(1)

Ir-Regolament (UE) 2020/1042 jistabbilixxi miżuri temporanji fir-rigward tal-inizjattiva taċ-ċittadini Ewropej biex jiġu indirizzati l-isfidi li l-organizzaturi tal-inizjattivi taċ-ċittadini, l-amministrazzjonijiet nazzjonali u l-istituzzjonijiet tal-Unjoni ffaċċjaw wara li l-Organizzazzjoni Dinjija tas-Saħħa ħabbret f’Marzu 2020 li t-tifqigħa tal-COVID-19 kienet saret pandemija dinjija. Fix-xhur ta’ wara din id-dikjarazzjoni, l-Istati Membri adottaw miżuri restrittivi kontra l-kriżi tas-saħħa pubblika. B’riżultat ta’ dan, il-ħajja pubblika waqfet fi kważi l-Istati Membri kollha. Ir-Regolament (UE) 2020/1042 għalhekk estenda ċerti limiti ta’ żmien stabbiliti fir-Regolament (UE) 2019/788.

(2)

Ir-Regolament (UE) 2020/1042 jagħti s-setgħa lill-Kummissjoni biex testendi ulterjorment il-perjodi ta’ ġbir bi tliet xhur f’ċerti ċirkostanzi. Il-kundizzjonijiet għal kwalunkwe estensjoni ulterjuri huma simili għal dawk li wasslu għall-estensjoni inizjali wara t-tifqigħa tal-COVID-19 f’Marzu 2020, jiġifieri li mill-inqas kwart tal-Istati Membri jew għadd ta’ Stati Membri li jirrappreżentaw aktar minn 35 % tal-popolazzjoni tal-Unjoni japplikaw miżuri b’rispons għall-pandemija tal-COVID-19, li jxekklu b’mod sostanzjali l-abbiltà tal-organizzaturi li jiġbru dikjarazzjonijiet ta’ appoġġ f’forma miktuba u li jinfurmaw lill-pubbliku dwar l-inizjattivi li għaddejjin tagħhom.

(3)

Mill-adozzjoni tar-Regolament (UE) 2020/1042 f’Lulju 2020, il-Kummissjoni ilha tissorvelja mill-qrib is-sitwazzjoni fl-Istati Membri.

(4)

Fis-17 ta’ Diċembru 2020 (3), kif ukoll fid-19 ta’ Frar 2021 (4), il-Kummissjoni tat estensjonijiet oħra ta’ tliet xhur għal inizjattivi li kienu fil-proċess li jiġbru dikjarazzjonijiet ta’ appoġġ, wara l-valutazzjoni tagħha li l-kundizzjonijiet għall-għoti ta’ tali estensjoni skont ir-Regolament (UE) 2020/1042 ġew issodisfati. Ingħataw estensjonijiet proporzjonati għal inizjattivi li bdew il-perjodu ta’ ġbir tagħhom matul il-perjodi ta’ estensjoni.

(5)

Mill-1 ta’ Frar 2021, is-sitwazzjoni pandemika kkawżata mill-COVID-19 f’diversi Stati Membri ma nbidlitx b’mod sinifikanti. Sal-aħħar ta’ April 2021, għadd sostanzjali ta’ Stati Membri kien għad kellhom fis-seħħ miżuri li jirrestrinġu ċ-ċirkolazzjoni libera taċ-ċittadini fit-territorju tagħhom sabiex iwaqqfu jew irażżnu t-trażmissjoni tal-COVID-19. Fid-19 ta’ April, seba’ Stati Membri rrappurtaw li kienu qed japplikaw miżuri nazzjonali ta’ konfinament, li jipprojbixxu jew jirrestrinġu b’mod sostanzjali l-libertà taċ-ċittadini li jduru liberament mat-territorju tagħhom, filwaqt li 12-il Stat Membru rrappurtaw li kienu qed japplikaw miżuri lokali ta’ konfinament. Dawk il-miżuri ta’ konfinament ġew ikkombinati ma’ miżuri addizzjonali b’effetti restrittivi simili fuq il-ħajja pubblika fit-territorju tagħhom jew mill-inqas partijiet sostanzjali minnu, inklużi restrizzjonijiet fuq l-aċċessibbiltà ta’ spazji pubbliċi, l-għeluq jew il-ftuħ limitat ta’ ħwienet, ristoranti u pubs, restrizzjonijiet severi fuq il-kapaċità ta’ laqgħat u laqgħat pubbliċi u privati u l-impożizzjoni ta’ curfews. Dawk il-miżuri meħuda flimkien jaffettwaw ukoll b’mod sostanzjali l-kapaċità tal-organizzaturi li jiġbru dikjarazzjonijiet ta’ appoġġ f’forma miktuba u li jinfurmaw lill-pubbliku dwar l-inizjattivi kontinwi tagħhom. Abbażi tal-informazzjoni disponibbli bħalissa, dawk il-miżuri, jew miżuri b’effett simili, x’aktarx li jibqgħu fis-seħħ għal perjodu ta’ mill-inqas tliet xhur.

(6)

L-Istati Membri kkonċernati jirrappreżentaw mill-inqas kwart tal-Istati Membri, u aktar minn 35 % tal-popolazzjoni tal-Unjoni.

(7)

Għal dawk ir-raġunijiet, jista’ jiġi konkluż li l-kundizzjonijiet għall-għoti ta’ estensjoni tal-perjodi ta’ ġbir huma ssodisfati fir-rigward ta’ ħames inizjattivi li għalihom il-perjodu ta’ ġbir kien għadu għaddej fl-1 ta’ Mejju 2021. Għalhekk, jenħtieġ li dawk il-perjodi ta’ ġbir jiġu estiżi bi tliet xhur.

(8)

Fid-19 ta’ Frar 2021, il-Kummissjoni tat estensjoni lil 14-il inizjattiva. Ma kienx possibbli għal disa’ inizjattivi li jibbenefikaw minn estensjoni ulterjuri, peress li kienu diġà bbenefikaw mill-estensjoni massima ta’ 12-il xahar.

(9)

Fil-każ ta’ inizjattivi li għalihom il-perjodu ta’ ġbir beda bejn l-1 ta’ Mejju 2021 u d-data tal-adozzjoni ta’ din id-Deċiżjoni, jenħtieġ li l-perjodu ta’ ġbir jiġi estiż sal-1 ta’ Awwissu 2022.