(1)

Biex is-suq intern jiffunzjona sewwa, u b’mod partikolari biex ma jkunx hemm evażjoni ta’ taxxa, id-Direttiva 95/60/KE tipprevedi sistema ta’ indikaturi komuni għall-identifikazzjoni taż-żjut tal-gass, li jinsab fil-kodiċi 2710 00 69 tan-Nomenklatura Magħquda (NM), u tal-pitrolju, li jinsab fil-kodiċi NM 2710 00 55, li nħarġu għall-konsum eżenti mid-dazju tas-sisa, jew suġġetti għal rata mnaqqsa tad-dazju tas-sisa. Il-kodiċi NM 2710 00 69 inqasam fil-kodiċijiet NM 2710 19 43, 2710 19 46, 2710 19 47, 2710 19 48, 2710 20 11, 2710 20 16 u 2710 20 19, sabiex jitqies il-kontenut tal-kubrit fiż-żejt tal-gass u l-preżenza tal-bijodiżil fiż-żejt tal-gass, filwaqt li l-kodiċi NM 2710 00 55 ġie traspost bħala l-kodiċi NM 2710 19 25 (2).

(2)

Id-Deċiżjoni ta’ Implimentazzjoni tal-Kummissjoni (UE) 2017/74 (3) ikkonfermat il-prodott identifikat bl-isem xjentifiku N-etil-N-[2-(1-isobjutossietossi)etil]-4-(fenilażo)anilina (Solvent Yellow 124), li kien ġie stabbilit bid-Deċiżjoni ta’ Implimentazzjoni tal-Kummissjoni 2011/544/UE (4), bħala indikatur fiskali komuni previst mid-Direttiva 95/60/KE, għall-immarkar ta’ żjut tal-gass u pitrolju li ma kellhomx dazju bir-rata sħiħa applikabbli għal tali prodotti tal-enerġija użati bħala propellant.

(3)

L-Artikolu 2 tad-Deċiżjoni ta’ Implimentazzjoni (UE) 2017/74 jirrikjedi li dik id-Deċiżjoni ta’ Implimentazzjoni tiġi rieżaminata sa mhux aktar tard mill-31 ta’ Diċembru 2021, fid-dawl tal-iżviluppi tekniċi fil-qasam tas-sistemi ta’ mmarkar u l-ħtieġa li jiġi miġġieled l-użu frodulenti ta’ prodotti tal-enerġija eżentati mid-dazju tas-sisa, jew soġġetti għal rata mnaqqsa tad-dazju tas-sisa.

(4)

Bħala parti mill-proċess ta’ reviżjoni, fl-2015 il-Kummissjoni nediet sejħa għall-espressjonijiet ta’ interess biex jitressqu l-prodotti addattati biex jintużaw bħala indikatur fiskali għaż-żjut tal-gass u għall-pitrolju (5). Il-Kummissjoni riedet tidentifika sustanza bħala indikatur li tkun taħdem aħjar fir-rigward ta’ sett ta’ kriterji predefiniti, meta mqabbla mas-sustanza li qed tintuża fil-preżent. Għall-indikaturi kandidati kollha, il-Kummissjoni talbet u rċeviet, mill-fornituri, il-prezz massimu tal-bejgħ għall-indikaturi u l-metodi ta’ indiċjar annwali tagħhom.

(5)

L-indikaturi kandidati proposti mill-fornituri ġew investigati bir-reqqa minn perspettiva teknika bl-għajnuna taċ-Ċentru Konġunt tar-Riċerka biex tiġi vverifikata r-reżiljenza tagħhom għat-tekniki ta’ tneħħija illegali l-aktar komuni. L-analiżi (6) identifikat il-prodott bl-isem kummerċjali ACCUTRACE™PLUS li fih il-butossibenżen bħala l-indikatur preferut.

(6)

F’rieżami tad-Direttiva 95/60/KE fl-2019 (7), l-evalwazzjoni tal-Kummissjoni kkonfermat l-utilità ta’ regoli komuni għall-immarkar ta’ fjuwils li huma soġġetti għal rati mnaqqsa tad-dazju tas-sisa iżda identifikat in-nuqqasijiet ta’ Solvent Yellow 124 f’termini tan-nuqqas ta’ reżiljenza tiegħu għal metodi komuni ta’ tneħħija. L-evalwazzjoni kkonfermat il-ħtieġa li Solvent Yellow 124 jiġi sostitwit b’indikatur aktar robust li ma jistax jitneħħa.

(7)

Dawn is-sejbiet ġew ikkorroborati mill-Grupp ta’ Ħidma dwar il-Kooperazzjoni Doganali tal-Kunsill (8) li sab li l-frodi tal-fjuwil irriżulta wkoll fi tniġġis ambjentali serju minħabba l-użu ta’ sustanzi kimiċi bħall-aċtu sulfuriku, l-aċtu kloriku u t-trab tal-ibbliċjar u r-rimi illegali ta’ prodotti ta’ skart u ta’ ħama taż-żejt fin-natura, fl-art agrikola jew fit-toroq pubbliċi.

(8)

Konsegwentement, jenħtieġ li ACCUTRACE™ PLUS jiġi stabbilit minflok Solvent Yellow 124 bħala l-indikatur fiskali komuni skont it-tifsira tad-Direttiva 95/60/KE soġġett għall-kundizzjonijiet stabbiliti f’dik id-Direttiva. Il-livell tal-immarkar għandu jiġi stabbilit f’firxa armonizzata biex jiġu ffaċilitati l-implimentazzjoni u l-kontroll tal-konformità madwar l-Unjoni.

(9)

Fl-interess ta’ implimentazzjoni bla xkiel tal-indikatur il-ġdid, u biex l-Istati Membri jkunu jistgħu jeżawrixxu l-ħażniet eżistenti tal-indikatur attwali Solvent Yellow 124, jenħtieġ li jitħalla perjodu tranżitorju ta’ 24-il xahar. Matul dan il-perjodu tranżizzjonali l-Istati Membri għandhom jitħallew jużaw jew Solvent Yellow 124 jew ACCUTRACE™ PLUS bħala l-indikatur fiskali komuni skont it-tifsira tad-Direttiva 95/60/KE.

(10)

Id-disponibbiltà ta’ ACCUTRACE™ PLUS, minkejja li hija koperta minn privattiva fl-Unjoni, jenħtieġ li tiġi żgurata, fejn xieraq, permezz ta’ ftehimiet ta’ liċenzjar.

(11)

Din id-Deċiżjoni ma tħoll lill-ebda impriża mill-obbligi tagħha skont l-Artikolu 102 tat-Trattat dwar il-Funzjonament tal-Unjoni Ewropea.

(12)

L-opportunitajiet li joffru żviluppi futuri fix-xjenza jenħtieġ li jitqiesu billi jiġi stabbilit limitu ta’ żmien għar-reviżjoni ta’ din id-Deċiżjoni.

(13)

Jenħtieġ li jsir rieżami ta’ din id-Deċiżjoni fi kwalunkwe ħin qabel dan il-limitu ta’ żmien jekk ACCUTRACE™ PLUS jinstab li jwassal għal evażjoni tat-taxxa jew li jikkawża ħsara lis-saħħa jew lill-ambjent.

(14)

Għaldaqstant, jenħtieġ li titħassar id-Deċiżjoni ta’ Implimentazzjoni (UE) 2017/74.

(15)

Il-miżuri previsti f’din id-Deċiżjoni huma skont l-opinjoni tal-Kumitat dwar id-Dazju tas-Sisa,