EUR-Lex Access to European Union law
This document is an excerpt from the EUR-Lex website
Document 32019R1602
Commission Delegated Regulation (EU) 2019/1602 of 23 April 2019 supplementing Regulation (EU) 2017/625 of the European Parliament and of the Council concerning the Common Health Entry Document accompanying consignments of animals and goods to their destination (Text with EEA relevance.)
Regolament Delegat tal-Kummissjoni (UE) 2019/1602 tat-23 ta' April 2019 li jissupplimenta r-Regolament (UE) 2017/625 tal-Parlament Ewropew u tal-Kunsill dwar id-Dokument Sanitarju Komuni tad-Dħul li jakkumpanja l-kunsinni ta' annimali u oġġetti sad-destinazzjoni tagħhom (Test b'rilevanza għaż-ŻEE.)
Regolament Delegat tal-Kummissjoni (UE) 2019/1602 tat-23 ta' April 2019 li jissupplimenta r-Regolament (UE) 2017/625 tal-Parlament Ewropew u tal-Kunsill dwar id-Dokument Sanitarju Komuni tad-Dħul li jakkumpanja l-kunsinni ta' annimali u oġġetti sad-destinazzjoni tagħhom (Test b'rilevanza għaż-ŻEE.)
C/2019/2910
ĠU L 250, 30.9.2019, p. 6–9
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force: This act has been changed. Current consolidated version: 15/04/2024
|
30.9.2019 |
MT |
Il-Ġurnal Uffiċjali tal-Unjoni Ewropea |
L 250/6 |
REGOLAMENT DELEGAT TAL-KUMMISSJONI (UE) 2019/1602
tat-23 ta' April 2019
li jissupplimenta r-Regolament (UE) 2017/625 tal-Parlament Ewropew u tal-Kunsill dwar id-Dokument Sanitarju Komuni tad-Dħul li jakkumpanja l-kunsinni ta' annimali u oġġetti sad-destinazzjoni tagħhom
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidratit-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2017/625 tal-Parlament Ewropew u tal-Kunsill tal-15 ta' Marzu 2017 dwar il-kontrolli uffiċjali u attivitajiet uffiċjali oħra mwettqa biex jiżguraw l-applikazzjoni tal-liġi tal-ikel u tal-għalf, ta' regoli dwar is-saħħa u t-trattament xieraq tal-annimali, dwar is-saħħa tal-pjanti u dwar prodotti għall-protezzjoni tal-pjanti, li jemenda r-Regolamenti (KE) Nru 999/2001, (KE) Nru 396/2005, (KE) Nru 1069/2009, (KE) Nru 1107/2009, (UE) Nru 1151/2012, (UE) Nru 652/2014, (UE) 2016/429 u (UE) 2016/2031 tal-Parlament Ewropew u tal-Kunsill, ir-Regolamenti tal-Kunsill (KE) Nru 1/2005 u (KE) Nru 1099/2009 u d-Direttivi tal-Kunsill 98/58/KE, 1999/74/KE, 2007/43/KE, 2008/119/KE u 2008/120/KE, u li jħassar ir-Regolamenti (KE) Nru 854/2004 u (KE) Nru 882/2004 tal-Parlament Ewropew u tal-Kunsill, id-Direttivi tal-Kunsill 89/608/KEE, 89/662/KEE, 90/425/KEE, 91/496/KEE, 96/23/KE, 96/93/KE u 97/78/KE u d-Deċiżjoni tal-Kunsill 92/438/KEE (ir-Regolament dwar il-Kontrolli Uffiċjali) (1), u b'mod partikolari l-Artikolu 50(4) tiegħu,
Billi:
|
(1) |
Ir-Regolament (UE) 2017/625 tal-Parlament Ewropew u tal-Kunsill jistabbilixxi regoli dwar it-twettiq ta' kontrolli uffiċjali mill-awtoritajiet kompetenti tal-Istati Membri fuq annimali u oġġetti li jidħlu fl-Unjoni sabiex tiġi vverifikata l-konformità mal-leġiżlazzjoni tal-Unjoni dwar il-katina agroalimentari. |
|
(2) |
Billi r-regoli dwar il-każijiet meta, u l-kundizzjonijiet li fihom, jenħtieġ li ċ-CHED jakkumpanja l-kunsinni fi tranżitu jridu jiġu stipulati f'att delegat separat li jrid jiġi adottat skont l-Artikolu 51(1) tar-Regolament (UE) 2017/625, dan ir-Regolament jenħtieġ li japplika biss għal kunsinni maħsuba biex jitqiegħdu fis-suq fl-Unjoni. |
|
(3) |
Ir-Regolament (UE) 2017/625 jistipula li l-kunsinni ta' annimali u oġġetti li jidħlu fl-Unjoni mill-postijiet ta' kontroll fuq il-fruntiera deżinjati jridu jkunu akkumpanjati mid-Dokument Sanitarju Komuni tas-Saħħa (“CHED”). Ladarba jkunu saru l-kontrolli uffiċjali u jkun ġie ffinalizzat iċ-CHED, il-kunsinni jistgħu jinqasmu f'partijiet differenti, skont il-ħtiġijiet kummerċjali tal-operatur. |
|
(4) |
Bil-ħsieb li jiġu żgurati t-traċċabbiltà tal-kunsinni u komunikazzjoni xierqa mal-awtorità kompetenti fil-post tad-destinazzjoni, jenħtieġ li jiġu stabbiliti r-regoli dwar il-kundizzjonijiet u l-arranġamenti prattiċi li bihom iċ-CHED jakkumpanja l-kunsinni intenzjonati għat-tqegħid fis-suq sad-destinazzjoni tagħhom. B'mod partikolari, huwa xieraq li jiġu stabbiliti r-regoli dettaljati relatati maċ-CHED għall-każijiet fejn il-kunsinni jkunu maqsuma. |
|
(5) |
Sabiex tiġi żgurata t-traċċabbiltà tal-kunsinni li jinqasmu fil-post ta' kontroll fuq il-fruntiera wara li jkunu saru l-kontrolli uffiċjali u ċ-CHED ikun ġie ffinalizzat mill-awtorità kompetenti, huwa xieraq li jintalab li l-operatur responsabbli mill-kunsinna, permezz tas-sistema ta' ġestjoni tal-informazzjoni għall-kontrolli uffiċjali (“IMSOC”) imsemmi fl-Artikolu 131 tar-Regolament (UE) 2017/625, jippreżenta CHED għal kull parti tal-kunsinna maqsuma, li jenħtieġ li jiġi ffinalizzat mill-awtoritajiet kompetenti tal-post ta' kontroll fuq il-fruntiera u jenħtieġ li jakkumpanja kull parti tal-kunsinna maqsuma lejn id-destinazzjoni ddikjarata fiċ-CHED rispettiv. |
|
(6) |
Sabiex jiġi evitat l-użu frodulenti taċ-CHED, huwa xieraq li l-awtoritajiet doganali jintalbu jikkomunikaw lill-IMSOC l-informazzjoni dwar il-kwantità tal-kunsinna ddikjarata fid-dikjarazzjoni doganali, sabiex jiżguraw li l-kwantitajiet iddikjarati f'tali dikjarazzjoni doganali jitnaqqsu mill-kwantità totali permessa ddikjarata fiċ-CHED. L-awtoritajiet doganali huma meħtieġa jiskambjaw l-informazzjoni bl-użu tat-tekniki elettroniċi doganali tal-ipproċessar tad-data msemmija fl-Artikolu 6(1) tar-Regolament (UE) Nru 952/2013 tal-Parlament Ewropew u tal-Kunsill (2). Jenħtieġ li dawk it-tekniki elettroniċi għall-ipproċessar tad-data jintużaw għall-finijiet ta' dan ir-Regolament. Sabiex l-awtoritajiet doganali jkollhom biżżejjed żmien biex jistabbilixxu dawk it-tekniki, huwa xieraq li jiġi previst li l-obbligu li tiġi kkomunikata l-informazzjoni dwar il-kwantità tal-kunsinni lill-IMSOC japplika f'kull Stat Membru mid-data li fiha dawk it-tekniki jsiru operattivi f'dak l-Istat Membru jew mill-1 ta' Marzu 2023, skont liema data tiġi l-ewwel. |
|
(7) |
Billi r-Regolament (UE) 2017/625 japplika mill-14 ta' Diċembru 2019, jenħtieġ li dan ir-Regolament japplika wkoll minn dik id-data, |
ADOTTAT DAN IR-REGOLAMENT:
Artikolu 1
Is-suġġett u l-kamp tal-applikazzjoni
1. Dan ir-Regolament jistabbilixxi l-każijiet fejn u l-kundizzjonijiet li fihom id-Dokument Sanitarju Komuni tad-Dħul imsemmi fl-Artikolu 56 tar-Regolament (UE) 2017/625 (“CHED”) irid jakkumpanja sal-post tad-destinazzjoni kull kunsinna tal-kategoriji ta' annimali u oġġetti msemmija fl-Artikolu 47(1) tar-Regolament (UE) 2017/625 li tkun maħsuba biex titqiegħed fis-suq (“kunsinna”).
2. Dan ir-Regolament ma japplikax għal kunsinni fi tranżitu.
Artikolu 2
Definizzjoni
Għall-finijiet ta' dan ir-Regolament, “post tad-destinazzjoni” tfisser il-post fejn titwassal il-kunsinna biex tinħatt għall-aħħar darba, kif ikun iddikjarat fiċ-CHED.
Artikolu 3
Każijiet fejn iċ-CHED għandu jakkumpanja l-kunsinni sal-post tad-destinazzjoni tagħhom
Kull kunsinna għandha tiġi akkumpjanjata b'CHED irrispettivament minn jekk tinqasamx fil-post tal-kontroll fuq il-fruntiera jew wara li titlaq mill-post tal-kontroll fuq il-fruntiera iżda qabel ma tiġi rilaxxata għaċ-ċirkolazzjoni libera skont l-Artikolu 57(2)(b) tar-Regolament (UE) 2017/625.
Artikolu 4
Kundizzjonijiet għaċ-CHED li jakkumpanjaw kunsinni li ma jkunux maqsuma
Meta kunsinna ma tinqasamx qabel ma tiġi rilaxxata għaċ-ċirkolazzjoni libera skont l-Artikolu 57(2)(b) tar-Regolament (UE) 2017/625, għandhom japplikaw ir-rekwiżiti li ġejjin:
|
(a) |
l-operatur responsabbli minn kunsinna għandu jiżgura li kopja taċ-CHED, stampata jew f'forma elettronika, takkumpanja lill-kunsinna sal-post tad-destinazzjoni u sakemm tiġi rilaxxata għaċ-ċirkolazzjoni libera skont l-Artikolu 57(2)(b) tar-Regolament (UE) 2017/625; |
|
(b) |
l-operatur responsabbli mill-kunsinna għandu jindika n-numru ta' referenza taċ-CHED fid-dikjarazzjoni doganali ppreżentata lill-awtoritajiet doganali u għandu jżomm kopja ta' dak iċ-CHED għad-dispożizzjoni tal-awtoritajiet doganali f'konformità mal-Artikolu 163 tar-Regolament (UE) Nru 952/2013; |
|
(c) |
l-awtoritajiet doganali għandhom jikkomunikaw lill-IMSOC l-informazzjoni dwar il-kwantità tal-kunsinna ddikjarata fid-dikjarazzjoni doganali u għandhom jippermettu biss it-tqegħid tal-kunsinna taħt proċedura doganali jekk il-kwantità totali stabbilita fiċ-CHED ma tkunx inqabżet. Dan ir-rekwiżit ma għandux japplika meta l-kunsinna tkun se titqiegħed taħt il-proċeduri doganali msemmija fil-punti (a) u (b) tal-Artikolu 210 tar-Regolament (UE) Nru 952/2013. |
Artikolu 5
Kundizzjonijiet għaċ-CHED li jakkumpanja kunsinni maqsuma fil-post tal-kontroll fuq il-fruntiera
1. Meta kunsinna tkun se tinqasam fil-post tal-kontroll fuq il-fruntiera, għandhom japplikaw ir-rekwiżiti li ġejjin:
|
(a) |
meta jagħti notifika minn qabel skont l-Artikolu 56(3) tar-Regolament (UE) 2017/625, l-operatur responsabbli mill-kunsinna għandu jiddikjara l-post tal-kontroll fuq il-fruntiera bħala l-post tad-destinazzjoni taċ-CHED għall-kunsinna kollha; |
|
(b) |
mal-finalizzazzjoni taċ-CHED għall-kunsinna sħiħa mill-awtorità kompetenti fil-post tal-kontroll fuq il-fruntiera skont l-Artikolu 56(5) tar-Regolament (UE) 2017/625, l-operatur responsabbli mill-kunsinna għandu jitlob li l-kunsinna tinqasam u għandu jippreżenta, permezz tal-IMSOC, CHED għal kull parti tal-kunsinna maqsuma, u jiddikjara fih il-kwantità, il-mezzi ta' trasport u l-post ta' destinazzjoni għall-parti rilevanti tal-kunsinna maqsuma; |
|
(c) |
l-awtorità kompetenti fil-post tal-kontroll fuq il-fruntiera għandha tiffinalizza ċ-CHEDs għall-partijiet individwali tal-kunsinna maqsuma skont l-Artikolu 56(5) tar-Regolament (UE) 2017/625, diment li s-somma tal-kwantitajiet iddikjarati f'dawk iċ-CHEDs ma taqbiżx il-kwantità totali stabbilita fiċ-CHED għall-kunsinna kollha kemm hi. |
|
(d) |
l-operatur responsabbli mill-kunsinna għandu jiżgura li kopja taċ-CHED, stampata jew f'forma elettronika, għal kull parti tal-kunsinna maqsuma takkumpanja l-parti rilevanti tal-kunsinna maqsuma lejn il-post tad-destinazzjoni ddikjarat fih u sakemm tiġi rilaxxata għaċ-ċirkolazzjoni libera skont l-Artikolu 57(2)(b) tar-Regolament (UE) 2017/625. |
|
(e) |
l-operatur responsabbli mill-kunsinna għandu jindika n-numru ta' referenza taċ-CHED għal kull parti tal-kunsinna maqsuma fid-dikjarazzjoni doganali ppreżentata lill-awtoritajiet doganali u għandu jżomm kopja ta' dak iċ-CHED għad-dispożizzjoni tal-awtoritajiet doganali skont l-Artikolu 163 tar-Regolament (UE) Nru 952/2013; |
|
(f) |
l-awtoritajiet doganali għandhom jikkomunikaw lill-IMSOC l-informazzjoni dwar il-kwantità tal-parti rilevanti tal-kunsinna maqsuma ddikjarata fid-dikjarazzjoni doganali u għandhom jippermettu biss it-tqegħid ta' dik il-parti taħt proċedura doganali jekk il-kwantità totali stabbilita fiċ-CHED għall-parti tal-kunsinna maqsuma ma tkunx inqabżet. Dan ir-rekwiżit ma għandux japplika meta l-kunsinna tkun se titqiegħed taħt il-proċeduri doganali msemmija fil-punti (a) u (b) tal-Artikolu 210 tar-Regolament (UE) Nru 952/2013. |
2. Fil-każ ta' kunsinna mhux konformi li trid tinqasam fil-post tal-kontroll fuq il-fruntiera, meta l-awtorità kompetenti tal-post tal-kontroll fuq il-fruntiera tordna lill-operatur biex jieħu waħda jew aktar mill-azzjonijiet imsemmija fl-Artikolu 66(4) tar-Regolament (UE) 2017/625 fir-rigward ta' parti mill-kunsinna biss, għandhom japplikaw ir-rekwiżiti li ġejjin:
|
(a) |
mal-finalizzazzjoni taċ-CHED għall-kunsinna kollha kemm hi, l-operatur responsabbli mill-kunsinna għandu jippreżenta CHED għal kull parti tal-kunsinna maqsuma u għandu jiddikjara fih il-kwantità, il-mezzi tat-trasport u l-post tad-destinazzjoni għal dik il-parti; |
|
(b) |
l-awtorità kompetenti fil-post tal-kontroll fuq il-fruntiera għandha tiffinalizza ċ-CHEDs għall-partijiet individwali tal-kunsinna maqsuma skont l-Artikolu 56(5) tar-Regolament (UE) 2017/625, filwaqt li tqis id-deċiżjoni meħuda għal kull parti tal-kunsinna maqsuma; |
|
(c) |
il-paragrafu 1 (d), (e) u (f) għandu japplika għal kull parti tal-kunsinna maqsuma. |
Artikolu 6
Kundizzjonijiet għaċ-CHED li jakkumpanja kunsinni taħt superviżjoni doganali maqsuma wara li telqu mill-post tal-kontroll fuq il-fruntiera
Meta kunsinna għandha tiġi maqsuma wara li titlaq mill-post tal-kontroll fuq il-fruntiera u qabel ma tiġi rilaxxata għal ċirkolazzjoni libera skont l-Artikolu 57(2)(b) tar-Regolament (UE) 2017/625, għandhom japplikaw ir-rekwiżiti li ġejjin:
|
(a) |
l-operatur responsabbli mill-kunsinna għandu jiżgura li kopja taċ-CHED, stampata jew f'forma elettronika, takkumpanja lil kull parti tal-kunsinna maqsuma sakemm tiġi rilaxxata għaċ-ċirkolazzjoni libera skont l-Artikolu 57(2)(b) tar-Regolament (UE) 2017/625; |
|
(b) |
għal kull parti tal-kunsinna maqsuma, l-operatur responsabbli mill-kunsinna għandu jindika n-numru ta' referenza taċ-CHED fid-dikjarazzjoni doganali ppreżentata lill-awtoritajiet doganali u għandu jżomm kopja ta' dak iċ-CHED għad-dispożizzjoni tal-awtoritajiet doganali skont l-Artikolu 163 tar-Regolament (UE) Nru 952/2013; |
|
(c) |
għal kull parti tal-kunsinna maqsuma, l-awtoritajiet doganali għandhom jikkomunikaw lill-IMSOC l-informazzjoni dwar il-kwantità ddikjarata fid-dikjarazzjoni doganali għal dik il-parti u jippermettu biss it-tqegħid ta' dik il-parti taħt proċedura doganali jekk il-kwantità totali stabbilita fiċ-CHED ma tkunx inqabżet. Dan ir-rekwiżit ma għandux japplika meta l-kunsinna tkun se titqiegħed taħt il-proċeduri doganali msemmija fil-punti (a) u (b) tal-Artikolu 210 tar-Regolament (UE) Nru 952/2013. |
Artikolu 7
Id-dħul fis-seħħ u l-applikazzjoni
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Għandu japplika mill-14 ta' Diċembru 2019.
Madankollu, id-dispożizzjonijiet li ġejjin għandhom japplikaw f'kull Stat Membru mid-data li fiha jibdew joperaw it-tekniki elettroniċi doganali tal-ipproċessar tad-data msemmija fl-Artikolu 6(1) tar-Regolament (UE) Nru 952/2013 f'dak l-Istat Membru jew mill-1 ta' Marzu 2023, skont liema data tiġi l-ewwel:
|
(a) |
il-punt (c) tal-Artikolu 4; |
|
(b) |
il-punt (f) tal-Artikolu 5(1); |
|
(c) |
il-punt (c) tal-Artikolu 6. |
L-Istati Membri għandhom jinfurmaw lill-Kummissjoni u lill-Istati Membri l-oħra bid-data li fiha dawk it-tekniki elettroniċi tal-ipproċessar tad-data jsiru operazzjonali.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-23 ta' April 2019.
Għall-Kummissjoni
Il-President
Jean-Claude JUNCKER
(2) Ir-Regolament (UE) Nru 952/2013 tal-Parlament Ewropew u tal-Kunsill tad-9 ta' Ottubru 2013 li jistabbilixxi l-Kodiċi Doganali tal-Unjoni (ĠU L 269, 10.10.2013, p. 1).