(1)

Skont il-proċedura stabbilita fl-Artikoli 19 sa 22 tar-Regolament (UE) 2018/1877 (ir-“Regolament Finanzjarju tal-11-il FEŻ”), il-Kummissjoni għandha tippreżenta proposta sal-15 ta’ Ottubru 2020 li tispeċifika: (a) il-limitu massimu għall-ammont annwali tal-kontribuzzjoni għall-2022; (b) l-ammont annwali tal-kontribuzzjoni għall-2021; (c) l-ammont tal-ewwel pagament parzjali tal-kontribuzzjoni għall-2021; u (d) tbassir indikattiv u mhux vinkolanti għall-ammonti annwali mistennija tal-kontribuzzjonijiet għas-snin 2023 u 2024.

(2)

F’konformità mal-Artikolu 46 tar-Regolament Finanzjarju tal-11-il FEŻ, il-Bank Ewropew tal-Investiment (BEI) bagħat lill-Kummissjoni l-estimi aġġornati tiegħu tal-impenji u l-pagamenti taħt l-istrumenti ġestiti minnu.

(3)

L-Artikolu 20(1) tar-Regolament Finanzjarju tal-11-il FEŻ jistipula li s-sejħiet għal kontribuzzjonijiet għandhom l-ewwel jeżawrixxu l-ammonti previsti fil-Fondi Ewropej għall-Iżvilupp li ppreċedew. Għaldaqstant, jenħtieġ li ssir sejħa għall-fondi taħt l-10 FEŻ għall-BEI u taħt il-11-il FEŻ għall-Kummissjoni.

(4)

L-Artikolu 55 tar-Regolament Finanzjarju tal-11-il FEŻ jipprevedi li l-ammonti minn proġetti taħt l-10 FEŻ jew minn Fondi Ewropej għall-Iżvilupp oħrajn li ppreċedew mhux impenjati skont l-Artikolu 1(3) tal-Ftehim Intern bejn ir-Rappreżentanti tal-Gvernijiet tal-Istati Membri tal-Unjoni Ewropea, imlaqqgħin fi ħdan il-Kunsill, dwar l-iffinanzjar ta’ għajnuna mill-Unjoni Ewropea taħt il-qafas finanzjarju pluriennali għall-perjodu mill-2014 sal-2020, skont il-Ftehim ta’ Sħubija AKP-UE, u dwar l-allokazzjoni ta’ assistenza finanzjarja għall-pajjiżi u territorji extra-Ewropej li għalihom tapplika r-Raba’ Parti tat-Trattat dwar il-Funzjonament tal-Unjoni Ewropea, jew diżimpenjati skont l-Artikolu 1(4) ta’ dak il-Ftehim, sakemm ma jiġix deċiż mod ieħor unanimament mill-Kunsill, għandhom jitnaqqsu minn dik il-parti mill-kontribuzzjonijiet tal-Istati Membri msemmija fil-punt (a) tal-Artikolu 1(2) ta’ dak il-Ftehim.

(5)

L-Artikoli 152 u 153 tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (3) jipprevedu li r-Renju Unit għandu jibqa’ Parti għall-FEŻ sal-egħluq tal-11-il FEŻ u ta’ kull FEŻ preċedenti mhux magħluq. Madankollu, ma għandux isir użu mill-ġdid tas-sehem tar-Renju Unit tal-fondi diżimpenjati minn proġetti taħt l-10 FEŻ jew taħt Fondi Ewropej għall-Iżvilupp li ppreċedew.

(6)

Fl-24 ta’ Ottubru 2019, permezz tad-Deċiżjoni (UE) 2019/1800 (4), abbażi ta’ proposta mill-Kummissjoni, il-Kunsill iffissa l-limitu massimu għall-ammont annwali tal-kontribuzzjonijiet għall-FEŻ tal-Istati Membri għall-2021 għal EUR 3 700 000 000 għall-Kummissjoni, u EUR 300 000 000 għall-BEI,