rwol importanti fil-forniment ta’ evidenza tal-konformità mal-kriterji tas-sostenibbiltà u l-iffrankar tal-emissjonijiet tal-gassijiet serra għall-bijokarburanti u l-bijolikwidi skont id-Direttiva 2009/28/KE tal-Parlament Ewropew u tal-Kunsill (3). Fil-qafas tad-Direttiva (UE) 2018/2001, ir-rwol tal-iskemi volontarji ġie estiż. L-ewwel nett, issa jistgħu jservu biex tiġi ċċertifikata l-konformità tal-karburanti kollha prodotti mill-bijomassa, inklużi l-karburanti gassużi u solidi, mal-kriterji tas-sostenibbiltà stabbiliti fid-Direttiva (UE) 2018/2001, u tiġi provduta data akkurata dwar l-iffrankar tagħhom tal-emissjonijiet tal-gassijiet serra. It-tieni, jistgħu jservu biex jiċċertifikaw il-konformità tal-karburanti rinnovabbli likwidi u gassużi ta’ oriġini mhux bijoloġika li jintużaw fit-trasport u tal-karburanti tal-karbonju riċiklat flimkien mal-kriterji tagħhom tal-iffrankar tal-emissjonijiet tal-gassijiet serra. It-tielet, jistgħu jservu biex tintwera l-konformità mar-regoli, li l-Artikolu 27(3) tad-Direttiva (UE) 2018/2001 jistabbilixxi biex jiġi kkalkulat l-elettriku rinnovabbli fit-trasport. Ir-raba’, jistgħu jservu biex jintwera li l-operaturi ekonomiċi jdaħħlu informazzjoni akkurata fil-bażi tad-data tal-Unjoni jew dik nazzjonali dwar għadd ta’ karburanti rinnovabbli u l-karburanti mill-karbonju riċiklat użati fit-trasport f’konformità mal-Artikolu 28(4) tad-Direttiva (UE) 2018/2001. Il-ħames, jistgħu jintużaw biex jiġu ċċertifikati l-bijokarburanti, il-bijolikwidi u l-karburanti mill-bijomassa b’riskju baxx ta’ bdil indirett tal-użu tal-art. Il-Kummissjoni tista’ tiddeċiedi li l-iskemi volontarji nazzjonali jew internazzjonali jistgħu jservu dawn il-finijiet kollha jew xi wħud minnhom. |
(4) |
Meta operatur ekonomiku jagħti provi tad-data dwar il-konformità mal-kriterji tas-sostenibbiltà u l-iffrankar tal-emissjonijiet tal-gassijiet serra, miksuba f’konformità ma’ skema volontarja rikonoxxuta mill-Kummissjoni, sa fejn dan ikun kopert bid-deċiżjoni tar-rikonoxximent, jenħtieġ li l-Istat Membru ma jirrikjedix li l-fornitur jipprovdi evidenza ulterjuri. |
(5) |
It-talba lill-Kummissjoni għar-rikonoxximent skont l-Artikolu 30(4) tad-Direttiva mill-iskema volontarja “SURE” ġiet sottomessa lill-Kummissjoni għall-ewwel darba fil-15 ta’ Ottubru 2020. Din t-talba wasslet għal valutazzjoni tal-iskema min-naħa tal-Kummissjoni, u fiha ġew identifikati ċerti kwistjonijiet li jeħtieġu modifika. Fis-sottomissjoni mill-ġdid tagħha tad-29 ta’ Ġunju 2021, l-iskema indirizzat dawn il-kwistjonijiet b’mod korrett. L-iskema tkopri l-materja prima kollha inkluż l-iskart u r-residwi, il-karburanti mill-bijomassa u l-katina tal-kustodja kollha. |
(6) |
Fil-valutazzjoni ta’ “SURE”, il-Kummissjoni sabet li din tkopri b’mod adegwat il-kriterji tas-sostenibbiltà stabbiliti fl-Artikolu 29 (2) sa (7) tad-Direttiva (UE) 2018/2001, filwaqt li fiha wkoll data akkurata dwar l-iffrankar tal-emissjonijiet tal-gassijiet serra għall-fini tal-Artikolu 29(10) tad-Direttiva (UE) 2018/2001 u tapplika l-istess metodoloġija tal-bilanċ tal-massa f’konformità mar-rekwiżiti tal-Artikolu 30(1) u (2) tad-Direttiva (UE) 2018/2001. Din il-valutazzjoni ma tqisx l-atti ta’ implimentazzjoni li jmiss li għandhom jiġu adottati f’konformità mal-Artikolu 29(8) u l-Artikolu 30(8) tad-Direttiva (UE) 2018/2001, dwar il-forniment ta’ gwida biex tintwera l-konformità mal-kriterji tas-sostenibbiltà stabbiliti fl-Artikolu 29 (6) u (7) tad-Direttiva (UE) 2018/2001 u dwar ir-regoli għall-verifika tal-kriterji tas-sostenibbiltà u l-iffrankar tal-emissjonijiet tal-gassijiet serra u l-kriterji ta’ riskju baxx ta’ bidla indiretta fl-użu tal-art. Għaldaqstant, “SURE” se tiġi rivalutata meta dawn l-atti ta’ implimentazzjoni jiġu adottati. |
(7) |
Il-valutazzjoni ta’ SURE sabet li din tilħaq l-istandards adegwati ta’ affidabbiltà, trasparenza u awditjar indipendenti u li tikkonforma mar-rekwiżiti metodoloġiċi stabbiliti fl-Anness VI tad-Direttiva (UE) 2018/2001. |
(8) |
Jenħtieġ li l-iskema rikonoxxuta tkun disponibbli fit-taqsima ddedikata għall-iskemi volontarji fuq is-sit web EUROPA tal-Kummissjoni. |
(9) |
Il-miżuri previsti f’din id-Deċiżjoni huma skont l-opinjoni tal-Kumitat dwar is-Sostenibbiltà tal-Bijokarburanti, il-Bijolikwidi u l-karburanti mill-Bijomassa, |
ADOTTAT DIN ID-DEĊIŻJONI:
Artikolu 1
“SURE” (“l-iskema”), sottomessa għar-rikonoxximent tal-Kummissjoni fid-29 ta’ Ġunju 2021, turi, għall-karburanti awditjati bħala parti mill-iskema, l-elementi li ġejjin:
(a) |
il-konformità tal-konsenji tal-bijokarburanti mal-kriterji ta’ sostenibbiltà stabbiliti fl-Artikolu 29(2) sa (7) u (10) tad-Direttiva (UE) 2018/2001; |
(b) |
il-konformità tal-operaturi ekonomiċi mal-obbligu li jdaħħlu informazzjoni akkurata fil-bażi tad-data tal-Unjoni jew nazzjonali dwar il-karburanti rinnovabbli u l-karburanti tal-karbonju riċiklat użati fit-trasport f’konformità mal-Artikolu 28(4) tad-Direttiva (UE) 2018/2001. |
L-iskema fiha wkoll data akkurata dwar l-iffrankar tal-emissjonijiet tal-gassijiet serra għall-fini tal-Artikolu 29(10) tad-Direttiva (UE) 2018/2001, u b’hekk tiżgura li t-tagħrif rilevanti kollu mogħti mill-operaturi ekonomiċi li jkunu jinsabu iktar ’il fuq fil-katina tal-kustodja jitgħadda lill-operaturi ekonomiċi li jkunu jinsabu iktar ’l isfel f’din il-katina.
Artikolu 2
Id-Deċiżjoni hija valida għal perjodu ta’ ħames snin wara li tidħol fis-seħħ. F’każ li l-kontenut tal-iskema, kif sottomessa fid-29 ta’ Ġunju 2021 lill-Kummissjoni għar-rikonoxximent, jinbidel b’mod li jista’ jaffettwa l-bażi ta’ din id-Deċiżjoni, dawn il-bidliet għandhom jiġu nnotifikati lill-Kummissjoni mingħajr dewmien. Il-Kummissjoni għandha tivvaluta l-bidliet innotifikati bil-ħsieb li tistabbilixxi jekk l-iskema tkunx għadha tkopri b’mod adegwat il-kriterji ta’ sostenibbiltà li għalihom tkun ġiet rikonoxxuta.
Artikolu 3
Il-Kummissjoni tista’ tħassar din id-Deċiżjoni, inter alia, fiċ-ċirkostanzi li ġejjin:
(a) |
jekk ikun intwera biċ-ċar li l-iskema ma tkunx implimentat elementi kkunsidrati bħala importanti għal din id-Deċiżjoni jew jekk ikun twettaq ksur gravi u strutturali ta’ dawk l-elementi; |
(b) |
jekk l-iskema ma tissottomettix rapporti annwali lill-Kummissjoni skont l-Artikolu 30(5) tad-Direttiva (UE) 2018/2001; |
(c) |
jekk l-iskema ma timplimentax standards ta’ awditjar indipendenti u rekwiżiti oħra speċifikati fl-atti ta’ implimentazzjoni msemmija fl-Artikolu 29(8) jew l-Artikolu 30(8) tad-Direttiva (UE) 2018/2001 jew titjib għal elementi oħra tal-iskema kkunsidrati bħala importanti għal rikonoxximent kontinwu. |
Artikolu 4
Din id-Deċiżjoni għandha tidħol fis-seħħ fil-jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Brussell, it-8 ta’ April 2022.
Għall-Kummissjoni
Il-President
Ursula VON DER LEYEN
(1) ĠU L 328, 21.12.2018, p. 82.
(2) Ir-Regolament Delegat tal-Kummissjoni (UE) 2019/807 tat-13 ta’ Marzu 2019 li jissupplimenta d-Direttiva (UE) 2018/2001 tal-Parlament Ewropew u tal-Kunsill fir-rigward tad-determinazzjoni ta’ materja prima b’riskju għoli ta’ tibdil indirett fl-użu tal-art li għaliha qed tiġi osservata espansjoni sinifikanti taż-żona ta’ produzzjoni f’art b’ħażna kbira ta’ karbonju u ċ-ċertifikazzjoni ta’ bijokarburanti, bijolikwidi u karburanti mill-bijomassa b’riskju baxx ta’ tibdil indirett fl-użu tal-art (ĠU L 133, 21.5.2019, p. 1).
(3) Id-Direttiva 2009/28/KE tal-Parlament Ewropew u tal-Kunsill tat-23 ta’ April 2009 dwar il-promozzjoni tal-użu tal-enerġija minn sorsi rinnovabbli u li temenda u sussegwentement tħassar id-Direttivi 2001/77/KE u 2003/30/KE (ĠU L 140, 5.6.2009, p. 16).