Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32020R1272

    Regolament Delegat tal-Kummissjoni (UE) 2020/1272 tal-4 ta’ Ġunju 2020 li jemenda u jikkoreġi r-Regolament Delegat (UE) 2019/979 li jissupplimenta r-Regolament (UE) 2017/1129 tal-Parlament Ewropew u tal-Kunsill fir-rigward ta’ standards tekniċi regolatorji dwar informazzjoni finanzjarja ewlenija fis-sommarju ta’ prospett, il-pubblikazzjoni u l-klassifikazzjoni tal-prospetti, ir-reklami għal titoli, is-supplimenti għal prospett, u l-portal ta’ notifika (Test b’rilevanza għaż-ŻEE)

    C/2020/3502

    ĠU L 300, 14.9.2020, p. 1–5 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/reg_del/2020/1272/oj

    14.9.2020   

    MT

    Il-Ġurnal Uffiċjali tal-Unjoni Ewropea

    L 300/1

    REGOLAMENT DELEGAT TAL-KUMMISSJONI (UE) 2020/1272

    tal-4 ta’ Ġunju 2020

    li jemenda u jikkoreġi r-Regolament Delegat (UE) 2019/979 li jissupplimenta r-Regolament (UE) 2017/1129 tal-Parlament Ewropew u tal-Kunsill fir-rigward ta’ standards tekniċi regolatorji dwar informazzjoni finanzjarja ewlenija fis-sommarju ta’ prospett, il-pubblikazzjoni u l-klassifikazzjoni tal-prospetti, ir-reklami għal titoli, is-supplimenti għal prospett, u l-portal ta’ notifika

    (Test b’rilevanza għaż-ŻEE)

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat ir-Regolament (UE) 2017/1129 tal-Parlament Ewropew u tal-Kunsill tal-14 ta’ Ġunju 2017 dwar il-prospett li għandu jiġi ppubblikat meta titoli jiġu offruti lill-pubbliku jew jiġu ammessi għall-kummerċ f’suq regolat, u li jħassar id-Direttiva 2003/71/KE (1) u b’mod partikolari l-Artikoli 7(13), 21(13) u 23(7) tiegħu,

    Billi:

    (1)

    Skont ir-Regolament Delegat tal-Kummissjoni (UE) 2019/979 (2), l-emittenti tat-titoli konvertibbli jew skambjabbli f’ishma ta’ parti terza huma attwalment meħtieġa, fis-sitwazzjonijiet elenkati fl-Artikolu 18 ta’ dak ir-Regolament, li jippubblikaw suppliment għall-prospett tagħhom. Min-naħa l-oħra, ir-Regolament Delegat tal-Kummissjoni (UE) Nru 382/2014 (3), li ġie sostitwit bir-Regolament Delegat (UE) 2019/979, ma kienx jeħtieġ il-pubblikazzjoni ta’ suppliment minn tali emittenti f’dawk is-sitwazzjonijiet. Peress li dawk ir-regoli wrew li jaħdmu tajjeb u ma affettwawx il-livell ta’ protezzjoni tal-investituri, ir-referenzi kollha għal emittenti ta’ titoli konvertibbli jew skambjabbli f’ishma ta’ parti terza għandhom jitneħħew mil-lista fl-Artikolu 18(1) tar-Regolament Delegat (UE) 2019/979.

    (2)

    Sabiex l-investituri jingħataw ħarsa ġenerali komparattiva tal-evoluzzjoni tad-dikjarazzjoni tal-fluss tal-flus ta’ entità mhux finanzjarja li toħroġ titoli ta’ ekwità, il-kolonna relatata mal-informazzjoni dwar il-flussi ta’ flus għas-sentejn ta’ qabel is-sena tal-prospett għandha tiddaħħal fit-tabella 3 tal-Anness I tar-Regolament Delegat (UE) 2019/979.

    (3)

    L-attribut 26 tal-Anness VII tar-Regolament Delegat (UE) 2019/979, li jirrigwarda r-riċevuti depożitorji, jirreferi għal “DRCP”. Madankollu, jenħtieġ li dak il-qasam jirreferi għal “DPRT”, li hija r-referenza użata fis-Sistema ta’ Data ta’ Referenza tal-Istrumenti Finanzjarji (FIRDS) operata mill-Awtorità Ewropea tat-Titoli u s-Swieq (AETS) skont ir-Regolament (UE) Nru 600/2014 tal-Parlament Ewropew u tal-Kunsill (4).

    (4)

    Ir-Regolament ta’ Delega (UE) 2019/979 jenħtieġ għalhekk li jiġi emendat skont dan.

    (5)

    Fil-verżjonijiet tal-lingwa Ċeka, Ingliża, Portugiża u Slovakka tal-Artikolu 21 tar-Regolament Delegat (UE) 2019/979, tħalliet barra kelma, u d-dispożizzjoni ġiet diffiċli biex tinftiehem. Dik id-dispożizzjoni għandha tiġi kkoreġuta kif xieraq.

    (6)

    Dan ir-Regolament huwa bbażat fuq l-abbozz tal-istandards tekniċi regolatorji sottomessi mill-Awtorità Ewropea tat-Titoli u s-Swieq (AETS) lill-Kummissjoni.

    (7)

    Fl-interess taċ-ċertezza legali, is-sommarji tal-prospetti approvati bejn il-21 ta’ Lulju 2019 u s-16 ta’ Settembru 2020 għandhom jibqgħu validi sa tmiem il-validità ta’ dawk il-prospetti.

    (8)

    Ir-Regolament (UE) 2017/1129 u r-Regolament Delegat (UE) 2019/979 daħlu fis-seħħ fl-21 ta’ Lulju 2019. Għal raġunijiet ta’ ċertezza legali u biex ikun żgurat il-funzjonament korrett tal-portal ta’ notifika tal-prospett, l-Artikolu 1, il-punti (1), (3) u (4), u l-Artikolu 2 ta’ dan ir-Regolament Delegat għandu jkollhom l-istess data ta’ applikazzjoni bħar-Regolament (UE) 2017/1129 u r-Regolament Delegat (UE) 2019/979.

    (9)

    Minħabba l-urġenza ta’ din il-kwistjoni u l-ambitu u l-impatt limitati tal-abbozz tal-istandards regolatorji li fuqu huwa bbażat dan ir-Regolament, l-ESMA la wettqet konsultazzjonijiet pubbliċi miftuħa, u lanqas analizzat il-kostijiet u l-benefiċċji potenzjali relatati. L-ESMA talbet l-opinjoni tal-Grupp tal-Partijiet Interessati tat-Titoli u s-Swieq stabbilit skont l-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (5),

    ADOTTAT DAN IR-REGOLAMENT:

    Artikolu 1

    Emendi għar-Regolament Delegat (UE) 2019/979

    Ir-Regolament Delegat (UE) 2019/979 huwa emendat kif ġej:

    (1)

    L-Artikolu 18(1) huwa emendat kif ġej:

    (a)

    fil-punt (a), il-punti (i) u (ii) huma sostitwiti b’dan li ġej:

    “(i)

    emittent fejn prospett ikun relatat ma’ ishma jew titoli trasferibbli oħra ekwivalenti għal ishma;

    (ii)

    emittent tal-ishma sottostanti jew titoli trasferibbli oħrajn ekwivalenti għal ishma fil-każ tat-titoli msemmija fl-Artikoli 19(2), jew 20(2) tar-Regolament Delegat (UE) 2019/980;”;

    (b)

    fil-punt (d), il-punti (i) u (ii) huma sostitwiti b’dan li ġej:

    “(i)

    emittent fejn prospett ikun relatat ma’ ishma jew titoli trasferibbli oħra ekwivalenti għal ishma;

    (ii)

    emittent tal-ishma sottostanti jew titoli trasferibbli oħrajn ekwivalenti għal ishma fil-każ li prospett huwa relatat ma’ titoli msemmija fl-Artikoli 19(2), jew 20(2) tar-Regolament Delegat (UE) 2019/980;”;

    (c)

    il-punt (e) huwa sostitwit b’dan li ġej:

    “(e)

    partijiet terzi jagħmlu offerta ġdida ta’ akkwist kif definita fl-Artikolu 2(1)(a) tad-Direttiva 2004/25/KE tal-Parlament Ewropew u tal-Kunsill (*1) jew ir-riżultat ta’ kwalunkwe offerta ta’ akkwist jsir disponibbli fir-rigward ta’ kwalunkwe tip ta’ titoli li ġejjin:

    (i)

    l-ekwità tal-emittent meta prospett ikun relatat ma’ ishma jew titoli trasferibbli oħra ekwivalenti għal ishma;

    (ii)

    l-ekwità tal-emittent tal-ishma sottostanti jew titoli trasferibbli oħrajn ekwivalenti għal ishma fil-każ li prospett huwa relatat ma’ titoli msemmija fl-Artikoli 19(2), jew 20(2) tar-Regolament Delegat (UE) 2019/980;

    (iii)

    l-ekwità tal-emittent tal-ishma sottostanti ta’ riċevuti depożitarji meta prospett jitfassal skont l-Artikoli 6 u 14 tar-Regolament Delegat (UE) 2019/980;

    (*1)  id-Direttiva 2004/25/KE tal-Parlament Ewropew u tal-Kunsill tal-21 ta’ April 2004 fuq offerti ta’ xiri (ĠU L 142, 30.4.2004, p. 12)”;"

    (d)

    fil-punt (f), il-punti (i) u (ii) huma sostitwiti b’dan li ġej:

    “(i)

    ishma jew titoli trasferibbli oħrajn ekwivalenti għal ishma;

    (ii)

    titoli kif imsemmija fl-Artikolu 19(2) tar-Regolament Delegat (UE) 2019/980;”;

    (e)

    il-punt (h) huwa sostitwit b’dan li ġej:

    “(h)

    fil-każ ta’ prospett dwar titoli ta’ ekwità jew titoli trasferibbli oħra ekwivalenti għal ishma; jew titoli msemmija fl-Artikoli 19(2) jew 20(2) tar-Regolament Delegat (UE) 2019/980; x’aktarx li impenn finanzjarju ġdid sinifikanti jagħti lok għal bidla grossa sinifikanti kif definit fl-Artikolu 1, punt (e), ta dak ir-Regolament Delegat;”;

    (2)

    għandu jiddaħħal l-Artikolu 22a li ġej:

    “Artikolu 22a

    Sommarji ta’ prospetti approvati bejn il-21 ta’ Lulju 2019 u s-16 ta’ Settembru 2020 għal entitajiet mhux finanzjarji li joħorġu titoli ta’ ekwità

    Sommarji ta’ prospetti li fihom informazzjoni kif imsemmija fit-Tabella 3 tal-Anness I u li ġew approvati bejn il-21 ta’ Lulju 2019 u s-16 ta’ Settembru 2020 għandhom jibqgħu validi sa tmiem il-validità ta’ dawk il-prospetti.”;

    (3)

    L-Anness I huwa emendat skont l-Anness 1 għal dan ir-Regolament;

    (4)

    L-Annes VII huwa emendat skont l-Anness 2 ta’ dan ir-Regolament.

    Artikolu 2

    Emendi għar-Regolament Delegat (UE) 2019/979

    L-Artikolu 21 tar-Regolament Delegat (UE) 2019/979 huwa sostitwit b’dan li ġej:

    ‘Artikolu 21

    Tniżżil ta’ dokumenti u ta’ data li takkumpanjahom

    L-ESMA għandha tiżgura li l-portal ta’ notifika jagħmel id-dokumenti mtellgħin u d-data li takkumpanjahom disponibbli għall-awtoritajiet kompetenti relevanti.

    Artikolu 3

    Dħul fis-seħħ u applikazzjoni

    Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu f’ Il-Ġurnal Uffiċjali tal-Unjoni Ewropea.

    Madankollu, l-Artikolu 1, il-punti (1), (3) u (4) u l-Artikolu 2 għandhom japplikaw mill-21 ta’ Lulju 2019.

    Dan ir-Regolament għandu jorbot fl-intier tiegħu u japplika direttament fl-Istati Membri kollha.

    Magħmul fi Brussell, l-4 ta’ Ġunju 2020.

    Għall-Kummissjoni

    Il-President

    Ursula VON DER LEYEN

    (1)  ĠU L 168, 30.6.2017, p. 12.

    (2)  Ir-Regolament Delegat tal-Kummissjoni (UE) 2019/979 tal-14 ta’ Marzu 2019 li jissupplimenta r-Regolament (UE) 2017/1129 tal-Parlament Ewropew u tal-Kunsill fir-rigward tal-istandards tekniċi regolatorji dwar l-informazzjoni finanzjarja ewlenija fis-sommarju ta’ prospett, il-pubblikazzjoni u l-klassifikazzjoni tal-prospetti, ir-reklami għal titoli, is-supplimenti għal prospett, u l-portal ta’ notifika, u li jħassar ir-Regolament ta’ Delega tal-Kummissjoni (UE) Nru 382/2014 u r-Regolament Delegat tal-Kummissjoni (UE) 2016/301 (ĠU L 166, 21.6.2019, p. 1).

    (3)  Ir-Regolament ta’ Delega tal-Kummissjoni (UE) Nru 382/2014 tas-7 ta’ Marzu 2014 li jissupplimenta d-Direttiva 2003/71/KE tal-Parlament Ewropew u tal-Kunsill fir-rigward tal-istandards tekniċi regolatorji għall-pubblikazzjoni ta’ supplimenti għall-prospetti (ĠU L 111, 15.4.2014, p. 36).

    (4)  Ir-Regolament (UE) Nru 600/2014 tal-Parlament Ewropew u tal-Kunsill tal-15 ta’ Mejju 2014 dwar is-swieq tal-istrumenti finanzjarji u li jemenda r-Regolament (UE) Nru 648/2012 (ĠU L 173, 12.6.2014, p. 84).

    (5)  Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).

    ANNESS 1

    Fl-Anness I tar-Regolament Delegat (UE) 2019/979, it-Tabella 3 hija mibdula b’dan li ġej:

    “Tabella 3

    Rapport tal-flussi tal-flus għal entitajiet mhux finanzjarji (titoli ta’ ekwità)

     

    Sena

    Sena -1

    Sena -2

    Interim

    Tqabbil interim mal-istess perjodu fis-sena preċedenti

    *Flussi ta’ flus netti relevanti minn attivitajiet operatorji u/jew flussi ta’ flus minn attivitajiet ta’ investiment u/jew flus minn attivitajiet ta’ finanzjament”

     

     

     

     

     

    ANNESS 2

    F’Tabella 1 tal-Anness VII, fil-kolonna “Format u Standard li għandu jintuża għar-rapportar”, fl-entrata 26, “DRPC” hija mibdula b’ “DPRS”.

    Top