(1)

Id-Deċiżjoni ta’ Implimentazzjoni tal-Kummissjoni 2014/287/UE (2) tistipula l-kriterji għall-istabbiliment u għall-evalwazzjoni tan-Netwerks Ewropej ta’ Referenza (“Netwerks”) u tal-Membri tagħhom u biex jiġi ffaċilitat l-iskambju ta’ informazzjoni u ta’ għarfien espert dwar l-istabbiliment u l-evalwazzjoni ta’ dawk in-Netwerks. L-Artikolu 6 ta’ dik id-Deċiżjoni stieden lill-Istati Membri biex iwaqqfu Bord tal-Istati Membri bl-għan li jiddeċiedu jekk japprovawx jew le l-proposti għan-Netwerks, is-sħubija u t-terminazzjoni tagħhom. L-Istati Membri waqqfu l-Bord tal-Istati Membri, li sussegwentement approva 23 Netwerk f’Diċembru 2016 u wieħed fi Frar 2017. In-Netwerks kollha bdew l-attivitajiet fl-2017.

(2)

Id-Deċiżjoni ta’ Implimentazzjoni tal-Kummissjoni 2019/1269/UE (3) emendat id-Deċiżjoni ta’ Implimentazzjoni 2014/287/UE u introduċiet, fost affarijiet oħra, il-kunċett ta’ bord għal kull Netwerk individwali, kif ukoll limiti ta’ żmien għal dawk il-bords biex joħorġu l-abbozz tal-opinjoni u l-opinjoni finali tagħhom dwar l-applikazzjonijiet għas-sħubija.

(3)

Għalhekk l-Artikolu 8 tad-Deċiżjoni ta’ Implimentazzjoni 2014/287/UE jistabbilixxi l-proċedura għall-applikazzjonijiet għall-isħubija tan-Netwerks eżistenti, inkluż limiti ta’ żmien speċifiċi li l-bords tan-Netwerks u l-fornituri tal-kura tas-saħħa applikanti jridu jikkonformaw magħhom.

(4)

Is-sejħa għall-isħubija tan-Netwerks eżistenti nfetħet fl-2019 u l-valutazzjoni tal-applikazzjonijiet li waslu għadha għaddejja.

(5)

Minħabba t-tifqigħa tal-pandemija tal-COVID-19, l-isforzi tal-fornituri tal-kura tas-saħħa u tal-professjonisti fil-kura medika fl-Unjoni kollha qegħdin jintużaw biex tiġi indirizzata l-kriżi tas-saħħa pubblika li għaddejja bħalissa. Għadd ta’ talbiet minn bordijiet differenti tan-Netwerks ġibdu l-attenzjoni tal-Kummissjoni dwar il-fatt li dawn iċ-ċirkostanzi ta’ eċċezzjoni jagħmluha impossibbli għalihom u għall-applikanti li jissodisfaw il-limiti ta’ żmien stabbiliti fl-Artikolu 8 tad-Deċiżjoni ta’ Implimentazzjoni 2014/287/UE.

(6)

Sabiex il-proċedura ta’ valutazzjoni tkun tista’ tkompli kif xieraq ladarba ċ-ċirkostanzi ta’ eċċezzjoni marbuta mal-emerġenza tas-saħħa pubblika ma jibqgħux jeżistu, jenħtieġ li l-eżami tal-applikazzjonijiet għall-isħubija tan-Netwerks eżistenti li kienu għadhom għaddejjin sal-31 ta’ Marzu 2020 jiġi sospiż mill-1 ta’ April 2020 sal-31 ta’ Awwissu 2020. Sabiex tiġi żgurata trasparenza sħiħa, jenħtieġ li s-servizzi tal-Kummissjoni jinfurmaw lill-bordijiet kollha tan-Netwerks, lill-applikanti u lill-Istati Membri dwar is-sospensjoni u r-raġunijiet għaliha.

(7)

Sabiex titnaqqas l-inċertezza dwar l-applikazzjonijiet pendenti matul il-pandemija, jenħtieġ li din id-Deċiżjoni tidħol fis-seħħ fil-jum wara dak tal-pubblikazzjoni tagħha.

(8)

Għal raġunijiet ta’ ċertezza tad-dritt, jenħtieġ li tapplika b’mod retroattiv mill-1 ta’ April 2020.

(9)

Il-miżuri previsti f’din id-Deċiżjoni huma f’konformità mal-opinjoni tal-Kumitat imwaqqaf skont l-Artikolu 16 tad-Direttiva 2011/24/UE,