1.   

Intestatura 1: Proġetti ta’ Prijorità u Trasversali fis-Sigurtà Nukleari

Proġett 1: Universalizzazzjoni tal-Emenda tal-2005 għall-Konvenzjoni dwar il-Protezzjoni Fiżika tal-Materjal Nukleari (ACPPNM)

Sfond

Bil-għan li tiġi ffaċilitata l-aderenza mal-Emenda u l-implimentazzjoni tagħha, l-IAEA tipprovdi assistenza leġiżlattiva u teknika fuq talba. Din tinkludi:

1.	Assistenza fl-abbozzar ta’ leġiżlazzjoni ta’ implimentazzjoni nazzjonali, inkluż il-provvediment ta’ korsijiet ta’ taħriġ u seminars nazzjonali, reġjonali u internazzjonali, assistenza bilaterali fl-abbozzar ta’ liġijiet nazzjonali u t-taħriġ ta’ individwi.

2.

Assistenza fl-istabbiliment, l-implimentazzjoni u ż-żamma ta’ reġim ta’ protezzjoni fiżika ta’ Stat, inkluż il-forniment ta’ servizzi ta’ sigurtà nukleari, bħal reviżjonijiet bejn il-pari u servizzi konsultattivi, korsijiet ta’ taħriġ nazzjonali u reġjonali u workshops immirati lejn it-tisħiħ tal-kapaċità u l-iżvilupp tar-riżorsi umani meħtieġa u l-iżvilupp u l-implimentazzjoni ta’ Pjanijiet ta’ Appoġġ Integrati għas-Sigurtà Nukleari (INSSPs).

Għanijiet

L-għanijiet ser ikunu li tingħata assistenza fl-iżvilupp u l-promozzjoni tas-sigurtà nukleari globalment, inkluż il-produzzjoni u l-użu rilevanti ta’ gwida fis-Sensiela tal-IAEA dwar is-Sigurtà Nukleari, biex tiġi promossa l-universalizzazzjoni tal-Konvenzjoni dwar il-Protezzjoni Fiżika tal-Materjal Nukleari (CPPNM) u l-Emenda tagħha, flimkien imsejħa A/CPPNM, u biex jiġi ffaċilitat l-iskambju ta’ informazzjoni dwar is-sigurtà nukleari u jissaħħaħ il-qafas legali internazzjonali.

Riżultati

1.	Rieżami tal-ACPPNM fil-Konferenza tal-Istati Parti tal-2021.

2.	Workshops Internazzjonali, Reġjonali u Nazzjonali – fuq talba mill-Istati Membri – għall-promozzjoni tal-universalizzazzjoni tas-CPPNM u l-għarfien.

3.	Żvilupp ta’ materjal ta’ sensibilizzazzjoni biex titħeġġeġ aktar aderenza mal-ACPPNM.

Eżitu

Kontributi tal-IAEA għall-aderenza mal-A/CPPNM

Proġett 2: Servizzi ta’ Sigurtà tal-Kompjuter u tat-Teknoloġija tal-Informazzjoni

Sfond

Is-sigurtà tal-informazzjoni u tal-kompjuter tibqa’ element kritiku għall-Istati fit-titjib tal-kapaċitajiet ta’ sigurtà nukleari tagħhom.

Is-sigurtà nukleari tiffoka fuq il-prevenzjoni ta’, is-sejbien ta’, u r-rispons għal, atti kriminali jew intenzjonali mhux awtorizzati li jinvolvu jew diretti lejn materjal nukleari, materjal radjuattiv ieħor, faċilitajiet assoċjati, jew attivitajiet assoċjati. Ir-responsabbiltà għas-sigurtà nukleari fi Stat taqa’ kompletament f’idejn l-Istat, li għandu jiżgura s-sigurtà ta’ materjal nukleari, materjal radjuattiv ieħor, faċilitajiet assoċjati, u attivitajiet assoċjati taħt il-ġuriżdizzjoni tiegħu. Kull Stat għandu l-għan li jikseb is-sigurtà nukleari billi joħloq ir-reġim tas-sigurtà nukleari tiegħu stess li jkun xieraq għal dak l-Istat. Il-kompjuters għandhom rwol essenzjali fl-aspetti kollha tal-ġestjoni tat-tħaddim sikur u sigur tal-faċilitajiet nukleari, inkluża s-sigurtà tal-kompjuter u ż-żamma tal-protezzjoni fiżika. Huwa ta’ importanza vitali li dawn is-sistemi kollha jkunu protetti kif xieraq kontra intrużjonijiet malizzjużi. Bil-kapaċitajiet u l-attributi tat-theddid li dejjem qed jinbidlu, is-sigurtà tal-informazzjoni u tal-kompjuter qed tevolvi kontinwament u qed jitfaċċaw kontinwament tekniki, tattiċi u proċessi ġodda ta’ theddid. L-IAEA twettaq ħidma mmirata lejn id-difiża kontra din it-theddida li qed tevolvi.

Għanijiet

It-titjib tas-sigurtà tal-kompjuter u l-kapaċitajiet tas-sigurtà tal-informazzjoni fl-Istati.

Riżultati

1.	Jiġu kompletati u jinżammu aġġornati l-informazzjoni u l-pubblikazzjonijiet ta’ gwida dwar is-sigurtà tal-kompjuter fis-Sensiela tal-IAEA dwar is-Sigurtà Nukleari (Dokumenti ta’ gwida ġodda u aġġornati) u dokumenti u pubblikazzjonijiet tekniċi relatati.

2.	L-Ospitar ta’ laqgħat ta’ esperti speċifiċi għas-sigurtà tal-kompjuter ta’ faċilitajiet nukleari biex jibqgħu aġġornati mal-iżviluppi f’dan il-qasam.

3.	Korsijiet ta’ taħriġ, eżerċizzji u workshops.

4.	Assistenza teknika pprovduta lill-Istati fis-sigurtà tal-kompjuter.

Eżitu

1.

Kontribuzzjonijiet tal-IAEA għal kapaċitajiet imtejba ta’ sigurtà tal-informazzjoni u tal-kompjuter fil-livelli tal-Istat, tal-awtorità kompetenti, u tal-faċilitajiet biex jiġu appoġġati l-prevenzjoni u d-detezzjoni ta’ inċidenti relatati mas-sigurtà tal-kompjuter u r-rispons għalihom li għandhom il-potenzjal li jkollhom impatt negattiv dirett jew indirett fuq is-sikurezza u s-sigurtà nukleari.

2.	It-titjib tal-kooperazzjoni internazzjonali billi jitlaqqgħu flimkien esperti u dawk li jfasslu l-politika biex jippromwovu l-iskambju ta’ informazzjoni u esperjenzi fis-sigurtà tal-kompjuter.

3.	Jinżammu pubblikazzjonijiet ta’ gwida u dokumenti tekniċi fil-qasam tas-sigurtà tal-informazzjoni u tal-kompjuter għas-sigurtà nukleari.

Proġett 3: Tisħiħ tal-Kultura tas-Sigurtà Nukleari

Sfond

Il-kultura tas-sigurtà nukleari hija approċċ multidixxiplinari biex il-forza tax-xogħol titħejja kontra theddid kemm minn barra kif ukoll minn ġewwa, bir-rieda u l-motivazzjoni tagħhom li jsegwu proċeduri stabbiliti, jikkonformaw mar-regolamenti u juru viġilanza. Peress li l-biċċa l-kbira tas-sistemi ta’ sigurtà nukleari huma mfassla, ġestiti u mħaddma mill-bniedem, fl-aħħar mill-aħħar is-suċċess tar-reġim tas-sigurtà nukleari jiddependi fuq in-nies involuti. Il-kultura tas-sigurtà nukleari hija identifikata bħala wieħed minn 12-il prinċipju fundamentali għall-protezzjoni fiżika ta’ materjal u faċilitajiet nukleari fl-ACPPNM kif ukoll wieħed mill-prinċipji bażiċi fil-Kodiċi ta’ Kondotta dwar is-Sikurezza u s-Sigurtà ta’ Materjali Radjuattivi. Il-Gwida ta’ Implimentazzjoni dwar il-Kultura tas-Sigurtà Nukleari, NSS Nru 7 tiddefinixxi l-kultura tas-sigurtà nukleari bħala l-assemblaġġ tal-karatteristiċi, l-attitudnijiet u l-imġiba tal-individwi, l-organizzazzjonijiet u l-istituzzjonijiet, li sservi bħala mezz biex tappoġġa u ssaħħaħ is-sigurtà nukleari. L-NSS Nru 7 tiddefinixxi l-kunċett, tiddeskrivi r-rwoli u r-responsabbiltajiet tal-istituzzjonijiet u l-individwi, u tipprovdi karatteristiċi tal-kultura tas-sigurtà nukleari li jservu biex tinkiseb sigurtà nukleari effettiva.

Il-proġett jiffoka fuq l-appoġġ għall-iżvilupp tar-riżorsi umani tal-Istati Membri permezz ta’ workshops, korsijiet ta’ taħriġ u seminars ta’ għarfien, appoġġ għat-twettiq tal-awtovalutazzjoni tal-kultura tas-sigurtà nukleari u l-promozzjoni tal-esperjenza u l-kondiviżjoni tal-għarfien dwar għodod u metodoloġiji ta’ awtovalutazzjoni u prattiki tajba tal-kultura tas-sigurtà nukleari.

Għan

L-assistenza lill-Istati fit-tisħiħ tal-kultura tas-sigurtà tagħhom.

Riżultati

1.	L-organizzazzjoni ta’ workshops internazzjonali dwar il-kultura tas-sigurtà nukleari biex jiġi appoġġat l-iżvilupp tar-riżorsi umani tal-Istati Membri.

2.	L-iżvilupp u l-konsolidazzjoni ta’ materjal u għodod ta’ gwida u ta’ taħriġ tal-kultura tas-sigurtà nukleari, inklużi għodod ta’ awtovalutazzjoni.

Eżitu

Il-promozzjoni ta’ skambji internazzjonali ta’ esperjenza, għarfien u prattiki tajba fir-rigward ta’ modi kif tiġi żviluppata, imrawma u miżmuma kultura robusta tas-sigurtà nukleari kompatibbli mar-reġimi tas-sigurtà nukleari tal-Istati.

2.   

Intestatura 2: Ġestjoni tal-Informazzjoni

Proġett 1: Valutazzjoni tal-Ħtiġijiet, il-Prijoritajiet u t-Theddid għas-Sigurtà Nukleari (missjonijiet INSSP)

Sfond

L-IAEA tassisti lill-Istati individwali li jitolbu dan biex jidentifikaw u jindirizzaw il-ħtiġijiet tas-sigurtà nukleari permezz tal-iżvilupp u l-implimentazzjoni ta’ INSSPs u l-iżvilupp ta’ għodod ta’ awtovalutazzjoni. Ir-responsabbiltà għas-sigurtà nukleari fi Stat taqa’ kompletament f’idejn l-Istat, li għandu jiżgura s-sigurtà ta’ materjal nukleari, materjal radjuattiv ieħor, faċilitajiet assoċjati, u attivitajiet assoċjati taħt il-ġuriżdizzjoni tiegħu. L-IAEA tappoġġa l-isforzi tal-Istati biex jistabbilixxu reġimi tas-sigurtà nukleari effettivi u sostenibbli, u l-INSSP huwa mekkaniżmu effettiv f’dan ir-rigward. L-INSSP huwa dokument li mhuwiex legalment vinkolanti, madankollu l-approvazzjoni jew l-iffirmar tiegħu mill-Istat jitqiesu bħala indikattivi ta’ impenn biex titkompla l-implimentazzjoni tat-titjib tas-sigurtà nukleari maqbul li jinsab fih. L-INSSP huwa mfassal biex jgħin fl-ippjanar strateġiku tal-attivitajiet ta’ sigurtà nukleari fi Stat u biex jiżgura s-sjieda tal-Istat tat-titjib meħtieġ biex isaħħaħ ir-reġim tas-sigurtà nukleari tiegħu. Huwa jipprovdi valutazzjoni tal-ħtiġijiet tas-sigurtà nukleari tal-Istat u jaqbad attivitajiet li qed jitwettqu, jew li huma ppjanati li jitwettqu, minn Stat u f’kooperazzjoni, fejn xieraq, mal-IAEA jew sħab internazzjonali oħra.

L-INSSP huwa organizzat f’qafas ġenerali ta’ oqsma u objettivi tas-sigurtà nukleari li jipprovdu approċċ sistematiku għall-Istat biex jidentifika l-ħtiġijiet tas-sigurtà nukleari tiegħu. L-intenzjoni hija li Stat jiġi pprovdut b’elementi ġenerali ta’ sigurtà nukleari ta’ natura strateġika biex jgħinu jiggwidaw lil dawk li jieħdu d-deċiżjonijiet u l-objettivi ta’ ppjanar strateġiku bi ħsieb fit-tul li jiġu stabbiliti reġimi ta’ sigurtà nukleari awtosuffiċjenti. L-INSSP huwa strutturat madwar sitt oqsma funzjonali: (1) Qafas Leġiżlattiv u Regolatorju; (2) Valutazzjoni tat-Theddid u tar-Riskju; (3) Reġim ta’ Protezzjoni Fiżika; (4) Detezzjoni ta’ atti kriminali u atti oħra mhux awtorizzati li jinvolvu materjal li ma jaqax taħt kontroll regolatorju; (5) Rispons għal avvenimenti ta’ sigurtà nukleari; u (6) Sostenn tar-reġim tas-sigurtà nukleari ta’ Stat. Minbarra l-missjonijiet tal-INSSP, l-IAEA torganizza wkoll Laqgħat Tekniċi tal-Punti ta’ Kuntatt tal-INSSP.

Il-proċess tal-INSSP huwa appoġġat mis-Sistema ta’ Ġestjoni tal-Informazzjoni dwar is-Sigurtà Nukleari (NUSIMS), sistema volontarja mfassla biex tassisti lill-Istati Membri fir-rieżami tal-istatus tal-infrastruttura tas-sigurtà nukleari tagħhom permezz ta’ Awtovalutazzjoni, kif ukoll fit-traċċar tal-progress tagħhom lejn l-istabbiliment, iż-żamma u s-sostenn ta’ reġim effettiv tas-sigurtà nukleari. L-istruttura ta’ informazzjoni tan-NUSIMS tirrifletti Żoni ta’ Sigurtà Nukleari operazzjonali (NSAs) ewlenin u hija bbażata fuq il-pubblikazzjonijiet dwar il-Prinċipji Fundamentali u r-Rakkomandazzjonijiet tas-Sigurtà Nukleari maħruġa fis-Sensiela tal-IAEA dwar is-Sigurtà Nukleari.

Għanijiet

Jiġu identifikati u kkonsolidati l-ħtiġijiet tas-sigurtà nukleari ta’ Stati individwali f’dokument integrat li jinkludi t-titjib meħtieġ fis-sigurtà nukleari, kif ukoll biex jiġi pprovdut qafas imfassal apposta għall-koordinazzjoni u l-implimentazzjoni ta’ attivitajiet ta’ sigurtà nukleari mwettqa mill-Istat, l-IAEA u donaturi potenzjali.

Tinżamm pjattaforma ta’ informazzjoni komprensiva li tipprovdi fehim tajjeb tal-ħtiġijiet tas-sigurtà nukleari tal-Istati globalment u tappoġġa l-implimentazzjoni tal-Pjan għas-Sigurtà Nukleari.

Riżultati

1.	Żvilupp u implimentazzjoni tal-INSSPs.

2.	Rieżami u allinjament mill-ġdid mal-istruttura tal-INSSP ta’ mekkaniżmu volontarju ta’ awtovalutazzjoni jew għodda għall-użu tal-Istati (NUSIMS).

3.	Laqgħat Tekniċi tal-Punti ta’ Kuntatt tal-INSSP.

4.	Finalizzazzjoni tal-Manwal għall-Utenti tal-INSSP.

Eżitu

Valutazzjoni tal-ħtiġijiet ta’ sigurtà nukleari tal-Istati li jagħmlu t-talba, u l-għoti ta’ appoġġ billi jiġi stabbilit ippjanar strateġiku ta’ attivitajiet rakkomandati ta’ sigurtà nukleari biex jiġu żgurati l-istabbiliment, il-manutenzjoni u s-sostenibbiltà ta’ reġim effettiv tas-sigurtà nukleari biex jgħin lill-Istati b’aderenza mal-obbligi tal-A/CPPNM.

3.   

Intestatura 3: Sigurtà Nukleari ta’ Materjali u Faċilitajiet Assoċjati

Proġett 1: Titjib tal-Protezzjoni Fiżika u l-Kontabbiltà u l-Kontroll tal-Materjal Nukleari għaċ-Ċiklu Kollu tal-Fjuwil

Sfond

Attivitajiet relatati mas-sigurtà nukleari ta’ materjal nukleari fl-użu u l-ħżin, is-sigurtà nukleari taċ-ċiklu tal-fjuwil nukleari u l-faċilitajiet assoċjati matul il-ħajja tagħhom, inkluż il-kontabbiltà u l-kontroll ta’ materjal nukleari għal finijiet ta’ sigurtà nukleari, u l-implimentazzjoni teknika tal-A/CPPNM. L-Aġenzija tiżviluppa gwida u tipprovdi taħriġ u assistenza lill-Istati, fuq talba, għat-titjib tas-sigurtà tal-materjali nukleari bl-użu tal-kontabbiltà u l-kontroll. Il-proġett ser jiffoka fuq l-indirizzar ta’ “theddida minn ġewwa”. Il-programm “Theddida Minn Ġewwa” tal-IAEA jipprovdi gwida dwar miżuri preventivi u protettivi ta’ sigurtà nukleari biex tiġi mitigata t-theddida minn ġewwa. Il-proġett ser jindirizza wkoll il-kontabbiltà u l-kontroll tal-materjal nukleari (NMAC). Sistema NMAC tgħin biex tiskoraġġixxi u tidentifika t-tneħħija mhux awtorizzata ta’ materjal nukleari billi żżomm inventarju tal-materjal nukleari kollu, inkluż informazzjoni relatata mal-post fejn jinsab. L-objettiv primarju ta’ sistema tal-NMAC huwa li żżomm u tirrapporta informazzjoni preċiża, f’waqtha, kompleta u affidabbli dwar l-attivitajiet u l-operazzjonijiet kollha (inklużi l-movimenti) li jinvolvu materjal nukleari. Is-sistema tal-NMAC fil-livell tal-faċilità hija stabbilita fil-kuntest ta’ qafas regolatorju nazzjonali u hija kkontrollata mill-awtorità kompetenti tal-Istat. Ma għandhiex tiġi konfuża mas-Sistema tal-Istat għall-kontabbiltà u l-kontroll tal-materjal nukleari (SSAC) stabbilita biex tissodisfa l-obbligi ta’ salvagwardja internazzjonali.

L-IAEA investiet riżorsi sinifikanti biex tiżviluppa l-Istitut ipotetiku ta’ Riċerka Nukleari Shapash (SNRI). L-għan ewlieni għall-iżvilupp tal-SNRI kien li l-Istati Membri jkunu jistgħu jitħarrġu dwar kwistjonijiet relatati mas-Sigurtà Nukleari mingħajr ma tiġi żvelata informazzjoni sensittiva dwar il-faċilitajiet attwali u r-riskju li tiġi kompromessa s-sigurtà tagħhom. Il-mudell 3D tal-SNRI huwa għodda utli għal skopijiet ta’ taħriġ dwar is-Sigurtà Nukleari. L-iżvilupp ulterjuri tal-SNRI huwa mistenni li jingrana l-qawwa tal-mudell 3D u jtejjeb l-eżiti tat-taħriġ dwar is-Sigurtà Nukleari. Madankollu, l-użu ta’ 3D u VR għal skopijiet ta’ taħriġ jeħtieġ għarfien u riżorsi speċjalizzati. L-objettivi tat-taħriġ jeħtieġ li jitqabblu mill-qrib mas-soluzzjonijiet teknoloġiċi użati biex jinkisbu. L-IAEA beħsiebha tesplora aktar il-punti b’saħħithom potenzjali tal-mudell 3D tal-SNRI u ssostni l-iżvilupp ta’ materjal edukattiv relatat mal-SNRI fil-futur.

Għanijiet:

Tingħata gwida u għodod għall-prevenzjoni u l-protezzjoni kontra t-tneħħija mhux awtorizzata ta’ materjal nukleari u s-sabotaġġ ta’ materjal u faċilitajiet nukleari minn persuni minn ġewwa.

Li jiġi vvalutat liema Stati Membri tal-IAEA li jipproċessaw, jimmaniġġaw jew jaħżnu materjal nukleari qed jużaw sistema NMAC u tiġi pprovduta assistenza lill-awtoritajiet kompetenti u l-operaturi tagħhom biex jiġi żgurat Programm NMAC ta’ suċċess. Li jiġi vvalutat liema Stati Membri tal-IAEA li bħalissa ma għandhomx sistema NMAC ikunu jixtiequ jitolbu assistenza fl-istabbiliment ta’ Programm NMAC.

Riżultati

1.	Il-Produzzjoni ta’ pubblikazzjonijiet ta’ gwida rigward is-Sensiela dwar is-Sikurezza Nukleari u ta’ għodod ta’ tagħlim elettroniku għall-ġlieda kontra theddida minn ġewwa u t-tisħiħ tar-rendikont materjali u l-kontroll għal finijiet tas-sigurtà nukleari fil-faċilitajiet.

2.	L-organizzazzjoni ta’ korsijiet tal-għarfien u tat-taħriġ prattiku.

3.	L-organizzazzjoni ta’ korsijiet tal-għarfien u tat-taħriġ prattiku dwar NMAC.

4.	L-Iżvilupp ulterjuri tal-għodda ta’ taħriġ Shapash virtual reality (VR).

Eżitu

L-għoti kontinwu ta’ appoġġ biex jiġu assistiti l-isforzi tal-Istati biex jistabbilixxu reġimi nazzjonali tas-sigurtà nukleari effettivi u sostenibbli li jappoġġaw il-ġlieda kontra theddida minn ġewwa u jsaħħu r-rendikont u l-kontroll għal finijiet tas-sigurtà nukleari fil-faċilitajiet

Proġett 2: Dokument Kunċettwali tar-Regoli ta’ Proċedura tal-Kunsill (RPK) dwar l-applikazzjoni ta’ miżuri tal-protezzjoni fiżika fl-era tal-COVID-19

Sfond

Dan il-proġett ser jindirizza l-applikazzjoni ta’ kontroll tal-aċċess u teknoloġiji tas-sigurtà nukleari oħra fl-ambjent pandemiku fil-faċilitajiet li jaħżnu u jużaw materjal nukleari u materjal radjuattiv ieħor, inkluż faċilitajiet taċ-ċiklu ta’ kombustibbli nukleari, reatturi ta’ riċerka u enerġija, u faċilitajiet tal-materjal radjuattiv. Matul pandemija simili għall-COVID-19, miżuri mediċi maħsuba biex jimminimizzaw it-trażmissjoni tal-virus jistgħu jaffettwaw l-effettività u saħansitra l-applikazzjoni tat-teknoloġiji u l-proċeduri eżistenti tas-sigurtà nukleari bħal miżuri ta’ kontroll tal-aċċess għall-persunal. Il-bidliet fil-protokolli ta’ implimentazzjoni, il-modifika tat-teknoloġiji eżistenti u l-adattament ta’ teknoloġiji ġodda jistgħu jkunu adatti f’xi ambjenti biex jingħelbu l-isfidi minħabba l-COVID-19. Il-proġett ser jirrieżamina l-esperjenza operattiva tal-Istati Membri tal-IAEA fl-użu tal-kontroll tal-aċċess u miżuri oħra tas-sigurtà nukleari matul il-COVID-19 u jidentifika l-isfidi assoċjati u l-prattiki tajbin. Imbagħad ser jipprova jidentifika t-teknoloġiji u l-proċeduri tas-sigurtà nukleari (inkluż fil-qasam tal-kontroll tal-aċċess) li jeħtieġu titjib u jwettaq evalwazzjonijiet fil-laboratorju ta’ modifiki u titjib potenzjali mill-perspettiva tal-implimentazzjoni tagħhom taħt kundizzjonijiet simili għall-COVID-19. L-IAEA ser tiffaċilita l-iskambju ta’ esperjenza operattiva u informazzjoni teknika bejn l-Istati Membri, tippubblika r-rapporti relatati mal-proġett u tappoġġa t-twettiq ta’ ħidma ta’ riċerka fil-laboratorji magħżula tal-Istati Membri.

Għanijiet

Il-proġett ser jipprova jiżgura miżuri effettivi tas-sigurtà nukleari fil-faċilitajiet tal-materjal nukleari u ta’ materjal radjuattiv ieħor matul sitwazzjoni simili għall-COVID-19. Speċifikament, l-għanijiet tal-proġett jinkludu dawn li ġejjin:

1.	Ir-rieżami tal-esperjenza operattiva tal-Istati Membri tal-implimentazzjoni tal-kontroll tal-aċċess u ta’ miżuri oħra tas-sigurtà nukleari matul il-COVID-19.

2.	L-identifikazzjoni tal-isfidi assoċjati u l-prattiki tajbin.

3.	Il-kunsiderazzjoni tal-ħtieġa tal-modifika tat-teknoloġiji eżistenti jew tal-proċeduri assoċjati mal-użu tagħhom, jew l-iżvilupp ta’ teknoloġiji ġodda biex jittieħed kont tar-rekwiżiti mediċi assoċjati mal-COVID-19.

4.	It-twettiq ta’ valutazzjoni teknika tal-modifiki proposti u tat-teknoloġiji tal-kontroll tal-aċċess li għadhom kif ġew żviluppati u ta’ teknoloġiji oħra tas-sigurtà nukleari biex jittieħed kont tal-kundizzjonijiet tal-pandemija.

Riżultati

1.	Il-gwida ta’ rakkomandazzjonijiet tal-prattiki tajbin u tat-teknoloġija biex tiġi kondiviża l-esperjenza operattiva tal-Istati Membri fis-sigurtà nukleari matul il-COVID-19.

2.	L-identifikazzjoni tal-oqsma tat-teknoloġija li jeħtieġu żvilupp ulterjuri biex jippermettu il-kontroll effettiv tal-aċċess u miżuri oħra tas-sigurtà nukleari taħt kundizzjonijiet simili għall-COVID-19.

Eżiti

Il-miżuri msaħħa tas-sigurtà nukleari għall-prevenzjoni ta’ serq jew sabutaġġ tal-materjal u l-faċilitajiet nukleari u materjal u faċilitajiet radjuattivi oħra matul sitwazzjonijiet simili għal pandemija.

It-teħid ta’ deċiżjonijiet imtejjeb mill-korpi regolatorji u l-industrija dwar l-implimentazzjoni tal-kontroll tal-aċċess u teknoloġiji oħra tas-sigurtà nukleari matul kriżi.

4.   

Intestatura 4: Sigurtà Nukleari ta’ Materjali li Ma Jaqax Taħt il-Kontroll Regolatorju

Proġett 1: Infrastruttura tar-Rispons Istituzzjonali għal Materjal li Ma Jaqax Taħt il-Kontroll Regolatorju

Sfond

Il-proġett jipprovdi assistenza lill-Istati Membri, fuq talba, fl-isforzi tagħhom biex jistabbilixxu l-infrastruttura meħtieġa għall-ġlieda kontra t-traffikar illeċitu ta’ materjal nukleari u materjal radjuattiv ieħor. L-appoġġ għall-infrastruttura taħt il-proġett huwa maqsum f’servizz biex jiġu identifikati l-ħtiġijiet tal-infrastruttura u l-appoġġ lill-Istati biex jistabbilixxu, jimplimentaw, jissorveljaw, jivvalutaw u jsostnu r-reġim tagħhom tas-sigurtà nukleari għar-rispons għal avvenimenti tas-sigurtà nukleari li jinvolvu materjal li ma jaqax taħt kontroll regolatorju. Il-ħtiġijiet tal-infrastruttura ta’ Stat jiġu vvalutati jew permezz tal-proċess tas-Servizz Konsultattiv Internazzjonali għas-Sigurtà Nukleari (INSServ) tal-IAEA, inkella permezz tal-iżvilupp ta’ Pjan Direzzjonali għar-Rispons dwar is-Sigurtà Nukleari. Qasam addizzjonali ta’ responsabbiltà huwa fl-għoti ta’ appoġġ lill-Istati li jixtiequ jimplimentaw sistemi tas-sigurtà nukleari u miżuri għal Avvenimenti Pubbliċi Ewlenin (MPEs).

Għan

Li jiġu assistiti l-Istati fl-istabbiliment u s-sostenn ta’ infrastruttura istituzzjonali effettiva biex jissaħħu l-isforzi nazzjonali għall-protezzjoni tal-persuni, il-proprjetà, l-ambjent u s-soċjetà mill-użu mhux awtorizzat ta’ materjal nukleari u materjal radjuattiv ieħor.

Riżultati

1.	L-iżvilupp ta’ pubblikazzjonijiet ta’ gwida għal infrastruttura tas-sigurtà nukleari u l-materjal u l-għodod ta’ taħriġ relatati.

2.	L-għoti ta’ appoġġ lill-Istati, fuq talba, fit-tisħiħ tal-kapaċitajiet umani u teknoloġiċi biex tinżamm infrastruttura effettiva biex iwettqu r-responsabbiltajiet tagħhom relatati ma’ materjal nukleari u materjal radjuattiv ieħor li ma jaqax taħt kontroll regolatorju.

3.	Il-koordinazzjoni ta’ appoġġ għall-grupp ta’ ħidma dwar ir-rispons.

4.	L-għoti ta’ appoġġ tal-IAEA għall-implimentazzjoni ta’ miżuri tas-sigurtà nukleari għall-MPEs.

Eżiti

L-IAEA tikkontribwixxi għal aktar għarfien tal-ħtieġa għal infrastruttura istituzzjonali effettiva fi Stat biex jiġi żgurat li jitwettqu l-obbligi nazzjonali u internazzjonali.

L-Istati għandhom fehim fil-fond tal-punti ta’ saħħa u l-oqsma għall-iżvilupp tal-MORC (Material Out of Regulatory Control - materjal barra mill-kontroll regolarju) tagħhom relatat mar-reġim tas-sigurtà nukleari.

L-Istati għandhom pjan ċar ibbażat fuq iż-żmien għall-iżvilupp tal-kapaċitajiet ta’ rispons MORC tagħhom.

5.   

Intestatura 5: Żvilupp tal-programm u kooperazzjoni internazzjonali

Proġett 1: Żvilupp tal-Programm tal-Edukazzjoni u t-Taħriġ

Sfond

L-Aġenzija taqdi rwol importanti fl-għoti ta’ programmi koordinati ta’ edukazzjoni u taħriġ li jsaħħu l-kapaċitajiet fl-Istati biex jistabbilixxu u jsostnu r-reġimi tas-sigurtà nukleari. Għadd suffiċjenti ta’ persunal kompetenti u motivat huwa wieħed mill-prerekwiżiti importanti għall-istabbiliment u s-sostenn tar-reġimi tas-sigurtà nukleari tal-Istati. It-taħriġ huwa mezz importanti biex jinkisbu l-kompetenza u l-prestazzjoni adegwata tal-persunal. L-IAEA tassisti lill-Istati billi tipprovdi taħriġ ibbażat fuq it-talbiet u l-ħtiġijiet tal-Istati kif ukoll tappoġġa l-istabbiliment ta’ programmi tat-taħriġ għas-sigurtà nukleari u organizzazzjonijiet tat-taħriġ inkluż Ċentri ta’ Appoġġ għas-Sigurtà Nukleari (NSSCs).

L-Approċċ Sistematiku għat-Taħriġ (SAT) huwa approċċ tat-taħriġ li jipprovdi progressjoni loġika mill-identifikazzjoni tal-għarfien, il-ħiliet u l-attitudnijiet meħtieġa biex jitwettaq impjieg jew rwol fis-sigurtà nukleari għall-iżvilupp u l-implimentazzjoni tat-taħriġ biex jinkisbu dawn il-kompetenzi, u l-evalwazzjoni sussegwenti ta’ dan it-taħriġ. L-użu tat-tagħlim elettroniku u għodod oħra tat-taħriġ tal-kompjuter, ser jingħata attenzjoni partikolari taħt dan il-proġett. Dan il-proġett mhuwiex limitat għall-iżvilupp tal-edukazzjoni u t-taħriġ, iżda wkoll jinvolvi l-koordinazzjoni ta’ networks bħan-Network Internazzjonali tal-Edukazzjoni dwar is-Sigurtà Nukleari (INSEN) u n-Network Internazzjonali taċ-Ċentri ta’ Taħriġ u Appoġġ għas-Sigurtà Nukleari (Network NSSC).

Għanijiet

L-għan ta’ dan il-proġett huwa li jippromwovi approċċ integrat għall-iżvilupp tar-riżorsi umani fil-qasam tas-sigurtà nukleari u jassisti lill-Istati fit-tisħiħ tal-kapaċitajiet tagħhom li jiżviluppaw u jimplimentaw programmi effettivi u sostenibbli edukattivi u tat-taħriġ għall-iżvilupp tar-riżorsi umani fis-sigurtà nukleari, ibbażati fuq il-ħtiġijiet identifikati.

Li tinbena kooperazzjoni aktar b’saħħitha u jiġi ffaċilitat l-iskambju ta’ informazzjoni bejn l-Istati dwar l-iżvilupp u l-implimentazzjoni ta’ programmi tal-edukazzjoni u tat-taħriġ għas-sigurtà nukleari permezz tal-INSEN u n-Network Internazzjonali NSSC u l-Portal tal-Informazzjoni dwar is-Sigurtà Nukleari (NUSEC).

Riżultati

1.	Il-metodoloġija għall-iżvilupp tar-riżorsi umani għas-sigurtà nukleari kondiviża mal-Istati u użata minnhom.

2.	L-istabbiliment tal-Akkademja ta’ Tmexxija għas-Sigurtà Nukleari.

3.	Il-kondiviżjoni tal-esperjenza u l-prattiki tajbin fit-taħriġ dwar is-sigurtà nukleari.

4.	L-għoti ta’ appoġġ lill-Istati Membri fl-applikazzjoni tal-metodoloġija SAT ipprovduta.

5.	L-għoti ta’ appoġġ fit-twettiq ta’ analiżi kontinwa u regolari tal-ħtiġijiet tat-taħriġ (TNA), evalwazzjoni tat-taħriġ, u l-istabbiliment ta’ kumitati tat-taħriġ.

6.	L-appoġġ għall-attivitajiet tan-Network NSSC u l-koordinazzjoni tagħhom, biex tiġi ffaċilitata l-kondiviżjoni tal-informazzjoni u r-riżorsi u tiġi promossa l-kooperazzjoni bejn l-Istati ma’ NSSC jew dawk li għandhom interess fl-iżvilupp ta’ ċentru.

7.	L-għoti ta’ assistenza lill-Istati fl-istabbiliment u l-operat ta’ NSSCs biex jiġu sostnuti r-reġimi nazzjonali tas-sigurtà nukleari permezz ta’ programmi fl-iżvilupp tar-riżorsi umani, l-appoġġ tekniku u l-appoġġ xjentifiku.

8.	L-appoġġ għall-kooperazzjoni reġjonali u subreġjonali bejn l-Istati li jkollhom NSSCs pjanati jew operazzjonali.

9.

L-INSEN.

10.	Programm ta’ Master fis-Sigurtà Nukleari.

11.	Skejjel dwar is-Sigurtà Nukleari

12.	Korsijiet għall-Iżvilupp fil-fakultajiet universitarji dwar l-Edukazzjoni dwar is-Sigurtà Nukleari.

13.	Materjali ta’ Tagħlim għall-Programmi ta’ Edukazzjoni dwar is-Sigurtà Nukleari.

14.	Il-produzzjoni ta’ korsijiet ta’ tagħlim elettroniku fil-lingwi uffiċjali kollha tal-IAEA, inkluż it-traduzzjoni.

15.	Ir-reviżjoni ta’ korsijiet ta’ legat tat-tagħlim elettroniku inkluż ir-reviżjoni tat-traduzzjoni.

Eżitu

L-Istati huma kapaċi jibdew u jimplimentaw b’mod effettiv miżuri biex isostnu r-reġimi nazzjonali tagħhom tas-sigurtà nukleari, b’mod partikolari, permezz ta’ programmi fl-iżvilupp tar-riżorsi umani, l-edukazzjoni, it-taħriġ, l-appoġġ tekniku u l-appoġġ xjentifiku.

6.   

Intestatura 6: It-Tisħiħ tal-Kapaċitajiet u l-Edukazzjoni ffokati fuq l-Ugwaljanza bejn il-Ġeneri fil-qasam tas-Sigurtà Nukleari

Sfond

Imsemmi b’rikonoxximent tal-fiżiku pijunier u darbtejn Rebbieħ tal-Premju Nobel Marie Skłodowska-Curie, il-programm ta’ boroż ta’ studju tnieda mid-Direttur Ġenerali Rafael Mariano Grossi waqt avveniment tal-IAEA b’tifkira tal-Jum Internazzjonali tan-Nisa f’Marzu 2020. Billi tappoġġa l-edukazzjoni u l-esperjenza ta’ xogħol tagħhom, l-inizjattiva għandha l-għan li tħeġġeġ lin-nisa żgħażagħ jistudjaw u jaħdmu fix-xjenza u t-teknoloġija nukleari jew fin-nonproliferazzjoni. Il-programm ta’ fellowship ser jipprovdi boroż ta’ studju sa sentejn għan-nisa li jsegwu lawrija fix-xjenza u t-teknoloġija nukleari jew fl-istudji tan-nonproliferazzjoni. L-istudenti ser jiġu offruti wkoll l-opportunità ta’ internship fl-IAEA, sabiex jissupplementaw l-għarfien espert miksub matul l-istudji tagħhom.

Għanijiet

Il-Programm Marie Skłodowska-Curie għandu l-għan li jispira u jinkoraġġixxi lin-nisa żgħażagħ biex isegwu karriera fix-xjenzi nukleari u l-istudji dwar it-teknoloġija u n-nonproliferazzjoni billi jipprovdi boroż ta’ studju għal programmi ta’ lawrija lil studenti nisa motivati ħafna u ta’ talent flimkien ma’ opportunitajiet ta’ internship fl-IAEA. Fuq medda twila ta’ żmien, il-Programm ser jikkontribwixxi għal ġenerazzjoni ġdida ta’ mexxejja nisa fix-xjenza, it-teknoloġija, l-inġinerija u l-matematika, li ser jixprunaw l-iżviluppi xjentifiċi u teknoloġiċi fil-pajjiżi tagħhom.

Riżultat

Il-programm ser jiffinanzja mill-inqas 100 student għall-boroż ta’ studju, bi spiża totali stmata fil-medda ta’ EUR 4 sa 6 miljuni għal perijodu ta’ sentejn.

Eżitu

Li n-nisa jiġu mgħammra b’edukazzjoni xjentifika u esperjenza ta’ xogħol sabiex tiġi promossa rappreżentanza ugwali fl-applikazzjoni ta’ teknoloġiji nukleari biex jintlaqgħu l-isfidi globali kondiviżi, inkluż is-sigurtà nukleari.