Artikolu 1

(a)	L-Istandard Internazzjonali tal-Kontabilità (IAS) 12 Taxxi fuq l-Introjtu huwa emendat kif stipulat fl-Anness ta' dan ir-Regolament;

(b)	L-IAS 23 Kostijiet tas-Self huwa emendat kif stipulat fl-Anness ta' dan ir-Regolament;

(c)	L-Istandard Internazzjonali tar-Rapportar Finanzjarju (IFRS) 3 Kombinamenti ta' Negozji huwa emendat kif stipulat fl-Anness ta' dan ir-Regolament;

(d)	L-IFRS 11 Arranġamenti Konġunti huwa emendat kif stipulat fl-Anness ta' dan ir-Regolament.

Artikolu 2

Kull kumpanija għandha tapplika l-emendi msemmija fl-Artikolu 1 tal-anqas mid-data tal-bidu tal-ewwel sena finanzjarja li tibda fl-1 ta' Jannar 2019 jew wara.

Artikolu 3

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

ANNESS

Titjib Annwali għall-Istandards tal-IFRS Ċiklu 2015-2017

Emendi għall-

IFRS 3 Kombinamenti ta' Negozji

Jiżdiedu l-paragrafi 42 A u 64O.

Gwida addizzjonali għall-applikazzjoni tal-metodu tal-akkwiżizzjoni għal tipi partikolari ta' kombinamenti ta' negozji

Kombinament ta' negozji mwettaq fi stadji

…

42 A

Meta parti f'arranġament konġunt (kif definit fl-IFRS 11 Arranġamenti Konġunti) tikseb il-kontroll ta' negozju li huwa operazzjoni konġunta (kif definit fl-IFRS 11), u kellha d-drittijiet għall-assi u l-obbligi għall-obbligazzjonijiet b'rabta ma' dik l-operazzjoni konġunta immedjatament qabel id-data tal-akkwiżizzjoni, it-tranżazzjoni tkun kombinament ta' negozju mwettaq fi stadji. L-akkwirent għandu għalhekk japplika r-rekwiżiti għal kombinament ta' negozju mwettaq fi stadji, inkluż li jerġa' jkejjel l-interessi li kellu qabel fl-operazzjoni konġunta bil-mod deskritt fil-paragrfaru 42. Meta jagħmel dan, l-akkwirent għandu jkejjel mill-ġdid l-interessi kollha li kellu qabel fl-operazzjoni konġunta.

DATA U TRANŻIZZJONI EFFETTIVI

Data effettiva

…

64O

Titjib Annwali għall-Istandards IFRS Ċiklu 2015-2017, maħruġ f'Diċembru 2017, żied il-paragrafu 42 A. Entità għandha tapplika dawn l-emendi għal kombinamenti ta' negozji li d-data tal-akkwiżizzjoni tagħhom tkun fil-bidu jew wara l-bidu tal-ewwel perjodu ta' rappurtar annwali li jibda fl-1 ta' Jannar 2019 jew wara. Hija permessa applikazzjoni aktar bikrija. Jekk entità tapplika dawk l-emendi aktar kmieni, hija għandha tiddivulga dak il-fatt.

Emendi għall-

IFRS 11 Arranġamenti Konġunti

Kontabilizzazzjoni għal akkwiżizzjonijiet ta' interessi f'operazzjonijiet konġunti

…

B33CA

Parti li tipparteċita f'operazzjoni konġunta, iżda li ma jkollhiex kontroll konġunt tagħha, tista' tikseb kontroll konġunt tal-operazzjoni konġunta li fiha l-attività tal-operazzjoni konġunta tikkostittiwixxi negozju kif definit fl-IFRS 3. F'dawn il-każijiet, l-interessi li kellha qabel fl-operazzjoni konġunta ma jitkejlux mill-ġdid. …

DATA EFFETTIVA

…

C1AB

Titjib Annwali għall-Istandards IFRS Ċiklu 2015-2017, maħruġ f'Diċembru 2017, żied il-paragrafu B33CA. Entità għandha tapplika dawn l-emendi għal tranżazzjonijiet li fihom hija tikseb kontroll konġunt fil-bidu jew wara l-bidu tal-ewwel perjodu ta' rappurtar annwali li jibda fl-1 ta' Jannar 2019 jew wara. Hija permessa applikazzjoni aktar bikrija. Jekk entità tapplika dawk l-emendi aktar kmieni, hija għandha tiddivulga dak il-fatt.

Emendi għall-

IAS12 Taxxi fuq l-Introjtu

Jiżdiedu l-paragrafi 57 A u 98I, l-intestatura tal-eżempju ta' taħt il-paragrafu 52B hija emendata u l-paragrafu 52B jitħassar.

KEJL

…

52B

[Imħassar]

Eżempju li jispjega l-paragrafi 52 A u 57 A

…

…

RIKONOXXIMENT TA' TAXXA ATTAWALI U DIFFERITA

…

57 A

Entità għandha tirrikonoxxi l-konsegwenzi tad-dividendi fuq it-taxxa tal-introjtu kif definit fl-IFRS 9 meta tirrikonoxxi obbligazzjoni li tħallas dividend. Il-konsegwenzi tad-dividendi fuq it-taxxa tal-introjtu huma marbuta direttament aktar ma' tranżazzjonijiet jew avvenimenti passati li ġġeneraw il-profitti distribwibbli milli mad-distribuzzjonijiet lis-sidien. Għalhekk, entità għandha tirrikonoxxi l-konsegwenzi tad-dividendi fuq it-taxxa tal-introjtu fil-profitt jew telf, f'introjtu komprensiv ieħor jew f'ekwità skont fejn oriġinarjament l-entità rrikonoxxiet dawk it-tranżazzjonijiet jew l-avvenimenti passati.

DATA EFFETTIVA

…

98I

Titjib Annwali għall-Istandards IFRSs Ċiklu 2015-2017, maħruġ f'Diċembru 2017, żied il-paragrafu 57 A u emenda l-paragrafu 52B. Entità għandha tapplika dawk l-emendi għall-perjodi ta' rappurtar annwali li jibdew fl-1 ta' Jannar 2019, jew wara. Hija permessa applikazzjoni aktar bikrija. Jekk entità tapplika dawk l-emendi aktar kmieni, hija għandha tiddivulga dak il-fatt. Meta entità tapplika dawk l-emendi għall-ewwel darba, għandha tapplikahom għal dawn il-konsegwenzi tad-dividendi fuq it-taxxa tal-introjtu rikonoxxuti fil-bidu tal-perjodu komparattiv l-iktar bikri jew wara.

Emendi għall-

IAS 23 Kostijiet tas-self

Il-paragrafu 14 huwa emendat u jiżdiedu l-paragrafi 28 A u 29D.

RIKONOXXIMENT

…

Kostijiet tas-self eliġibbli għall-kapitalizzazzjoni

…

14.

Sal-punt li entità tissellef fondi b'mod ġenerali u tużahom għall-iskop li tikseb assi kwalifikanti, l-entità għandha tiddetermina l-ammont tal-kostijiet tat-teħid ta' self eliġibbli għall-kapitalizzazzjoni billi tapplika rata ta' kapitalizzazzjoni għall-infiq fuq dak l-assi. Ir-rata tal-kapitalizzazzjoni għandha tkun il-medja ponderata tal-kostijiet tat-teħid tas-self applikabbli għat-teħid tas-self tal-entità li jkunu pendenti matul il-perjodu. Madankollu, entità għandha teskludi minn dan il-kalkolu tal-kostijiet tat-teħid tas-self applikabbli għat-teħid tas-self li sar speċifikament għall-iskop li tikseb assi kwalifikanti, sakemm b'mod sostanzjali jitlestew l-attivitajiet kollha meħtieġa biex tipprepara dak l-assi għall-użu intenzjonat jew għall-bejgħ tiegħu. L-ammont tal-kostijiet tat-teħid tas-self li entità tikkapitalizza matul perjodu ma għandux jaqbeż l-ammont tal-kostijiet tas-self li l-entità tkun ġarrbet matul dak il-perjodu.

…

DISPOŻIZZJONIJIET TRANŻIZZJONALI

…

28 A

Titjib Annwali għall-Istandards IFRS, Ċiklu 2015-2017, maħruġ f'Diċembru 2017, emenda l-paragrafu 14. Entità għandha tapplika dawk l-emendi fuq il-kostijiet tat-teħid tas-self imġarrba fil-bidu tal-perjodu tar-rappurtar annwali, jew wara u li fih l-entità tapplika għall-ewwel darba dawn l-emendi.

DATA EFFETTIVA

…

29D

Titjib Annwali għall-Istandards IFRS, Ċiklu 2015-2017, maħruġ f'Diċembru 2017, emenda l-paragrafu 14 u żied il-paragrafu 28 A. Entità għandha tapplika dawk l-emendi għall-perjodi ta' rappurtar annwali li jibdew fl-1 ta' Jannar 2019, jew wara. Hija permessa applikazzjoni aktar bikrija. Jekk entità tapplika dawk l-emendi aktar kmieni, hija għandha tiddivulga dak il-fatt.