Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32021R0866

Regolament ta’ Implimentazzjoni tal-Kummissjoni (UE) 2021/866 tat-28 ta’ Mejju 2021 li jissospendi ċerti miżuri ta’ politika kummerċjali rigward ċerti prodotti li joriġinaw mill-Istati Uniti tal-Amerka imposti bir-Regolament ta’ Implimentazzjoni (UE) 2018/886

C/2021/3943

ĠU L 190, 31.5.2021, p. 94–95 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/reg_impl/2021/866/oj

31.5.2021   

MT

Il-Ġurnal Uffiċjali tal-Unjoni Ewropea

L 190/94

REGOLAMENT TA’ IMPLIMENTAZZJONI TAL-KUMMISSJONI (UE) 2021/866

tat-28 ta’ Mejju 2021

li jissospendi ċerti miżuri ta’ politika kummerċjali rigward ċerti prodotti li joriġinaw mill-Istati Uniti tal-Amerka imposti bir-Regolament ta’ Implimentazzjoni (UE) 2018/886

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 654/2014 tal-Parlament Ewropew u tal-Kunsill tal-15 ta’ Mejju 2014 dwar l-eżerċizzju tad-drittijiet tal-Unjoni għall-applikazzjoni u l-infurzar ta’ regoli kummerċjali internazzjonali u li jemenda r-Regolament tal-Kunsill (KE) Nru 3286/94 li jistabbilixxi l-proċeduri tal-Komunità fil-qasam ta’ politika kummerċjali komuni sabiex jiżgura l-eżerċizzju tad-drittijiet tal-Komunità skont ir-regoli internazzjonali tal-kummerċ, b’mod partikolari dawk stabbiliti taħt l-awspiċji tal-Organizzazzjoni Dinjija tal-Kummerċ (1), u b’mod partikolari l-paragrafi 3 u 4 tal-Artikolu 7 tiegħu,

Billi:

(1)

Fl-20 ta’ Ġunju 2018, il-Kummissjoni adottat ir-Regolament ta’ Implimentazzjoni (UE) 2018/886 (2) dwar miżuri ta’ politika kummerċjali rigward ċerti prodotti li joriġinaw mill-Istati Uniti tal-Amerka (l-Istati Uniti) li jipprevedi l-applikazzjoni ta’ dazji doganali addizzjonali fuq l-importazzjonijiet fl-Unjoni ta’ għadd ta’ prodotti li joriġinaw mill-Istati Uniti.

(2)

B’mod partikolari, il-Kummissjoni, f’isem l-Unjoni, imponiet dazji doganali addizzjonali fuq il-prodotti elenkati fl-Anness I u fl-Anness II tar-Regolament ta’ Implimentazzjoni (UE) 2018/886, sabiex:

(a)

id-dazji ad valorem addizzjonali ta’ rata ta’ 10 % u 25 % fuq importazzjonijiet tal-prodotti elenkati fl-Anness I, kif speċifikat hemmhekk, daħlu fis-seħħ fil-21 ta’ Ġunju 2018 u kienu se jibqgħu japplikaw sakemm l-Istati Uniti jieqfu japplikaw il-miżuri ta’ salvagwardja tagħhom fuq prodotti mill-Unjoni;

(b)

id-dazji ad valorem addizzjonali ta’ rata ta’ 10 %, 25 %, 35 % u 50 % fuq l-importazzjonijiet tal-prodotti elenkati fl-Anness II, kif speċifikat hemmhekk, kienu jibdew japplikaw mill-1 ta’ Ġunju 2021 jew malli sseħħ l-adozzjoni ta’ deċiżjoni mill-Korp għas-Soluzzjoni tat-Tilwim tad-WTO li l-miżuri ta’ salvagwardja tal-Istati Uniti huma inkonsistenti mad-dispożizzjonijiet rilevanti tal-Ftehim tad-WTO, jew malli jkun innotifikat biha, jekk dan iseħħ qabel, sakemm l-Istati Uniti jieqfu japplikaw il-miżuri ta’ salvagwardja tagħhom għall-Unjoni.

(3)

Wara l-adozzjoni tar-Regolament ta’ Implimentazzjoni (UE) 2018/724 (3), il-Kummissjoni, f’isem l-Unjoni, issospendiet, fid-WTO, l-applikazzjoni tal-konċessjonijiet tad-dazju tal-importazzjoni għall-kummerċ mal-Istati Uniti skont il-GATT tal-1994 fir-rigward tal-prodotti inklużi fl-Anness I u l-Anness II għar-Regolament ta’ Implimentazzjoni (UE) 2018/724. Tali pass ippermetta l-applikazzjoni ta’ dazji doganali addizzjonali fuq l-importazzjoni ta’ prodotti li joriġinaw fl-Istati Uniti kif elenkati fl-Anness I u l-Anness II tar-Regolament ta’ Implimentazzjoni (UE) 2018/886.

(4)

Il-premessa 7 tar-Regolament ta’ Implimentazzjoni (UE) 2018/886 tipprevedi li l-Kummissjoni, f’isem l-Unjoni, tista’ temenda dak ir-Regolament, jekk tqisu xieraq, biex tieħu kont ta’ kwalunkwe modifika jew emenda tal-miżuri ta’ salvagwardja tal-Istati Uniti.

(5)

Fis-17 ta’ Mejju 2021, l-Unjoni u l-Istati Uniti ppubblikaw Dikjarazzjoni Konġunta li fiha t-tnejn “qablu li jħejju rotta li ttemm it-tilwimiet fid-WTO wara l-applikazzjoni mill-Istati Uniti ta’ tariffi fuq l-importazzjonijiet mill-UE skont it-taqsima 232”. F’dan il-kuntest, jenħtieġ li l-Unjoni tissospendi l-applikazzjoni tad-dazji ad valorem addizzjonali fuq il-prodotti elenkati fl-Anness II tar-Regolament ta’ Implimentazzjoni (UE) 2018/886 bħala pass importanti lejn l-eliminazzjoni reċiproka ta’ miżuri restrittivi u bl-għan li tipprovdi ż-żmien u l-kundizzjonijiet meħtieġa biex il-kwistjoni tiġi solvuta politikament.

(6)

Jenħtieġ li l-perjodu tas-sospensjoni jdum sat-30 ta’ Novembru 2021, li huwa meqjus bħala perjodu suffiċjenti għall-finijiet imsemmija fil-premessa preċedenti.

(7)

F’konformità mal-Artikolu 7(4) tar-Regolament (UE) Nru 654/2014, il-Kummissjoni tista’ tadotta minnufih atti ta’ implimentazzjoni applikabbli li jissospendu miżuri ta’ politika kummerċjali għal raġunijiet ta’ urġenza, meta din is-sospensjoni tkun relatata mal-modifika tal-miżura kkonċernata tal-pajjiż terz. L-applikazzjoni immedjata ta’ dan ir-Regolament hija ġġustifikata fid-dawl tal-objettiv li jiġu pprovduti ż-żmien u l-kundizzjonijiet meħtieġa biex tissolva l-kwistjoni, kif iddikjarat fil-premessa (5), u għal dak il-għan huwa neċessarju li tiġi sospiża l-applikazzjoni imminenti tal-Anness II, sabiex id-dazji ad valorem addizzjonali fuq il-prodotti elenkati fl-Anness II ma japplikawx matul il-perjodu meħtieġ biex jintlaħqu l-objettivi inkwistjoni.

(8)

Dan ir-Regolament ma jaffettwax is-sospensjoni, fid-WTO, tal-applikazzjoni tal-konċessjonijiet tad-dazju tal-importazzjoni għall-kummerċ mal-Istati Uniti skont il-GATT tal-1994 fir-rigward taż-żewġ prodotti inklużi fl-Anness I u l-Anness II tar-Regolament ta’ Implimentazzjoni tal-Kummissjoni (UE) 2018/724, kif immodifikat permezz tar-Regolament ta’ Implimentazzjoni (UE) 2018/886. Din is-sospensjoni tal-obbligi tad-WTO tibqa’ applikabbli, filwaqt li dan ir-Regolament jissospendi l-applikazzjoni tad-dazji addizzjonali tal-importazzjoni.

(9)

F’konformità mal-Artikolu 8 tar-Regolament (UE) Nru 182/2011 tal-Parlament Ewropew u tal-Kunsill (4), mhux aktar tard minn 14-il jum wara l-adozzjoni tiegħu, il-Kummissjoni se tissottometti dan ir-Regolament lill-Kumitat dwar l-Ostakoli għall-Kummerċ, stabbilit bir-Regolament (UE) 2015/1843 tal-Parlament Ewropew u tal-Kunsill (5), għall-opinjoni tiegħu,

ADOTTAT DAN IR-REGOLAMENT:

Artikolu 1

L-UE tissospendi l-applikazzjoni ta’ dazji ad valorem addizzjonali bir-rata ta’ 10 %, 25 %, 35 % u 50 % fuq l-importazzjonijiet tal-prodotti elenkati fl-Anness II tar-Regolament ta’ Implimentazzjoni (UE) 2018/886 li tkopri l-perjodu sat-30 ta’ Novembru 2021 (inkluż).

Għaldaqstant, id-dazji previsti fl-Anness II tar-Regolament ta’ Implimentazzjoni (UE) 2018/886 għandhom japplikaw b’effett mill-1 ta’ Diċembru 2021 (inkluż).

Artikolu 2

Dan ir-Regolament għandu jidħol fis-seħħ fil-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-28 ta’ Mejju 2021.

Għall-Kummissjoni

Il-President

Ursula VON DER LEYEN

(1)  ĠU L 189, 27.6.2014, p. 50; emendat bir-Regolament (UE) 2015/1843 u bir-Regolament (UE) 2021/167 tal-Parlament Ewropew u tal-Kunsill (ĠU L 49, 12.2.2021, p. 1).

(2)  Ir-Regolament ta’ Implimentazzjoni tal-Kummissjoni (UE) 2018/886 tal-20 ta’ Ġunju 2018 dwar ċerti miżuri ta’ politika kummerċjali rigward ċerti prodotti li joriġinaw mill-Istati Uniti tal-Amerka u li jemenda r-Regolament ta’ Implimentazzjoni (UE) 2018/724 (ĠU L 158, 21.6.2018, p. 5)

(3)  Ir-Regolament ta’ Implimentazzjoni tal-Kummissjoni (UE) 2018/724 tas-16 ta’ Mejju 2018 dwar ċerti miżuri ta’ politika kummerċjali li jikkonċernaw ċerti prodotti li joriġinaw fl-Istati Uniti tal-Amerka (ĠU L 122, 17.5.2018, p. 14).

(4)  Ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13).

(5)  Ir-Regolament (UE) 2015/1843 tal-Parlament Ewropew u tal-Kunsill tas-6 ta’ Ottubru 2015 li jistabbilixxi l-proċeduri tal-Unjoni fil-qasam tal-politika kummerċjali komuni sabiex jiżgura l-eżerċizzju tad-drittijiet tal-Unjoni skont ir-regoli internazzjonali tal-kummerċ, b’mod partikolari dawk stabbiliti taħt l-awspiċji tal-Organizzazzjoni Dinjija tal-Kummerċ (kodifikazzjoni) (ĠU L 272, 16.10.2015, p. 1).

Top