EUR-Lex Access to European Union law
This document is an excerpt from the EUR-Lex website
Document 32019D1003
Council Decision (EU) 2019/1003 of 14 June 2019 establishing that no effective action has been taken by Hungary in response to the Council Recommendation of 4 December 2018
Deċiżjoni tal-Kunsill (UE) 2019/1003 tal-14 ta' Ġunju 2019 li tistabbilixxi li ebda azzjoni effettiva ma ttieħdet mill-Ungerija b'reazzjoni għar-Rakkomandazzjoni tal-Kunsill tal-4 ta' Diċembru 2018
Deċiżjoni tal-Kunsill (UE) 2019/1003 tal-14 ta' Ġunju 2019 li tistabbilixxi li ebda azzjoni effettiva ma ttieħdet mill-Ungerija b'reazzjoni għar-Rakkomandazzjoni tal-Kunsill tal-4 ta' Diċembru 2018
ST/10005/2019/INIT
ĠU L 163, 20.6.2019, p. 64–65
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
20.6.2019 |
MT |
Il-Ġurnal Uffiċjali tal-Unjoni Ewropea |
L 163/64 |
DEĊIŻJONI TAL-KUNSILL (UE) 2019/1003
tal-14 ta' Ġunju 2019
li tistabbilixxi li ebda azzjoni effettiva ma ttieħdet mill-Ungerija b'reazzjoni għar-Rakkomandazzjoni tal-Kunsill tal-4 ta' Diċembru 2018
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra r-Regolament tal-Kunsill (KE) Nru 1466/97 tas-7 Lulju 1997 dwar it-tisħiħ tas-sorveljanza ta' pożizzjonijiet ta' budget u s-sorveljanza u l-koordinazzjoni ta' politika ekonomika (1), u b'mod partikolari r-raba' subparagrafu tal-Artikolu 10(2) tiegħu,
Wara li kkunsidra r-Rakkomandazzjoni mill-Kummissjoni Ewropea,
Billi:
(1) |
Fit-22 ta' Ġunju 2018, il-Kunsill sab b'konformità mal-Artikolu 121(4) tat-Trattat li fl-Ungerija kienet teżisti devjazzjoni osservata sinifikanti mill-perkors ta' aġġustament lejn l-objettiv baġitarju fuq terminu medju ta' – 1,5 % tal-prodott domestiku gross (PDG). Fid-dawl ta' dik id-devjazzjoni sinifikanti stabbilita, fit-22 ta' Ġunju 2018 il-Kunsill ħareġ Rakkomandazzjoni (2), li tirrakkomanda li l-Ungerija tieħu l-miżuri meħtieġa sabiex tiżgura li r-rata ta' tkabbir nominali tan-nefqa primarja tal-gvern nett (3) ma taqbiżx it-2,8 % fl-2018, li tikkorrispondi għal aġġustament strutturali annwali ta' 1 % tal-PDG. |
(2) |
Fl-4 ta' Diċembru 2018 il-Kunsill ikkonkluda li l-Ungerija ma kinitx ħadet azzjoni effettiva b'reazzjoni għar-Rakkomandazzjoni tiegħu tat-22 ta' Ġunju 2018. Fuq dik il-bażi, fl-4 ta' Diċembru 2018 il-Kunsill ħareġ Rakkomandazzjoni riveduta (4) biex l-Ungerija tieħu l-miżuri neċessarji biex ikun żgurat li r-rata ta' tkabbir nominali tan-nefqa pubblika primarja netta ma tkunx ogħla minn 3,3 % fl-2019, li jikkorrispondi għal aġġustament strutturali annwali ta' 1 % tal-PDG. Huwa rrakkomanda wkoll li l-Ungerija tuża kwalunkwe gwadann mhux previst biex tnaqqas id-defiċit u ddikjara li jenħtieġ li miżuri ta' konsolidazzjoni baġitarja jiżguraw titjib dejjiemi fil-bilanċ strutturali tal-gvern ġenerali b'manjiera li tiffavorixxi t-tkabbir. Il-Kunsill stabbilixxa l-iskadenza tal-15 ta' April 2019 biex l-Ungerija tirrapporta dwar l-azzjoni li tkun ħadet b'reazzjoni għar-Rakkomandazzjoni tal-4 ta' Diċembru 2018. |
(3) |
Fl-20 ta' Marzu 2019, il-Kummissjoni wettqet missjoni ta' sorveljanza msaħħa fl-Ungerija għall-fini ta' monitoraġġ fil-post skont l-Artikolu 11(2) tar-Regolament (KE) Nru 1466/97. Wara li l-eżiti proviżorji ġew trażmessi lill-awtoritajiet Ungeriżi għall-kummenti tagħhom, fil-5 ta' Ġunju 2019 il-Kummissjoni rrapportat is-sejbiet tagħha lill-Kunsill. Dawk is-sejbiet sussegwentement saru pubbliċi. Ir-rapport tal-Kummissjoni jikkonstata li l-awtoritajiet Ungeriżi mhumiex qegħdin jippjanaw li jaġixxu għar-Rakkomandazzjoni tal-Kunsill tal-4 ta' Diċembru 2018. Matul il-missjoni, l-awtoritajiet ikkonfermaw li l-mira baġitarja tagħhom għall-2019 tibqa' defiċit nominali ta' 1,8 % kif inkluż fil-baġit tal-2019 adottat f'Lulju 2018, minkejja x-xenarju makroekonomiku aktar favorevoli u l-eżitu fiskali aħjar milli mistenni fl-2018. |
(4) |
Fil-15 ta' April 2019, l-awtoritajiet Ungeriżi ppreżentaw rapport dwar l-azzjoni meħuda b'reazzjoni għar-Rakkomandazzjoni tal-Kunsill tal-4 ta' Diċembru 2018. Fir-rapport, l-awtoritajiet tennew li l-mira tagħhom għall-2019 baqgħet defiċit nominali ta' 1,8 % tal-PDG fl-2019, tnaqqis ta' 0,4 punt perċentwali tal-PDG meta mqabbel mal-eżitu tal-2018. Ir-rapport ma jinkludi l-ebda pjan ta' konformità mal-aġġustament fiskali rrakkomandat mill-Kunsill. Barra minn hekk, il-firxa wiesgħa ta' programmi ekonomiċi b'impatt fiskali elenkati fir-rapport jibqgħu fil-biċċa l-kbira mhux kwantifikati, u r-rapport ma jinkludi ebda projezzjoni baġitarja għall-2019. Għalhekk, ir-rapport ma jikkonformax mar-rekwiżit ta' rapportar tal-Kunsill. It-titjib fid-defiċit strutturali sottostanti jaqa' b'mod sinifikanti taħt ir-rekwiżit iddikjarat fir-Rakkomandazzjoni tal-4 ta' Diċembru 2018. |
(5) |
Fuq il-bażi tat-tbassir tar-rebbiegħa tal-2019 tal-Kummissjoni ppubblikat fis-7 ta' Mejju 2019, it-tkabbir tan-nefqa primarja nett huwa projettat li jammonta għal 6,5 % fl-2019, ferm ogħla mir-rata rakkomandata ta' 3,3 %. Il-bilanċ strutturali huwa mistenni jitjieb b'0,4 % tal-PDG meta mqabbel mal-2018, li ma jilħaqx l-aġġustament rakkomandat ta' 1 % tal-PDG. Għalhekk, iż-żewġ indikaturi jippuntaw lejn devjazzjoni mill-aġġustament rakkomandat. Il-valur referenzjarju tan-nefqa jindika devjazzjoni ta' 1,2 % tal-PDG. Id-daqs tad-devjazzjoni indikata mill-bilanċ strutturali hija kemxejn iżgħar, u tammonta għal 0,6 % tal-PDG. Il-bilanċ strutturali huwa influwenzat b'mod negattiv minn xi nuqqasijiet fid-dħul. Il-qari tal-valur referenzjarju tan-nefqa huwa affettwat b'mod negattiv qawwi mit-tkabbir potenzjali tal-PDG fuq terminu medju applikat fil-kalkolu tiegħu, li jinkludi tkabbir potenzjali baxx ħafna tal-PDG fil-perjodu ta' wara l-kriżi. Barra minn hekk, id-deflatur tal-PDG li fuqu huwa bbażat il-valur referenzjarju tan-nefqa ma jidhirx li jqis sew il-pressjonijiet tal-kost miżjud li jaffettwaw l-infiq pubbliku. Wara aġġustament għal dawk il-fatturi kollha, il-parametru referenzjarju tan-nefqa jidher li jirrifletti b'mod adegwat l-isforz fiskali iżda xorta għadu jindika devjazzjoni mill-aġġustament rakkomandat. |
(6) |
Sa mit-tbassir tal-ħarifa 2018 tal-Kummissjoni, li kienet il-bażi għar-Rakkomandazzjoni tal-Kunsill tal-4 ta' Diċembru 2018, l-awtoritajiet Ungeriżi ħabbru miżuri espansjonarji ġodda fuq in-naħa tan-nefqa. Barra minn hekk, wara ż-żieda fil-pagi pubbliċi aktar mgħaġġla milli mistenni fl-2018, tħabbru żidiet ġodda fil-pagi għal xi kategoriji mill-ħarifa tal-2018 'il hawn. Fl-aħħar nett, riżervi ogħla fil-baġit, bl-intenzjoni espliċita tal-gvern li jużahom kollha sal-aħħar tas-sena, żiedu mal-projetzzzjonijiet tan-nefqa għall-2019. B'riżultat ta' dan, id-devjazzjoni mill-parametru referenzjarju tan-nefqa hija mistennija li tkun ferm akbar mid-devjazzjoni misjuba fil-valutazzjoni mwettqa fil-ħarifa tal-2018. |
(7) |
Dan iwassal għall-konklużjoni li r-reazzjoni tal-Ungerija għar-Rakkomandazzjoni tal-Kunsill tal-4 ta' Diċembru 2018 ma kinitx biżżejjed. L-isforz fiskali ma jiżgurax li r-rata ta' tkabbir nominali tal-infiq pubbliku primarju nett ma teċċedix it-3,3 % fl-2019, li tikkorrispondi għal aġġustament strutturali annwali ta' 1 % tal-PDG, |
ADOTTA DIN ID-DEĊIŻJONI:
Artikolu 1
L-Ungerija ma ħaditx azzjoni effettiva b'reazzjoni għar-Rakkomandazzjoni tal-Kunsill tal-4 ta' Diċembru 2018.
Artikolu 2
Din id-Deċiżjoni hija indirizzata lill-Ungerija.
Magħmul fil-Lussemburgu, l-14 ta' Ġunju 2019.
Għall-Kunsill
Il-President
E.O. TEODOROVICI
(2) Ir-Rakkomandazzjoni tal-Kunsill tat-22 ta' Ġunju 2018 bil-ħsieb li tiġi kkoreġuta d-devjazzjoni osservata sinifikanti mill-perkors ta' aġġustament lejn l-objettiv baġitarju fit-terminu medju fl-Ungerija (ĠU C 223, 27.6.2018, p. 1).
(3) In-nefqa pubblika primarja netta tal-gvern hija magħmula min-nefqa pubblika totali bl-esklużjoni tan-nefqa fuq l-imgħax, in-nefqa fuq programmi tal-Unjoni kompletament korrisposti mid-dħul mill-fondi tal-Unjoni u tibdil mhux diskrezzjonarju fin-nefqa fuq il-benefiċċji tal-qgħad. Il-formazzjoni tal-kapital fiss gross iffinanzjata fil-livell nazzjonali hija mifruxa fuq perjodu ta' erba' snin. Miżuri ta' dħul diskrezzjonali jew żidiet fid-dħul mitluba mil-liġi huma meqjusa. Miżuri ta' darba fuq in-naħa kemm tad-dħul kif ukoll tan-nefqa huma nnettjati.
(4) Ir-Rakkomandazzjoni tal-Kunsill tal-4 ta' Diċembru 2018 bil-għan li tiġi kkoreġuta d-devjazzjoni sinifikanti osservata mill-perkors ta' aġġustament lejn l-objettiv baġitarju ta' terminu medju fl-Ungerija (ĠU C 460, 21.12.2018, p. 4).