(1)

L-Artikolu 29(1) tad-Direttiva 96/23/KE jirrikjedi li l-pajjiżi terzi li minnhom l-Istati Membri huma awtorizzati jimportaw l-annimali u l-prodotti tal-annimali koperti minn dik id-Direttiva, jissottomettu l-pjanijiet ta’ monitoraġġ tar-residwi li jipprovdu l-garanziji meħtieġa (“il-pjanijiet”). Dawn il-garanziji jrid ikollhom effett mill-inqas ekwivalenti għal dawk previsti f’dik id-Direttiva u, b’mod partikolari, iridu jissodisfaw ir-rekwiżiti tal-Artikolu 4 ta’ dik id-Direttiva u jispeċifikaw id-dettalji stabbiliti fl-Artikolu 7 ta’ dik id-Direttiva u jissodisfaw ir-rekwiżiti tal-Artikolu 11(2) tad-Direttiva 96/22/KE. Jenħtieġ li l-pjanijiet ikopru mill-inqas il-gruppi tar-residwi u tas-sustanzi elenkati fl-Anness I tad-Direttiva 96/23.

(2)

Id-Deċiżjoni tal-Kummissjoni 2011/163/UE (2) tapprova l-pjanijiet sottomessi minn ċerti pajjiżi terzi dwar l-annimali u l-prodotti tal-annimali, li huma elenkati fl-Anness ta’ dik id-Deċiżjoni.

(3)

Il-budellat tal-annimali jista’ jkun fih residwi ta’ sustanzi farmakoloġikament attivi. Tali residwi nstabu fil-budellat importat lejn l-Unjoni u rrapportati fis-Sistema ta’ Twissija Rapida għall-Ikel u l-Għalf mill-2015 minn xi pajjiżi terzi u kienu jikkonċernaw sustanzi pprojbiti b’attività antimikrobika. Dawk ir-residwi jistgħu jkunu preżenti fil-budellat minħabba l-amministrazzjoni ta’ antimikrobiċi li jipprevjenu t-taħsir batteriku tagħhom. Għalhekk, jenħtieġ li l-Kummissjoni tiżgura s-sikurezza kimika tal-budellat billi teżiġi li l-budellat tal-annimali jidħol biss fl-Unjoni minn pajjiżi terzi elenkati fl-Anness tad-Deċiżjoni 2011/163/UE, li pprovdew il-garanziji meħtieġa għal din il-komodità fil-pjanijiet approvati tagħhom ta’ monitoraġġ tar-residwi. L-Artikolu 2(1) tad-Deċiżjoni 2011/163/UE jenħtieġ li jiġi emendat skont dan.

(4)

Il-pajjiżi terzi awtorizzati għad-dħul fl-Unjoni ta’ ċerti prodotti tal-laħam u stonkijiet, bżieżaq tal-awrina u intestini ttrattati għall-konsum mill-bniedem f’konformità mar-Regolament (UE) 2017/625 (3), huma elenkati fir-Regolament ta’ Implimentazzjoni tal-Kummissjoni (UE) 2021/404 (4). Il-pajjiżi terzi awtorizzati għad-dħul fl-Unjoni ta’ ċerti prodotti tal-laħam f’konformità mar-Regolament (UE) 2016/429 (5), huma elenkati fir-Regolament ta’ Implimentazzjoni tal-Kummissjoni (UE) 2021/405 (6).

(5)

Sabiex jiġi minimizzat it-tfixkil fil-kummerċ, il-pajjiżi terzi kollha li bħalissa huma awtorizzati għad-dħul fl-Unjoni ta’ prodotti tal-laħam fir-Regolamenti ta’ Implimentazzjoni (UE) 2021/404 u (UE) 2021/405 u li huma diġà elenkati fl-Anness tad-Deċiżjoni 2011/163/UE jenħtieġ li jiġu wkoll elenkati f’dak l-Anness għall-budellat tal-annimali, peress li diġà pprovdew biżżejjed garanziji relatati mas-sorveljanza tar-residwi. Barra minn hekk, fir-rigward tal-budellat, ir-riskju ma jirriżultax mit-trattament tal-annimali iżda mill-adulterazzjoni tal-prodott għall-prevenzjoni tat-taħsir batteriku.

(6)

Barra minn hekk, dawk il-pajjiżi terzi li lestew b’suċċess il-kwestjonarju relatat mas-saħħa tal-annimali u mas-saħħa pubblika bil-ħsieb li jiġi inkluż fir-Regolamenti ta’ Implimentazzjoni (UE) 2021/404 u (UE) 2021/405, jenħtieġ li jiġu elenkati wkoll għall-budellat fl-Anness tad-Deċiżjoni 2011/163/UE, dment li jkunu ppreżentaw pjan speċifiku ta’ monitoraġġ tar-residwi għall-budellat tal-annimali lill-Kummissjoni, u li dak il-pjan ikun ġie approvat mill-Kummissjoni.

(7)

wara l-evalwazzjoni sħiħa tal-pjanijiet ta’ monitoraġġ tar-residwi ppreżentati mill-pajjiżi terzi kollha li jesportaw il-budellat lejn l-Unjoni, u qabel it-tmiem tal-perjodu tranżitorju li jiskadi fl-20 ta’ Ottubru 2021, il-Kummissjoni se tistabbilixxi lista definittiva tal-pajjiżi li jikkonformaw mar-rekwiżiti tad-Direttiva 96/23/KE relatati man-nuqqas ta’ sustanzi pprojbiti b’attività antimikrobika fil-budellat.

(8)

Filwaqt li l-Awstralja ma għandha l-ebda pjan ta’ monitoraġġ tar-residwi approvat għall-bajd, hija pprovdiet il-garanziji li fil-prodotti komposti destinati għall-esportazzjoni lejn l-UE, jintuża biss il-bajd li joriġina minn Stati Membri jew minn pajjiżi terzi li huma approvati biex jesportaw tali prodotti lejn l-Unjoni. Għalhekk, jenħtieġ li mal-lista tiżdied entrata għall-Awstralja dwar il-bajd, bin-nota f’qiegħ il-paġna xierqa.

(9)

Filwaqt li l-Indja ma għandha l-ebda pjan ta’ monitoraġġ tar-residwi approvat għall-prodotti tat-tjur u għall-prodotti tal-ħalib, hija pprovdiet il-garanziji li fil-prodotti komposti destinati għall-esportazzjoni lejn l-UE, jintużaw biss il-prodotti tal-ħalib li joriġinaw minn Stati Membri jew minn pajjiżi terzi li huma approvati biex jesportaw tali prodotti lejn l-Unjoni. Għalhekk jenħtieġ li mal-lista tiżdied entrata għall-Indja dwar il-prodotti tal-ħalib, bin-nota f’qiegħ il-paġna xierqa.

(10)

Filwaqt li New Zealand ma għandha l-ebda pjan ta’ monitoraġġ tar-residwi approvat għall-ispeċi porċina, għall-prodotti tat-tjur, għall-bajd u għall-fniek, hija pprovdiet il-garanziji li fil-prodotti komposti destinati għall-esportazzjoni lejn l-UE, jintużaw biss il-prodotti tal-majjal, il-prodotti tat-tjur, il-bajd u l-fniek li joriġinaw minn Stati Membri jew minn pajjiżi terzi li huma approvati biex jesportaw tali prodotti lejn l-Unjoni. Għalhekk jenħtieġ li mal-lista tiżdied entrata għal New Zealand dwar il-speċi porċina, il-prodotti tat-tjur, il-bajd u l-fniek, bin-nota f’qiegħ il-paġna xierqa.

(11)

Filwaqt li l-Filippini ma għandhom l-ebda pjan ta’ monitoraġġ tar-residwi approvat għall-prodotti tal-ħalib u l-bajd, huma pprovdew il-garanziji li fil-prodotti komposti destinati għall-esportazzjoni lejn l-UE, jintużaw biss il-prodotti tal-ħalib u l-bajd li joriġinaw minn Stati Membri jew minn pajjiżi terzi li huma approvati biex jesportaw tali prodotti lejn l-Unjoni. Għalhekk, jenħtieġ li mal-lista tiżdied entrata għall-Filippini dwar il-prodotti tal-ħalib u l-bajd, bin-nota f’qiegħ il-paġna xierqa.

(12)

Filwaqt li Singapore ma għandha l-ebda pjan ta’ monitoraġġ tar-residwi approvat għall-bajd, hija pprovdiet il-garanziji li fil-prodotti komposti destinati għall-esportazzjoni lejn l-UE, jintuża biss il-bajd li joriġina minn Stati Membri jew minn pajjiżi terzi li huma approvati biex jesportaw tali prodotti lejn l-Unjoni. Għalhekk jenħtieġ li mal-lista tiżdied entrata għal Singapore dwar il-bajd, bin-nota f’qiegħ il-paġna xierqa.

(13)

Filwaqt li t-Tajlandja ma għandha l-ebda pjan ta’ monitoraġġ tar-residwi approvat għall-ispeċi bovina, għall-ispeċi porċina, għall-prodotti tal-ħalib u għall-bajd, hija pprovdiet il-garanziji li fil-prodotti komposti destinati għall-esportazzjoni lejn l-UE, jintużaw biss il-prodotti tal-ispeċi bovina, il-prodotti tal-ħalib u l-bajd li joriġinaw minn Stati Membri jew minn pajjiżi terzi li huma approvati biex jesportaw tali prodotti lejn l-Unjoni. Għalhekk jenħtieġ li mal-lista tiżdied entrata għat-Tajlandja dwar l-ispeċi bovina, il-prodotti tal-ħalib u l-bajd, bin-nota f’qiegħ il-paġna xierqa.

(14)

Filwaqt li l-Korea t’Isfel ma għandha l-ebda pjan ta’ monitoraġġ tar-residwi approvat għall-prodotti tal-ħalib, għall-bajd u għall-għasel, hija pprovdiet il-garanziji li fil-prodotti komposti destinati għall-esportazzjoni lejn l-UE, jintużaw biss il-prodotti tal-ħalib, il-bajd u l-għasel li joriġinaw minn Stati Membri jew minn pajjiżi terzi li huma approvati biex jesportaw tali prodotti lejn l-Unjoni. Għalhekk jenħtieġ li mal-lista tiżdied entrata għall-Korea t’Isfel dwar il-prodotti tal-ħalib, il-bajd u l-għasel, bin-nota f’qiegħ il-paġna xierqa.

(15)

Għalhekk jenħtieġ li d-Deċiżjoni 2011/163/UE tiġi emendata skont dan.

(16)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,