(1)

Il-kompetizzjoni miftuħa u ġusta fis-swieq interni tal-elettriku u tal-gass u l-iżgurar ta’ kundizzjonijiet ekwi għall-parteċipanti fis-suq jeħtieġu l-integrità u t-trasparenza tas-swieq tal-enerġija bl-ingrossa. Ir-Regolament (UE) Nru 1227/2011 tal-Parlament Ewropew u tal-Kunsill (2) jistabbilixxi qafas komprensiv biex jinkiseb dan l-objettiv.

(2)

Ir-Regolament (UE) Nru 1227/2011 jobbliga lill-Aġenzija tal-Unjoni Ewropea għall-Kooperazzjoni tar-Regolaturi tal-Enerġija, minn hawn ’il quddiem l-“Aġenzija”, biex timmonitorja s-swieq tal-enerġija bl-ingrossa sabiex tiżgura, b’kooperazzjoni mill-qrib mal-awtoritajiet regolatorji nazzjonali u ma’ awtoritajiet nazzjonali oħra, is-sorveljanza effettiva tagħhom. Il-Punt (b) tal-Artikolu 32(1) tar-Regolament (UE) 2019/942 jintroduċi drittijiet biex jittejjeb il-finanzjament tal-Aġenzija u biex jiġu koperti l-ispejjeż relatati ma’ din il-funzjoni ta’ monitoraġġ u sorveljanza. Jenħtieġ li ż-żieda fil-finanzjament disponibbli għall-Aġenzija tippermetti wkoll lill-Aġenzija ttejjeb il-kwalità tas-servizzi pprovduti mill-Aġenzija lill-entitajiet li jirrapportaw id-data u, jekk applikabbli, lill-parteċipanti fis-suq b’mod ġenerali.

(3)

Il-leġiżlatur jistabbilixxi fl-Artikolu 32 tar-Regolament (UE) 2019/942 il-kamp ta’ applikazzjoni u l-prinċipji bażiċi tal-iskema tad-drittijiet u jagħti l-kompitu lill-Kummissjoni biex tistabbilixxi d-drittijiet u l-mod kif dawn iridu jitħallsu.

(4)

Skont l-Artikolu 32(2) tar-Regolament (UE) 2019/942, saret konsultazzjoni pubblika u ġew ikkonsultati l-Bord Amministrattiv u l-Bord tar-Regolaturi tal-Aġenzija. Il-konsultazzjoni pubblika ġiet ikkumplimentata minn workshop tal-partijiet ikkonċernati li għalih ġew mistiedna d-destinatarji potenzjali attwali kollha tal-iskema tad-drittijiet kif ukoll l-assoċjazzjonijiet li jirrappreżentaw lil dawn id-destinatarji jew parteċipanti oħra fis-suq.

(5)

Ir-Regolament Delegat tal-Kummissjoni (UE) 2019/715 (3) jistabbilixxi r-regolament finanzjarju qafas għall-korpi li huma stabbiliti mill-Unjoni skont it-Trattat dwar il-Funzjonament tal-Unjoni Ewropea u t-Trattat li jistabbilixxi l-Komunità Ewropea tal-Enerġija Atomika u li għandhom personalità ġuridika u li jirċievu kontribuzzjonijiet li jitħallsu mill-baġit tal-Unjoni. L-Aġenzija hija tali korp u, kif meħtieġ mir-Regolament Delegat (UE) 2019/715, adottat ir-regoli finanzjarji tagħha stess, ir-Regolament Finanzjarju tal-Aġenzija (4), li ma jitbiegħdux minn dawk tar-Regolament Delegat (UE) 2019/715.

(6)

Id-dokument ta’ programmazzjoni tal-Aġenzija, stabbilit skont l-Artikolu 20 tar-Regolament (UE) 2019/942 u l-Artikolu 32 tar-Regolament Finanzjarju tal-Aġenzija, fih programmazzjoni annwali u pluriennali u f’dan il-kuntest jistabbilixxi fid-dettall il-kompiti tal-Aġenzija u r-riżorsi użati għal dawk il-kompiti. Id-dokument ta’ programmazzjoni huwa għalhekk l-għodda xierqa biex jiġu identifikati dawk l-ispejjeż li huma eliġibbli biex jiġu koperti mid-drittijiet skont il-punt (b) tal-Artikolu 32(1) tar-Regolament (UE) 2019/942.

(7)

L-ispejjeż eliġibbli jenħtieġ li jinkludu dawk imġarrba mill-Aġenzija għall-ġbir tad-data skont ir-Regolament ta’ Implimentazzjoni tal-Kummissjoni (UE) Nru 1348/2014 (5), iżda anke kull kompitu jew attività oħra skont ir-Regolament (UE) Nru 1227/2011 li jinvolvu t-trattament, l-ipproċessar u l-analiżi tad-data miġbura sabiex jiġu żgurati l-integrità u t-trasparenza tas-swieq tal-enerġija bl-ingrossa. Skont l-Artikolu 20 tar-Regolament (UE) 2019/942, il-Kummissjoni tipprovdi opinjoni dwar l-abbozz tad-dokument ta’ programmazzjoni tal-Aġenzija, inkluż il-proposti tal-Aġenzija li fir-rigward tagħhom l-ispejjeż jitqiesu bħala eliġibbli għal finanzjament permezz ta’ drittijiet.

(8)

Skont l-Artikolu 31 tar-Regolament (UE) 2019/942, l-Aġenzija jenħtieġ li tkun iffinanzjata prinċipalment mill-baġit ġenerali tal-Unjoni. Għalhekk jenħtieġ li d-dħul mid-drittijiet ma jaqbiżx il-kontribuzzjoni lill-Aġenzija mill-baġit tal-Unjoni.

(9)

Sabiex tiġi pprovduta trasparenza li d-drittijiet qegħdin jintużaw biss biex ikopru l-ispejjeż eliġibbli u li l-Aġenzija tibqa’ prinċipalment iffinanzjata mill-baġit ġenerali tal-Unjoni, ir-Rapport Konsolidat tal-Attività Annwali, stabbilit skont l-Artikolu 48 tar-Regolament Finanzjarju tal-Aġenzija, jenħtieġ li jipprovdi informazzjoni dwar is-sorsi differenti ta’ dħul riċevut u l-użu ta’ dan id-dħul.

(10)

Il-parteċipanti fis-suq iridu jiġu rreġistrati mal-awtoritajiet regolatorji tal-Istati Membri skont l-Artikolu 9 tar-Regolament (UE) Nru 1227/2011. Il-partijiet li jirrapportaw, imsejħa wkoll mekkaniżmi ta’ rapportar irreġistrati, huma parteċipanti fis-suq, jew entitajiet li jirrapportaw f’isem il-parteċipanti fis-suq, li jissodisfaw ir-rekwiżiti tekniċi u organizzazzjonali biex jiżguraw skambju u trattament effiċjenti, effikaċi u sikuri tal-informazzjoni għall-finijiet tar-rapportar tal-informazzjoni skont l-Artikolu 8 tar-Regolament (UE) Nru 1227/2011 u tar-Regolament ta’ Implimentazzjoni (UE) Nru 1348/2014. Il-mekkaniżmi ta’ rapportar irreġistrati jenħtieġ li jiġu rreġistrati direttament mal-Aġenzija, għalhekk, huma dawk li jenħtieġ li jħallsu d-drittijiet.

(11)

Il-fatturi mibgħuta lill-mekkaniżmi ta’ rapportar irreġistrati jenħtieġ li jinkludu informazzjoni dwar kif it-tariffa ġiet ikkalkulata, biex ikun magħmul trasparenti għall-mekkaniżmu ta’ rapportar irreġistrat, kif il-parteċipanti differenti fis-suq li għalihom qed tirrapporta d-data qed jikkontribwixxu għat-tariffa fatturata. Sabiex jiġi evitat piż finanzjarju mhux dovut għall-mekkaniżmi ta’ rapportar irreġistrati, jenħtieġ li jkun possibbli li fatturi kbar jitħallsu f’pagamenti parzjali bi qbil mal-Aġenzija. Id-deċiżjoni ta’ sa liema punt l-operaturi tas-sistema ta’ trażmissjoni tal-elettriku jew tal-gass li huma mekkaniżmi ta’ rapportar irreġistrati jistgħu jirkupraw l-ispejjeż imġarrba billi jkollhom iħallsu d-drittijiet dovuti lill-Aġenzija mill-utenti tan-network permezz ta’ tariffi tan-network, hija parti mill-kompiti u s-setgħat tal-awtoritajiet regolatorji tal-Istati Membri skont l-Artikolu 59(1) tad-Direttiva (UE) 2019/944 tal-Parlament Ewropew u tal-Kunsill (6) u l-Artikolu 41(1) tad-Direttiva 2009/73/KE tal-Parlament Ewropew u tal-Kunsill (7).

(12)

Skont l-Artikolu 32(2) tar-Regolament (UE) 2019/942, id-drittijiet jenħtieġ li jkunu proporzjonati mal-ispejjeż tas-servizzi rilevanti kif previst b’mod kosteffettiv u jkunu biżżejjed biex ikopru dawk l-ispejjeż u jenħtieġ li dawn jiġu stabbiliti f’tali livell sabiex jiġi żgurat li ma jkunux diskriminatorji u jiġi evitat li jitqiegħed piż finanzjarju jew amministrattiv żejjed fuq il-parteċipanti fis-suq jew entitajiet li jirrapportaw f’isimhom.

(13)

L-ixprunaturi ewlenin tal-ispejjeż tas-servizzi rilevanti, u għalhekk tal-ispejjeż eliġibbli tal-Aġenzija, huma l-għadd ta’ mekkaniżmi ta’ rapportar irreġistrati, l-għadd ta’ parteċipanti fis-suq li jirrapportaw għalihom u l-ammont u l-karatteristiċi tad-data li jirrapportaw. Sabiex jiġu riflessi dawn l-ixprunaturi tal-ispejjeż, jenħtieġ li t-tariffa li kull mekkaniżmu ta’ rapportar irreġistrat jeħtieġ li jħallas tkun taħlita ta’ ammont fiss, il-komponent tat-tariffa fissa għar-reġistrazzjoni u ammont varjabbli, il-komponent tat-tariffa bbażat fuq ir-rekords tat-tranżazzjonijiet, skont l-għadd ta’ parteċipanti fis-suq li għalihom il-mekkaniżmu ta’ rapportar irreġistrat qed jirrapporta d-data kif ukoll l-ammont u l-karatteristiċi tad-data rrapportata.

(14)

L-ammont fiss jenħtieġ jirrifletti l-ispejjeż tal-Aġenzija għall-ipproċessar tal-applikazzjonijiet għar-reġistrazzjoni bħala mekkaniżmi ta’ rapportar irreġistrati kif ukoll għall-iżgurar tal-konformità kontinwa tal-mekkaniżmi ta’ rapportar diġà rreġistrati mar-rekwiżiti stabbiliti fl-Artikolu 11 tar-Regolament ta’ Implimentazzjoni (UE) Nru 1348/2014. Peress li dawn l-ispejjeż jiġġarrbu mill-Aġenzija irrispettivament minn jekk il-mekkaniżmi ta’ rapportar irreġistrati jirrapportawx ir-rekords tat-tranżazzjonijiet jew id-data fundamentali, l-ammont fiss jenħtieġ jitħallas mill-mekkaniżmi ta’ rapportar irreġistrati kollha.

(15)

Sabiex jiġi evitat piż finanzjarju żejjed fuq il-mekkaniżmi ta’ rapportar irreġistrati, l-ammont varjabbli msemmi fl-Artikolu 6 jenħtieġ jirrifletti l-ammont ta’ rekords tat-tranżazzjonijiet rapportati, li huwa marbut mal-volum ta’ negozjar u għalhekk id-dħul potenzjali ta’ mekkaniżmu ta’ rapportar irreġistrat. Il-komponent varjabbli jenħtieġ iqis il-fatt li ħafna mekkaniżmi ta’ rapportar irreġistrati jirrapportaw data għal għadd kbir ta’ parteċipanti fis-suq li ta’ spiss ikunu attivi f’diversi swieq organizzati u li jkunu qegħdin jużaw kanali differenti ta’ negozjar.

(16)

Il-punti (b) u (c) tal-Artikolu 4(1) tar-Regolament ta’ Implimentazzjoni (UE) Nru 1348/2014 jeskludu produtturi żgħar tal-elettriku u tal-gass, li spiss ikunu produtturi tal-enerġija rinnovabbli, mir-rapportar kontinwu skont ir-Regolament (UE) Nru 1227/2011. Jenħtieġ għalhekk li l-introduzzjoni tad-drittijiet ma toħloqx piż finanzjarju għal produtturi bħal dawn.

(17)

Id-data fundamentali bħall-informazzjoni relatata mal-kapaċità u l-użu tal-faċilitajiet għall-produzzjoni, il-ħażna, il-konsum jew it-trażmissjoni tal-elettriku u tal-gass naturali jew relatata mal-kapaċità u l-użu tal-faċilitajiet tal-LNG, tinġabar biss mill-Aġenzija biex tikkomplementa r-rekords tat-tranżazzjonijiet miġbura bħall-ordnijiet, in-negozjar, il-kuntratti mhux standard jew il-kuntratti ta’ trasport. Id-data fundamentali jenħtieġ għalhekk li ma tiġix inkluża fil-kalkolu tal-komponent tat-tariffa varjabbli. Minħabba li l-istatus ta’ mekkaniżmu ta’ rapportar irreġistrat huwa xprunatur sinifikanti tal-ispejjeż għall-Aġenzija, il-mekkaniżmi ta’ rapportar irreġistrati li jirrapportaw data fundamentali jenħtieġu xorta waħda jħallsu l-komponent ta’ tariffa fissa.

(18)

Sabiex tiskopri b’mod effettiv l-abbużi fis-suq, l-Aġenzija ma tiġborx biss id-data dwar in-negozjar u kuntratti oħra, iżda anke ammont konsiderevoli ta’ data dwar l-ordnijiet għan-negozjar imqiegħda fi swieq organizzati bħal skambji tal-enerġija. Għalhekk, l-ordnijiet għan-negozjar jenħtieġ li jkunu koperti wkoll mill-iskema ta’ drittijiet sabiex tiġi żgurata l-proporzjonalità tal-ispejjeż. Għall-istess raġunijiet, l-informazzjoni dwar iċ-ċiklu tal-ħajja jenħtieġ li tkun koperta wkoll mill-iskema tad-drittijiet.

(19)

Jenħtieġ li l-iskema tad-drittijiet ma tiddiskriminax kontra n-negozjar f’postijiet tas-suq organizzati. In-negozjar ta’ prodotti tal-enerġija bl-ingrossa b’rabta mal-provvista tal-elettriku jew tal-gass naturali f’postijiet tas-suq organizzati huwa kkaratterizzat minn livell ogħla ta’ standardizzazzjoni min-negozjar ta’ tali prodotti barra minn postijiet tas-suq organizzati. Barra minn hekk, ir-rekords tat-tranżazzjonijiet irrapportati li jirriżultaw minn postijiet tas-suq organizzati jinkludu ordnijiet għan-negozjar. L-iżviluppi tas-suq fin-negozjar ta’ kuntratti għall-provvista tal-elettriku jew tal-gass naturali bħan-negozjar algoritmiku u bi frekwenza għolja qed isiru dejjem aktar importanti u dan jirriżulta f’għadd dejjem jiżdied ta’ ordnijiet għan-negozjar li qed jiġu rrapportati minn postijiet tas-suq organizzati għal kull kuntratt ta’ provvista standard meta mqabbla ma’ kuntratti ta’ provvista konklużi barra mill-postijiet tas-suq organizzati. Ir-rekords tat-tranżazzjonijiet dwar il-prodotti tal-enerġija bl-ingrossa b’rabta mal-provvista tal-elettriku jew tal-gass naturali li jirriżultaw minn postijiet tas-suq organizzati jenħtieġ għalhekk jiġu ppeżati b’mod differenti minn dawk li jirriżultaw minn postijiet tas-suq organizzati barra meta jiġi kkalkulat il-komponent tat-tariffa varjabbli.

(20)

Il-prodotti tal-enerġija bl-ingrossa fir-rigward tat-trasport tal-elettriku jew tal-gass naturali huma kkaratterizzati minn livell simili ta’ standardizzazzjoni tal-kuntratti, irrispettivament minn jekk ikunux innegozjati barra jew f’postijiet tas-suq organizzati, u hemm kompetizzjoni limitata bejn in-negozjar f’postijiet tas-suq organizzati u n-negozjar barra minn postijiet tas-suq organizzati. Fil-każ ta’ prodotti bħal dawn, jenħtieġ għalhekk li l-iskema tad-drittijiet ma tiddifferenzjax bejn ir-rekords ta’ tranżazzjonijiet li jirriżultaw minn postijiet tas-suq organizzati u dawk li jirriżultaw minn postijiet barra mis-suq organizzati.

(21)

Peress li d-drittijiet huma ddeterminati kompletament minn din id-Deċiżjoni, li hija l-bażi għall-Aġenzija li tistabbilixxi l-ammonti riċevibbli, skont l-Artikolu 71 tar-Regolament Finanzjarju tal-Aġenzija, il-fatturi jenħtieġ li jkunu noti ta’ debitu.

(22)

Skont l-Artikolu 71 tar-Regolament Finanzjarju tal-Aġenzija, aġenzija għandha tipprovdi biss servizzi wara li t-tariffa korrispondenti tkun tħallset kollha kemm hi. Peress li d-drittijiet huma kkalkulati fuq il-bażi tal-ammont ta’ rekords ta’ tranżazzjoni rrapportati fis-sena preċedenti, l-ammonti riċevibbli jistgħu jiġu stabbiliti biss u l-fatturi jistgħu jintbagħtu biss fil-bidu ta’ kull sena. Il-mekkaniżmi ta’ rapportar irreġistrati madankollu jenħtieġ li jkunu jistgħu jirrapportaw kontinwament id-data lill-Aġenzija, u għalhekk anke qabel ma jkunu ħallsu l-fattura għas-sena rispettiva. Madankollu, jekk mekkaniżmu ta’ rapportar irreġistrat ikun ilu dovut bil-ħlas tal-fattura, l-Aġenzija jenħtieġ ikollha l-possibbiltà li twaqqaf il-kapaċità tal-entità li tirrapporta d-data, minkejja li tkun irreġistrata skont l-Artikolu 11 tar-Regolament ta’ Implimentazzjoni (UE) Nru 1348/2014.

(23)

Is-sena 2021 jenħtieġ li tkun l-ewwel sena li fiha l-mekkaniżmi ta’ rapportar irreġistrati jeħtieġu li jħallsu drittijiet biex ikopru l-ispejjeż eliġibbli identifikati fid-dokument ta’ programmazzjoni li għandu jiġi adottat mill-Bord Amministrattiv tal-Aġenzija sal-31 ta’ Diċembru 2020 skont l-Artikolu 20 tar-Regolament (UE) 2019/942.

(24)

Fil-bidu tal-iskema tad-drittijiet, il-mekkaniżmi ta’ rapportar irreġistrati jenħtieġ li jkollhom il-possibbiltà li jikkunsidraw jekk iridux iżommu r-reġistrazzjoni tagħhom mal-Aġenzija. Għalhekk, dawn jenħtieġ li jkunu jistgħu, anke wara li jirċievu l-fattura fuq it-tariffa annwali, jevitaw li jkollhom iħallsu t-tariffa billi jinfurmaw lill-Aġenzija li jixtiequ jieqfu milli jkunu mekkaniżmu ta’ rapportar irreġistrat. F’dak il-każ, jenħtieġ li jkollhom żmien biex jimplimentaw soluzzjonijiet alternattivi biex jissodisfaw l-obbligi tagħhom skont ir-Regolament (UE) Nru 1227/2011, pereżempju billi jużaw is-servizzi ta’ mekkaniżmu ta’ rapportar irreġistrat ieħor. Fis-snin li ġejjin wara l-ewwel sena, il-mekkaniżmi ta’ rapportar irreġistrati jenħtieġ li jkunu jistgħu jiddeċiedu qabel l-aħħar ta’ kull sena jekk jixtiqux iżommu dan l-istatus jew le u ma jkunux intitolati għal kwalunkwe rimborż ta’ drittijiet mħallsa jew rinunzja ta’ drittijiet dovuti.

(25)

L-Artikolu 32(2) tar-Regolament (UE) 2019/942 jirrikjedi li l-Kummissjoni teżamina regolarment il-livell tad-drittijiet. Dan jenħtieġ li jsir flimkien mal-evalwazzjonijiet tal-prestazzjoni tal-Aġenzija skont l-Artikolu 45 tar-Regolament (UE) 2019/942. Dan ir-rekwiżit ma jżommx lill-Kummissjoni milli tirrevedi l-iskema tad-drittijiet indipendentement minn dawk l-evalwazzjonijiet.

(26)

Din id-Deċiżjoni jenħtieġ li tidħol fis-seħħ fit-tielet jum wara l-pubblikazzjoni tagħha għax id-dokument ta’ programmazzjoni tal-Aġenzija għall-2021-2023 imsemmi fl-Artikoli 3(1) u 3(2) se jiġi adottat f’Diċembru 2020. Peress li l-2021 jenħtieġ li tkun l-ewwel sena li l-mekkaniżmi ta’ rapportar irreġistrati jridu jħallsu d-drittijiet, din id-Deċiżjoni tal-Kummissjoni, ħlief għall-Artikoli 3(1) u 3(2) tagħha, jenħtieġ li ma tiġix applikata mid-dħul fis-seħħ tagħha, iżda mill-1 ta’ Jannar 2021,

(1)

“mekkaniżmu ta’ rapportar irreġistrat” tfisser entità rreġistrata mill-Aġenzija skont l-Artikolu 11 tar-Regolament ta’ Implimentazzjoni (UE) Nru 1348/2014 għall-finijiet ta’ rapportar ta’ rekords ta’ tranżazzjonijiet jew ta’ data fundamentali;

(2)

“rekord ta’ tranżazzjoni” tfisser sett ta’ data individwali li jkun fih dettalji ta’ negozju, ordni ta’ negozjar jew kuntratt, jew li jkun fih informazzjoni dwar iċ-ċiklu tal-ħajja bħal modifiki, terminazzjoni bikrija jew korrezzjonijiet ta’ negozjar, ordni ta’ negozjar jew kuntratti, li jkun rapportat lill-Aġenzija skont l-Artikolu 3 tar-Regolament ta’ Implimentazzjoni (UE) Nru 1348/2014;

(3)

“parteċipant fis-suq” tfisser entità rreġistrata mal-awtorità regolatorja nazzjonali fl-Istat Membru skont l-Artikolu 9 tar-Regolament (UE) Nru 1227/2011.

(a)

l-iskadenza l-aktar bikrija li l-Aġenzija tista’ tistabbilixxi għall-ħlas tal-fatturi skont l-Artikolu 4(2) għandha tkun il-31 ta’ Marzu 2021;

(b)

il-mekkaniżmi ta’ rapportar irreġistrati li jinfurmaw lill-Aġenzija sa mhux aktar tard mill-31 ta’ Marzu 2021 li ma jkunux iridu jibqgħu jiġu rreġistrati mill-Aġenzija ma għandhomx ikunu obbligati jħallsu t-tariffa. Għandhom ikunu jistgħu jkomplu jirrapportaw id-data sat-30 ta’ Ġunju 2021;

(c)

mekkaniżmi ta’ rapportar irreġistrati li jonqsu milli jħallsu t-tariffa jistgħu jiġu diżattivati milli jirrapportaw data lill-Aġenzija skont l-Artikolu 7(3) mhux aktar kmieni mill-1 ta’ Lulju 2021;

(d)

il-punt (c) tal-Artikolu 5(1) ma għandux japplika għad-drittijiet imposti fl-2021.