(1)

Skont l-Artikolu 14(4) tar-Regolament ta’ Implimentazzjoni tal-Kummissjoni (UE) Nru 809/2014 (2), f’ċirkustanzi ġġustifikati kif xieraq, l-Istati Membri jistgħu jawtorizzaw lill-benefiċjarji tal-pagament għal prattiki agrikoli li huma ta’ benefiċċju għall-klima u għall-ambjent skont ir-Regolament (UE) Nru 1307/2013 tal-Parlament Ewropew u tal-Kunsill (3) jimmodifikaw l-applikazzjonijiet uniċi tagħhom b’rabta mal-użu tal-ħbula raba’ ddikjarati wara d-data finali għat-tressiq tal-applikazzjoni unika. Matul l-istaġun tat-tkabbir, il-benefiċjarji jaf ikollhom bżonn jadattaw il-pjan ta’ kultivazzjoni f’dak li għandu x’jaqsam mal-għalla jew mal-post fejn tinsab. Dan jista’ jkun minħabba kundizzjonijiet tat-temp li jkunu nbidlu jew minħabba kundizzjonijiet agrikoli oħrajn. Il-benefiċjarji tal-pagament imsemmi fl-Artikolu 30 tar-Regolament (UE) Nru 1305/2013 tal-Parlament Ewropew u tal-Kunsill (4) jistgħu jkunu f’sitwazzjoni simili, b’mod partikulari f’dak li għandu x’jaqsam mal-għelejjel tat-titwiq. Għalhekk, huwa xieraq ukoll li l-Istati Membri jitħallew jawtorizzaw lil dawn il-benefiċjarji jemendaw l-applikazzjoni unika jew it-talba għall-ħlas f’dak li għandu x’jaqsam mal-użu tal-ħbula raba’ ddikjarati għall-finijiet tal-pagament imsemmi fl-Artikolu 30 tar-Regolament (UE) Nru 1305/2013. Barra minn hekk, jenħtieġ li dan il-paragrafu jitħassar mill-Artikolu 14 tar-Regolament ta’ Implimentazzjoni (UE) Nru 809/2014 u jiddaħħal fl-Artikolu 15 tiegħu, minħabba li dan għandu x’jaqsam ma’ emendi fl-applikazzjoni unika jew fit-talba għall-ħlas. Jenħtieġ li jiġi ċċarat ukoll li dawn l-emendi jistgħu jsiru wara li jkunu għaddew l-iskadenzi ġenerali għan-notifika tal-emendi u li l-Istati Membri jistgħu jistabbilixxu skadenza finali għan-notifika tagħhom.

(2)

L-Artikolu 15(1b) jipprevedi emendi fl-applikazzjoni unika jew fit-talba għall-ħlas meta jsiru verifiki permezz tal-monitoraġġ. Huwa xieraq li jiġi ċċarat li din id-dispożizzjoni tirreferi għall-possibbiltà li jiġu emendati l-applikazzjoni unika jew it-talbiet għall-ħlas wara r-riżultati provviżorji tal-verifiki permezz tal-monitoraġġ. Jenħtieġ li jiġi speċifikat ukoll x’jistgħu jkopru dawn l-emendi.

(3)

L-Artikolu 15(2) tar-Regolament ta’ Implimentazzjoni (UE) Nru 809/2014 jistabbilixxi l-iskadenza għall-emenda tal-applikazzjoni unika jew tat-talba għall-ħlas. L-Artikolu 15(3) ta’ dak ir-Regolament jistabbilixxi s-sitwazzjonijiet li fihom ma tkunx tista’ tiġi emendata iktar l-applikazzjoni unika jew it-talba għall-ħlas. Dawn ir-regoli ma japplikawx f’każ li l-benefiċjarji jsirulhom verifiki permezz tal-monitoraġġ, minħabba l-ispeċifiċitajiet ta’ dawn it-tipi ta’ verifiki. Għalhekk huwa xieraq li jiġi ċċarat meta dawn il-benefiċjarji jistgħu jagħmlu t-tali emendi. Barra minn hekk, huwa xieraq li l-awtoritajiet kompetenti jitħallew jistabbilixxu d-data għan-notifika tat-tali emendi fil-livell tal-iskema tal-għajnuna, tal-miżura ta’ appoġġ jew tat-tip ta’ operazzjoni ċċekkjata permezz tal-monitoraġġ.

(4)

L-Istati Membri jistgħu jagħżlu li jwettqu l-verifiki permezz tal-monitoraġġ għal ċerti skemi tal-għajnuna, għal ċerti miżuri ta’ appoġġ, għal ċerti tipi ta’ operazzjonijiet jew għal ċerti rekwiżiti u standards rilevanti għall-kundizzjonalità, filwaqt li jżommu l-verifiki fuq il-post ibbażati fuq il-kampjuni għal skemi, miżuri, tipi ta’ operazzjonijiet jew rekwiżiti u standards oħrajn. Dan jista’ jwassal għal sitwazzjonijiet fejn il-verifiki permezz tal-monitoraġġ jiżvelaw sejbiet li jkunu rilevanti biex tiġi stabbilita l-konformità mar-regoli tal-iskemi, tal-miżuri, tat-tipi ta’ operazzjonijiet jew tal-istandards u tar-rekwiżiti rilevanti għall-kundizzjonalità li jsirulhom verifiki bbażati fuq il-kampjuni. Għalhekk huwa xieraq li jiġu previsti regoli dwar kif għandhom jitqiesu dawk is-sejbiet.

(5)

Jenħtieġ li jiġi ċċarat li l-obbligu ta’ kontronotifika previst fl-Artikolu 27 tar-Regolament ta’ Implimentazzjoni (UE) Nru 809/2014 japplika wkoll għar-rekwiżiti u għall-istandards rilevanti għall-kundizzjonalità. Għalhekk jenħtieġ li l-Artikolu 27 jiġi emendat kif xieraq.

(6)

L-Artikolu 38 tar-Regolament ta’ Implimentazzjoni (UE) Nru 809/2014 għandu x’jaqsam mal-kejl taż-żona. Madankollu, il-paragrafu 1 ta’ dak l-Artikolu jirreferi għall-possibbiltà li l-verifiki tal-eliġibbiltà u l-kejl taż-żona jiġu limitati għal kampjun magħżul b’mod aleatorju ta’ mill-inqas 50 % tal-ħbula raba’ li għalihom tkun intbagħtet applikazzjoni għall-għajnuna jew talba għall-ħlas. Għall-finijiet taċ-ċarezza, jenħtieġ li r-regoli dwar il-verifika tal-kundizzjonijiet tal-eliġibbiltà jitħassru mill-Artikolu 38 u jiddaħħlu fl-Artikolu 39.

(7)

L-Istati Membri jistgħu jagħżlu li jwettqu l-verifiki permezz tal-monitoraġġ għal ċerti skemi tal-għajnuna, għal ċerti miżuri ta’ appoġġ jew għal ċerti tipi ta’ operazzjonijiet skont l-Artikolu 40a tar-Regolament ta’ Implimentazzjoni (UE) Nru 809/2014, filwaqt li jżommu l-verifiki fuq il-post ibbażati fuq il-kampjuni li jinkludu l-kejl taż-żona msemmi fl-Artikolu 38 ta’ dak ir-Regolament għal skemi, miżuri jew operazzjonijiet oħrajn. Dan jista’ jwassal għal sitwazzjonijiet fejn ħabel raba’ mkejjel skont il-verifika fuq il-post ibbażata fuq il-kampjuni jkun differenti miż-żona stabbilita bħala l-bażi għall-kalkolu tal-appoġġ jew tal-għajnuna meta jiġu applikati l-verifiki permezz tal-monitoraġġ. Għalhekk jenħtieġ li l-Artikolu 38 tar-Regolament ta’ Implimentazzjoni (UE) Nru 809/2014 jiċċara liema żona tipprevali f’dawn il-każijiet.

(8)

Il-ħbula raba’ kollha ddikjarati minn benefiċjarju u magħżula għal verifika fuq il-post iridu jitkejlu skont l-Artikolu 38 tar-Regolament ta’ Implimentazzjoni (UE) Nru 809/2014 u l-kundizzjonijiet tal-eliġibbiltà tagħhom iridu jiġu vverifikati skont l-Artikolu 39 tal-istess Regolament. Dawn jinkludu l-ħbula raba’ l-kbar li jkunu bwar permanenti jew mergħat permanenti li jkunu jintużaw b’mod komuni minn diversi benefiċjarji, li jistgħu jinvolvu ammont kbir ta’ xogħol għall-awtoritajiet kompetenti. Sabiex jiġi limitat l-ammont ta’ xogħol filwaqt li jinżamm livell xieraq ta’ protezzjoni tal-Fondi tal-Unjoni, huwa xieraq li tiġi prevista l-possibbiltà li l-kejl u l-verifiki tal-kriterji tal-eliġibbiltà, tal-impenji u ta’ obbligi oħrajn jiġu sostitwiti b’verifiki bbażati fuq l-ortoimmaġnijiet użati għall-aġġornamenti regolari tas-sistema ta’ identifikazzjoni tal-irqajja’ tal-art u li jiġu stabbiliti l-kundizzjonijiet li bihom l-awtoritajiet kompetenti jistgħu jużaw din il-possibbiltà.

(9)

Meta l-verifika tal-eliġibbiltà tal-ħbula raba’ matul il-verifiki fuq il-post tal-miżuri tal-iżvilupp rurali tkun limitata għal kampjun magħżul b’mod aleatorju ta’ mill-inqas 50 % tal-ħbula raba’ li għalihom tkun intbagħtet talba għall-ħlas, jista’ jkun li xi wħud mill-kriterji tal-eliġibbiltà, mill-impenji u mill-obbligi l-oħrajn ma jiġux iċċekkjati b’mod adegwat. Għalhekk huwa xieraq li, fl-Artikolu 39 tar-Regolament ta’ Implimentazzjoni (UE) Nru 809/2014, jiġi previst li jintgħażel kampjun addizzjonali bbażat fuq ir-riskju li jippermetti li jiġu vverifikati t-tali kriterji ta’ eliġibbiltà, impenji jew obbligi oħrajn.

(10)

Għan ewlieni tal-verifiki permezz tal-monitoraġġ huwa li l-benefiċjarji jingħataw appoġġ biex jissodisfaw il-kriterji tal-eliġibbiltà, l-impenji u l-obbligi l-oħrajn u li huma jingħataw il-possibbiltà jirranġaw il-kwistjonijiet li joħorġu minn dawn il-verifiki. Għal dan il-għan, huwa importanti li jiġi ċċarat l-obbligu tal-awtoritajiet kompetenti li jikkomunikaw mal-benefiċjarji fil-ħin, b’mod partikulari dwar it-twissijiet u dwar ir-riżultati provviżorji tal-analiżi awtomatizzata ta’ serje kronoloġika ta’ data satellitari. Għalhekk, jenħtieġ li l-punt (d) tal-ewwel subparagrafu tal-Artikolu 40a(1) tar-Regolament ta’ Implimentazzjoni (UE) Nru 809/2014 jistabbilixxi l-prinċipji ewlenin dwar il-komunikazzjoni tar-riżultati provviżorji tal-verifiki permezz tal-monitoraġġ min-naħa tal-awtoritajiet kompetenti.

(11)

It-tieni subparagrafu tal-Artikolu 40a(1) tar-Regolament ta’ Implimentazzjoni (UE) Nru 809/2014 jirreferi għall-ispezzjonijiet fiżiċi. Huwa importanti li jiġi ċċarat li dawn l-ispezzjonijiet fiżiċi ma jimplikawx il-kejl taż-żona sakemm dan ma jkunx meħtieġ biex tinsilet konklużjoni dwar l-eliġibbiltà tal-għajnuna jew tal-appoġġ mitlub.

(12)

Meta l-awtoritajiet kompetenti jwettqu verifiki fuq il-post ibbażati fuq il-kampjuni skont l-Artikolu 38 u l-Artikolu 39 tar-Regolament ta’ Implimentazzjoni (UE) Nru 809/2014, dawn jistgħu jillimitaw il-verifiki għal kampjun magħżul b’mod aleatorju ta’ mill-inqas 50 % tal-ħbula raba’ li għalihom tkun intbagħtet applikazzjoni għall-għajnuna jew talba għall-ħlas. Huwa xieraq li jkun permess l-istess livell ta’ flessibbiltà f’każijiet fejn, skont il-punt (c) tal-ewwel subparagrafu tal-Artikolu 40a(1), il-verifiki permezz tal-monitoraġġ ikunu jeħtieġu kontroll ibbażat fuq kampjun tal-ħbula raba’ tal-benefiċjarji li lilhom jolqtu l-kriterji li ma jistgħux jiġu mmonitorjati.

(13)

Il-proċedura awtomatizzata użata fil-kuntest tal-verifiki permezz tal-monitoraġġ tista’ tiżvela sejbiet li jkunu rilevanti biex tiġi stabbilita l-eliġibbiltà għall-iskemi bbażati fuq iż-żona, għall-miżuri bbażati fuq iż-żona jew għar-rekwiżiti u għall-istandards rilevanti għall-kundizzjonalità li ma jiġux iċċekkjati permezz tal-monitoraġġ. Sabiex l-awtoritajiet kompetenti jkunu jistgħu jadattaw bla xkiel għall-użu dejjem jiżdied tal-verifiki permezz tal-monitoraġġ, huwa xieraq li dawk l-awtoritajiet jingħataw ċerta flessibbiltà fl-applikazzjoni tar-rekwiżit li jridu jqisu l-informazzjoni rilevanti kollha li jkollhom għad-dispożizzjoni tagħhom biex jistabbilixxu jkunux ġew issodisfati l-kriterji tal-eliġibbiltà, l-impenji u l-obbligi l-oħrajn kif ukoll ir-rekwiżiti u l-istandards rilevanti għall-kundizzjonalità jew le. Jenħtieġ li t-tali flessibbiltà tkun limitata fiż-żmien sabiex jiġi żgurat li l-bdiewa jiġu ttrattati bl-istess mod. Għalhekk jenħtieġ li l-Artikolu 40a jiġi emendat kif xieraq. Barra minn hekk, meta jużaw it-tali flessibbiltà, jenħtieġ li l-awtoritajiet kompetenti jqisu s-sejbiet rilevanti għall-għażla tal-parti bbażata fuq ir-riskju tal-kampjun ta’ kontroll tal-iskemi, tal-miżuri jew tat-tipi ta’ operazzjonijiet kif ukoll tal-kundizzjonalità fis-sena tat-talba ta’ wara. Għalhekk jenħtieġ li l-Artikolu 34(2) u (3) u l-Artikolu 69(1) tar-Regolament ta’ Implimentazzjoni (UE) Nru 809/2014 jiġu emendati kif xieraq.

(14)

Skont l-Artikolu 40b, l-Istati Membri għandhom l-obbligu jinnotifikaw lill-Kummissjoni dwar id-deċiżjoni tagħhom li jibdew iwettqu l-verifiki permezz tal-monitoraġġ u jgħaddulha ċerta data. Sabiex ikun żgurat li n-notifika tkun tinkludi l-informazzjoni ewlenija, li tista’ tevolvi hekk kif l-awtoritajiet kompetenti tal-Istati Membri jestendu l-applikazzjoni tal-verifiki permezz tal-monitoraġġ, jenħtieġ li kull sena, sal-1 ta’ Novembru, il-Kummissjoni tagħti lill-Istati Membri mudell għan-notifiki. Għalhekk huwa xieraq li l-ewwel paragrafu tal-Artikolu 40b jiġi emendat kif xieraq. Huwa xieraq ukoll li jitħassar it-tieni paragrafu tal-Artikolu 40b minħabba li dan kien jirreferi biss għas-sena tat-talba tal-2018 u għalhekk ma għadux jgħodd.

(15)

L-Artikolu 40a tar-Regolament ta’ Implimentazzjoni (UE) Nru 809/2014 jistabbilixxi l-qafas legali biex il-verifiki fuq il-post relatati maż-żona jiġu sostitwiti b’verifiki permezz tal-monitoraġġ abbażi tad-data satellitari tal-Copernicus Sentinels jew ta’ data oħra li jkollha tal-inqas valur ekwivalenti. Din id-data tista’ tkun rilevanti wkoll biex tiġi stabbilita l-konformità ma’ ċerti rekwiżiti u standards rilevanti għall-kundizzjonalità. Għalhekk, sabiex jitnaqqas il-piż tal-kontrolli u jiġi mmassimizzat l-investiment meħtieġ min-naħa tal-awtoritajiet kompetenti sabiex il-metodu attwali ta’ verifiki fuq il-post jiġi sostitwit bil-verifiki permezz tal-monitoraġġ, jenħtieġ li jiġi pprovdut qafas legali biex jiġu stabbiliti l-kundizzjonijiet li bihom il-verifiki permezz tal-monitoraġġ jistgħu jieħdu post il-verifiki fuq il-post b’rabta mal-kundizzjonalità.

(16)

Huwa xieraq li tiġi stabbilita rata minima ta’ kontroll sabiex jiġi żgurat li l-verifiki marbutin mar-rekwiżiti u mal-istandards rilevanti għall-kundizzjonalità jkunu sodisfaċenti f’ċirkustanzi fejn id-data li jipprovdu s-satelliti Sentinel tal-programm Copernicus ma tkunx rilevanti. Jenħtieġ li l-ispezzjonijiet fiżiċi fuq il-post ikunu meħtieġa biss jekk l-evidenza li tinġabar bl-użu tat-teknoloġiji l-ġodda bħar-ritratti mmarkati bil-post ġeografiku u s-sistemi tal-ajru mingħajr bdot abbord jew l-evidenza dokumentarja rilevanti ma twassalx għal riżultat konklużiv jew jekk l-awtoritajiet kompetenti jantiċipaw li l-ebda waħda minn dawn it-tipi ta’ evidenza mhi se tkun effettiva fil-verifika tar-rekwiżiti u tal-istandards li ma jistgħux jiġu mmonitorjati.

(17)

Il-verifiki permezz tal-monitoraġġ jistgħu jappoġġaw ukoll lill-benefiċjarji biex iħarsu r-rekwiżiti u l-istandards rilevanti għall-kundizzjonalità. Dan jista’ jinkiseb billi l-awtoritajiet nazzjonali jintalbu jistabbilixxu għodod xierqa għall-komunikazzjoni fil-ħin tar-riżultati provviżorji tal-verifiki permezz tal-monitoraġġ marbutin mar-rekwiżiti u mal-istandards tal-kundizzjonalità lill-benefiċjarji u billi l-benefiċjarji jingħataw il-possibbiltà jindirizzaw jew jirranġaw is-sitwazzjoni qabel ma jinsiltu l-konklużjonijiet fir-rapport ta’ kontroll. Jenħtieġ li din il-possibbiltà tkun mingħajr ħsara għas-sistema ta’ twissija bikrija prevista fl-Artikolu 99(2) tar-Regolament (UE) Nru 1306/2013.

(18)

Għall-finijiet tal-monitoraġġ tal-implimentazzjoni tal-verifiki permezz tal-monitoraġġ għall-kundizzjonalità, jenħtieġ li jiġi previst obbligu ta’ notifika għall-Istati Membri.

(19)

Għalhekk jenħtieġ li r-Regolament ta’ Implimentazzjoni (UE) Nru 809/2014 jiġi emendat kif xieraq.

(20)

Jenħtieġ li l-flessibbiltà mdaħħla permezz tal-paragrafu 4 l-ġdid tal-Artikolu 40a u permezz tal-Artikolu 70a(3) tar-Regolament ta’ Implimentazzjoni (UE) Nru 809/2014 tibda tapplika mill-1 ta’ Jannar 2019 sabiex tilħaq l-għan tagħha, minħabba li huwa proprju meta l-Istati Membri jibdew japplikaw il-verifiki permezz tal-monitoraġġ u meta jibdew jużaw it-teknoloġija l-ġdida marbuta ma’ dawn il-verifiki li huma jistgħu jiltaqgħu ma’ diffikultà biex jikkonformaw mar-rekwiżit li jqisu l-informazzjoni rilevanti kollha biex jistabbilixxu jkunux ġew issodisfati l-kriterji tal-eliġibbiltà, l-impenji u l-obbligi l-oħrajn kif ukoll ir-rekwiżiti u l-istandards rilevanti għall-kundizzjonalità jew le.

(21)

Il-miżuri previsti f’dan ir-Regolament huma skont l-opinjoni tal-Kumitat għall-Pagamenti Diretti u tal-Kumitat għall-Iżvilupp Rurali,