(1)

Esperjenza miksuba mill-impriżi tal-assigurazzjoni u tar-riassigurazzjoni fl-ewwel snin tal-applikazzjoni tad-Direttiva 2009/138/KE jenħtieġ li tiġi użata biex jiġu rieżaminati l-metodi, is-suppożizzjonijiet u l-parametri standard meta tiġi kkalkulata il-formola standard tar-Rekwiżiti Kapitali tas-Solvenza.

(2)

Il-proposta tal-Kummissjoni għal Regolament ġdid li jistabilixxi l-Programm InvestEU (2) tiffoka fuq li tindirizza fallimenti tas-suq u sitwazzjonijiet ta' investiment subottimali madwar l-UE kollha. Dik il-proposta tinkludi l-istabbiliment taċ-Ċentru ta' Konsulenza tal-InvestEU li jenħtieġ li jappoġġja l-iżvilupp ta' sensiela b'saħħitha ta' proġetti ta' investiment u l-Portal tal-InvestEU li jenħtieġ li jipprovdi lill-investituri b'bażi tad-data tal-proġetti tal-investiment li faċli biex taċċessaha u faċli għall-utent. B'hekk, l-InvestEU ser jappoġġja investimenti għal iffinanzjar ta' negozji ta' daqs żgħir u medju fil-forom ta' bonds, self jew ekwità privata kif ukoll investimenti fit-tul oħrajn f'ekwità. Il-formola standard għall-kalkolu tar-Rekwiżit Kapitali tas-Solvenza ma tipprevedix regoli speċifiċi għall-investimenti fid-dejn privat, l-ekwità privata u l-investimenti fit-tul f'ekwità. Fid-dawl tat-titjib mistenni fl-aċċessibilità ta' tali investiment permezz tal-portal tal-InvestEU, jenħtieġ li tali regoli jiġu introdotti. Barra minn hekk, fid-dawl tal-Pjan ta' Azzjoni dwar il-Bini ta' Unjoni tas-Swieq Kapitali tat-30 ta' Settembru 2015, aktar investimenti fl-Ewropa ser jiġu inkoraġġiti u aċċess għal ekwità u fondi għad-dejn għal intrapriżi żgħar u medji Ewropej jenħtieġ li jiġu ffaċilitati. It-trattament prudenzjali tal-ekwità privat u dejn bi pjazzament privat jenħtieġ li għalhekk jiġi emendat biex jitneħħew ostakli mhux ġustifikati għal investimenti f'dawk il-klassijiet ta' assi.

(3)

Sabiex jiġu żgurati kundizzjonijiet ugwali bejn l-operaturi ekonomiċi attivi fis-settur tal-assigurazzjoni u operaturi ekonomiċi attivi f'setturi finanzjarji oħra, uħud mid-dispożizzjonijiet applikabbli għall-impriżi tal-assigurazzjoni u tar-riassigurazzjoni jenħtieġ li jiġu allinjati mad-dispożizzjonijiet applikabbli għall-istituzzjonijiet finanzjarji u tal-kreditu, sal-punt li tali allinjament ikun proporzjonat mal-mudelli ta' negozju differenti.

(4)

Skoperturi tan-negozju għall-kontropartijiet ċentrali kwalifikanti (CCPs) jibbenefikaw minn kalkolu tal-valur nett multilaterali u mekkaniżmu ta' qsim tat-telf ipprovdut mis-CCPs kwalifikanti. Dawk l-iskoperturi tan-negozju baxxew ir-riskju ta' kreditu tal-kontroparti mnaqqas u jenħtieġ li għalhekk ikunu soġġetti għal rekwiżit ta' fondi propji aktar baxx minn dawk tal-kontropartijiet li ma jibbenefikawx minn mekkaniżmi tas-CCP. F'konformità mal-Artikolu 111(1) (fa) tad-Direttiva 2009/138/KE, il-kalkolu tar-riskju tal-inadempjenza tal-kontroparti bil-formola standard jenħtieġ li tittratta l-iskoperturi tan-negozju għas-CCPs li jikkwalifikaw b'mod li jkun konsistenti mar-rekwiżiti kapitali għal dawn l-iskoperturi applikabbli għall-istituzzjonijiet tal-kreditu u l-istituzzjonijiet finanzjarji.

(5)

Sabiex jikkontribwixxu għall-objettiv tal-Unjoni ta' tkabbir sostenibbli fit-tul, investimenti minn assiguraturi f'dejn bi pjazzament fil-privat jenħtieġ li jkun ffaċilitat. Għal dak il-għan, jenħtieġ li jiġu stabbiliti kriterji li jippermettu ċ-ċessjoni għall-passi 2 jew 3 tal-kwalità kreditizja ta' bonds u self li għalihom ma jkunx hemm disponibbli valutazzjoni tal-kreditu minn ECAI nominata, abbażi tal-valutazzjoni interna tal-kreditu tal-impriża tal-assigurazzjoni jew ir-riassigurazzjoni.

(6)

Bidliet sostanzjali fid-data użata għad-determinazzjoni tal-informazzjoni teknika fl-istrutturi ta' terminu tar-rata ta' mgħax mingħajr riskju rilevanti tista' twassal għal sitwazzjoni fejn is-sorsi tad-data li ġew użati fil-passat ma jibqgħux disponibbli. Barra minn hekk, disponibbilità mtejba tad-data tista' tagħmel tekniki użati għad-determinazzjoni tal-informazzjoni teknika tal-istrutturi ta' terminu tar-rata ta' mgħax mingħajr riskju rilevanti mhux aktar validi. Bidla sostanzjali fil-kundizzjonijiet tas-suq tista' wkoll tkun teħtieġ rivalutazzjoni tal-parametri inkluż ir-rata forward aħħarija, il-punt tat-tluq għal-estrapolazzjoni ta' rati tal-imgħax mingħajr riskju jew il-perjodu ta' konverġenza għar-rata forward aħħarija. Għalhekk jenħtieġ li jiġu stabbiliti l-kundizzjonijiet biex jiġi vvalutat jekk il-bidliet potenzjali fid-data u t-tekniki użati għall-ispeċifikar tal-informazzjoni teknika dwar l-istruttura tat-terminu rilevanti tar-rata tal-imgħax mingħajr riskju jkunux proporzjonati mal-objettivi tat-trasparenza, il-prudenza, l-affidabbiltà u l-konsistenza tal-metodi biex tiġi speċifikata l-informazzjoni teknika dwar l-istruttura tat-terminu tar-rata mingħajr riskju rilevanti tul iż-żmien. Għal dan l-għan, l-EIOPA jenħtieġ li tissottometti lill-Kummissjoni valutazzjoni tal-impatt ta' tekniki mmodifikati, speċifikazzjonijiet jew parametri tad-data u l-proporzjonalità tal-modifikazzjoni fir-rigward tal-bidla sostanzjali fid-data.

(7)

L-objettiv ta' metodi trasparenti, prudenti, affidabbli u konsistenti biex tiġi ddeterminata l-informazzjoni teknika dwar l-istrutturi ta' terminu tar-rata tal-imgħax mingħajr riskju relevanti matul iż-żmien jenħtieġ li japplika wkoll fil-livell tal-komponenti, u b'mod partikolari, tal-aġġustament tal-volatilità. Sabiex jiġu żgurati t-trasparenza, il-prudenza, l-affidabbiltà u l-konsistenza matul iż-żmien, il-metodu biex tiġi ddeterminata l-informazzjoni teknika dwar l-aġġustament tal-volatilità applikat mill-Awtorità Ewropea tal-Assigurazzjoni u l-Pensjonijiet tax-Xogħol (EIOPA), b'mod partikolari rigward l-attivazzjoni tal-komponent tal-pajjiż kif stipulat fl-Artikolu 77d(4) tad-Direttiva 2009/138/KE, jenħtieġ li jiġi rieżaminat jekk l-evidenza turi li l-metodu jonqos milli jissodisfa l-objettivi, u bħala parti mir-rieżami tal-Kummissjoni skont l-Artikolu 77f(3) tad-Direttiva 2009/138/KE.

(8)

Entrati ta' fondi proprji fil-forma ta' kontijiet tal-membri mutwalisti subordinati u mħallsa, azzjonijiet ta' preferenza mħallsa u l-kont tal-primjum azzjonarju relatat, u obbligazzjonijiet subordinati mħallsa, jistgħu jipprovdu għal mekkaniżmu ta' assorbiment tat-telf prinċipali parzjali għal każijiet fejn ir-Rekwiżit Kapitali tal-Solvenza jinkiser għal tliet xhur konsekuttivi. Jenħtieġ li jiġu stabbiliti kriterji li jispeċifikaw sa liema punt tali entrati jikkwalifikaw bħala fondi proprji tal-Grad 1.

(9)

Telf ta' fondi proprji bażiċi minħabba effetti tat-taxxa meta l-mekkaniżmu ta' assorbiment tat-telf prinċipali jiġi skattat jenħtieġ li jiġi evitat. Impriżi tal-assigurazzjoni u r-riassigurazzjoni jenħtieġ għalhekk li jkunu jistgħu jitolbu eżenzjoni mill-applikazzjoni ta' dak il-mekkaniżmu. Iżda qabel tingħata l-eżenzjoni, jenħtieġ li l-awtoritajiet superviżorji jivvalutaw jekk hemmx possibbiltà għolja u kredibbli li l-effetti tat-taxxa tal-mekkaniżmu jkunu jistgħu jdgħajfu b'mod sinifikanti l-pożizzjoni tas-solvenza ta' impriża tal-assigurazzjoni jew ir-riassigurazzjoni.

(10)

Kundizzjonijiet ugwali bejn l-operaturi ekonomiċi fis-settur tal-assigurazzjoni u f'setturi finanzjarji oħra jenħtieġ li jiġi żgurat. Għalhekk, impriżi tal-assigurazzjoni u r-riassigurazzjoni jenħtieġ li jkollhom il-possibbiltà, bil-kundizzjoni tal-approvazzjoni superviżorja minn qabel, li jħallsu lura jew jifdu entrata ta' fond proprju fl-ewwel ħames snin wara d-data tal-ħruġ tiegħu f'każ li jkun hemm bidla mhux mistennija fil-klassifikazzjoni regolatorja tal-entrata ta' fond proprju li aktarx tirriżulta fl-esklużjoni ta' dik l-entrata mill-fondi propjri, jew f'każ li jkun hemm bidla mhux mistennija fit-trattament tat-taxxa applikabbli ta' dik l-entrata.

(11)

L-approċċ trasparenti jenħtieġ li jiżgura li r-riskji li tkun skoperta għalihom impriża tal-assigurazzjoni jew riassigurazzjoni jinqabdu sew, irrispettivament mill-istrutturi tal-investiment tal-impriża. Jenħtieġ li dak l-approċċ għalhekk jiġi applikat lil impriżi relatati ma' dik l-impriża tal-assigurazzjoni jew tar-riassigurazzjoni li jkollhom bħala l-għan ewlieni tagħhom il-parteċipazzjoni jew il-ġestjoni tal-assi f'isem dik l-impriża tal-assigurazzjoni jew tar-riassigurazzjoni.

(12)

Fejn l-approċċ trasparenti ma jistax jiġi applikat għal impriża ta' investiment kollettiv jew investiment miġbur bħala fondi, impriżi tal-assigurazzjoni jew tar-riassigurazzjoni jenħtieġ li jkunu permessi jużaw approċċ issimplifikat ibbażat fuq l-aħħar allokazzjoni tal-assi rrappurtata tal-impriża ta' investiment kollettiv jew fond, sakemm dak l-approċċ issimplifikat ikun proporzjonat man-natura, l-iskala u l-kumplessità tar-riskji kkonċernati.

(13)

Is-submoduli tar-riskju ta' ċessazzjoni jeħtieġu kalkoli kumplessi bbażati fuq il-livell tal-poloz tal-assigurazzjoni individwali. Fejn tali kumplessità mhix proporzjonata man-natura, l-iskala u l-kumplessità tar-riskji li jaqgħu taħt dawk is-submoduli, jenħtieġ li jkun possibbli li l-kalkoli għal dawk is-submoduli jkunu bbażati fuq raggruppamenti ta' poloz tal-assigurazzjoni, minflok poloz tal-assigurazzjoni individwali, sakemm tali raggruppamenti ma jkunux ser iwasslu għal żball materjali.

(14)

Il-kalkolu tar-riskju ta' katastrofi naturali bil-formola standard jenħtieġ li tqis in-natura, l-iskala u l-kumplessità tal-iskopertura tal-assigurazzjoni jew ir-riassigurazzjoni tal-impriża għal dak ir-riskju. Il-kalkolu tar-riskju ta' katastrofi naturali bil-formola standard teħtieġ lill-impriżi tal-assigurazzjoni u tar-riassigurazzjoni jimmappjaw is-somma assigurata tagħhom fiż-żoni ta' riskju. Mhux l-impriżi tal-assigurazzjoni u tar-riassigurazzjoni kollha jkollhom informazzjoni dwar il-livell taż-żoni tar-riskji meħtieġa għal dak il-kalkolu fis-sistemi interni tagħhom, u għal dawk l-impriżi jista' jiswihom għali li jipproduċu din l-informazzjoni. Għaldaqstant dawk l-impriżi jenħtieġ li jkunu jistgħu jibbażaw il-kalkolu tagħhom fuq raggruppamenti ta' żoni ta' riskju fejn tali raggruppamenti jkollhom bażi sostanzjata u proporzjonata għall-iskopertura.

(15)

Il-kalkolu tar-rekwiżit kapitali għas-submodulu ta' riskju ta' nirien tal-formola standard jitlob lill-impriżi tal-assigurazzjoni u tar-riassigurazzjoni jidentifikaw l-akbar konċentrazzjoni ta' riskju ta' nirien. Sabiex jiġi limitat il-piż tal-kalkolu, l-impriżi tal-assigurazzjoni u tar-riassigurazzjoni jenħtieġ li jkunu jistgħu jirrestrinġu l-proċess ta' identifikazzjoni tagħhom għall-akbar konċentrazzjoni ta' riskju ta' nirien fiż-żoni ta' madwar l-akbar skoperturi ta' riskju ta' nirien tagħhom, sakemm dak l-approċċ ikun proporzjonat għan-natura, l-iskala u l-kumplessità tal-iskopertura għal riskju ta' nar tal-impriżi tal-assigurazzjoni jew r-riassigurazzjoni.

(16)

Il-kalkoli ssimplifikati tar-rekwiżit kapitali għas-submoduli tar-riskju tal-mortalità tal-ħajja u tas-saħħa tal-formola standard jenħtieġ li jiġu emendati biex jirriflettu li l-kapital f'riskju ta' poloz tal-assigurazzjoni jista' jvarja tul iż-żmien.

(17)

Il-kost biex jinkisbu klassifikazzjonijiet għall-kalku tar-Rekwiżit Kapitali tas-Solvenza bl-użu tal-formola standard jenħtieġ li jkun proporzjonat għan-natura, l-iskala u l-kumplessità tar-riskju tal-ass assoċjat. Impriżi tal-assigurazzjoni u tar-riassigurazzjoni li nnominaw aġenzija tal-klassifikazzjoni tal-kreditu esterna jenħtieġ li għalhekk ikunu jistgħu jużaw kalkolu ssimplifikat għal dawk il-partijiet tal-portafoll tad-dejn li għalihom il-klassifikazzjonijiet esterni ma jkunux ingħataw mill-aġenzija esterna tal-klassifikazzjoni tal-kreditu.

(18)

Il-kalkolu tal-formola standard tar-Rekwiżit Kapitali tas-Solvenza għar-riskju tal-inadempjenza tal-kontroparti jirrikjedi li l-impriżi tal-assigurazzjoni u tar-riassigurazzjoni jqisu s-sehem tal-assi tal-kontroparti li jkunu soġġetti għal arranġamenti kollaterali. Piż sproporzjonat fil-kalkolu bil-formola standard jenħtieġ li jiġi evitat. Għaldaqstant jenħtieġ li l-impriżi tal-assigurazzjoni u tar-riassigurazzjoni li jużaw il-formola standard għall-kalkolu tar-Rekwiżit Kapitali tas-Solvenza għar-riskju ta' inadempjenza tal-kontroparti jkunu jistgħu jikkalkulaw ir-Rekwiżit Kapitali tas-Solvenza għar-riskju ta' inadempjenza tal-kontroparti abbażi tas-suppożizzjoni li aktar minn 60 % tal-assi tal-kontroparti jkunu soġġetti għal arranġamenti kollaterali.

(19)

Impriżi tal-assigurazzjoni u tar-riassigurazzjoni li jużaw il-formola standard għall-kalkolu tar-Rekwiżit Kapitali tas-Solvenza għar-riskju ta' inadempjenza tal-kontroparti jridu jużaw formola speċifika għall-kalkolu tar-rekwiżit kapitali għar-riskju ta' inadempjenza tal-kontroparti fuq skoperturi tat-tip 1 meta d-devjazzjoni standard tad-distribuzzjoni tat-telf tal-iskoperturi tat-tip 1 tkun inqas minn 7 %. Piż sproporzjonat meta jiġi kkalkulat dak ir-rekwiżit jenħtieġ li jiġi evitat. Impriżi tal-assigurazzjoni u tar-riassigurazzjoni jenħtieġ li għalhekk ikunu jistgħu jikkalkolaw ir-rekwiżit kapitali għar-riskju ta' inadempjenza tal-kontroparti għal skoperturi tat-tip 1 bl-użu tal-istess formola li hija applikata meta d-devjazzjoni standard tad-distribuzzjoni tat-telf għal skoperturi tat-tip 1 tkun bejn 7 % u 20 %.

(20)

Il-kalkolu tal-effett mitiganti ta' riskju fuq ir-riskju tas-sottoskrizzjoni hija kumplessa u tista' tkun ta' piż sproporzjonat għall-impriżi tal-assigurazzjoni u tar-riassigurazzjoni li joperaw f'linji mhux tal-ħajja tan-negozju. Huwa għalhekk xieraq li l-impriżi tal-assigurazzjoni u tar-riassigurazzjoni jiġu aġevolati biex jużaw formola ssimplifikata, sakemm l-użu ta' dik il-formola ssimplifikata jkun proporzjonat man-natura, l-iskala u l-kumplessità tal-profil tar-riskju tal-kontroparti tal-impriża.

(21)

L-imposta tar-riskju għall-primjums għal kuntratti futuri ma għandhiex tippenalizza b'mod indebitu kuntratti b'terminu inizjali ta' aktar minn sena sabiex jitqies ir-riskju aktar baxx assoċjat mal-primjums futuri minn kuntratti b'termini itwal. Għaldaqstant, għal kuntratti futuri li t-terminu tagħhom huwa ta' aktar minn sena, il-kejl tal-volum ta' riskju tal-primjum u tar-riżerva mhux tal-ħajja u tas-saħħa NSLT jenħtieġ li jqis biss 30 % tal-primjums futuri.

(22)

L-iskopertura attwali għar-riskju tal-impriża fil-kalkolu tar-Rekwiżit Kapitali tas-Solvenza għar-riskju ta' katastrofi naturali jenħtieġ li tiġi riflessa fil-kalkolu tar-Rekwiżit Kapitali tas-Solvenza bil-formola standard. Il-kalkolu tar-Rekwiżit Kapitali tas-Solvenza għar-riskju ta' katastrofi naturali bil-formola standard għalhekk jenħtieġ li jqis il-limiti kuntrattwali għall-kumpens għall-katastrofi naturali.

(23)

Il-kalkolu tar-Rekwiżit Kapitali tas-Solvenza għal riskju ta' katastrofi magħmula mill-bniedem jenħtieġ li jirrifletti r-riskji li impriżi tal-assigurazzjoni u tar-riassigurazzjoni jkunu esposti għalihom. Għalhekk jenħtieġ li l-kalkoli bbażati fuq dak ix-xenarju għal riskju marittimu, tal-avjazzjoni u tan-nirien jkunu bbażati fuq l-akbar espożizzjonijiet, wara t-tnaqqis tal-ammonti li jistgħu jerġgħu jinġabru minn riassigurazzjoni jew veikoli bi skop speċjali.

(24)

Mhux xieraq li japplika x-xenarju ta' kolliżjoni ta' tanker tas-submodulu tar-riskju marittimu għal opra tal-baħar għar-rikreazzjoni jew dgħajjes li jintefħu. Dak ix-xenarju għalhekk jenħtieġ li jkun applikabbli biss għal bastimenti b'somma assigurata minima ta' mill-anqas EUR 250 000.

(25)

L-investimenti diretti mill-assiguraturi f'ekwità mhux elenkata jistgħu jikkontribwixxu għall-objettiv tal-Unjoni ta' tkabbir sostenibbli fit-tul. Għaldaqstant dawk l-investimenti jenħtieġ li jiġu ffaċilitati. Meta jikkalkulaw ir-rekwiżit kapitali għar-riskju tal-ekwità bil-formola standard, il-portafolli ta' investimenti f'ekwità ta' kwalità għolja mhux elenkati jenħtieġ li jkunu jistgħu jibbenefikaw mill-istess trattament bħall-ekwitajiet elenkati fi swieq regolati. Jenħtieġ li jiġu stabbiliti kriterji biex jiġi żgurat li portafoll ta' ekwità mhux ikkwotata ta' kwalità għolja jkollu riskju sistematiku suffiċjentment żgħir.

(26)

L-assiguraturi għandhom rwol importanti billi l-investituri fit-tul u l-investimenti f'ekwità huma importanti għall-finanzjament tal-ekonomija reali. Għaldaqstant, meta jiġi kkalkulat ir-Rekwiżit Kapitali tas-Solvenza bil-formola standard li tinkludi l-matriċi ta' korrelazzjoni, l-investimenti f'ekwità fit-tul minn impriżi tal-assigurazzjoni u tar-riassigurazzjoni jenħtieġ li jiġu mħeġġa permezz tal-allinjament tat-trattament tal-investimenti f'ekwità fit-tul u tal-investimenti f'ekwità strateġika. Sabiex jiġi żgurat il-karattru fit-tul tal-investimenti, jenħtieġ li jiġi introdott portafoll ta' investimenti f'ekwità fit-tul u assi oħrajn li jaqblu ma' portafoll ta' obbligi tal-assigurazzjoni jew tar-riassigurazzjoni identifikati b'mod ċar fi ħdan is-submodulu tar-riskju tal-ekwità. Biex jiġi evitat l-arbitraġġ regolatorju, il-portafoll tal-assi u l-portafoll tal-obbligi jenħtieġ li jkollhom valuri simili, u kull wieħed minnhom ma għandux jirrappreżenta aktar minn nofs id-daqs totali tal-karta tal-bilanċ tal-impriża tal-assigurazzjoni jew tar-riassigurazzjoni.

(27)

L-ekwitajiet individwali elenkati fiż-ŻEE u l-investimenti li jsiru permezz ta' ċerti tipi ta' fondi jenħtieġ li jiġu ttrattati bl-istess mod. L-impriżi tal-assigurazzjoni u tar-riassigurazzjoni għalhekk jenħtieġ li jitħallew japplikaw ir-regoli applikabbli għal investimenti fit-tul fil-livell ta' fondi ta' intraprenditorija soċjali kwalifikanti, fondi ta' kapital ta' riskju kwalifikanti, fondi ta' investiment alternattivi magħluqa u mingħajr ingranaġġ finanzjarju jew fondi ta' investiment Ewropej fuq terminu twil, dment li l-maniġer tal-fond ikun awtorizzat fiż-ŻEE.

(28)

Il-kalkolu tar-rekwiżit kapitali għas-submodulu tar-riskju tal-firxa bil-formola standard ma għandux ixekkel impriżi tal-assigurazzjoni jew tar-riassigurazzjoni milli jinvestu fi pjazzamenti privati ta' kwalità għolja, li spiss ma jkunux klassifkati. Impriża tal-assigurazzoni jew tar-riassigurazzjoni jista' jkun li tkun ikkonkludiet ftehim ma' istituzzjoni tal-kreditu jew ditta tal-investiment biex tikkoinvesti f'bonds u selfiet li għalihom valutazzjoni tal-kreditu minn ECAI nnominat ma tkunx disponibbli. F'dak il-każ, l-impriża tal-assigurazzjoni jew tar-riassigurazzjoni jenħtieġ li titħalla tuża r-riżultati tal-approċċ ibbażat fuq il-klassifikazzjonijiet interni approvati ta' dik l-istituzzjoni tal-kreditu jew ditta tal-investiment biex tikkalkula r-Rekwiżiti Kapitali għas-Solvenza, sakemm dik l-istituzzjoni tal-kreditu jew ditta tal-investiment għandha uffiċju prinċipali tagħha fiż-Żona Ekonomika Ewropea. L-istess jenħtieġ li japplika kull fejn impriża tal-assigurazzjoni jew tar-riassigurazzjoni kkonkludiet ftehim ma' impriża tal-assigurazzjoni jew tar-riassigurazzjoni oħra li tuża mudell intern approvat f'konformità tal-Artikolu 100 tad-Direttiva 2009/138/KE.

(29)

Il-leġiżlazzjoni li tkopri s-settur finanzjarju jeħtieġ li tkun konsistenti, waqt li tqis id-differenzi fil-mudell ta' negozju tas-setturi, elementi diverġenti fid-determinazzjoni tar-rekwiżiti kapitali, jew fatturi oħra. Għalhekk, ir-regoli tal-impriżi tal-assigurazzjoni u tar-riasssigurazzjoni għar-rikonoxximent ta' garanziji li jinħarġu minn gvernijiet reġjonali u awtoritajiet lokali jenħtieġ li jiġu allinjati mar-regoli tal-istituzzjonijiet kreditizji u ditti tal-investimenti.

(30)

Derivattivi jesponu l-impriżi tal-assigurazzjoni u tar-riassigurazzjoni għar-riskju ta' inadempjenza tal-kontroparti, irrispettivament minn jekk dawk id-derivattivi jinżammux għal iħħeġġjar jew spekulazzjoni. Id-derivattivi kollha jenħtieġ li għalhekk jiġu ttrattati bħala skoperturi tat-tip 1 fil-modulu tar-riskju ta' inadempjenza tal-kontroparti fil-formola standard.

(31)

Diskrepanzi fis-sekwenza tal-kalkoli għar-rekwiżiti kapitali għal konċentrazzjonijiet tar-riskju tas-suq bil-formola standard jenħtieġ li jiġu evitati. Skoperturi individwali jenħtieġ li għalhekk l-ewwel jiġu mmappjati mal-iskali tal-kwalità kreditizja u mal-limiti għall-iskopertura ta' eċċess relattivi, u fatturi ta' riskju jenħtieġ li sussegwentement jiġu applikati fil-livell ta' skoperturi b'isem wieħed.

(32)

Jenħtieġ li l-impriżi tal-assigurazzjoni u tar-riassigurazzjoni ma jagħmlux suppożizzjonijiet ottimisti żżejjed fit-tbassir tal-profitt taxxabbli futuri wara xenarju ta' telf eċċezzjonali. Għaldaqstant, meta jikkalkolaw bil-formola standard il-kapaċità ta' assorbiment ta' telf tat-taxxi differiti, l-impriżi tal-assigurazzjoni u tar-riassigurazzjoni jenħtieġ li għalhekk iqisu l-pożizzjoni finanzjarja u ta' solvenza tagħhom wara t-telf istantanju, u l-inċertezza miżjuda fejn jidħlu l-projezzjoni ta' profitti taxxabbli futuri. Barra minn hekk, is-suppożizzjonijiet għall-projezzjoni ta' profitti taxxabbli futuri wara telf istantanju, inklużi r-rati supposti ta' redditu fuq l-investimenti tal-impriża tal-assigurazzjoni jew tar-riassigurazzjoni, jenħtieġ li jkunu aktar favorevoli mis-suppożizzjonijiet applikati għall-valutazzjoni ta' taxxi differiti fuq il-karta bilanċjali u l-ammont totali projettat tan-negozju l-ġdid jenħtieġ li ma jaqbiżx dak tal-ippjanar tan-negozju. Impriżi tal-assigurazzjoni u tar-riassigurazzjoni jenħtieġ li jitħallew jissopponu redditi għola minn dawk implikati fl-istruttura tat-terminu tar-rata tal-imgħax rilevanti biss meta jkunu jistgħu juru li dawk ir-redditi se jiġu rilaxxati wara t-telf istantanju.

(33)

Il-kalkolu tar-Rekwiżit Kapitali tas-Solvenza bil-formola standard jenħtieġ li jirrifletti l-iżviluppi fil-prattiki tal-ġestjoni tar-riskju, b'mod partikolari dwar l-użu tat-tekniki tal-mitigazzjoni tar-riskju. Għaldaqstant l-impriżi tal-assigurazzjoni u tar-riassigurazzjoni jenħtieġ li jkunu jistgħu jqisu l-effett tat-tekniki tal-mitigazzjoni tar-riskju, inkluż fejn dawk it-tekniki jiġu sostitwiti b'arranġament simili meta jiskadu jew fejn dawk it-tekniki jiġu aġġustati biex jirriflettu l-bidliet fl-iskoperturi koperti, sakemm tali sostituzzjoni jew aġġustament ikun limitat għal darba fil-ġimgħa. Il-formola standard jenħtieġ ukoll li tippermetti għal arranġamenti ta' kalkolu tal-valur nett bejn derivattivi u strateġiji ta' ħħeġġjar fejn diversi arranġamenti kuntrattwali flimkien ikollhom l-effett ta' teknika ta' mitigazzjoni ta' riskju. Devjazzjonijiet possibbli bejn l-effett ta' mitigazzjoni ta' riskju rifless fil-formola standard fuq naħa u l-effett reali ta' mitigazzjoni ta' riskju fuq in-naħa l-oħra, u valutazzjoni tar-riskju ta' bażi, jenħtieġ li jiġu inklużi fil-valutazzjoni proprja tar-riskju u tas-solvenza tal-impriża.

(34)

L-impriżi tal-assigurazzjoni u tar-riassigurazzjoni jenħtieġ li ma jiġux ippenalizzati b'mod sproporzjonat meta kontroparti ta' riassigurazzjoni tieqaf tkun konformi mar-Rekwiżit Kapitali ta' Solvenza tagħha waqt li tkun għadha konformi mir-Rekwiżit Kapitali Minimu. Impriżi tal-assigurazzjoni u tar-riassigurazzjoni jenħtieġ li għalhekk jitħallew, għal perjodu ta' massimu ta' sitt xhur, biex parzjalment iqisu l-effett ta' mitigazzjoni tar-riskju tal-arranġamenti tar-riassigurazzjoni li jkunu għamlu ma' dik il-kontroparti ta' riassigurazzjoni. Fejn kontroparti ta' riassigurazzjoni tieqaf tkun konformi mar-Rekwiżit Kapitali Minimu tagħha, l-impriża tal-assigurazzjoni jew tar-riassigurazzjoni jenħtieġ li ma tibqa tqis ebda effett ta' mitigazzjoni tar-riskju minn arranġamenti ta' riassigurazzjoni li tkun daħlet fihom ma' dik il-kontroparti ta' riassigurazzjoni.

(35)

Kuntratti ta' riassigurazzjoni ta' waqfien ta' telf jenħtieġ li jirċievu trattament simili bħal kuntratti ta' riassigurazzjoni ta' eċċess ta' telf fil-kalkolu tar-Rekwiżit Kapitali tas-Solvenza bil-formola standard. Impriżi tal-assigurazzjoni u tar-riassigurazzjoni jenħtieġ li għalhekk ikunu jistgħu jqisu l-mitigazzjoni tar-riskju pprovduta b' kuntratt tar-riassigurazzjoni tal-waqfien tat-telf fil-kalkolu tal-formola standard tar-Rekwiżiti Kapitali tas-Solvenza b'parametri speċifiċi għall-impriża billi jistabbilixxu metodu standardizzat biex jikkalkolaw parametru speċifiku għall-impriża biex jissostitwixxu l-parametru standard għar-riassigurazzjoni mhux propozjonali.

(36)

Il-kapaċità ta' assorbiment ta' telf ta' taxxi differiti għandha impatt sinifikanti fuq il-pożizzjoni tas-solvenza ta' impriżi tal-assigurazzjoni u tar-riassigurazzjoni. Il-korp amministrattiv, ta' ġestjoni jew superviżorju ta' impriżi tal-assigurazzjoni jew tar-riassigurazzjoni jenħtieġ għalhekk li jadotta politika ta' ġestjoni ta' riskju relatata mat-taxxi differiti, li tqis il-kapaċità ta' assorbiment ta' telf tat-taxxi differiti. B'mod partikolari, dik il-politika jenħtieġ li tistabbilixxi ir-reponsabbiltajiet għal valutazzjoni tal-suppożizzjonijiet sottostanti għall-projezzjonijiet ta' profitti taxxabbli futuri.

(37)

Il-kalkolu tar-Rekwiżit Kapitali tas-Solvenza fuq livell individwali u fi grupp jenħtieġ li tkun konsistenti. Fejn jiġi applikat l-approċċ ta' trasparenza fuq livell individwali għall-impriżi ta' investiment kollettiv, jew għal investimenti miġbura bħala fondi li huma relatati għal impriżi ta' impriża tal-assigurazzjoni jew tar-riassigurazzjoni parteċipanti, l-approċċ ta' trasparenza jenħtieġ li wkoll jiġi applikat fuq livell ta' grupp. Fejn dawk l-impriżi ta' investiment kollettiv jew fondi huma sussidjarji ta' grupp tal-assigurazzjoni jew tar-riassigurazzjoni, il-kalkolu tar-Rekwiżit Kapitali tas-Solvenza jenħtieġ li tkun ibbażata fuq is-suppożizzjoni ta' diversifikazzjoni sħiħa b'assi jew obbligazzjonijiet konsolidati oħrajn.

(38)

Il-kalkolu tar-rekwiżit kapitali għal riskju tal-munita għal grupp jenħtieġ li jirrifletti is-sitwazzjoni ekonomika speċifika ta' dak il-grupp, f'każijiet partikolari fejn l-attivitajiet tal-assigurazzjoni jew tar-riassigurazzjoni huma denominati f'muniti differenti. Għal dik ir-raġuni, impriżi tal-assigurazzjoni jew tar-riassigurazzjoni parteċipanti, kumpaniji azzjonarji tal-assigurazzjoni jew kumpaniji azzjonarji finanzjarji mħallta jenħtieġ li jkunu jistgħu jagħżlu munita ta' referenza apparti dik użata għall-preparazzjoni ta' kontijiet konsolidati fejn ir-riskju tal-munita fir-Rekwiżit Kapitali ta' Solvenza ta' grupp konsolidat hija kkalkulat fuq il-bażi tal-formola standard. Dik l-għażla jenħtieġ li tkun ibbażata fuq kriterji oġġettivi, bħall-munita li fiha huma ddenominati ammont materjali tal-provvedimenti tekniċi ta' grupp jew fondi personali.

(39)

Il-kalkolu tal-formola standard għas-submodulita' riskju ta' primjum u ta' riżerva mhux tal-ħajja, is-submoduli ta' riskju ta' primjum u ta' riżerva tas-saħħa, u għas-submodulu ta' riskju ta' katastrofi naturali, jenħtieġ li jiġi mmodifikat biex jirrifletti l-evidenza empirika riċenti dwar il-provvedimenti għall-primjums u l-provvedimenti għall-pretenzjonijiet pendenti.

(40)

Il-kumplessità tal-kalkolu tar-rekwiżit kapitali għal inċidenti tal-massa u konċentrazzjoni ta' inċidenti jenħtieġ li tkun xierqa għan-natura, l-iskala u l-kumplessità tar-riskju li impriżi li joffru assigurazzjoni tas-saħħa huma skoperti għalih. It-tip ta' avveniment li jirreferi għal diżabbiltà li ddum 10 snin ikkawżata minn inċident jenħtieġ li titneħħa minn dan il-kalkolu.

(41)

Ir-Regolament ta' Delega tal-Kummissjoni (UE) 2015/35 (3) fih numru ta' żbalji tipoloġiċi, bħal kontroreferenzi interni ħżiena, li jenħtieġ jiġu rranġati.

(42)

Sabiex jiġu evitati interruzzjonijiet fis-suq tal-assigurazzjoni mhux tal-ħajja u tas-saħħa, b'mod partikolari għal impriżi tal-assigurazzjoni u tar-riassigurazzjoni li joperaw biss f'linja tan-negozju waħda, jenħtieġ li jingħata ħin suffiċjenti biex jippermetti lil impriżi tal-assigurazzjoni u tar-riassigurazzjoni jippreparaw għal bidliet fil-kalkolu tar-riskju tal-primjums u tar-riżerva mhux tal-ħajja u tas-saħħa. Għalhekk jenħtieġ li dawk it-tibdiliet ma jkunux japplikaw qabel l-1 ta' Jannar 2020.

(43)

Ir-Regolament ta' Delega (UE) 2015/35 jenħtieġ għalhekk li jiġi emendat skont dan,