(1)

Ir-Regolament tal-Kummissjoni (KE) Nru 474/2006 (2) jistabbilixxi l-lista ta’ kumpaniji tal-ajru li huma soġġetti għal projbizzjoni fuq l-operat fl-Unjoni.

(2)

Skont l-Artikolu 4(3) tar-Regolament (KE) Nru 2111/2005, ċerti Stati Membri u l-Aġenzija tal-Unjoni Ewropea għas-Sikurezza tal-Avjazzjoni (“EASA”) għaddew lill-Kummissjoni informazzjoni li hija rilevanti għall-aġġornament ta’ dik il-lista. Pajjiżi terzi u organizzazzjonijiet internazzjonali pprovdew ukoll informazzjoni rilevanti. Jenħtieġ li l-lista tiġi aġġornata abbażi ta’ dik l-informazzjoni.

(3)

Il-Kummissjoni infurmat lill-kumpaniji tal-ajru kollha kkonċernati, direttament jew permezz tal-awtoritajiet responsabbli għas-sorveljanza regolatorja tagħhom, dwar il-fatti u l-kunsiderazzjonijiet essenzjali li jiffurmaw il-bażi ta’ deċiżjoni li timponilhom projbizzjoni fuq l-operat fl-Unjoni jew li timmodifika l-kundizzjonijiet ta’ projbizzjoni fuq l-operat imposta fuq kumpanija tal-ajru li tkun inkluża fil-lista fl-Annessi A jew B tar-Regolament (KE) Nru 474/2006.

(4)

Il-Kummissjoni tat l-opportunità lill-kumpaniji tal-ajru kkonċernati biex jikkonsultaw id-dokumenti fornuti mill-Istati Membri, biex jissottomettu kummenti bil-miktub u biex jagħmlu preżentazzjoni orali lill-Kummissjoni u lill-Kumitat stabbilit bir-Regolament (KE) Nru 2111/2005 (il-“Kumitat għas-Sikurezza tal-Ajru”).

(5)

Il-Kummissjoni infurmat lill-Kumitat għas-Sikurezza tal-Ajru dwar il-konsultazzjonijiet konġunti li għaddejjin, fil-qafas tar-Regolament (KE) Nru 2111/2005 u r-Regolament tal-Kummissjoni (KE) Nru 473/2006 (3), mal-awtoritajiet kompetenti u mal-kumpaniji tal-ajru tal-Armenja, tal-Belarussja, tal-Guinea Ekwatorjali, tal-Gabon, tal-Indoneżja, tal-Moldova, tar-Repubblika Dominicana u tar-Russja. Il-Kummissjoni infurmat ukoll lill-Kumitat għas-Sikurezza tal-Ajru dwar il-qagħda tas-sikurezza tal-avjazzjoni fl-Angola, fl-Iraq, fil-Kongo Brazzaville, fil-Malasja, fin-Nepal, fir-Repubblika Kirgiża, fit-Turkmenistan u fil-Venezwela.

(6)

L-EASA infurmat lill-Kummissjoni u lill-Kumitat għas-Sikurezza tal-Ajru dwar il-valutazzjonijiet tekniċi mwettqa għall-evalwazzjoni inizjali u l-monitoraġġ kontinwu tal-awtorizzazzjonijiet maħruġa minn Operaturi ta’ Pajjiżi Terzi (“TCO”), skont id-dispożizzjonijiet tar-Regolament tal-Kummissjoni (UE) Nru 452/2014 (4).

(7)

L-EASA infurmat ukoll lill-Kummissjoni u lill-Kumitat għas-Sikurezza tal-Ajru dwar ir-riżultati tal-analiżi tal-ispezzjonijiet fir-rampa li twettqu fil-kuntest tal-programm tal-Valutazzjoni tas-Sikurezza tal-Inġenji tal-Ajru Barranin (“SAFA”), f’konformità mar-Regolament tal-Kummissjoni (UE) Nru 965/2012 (5).

(8)

Barra minn hekk, l-EASA infurmat lill-Kummissjoni u lill-Kumitat għas-Sikurezza tal-Ajru dwar il-proġetti ta’ assistenza teknika li saru fil-pajjiżi terzi milqutin minn projbizzjoni fuq l-operat skont ir-Regolament tal-Kummissjoni (KE) Nru 474/2006. L-EASA pprovdiet informazzjoni dwar il-pjanijiet u t-talbiet għal aktar assistenza teknika u kooperazzjoni biex tittejjeb il-kapaċità amministrattiva u teknika tal-awtoritajiet tal-avjazzjoni ċivili fil-pajjiżi terzi, bil-għan li dawn ikunu megħjuna jsolvu n-nuqqasijiet ta’ konformità ma’ standards internazzjonali applikabbli tas-sikurezza tal-avjazzjoni ċivili. L-Istati Membri ġew mistiedna jirrispondu għal tali talbiet fuq bażi bilaterali, b’koordinazzjoni mal-Kummissjoni u mal-EASA. F’dak ir-rigward, il-Kummissjoni saħqet mill-ġdid fuq is-siwi tal-għoti ta’ informazzjoni lill-komunità internazzjonali tal-avjazzjoni, b’mod partikulari permezz tal-għodda ta’ Sħubija tal-Assistenza għall-Implimentazzjoni tas-Sikurezza fl-Avjazzjoni tal-Organizzazzjoni tal-Avjazzjoni Ċivili Internazzjonali (ICAO), dwar l-assistenza teknika lil pajjiżi terzi pprovduta mill-Unjoni u mill-Istati Membri sabiex tittejjeb is-sikurezza tal-avjazzjoni mad-dinja kollha.

(9)

Il-Eurocontrol ipprovdiet lill-Kummissjoni u lill-Kumitat għas-Sikurezza tal-Ajru b’aġġornament dwar l-istatus tal-funzjoni ta’ allarm tal-SAFA u tat-TCO, u bi statistika attwali għall-messaġġi ta’ allert għall-kumpaniji tal-ajru pprojbiti.

(10)

Wara l-analiżi mill-EASA tal-informazzjoni li ħarġet mill-ispezzjonijiet fir-rampa li twettqu fuq l-inġenji tal-ajru tal-kumpaniji tal-ajru tal-Unjoni u mill-ispezzjonijiet ta’ standardizzazzjoni li twettqu mill-EASA, kif ukoll minn spezzjonijiet u minn awditjar speċifiċi li twettqu mill-awtoritajiet nazzjonali tal-avjazzjoni, diversi Stati Membri ħadu ċerti miżuri ta’ infurzar u infurmaw lill-Kummissjoni u lill-Kumitat għas-Sikurezza tal-Ajru dwar dawk il-miżuri. Il-Bulgarija infurmat lill-Kummissjoni u lill-Kumitat għas-Sikurezza tal-Ajru dwar l-azzjonijiet li kienet ħadet fir-rigward tal-kumpaniji tal-ajru ċċertifikati fil-Bulgarija.

(11)

L-Istati Membri tennew li huma lesti jaġixxu kif meħtieġ f’każ li l-informazzjoni rilevanti dwar is-sikurezza tkun tindika li jkun hemm riskji imminenti għas-sikurezza minħabba nuqqas ta’ konformità min-naħa tal-kumpaniji tal-ajru tal-Unjoni mal-istandards internazzjonali rilevanti tas-sikurezza.

(12)

Qatt ma ġew inklużi kumpaniji tal-ajru mill-Armenja fl-Anness A tar-Regolament (KE) Nru 474/2006.

(13)

F’Lulju 2019, bħala parti mill-proċess ta’ awtorizzazzjoni tat-TCO tagħha, l-EASA wettqet żjara fuq il-post tal-Kumitat tal-Avjazzjoni Ċivili tal-Armenja (“CAC”) u lil żewġ kumpaniji tal-ajru, Taron Avia LLC u Atlantis European Airways.

(14)

Wara dik iż-żjara, l-EASA kkonkludiet li s-CAC, hu u jaġġorna l-Ispeċifikazzjonijiet ta’ Operazzjonijiet ta’ dawn il-kumpaniji tal-ajru, ma kienx segwa b’mod sistematiku l-proċess ta’ ċertifikazzjoni stabbilit. Barra minn hekk, is-CAC ma setax jipprovdi garanziji li kien qiegħed jivvaluta b’mod sistematiku s-Sistemi ta’ Ġestjoni tas-Sikurezza, is-sistemi tal-ajrunavigabbiltà kontinwa u l-organizzazzjonijiet ta’ manutenzjoni tal-kumpaniji tal-ajru li kien ivvaluta. Barra minn hekk, is-CAC ma kellux il-kapaċità meħtieġa biex jidentifika każijiet sinifikanti ta’ nuqqas ta’ konformità mal-istandards internazzjonali tas-sikurezza mill-kumpaniji tal-ajru.

(15)

Minbarra s-sejbiet tal-EASA matul il-proċedura ta’ awtorizzazzjoni tat-TCO tagħha, il-Kummissjoni, permezz ta’ ittra tal-11 ta’ Ottubru 2019, infurmat lis-CAC dwar għadd ta’ punti ta’ tħassib relatati mal-kumpaniji tal-ajru rreġistrati fl-Armenja, u stiednet lis-CAC u lill-kumpanija tal-ajru Taron Avia LLC għal seduta ta’ smigħ quddiem il-Kumitat għas-Sikurezza tal-Ajru f’konformità mal-Artikolu 7 tar-Regolament (KE) Nru 2111/2005.

(16)

Fis-7 ta’ Novembru 2019, il-Kummissjoni, l-EASA u s-CAC kellhom laqgħa teknika fi Brussell. Matul dik il-laqgħa, is-CAC pprovdiet informazzjoni dwar l-attivitajiet ta’ sorveljanza tagħha, inkluż il-pjanijiet tagħha fir-rigward tar-riorganizzazzjoni, tal-ingaġġ u t-taħriġ ta’ persunal tekniku, u t-titjib fil-kapaċitajiet tagħha ta’ sorveljanza. Is-CAC informa lill-Kummissjoni li b’riżultat tas-sejbiet tal-EASA fir-rigward tat-TCO għat-Taron Avia LLC f’Lulju 2019, fis-7 ta’ Novembru 2019, is-CAC iddeċieda li jirrevoka ċ-Ċertifikat tal-Operatur tal-Ajru (“AOC”) ta’ din il-kumpanija tal-ajru. Fid-dawl tal-fatt li t-Taron Avia LLC b’konsegwenza waqfet topera, ma baqax meħtieġ li l-kumpanija tal-ajru tiġi mistiedna għas-seduta ta’ smigħ quddiem il-Kumitat għas-Sikurezza tal-Ajru.

(17)

Abbażi tal-informazzjoni disponibbli bħalissa, inkluż ir-riżultati tal-valutazzjoni tat-TCO mill-EASA, l-ispezzjonijiet fir-rampa mwettqa mill-Istati Membri fil-qafas tal-programm tas-SAFA u l-informazzjoni pprovduta mis-CAC, il-Kummissjoni tqis li s-CAC jenħtieġ li jkompli jiżviluppa l-kapaċità ta’ spezzjoni tiegħu tal-kumpaniji tal-ajru li għandu responsabbiltajiet ta’ ċertifikazzjoni u sorveljanza tagħhom.

(18)

Matul is-seduta ta’ smigħ quddiem il-Kumitat għas-Sikurezza tal-Ajru, li saret fl-20 ta’ Novembru 2019, is-CAC ippreżenta ħarsa ġenerali tal-organizzazzjoni u tal-istruttura tiegħu, fosthom dettalji dwar il-persunal ingaġġat fid-Dipartiment tal-Ajrunavigabbiltà u fid-Dipartiment tal-Operazzjonijiet tiegħu. Is-CAC ipprovda dettalji dwar l-azzjonijiet li ttieħdu fir-rigward ta’ għadd ta’ kumpaniji tal-ajru rreġistrati fl-Armenja, u fir-rigward tat-taħriġ għall-ispetturi tiegħu u l-iżviluppi futuri tiegħu, inklużi l-pjanijiet iddedikati għar-reklutaġġ ta’ spetturi ġodda. Il-Kummissjoni enfasizzat l-aspettattiva tagħha li, bħalma huwa l-każ għall-awtoritajiet kollha tal-avjazzjoni ċivili, is-CAC għandu joħroġ biss l-AOCs u jaċċetta l-inġenji tal-ajru fuq ir-reġistru tiegħu jekk u meta jkollu kapaċità sħiħa li jissoveljahom.

(19)

Barra minn hekk, is-CAC enfasizza fuq il-konverġenza ppjanata mal-qafas regolatorju tal-Unjoni b’riżultat tal-konklużjoni u l-implimentazzjoni tal-Ftehim dwar l-Ispazju Komuni tal-Avjazzjoni bejn l-Unjoni u l-Istati Membri u l-Armenja.

(20)

Matul is-seduta ta’ smigħ, is-CAC impenja ruħu li jżomm il-Kummissjoni kontinwament infurmata dwar l-attivitajiet ta’ sorveljanza u l-azzjonijiet tiegħu biex is-sikurezza tal-avjazzjoni ċivili fl-Armenja tkompli tittejjeb, b’mod partikolari l-iżvilupp ulterjuri u l-implimentazzjoni tal-Programm tas-Sikurezza tal-Istat tal-Armenja.

(21)

Il-Kummissjoni beħsiebha twettaq żjara ta’ valutazzjoni fuq il-post tal-Unjoni fl-Armenja, bl-għajnuna tal-EASA u bl-appoġġ tal-Istati Membri, biex tivverifika jekk iċ-ċertifikazzjoni u s-sorveljanza tal-kumpaniji tal-ajru min-naħa tas-CAC humiex qed isiru b’konformità mal-istandards internazzjonali tas-sikurezza rilevanti. Din iż-żjara ta’ valutazzjoni fuq il-post se tiffoka fuq is-CAC u fuq għażla ta’ kumpaniji tal-ajru tal-Armenja.

(22)

Għalkemm huwa ċar li n-nuqqasijiet varji identifikati se jkollhom jissolvew, dawn mhumiex tali li jesiġu l-inklużjoni tal-kumpaniji tal-ajru kollha mill-Armenja fl-Anness A tar-Regolament (KE) Nru 474/2006.

(23)

Għaldaqstant, abbażi tal-informazzjoni disponibbli bħalissa, u skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f’dan l-istadju, fir-rigward tal-kumpaniji tal-ajru mill-Armenja, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(24)

Jenħtieġ li l-Istati Membri jkomplu jivverifikaw il-konformità effettiva tal-kumpaniji tal-ajru ċċertifikati fl-Armenja mal-istandards internazzjonali rilevanti tas-sikurezza permezz tal-prijoritizzazzjoni tal-ispezzjonijiet fir-rampa tal-kumpaniji tal-ajru kollha ċċertifikati fl-Armenja, skont ir-Regolament (UE) Nru 965/2012.

(25)

Jekk ikun hemm informazzjoni rilevanti dwar is-sikurezza li tindika li hemm riskji imminenti għas-sikurezza minħabba nuqqas ta’ konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri f’konformità mar-Regolament (KE) Nru 2111/2005.

(26)

Qatt ma ġew inklużi kumpaniji tal-ajru mill-Belarussja fl-Anness A tar-Regolament (KE) Nru 474/2006.

(27)

Fis-17 ta’ Settembru 2018, b’segwitu għal nuqqasijiet ta’ sikurezza identifikati mill-EASA fil-qafas tal-proċess ta’ awtorizzazzjoni tat-TCO, il-Kummissjoni bdiet konsultazzjonijiet mad-Dipartiment tal-Avjazzjoni tal-Belarussja (“AD-BLR”), skont l-Artikolu 3(2) tar-Regolament Nru 473/2006.

(28)

Wara s-seduta ta’ smigħ quddiem il-Kumitat għas-Sikurezza tal-Ajru fit-3 ta’ April 2019, il-Kumitat għas-Sikurezza tal-Ajru rrikonoxxa l-progress tal-AD-BLR fl-implimentazzjoni tal-istandards internazzjonali tas-sikurezza, iżda fl-istess ħin iddetermina li l-AD-BLR jenħtieġ li jkompli jtejjeb il-kapaċità tiegħu tas-sorveljanza tas-sikurezza.

(29)

Fil-5 ta’ Novembru 2019, il-Kummissjoni, l-EASA u rappreżentanti tal-AD-BLR kellhom laqgħa teknika. L-iskop ta’ dik il-laqgħa kien li jiġi rieżaminat il-pjan ta’ azzjoni korrettiva implimentat mill-AD-BLR, kif ukoll l-azzjonijiet assoċjati mwettqa mill-AD-BLR biex tiġi żgurata konformità effettiva tas-sistema ta’ sorveljanza tas-sikurezza mal-istandards internazzjonali tas-sikurezza. Il-laqgħa wriet il-ħtieġa li l-AD-BLR jipprovdi lill-Kummissjoni bi kjarifiki ulterjuri fir-rigward ta’ ċerti azzjonijiet li ttieħdu. Il-Kummissjoni rċeviet din l-informazzjoni addizzjonali fl-14 ta’ Novembru 2019.

(30)

Il-Kummissjoni talbet ukoll lill-AD-BLR biex jirrieżamina l-pjan ta’ azzjoni korrettiva billi jkompli jiżviluppa l-analiżi tal-kawżi ewlenin tan-nuqqasijiet fis-sikurezza identifikati matul l-aħħar żjara ta’ valutazzjoni fuq il-post tal-Unjoni, f’Marzu 2019, bil-għan li dan kollu jiġi diskuss fl-ewwel kwart tal-2020 fil-laqgħa teknika li jmiss fi Brussell.

(31)

Fl-20 ta’ Novembru 2019, il-Kummissjoni ppreżentat rapport lil-Kumitat għas-Sikurezza tal-Ajru dwar l-informazzjoni pprovduta mill-AD-BLR, jiġifieri l-progress li sar fl-implimentazzjoni tal-ispettorat iddedikat għas-settur tal-avjazzjoni, il-ħolqien tad-Dipartiment tal-Kwalità, l-istatus tal-programm ta’ ċertifikazzjoni mill-ġdid tal-kumpaniji tal-ajru ċċertifikati mill-AD-BLR kif ukoll il-miżuri li ttieħdu biex jittejjeb il-programm ta’ sorveljanza. Il-Kummissjoni infurmat ukoll lill-Kumitat dwar is-Sikurezza tal-Ajru li s-sitwazzjoni tal-avjazzjoni ċivili fil-Belarussja għadha taħt skrutinju qawwi.

(32)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f’dan l-istadju, fir-rigward tal-kumpaniji tal-ajru mill-Belarussja, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(33)

Jenħtieġ li l-Istati Membri jkomplu jivverifikaw il-konformità effettiva tal-kumpaniji tal-ajru ċċertifikati fil-Belarussja, mal-istandards internazzjonali rilevanti tas-sikurezza permezz tal-prijoritizzazzjoni tal-ispezzjonijiet fir-rampa tal-kumpaniji tal-ajru kollha ċċertifikati fil-Belarussja, skont ir-Regolament (UE) Nru 965/2012.

(34)

Jekk ikun hemm informazzjoni rilevanti dwar is-sikurezza li tindika li hemm riskji imminenti għas-sikurezza minħabba nuqqas ta’ konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri f’konformità mar-Regolament (KE) Nru 2111/2005.

(35)

Qatt ma ġew inklużi kumpaniji tal-ajru mir-Repubblika Dominicana fl-Anness A tar-Regolament (KE) Nru 474/2006.

(36)

Fil-15 ta’ April 2019, b’segwitu għal nuqqasijiet tas-sikurezza identifikati mill-EASA fil-qafas tal-proċess ta’ awtorizzazzjoni tat-TCO u abbażi tal-analiżi tal-ispezzjonijiet fir-rampa mwettqa fil-kuntest tal-programm SAFA, il-Kummissjoni bdiet konsultazzjonijiet mal-Instituto Dominicano de Aviación Civil (‘IDAC’), skont l-Artikolu 3(2) tar-Regolament Nru 473/2006.

(37)

Fl-10 ta’ Ottubru 2019, il-Kummissjoni, l-EASA, rappreżentant ta’ Stat Membru u rappreżentant tal-IDAC kellhom laqgħa teknika. Matul is-seduta, l-IDAC ipprovda lill-Kummissjoni b’informazzjoni ġenerali dwar is-settur tal-avjazzjoni fir-Repubblika Dominicana, il-persunal disponibbli għall-attivitajiet ta’ sorveljanza, u l-mod kif dawn l-attivitajiet jitwettqu. Ġew ukoll diskussi d-diffikultajiet li ltaqgħu magħhom ċerti kumpaniji tal-ajru matul il-proċess ta’ awtorizzazzjoni tat-TCO, l-aktar minħabba nuqqasijiet ta’ sikurezza, kif ukoll is-sejbiet li tqajmu waqt l-ispezzjonijiet fir-rampa tas-SAFA. L-IDAC informa lill-Kummissjoni li għaddejjin miżuri korrettivi biex jiġu indirizzati l-kawżi fundamentali tan-nuqqasijiet tas-sikurezza li identifikat l-EASA. B’mod partikolari, l-IDAC semma l-azzjonijiet kurrenti fir-rigward tat-taħriġ tal-persunal.

(38)

Matul din il-laqgħa, l-IDAC ta informazzjoni wkoll dwar il-livell ta’ implimentazzjoni tal-Programm tas-Sikurezza tal-Istat fir-Repubblika Dominicana. B’kunfidenza li l-attivitajiet tiegħu jitwettqu f’konformità sħiħa mal-istandards internazzjonali tas-sikurezza, l-IDAC stieden lill-Unjoni tagħmel żjara ta’ valutazzjoni fuq il-post. Il-Kummissjoni jidhrilha li fil-fatt hemm bżonn li l-Unjoni tagħmel żjara ta’ valutazzjoni fuq il-post, qabel il-laqgħa li jmiss tal-Kumitat għas-Sikurezza tal-Ajru.

(39)

Għalkemm mill-analiżi tal-informazzjoni li rċevew minn dokumenti u mil-laqgħa teknika, il-Kummissjoni u l-EASA identifikaw diversi nuqqasijiet, dawn in-nuqqasijiet mhumiex ta’ natura li tiġġustifika l-inklużjoni tal-kumpaniji tal-ajru mir-Repubblika Dominicana fl-Anness A tar-Regolament (KE) Nru 474/2006.

(40)

Abbażi tal-informazzjoni disponibbli bħalissa, u skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f’dan l-istadju, fir-rigward tal-kumpaniji tal-ajru mir-Repubblika Dominicana, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(41)

Jenħtieġ li l-Istati Membri jkomplu jivverifikaw il-konformità effettiva tal-kumpaniji tal-ajru ċċertifikati fir-Repubblika Dominicana, mal-istandards internazzjonali rilevanti tas-sikurezza permezz tal-prijoritizzazzjoni tal-ispezzjonijiet fir-rampa tal-kumpaniji tal-ajru kollha ċċertifikati fir-Repubblika Dominicana, skont ir-Regolament (UE) Nru 965/2012.

(42)

Jekk ikun hemm informazzjoni rilevanti dwar is-sikurezza li tindika li hemm riskji imminenti għas-sikurezza minħabba nuqqas ta’ konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri f’konformità mar-Regolament (KE) Nru 2111/2005.

(43)

Fl-2006, il-kumpaniji tal-ajru kollha ċċertifikati fil-Guinea Ekwatorjali ġew inklużi fl-Anness A tar-Regolament (KE) Nru 474/2006.

(44)

F’Ottubru 2017, saret żjara ta’ valutazzjoni tal-Unjoni fuq il-post fil-Guinea Ekwatorjali, li matulha ġie vvalutat ix-xogħol tal-Autoridad Aeronáutica de Guinea Ecuatorial (AAGE). Saru żjarat ukoll lil żewġ kumpaniji tal-ajru attivi ċċertifikati fil-Guinea Ekwatorjali, CEIBA Intercontinental uCronos Airlines. Iż-żjara ta’ valutazzjoni fuq il-post tal-Unjoni identifikat il-ħtieġa għal aktar titjib biex is-sistema ta’ sorveljanza tas-sikurezza tinżamm aġġornata skont l-emendi reċenti għall-istandards internazzjonali tas-sikurezza. Għal dan l-għan, l-AAGE żviluppat pjan ta’ azzjoni korrettiva.

(45)

F’Diċembru 2018, l-AAGE esprimiet lill-Kummissjoni l-interess tagħha biex tiftaħ mill-ġdid djalogu dwar l-emendar tal-Anness A tar-Regolament (KE) Nru 474/2006 fir-rigward tal-kumpaniji tal-ajru kollha ċċertifikati fil-Guinea Ekwatorjali. Fit-12 ta’ Frar 2019, il-Kummissjoni bagħtet ittra lill-AAGE fejn talbet rapport dettaljat dwar l-implimentazzjoni tal-pjan ta’ azzjoni korrettiva u għal kwalunkwe informazzjoni rilevanti li tindika l-progress tal-AAGE fl-indirizzar tan-nuqqasijiet tas-sikurezza. L-AAGE pprovdiet l-informazzjoni bejn il-11 ta’ Lulju u l-20 ta’ Awwissu 2019, iżda din l-informazzjoni kellha xi nuqqasijiet, u għalhekk fl-10 ta’ Settembru 2019 il-Kummissjoni infurmat lill-AAGE li l-informazzjoni pprovduta ma kenitx kompluta. Fis-17 ta’ Settembru 2019 u fit-28 ta’ Ottubru 2019, l-AAGE bagħtet aktar informazzjoni dwar CEIBA Intercontinental u Cronos Airlines, rispettivament, kif ukoll informazzjoni dwar l-organizzazzjoni, il-persunal u l-attivitajiet ta’ sorveljanza tal-AAGE.

(46)

Fis-6 ta’ Novembru 2019, l-EASA kkonkludiet li d-dokumentazzjoni mitluba kollha ġiet ipprovduta u li din l-informazzjoni wriet titjib tal-attivitajiet ta’ sorveljanza fi ħdan is-sistema ta’ sorveljanza tas-sikurezza tal-AAGE, inklużi l-attivitajiet ta’ sorveljanza msaħħa taż-żewġ kumpaniji tal-ajru kummerċjali CEIBA Intercontinental u Cronos Airlines. Madankollu, l-EASA kkonkludiet ukoll li kien għad hemm tħassib dwar il-kapaċità tal-AAGE li tindirizza n-nuqqasijiet b’mod sostenibbli.

(47)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f’dan l-istadju, fir-rigward tal-kumpaniji tal-ajru mill-Guinea Ekwatorjali, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(48)

Jenħtieġ li l-Istati Membri jkomplu jivverifikaw il-konformità effettiva tal-kumpaniji tal-ajru ċċertifikati fil-Guinea Ekwatorjali, mal-istandards internazzjonali rilevanti tas-sikurezza permezz tal-prijoritizzazzjoni tal-ispezzjonijiet fir-rampa tal-kumpaniji tal-ajru kollha ċċertifikati fil-Guinea Ekwatorjali, skont ir-Regolament (UE) Nru 965/2012.

(49)

Fl-2008 (6) il-kumpaniji tal-ajru kollha ċċertifikati fil-Gabon ġew inklużi fl-Anness A tar-Regolament (KE) Nru 474/2006, bl-eċċezzjoni tal-Gabon Airlines u Afrijet li kienu inklużi fl-Anness B ta’ dak ir-Regolament.

(50)

Il-konsultazzjonijiet bejn il-Kummissjoni u l-awtoritajiet kompetenti tal-Gabon, l-Agence Nationale de l’Aviation Civile (“ANAC Gabon”), komplew bil-għan li jiġi mmonitorjat il-progress tal-ANAC Gabon fl-iżgurar li s-sistema ta’ sorveljanza tas-sikurezza tal-avjazzjoni tagħha tikkonforma mal-istandards internazzjonali tas-sikurezza.

(51)

L-awditu tal-ICAO li sar f’Jannar 2019 ikkonkluda li l-ANAC Gabon kisbet rata ta’ implimentazzjoni effettiva tal-istandards internazzjonali tas-sikurezza ta’ 72,6 % li tirrappreżenta żieda minn rata ta’ 26,1 % miksuba fl-2016.

(52)

Mill-14 sat 18 ta’ Ottubru 2019, saret żjara ta’ valutazzjoni fuq il-post tal-Unjoni fil-Gabon, fl-uffiċini tal-ANAC Gabon u fil-binjiet taż-żewġ kumpaniji tal-ajru ċċertifikati attwalment, jiġifieri Afrijet Business Service u Solenta Aviation Gabon.

(53)

Matul iż-żjara, l-ANAC Gabon uriet li kienet għamlet progress sinifikanti fl-aħħar snin, b’mod partikolari li hija kapaċi żżomm u tinforza sistema regolatorja soda. Jidher li r-regolamenti nazzjonali jiġu aġġornati regolarment meta jiġu adottati emendi ġodda għall-istandards u għall-prattiki rakkomandati tal-ICAO. L-ANAC Gabon tat evidenza li kienet stabilixxiet proċess sod għar-reklutaġġ u t-taħriġ tal-persunal tagħha. Il-persunal huwa kkwalifikat tajjeb u motivat għalkemm il-kisba tal-esperjenza tibqa’ sfida. L-ANAC Gabon jenħtieġ li tiżgura li tiġi stabbilita ġestjoni effettiva tal-kompetenzi meħtieġa għall-attivitajiet tagħha. L-ANAC Gabon ipprovdiet evidenza li ċ-ċertifikazzjoni tal-kumpaniji tal-ajru ssir f’konformità mal-proċess tal-ICAO u li l-attivitajiet kollha jiġu ddokumentati sew. L-evidenza indikat ukoll li l-ANAC Gabon kellha l-kapaċitajiet biex tissorvelja l-attivitajiet tal-avjazzjoni fil-Gabon u biex tindirizza d-defiċjenzi identifikati fis-sikurezza.

(54)

Iż-żjarat liż-żewġ kumpaniji tal-ajru attwalment iċċertifikati fil-Gabon ikkonkludew li t-tnejn li huma kellhom kontroll fuq l-ajrunavigabbiltà kontinwa u fuq l-operazzjonijiet imwettqa skont l-istandards internazzjonali tas-sikurezza applikabbli. Madankollu, kampjunar ta’ xi attivitajiet oħra wera ċerti nuqqasijiet żgħar, li l-ebda wieħed minnhom ma kellu impatt immedjat fuq is-sikurezza tal-avjazzjoni.

(55)

Fl-20 ta’ Novembru 2019, il-Kummissjoni u l-Kumitat għas-Sikurezza tal-Ajru semgħu lill-ANAC Gabon u lil-kumpaniji tal-ajru Afrijet Business Service u Solenta Aviation Gabon.

(56)

Matul dik is-seduta, l-ANAC Gabon ippreżentat lill-Kummissjoni u lill-Kumitat għas-Sikurezza tal-Ajru s-sistema stabbilita biex tiġi żgurata s-sorveljanza tas-sikurezza tal-kumpaniji tal-ajru ċċertifikati fil-Gabon. Hija spjegat li l-progress fl-implimentazzjoni effettiva tal-istandards internazzjonali tas-sikurezza, kif intwera mill-verifika tal-ICAO tal-2019, kien ir-riżultat ta’ serje ta’ azzjonijiet meħuda mill-2012. Filwaqt li enfasizzat l-impenn tagħha għal titjib kontinwu, l-ANAC Gabon għarrfet lill-Kummissjoni u lill-Kumitat għas-Sikurezza tal-Ajru dwar l-implimentazzjoni tal-pjan ta’ azzjoni korrettiva żviluppat b’reazzjoni għar-riżultati taż-żjara ta’ valutazzjoni fuq il-post tal-Unjoni li saret f’Ottubru 2019. Dan jinkludi l-objettivi strateġiċi ddefiniti għall-futur, bħall-istabbiliment ta’ Programm tas-Sikurezza tal-Istat, iċ-ċertifikazzjoni ta’ sistema tal-kwalità, u t-titjib ulterjuri tal-implimentazzjoni effettiva ta’ standards ta’ sikurezza internazzjonali. Dawn l-iżviluppi kollha huma ta’ natura pożittiva. Madankollu, it-tkabbir mistenni fl-attività tal-avjazzjoni ċivili fil-Gabon se jirrikjedi l-adozzjoni ta’ miżuri ta’ mitigazzjoni speċifiċi mill-ANAC Gabon, b’mod partikolari f’termini tal-għadd ta’ persunal tal-organizzazzjoni u l-livell ta’ għarfien espert meħtieġ.

(57)

Matul is-seduta ta’ smigħ Afrijet Business Service ippreżentat ħarsa ġenerali tal-organizzazzjoni u l-istruttura tagħha, il-pjanijiet attwali ta’ żvilupp tal-flotta u tar-rotot tagħha kif ukoll elementi ewlenin tas-Sistema ta’ Ġestjoni tas-Sikurezza tal-kumpanija tal-ajru, inkluż il-proċess ta’ identifikazzjoni tal-perikli u l-proċess tal-mitigazzjoni tar-riskji tagħha.

(58)

Solenta Aviation Gabon ippreżentat ħarsa ġenerali tal-organizzazzjoni u l-istruttura tagħha, il-pjanijiet attwali ta’ żvilupp tal-flotta u tar-rotot tagħha kif ukoll elementi ewlenin tas-Sistema ta’ Ġestjoni tas-Sikurezza tal-kumpanija tal-ajru, inkluż il-proċess ta’ identifikazzjoni tal-perikli u l-proċess tal-mitigazzjoni tar-riskji tagħha. Enfasizzat l-impenn tagħha li ttejjeb kontinwament il-prestazzjoni tas-sikurezza tagħha, muri permezz ta’ spjegazzjoni dwar il-kumplessità tal-operazzjonijiet tal-kumpanija tal-ajru u tal-ġestjoni tal-ekwipaġġ, inklużi l-proċessi ta’ ġestjoni tas-sikurezza li jintużaw għall-iżgurar tal-operazzjonijiet sikuri. Żiedet li dawk l-operazzjonijiet jitqiegħdu taħt skrutinju qawwi mill-ANAC Gabon.

(59)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li l-lista tal-kumpaniji tal-ajru li huma soġġetti għal projbizzjoni tal-operat fl-Unjoni jenħtieġ li tiġi emendata biex il-kumpaniji tal-ajru kollha ċċertifikati fil-Gabon jitneħħew mill-Anness A u mill-Anness B tar-Regolament (KE) Nru 474/2006.

(60)

Jenħtieġ li l-Istati Membri jkomplu jivverifikaw il-konformità effettiva tal-kumpaniji tal-ajru ċċertifikati fil-Gabon, mal-istandards internazzjonali rilevanti tas-sikurezza permezz tal-prijoritizzazzjoni tal-ispezzjonijiet fir-rampa tal-kumpaniji tal-ajru kollha ċċertifikati fil-Gabon, skont ir-Regolament (UE) Nru 965/2012.

(61)

Jekk ikun hemm informazzjoni rilevanti dwar is-sikurezza li tindika li hemm riskji imminenti għas-sikurezza minħabba nuqqas ta’ konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri f’konformità mar-Regolament (KE) Nru 2111/2005.

(62)

F’Ġunju 2018, il-kumpaniji tal-ajru kollha mill-Indoneżja tneħħew mill-Anness A tar-Regolament (KE) Nru 474/2006, kif emendat bir-Regolament ta’ Implimentazzjoni tal-Kummissjoni (UE) 2018/871 (7). Bil-għan li jsir iktar monitoraġġ tas-sistema ta’ sorveljanza tas-sikurezza fl-Indoneżja, il-Kummissjoni u d-Direttorat Ġenerali tal-Avjazzjoni Ċivili tal-Indoneżja (“DGCA Indonesia”) baqgħu għaddejjin bil-konsultazzjonijiet skont l-Artikolu 3(2) tar-Regolament (KE) Nru 473/2006. F’dak il-kuntest, b’ittra tas-27 ta’ Settembru 2019, id-DGCA Indonesia pprovda informazzjoni u aġġornament dwar l-attivitajiet ta’ sorveljanza tas-sikurezza għall-perjodu minn Marzu 2019 sa Settembru 2019. Minbarra l-aġġornament dwar il-pjan ta’ azzjoni korrettiva b’riżultat taż-żjara ta’ valutazzjoni fuq il-post tal-Unjoni f’Marzu 2018, l-informazzjoni li pprovdiet id-DGCA Indonesia inkludiet ukoll aġġornamenti fir-rigward tal-lista ta’ detenturi tal-AOC, tal-inġenji tal-ajru rreġistrati, tal-inċidenti serji u l-okkorrenzi tal-avjazzjoni kif ukoll tal-miżuri ta’ infurzar li ħa d-DGCA Indonesia

(63)

Id-DGCA Indoneżjan informa wkoll lill-Kummissjoni dwar l-istatus tal-azzjonijiet korrettivi meħuda wara l-Missjoni ta’ Validazzjoni Koordinata tal-ICAO (ICVM) li seħħet fl-2017, li wriet titjib kontinwu, speċjalment fil-qasam tal-ajrunavigabbiltà.

(64)

Wara eżaminazzjoni ulterjuri tal-informazzjoni u d-dokumentazzjoni li rċeviet, il-Kummissjoni tqis li l-biċċa l-kbira tal-ispjegazzjonijiet mogħtija dwar il-pjan ta’ azzjonijiet korrettivi, l-inċidenti serji u l-miżuri ta’ infurzar huma adegwati. B’riżultat ta’ dan, xi sejbiet tal-pjan ta’ azzjoni korrettiva ngħalqu u d-dati l-ġodda proposti għall-għeluq ġew aċċettati.

(65)

Fid-29 ta’ Ottubru 2019, inħareġ ir-rapport finali tal-inċident tat-titjira Lion Air JT610. Bħala parti mill-attivitajiet ta’ monitoraġġ kontinwu tagħha tal-Indoneżja, il-Kummissjoni se titlob lid-DGCA Indoneżjan biex ikompli jipprovdi informazzjoni relatata, b’mod partikolari fir-rigward tal-azzjonijiet ta’ segwitu għar-rakkomandazzjonijiet dwar is-sikurezza li jinsabu fir-rapport.

(66)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f’dan l-istadju, fir-rigward tal-kumpaniji tal-ajru mill-Indoneżja, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(67)

Jenħtieġ li l-Istati Membri jkomplu jivverifikaw il-konformità effettiva tal-kumpaniji tal-ajru ċċertifikati fl-Indoneżja, mal-istandards internazzjonali rilevanti tas-sikurezza permezz tal-prijoritizzazzjoni tal-ispezzjonijiet fir-rampa tal-kumpaniji tal-ajru kollha ċċertifikati fl-Indoneżja, skont ir-Regolament (UE) Nru 965/2012.

(68)

Jekk ikun hemm informazzjoni rilevanti dwar is-sikurezza li tindika li hemm riskji imminenti għas-sikurezza minħabba nuqqas ta’ konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri f’konformità mar-Regolament (KE) Nru 2111/2005.

(69)

F’April 2019 (8), il-kumpaniji kollha tal-ajru ċċertifikati fil-Moldova, minbarra t-tliet kumpaniji tal-ajru Air Moldova, Fly One u Aerotranscargo, kienu soġġetti għal projbizzjoni sħiħa fuq l-operat, prinċipalment minħabba l-inkapaċità tal-Awtorità tal-Avjazzjoni tal-Moldova, (is-“CAAM”) li timplimenta u tinforza l-istandards internazzjonali tas-sikurezza applikabbli.

(70)

Il-livell baxx ta’ implimentazzjoni tal-istandards internazzjonali tas-sikurezza kien ġie identifikat waqt żjara ta’ valutazzjoni fuq il-post tal-Unjoni li saret fi Frar 2019, fejn tqajmu għadd ta’ osservazzjonijiet fir-rigward tar-regolamenti, tal-proċeduri u tal-prattiki tas-CAAM.

(71)

Fl-24 ta’ Ottubru 2019, saret laqgħa teknika bejn ir-rappreżentanti tal-Kummissjoni, tal-EASA, ta’ Stat Membru u tas-CAAM. Matul il-laqgħa, is-CAAM ipprovdiet informazzjoni dwar azzjonijiet li ttieħdu biex jiġi żviluppat qafas nazzjonali leġiżlattiv konformi mal-istandards internazzjonali tas-sikurezza u mmirat lejn it-titjib tas-sistema tas-sorveljanza tas-sikurezza fil-Moldova, inklużi l-passi li ttieħdu fir-rigward tal-implimentazzjoni ta’ funzjoni aktar b’saħħitha għall-ġestjoni tal-kwalità fi ħdan l-awtorità.

(72)

Is-CAAM ipprovdiet ukoll informazzjoni dwar il-Manwal ta’ Ġestjoni l-ġdid tal-awtorità, dwar il-Lista ta’ Kontroll tal-Analiżi tal-Lakuni fil-Programm tas-Sikurezza Statali, flimkien mal-Politika tas-Sikurezza tal-Istat u l-istatus tal-implimentazzjoni tas-Sistema tal-Ġestjoni tas-Sikurezza għall-kumpaniji tal-ajru tal-Moldova. Barra minn hekk, il-CAAM infurmat lill-Kummissjoni li, b’riżultat tal-awditi u tal-ispezzjonijiet li saru fuq il-kumpaniji tal-ajru rreġistrati fil-Moldova, erba’ AOCs ġew sospiżi, li minnhom tnejn reġgħu ngħataw, u tnejn oħra eventwalment tħassru, jiġifieri CA Î.M „TANDEM AERO” SRL u CA “OSCAR JET” SRL.

(73)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li l-lista tal-kumpaniji tal-ajru li huma soġġetti għal restrizzjonijiet operattivi fl-Unjoni jenħtieġ li tiġi emendata biex jitneħħew il-kumpaniji tal-ajru CA Î.M „TANDEM AERO” SRL u CA “OSCAR JET” SRL mill-Anness A tar-Regolament (KE) Nru 474/2006.

(74)

Jenħtieġ li l-Istati Membri jkomplu jivverifikaw il-konformità effettiva tal-kumpaniji tal-ajru ċċertifikati fil-Moldova, mal-istandards internazzjonali rilevanti tas-sikurezza permezz tal-prijoritizzazzjoni tal-ispezzjonijiet fir-rampa tal-kumpaniji tal-ajru kollha ċċertifikati fil-Moldova, skont ir-Regolament (UE) Nru 965/2012.

(75)

Jekk ikun hemm informazzjoni rilevanti dwar is-sikurezza li tindika li hemm riskji imminenti għas-sikurezza minħabba nuqqas ta’ konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri f’konformità mar-Regolament (KE) Nru 2111/2005.

(76)

Il-Kummissjoni, l-EASA u l-awtoritajiet kompetenti tal-Istati Membri komplew jimmonitorjaw mill-qrib il-prestazzjoni tas-sikurezza tal-kumpaniji tal-ajru li huma ċċertifikati fir-Russja u li joperaw fl-Unjoni, inkluż permezz tal-prijoritizzazzjoni tal-ispezzjonijiet fir-rampa li jridu jitwettqu fir-rigward ta’ ċerti kumpaniji tal-ajru Russi skont ir-Regolament (UE) Nru 965/2012.

(77)

Fil-25 ta’ Ottubru 2019, rappreżentanti tal-Kummissjoni, tal-EASA u ta’ Stat Membru ltaqgħu ma’ rappreżentanti tal-Aġenzija Federali Russa tat-Trasport bl-Ajru (“FATA”), biex jirrieżaminaw il-prestazzjoni tas-sikurezza tal-kumpaniji tal-ajru ċċertifikati fir-Russja abbażi tar-rapporti tal-ispezzjonijiet fir-rampa mwettqa bejn id-19 ta’ Marzu 2019 u l-4 ta’ Ottubru 2019, u biex jiġi identifikat f’liema każijiet jenħtieġ li l-FATA ssaħħaħ l-attivitajiet ta’ sorveljanza tagħha.

(78)

Ir-rieżami tal-ispezzjonijiet fir-rampa tas-SAFA tal-kumpaniji tal-ajru ċċertifikati fir-Russja ma żvela l-ebda nuqqas rikorrenti tas-sikurezza. Matul il-laqgħa, l-FATA infurmat lill-Kummissjoni dwar il-miżuri li ttieħdu biex tiġi żgurata l-konformità tal-kumpaniji tal-ajru ċċertifikati fir-Russja mar-rekwiżiti tal-profiċjenza fil-lingwa Ingliża kif definiti mill-ICAO.

(79)

Abbażi tal-informazzjoni disponibbli attwalment, inkluż l-informazzjoni pprovduta mill-FATA fil-laqgħa, il-Kummissjoni tqis li f’dan l-istadju, il-FATA għandha l-ħila u r-rieda meħtieġa biex tindirizza n-nuqqasijiet fis-sikurezza. Għal dawk ir-raġunijiet, il-Kummissjoni kkonkludiet li ma kienx hemm bżonn li jsir smigħ tal-awtoritajiet tal-avjazzjoni Russi u ta’ kwalunkwe kumpanija tal-ajru ċċertifikata fir-Russja quddiem il-Kumitat għas-Sikurezza tal-Ajru.

(80)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f’dan l-istadju ma hemm ebda raġuni biex tiġi emendata l-lista tal-kumpaniji tal-ajru li huma soġġetti għall-projbizzjoni fuq l-operat fl-Unjoni biex jiġu inklużi kumpaniji tal-ajru mir-Russja.

(81)

Jenħtieġ li l-Istati Membri jkomplu jivverifikaw il-konformità effettiva tal-kumpaniji tal-ajru mir-Russja mal-istandards internazzjonali rilevanti tas-sikurezza, permezz tal-prijoritizzazzjoni tal-ispezzjonijiet fir-rampa skont ir-Regolament (UE) Nru 965/2012.

(82)

Meta dawk l-ispezzjonijiet jidentifikaw riskju imminenti għas-sikurezza minħabba nuqqas ta’ konformità mal-istandards internazzjonali tas-sikurezza, il-Kummissjoni tista’ timponi projbizzjoni fuq l-operat tal-kumpaniji tal-ajru ċċertifikati mir-Russja u tinkludihom fl-Anness A jew fl-Anness B tar-Regolament (KE) Nru 474/2006.

(83)

Għaldaqstant, jenħtieġ li r-Regolament (KE) Nru 474/2006 jiġi emendat skont dan.

(84)

Il-miżuri previsti f’dan ir-Regolament huma konformi mal-opinjoni tal-Kumitat għas-Sikurezza tal-Ajru stabbilit permezz tar-Regolament (KE) Nru 2111/2005.