Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32021R2195

    Regolament ta’ Implimentazzjoni tal-Kunsill (UE) 2021/2195 tat-13 ta’ Diċembru 2021 li jimplimenta r-Regolament (UE) 2020/1998 dwar miżuri restrittivi kontra ksur u abbużi serji tad-drittijiet tal-bniedem

    ST/14538/2021/INIT

    ĠU L 445I, 13.12.2021, p. 10–13 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/reg_impl/2021/2195/oj

    13.12.2021   

    MT

    Il-Ġurnal Uffiċjali tal-Unjoni Ewropea

    LI 445/10

    REGOLAMENT TA’ IMPLIMENTAZZJONI TAL-KUNSILL (UE) 2021/2195

    tat-13 ta’ Diċembru 2021

    li jimplimenta r-Regolament (UE) 2020/1998 dwar miżuri restrittivi kontra ksur u abbużi serji tad-drittijiet tal-bniedem

    IL-KUNSILL TAL-UNJONI EWROPEA,

    Wara li kkunsidra t-Trattat dwar il-Funzjonament tal-Unjoni Ewropea,

    Wara li kkunsidra li r-Regolament tal-Kunsill (UE) 2020/1998 tas-7 ta’ Diċembru 2020 dwar miżuri restrittivi kontra ksur u abbużi serji tad-drittijiet tal-bniedem (1), u b’mod partikolari l-Artikolu 14(1) tiegħu,

    Wara li kkunsidra l-proposta mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà,

    Billi:

    (1)

    Fis-7 ta’ Diċembru 2020, il-Kunsill adotta r-Regolament (UE) 2020/1998.

    (2)

    Fit-8 ta’ Diċembru 2020, f’Dikjarazzjoni mir-Rappreżentant Għoli f’isem l-Unjoni Ewropea dwar ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem, l-Unjoni u l-Istati Membri tagħha affermaw mill-ġdid l-impenn qawwi tagħhom lejn il-promozzjoni u l-ħarsien tad-drittijiet tal-bniedem madwar id-dinja. Ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem jenfasizza d-determinazzjoni tal-Unjoni li ssaħħaħ ir-rwol tagħha fl-indirizzar ta’ ksur u abbużi serji tad-drittijiet tal-bniedem madwar id-dinja. Il-kisba tat-tgawdija effettiva tad-drittijiet tal-bniedem minn kulħadd hija għan strateġiku tal-Unjoni. Ir-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem huma valuri fundamentali tal-Unjoni u tal-Politika Estera u ta’ Sigurtà Komuni tagħha.

    (3)

    Fit-2 ta’ Marzu 2021, il-Kunsill adotta d-Deċiżjoni (PESK) 2021/372 (2) u r-Regolament ta’ Implimentazzjoni (UE) 2021/371 (3), li ddeżinjaw erba’ individwi Russi involuti fi ksur serju tad-drittijiet tal-bniedem fir-Russja, inkluż arresti u detenzjonijiet arbitrarji, kif ukoll repressjoni mifruxa u sistematika tal-libertà ta’ għaqda paċifika u ta’ assoċjazzjoni, u tal-libertà ta’ opinjoni u espressjoni.

    (4)

    Fit-22 ta’ Marzu 2021, il-Kunsill adotta d-Deċiżjoni (PESK) 2021/481 (4) u r-Regolament ta’ Implimentazzjoni (UE) 2021/478 (5), li ddeżinjaw 11-il individwu u erba’ entitajiet involuti fi ksur serju tad-drittijiet tal-bniedem fiċ-Ċina, fir-Repubblika Demokratika tal-Poplu tal-Korea (RDPK), fil-Libja, fl-Eritrea, fis-Sudan t’Isfel u fir-Russja, inkluż tortura, qtil extraġudizzjarju, għajbien sfurzat jew l-użu sistematiku ta’ xogħol furzat.

    (5)

    L-Unjoni tibqa’ mħassba ħafna dwar ksur u abbużi serji tad-drittijiet tal-bniedem f’diversi partijiet tad-dinja, bħat-tortura u trattament jew pieni krudili, inumana jew degradanti oħra, eżekuzzjonijiet u qtil extraġudizzjarji, sommarji jew arbitrarji, imwettqa fl-Ukranja, fis-Sirja, fil-Libja, fir-Repubblika Ċentru-Afrikana (RĊA), fis-Sudan u fil-Mozambique mill-Grupp Wagner, entità militari privata mhux inkorporata bbażata fir-Russja.

    (6)

    B’kont meħud tad-dimensjoni internazzjonali u l-gravità tal-attivitajiet tal-Grupp Wagner, kif ukoll l-impatt destabbilizzanti tagħha f’dawk il-pajjiżi, l-Unjoni tqis li l-azzjonijiet tal-Grupp Wagner jimminaw l-objettivi tal-politika estera u ta’ sigurtà komuni kif stabbiliti fl-Artikolu 21 TUE, b’mod partikolari l-objettiv li jiġu kkonsolidati u appoġġati d-demokrazija, l-istat tad-dritt, id-drittijiet tal-bniedem u l-prinċipji tad-dritt internazzjonali f’konformità mal-punt (b) tal-Artikolu 21(2) TUE.

    (7)

    F’dan il-kuntest, jenħtieġ li tliet persuni u entità waħda jiġu inklużi fil-lista ta’ persuni fiżiċi u ġuridiċi, entitajiet u korpi soġġetti għall-miżuri restrittivi li tinsab fl-Anness I għar-Regolament (UE) 2020/1998.

    (8)

    Anness I għar-Regolament (UE) 2020/1998 għalhekk jenħtieġ li jiġi emendat skont dan,

    ADOTTA DAN IR-REGOLAMENT:

    Artikolu 1

    L-Anness I għar-Regolament (UE) 2020/1998 huwa emendat kif indikat fl-Anness għal dan ir-Regolament.

    Artikolu 2

    Dan ir-Regolament għandu jidħol fis-seħħ fid-data tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

    Dan ir-Regolament għandu jorbot fl-intier tiegħu u japplika direttament fl-Istati Membri kollha.

    Magħmul fi Brussell, it-13 ta’ Diċembru 2021.

    Għall-Kunsill

    Il-President

    J. BORRELL FONTELLES

    (1)  ĠU L 410 I, 7.12.2020, p. 1.

    (2)  Id-Deċiżjoni tal-Kunsill (PESK) 2021/372 tat-2 ta’ Marzu 2021 li temenda d-Deċiżjoni (PESK) 2020/1999 li tikkonċerna miżuri restrittivi kontra l-ksur u l-abbużi serji tad-drittijiet tal-bniedem (ĠU L 71 I, 2.3.2021, p. 6).

    (3)  Ir-Regolament ta’ Implimentazzjoni tal-Kunsill (UE) 2021/371 tat-2 ta’ Marzu 2021 li jimplimenta r-Regolament (UE) 2020/1998 dwar miżuri restrittivi kontra ksur u abbużi serji tad-drittijiet tal-bniedem (ĠU L 71 I, 2.3.2021, p. 1).

    (4)  Id-Deċiżjoni tal-Kunsill (PESK) 2021/481 tat-22 ta’ Marzu 2021 li temenda d-Deċiżjoni (PESK) 2020/1999 li tikkonċerna miżuri restrittivi kontra l-ksur u l-abbużi serji tad-drittijiet tal-bniedem (ĠU L 99 I, 22.3.2021, p. 25).

    (5)  Ir-Regolament ta’ Implimentazzjoni tal-Kunsill (UE) 2021/478 tat-22 ta’ Marzu 2021 li jimplimenta r-Regolament (UE) 2020/1998 dwar miżuri restrittivi kontra ksur u abbużi serji tad-drittijiet tal-bniedem (ĠU L 99 I, 22.3.2021, p. 1).

    ANNESS

    1.   

    L-entrati li ġejjin jiżdiedu mal-lista ta’ persuni fiżiċi li tinsab fit-taqsima A (“Persuni fiżiċi”) fl-Anness I għar-Regolament (UE) 2020/1998:

     

    Ismijiet

    (Trażlitterazzjoni bl-alfabett Latin)

    Ismijiet

    Informazzjoni ta’ identifikazzjoni

    Raġunijiet għall-elenkar

    Data tal-elenkar

    “16.

    Dimitriy (Dimitry, Dmitri, Dmitry) Valerievich UTKIN

    Дмитрий Валерьевич Уткин

    (Ortografija Russa)

    Pożizzjoni(jiet): Fundatur u kmandant tal-Grupp Wagner

    Grad: Logutenent Kurunell (riżerva)

    Sinjal tas-sejħa: Vagner, Wagner

    ID tal-Grupp Wagner: M-0209

    Data tat-twelid: 1.6.1970 jew 11.6.1970

    Post tat-twelid: Asbest, Sverdlovsk Oblast, SFSR Russa (issa l-Federazzjoni Russa)

    Nazzjonalità: Russa

    Indirizz: Pskov, il-Federazzjoni Russa

    Ġeneru: raġel

    Dimitriy Utkin, eks-uffiċjal tal-intelligence militari Russa (GRU), huwa l-fundatur tal-Grupp Wagner u huwa responsabbli għall-koordinazzjoni u l-ippjanar tal-operazzjonijiet għall-iskjerament tal-merċenarji tal-Grupp Wagner f’diversi pajjiżi.

    Fil-pożizzjoni tiegħu ta’ kmand fi ħdan il-Grupp Wagner, huwa responsabbli għal abbużi serji tad-drittijiet tal-bniedem imwettqa mill-grupp, li jinkludu tortura u eżekuzzjonijiet u qtil extraġudizzjarji, sommarji jew arbitrarji.

    Dan jinkludi t-tortura sal-mewt ta’ diżertur Sirjan minn erba’ membri tal-Grupp Wagner f’Ġunju 2017 fil-provinċja ta’ Homs, is-Sirja. Skont eks-membru tal-Grupp Wagner, Dimitriy Utkin personalment ordna t-tortura sal-mewt tad-diżertur kif ukoll l-iffilmjar tal-att.

    13.12.2021

    17.

    Stanislav Evgenievitch DYCHKO

    Станислав Евгеньевич Дl-mudell чко

    (Ortografija Russa)

    Pożizzjoni(jiet): Merċenarju tal-Grupp Wagner

    Data tat-twelid: 1990

    Nazzjonalità: Russa

    Ġeneru: raġel

    Stanislav Dychko, eks-impjegat tal-pulizija ta’ Stavropol, huwa merċenarju tal-Grupp Wagner.

    Flimkien ma’ tlett merċenarji oħra tal-Grupp Wagner, huwa ħa sehem fit-tortura sal-mewt ta’ diżertur Sirjan f’Ġunju 2017 fil-provinċja ta’ Homs, is-Sirja.

    Għalhekk huwa responsabbli għal abbużi serji tad-drittijiet tal-bniedem fis-Sirja.

    13.12.2021

    18.

    Valery (Valeriy) Nikolaevich ZAKHAROV

    Валерий Николаевич Захаров

    (Ortografija Russa)

    Pożizzjoni(jiet): Konsulent tas-sigurtà għall-President tar-Repubblika Ċentru-Afrikana (RĊA)

    ID tal-Grupp Wagner: M-5658

    Data tat-twelid: 12.1.1970

    Post tat-twelid: Leningrad, SFSR Russa (issa l-Federazzjoni Russa)

    Nazzjonalità: Russa

    Ġeneru: raġel

    Valery Zakharov, eks-membru tas-servizzi tas-sigurtà tal-istat Russu (FSB), huwa l-konsulent tas-sigurtà tal-President tar-Repubblika Ċentru-Afrikana (RĊA). Huwa figura ewlenija fl-istruttura ta’ kmand tal-Grupp Wagner u għandu rabtiet mill-qrib mal-awtoritajiet Russi.

    Minħabba l-pożizzjoni influwenti tiegħu fir-RĊA u r-rwol ta’ tmexxija tiegħu fil-grupp Wagner, huwa responsabbli għal abbużi serji tad-drittijiet tal-bniedem imwettqa mill-Grupp Wagner fir-RĊA, li jinkludu eżekuzzjonijiet u qtil extraġudizzjarji, sommarji jew arbitrarji.

    Dan jinkludi l-qtil ta’ tliet ġurnalisti Russi fl-2018, li s-sigurtà tagħhom kienet taħt ir-responsabbiltà ta’ Valery Zakharov.

    13.12.2021’

    2.   

    L-entrata li ġejja tiżdied mal-lista ta’ persuni ġuridiċi, entitajiet u korpi li tinsab fit-taqsima B (“Persuni ġuridiċi, entitajiet u korpi”) fl-Anness I għar-Regolament (UE) 2020/1998:

     

    Ismijiet

    (Trażlitterazzjoni bl-alfabett Latin)

    Ismijiet

    Informazzjoni ta’ identifikazzjoni

    Raġunijiet għall-elenkar

    Data tal-elenkar

    “5.

    Grupp Wagner magħruf ukoll bħala Grupp Vagner

    Група Вагнера

    (Ortografija Russa)

     

    Il-Grupp Wagner huwa entità militari privata mhux inkorporata bbażata fir-Russja, li ġiet stabbilita fl-2014 bħala organizzazzjoni suċċessur tal-Korp Slavoniku. Huwa mmexxi minn Dimitri Utkin u ffinanzjat minn Yevgeny Prigozhin. Permezz tal-istabbiliment ta’ entitajiet lokali, u bl-appoġġ tal-gvernijiet lokali, il-Grupp Wagner jiffinanzja u jwettaq l-operazzjonijiet tiegħu.

    Il-Grupp Wagner huwa responsabbli għal abbużi serji tad-drittijiet tal-bniedem fl-Ukrajna, is-Sirja, il-Libja, ir-Repubblika Ċentru-Afrikana (RĊA), is-Sudan u l-Mozambique, li jinkludu tortura u eżekuzzjonijiet u qtil extraġudizzjarji, sommarji jew arbitrarji.

    13.12.2021”
    Top