(1)

Skont l-Artikolu 15(1) tar-Regolament ta’ Implimentazzjoni tal-Kummissjoni (UE) Nru 543/2011 (2), il-Kummissjoni tista’, fuq talba ta’ pajjiż terz, tapprova l-verifiki tal-konformità mal-istandards tal-kummerċjalizzazzjoni mwettqa minn dak il-pajjiż terz qabel ma ssir l-importazzjoni fl-Unjoni.

(2)

Wara l-ħruġ tar-Renju Unit mill-Unjoni fl-1 ta’ Frar 2020 u fid-dawl ta’ tmiem il-perjodu ta’ tranżizzjoni previst fil-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (Ftehim dwar il-Ħruġ) fil-31 ta’ Diċembru 2020, ir-Renju Unit kien bagħat talba lill-Kummissjoni biex jiġu approvati verifiki tal-konformità mal-istandards speċifiċi tal-kummerċjalizzazzjoni mwettqa mir-Renju Unit qabel ma ssir l-importazzjoni fl-Unjoni. B’mod partikolari, ir-Renju Unit kien intrabat li jikkonforma mar-rekwiżiti stabbiliti għall-kummerċjalizzazzjoni tal-frott u l-ħaxix wara tmiem il-perjodu ta’ tranżizzjoni u kien indika l-awtorità uffiċjali u l-entitajiet ta’ spezzjoni msemmija fit-tieni subparagrafu tal-Artikolu 15(2) tar-Regolament ta’ Implimentazzjoni (UE) Nru 543/2011.

(3)

Abbażi ta’ dan, ir-Regolament ta’ Implimentazzjoni tal-Kummissjoni (UE) 2020/2102 (3) approva l-kontrolli tal-konformità mal-istandards tal-kummerċjalizzazzjoni għall-frott u l-ħaxix imwettqa mir-Renju Unit, speċifika l-awtorità uffiċjali li taħt ir-responsabbiltà tagħha jitwettqu dawk il-kontrolli, kif ukoll il-korpi ta’ spezzjoni inkarigati mill-kontrolli xierqa fil-Gran Brittanja u elenkaw lir-Renju Unit fl-Anness IV tar-Regolament ta’ Implimentazzjoni (UE) Nru 543/2011 permezz ta’ nota f’qiegħ il-paġna.

(4)

Għalkemm f’konformità mal-Artikoli 6(3) u 7(1) tal-Ftehim dwar il-Ħruġ u mal-Artikoli 5(4) u 13(1) tal-Protokoll dwar l-Irlanda/l-Irlanda ta’ Fuq għal dak il-Ftehim flimkien mal-Anness 2 ta’ dak il-Protokoll, ir-Regolament ta’ Implimentazzjoni (UE) Nru 543/2011 japplika għar-Renju Unit u fir-Renju Unit fir-rigward tal-Irlanda ta’ Fuq, l-ewwel subparagrafu tal-Artikolu 7(3) ta’ dak il-Protokoll jipprevedi li fir-rigward tar-rikonoxximent fi Stat Membru wieħed ta’ regolamenti tekniċi, valutazzjonijiet, reġistrazzjonijiet, ċertifikati, approvazzjonijiet u awtorizzazzjonijiet maħruġa jew imwettqa mill-awtoritajiet ta’ Stat Membru ieħor, jew minn korp stabbilit fi Stat Membru ieħor, ir-referenzi għall-Istati Membri fid-dispożizzjonijiet tad-dritt tal-Unjoni applikabbli permezz ta’ dak il-Protokoll għandhom jinqraw li jkunu jinkludu lir-Renju Unit fir-rigward tal-Irlanda ta’ Fuq għal dak li jirrigwarda r-regolamenti tekniċi, l-valutazzjonijiet, ir-reġistrazzjonijiet, iċ-ċertifikati, l-approvazzjonijiet u l-awtorizzazzjonijiet maħruġa jew imwettqa mill-awtoritajiet tar-Renju Unit jew minn korpi stabbiliti fir-Renju Unit. Konsegwentement, il-kontrolli tal-konformità mal-istandards tal-kummerċjalizzazzjoni mwettqa mill-korp ta’ spezzjoni għall-Irlanda ta’ Fuq jenħtieġ li jitqiesu bħala mwettqa minn pajjiż terz, mingħajr preġudizzju għar-raba’ subparagrafu tal-Artikolu 7(3) ta’ dak il-Protokoll.

(5)

Għaldaqstant, il-Kummissjoni jenħtieġ li tispeċifika wkoll il-korp ta’ spezzjoni inkarigat mill-kontrolli xierqa għall-Irlanda ta’ Fuq, kif innotifikat mir-Renju Unit fit-9 ta’ April 2020, u tikkjarifika d-dħul tar-Renju Unit fl-Anness IV tar-Regolament ta’ Implimentazzjoni (UE) Nru 543/2011.

(6)

Għalhekk jenħtieġ li r-Regolament ta’ Implimentazzjoni (UE) Nru 543/2011 jiġi emendat skont dan.

(7)

Fl-interess taċ-ċarezza u tat-trasparenza, jenħtieġ li r-Regolament ta’ Implimentazzjoni (UE) 2020/2102.

(8)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,