(1)

Fit-13 ta’ Mejju 2013, il-Kunsill adotta Regolament ta’ Implimentazzjoni tal-Kunsill (UE) Nru 430/2013 (2) li jimponi dazju antidumping definittiv u jiġbor b’mod definittiv id-dazju provviżorju impost fuq importazzjonijiet ta’ fittings fonduti ta’ tubi jew pajpijiet bil-kamin, ta’ ħadid fondut malleabbli, li joriġinaw mir-Repubblika tal-Poplu taċ-Ċina (“RPĊ”) u t-Tajlandja u li jtemm il-proċediment fir-rigward tal-Indoneżja (“l-investigazzjoni oriġinali”).

(2)

Fit-12 ta’ Ġunju 2013, produttur esportatur Ċiniż li kkoopera, Jinan Meide Castings Co., Ltd (“Jinan Meide” jew “ir-rikorrent”), ippreżentaw applikazzjoni fil-Qorti Ġenerali tal-Unjoni Ewropea (“il-Qorti Ġenerali”) fejn talbu l-annullament tar-Regolament ta’ Implimentazzjoni (UE) Nru 430/2013 sa fejn dan japplika għar-rikorrent.

(3)

Fis-sentenza tagħha (3) (“l-ewwel sentenza”) fit-30 ta’ Ġunju 2016, il-Qorti Ġenerali sabet li d-drittijiet ta’ difiża Jinan Meide kienu miksura bit-tiċħid tat-talba tiegħu għall-iżvelar tal-kalkoli ta’ valur normali bl-użu ta’ data kunfidenzjali minn produttur ta’ pajjiż analogu. Għalhekk, il-Qorti Ġenerali annullat ir-Regolament ta’ Implimentazzjoni (UE) Nru 430/2013 sa fejn kien impona dazju ta’ antidumping fuq l-importazzjonijiet ta’ fittings tal-fondut għal tubi jew pajpijiet bil-kamin, ta’ ħadid fondut malleabbli manifatturati minn Jinan Meide.

(4)

Wara din l-ewwel sentenza, il-Kummissjoni ppubblikat avviż (4) dwar il-ftuħ mill-ġdid parzjali tal-investigazzjoni antidumping li tikkonċerna l-importazzjonijiet ta’ fittings tal-fondut għal tubi jew pajpijiet bil-kamin, ta’ ħadid fondut malleabbli, li joriġinaw mir-RPĊ. Il-ftuħ mill-ġdid kien limitat fil-kamp tal-applikazzjoni tiegħu għall-implimentazzjoni tas-sentenza tal-Qorti Ġenerali fir-rigward ta’ Jinan Meide.

(5)

Fis-26 ta’ Ġunju 2017, il-Kummissjoni adottat Regolament ta’ Implimentazzjoni (UE) 2017/1146 (5) li jimponi mill-ġdid dazju antidumping definittiv fuq l-importazzjonijiet ta’ fittings tal-fondut għal tubi jew pajpijiet bil-kamin, ta’ ħadid fondut malleabbli, li joriġinaw mir-RPĊ, manifatturati minn Jinan Meide Castings Co., Ltd (“ir-Regolament ikkontestat”).

(6)

Jinan Meide Castings Co., Ltd (“Jinan Meide”) ikkontestat ir-Regolament ikkontestat quddiem il-Qorti Ġenerali. Fl-20 ta’ Settembru 2019, il-Qorti Ġenerali qatgħet is-sentenza tagħha fil-kawża T-650/17 (6) dwar ir-regolament ikkontestat (“it-tieni sentenza”).

(7)

Il-Qorti Ġenerali sabet li l-Kummissjoni ma kkonformatx mad-dispożizzjonijiet tal-Artikolu 2(10)(a) tar-Regolament tal-Kunsill (KE) Nru 1225/2009 (7) dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Komunità Ewropea (“ir-Regolament bażiku”) billi ddeterminat il-valur tas-suq tad-differenzi fiżiċi bejn it-tipi ta’ prodotti simili abbażi tal-prezz tal-esportazzjoni tat-tipi ta’ prodotti li ma jaqblux, li kien il-prezz imħallas fl-Unjoni Ewropea għal dak il-prodott mill-ewwel klijent indipendenti.

(8)

Skont il-Qorti Ġenerali, il-fatt li l-prezz tal-esportazzjoni tat-tipi ta’ prodotti li ma jaqblux kien jikkostitwixxi l-prezz imħallas mill-ewwel klijent indipendenti fl-Unjoni Ewropea ma setax jitqies bħala stima raġonevoli tal-valur tas-suq. Fid-dawl tal-għan tal-Artikolu 2(7)(a) u (10) tar-Regolament bażiku, dan il-kunċett ma jimplikax biss li l-prezz inkwistjoni jitħallas minn klijent indipendenti fil-kuntest ta’ tranżazzjoni distakkata, iżda li jrid ukoll ikun possibbli li jiġi żgurat li dan il-prezz ikun ir-riżultat normali tal-forzi tas-suq. Madankollu, skont il-Qorti Ġenerali, dan ma jistax ikun il-każ meta dan il-prezz x’aktarx ikun affettwat minn dumping.

(9)

Skont il-fehma tal-Qorti Ġenerali, il-Kummissjoni użat metodoloġija irraġonevoli biex tirrifletti d-differenzi fil-karatteristiċi fiżiċi bejn it-tipi ta’ prodotti manifatturati fil-pajjiż analogu (l-Indja) u dawk esportati mir-RPĊ. Fin-nuqqas ta’ data relatata mal-produzzjoni domestika fil-pajjiż analogu, il-Kummissjoni użat id-differenza fil-prezzijiet osservata għall-bejgħ tal-esportazzjoni tad-diversi tipi ta’ prodotti mir-RPĊ. Il-Qorti Ġenerali qieset li l-prezzijiet li x’aktarx jiġu affettwati minn dumping u li joriġinaw f’pajjiż b’ekonomija mhux tas-suq ma jistgħux jiffurmaw il-bażi għal stima raġonevoli tal-valur tas-suq tad-differenzi fil-karatteristiċi fiżiċi peress li tali prezzijiet jistgħu ma jkunux ir-riżultat ta’ forzi normali tas-suq.

(10)

Minkejja li l-Qorti Ġenerali ma speċifikatx liema metodoloġija kellha tintuża biex tirrifletti d-differenzi fil-karatteristiċi fiżiċi bejn it-tipi ta’ prodotti simili, hija indikat li l-prezz effettivament imħallas jew li għandu jitħallas fl-Unjoni Ewropea għall-prodott simili, aġġustat kif xieraq jekk meħtieġ biex jinkludi marġni ta’ profitt raġonevoli, jista’ jservi, skont ċerti kundizzjonijiet, bħala bażi raġonevoli għad-determinazzjoni tal-valur normali (8).

(11)

Fid-dawl tal-kunsiderazzjonijiet preċedenti, il-Qorti Ġenerali annullat ir-regolament ikkontestat.

(12)

Skont l-Artikolu 266 tat-Trattat dwar il-Funzjonament tal-Unjoni Ewropea (“TFUE”), l-istituzzjonijiet tal-Unjoni għandhom l-obbligu li jieħdu l-passi neċessarji sabiex jikkonformaw mas-sentenzi tal-Qorti. Fil-każ ta’ annullament ta’ att adottat mill-istituzzjonijiet tal-Unjoni fil-kuntest ta’ proċedura amministrattiva, bħall-investigazzjonijiet anti-dumping f’dan il-każ, il-konformità mas-sentenza tal-Qorti Ġenerali tikkonsisti fis-sostituzzjoni tal-att annullat b’att ġdid, li fih l-illegalità identifikata mill-Qorti Ġenerali tiġi eliminata (9).

(13)

Skont il-ġurisprudenza tal-Qorti tal-Ġustizzja, il-proċedura għas-sostituzzjoni ta’ att annullat tista’ tissokta fil-punt eżatt li fih saret l-illegalità (10). Dan jimplika, b’mod partikolari, li f’sitwazzjoni fejn att li jikkonkludi proċedura amministrattiva jiġi annullat, l-annullament mhux neċessarjament jaffettwa l-atti preparatorji, bħall-bidu tal-proċedura anti-dumping. Pereżempju, fejn jiġi annullat regolament li jimponi miżuri anti-dumping definittivi, il-proċediment jibqa’ miftuħ minħabba li huwa biss l-att li jikkonkludi l-proċediment li jisparixxi mill-ordinament ġuridiku tal-Unjoni (11), ħlief f’każijiet fejn l-illegalità tkun seħħet fl-istadju tal-bidu. It-tkomplija tal-proċedura amministrattiva bl-impożizzjoni mill-ġdid tad-dazji anti-dumping fuq l-importazzjonijiet li jkunu saru matul il-perjodu ta’ applikazzjoni tar-regolament annullat ma tistax titqies li tmur kontra r-regola ta’ nonretroattività (12).

(14)

F’din il-kawża, il-Qorti Ġenerali annullat ir-Regolament ikkontestat għar-raġuni li l-Kummissjoni użat metodoloġija irraġonevoli biex tirrifletti d-differenzi fil-karatteristiċi fiżiċi bejn it-tipi ta’ prodotti manifatturati fil-pajjiż analogu u dawk esportati mir-RPĊ. Skont il-Qorti Ġenerali, ma setax jiġi eskluż li l-iżball kellu impatt sinifikanti fuq ir-rata tal-marġni ta’ dumping ta’ Jinan Meide.

(15)

Il-konklużjonijiet fir-regolament ikkontestat, li ġew ikkontestati iżda li kienu miċħuda mill-Qorti Ġenerali u għalhekk ma wasslux għall-annullament tar-regolament ikkontestat, jibqgħu kompletament validi u huma b’dan inkorporati u kkonfermati (13).

(16)

Wara t-tieni sentenza tal-Qorti Ġenerali, il-Kummissjoni ddeċidiet permezz ta’ avviż (14) (“avviż ta’ ftuħ mill-ġdid”) li terġa’ tiftaħ l-investigazzjoni antidumping li tikkonċerna l-importazzjonijiet ta’ fittings fonduti ta’ tubi jew pajpijiet bil-kamin, ta’ ħadid fondut malleabbli u ħadid fondut bil-grafit sferojdali, li joriġinaw mir-RPĊ, immanifatturati minn Jinan Meide Castings Co., Ltd li jwasslu għall-adozzjoni tar-regolament ikkontestat u jkomplu l-investigazzjoni fil-punt li fih seħħet l-irregolarità. Il-ftuħ mill-ġdid huwa limitat fl-ambitu għall-implimentazzjoni tat-tieni sentenza tal-Qorti Ġenerali.

(17)

Sussegwentement, fid-29 ta’ Novembru 2019, il-Kummissjoni ddeċidiet li tagħmel l-importazzjonijiet ta’ fittings fonduti ta’ tubi jew pajpijiet bil-kamin, ta’ ħadid fondut malleabbli u ħadid fondut bil-grafit sferojdali, li joriġinaw mir-RPĊ, immanifatturati minn Jinan Meide Castings Co., Ltd, soġġetti għar-reġistrazzjoni (15) u talbet lill-awtoritajiet doganali nazzjonali sabiex jistennew il-pubblikazzjoni tar-Regolament ta’ Implimentazzjoni rilevanti tal-Kummissjoni li kien se jimponi mill-ġdid id-dazji qabel ma jiddeċiedu dwar kwalunkwe talba għal ħlas lura u remissjoni tad-dazji anti-dumping f’dak li kellu x’jaqsam mal-importazzjonijiet li jikkonċernaw Jinan Meide (“ir-Regolament dwar ir-reġistrazzjoni”).

(18)

Il-Kummissjoni informat lill-partijiet interessati kollha dwar il-ftuħ mill-ġdid u stednithom jikkummentaw.

(19)

Il-Kummissjoni rċeviet kummenti mingħand l-ilmentaturi fl-investigazzjoni oriġinali, erba’ importaturi mhux relatati u Jinan Meide.

(20)

Wieħed miż-żewġ kwerelanti oriġinali esprima l-appoġġ tiegħu għall-ftuħ mill-ġdid u r-reġistrazzjoni tal-importazzjonijiet ta’ Jinan Meide.

(21)

Erba’ importaturi mhux relatati ppreżentaw ruħhom. L-importaturi kollha esprimew id-diżappunt tagħhom li l-Kummissjoni tiftaħ mill-ġdid l-investigazzjoni oriġinali wara t-tieni sentenza li tannulla d-dazji antidumping. Huma kkummentaw ukoll dwar l-allegata illegalità tar-reġistrazzjoni tal-importazzjonijiet u l-intenzjoni possibbli tal-Kummissjoni li terġa’ timponi dazji b’mod retroattiv. Huma esprimew ukoll id-disappunt tagħhom dwar it-talba lill-awtoritajiet doganali biex iwaqqfu l-ħlas lura tad-dazji miġbura preċedentement. Fil-fehma tagħhom, ma għandu jkun hemm l-ebda dazju antidumping impost fuq prodotti minn Jinan Meide. Wieħed mill-erba’ importaturi talab għal smigħ konġunt ma’ Jinan Meide, fejn iż-żewġ partijiet flimkien ippreżentaw il-kummenti tagħhom.

(22)

Importatur wieħed esprima n-nuqqas ta’ qbil mad-deċiżjoni tal-Kummissjoni li tordna r-reġistrazzjoni għall-importazzjonijiet fuq il-bażi ta’ numru ta’ elementi. L-ewwel nett, huwa sostna li ma kienx hemm raġunijiet suffiċjenti għar-reġistrazzjoni u nuqqas ta’ proporzjonalità. Speċifikament, l-importatur sostna li r-raġunijiet imressqa għall-Kummissjoni biex tirreġistra l-importazzjonijiet ma qablux maċ-ċirkostanzi tal-każ inkwistjoni: fil-premessa (17) tar-Regolament ta’ reġistrazzjoni, il-Kummissjoni ddikjarat li r-reġistrazzjoni tal-importazzjonijiet setgħet tiġi applikata, pereżempju: “sabiex jiġi żgurat il-pagament f’każ ta’ applikazzjoni ta’ dazji jew f’każijiet ta’ kontra ċ-ċirkomvenzjoni”, filwaqt li fil-proċediment inkwistjoni r-reġistrazzjoni kellha l-għan li tiffaċilita l-ġbir ta’ dazji antidumping wara l-ftuħ mill-ġdid tal-investigazzjoni.

(23)

F’dan ir-rigward, il-Kummissjoni tfakkar li r-Regolament ta’ reġistrazzjoni jirreferi fil-premessa (17) għal-lista ta’ raġunijiet għar-reġistrazzjoni fl-Artikolu 14(5) tar-Regolament bażiku, li mhijiex eżawrjenti, u jagħti lill-Kummissjoni d-diskrezzjoni li tiddeċiedi jekk ir-reġistrazzjoni tal-importazzjonijiet hijiex ġustifikata f’każ partikolari. Barra minn hekk, il-premessa (18) tar-Regolament ta’ reġistrazzjoni tispjega b’mod ċar ir-raġuni għar-reġistrazzjoni tal-importazzjonijiet, li hija li tiġi żgurata l-effettività tal-miżuri: “l-importazzjonijiet għandhom ikunu soġġetti għall-obbligazzjoni korretta ta’ antidumping mingħajr interruzzjoni eċċessiva mid-data tad-dħul fis-seħħ tar-regolament dwar l-antidumping sal-impożizzjoni mill-ġdid tad-dazji kkoreġuti, jekk ikun hemm.” Il-premessa (18) tar-Regolament ta’ reġistrazzjoni tispjega li l-kundizzjonijiet tal-Artikolu 10(4) tar-Regolament bażiku mhumiex applikabbli għall-każ inkwistjoni, peress li l-għan tar-reġistrazzjoni mhuwiex ġabra retroattiva ta’ dazji, iżda pjuttost li tiġi żgurata l-effikaċja tal-miżuri.

(24)

It-tieni nett, skont l-importatur, is-sempliċi raġuni li jiġi ffaċilitat il-ġbir ta’ dazji tkun sproporzjonata peress li hija ta’ piż żejjed għall-importaturi.

(25)

Il-Kummissjoni tfakkar li r-Regolament ta’ reġistrazzjoni jistipula speċifikament li r-rata tad-dazju dovuta bħala riżultat tal-ftuħ mill-ġdid ma tistax taqbeż l-ammont impost inizjalment mir-regolament parzjalment annullat fir-rigward tal-perjodu bejn il-ftuħ mill-ġdid tal-investigazzjoni u d-data tad-dħul fis-seħħ tar-riżultati tal-ftuħ mill-ġdid. Barra minn hekk, ir-Regolament ta’ reġistrazzjoni huwa limitat fiż-żmien, sabiex jiġi żgurat li l-importaturi ma jkunux soġġetti għar-reġistrazzjoni matul perjodi ta’ żmien mhux raġonevoli, preċiżament sabiex jiġi evitat piż mhux meħtieġ. Barra minn hekk, ir-reġistrazzjoni teknikament ma timponi l-ebda piż fuq l-importaturi iżda biss fuq l-awtoritajiet nazzjonali li jridu jistabbilixxu s-sistema ta’ reġistrazzjoni, u għalhekk ma jistgħux ikunu sproporzjonati għalihom.

(26)

It-tielet nett, l-importatur sostna wkoll li l-interruzzjonijiet f’dan il-każ ikunu indebiti, peress li dawn kienu konsegwenza tal-illegalitajiet fir-Regolament ta’ Implimentazzjoni stabbilit mill-Qorti Ġenerali.

(27)

Il-Kummissjoni tfakkar li l-ftuħ mill-ġdid tal-każ sabiex jiġu kkoreġuti l-iżbalji li nstabu mill-Qorti Ġenerali huwa konformi mal-ġurisprudenza tal-Qorti tal-Ġustizzja kif spjegat aktar fil-premessi (13) sa (17).

(28)

It-raba’ nett, fir-rigward tal-obbligu li jkun hemm konformità mas-sentenza skont l-Artikolu 266 TFUE, l-importatur esprima d-dubji tiegħu dwar il-possibbiltà li jiġu imposti dazji fuq prodotti b’mod retroattiv li ma kinux koperti minn xi att legali rilevanti fil-punt meta daħlu fiċ-ċirkolazzjoni libera. L-importatur argumenta wkoll li l-impożizzjoni kontinwa tad-dazji tmur kontra r-regola tar-retroattività tal-Artikolu 10(4) tar-Regolament bażiku.

(29)

Il-Kummissjoni tfakkar li hija ġurisprudenza stabbilita li, meta l-qrati tal-UE jiddikjaraw li regolament li jimponi dazji huwa invalidu, dawn id-dazji għandhom jitqiesu li qatt ma kienu dovuti legalment fis-sens tal-Artikolu 236 tal-Kodiċi Doganali preċedentement applikabbli u stabbilit permezz tar-Regolament tal-Kunsill (KEE) Nru 2913/92 (16) u, fil-prinċipju, huma meħtieġa li jitħallsu lura mill-awtoritajiet doganali nazzjonali skont il-kondizzjonijiet stabbiliti għal dak l-għan (17). Madankollu, il-Qorti tal-Ġustizzja ddikjarat ukoll li l-ambitu eżatt ta’ dikjarazzjoni ta’ invalidità mill-qorti f’sentenza u, konsegwentement, tal-obbligi li jirriżultaw minnha jridu jiġu stabbiliti f’kull każ speċifiku billi jitqiesu mhux biss il-parti operattiva ta’ dik is-sentenza, iżda wkoll ir-raġunijiet li jikkostitwixxu l-bażi essenzjali tagħha (18).

(30)

F’dan il-każ, il-Qorti Ġenerali sabet li l-Kummissjoni għamlet żball billi użat metodoloġija li ma għamlitx stima raġonevoli tal-valur tas-suq tad-differenzi fil-karatteristiċi fiżiċi bejn it-tipi ta’ prodotti li ma jaqblux u t-tipi ta’ prodotti direttament komparabbli (19). L-applikazzjoni ta’ dik il-metodoloġija ma wasslitx għal paragun ġust bejn il-valur normali u l-prezzijiet tal-esportazzjoni. Barra minn hekk, din il-metodoloġija ma pprovatx li l-aġġustament għall-valur normali tat-tipi ta’ prodotti li ma jaqblux li saru b’dan il-mod ippreżerva d-determinazzjoni raġonevoli ta’ dak il-valur normali, jiġifieri determinazzjoni bbażata fuq valuri u parametri li jistgħu jitqiesu li huma r-riżultat normali tal-forzi tas-suq. L-applikazzjoni tal-metodoloġija żbaljata għalhekk instabet mhux skont l-Artikolu 2(7)(a) jew l-Artikolu 2(10) ab initio u (a) tar-Regolament bażiku.

(31)

Barra minn hekk, il-Qorti tal-Ġustizzja konsistentement sostniet li l-Artikolu 10(1) tar-Regolament bażiku ma jipprekludix atti milli jimponu mill-ġdid dazji anti-dumping fuq importazzjonijiet li saru matul il-perjodu ta’ applikazzjoni tar-regolamenti ddikjarati invalidi. Konsegwentement,kif spjegat fil-premessi (14) sa (17) tar-Regolament ta’ reġistrazzjoni, it-tkomplija tal-proċedura amministrattiva u l-impożizzjoni mill-ġdid eventwali tad-dazji ma jistgħux jitqiesu bħala kuntrarji għar-regola ta’ nonretroattività.

(32)

Il-ħames nett, l-importatur sostna li l-azzjonijiet tal-Kummissjoni f’dan il-każ dgħajfu ċ-ċertezza legali għall-importaturi, peress li ma setgħux ibassru jekk l-importazzjonijiet tagħhom kinux se jkunu soġġetti għal dazji antidumping jew le.

(33)

Il-Kummissjoni kkonformat mal-prinċipju ta’ ċertezza legali fir-rigward tal-importaturi permezz tal-pubblikazzjoni ta’ Regolament ta’ reġistrazzjoni dettaljat. Il-Kummissjoni kkonformat bil-ftuħ mill-ġdid tal-investigazzjoni bil-għan li tikkoreġi l-iżbalji stabbiliti fis-sentenzi tal-Qorti.

(34)

Is-sitt nett, l-importatur ressaq ukoll kummenti dwar it-talba tal-Kummissjoni lill-awtoritajiet doganali biex iżommu r-rifużjonijiet tad-dazji preċedenti, u semma l-elementi li ġejjin. L-ewwel nett, l-obbligu li jkun hemm konformità mas-sentenza allegatament ikun jeħtieġ li d-dazji jitħallsu lura b’mod sħiħ u jenħtieġ li l-applikazzjonijiet tagħhom f’dak ir-rigward ma jiġux posposti.

(35)

Kif spjegat fin-notifika ta’ ftuħ mill-ġdid kif ukoll fir-Regolament dwar ir-reġistrazzjoni, u minħabba li l-ammont tar-responsabbiltà li jirriżulta mill-ftuħ mill-ġdid huwa inċert, il-Kummissjoni talbet lill-awtoritajiet tad-dwana nazzjonali biex jistennew l-eżitu tal-ftuħ mill-ġdid qabel jiddeċiedu dwar xi pretensjoni ta’ ħlas lura dwar id-dazju tal-antidumping annullati mill-Qorti Ġenerali fir-rigward ta’ Jinan Meide. Hija ġurisprudenza stabbilita li l-kamp ta’ applikazzjoni u r-raġunijiet għad-dikjarazzjoni ta’ invalidità mill-Qorti f’sentenza għandhom jiġu ddeterminati f’kull każ speċifiku u jistgħu jkunu tali li ma jkunux jeħtieġu l-ħlas lura sħiħ u immedjat tad-dazji rilevanti (20).

(36)

Barra minn hekk, rigward in-nuqqas ta’ retroattività għal importazzjonijiet mhux irreġistrati, l-importatur sostna li jekk il-Kummissjoni tiddeċiedi li tapplika r-regola ta’ retroattività skont l-Artikolu 10 tar-Regolament bażiku għall-każ inkwistjoni, din ir-regola ma setgħetx tapplika għall-importazzjonijiet li saru qabel it-30 ta’ Novembru 2019. Skont l-importatur, dawn id-dazji qatt ma kienu legalment dovuti u għalhekk għandhom jitħallsu lura kompletament.

(37)

Skont il-ġurisprudenza tal-Qorti tal-Ġustizzja, it-tkomplija tal-proċedura amministrattiva bl-impożizzjoni mill-ġdid tad-dazji anti-dumping fuq l-importazzjonijiet li jkunu saru matul il-perjodu ta’ applikazzjoni tar-regolament annullat ma tistax titqies li tmur kontra r-regola ta’ nonretroattività (ara l-premessi (13) u (25)).

(38)

Barra minn hekk, fir-rigward tal-allegat ksur tal-prinċipju ta’ ċertezza legali, l-importatur sostna li t-talba mill-Kummissjoni lill-awtoritajiet doganali nazzjonali biex iwaqqfu kwalunkwe applikazzjoni għal rifużjoni f’dan il-każ tippreġudika l-prinċipju ta’ ċertezza legali.

(39)

Iċ-ċertezza legali hija żgurata għall-importaturi mir-Regolament ta’ reġistrazzjoni li jillimita l-ammont ta’ dazji fl-ammont inizjalment impost mir-regolament parzjalment annullat fir-rigward tal-perjodu bejn il-ftuħ mill-ġdid tal-investigazzjoni u d-data tad-dħul fis-seħħ tar-riżultati tal-ftuħ mill-ġdid. Barra minn hekk, ir-Regolament ta’ reġistrazzjoni jispjega li, jekk il-Kummissjoni tistabbilixxi, wara l-ftuħ mill-ġdid tal-investigazzjoni, li l-impożizzjoni mill-ġdid tad-dazji mhijiex ġustifikata u li l-miżuri jenħtieġ li jintemmu, il-ħlas lura u/jew ir-rimessa tad-dazji jseħħu mill-istess data tad-dħul fis-seħħ tar-regolament parzjalment annullat. Fl-aħħar nett, biex jiġu evitati piż addizzjonali u inċertezza għall-atturi affettwati, ir-reġistrazzjoni hija limitata għal perjodu ta’ disa’ xhur, u li wara dan il-perjodu d-dazji se jitħallsu lura kollha jew inkella jiġu aġġustati skont ir-riżultati tal-investigazzjoni li tkun reġgħet infetħet.

(40)

Fl-aħħar nett, l-importatur sostna li s-sentenzi fil-każijiet C-256/16 u C-612/16 ma jiġġustifikawx l-impożizzjoni ta’ reġistrazzjoni jew it-talba lill-awtoritajiet nazzjonali dwar l-applikazzjonijiet għal rifużjoni, peress li dawk is-sentenzi nħarġu skont il-kuntest tal-Kodiċi Doganali applikabbli qabel stabbilit mir-Regolament (KEE) Nru 2913/92 u r-Regolament bażiku (KE) Nru 1225/2009, li qabel kien applikabbli, li sadanittant ġew sostitwiti. B’mod partikolari, l-importatur jirrimarka li fil-kawża C-256/16 il-Qorti tal-Ġustizzja tal-Unjoni Ewropea kkunsidrat il-miżuri fil-forma ta’ talba magħmula mill-Kummissjoni lill-awtoritajiet doganali nazzjonali biex jissospendu l-applikazzjonijiet ta’ rifużjoni inkwantu dawn huma proporzjonati, speċjalment minħabba l-fatt li “kwalunkwe dewmien qed jiġi kkumpensat bil-ħlas ta’ imgħax.” L-importatur isostni li d-dispożizzjoni rilevanti fir-Regolament (KEE) Nru 2913/92 hija issa sostitwita bl-Artikolu 116(6) tal-Kodiċi Doganali tal-Unjoni (21) li tindika b’mod espliċitu li l-ħlas lura ta’ dazji ma jagħtix lok għall-ħlas ta’ mgħax. Għalhekk, l-importatur sostna li l-Kummissjoni ma tistax tuża l-kunsiderazzjonijiet rilevanti tas-sentenzi fil-kawżi C-256/16 u C-612/16 biex tiġġustifika l-impożizzjoni ta’ reġistrazzjoni jew l-istruzzjonijiet lill-awtoritajiet nazzjonali dwar l-applikazzjonijiet għal rifużjoni.

(41)

Il-Kummissjoni tfakkar li filwaqt li l-Artikolu 116(6) tal-Kodiċi Doganali tal-Unjoni tabilħaqq jindika li l-ħlas lura tad-dazji ma jwassalx għall-ħlas tal-imgħax, l-Artikolu 109 tar-Regolament (EU, Euratom) 2018/1046 tal-Parlament Ewropew u tal-Kunsill (22) jipprovdi għall-imgħax kumpensatorju fil-każ ta’ rimborżi wara sentenza tal-Qorti tal-Ġustizzja tal-Unjoni Ewropea. F’dan il-każ, peress li r-rifużjonijiet se jkunu soġġetti għal deċiżjoni wara s-sentenza tal-Qorti tal-Ġustizzja, dawn ikunu soġġetti għal rata ta’ imgħax ugwali għar-“rata applikata mill-Bank Ċentrali Ewropew għall-operazzjonijiet ta’ rifinanzjament prinċipali tiegħu, kif ippubblikat fis-serje C ta’ Il-Ġurnal Uffiċjali tal-Unjoni Ewropea fl-ewwel jum kalendarju ta’ kull xahar”. L-argument dwar in-nuqqas ta’ rata ta’ imgħax fil-każ ta’ rifużjonijiet huwa għalhekk miċħud.

(42)

Jinan Meide iddikjara li l-Kummissjoni ma setgħetx titlob lill-awtoritajiet doganali nazzjonali biex ma jħallsux lura u/jew ma jagħmlux remissjoni tad-dazji li kienu nġabru skont ir-regolament ikkontestat. Allegatament is-sitwazzjoni fil-każ preżenti hija differenti minn dik fis-sentenza Deichmann (23). Skont Jinan Meide, ir-regolament ikkontestat ġie annullat fl-intier tiegħu, li jfisser li dan tneħħa mill-ordinament ġuridiku tal-Unjoni b’effett retroattiv, filwaqt li fis-sentenza Deichmann, il-miżuri ġew iddikjarati invalidi fil-kuntest ta’ rinviju għal deċiżjoni preliminari. Barra minn hekk, fis-sentenza Deichmann, il-Qorti tal-Ġustizzja sabet li ma kienx hemm fatturi “li jistgħu jaffettwaw il-validità tar-regolament definittiv”, filwaqt li l-ebda sejba bħal din ma saret f’dan il-każ.

(43)

Kif spjegat fil-premessa (13), il-Kummissjoni, f’konformità mal-ġurisprudenza stabbilità (24), tista’ tkompli l-proċedimenti fil-punt eżatt li fih seħħet l-illegalità. F’dan il-każ, il-Kummissjoni reġgħet fetħet l-investigazzjoni bl-iskop li jiġu irranġati l-iżbalji li nstabu mill-Qorti Ġenerali. Is-sentenza Deichmann tenniet fil-punt 78 l-interpretazzjoni ġenerali tal-Artikolu 10(1): “Min-naħa l-oħra, il-formulazzjoni tal-Artikolu 10(1) tar-Regolament Nru 384/96 ma teskludix li sseħħ tali tkomplija tal-proċedura fil-każ fejn id-dazji antidumping ikkonċernati jkunu skadew minn dik id-data, sakemm dawn id-dazji jkunu stabbiliti mill-ġdid matul il-perijodu ta’ applikazzjoni inizjali tagħhom, […].” Din l-interpretazzjoni tal-Qorti Ġenerali hija ta’ natura ġenerali u għalhekk tapplika wkoll għal dan il-każ.

(44)

Jinan Meide ddikjara wkoll li l-Kummissjoni ma tistax timponi mill-ġdid id-dazji b’mod retroattiv u b’hekk iddikjara li t-talba tal-Kummissjoni lill-awtoritajiet doganali nazzjonali biex tistenna l-pubblikazzjoni tar-Regolament ta’ Implimentazzjoni l-ġdid li jimponi mill-ġdid id-dazji qabel ma tiddeċiedi dwar it-talbiet għal rifużjoni ta’ dazji imposti qabel kienet infondata. Dan minħabba li r-Regolament ikkontestat ma kienx annullament parzjali, iżda annullament sħiħ u għalhekk ir-Regolament ikkontestat qatt ma kien jeżisti fl-ordinament ġuridiku. Jinan Meide jsostni li ċ-ċirkostanzi tal-każ Deichmann kienu differenti u li l-Kummissjoni ma tistax tibbaża d-deċiżjonijiet tagħha f’dan il-każ fuq is-sejbiet tas-sentenza Deichmann. Jinan Meide ddikjara wkoll li l-Kummissjoni ma kinitx qed tosserva l-protezzjoni ġudizzjarja mogħtija lill-partijiet affettwati mill-proċedimenti amministrattivi tal-Unjoni, billi ma osservatx l-awtorità tal-Qorti tal-Ġustizzja tal-Unjoni Ewropea. L-effett prattiku tal-approċċ tal-Kummissjoni allegatament ikun li ma jkun hemm ebda raġuni għal parti affettwata minn miżuri ta’ difiża kummerċjali li tippreżenta rikors kontra miżuri illegali.

(45)

Jinan Meide ddikjara wkoll li r-reġistrazzjoni imposta mill-Kummissjoni taqa’ barra mill-ambitu tal-ftuħ mill-ġdid, peress li s-sentenza ma fihiex sejbiet li jistgħu jiffurmaw il-bażi għar-reġistrazzjoni.

(46)

Ir-raġunijiet għar-reġistrazzjoni f’dan il-każ kienu spjegati fil-premessa (23). Mhuwiex meħtieġ li l-Qorti tiddetermina fid-dettall kull pass tal-proċedura ta’ antidumping peress li l-Kummissjoni għandha diskrezzjoni li tiddeċiedi dwar il-proċedimenti wara l-ftuħ mill-ġdid minħabba s-sentenza tal-Qorti, f’konformità mal-ġurisprudenza rilevanti u r-regoli tar-Regolament bażiku, inklużi r-regoli dwar ir-reġistrazzjoni.

(47)

Barra minn hekk, Jinan Meide ddikjara li ma hemm l-ebda bażi ġuridika għar-reġistrazzjoni tal-importazzjonijiet f’dan il-każ, peress li la l-Artikolu 10(2), u lanqas l-Artikoli 10(4), 10(5), 11(4), 12(5) u 13(3) tar-Regolament bażiku ma huma applikabbli f’dan il-każ. Jinan Meide ddikjara ukoll li l-ebda deroga mill-prinċipju ġenerali tan-nonretroattività ma tapplika peress li l-ebda eċċezzjoni għall-prinċipju ġenerali tan-nonretroattività ma tista’ titqies li tapplika għal dan il-każ.

(48)

Kif spjegat fid-dettall fil-premessa (23), il-bażi għar-reġistrazzjoni hija l-Artikolu 14(5) tar-Regolament bażiku. Il-premessa (23) tkompli tispjega li l-kundizzjonijiet tal-Artikolu 10(4) tar-Regolament antidumping bażiku mhumiex applikabbli għall-każ inkwistjoni, peress li l-għan tar-reġistrazzjoni mhuwiex ġabra retroattiva ta’ dazji, iżda pjuttost li tiġi żgurata l-effikaċja tal-miżuri.

(49)

Jinan Meide kkunsidra wkoll li ebda data mill-perjodu ta’ investigazzjoni, li kopriet l-perjodu mill-1 ta’ Jannar sal-31 ta’ Diċembru 2011, ma setgħet tibqa’ tiġi ttrattata bħala kunfidenzjali minħabba li għadda ż-żmien. Jinan Meide qal li l-Qorti Ġenerali kkunsidrat, u l-Qorti tal-Ġustizzja kkonfermat, li perjodu ta’ ħames snin fih innifsu huwa suffiċjenti sabiex informazzjoni titlef il-kwalifika tagħha bħala sigriet kummerċjali jew informazzjoni kunfidenzjali oħra.

(50)

L-Artikolu 19 tar-Regolament bażiku ma jistabbilixxi l-ebda limitu ta’ żmien għall-protezzjoni ta’ informazzjoni kunfidenzjali. Dan huwa konformi mal-Artikolu 6.5 tal-Ftehim Antidumping tad-WTO li ma fih lanqas ebda limitu ta’ żmien u speċifikament jistipula li l-informazzjoni li għaliha ntalab trattament kunfidenzjali “ma għandhiex tiġi żvelata mingħajr permess speċifiku mill-parti li qed tissottomettieha” mingħajr ebda limitu ta’ żmien. Għalhekk, dan l-argument ma ntlaqax.

(51)

Huwa mfakkar li kif iddikjarat fil-premessa (15), il-partijiet tar-regolament ikkontestat li ġew ikkontestati iżda miċħuda mill-Qorti Ġenerali jibqgħu kompletament validi.

(52)

Kif kien stabbilit matul l-investigazzjoni oriġinali, it-tipi ta’ prodotti li ma jaqblux jirrappreżentaw 28 % tal-esportazzjonijiet ta’ Jinan Meide matul il-perjodu ta’ investigazzjoni. 55 % tal-volum totali ta’ esportazzjoni tar-rikorrent kienu kkunsidrati li huma tipi ta’ prodott komparabbli direttament u li fir-rigward tagħhom il-marġini ta’ dumping kien determinat bil-kalkolu tal-valur normali, abbażi tal-bejgħ domestiku tal-produttur analogu tal-pajjiż magħmul fil-kors ordinarju tal-kummerċ jew abbażi ta’ valur maħdum. Is-17 % li jifdal ta’ dak il-volum totali, tqiesu bħala tipi ta’ prodotti “kważi komparabbli”, li għalihom il-marġni ta’ dumping ġie ddeterminat billi ġie aġġustat il-valur normali (25). Ir-rikorrent ikkontesta biss il-metodoloġija li tikkonċerna l-prodotti mhux komparabbli li jikkostitwixxu 28 % tal-volum ta’ esportazzjoni ta’ Jinan Meide.

(53)

Skont il-Qorti Ġenerali, l-Artikolu 2(10)(a) tar-Regolament bażiku jipprovdi li għandu jsir aġġustament għad-differenzi fil-karatteristiċi fiżiċi tal-prodott ikkonċernat u li l-ammont tal-aġġustament għandu jikkorrispondi għal stima raġonevoli tal-valur tas-suq tad-differenza (26). Madankollu, dik id-dispożizzjoni ma tispeċifikax kif għandha tintlaħaq tali stima raġonevoli. Barra minn hekk, il-Qorti Ġenerali rrilevat li, sabiex tiġi stabbilita mill-ġdid is-simetrija bejn il-valur normali tal-prodott simili u l-prezz tal-esportazzjoni tal-prodott ikkonċernat, dik id-dispożizzjoni ma teħtieġx li l-ammont tal-aġġustament li ġie evalwat b’dan il-mod jirrifletti dan il-valur tas-suq, iżda biss li jikkostitwixxi stima raġonevoli tiegħu.

(54)

Barra minn hekk, il-Qorti Ġenerali indikat li l-Kummissjoni kellha setgħa diskrezzjonali wiesgħa kemm sabiex tevalwa l-valur normali ta’ prodott kif ukoll sabiex tevalwa l-fatti li jiġġustifikaw l-ekwità tal-paragun tal-valur normali u tal-prezz ta’ esportazzjoni mwettaq, bil-kunċetti vagi ta’ raġonevolezza u ta’ ekwità li għandhom jiġu applikati mill-Kummissjoni fil-kuntest ta’ dawn id-dispożizzjonijiet li għandhom jiġu kkonkretizzati minnha abbażi ta’ każ b’każ, skont il-kuntest ekonomiku rilevanti (27).

(55)

Skont ir-rikorrent, il-metodoloġija kkontestata kienet ibbażata fuq l-ipoteżi żbaljata li l-valur tas-suq tad-differenzi fiżiċi kien rifless fil-prezzijiet tal-esportazzjoni filwaqt li, skont il-konstatazzjonijiet tal-Kummissjoni stess, l-istess prezzijiet tal-esportazzjoni kienu jirriflettu, tal-inqas parzjalment, id-dumping. Barra minn hekk, ir-rikorrent allega li dik il-metodoloġija kienet ibbażata fuq is-suppożizzjoni żbaljata li l-prezzijiet tal-esportazzjoni tat-tipi ta’ prodotti li ma jaqblux kienu jirriflettu livell ta’ dumping ekwivalenti għal dak li nstab għal dawk it-tipi ta’ prodotti li għalihom kien hemm tip ta’ prodott direttament komparabbli (“it-tipi ta’ prodotti direttament komparabbli”). Skont ir-rikorrenti, dik is-suppożizzjoni hija irraġonevoli u ma tistax tiġi vverifikata (28).

(56)

Skont il-Qorti Ġenerali, l-użu ta’ dik il-metodoloġija seta’ kellu impatt sinifikattiv fuq il-kalkolu tal-marġni ta’ dumping stabbilit għall-esportazzjonijiet ta’ tipi ta’ prodotti li ma jaqblux (29).

(57)

Il-Qorti Ġenerali ddikjarat li sabiex tkun tista’ tiddetermina l-marġni ta’ dumping b’mod raġonevoli u oġġettiv, il-kalkolu tal-valur normali ta’ tip ta’ prodott partikolari jrid ikun ibbażat, fil-prinċipju, fuq data indipendenti mill-prezzijiet tal-esportazzjoni li l-Kummissjoni qed tfittex speċifikament li tivvaluta, billi jiġi stabbilit dak il-valur normali, is-sottovalutazzjoni li huma soġġetti għaliha (30).

(58)

Il-Qorti Ġenerali ddikjarat ukoll li ma kienx ipprovat li l-użu ta’ element kostitwenti tal-prezzijiet tal-esportazzjoni tat-tipi ta’ prodotti li ma jaqblux, sabiex jiġi kkoreġut il-valur normali li dawk il-prezzijiet jiġu mqabbla miegħu, kien tali li jistabbilixxi mill-ġdid is-simetrija bejn dawk il-prezzijiet u dak il-valur normali skont l-għan tal-Artikolu 2(10) tar-Regolament bażiku. B’mod partikolari, ma kien hemm l-ebda indikazzjoni li l-proporzjon bejn il-prezz tal-esportazzjoni ta’ kull tip ta’ prodott li ma jaqbilx u l-prezz medju tal-esportazzjoni ta’ unità tat-tipi ta’ prodotti komparabbli direttament jirrifletti l-valur tad-differenzi fiżiċi bejn il-kategorija tal-aħħar tat-tip ta’ prodott u t-tip ta’ prodott li ma jaqbilx inkwistjoni (31).

(59)

Il-Qorti Ġenerali ddikjarat li l-metodoloġija kkontestata hija impliċitament ibbażata fuq il-preżunzjoni li dik id-differenza fil-prezz tikkorrispondi għall-valur tas-suq tad-differenzi fiżiċi għat-tipi kollha ta’ prodotti li ma jaqblux (32). Konsegwentement, din s-suppożizzjoni timplika li l-marġni ta’ dumping li x’aktarx jaffettwa l-prezzijiet ta’ ċerti tipi speċifiċi ta’ prodotti li ma jaqblux u l-prezzijiet ta’ esportazzjoni ta’ tipi ta’ prodotti komparabbli direttament huwa fl-istess livell. Inkella, id-differenzi fil-prezz bejn iż-żewġ kategoriji ta’ tipi ta’ prodotti inkwistjoni jistgħu jirriżultaw, tal-inqas parzjalment, mid-differenzi fil-marġni ta’ dumping u għalhekk ma jistgħux jiġu kkunsidrati b’affidabbiltà suffiċjenti biex jirriflettu biss id-differenzi fil-karatteristiċi fiżiċi (33).

(60)

Il-Qorti Ġenerali ddikjarat li l-prezz effettivament imħallas jew li għandu jitħallas fl-Unjoni Ewropea għall-prodott simili, aġġustat kif xieraq jekk meħtieġ biex jinkludi marġni ta’ profitt raġonevoli jista’ jservi, taħt ċerti kundizzjonijiet, bħala bażi raġonevoli għad-determinazzjoni tal-valur normali. Għalhekk għall-fini ta’ tqabbil ġust, stima raġonevoli tal-valur tas-suq tad-differenzi fiżiċi tista’ tkun ibbażata, fin-nuqqas ta’ data oħra disponibbli, fuq id-differenza bejn il-prezz tat-tipi ta’ prodotti li ma jaqblux u l-prezz medju tat-tip ta’ prodott komparabbli direttament f’wieħed jew aktar mill-produtturi tal-Unjoni (34).

(61)

Bl-użu tal-approċċ deskritt mill-Qorti Ġenerali, il-Kummissjoni kkalkulat mill-ġdid il-marġni ta’ dumping ta’ Jinan Meide fir-rigward tat-28 % ikkontestat tal-esportazzjonijiet tagħha. Il-Kummissjoni użat bħala valur normali għal dawn it-tipi ta’ prodotti li ma jaqblux, li ġew esportati lejn l-UE minn Jinan Meide, il-prezz tal-bejgħ reali tal-industrija Ewropea għall-istess tip ta’ prodott.

(62)

Il-Kummissjoni osservat li kien hemm kwantità żgħira ta’ esportazzjonijiet Ċiniżi (4,5 %) li l-Kummissjoni ma setgħetx tqabbel la mat-tipi ta’ prodotti mibjugħa mill-produttur Indjan u lanqas ma’ dawk tal-industrija tal-Unjoni. Din il-kwantità tikkorrispondi għal prodotti niċċa li dwarhom il-Kummissjoni ma rċevietx informazzjoni speċifika dwar il-karatteristiċi fiżiċi tagħhom. Għalhekk, il-Kummissjoni użat il-valur normali medju peżat Indjan fin-nuqqas ta’ metodu aktar xieraq. L-impatt fuq il-marġni globali ta’ dumping kien żgħir ħafna. Il-Kummissjoni stiednet lill-produttur esportatur biex jikkummenta dwar dan il-metodu. Il-Kummissjoni stiednet ukoll lil dan il-produttur esportatur biex jipprovdi informazzjoni sħiħa dwar il-karatteristiċi fiżiċi ta’ dawk il-prodotti speċjalizzati u indikazzjoni dwar l-eqreb tip ta’ prodott korrispondenti esportat lejn l-UE.

(63)

F’dawn iċ-ċirkostanzi, il-marġni ta’ dumping ikkalkulat mill-ġdid għal Jinan Meide huwa ta’ 75,1 %.

(64)

Fit-23 ta’ Ġunju 2020, il-Kummissjoni infurmat lill-partijiet interessati kollha dwar is-sejbiet imsemmija hawn fuq, li abbażi tagħhom kien maħsub li jiġi propost li jkun impost mill-ġdid id-dazju antidumping fuq importazzjonijiet ta’ fittings tal-fondut għal tubi jew pajpijiet bil-kamin, ta’ ħadid fondut malleabbli u ħadid fondut bil-grafit sferojdali, manifatturati minn Jinan Meide abbażi tal-fatti miġbura u ppreżentati relatati mal-investigazzjoni oriġinali (“l-aħħar divulgazzjoni”).

(65)

Wara l-aħħar divulgazzjoni, Jinan Meide sostna wkoll li ebda data tal-industrija Ewropea mill-perjodu ta’ investigazzjoni, li kopriet l-perjodu mill-1 ta’ Jannar sal-31 ta’ Diċembru 2011, ma setgħet tibqa’ tiġi ttrattata bħala kunfidenzjali minħabba li għadda ż-żmien. Huwa talab ukoll li l-Kummissjoni tivverifika mal-industrija Ewropea jekk id-data tiegħu kellhiex tiġi meqjusa bħala waħda kunfidenzjali. Jinan Meide ddikjara li ma kellux aċċess adegwat għall-fatti u għall-kunsiderazzjonijiet essenzjali sottostanti għall-kalkolu. Skont Jinan Meide, jenħtieġ li d-data kollha użata fil-kalkolu tiġi żvelata lilu.

(66)

Il-Kummissjoni diġà wieġbet għal dawn il-kummenti fil-premessa (50). Barra minn hekk, f’dan il-każ il-Kummissjoni kkonkludiet li l-produtturi tal-Unjoni pprovdew raġunijiet validi li juru li l-informazzjoni ppreżentata oriġinarjament jenħtieġ tibqa’ kunfidenzjali. Jinan Meide talbab l-intervent tal-Uffiċjal tas-Seduta f’dan ir-rigward, li kkonferma wkoll li d-data pprovduta mill-produtturi tal-Unjoni fil-kampjun kienet għadha kunfidenzjali minkejja li għadda ż-żmien.

(67)

Importatur wieħed bl-istess mod iddikjara wkoll li l-Kummissjoni pprovdiet biss informazzjoni limitata fid-divulgazzjoni finali tagħha, li minnha l-importaturi ma kinux kapaċi jibnu mill-ġdid il-metodu ta’ kalkolu, li jillimita d-drittijiet tad-difiża tagħhom f’dan il-każ u ma jikkonformax mar-rekwiżit ta’ amministrazzjoni tajba.

(68)

Huwa mfakkar li Jinan Meide rċeva biss divulgazzjoni sħiħa tal-kalkolu tagħha ta’ dumping peress li din tinkludi data sensittiva. Il-partijiet l-oħra kollha rċevew id-divulgazzjoni ġenerali u d-divulgazzjoni addizzjonali, li jispjegaw il-metodoloġija użata fil-kalkolu tad-dumping.

(69)

B’risposta għall-informazzjoni divulgata lill-kumpanija (premessa (62)), Jinan Meide pprovdiet lista tat-tipi ta’ prodotti l-aktar komparabbli mibjugħa domestikament mill-produttur Indjan mill-pajjiż analogu għat-tipi kollha ta’ prodotti li ma jaqblux esportati lejn l-Unjoni minn Jinan Meide.

(70)

Il-Kummissjoni vvalutat il-kummenti ta’ Jinan Meide u kkonkludiet li l-informazzjoni pprovduta ppermettiet li jiġi stabbilit valur normali għat-tipi kollha ta’ prodotti esportati minn Jinan Meide lejn l-Unjoni abbażi tal-informazzjoni pprovduta mill-produttur Indjan tal-pajjiż analogu. Għalhekk ma kienx iktar meħtieġ li tintuża l-informazzjoni pprovduta mill-produtturi tal-Unjoni fil-kampjun biex jiġi stabbilit il-valur normali, kif imsemmi fil-premessa (60). Fuq din il-bażi, il-Kummissjoni stabbiliet rata ta’ dazju riveduta fuq din il-bażi fil-livell ta’ 36,0 %.

(71)

Il-partijiet interessati għamlu numru ta’ kummenti dwar il-metodoloġija u r-rata tad-dazju msemmija fil-premessi (61) sa (63). Madankollu, wara s-sottomissjoni ta’ informazzjoni addizzjonali minn Jinan Meide, il-metodoloġija ġiet riveduta. Għalhekk, dawn il-kummenti saru irrilevanti.

(72)

Jinan Meide tenna wkoll il-kummenti tiegħu dwar il-ftuħ mill-ġdid ta’ dan il-każ - li l-impożizzjoni retroattiva tad-dazji u d-direzzjoni lill-awtoritajiet doganali biex ma jħallsux lura/jirrimborżaw id-dazji imposti illegalment u r-reġistrazzjoni ta’ esportazzjonijiet ta’ Jinan Meide lejn l-UE kienu illegali kollha. L-istess kummenti li jikkonċernaw ir-retroattività kienu sottomessi wkoll minn diversi importaturi.

(73)

Il-Kummissjoni diġà indirizzat din il-kwistjoni fil-premessi (21) sa (48). Il-Kummissjoni qieset li ma hemm l-ebda impożizzjoni retroattiva tad-dazji, iżda biss l-istabbiliment tal-ammont legali ta’ dazji li għandhom jinġabru fir-rigward ta’ Jinan Meide minn mindu ddaħħlu l-miżuri oriġinali. Barra minn hekk, it-talbiet lill-awtoritajiet doganali jfittxu li jiżguraw il-ġbir xieraq tal-obbligazzjoni antidumping.

(74)

Diversi importaturi sostnew ukoll li dan il-ftuħ mill-ġdid ipoġġi fid-dubju l-effettività tal-istħarriġ ġudizzjarju fl-Unjoni Ewropea.

(75)

Il-Kummissjoni wieġbet għal dan il-kumment fil-premessa (33). L-effettività ta’ stħarriġ ġudizzjarju ma tipprevjenix lill-Kummissjoni milli timponi mill-ġdid dazji antidumping fuq l-ammont xieraq f’każijiet fejn ir-responsabbiltà antidumping tibqa’ fis-seħħ meta jiġu implimentati s-sentenzi tal-qrati tal-UE.

(76)

Fl-14 ta’ Lulju 2020, wara li eżaminat il-kummenti li rċeviet mingħand il-partijiet interessati kollha dwar id-divulgazzjoni tat-23 ta’ Ġunju 2020, il-Kummissjoni bagħtet Divulgazzjoni Addizzjonali li biha tinforma lill-partijiet interessati bid-deċiżjoni tagħha li tibdel il-metodoloġija li għandha tintuża fil-kalkolu tad-dazju antidumping ta’ Jinan Meide u li informathom dwar ir-rata ta’ dazju riveduta.

(77)

Diversi prodotturi Ewropej ikkumentaw fuq il-lista pprovduta minn Jinan Meide tat-tipi ta’ prodotti l-aktar komparabbli mibjugħa domestikament mill-produttur Indjan mill-pajjiż analogu għat-tipi kollha ta’ prodotti li ma jaqblux esportati lejn l-Unjoni minn Jinan Meide msemmija fil-premessa (69). Il-produtturi ddikjaraw li l-isem tal-lista kien qarrieqi, peress li t-tipi ta’ prodotti ma kinux l-aktar komparabbli, iżda pjuttost kellhom prezzijiet ħafna aktar baxxi mill-prodotti ta’ Jinan Meide li suppost kellhom jitqabblu magħhom. Għalhekk, huma kkunsidraw il-kalkolu li rriżulta bħala mhux validu u inadegwat kif ukoll li jfixkel il-kalkolu tad-dumping. Biex jiġi sostnut dan l-argument, saret referenza għal-lista tal-prezzijiet ta’ Jinan Meide.

(78)

Il-Kummissjoni ma qablitx ma’ dan l-argument. Hija qieset li l-lista pprovduta minn Jinan Meide kienet raġonevolment tirrifletti l-aktar tipi komparabbli. Barra minn hekk, ebda parti interessata ma pprovdiet lista alternattiva ta’ tipi ta’ prodotti aktar komparabbli b’sostenn għall-allegazzjonijiet tagħhom. Barra minn hekk, ir-referenza għal-lista tal-prezzijiet ta’ Jinan Meide ma tistax tkun rilevanti f’dan ir-rigward, peress li l-prezzijiet ta’ Jinan Meide kienu affettwati minn dumping u ma jistgħux jintużaw bħala referenza. Għalhekk, dan l-argument ma ntlaqax.

(79)

Jinan Meide laqgħet l-użu tad-data tal-pajjiż analogu biex tikkalkula l-valur normali għat-tipi li ma jaqblux, kif issuġġerit minn Jinan Meide. Madankollu, Jinan Meide pproponiet, għal tipi ta’ prodotti li ma jaqblux, li taġġusta l-valur normali medju Indjan billi tapplika l-proporzjon bejn il-prezz medju tal-produtturi tal-Unjoni fil-kampjun u t-tip ta’ prodott li ma jaqbilx. Jinan Meide ddikjara wkoll li din il-metodoloġija kienet fattibbli, peress li t-tipi kollha ta’ prodotti li jaqblu kienu allegatament mibjugħa wkoll mill-produtturi tal-Unjoni fil-kampjun.

(80)

Madankollu, l-allegazzjoni ta’ Jinan Meide mhijiex korretta. Skont il-lista ta’ tipi ta’ prodotti mibjugħa mill-produtturi tal-Unjoni fil-kampjun, li kienet ukoll disponibbli għal Jinan Meide, kien hemm ħafna tipi ta’ prodotti li jaqblu li ma nbigħux mill-produtturi tal-Unjoni fil-kampjun. Barra minn hekk, billi Jinan Meide għamlet disponibbli informazzjoni addizzjonali dwar it-tipi ta’ prodotti li oriġinarjament ma jaqblux, ma kienx għad hemm bżonn li tintuża l-informazzjoni pprovduta mill-produtturi tal-Unjoni fil-kampjun biex jiġi stabbilit il-valur normali, kif imsemmi fil-premessa (70). Għalhekk, il-Kummissjoni sabet li ma kienx xieraq jew meħtieġ li tintuża l-metodoloġija proposta minn Jinan Meide. Jinan Meide naqas ukoll milli jissostanzja kwalunkwe talba għal aktar aġġustamenti abbażi tal-kalkolu finali.

(81)

Importatur wieħed irrepeta l-kumment tiegħu dwar l-inabbiltà tiegħu li jikkummenta dwar il-kalkolu konkret, peress li d-dettalji tal-metodoloġija ta’ kalkolu sottostanti ma kinux disponibbli għalih u talab aktar informazzjoni dwar kif ġiet ikkalkulata r-rata ta’ dazju finali proposta sabiex jiġu pprovduti kummenti aktar siewja. Huwa tenna wkoll il-kummenti tiegħu dwar ir-rifużjonijiet għal dazji mħallsa fuq il-bażi ta’ regolament annullat għall-importazzjonijiet qabel ir-reġistrazzjoni.

(82)

L-argumenti hawn fuq huma indirizzati fil-premessa 68) u l-premessi (34) sa (46) rispettivament.

(83)

Minħabba li l-marġni ta’ dumping stabbilit mill-ġdid huwa inqas mill-marġini ta’ dannu, skont ir-regoli applikabbli, jenħtieġ li r-rata ta’ dazju antidumping tiġi stabbilita fil-livell tar-rata ta’ dumping. Għaldaqstant, ir-rata tad-dazju antidumping applikabbli għal Jinan Meide hija kif ġej.

(84)

Il-livell rivedut ta’ dazji antidumping japplika mid-data tad-dħul fis-seħħ ta’ dan ir-Regolament. Kif iddikjarat fil-premessa (21) tar-Regolament ta’ reġistrazzjoni, ebda dazju ogħla minn 39,2 % ma għandu jinġabar qabel id-dħul fis-seħħ ta’ dan ir-Regolament. Peress li d-dazju antidumping li jirriżulta minn dawn il-proċedimenti huwa aktar baxx, l-awtoritajiet doganali qed jingħataw struzzjonijiet biex jiġbru l-ammont xieraq fuq l-importazzjonijiet li jikkonċernaw lil Jinan Meide (jiġifieri 36,0 %) u jirrimborżaw kwalunkwe ammont eċċessiv miġbur sa issa skont il-leġiżlazzjoni doganali applikabbli.

(85)

Fid-dawl tal-Artikolu 109 tar-Regolament (UE, Euratom) 2018/1046, meta ammont jiġi rimborżat wara sentenza tal-Qorti tal-Ġustizzja tal-Unjoni Ewropea, l-imgħax li jrid jitħallas jenħtieġ li jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea, fl-ewwel jum kalendarju ta’ kull xahar.

(86)

Abbażi ta’ dak li ntqal hawn fuq, il-Kummissjoni kkunsidrat li kien xieraq li terġa’ timponi d-dazju definittiv antidumping fuq importazzjonijiet ta’ fittings ta’ fondut għal tubi jew pajpijiet bil-kamin, ta’ ħadid fondut malleabbli u ta’ ħadid fondut bil-grafit sferojdali, li jeskludi komponenti ta’ fittings b’kompressjoni bl-użu tal-kamin metriku ISO DIN 13 u kaxxi fejn jingħaqdu l-kejbils tal-ħadid malleabbli bil-kamin ċirkolari mingħajr ma jkollhom għatu, li attwalment jaqgħu taħt il-kodiċi NM ex 7307 19 10 (kodiċi TARIC 7307191010 u 7307191020), u li joriġinaw fir-RPC u mmanifatturati minn Jinan Meide bir-rata ta’ 36,0 %.

(87)

Bħala riżultat ta’ rieżami ta’ skadenza (35) ta’ dan il-prodott li impona dazju antidumping definittiv fuq importazzjonijiet ta’ fittings ta’ fondut għal tubi jew pajpijiet bil-kamin, ta’ ħadid fondut malleabbli u ħadid fondut bil-grafit sferojdali, li joriġinaw mir-RPĊ u mit-Tajlandja, id-dazji antidumping stabbiliti fl-investigazzjoni oriġinali jinżammu sal-24 ta’ Lulju 2024.

(88)

Il-miżuri previsti f’dan ir-Regolament huma f’konformità mal-opinjoni tal-Kumitat imwaqqaf mill-Artikolu 15(1) tar-Regolament (UE) 2016/1036.