(1)

Ir-Regolament (UE) Nru 1315/2013 jipprevedi l-possibilità li jiġu adattati l-mapep indikattivi tan-netwerk trans-Ewropew tat-trasport (TEN-T) li ġie estiż għall-pajjiżi ġirien speċifiċi abbażi ta' ftehimiet ta' livell għoli dwar netwerks tal-infrastruttura tat-trasport bejn l-Unjoni u l-pajjiżi ġirien ikkonċernati.

(2)

Il-ftehimiet ta' livell għoli dwar l-adattament tal-estensjoni indikattiva tal-mapep komprensivi tat-TEN-T u dwar l-identifikazzjoni tal-konnessjonijiet tan-netwerk ewlieni fuq il-mapep komprensivi tan-netwerk ġew iffirmati bejn l-Unjoni u l-pajjiżi tas-Sħubija tal-Lvant (ir-Repubblika tal-Armenja, l-Ażerbajġan, il-Belarussja, ir-Repubblika tal-Moldova u l-Ukrajna) fl-24 ta' Novembru 2017. Il-ftehim ta' livell għoli bejn l-Unjoni u l-Georgia ġie ffirmat fit-18 ta' Lulju 2018. Il-ftehimiet jikkonċernaw l-linji tan-netwerks ferrovjarji u tat-toroq, kif ukoll il-portijiet u l-ajruporti. L-adattament tal-mapep komprensivi u indikattivi tan-netwerk u, b'mod partikolari, l-identifikazzjoni ta' netwerk ewlieni indikattiv, għandu jippermetti lill-Unjoni timmira aħjar il-kooperazzjoni tagħha mal-pajjiżi tas-Sħubija tal-Lvant ikkonċernati.

(3)

Għalhekk ir-Regolament (UE) Nru 1315/2013 jenħtieġ li jiġi emendat skont dan,