(1)

Fl-1 ta' Ġunju 2012, il-Kummissjoni rċeviet ilment mill-awtoritajiet Spanjoli dwar l-att il-ġdid dwar it-taxxa fuq l-introjtu f'Ġibiltà, l-Att dwar it-Taxxa fuq l-Introjtu tal-2010 (minn hawn 'il quddiem “l-ATI tal-2010”).

(2)

Fis-16 ta' Ottubru 2013, il-Kummissjoni bdiet proċedura ta' investigazzjoni formali biex tivverifika jekk l-eżenzjoni mit-taxxa tal-imgħax passiv u l-introjtu mir-royalties fl-ATI tal-2010 tagħtix vantaġġ selettiv lil ċerti kumpaniji, fi ksur tar-regoli dwar l-għajnuna mill-Istat tal-Unjoni (id-deċiżjoni li ttieħdet biex tinbeda dik il-proċedura ssir referenza għaliha f'din id-Deċiżjoni bħala “l-Ewwel Deċiżjoni tal-Ftuħ”) (2).

(3)

Fl-4 ta' Diċembru 2013, l-awtoritajiet tar-Renju Unit ipprovdew nota lill-Kummissjoni dwar l-eżenzjoni mir-royalties, flimkien ma' abbozz ta' leġiżlazzjoni ppreparat mill-Gvern ta' Ġibiltà li jemenda l-ATI tal-2010 sabiex l-introjtu mir-royalties isir taxxabbli f'Ġibiltà. Fuq talba, din l-informazzjoni kienet issupplementata mill-awtoritajiet ta' Ġibiltà permezz ta' ittri elettroniċi datati s-6, it-12 u s-16 ta' Diċembru 2013.

(4)

Fis-16 ta' Diċembru 2013, Ġibiltà talbet għal estensjoni tal-iskadenza biex tipprovdi kummenti dwar l-Ewwel Deċiżjoni tal-Ftuħ sas-17 ta' Jannar 2014. Dik it-talba ntlaqgħet mill-Kummissjoni fl-istess jum.

(5)

Fl-20 ta' Diċembru 2013, ir-Renju Unit issottometta kummenti dwar il-ftuħ tal-proċedura skont l-Artikolu 108(2) tat-Trattat. Kummenti minn partijiet terzi dwar dik il-proċedura waslu mill-Konfederazzjoni Spanjola tal-Impjegaturi (C.E.O.E) (3), mill-Ġermanja, minn Spanja u mill-Gvern ta' Ġibiltà, fis-27 ta' Diċembru 2013, fis-27 ta' Diċembru 2013, fis-6 ta' Jannar 2014 u fis-17 ta' Jannar 2014 rispettivament.

(6)

Permezz ta' ittra elettronika datata s-7 ta' Jannar 2014, l-awtoritajiet ta' Ġibiltà pprovdew lill-Kummissjoni b'kopja tal-Att dwar it-Taxxa fuq l-Introjtu (Emenda) tal-2013 tal-24 ta' Diċembru 2013, li introduċa emenda għall-ATI tal-2010 fir-rigward tal-intaxxar tar-royalties.

(7)

B'ittra tas-16 ta' April 2014, il-Kummissjoni stiednet lir-Renju Unit biex jippreżenta l-kummenti tiegħu dwar l-osservazzjonijiet imqajma minn partijiet terzi dwar il-ftuħ tal-proċedura formali. Ir-Renju Unit irrisponda permezz ta' ittra datata t-2 ta' Ġunju 2014, fi żmien l-iskadenza estiża.

(8)

Fl-1 ta' Ottubru 2014, il-Kummissjoni infurmat lir-Renju Unit bid-deċiżjoni tagħha (4) li testendi l-proċedura stabbilita fl-Artikolu 108(2) tat-Trattat biex tiġi inkluża l-prattika tad-deċiżjonijiet tat-taxxa f'Ġibiltà (dik id-deċiżjoni ssir referenza għaliha f'din id-Deċiżjoni bħala d-“Deċiżjoni għall-Estensjoni tal-Proċedimenti”).

(9)

Fl-10 ta' Novembru 2014, il-Kummissjoni talbet aktar informazzjoni dwar il-prattika tad-deċiżjonijiet tat-taxxa f'Ġibiltà. Dik l-informazzjoni ġiet ipprovduta mir-Renju Unit fit-8 ta' Diċembru 2014.

(10)

Fl-4 ta' Marzu 2015, rettifika għad-Deċiżjoni għall-Estensjoni tal-Proċedimenti kienet ikkomunikata lir-Renju Unit.

(11)

Fit-23 ta' Marzu 2015, il-Kummissjoni talbet informazzjoni addizzjonali dwar il-prattika tad-deċiżjonijiet tat-taxxa. Dik l-informazzjoni ġiet ipprovduta mir-Renju Unit fit-23 ta' April 2015.

(12)

Fil-31 ta' Marzu 2015, ir-Renju Unit issottometta l-kummenti tiegħu dwar id-Deċiżjoni għall-Estensjoni tal-Proċedimenti.

(13)

B'segwitu għal ittra elettronika mir-Renju Unit datata d-9 ta' Marzu 2015 bi proposti għal abbozz ta' leġiżlazzjoni u noti ta' gwida b'relazzjoni mal-prinċipju tat-territorjalità u l-prattika tad-deċiżjonijiet tat-taxxa, il-Kummissjoni pprovdiet lir-Renju Unit b'numru ta' suġġerimenti dwar l-abbozz ta' leġiżlazzjoni u noti ta' gwida b'ittra tat-3 ta' Settembru 2015.

(14)

Fid-19 ta' Ottubru 2015, ir-Renju Unit ipprovda lill-Kummissjoni b'abbozz ta' regolament u noti ta' gwida riveduti dwar il-prattika tad-deċiżjonijiet tat-taxxa kif ukoll 20 rieżami dwar deċiżjonijiet tat-taxxa. Fil-11 ta' Novembru 2015, il-Kummissjoni talbet informazzjoni dwar 2 299 kumpanija b'introjtu li jseħħ jew li jkun derivat minn Ġibiltà. L-informazzjoni mitluba ġiet ipprovduta mir-Renju Unit fl-24 ta' Novembru 2015. Rieżamijiet addizzjonali dwar deċiżjonijiet tat-taxxa ntbagħtu lill-Kummissjoni fit-3 ta' Diċembru 2015, fid-19 ta' Frar 2016 u fil-31 ta' Awwissu 2016.

(15)

Fl-14 ta' Lulju 2016, talba ġdida għal informazzjoni dwar il-prattika tad-deċiżjonijiet tat-taxxa kif ukoll dwar l-eżenzjoni mit-taxxa għall-introjtu passiv u għall-introjtu mir-royalties intbagħtet lir-Renju Unit. Ir-Renju Unit irrisponda permezz ta' ittra datata l-31 ta' Awwissu 2016.

(16)

Fis-7 ta' Ottubru 2016, id-Deċiżjoni għall-Estensjoni tal-Proċedimenti ġiet ippubblikata f'Il-Ġurnal Uffiċjali (5).

(17)

F'Ottubru u Novembru 2016, sitt partijiet interessati, inkluż Ġibiltà u Spanja, ippreżentaw l-osservazzjonijiet taghom dwar id-Deċiżjoni għall-Estensjoni tal-Proċedimenti.

(18)

Fid-9 ta' Novembru 2016, Ġibiltà ressqet applikazzjoni għal annullament tad-Deċiżjoni għall-Estensjoni tal-Proċedimenti quddiem il-Qorti Ġenerali tal-Unjoni Ewropea (6).

(19)

Fis-7 ta' Diċembru 2016, il-Kummissjoni stiednet lir-Renju Unit sabiex jikkummenta dwar il-kummenti li waslu mingħand partijiet terzi. Ir-Renju Unit ipprovda l-kummenti tiegħu fil-31 ta' Jannar 2017.

(20)

Fis-16 ta' Frar 2017, il-Kummissjoni talbet aktar kjarifiki mir-Renju Unit dwar id-deċiżjonijiet tat-taxxa ta' Ġibiltà. L-awtoritajiet tar-Renju Unit irrispondew fil-31 ta' Marzu 2017, u pprovdew aktar informazzjoni fit-3 ta' Mejju 2017, fiż-żmien ta' skadenza estiż.

(21)

Fid-29 ta' Novembru 2017, ir-Renju Unit issottometta kopja tar-rapporti kollha mħejjija mill-awtoritajiet tat-taxxa ta' Ġibiltà bħala riżultat tar-rieżamijiet imwettqa fir-rigward tal-165 deċiżjoni tat-taxxa elenkati fid-Deċiżjoni għall-Estensjoni tal-Proċedimenti.

(22)

Wara l-kummenti li saru mill-Kummissjoni fis-7 ta' Diċembru 2017, ir-Renju Unit ipprovda informazzjoni addizzjonali fit-18 ta' Jannar 2018, inkluż abbozz ta' leġiżlazzjoni u noti ta' gwida.

(23)

Fid-9 ta' Frar 2018, il-Kummissjoni talbet aktar kjarifiki dwar l-abbozz ta' leġiżlazzjoni mibgħut mir-Renju Unit. Hija talbet ukoll spjegazzjonijiet supplementari dwar aspetti fattwali jew legali ta' wħud mir-rieżamijiet dwar id-deċiżjonijiet tat-taxxa sottomessi mir-Renju Unit f'Novembru 2017.

(24)

Permezz ta ittra datata l-21 ta' Frar 2018, ir-Renju Unit irrisponda għal dik it-talba għal informazzjoni. Permezz ta' ittra elettronika tal-1 ta' Marzu 2018, il-Kummissjoni stiednet lir-Renju Unit sabiex jipprovdi kjarifika dwar ċerti deċiżjonijiet speċifiċi tat-taxxa. Ir-Renju Unit irrisponda għal dik it-talba fil-15 ta' Marzu 2018. Aktar kjarifiki dwar l-istess kwistjonijiet ġew ipprovduti mir-Renju Unit fl-24 ta' Mejju 2018, wara talba mill-Kummissjoni datata t-3 ta' Mejju 2018.

(25)

Saru laqgħat fil-5 ta' Diċembru 2013, fit-12 ta' Marzu 2015, fit-28 ta' Mejju 2015 u fid-29 ta' Novembru 2017 u fil-5 ta' Ottubru 2018 mar-Renju Unit, flimkien ma' rappreżentanti tal-awtoritajiet ta' Ġibiltà.

(26)

Ġibiltà hija Territorju Brittanniku Barra l-Pajjiż. Hija għandha awtonomija interna sħiħa fir-rigward ta' kwistjonijiet ta' taxxa, filwaqt li l-gvern tar-Renju Unit huwa responsabbli għar-relazzjonijiet internazzjonali tagħha, pereżempju għan-negozjati ta' trattati dwar taxxa.

(27)

L-ATI tal-2010 (7) daħal fis-seħħ fl-1 ta' Jannar 2011 u ssostitwixxa l-Att tat-Taxxa fuq l-Introjtu preċedenti tal-1952 (“l-ATI tal-1952”). Dan introduċa rata ġenerali ta' taxxa fuq l-introjtu ta' 10 % li tapplika għal kumpaniji fl-ekonomija kollha ta' Ġibiltà, ħlief għal kumpaniji tal-utilitajiet, servizzi ta' telekomunikazzjoni u kumpaniji li jgawdu u jabbużaw minn pożizzjoni dominanti fis-suq, li huma suġġetti għal rata ta' 20 %.

(28)

Kemm kumpanija (8) ordinarjament residenti (9) f'Ġibiltà, kif ukoll kumpanija li mhijiex ordinarjament residenti f'Ġibiltà tista' tkun kontribwent f'Ġibiltà imma, fil-każ tal-aħħar, dan iseħħ biss jekk il-kumpanija twettaq kummerċ f'Ġibiltà permezz ta' fergħa jew aġenzija (10).

—

Tabella A: kummerċ, negozju, professjoni, vokazzjoni u proprjetà immobbli;

—

Tabella B: impjieg u impjieg indipendenti;

—

Tabella C: introjtu ieħor (dividendi (11), introjtu minn fondi, introjtu minn drittijiet, pensjonijiet u “Sweeping Up Class” ġenerali f'relazzjoni ma' elementi ta' introjtu inklużi taħt id-dispożizzjonijiet kontra l-evażjoni tat-taxxa fit-Taqsima 40 tal-Iskeda 4 tal-ATI tal-2010).

(29)

Għall-iskopijiet ta' komputazzjoni fuq il-bażi ta' valutazzjoni għall-kumpaniji, it-Taqsima 16 tal-ATI tal-2010 tistipula li, suġġett għal ċerti eċċezzjonijiet, il-profitti jew qligħ ta' kumpanija li jistgħu jiġi vvalutati għat-taxxa għal perjodu kontabilistiku jridu jkunu l-ammont sħiħ tal-profitti jew qligħ tal-kumpanija għal dak il-perjodu kontabilistiku, filwaqt li tiġi applikata l-bażi territorjali tat-taxxa deskritta fil-premessi 30 sa 32.

(30)

L-ATI tal-2010 hija bbażata fuq sistema territorjali tat-taxxa, li tfisser li profitti jew qligħ huma ntaxxati biss jekk l-introjtu “iseħħ f'Ġibiltà jew ikun derivat minnha”. Skont it-Taqsima 74 tal-ATI tal-2010, “iseħħ u jkun derivat” trid tkun definita b'referenza għall-post tal-attivitajiet (12) li jwasslu għall-profitti, normalment determinati fuq bażi każ b'każ. Dik id-dispożizzjoni tqis ukoll li attivitajiet li jirrikjedu liċenzja u regolamentazzjoni skont kwalunkwe liġi ta' Ġibiltà jkunu qed iseħħu f'Ġibiltà.

(31)

L-applikazzjoni mill-awtoritajiet tat-taxxa ta' Ġibiltà tal-kunċetti ta' seħħ u derivazzjoni ssib ukoll is-sors tagħha fi prinċipji derivati mill-ġurisprudenza tal-Kumitat Ġudizzjarju tal-Privy Council (13) f'diversi sentenzi prominenti, bħal Hang Seng (14) u HK-TVB (15), li t-tnejn jirrigwardaw l-applikazzjoni tal-prinċipju tat-territorjalità f'Hong Kong. Filwaqt li d-deċiżjonijiet tal-Kumitat Ġudizzjarju tal-Privy Council li jikkonċernaw ġuriżdizzjonijiet oħra li mhumiex Ġibiltà mhumiex vinkolanti f'Ġibiltà, il-qrati ta' Ġibiltà jistgħu jirreferu għalihom jekk dawn jitqiesu bħala rilevanti. Fl-opinjoni tar-Renju Unit, huwa ċar li dan ikun il-każ għad-deċiżjonijiet li tirreferi għalihom din il-premessa minħabba s-similarità tal-leġiżlazzjoni fiż-żewġ ġuriżdizzjonjiet (16).

(32)

Skont il-ġurisprudenza msemmija fil-premessa 31, meta jiddeċiedu jekk profitti ta' kwalunkwe persuna jkunux seħħu f'Ġibiltà jew ġew derivati minnha, l-awtoritajiet tat-taxxa ta' Ġibiltà jenħtieġ li jħarsu lejn dak li tkun għamlet dik il-persuna, jew dak li tkun qed tipproponi li tagħmel, sabiex taqla' l-profitti inkwistjoni, u fejn dik il-persuna tkun għamlet dan, jew ikollha l-intenzjoni li tagħmlu. L-enfasi għalhekk hija fuq l-istabbiliment tal-post ġeografiku tal-attività li tkun produċiet il-profitti għat-tranżazzjonijiet rilevanti. Fir-rigward tal-forniment ta' servizzi minn kumpanija, l-awtoritajiet ta' Ġibiltà indikaw li huma jibbażaw b'mod partikolari fuq il-post ġeografiku fejn iseħħu l-attivitajiet kollha li jiġġeneraw introjtu (u mhux smepliċiment funzjonijiet tal-back-office jew ta' appoġġ amministrattiv) sabiex jiddeterminaw il-post fejn jitwettqu s-servizzi li jwasslu għal ħlas.

(33)

Skont l-ATI tal-2010, kif stabbilit oriġinalment, l-imgħax passiv u r-royalties ma tapplikax għalihom it-taxxa (17), irrispettivament mis-sors tal-introjtu jew mill-applikazzjoni tal-prinċipju tat-territorjalità. L-idea ta' imgħax passiv tirreferi l-aktar għal imgħax fuq self bejn il-kumpaniji. Min-naħa l-oħra, l-imgħax kien suġġett għat-taxxa jekk kien meqjus bħala introjtu min-negozju, jiġifieri jekk kien jifforma parti integrali mill-fluss ta' dħul ta' kumpanija (18).

(34)

L-ATI tal-2010 kien emendat f'Ġunju tal-2013, b'effett mill-1 ta' Lulju 2013, biex l-imgħax kollu fuq self bejn kumpaniji (kemm minn sorsi domestiċi kif ukoll minn dawk barranin) ikun jista' jiġi ntaxxat bir-rata ġenerali ta' 10 % meta l-imgħax riċevut jew riċevibbli għal kull kumpanija sors ikun jeċċedi GBP 100 000 fis-sena (19). Fir-rigward tal-introjtu mir-royalties, ġiet stabbilita leġiżlazzjoni ulterjuri fl-24 ta' Diċembru 2013 li tissoġġetta r-royalties (riċevuti jew reċivibbli minn kumpanija rreġistrata f'Ġibiltà) għal taxxa b'rata ta' 10 % mill-1 ta' Jannar 2014 (20).

(35)

Skont it-Tabella C tal-Iskeda 1 tal-ATI tal-2010, dividendi mħallsa jew pagabbli minn kumpanija lil kumpanija oħra mhumiex suġġetti għat-taxxa. Din hija r-regola ġenerali irrispettivament mill-post tal-kumpanija u irrispettivament mill-attività tal-kumpaniji involuti (kumpaniji holding jew kumpaniji ta' negozju attiv). L-istess japplika għal dividendi riċevuti minn stabbilimenti permanenti (li jinsabu f'Ġibiltà) ta' kumpanija mhux residenti.

(36)

Il-Kummissarju għat-Taxxa fuq l-Introjtu ta' Ġibiltà huwa intitolat li jagħti deċiżjonijiet tat-taxxa bħala parti mid-dmirijiet ġenerali tiegħu biex jiżgura l-amministrazzjoni dovuta tal-Att dwar it-Taxxa fuq l-Introjtu u r-responsabbiltà tiegħu għall-valutazzjoni u l-ġbir tat-taxxa fuq l-introjtu f'Ġibiltà. Dawn is-setgħat ġenerali jirriżultaw mit-Taqsima 2(1) u (2) tal-ATI tal-2010.

(37)

Fir-rigward tad-deċiżjonijiet tat-taxxa elenkati fid-Deċiżjoni għall-Estensjoni tal-Proċedimenti, fil-parti l-kbira tal-każijiet, talbiet għal deċiżjonijiet tat-taxxa jfittxu konferma dwar jekk kumpanija residenti hijiex obbligata jew le tħallas taxxa f'Ġibiltà b'riżultat tal-prinċipji legali bażiċi tat-taxxa, jiġifieri s-seħħ u d-derivazzjoni tal-introjtu skont is-sistema territorjali.

(38)

Barra minn dan, it-Taqsima 42 tal-ATI tal-2010 tistipula proċedura speċifika għar-rilaxx fir-rigward ta' kwistjonijiet ta' kontra l-evażjoni tat-taxxa. Dawn id-deċiżjonijiet jistgħu jingħataw biss sabiex ikun determinat jekk ċerti tranżazzjonijiet jew arranġamenti humiex taxxabbli skont it-Taqsima 40 tal-Iskeda 4 tal-ATI tal-2010, jiġifieri sabiex ikun determinat jekk arranġament huwiex artifiċjali jew fittizju jew le sabiex ikun eliminat jew imnaqqas l-ammont ta' taxxa pagabbli.

(39)

Fl-Ewwel Deċiżjoni tal-Ftuħ, il-Kummissjoni adottat il-fehma preliminari li l-eżenzjoni mit-taxxa għall-imgħax passiv (self bejn il-kumpaniji) u l-introjtu mir-royalties li tirriżulta mill-ATI tal-2010 tikkostitwixxi għajnuna mill-Istat għall-iskopijiet tal-Artikolu 107(1) tat-Trattat u esprimiet dubji dwar il-kompatibilità tagħha mas-suq intern.

(40)

Fir-rigward tas-selettività materjali tal-miżura, il-Kummissjoni sabet li l-eżenzjoni fuq l-introjtu passiv (imgħax, royalties u dividendi) kienet selettiva prima facie. Madankollu, fir-rigward ta' dividendi hija sabet li l-eżenzjoni kienet ġustifikata mil-loġika tal-prevenzjoni tat-taxxa doppja. Min-naħa l-oħra, il-Kummissjoni ma identifikat l-ebda ġustifikazzjoni għall-eżenzjoni għall-imgħax passiv jew għall-introtu mir-royalties. B'mod partikolari, hija ma qablitx li l-eżenzjoni għall-imgħax passiv minn sorsi barranin kienet issegwi mil-loġika tas-sistema territorjali tat-taxxa. Lanqas ma aċċettat l-argument li l-eżenzjoni għall-imgħax passiv minn sorsi domestiċi kienet tkun ġustifikata minn tħassib dwar il-maniġġabbiltà (spejjeż eċċessivi għall-ġbir tat-taxxa). Fl-aħħar nett, dwar l-eżenzjoni tar-royalties, il-Kummissjoni ma aċċettatx il-ħtieġa li s-sistema tat-taxxa ta' Ġibiltà ssir aktar sempliċi u effettiva bħala ġustifikazzjoni valida għall-eżenzjoni.

(41)

Fuq bażi preliminari, il-Kummissjoni kkonkludiet ukoll li l-miżura kienet iffinanzjata permezz ta' riżorsi tal-Istat, li din kienet tikkonferixxi vantaġġ ekonomiku lil intrapriżi, li kienet taffettwa l-kummerċ bejn l-Istati Membri u li kienet thedded li tfixkel il-kompetizzjoni billi tiffavorixxi lil ċerti intrapriżi. Għaldaqstant, hija kienet tal-opinjoni li l-eżenzjoni mit-taxxa għall-imgħax passiv u għar-royalties kienet tikkostitwixxi għajnuna mill-Istat għall-iskopijiet tal-Artikolu 107(1) tat-Trattat.

(42)

Il-Kummissjoni kkonkludiet ukoll li din l-għajnuna kienet tikkostitwixxi “għajnuna ġdida” minħabba li l-eżenzjoni għall-imgħax passiv taħt l-ATI tal-1952 ma kinitx mogħtija awtomatikament u kienet tirrikjedi valutazzjoni ta' territorjalità. Barra minn dan, l-ATI tal-2010 introduċiet eżenzjoni għar-royalties, li qabel ma kinitx teżisti fl-ATI tal-1952. F'dan ir-rigward, il-Kummissjoni nnutat li l-applikazzjoni tas-sistema territorjali kienet tfisser li l-introjtu kollu mir-royalties riċevut minn kumpanija ta' Ġibiltà jseħħ f'Ġibiltà u huwa derivat minnha.

(43)

Fl-aħħar nett, il-Kummissjoni esprimiet id-dubji tagħha fir-rigward tal-kompatibbiltà tar-regola tal-eżenzjoni għall-imgħax passiv (self bejn il-kumpaniji) u għall-introjtu mir-royalties mas-suq intern. B'mod partikolari, hi ma identifikat l-ebda bażi ta' kompatibbiltà possibbli taħt l-Artikolu 107(2) jew (3) tat-Trattat.

(44)

Bid-Deċiżjoni għall-Estensjoni tal-Proċedimenti, il-Kummissjoni ddeċidiet li testendi l-proċedura ta' investigazzjoni formali biex tkopri 165 deċiżjoni tat-taxxa mogħtija mill-awtoritajiet tat-taxxa ta' Ġibiltà fil-perjodu mill-2011 sa Awwissu 2013 (minn total ta' 340 deċiżjoni mogħtija matul dak il-perjodu).

(45)

Il-Kummissjoni qieset li l-erba' kundizzjonijiet biex miżura tiġi kkwalifikata bħala għajnuna mill-Istat kienu ssodisfati. B'mod partikolari, hija kkonkludiet fuq bażi preliminari li l-miżuri tad-deċiżjonijiet tat-taxxa kienu materjalment selettivi minħabba li l-awtoritajiet tat-taxxa ta' Ġibiltà ġeneralment żammew lura milli jwettqu valutazzjoni proprja tal-obbligi tat-taxxa tal-kumpanija, fl-eżerċizzju tas-setgħat diskrezzjonarji tagħhom. Fl-opinjoni tal-Kummissjoni, dan il-kors ta' kondotta kien possibbli minħabba li d-dispożizzjonijiet legali kienu fformulati b'mod vag. Il-Kummissjoni adottat ukoll il-fehma preliminari li, f'ċerti każijiet, l-awtoritajiet tat-taxxa ta' Ġibiltà ħarġu deċiżjonijiet tat-taxxa li ma kinux konsistenti mad-dispożizzjonijiet tat-taxxa applikabbli.

(46)

Bħala appoġġ għall-opinjonijiet preliminari tagħha dwar in-natura selettiva tal-miżuri tad-deċiżjonijiet tat-taxxa jew in-nuqqas ta' verifika proprja dwar fejn l-attivitajiet twettqu effettivament, il-Kummissjoni elenkat seba' kategoriji tipiċi ta' każijiet fuq il-bażi ta' tipi differenti ta' deċiżjoni, attività jew introjtu.

(47)

Fuq bażi preliminari, il-Kummissjoni qieset li, bl-għoti ta' dawn id-deċiżjonijiet tat-taxxa biss lil ċerti kumpaniji multinazzjonali, għall-kuntrarju ta' kumpaniji oħra domestiċi li ma jitolbux deċiżjoni tat-taxxa, l-awtoritajiet tat-taxxa ttrattaw kumpaniji li kienu f'sitwazzjoni legali u fattwali simili b'mod differenti. Għaldaqstant, instab li prima facie l-miżuri kienu selettivi. Barra minn dan, il-Kummissjoni ma identifikatx ġustifikazzjoni aċċettabbli abbażi tan-natura jew tal-iskema ġenerali tas-sistema ta' referenza (ara l-premessa 57 tad-Deċiżjoni għall-Estensjoni tal-Proċedimenti). F'dan ir-rigward, hija indikat ukoll li kwalunkwe ġustifikazzjoni possibbli tkun tirrikjedi l-eżistenza ta' kontroll xieraq u ta' proċeduri ta' monitoraġġ (21) (sabiex tkun żgurata applikazzjoni koerenti tas-sistema tat-taxxa), u dawn dehru li huma nieqsa f'dan il-każ.

(48)

Bħala konklużjoni preliminari, il-Kummissjoni sabet ukoll li l-miżuri tad-deċiżjonijiet tat-taxxa kienu ngħataw permezz ta' riżorsi tal-Istat, li kkonferew vantaġġ ekonomiku lil intrapriżi, li kienu jaffettwaw il-kummerċ bejn l-Istati Membri u li kienu jheddu li jfixklu l-kompetizzjoni billi jiffavorixxu lil ċerti intrapriżi. Hija esprimiet id-dubji tagħha għall-kompatibbiltà ta' dawk il-miżuri mas-suq intern. Għaldaqstant, hija adottat il-fehma preliminari li l-miżuri ta' deċiżjonijiet tat-taxxa kienu jikkostitwixxu għajnuna mill-Istat għall-iskopijiet tal-Artikolu 107(1) tat-Trattat. Hija qieset ukoll li din l-għajnuna mill-Istat kienet tikkostitwixxi “għajnuna ġdida”.

(49)

Il-proċedimenti estiżi kienu relatati mhux biss mal-165 deċiżjoni individwali imma b'mod aktar ġenerali mal-prattika tad-deċiżjonijiet tat-taxxa taħt l-ATI tal-2010, li dehru li kienu japplikaw ħażin id-dispożizzjonijiet tal-ATI tal-2010 fuq bażi rikorrenti.

(50)

Fir-rigward tal-kompatibbiltà tal-165 deċiżjoni tat-taxxa u l-prattika ġenerali tad-deċiżjonijiet tat-taxxa mas-suq intern, il-Kummissjoni ma identifikat l-ebda bażi possibbli għal kompatibbiltà abbażi tal-eċċezzjonijiet stabbiliti fl-Artikolu 107(2) u (3) tat-Trattat.

(51)

B'konklużjoni, il-Kummissjoni esprimiet il-fehma preliminari li l-165 deċiżjoni tat-taxxa elenkati fl-Anness tad-Deċiżjoni għall-Estensjoni tal-Proċedimenti u l-prattika tad-deċiżjonijiet tat-taxxa ta' Ġibiltà jikkostitwixxu għajnuna mill-Istat għall-iskopijiet tal-Artikolu 107(1) tat-Trattat u esprimiet dubji dwar il-kompatibbiltà tagħhom mas-suq intern. Hija stiednet ukoll lill-awtoritajiet tar-Renju Unit u ta' Ġibiltà biex jipprovdulha evidenza ta' kontrolli ex post. Fl-aħħarnett, hija stiednet lir-Renju Unit biex jispjega jekk u fuq liema bażi l-prattika tad-deċiżjonijiet tat-taxxa jew kwalunkwe waħda mill-165 deċiżjoni tat-taxxa vvalutati setgħu jinstabu li huma kompatibbli.

(52)

Il-kummenti ppreżentati mir-Renju Unit fl-20 ta' Diċembru 2013 jistgħu jinġabru fil-qosor kif ġej:

(53)

L-argumenti mressqa mir-Renju Unit fil-31 ta' Marzu 2015 kontra d-Deċiżjoni għall-Estensjoni tal-Proċedimenti jistgħu jinġabru fil-qosor kif ġej:

(54)

Il-Kummissjoni rċeviet kummenti minn erba' partijiet interessati - Ġibiltà, Spanja, il-Ġermanja u l-Konfederazzjoni Spanjola tal-Organizzazzjonijiet tal-Kummerċ (CEOE).

(55)

Fil-kummenti tagħha, Ġibiltà appoġġjat il-linja tal-argument imressqa mir-Renju Unit li l-miżura mhijiex selettiva minħabba li hija applikata b'mod universali u hija miftuħa għat-tipi kollha ta' oġġetti, servizzi u kumpaniji u li, kieku jinstab li din hija selettiva, trid titqies bħala ġustifikata minħabba l-loġika u n-natura ġenerali tas-sistema bħala konsegwenza tal-prinċipju tat-territorjalità. Hija kompliet tenfasizza li l-eżenzjoni għall-imgħax passiv u għall-introjtu mir-royalties hija ġustifikata minn tħassib dwar il-maniġġibbiltà amministrattiva, minħabba li l-ispejjeż assoċjati mal-ġbir tat-taxxa huma mistennija li jkunu akbar mid-dħul mit-taxxa nnifsu.

(56)

Fir-rigward tal-eżenzjoni għall-introjtu mir-royalties, Ġibiltà ssottomettiet ukoll li l-eżenzjoni ma tistax titqies bħala selettiva minħabba li l-kumpaniji li kienu jirċievu r-royalties matul il-perjodu ta' tliet snin meta kien fis-seħħ in-nuqqas ta' impożizzjoni tat-taxxa kienu attivi f'setturi differenti minn xulxin bħall-bejgħ bl-imnut tal-ikel, u bejgħ tal-ħwejjeġ, il-gaming u l-assigurazzjoni. Barra minn dan, it-tipi ta' royalties ikkonċernati kienu daqstantieħor diversi, inklużi drittijiet tal-awtur, trademarks, għarfien u privattivi.

(57)

Ġibiltà sostniet ukoll li, jekk minkejja kollox il-miżura tinsab li hija selettiva, din jenħtieġ li titqies bħala “għajnuna eżistenti” minħabba li din hija de facto tkomplija tal-iskema antika li taħtha imgħax barrani kien eżenti mit-taxxa, abbażi ta' analiżi tas-“situs tas-self”. Għal dik ir-raġuni, il-miżura tista' titqies biss bħala “għajnuna ġdida” sal-punt li din kienet tikkonċerna introjtu fuq imgħax domestiku.

(58)

Fir-rigward ta' kull irkupru potenzjali, Ġibiltà ssottomettiet ukoll li l-ammonti ta' taxxa mitlufa kienu taħt il-limitu de minimis stabbilit mir-Regolament tal-Kunsill (UE) Nru 1407/2013 (24). B'mod partikolari, Ġibiltà ssottomettiet li l-informazzjoni miġbura minn 18-il kumpanija li jirċievu introjtu mir-royalties, li flimkien kienu jammontaw għal GBP 90 miljun f'introjtu gross mir-royalties, kienet turi li ċ-ċifra totali netta ta' introjtu mir-royalties, bħala riżultat tal-ispejjeż deduċibbli, kienet tammonta għal mhux aktar minn GBP 18-il miljun. Barra minn dan, fir-rigward tal-imgħax passiv minn sors f'Ġibiltà, id-dħul mit-taxxa massimu jkun bejn wieħed u ieħor GBP 250 000, imqassam fuq mill-inqas 17-il kumpanija. Barra minn dan, l-opinjoni ta' Ġibiltà hija li l-irkupru x'aktarx ikun impossibbli għal raġunijiet prattiċi u jaffaċċja diffikultajiet insormontabbli, minħabba n-natura mobbli tal-fondi għall-kumpaniji kkonċernati u fid-dawl tal-prinċipju tal-liġi internazzjonali li l-qrati ta' Stat wieħed ma jippermettux u ma jinfurzawx pretensjonijiet għal taxxi f'isem Stat ieħor.

(59)

Fir-rigward tal-proċedura, Ġibiltà ddikjarat li l-Kummissjoni ma segwietx il-prattika normali skont ir-Regolament Proċedurali, b'argumenti simili għal dawk imressqa mill-awtoritajiet tar-Renju Unit.

(60)

Fis-sottomissjonijiet tagħhom, Spanja, il-Ġermanja u s-CEOE appoġġjaw l-analiżi tal-Kummissjoni li l-miżura kienet tikkostitwixxi għajnuna mill-Istat għax kienet teskludi b'mod selettiv ċerti tipi ta' introjtu mit-taxxa, kellha effett negattiv fuq il-kummerċ intra UE u kienet tfixkel il-kompetizzjoni.

(61)

Barra minn dan, Spanja esprimiet tħassib dwar l-effettività tal-emenda tas-7 ta' Ġunju 2013, dwar intaxxar ta' imgħax passiv, minħabba li l-kumpaniji eżentati f'Ġibiltà li kienu rċevew introjtu mill-imgħax ma kellhomx obbligi ta' dikjarazzjoni tat-taxxa. Fl-opinjoni ta' Spanja, dan jista' jxekkel l-identifikazzjoni tal-benefiċjarji potenzjali tal-miżura u kontrolli ex post dwar ir-rappurtar u l-intaxxar ta' introjtu mill-imgħax.

(62)

Spanja sostniet ukoll li l-livell minimu l-ġdid ta' GBP 100 000 introdott bl-emenda tal-2013 kien għoli. Barra minn dan, id-dispożizzjoni ta' kontra l-abbuż, li tirrikjedi li l-imgħax riċevut minn kumpaniji relatati jkun aggregat, ma tapplikax fil-livell tal-kumpaniji riċevituri. Għalhekk, id-dispożizzjoni dwar il-livell minimu tista' faċilment tiġi evitata permezz ta' ristrutturar sempliċi ta' grupp ta' kumpaniji, billi jinħolqu diversi kumpaniji f'Ġibiltà u l-imgħax riċevut jiġi distribwit fost dawn.

(63)

Fir-rigward tal-eżenzjoni tad-dividendi, Spanja kkontestat il-ġustifikazzjoni tal-prevenzjoni tat-taxxa doppja mressqa mill-Kummissjoni. Fl-opinjoni ta' Spanja, kuntrarjament għall-Pakkett ta' Ħidma tal-Grupp dwar il-Kodiċi ta' Kondotta tal-2011 dwar noti ta' gwida għall-intaxxar tan-negozju, Ġibiltà ma kinitx stabbiliet dispożizzjoni effettiva kontra l-abbuż biex tiżgura l-intaxxar. B'mod partikolari, hija qieset li l-leġiżlazzjoni ta' Ġibiltà naqset milli tirrikjedi li l-intrapriża inkwistjoni tkun suġġetta għat-taxxa (kemm f'Ġibiltà kif ukoll f'pajjiż barrani) sabiex tibbenefika mill-eżenzjoni. Dan in-nuqqas wassal, fl-opinjoni ta' Spanja, għal riskju ta' nuqqas doppju ta' ntaxxar.

(64)

Dwar it-trattament tat-taxxa tar-royalties, l-awtoritajiet Spanjoli kienu tal-fehma li l-eżenzjoni kienet tiffavorixxi b'mod selettiv lil kumpaniji li jirċievu introjtu minn royalties, u li din l-eżenzjoni ma setgħetx tkun ġustifikata mill-evitar tat-taxxa doppja.

(65)

Kemm l-awtoritajiet Spanjoli kif ukoll is-CEOE wkoll irreferew għall-fatt li l-eżenzjoni għall-imgħax passiv u l-introjtu mir-royalties jenħtieġ li tkun eżaminata fid-dawl tal-effetti ġenerali tal-ATI tal-2010. Fl-opinjoni tagħhom, l-intenzjoni tal-ATI tal-2010 kienet li tkompli l-effetti tas-sistema tat-taxxa preċedenti (diġà ddikjarata mill-Qorti tal-Ġustizzja bħala għajnuna mill-Istat) li tiffavorixxi kumpaniji barranin fuq dawk residenti f'Ġibiltà.

(66)

Fl-aħħar nett, Spanja kkontestat ukoll il-valutazzjoni li għamlet il-Kummissjoni fir-rigward tas-selettività reġjonali, billi għamlet distinzjoni bejn l-istatus tal-provinċja tal-Azores (li l-Kummissjoni għamlet referenza għaliha fl-analiżi tagħha fl-Ewwel Deċiżjoni tal-Ftuħ) u l-istatus ta' Ġibiltà. B'mod partikolari, l-awtoritajiet Spanjoli qiesu li, minbarra l-eżaminar tat-tliet kriterji ta' awtonomija istituzzjonali, proċedurali u finanzjarja, il-kriterju impliċitu li jirrigwarda l-armonizzazzjoni tat-taxxa (li, skont l-awtoritajiet Spanjoli, huwa ċar li ma jeżistix f'Ġibiltà) jenħtieġ li jkun eżaminat ukoll. Spanja rreferiet ukoll għal numru ta' kwistjonijiet tat-taxxa oħra, bħan-numru ta' impriżi fittizji li jinsabu f'Ġibiltà u li mhumiex taxxabbli.

(67)

Il-Kummissjoni rċeviet kummenti minn sitt partijiet interessati - Ġibiltà, Spanja, Is-Soċjetà tal-Kontabilisti f'Ġibiltà u tliet kumpaniji elenkati bħala riċevituri possibbli ta' deċiżjonijiet tat-taxxa fid-Deċiżjoni għall-Estensjoni tal-Proċedimenti.

(68)

Il-kummenti li saru minn Ġibiltà jirrigwardaw kemm il-proċedura kif ukoll is-sustanza. Il-kummenti jsegwu l-linji tal-argument imressaq mir-Renju Unit u jistgħu jinġabru fil-qosor kif ġej:

(69)

Il-kummenti ppreżentati mill-awtoritajiet Spanjoli fit-30 ta' Novembru 2016 jistgħu jinġabru fil-qosor kif ġej:

(70)

Fit-3 ta' Novembru 2016, is-Soċjetà tal-Kontabilisti ta' Ġibiltà - il-korp rappreżentattiv prinċipali tal-kontabilisti professjonali li jaħdmu f'Ġibiltà, issottomettiet il-kummenti tagħha dwar id-Deċiżjoni għall-Estensjoni tal-Proċedimenti. Il-kummenti jistgħu jitqassru kif ġej:

(71)

Il-Kummissjoni rċeviet ukoll kummenti minn jew f'isem tliet kumpaniji li ngħataw deċiżjonijiet tat-taxxa identifikati fid-Deċiżjoni għall-Estensjoni tal-Proċedimenti – International Power Ltd; rappreżentant ta' kumpanija potenzjali fiż-żmien tat-talba għal deċiżjoni; u Hastings Insurance Group Ltd. Il-kummenti tagħhom jistgħu jinġabru fil-qosor kif ġej:

(72)

Il-Kummissjoni għaddiet il-kummenti li rċeviet mingħand il-partijiet interessati dwar l-eżenzjoni tal-imgħax passiv u tal-introjtu mir-royalties lir-Renju Unit fis-16 ta' April 2014. Ir-rispons tar-Renju Unit għal dawk il-kummenti jista' jinġabar fil-qosor kif ġej:

(73)

Il-Kummissjoni bagħtet il-kummenti magħmula minn partijiet interessati dwar il-prattika tad-deċiżjonijiet tat-taxxa kif stabbilit fid-Deċiżjoni għall-Estensjoni tal-Proċedimenti lir-Renju Unit fis-7 ta' Diċembru 2016. Ir-rispons tar-Renju Unit għal dawk il-kummenti jista' jinġabar kif ġej:

(74)

Fl-Ewwel Deċiżjoni tal-Ftuħ, il-Kummissjoni kkonkludiet fuq bażi preliminari li l-eżenzjoni mit-taxxa għall-imgħax passiv (self bejn il-kumpaniji) u l-introjtu mir-royalties ikkostitwiet għajnuna mill-Istat u esprimiet id-dubji tagħha dwar il-kompatibbiltà tagħha mas-suq intern.

(75)

Mill-1 ta' Lulju 2013, l-introjtu mill-imgħax passiv kien taxxabbli (safejn l-imgħax riċevut jew riċevibbli minn kull kumpanija sors jeċċedi GBP 100 000 fis-sena). Sa mill-1 ta' Jannar 2014, l-imgħax mir-royalties (riċevut jew riċevibbli minn kumpanija rreġistrata f'Ġibiltà) kien suġġett għat-taxxa.

(76)

L-iskop ta' din id-Deċiżjoni (skont it-Taqsima 7) huwa limitat għall-valutazzjoni tal-introjtu mill-imgħax passiv u mir-royalties riċevut jew riċevibbli bejn id-dħul fis-seħħ tal-ATI tal-2010 (l-1 ta' Jannar 2011) u t-30 ta' Ġunju 2013 (fir-rigward ta' imgħax) jew il-31 ta' Diċembru 2013 (fir-rigward tar-royalties) (25).

(77)

Il-klassifikazzjoni ta' miżura nazzjonali bħala għajnuna mill-Istat, fis-sens tal-Artikolu 107(1) tat-Trattat, tirrikjedi li jkunu ssodisfati l-kundizzjonijiet li ġejjin. L-ewwel nett irid ikun hemm intervent mill-Istat jew permezz ta' riżorsi tal-Istat. It-tieni nett, dan l-intervent irid ikun jista' jaffettwa l-kummerċ bejn l-Istati Membri. It-tielet, irid jagħti vantaġġ selettiv lir-riċevitur. Ir-raba', irid ifixkel jew jhedded li jfixkel il-kompetizzjoni (26).

(78)

Sabiex tikkostitwixxi għajnuna mill-Istat, miżura trid tkun imputabbli lil Stat Membru u ffinanzjata permezz tar-riżorsi tal-Istat.

(79)

Minħabba li l-eżenzjoni tirriżulta minn Att tal-Parlament ta' Ġibiltà, hija tista' titqies bħala imputabbli lil Ġibiltà,

(80)

Fir-rigward tal-finanzjament tal-miżura permezz tar-riżorsi tal-Istat, il-Qorti tal-Ġustizzja sostniet b'mod konsistenti li miżura li biha l-awtoritajiet pubbliċi jagħtu lil ċerti impriżi eżenzjoni mit-taxxa li, għalkemm ma tinvolvix trasferiment pożittiv ta' riżorsi tal-Istat, tpoġġi lill-persuni li tapplika għalihom f'sitwazzjoni finanzjarja aktar favorevoli minn kontribwenti oħrajn, tikkostitwixxi għajnuna mill-Istat (27). Il-miżura tat-taxxa inkwistjoni tirriżulta f'li Ġibiltà tirrinunzja għal dħul mit-taxxa li kieku kienet tkun intitolata li tiġbor mingħand kumpaniji residenti f'Ġibiltà li jirċievu imgħax passiv jew introjtu mir-royalties. Billi tirrinunzja għal dak id-dħul, din il-miżura tat-taxxa tagħti lok għal telf ta' riżorsi tal-Istat fit-tifsira tal-Artikolu 107(1) tat-Trattat (28).

(81)

Skont il-ġurisprudenza tal-Qrati tal-Unjoni, il-kunċett ta' għajnuna ma jkoprix biss il-benefiċċji pożittivi, iżda wkoll miżuri li, f'forom varji, jimmitigaw it-tariffi li normalment ikunu inklużi fil-baġit ta' intrapriża (29). Vantaġġ jista' jingħata permezz ta' tipi differenti ta' tnaqqis fil-piż tat-taxxa ta' kumpanija u, b'mod partikolari, permezz ta' tnaqqis fir-rata tat-taxxa applikabbli, fil-bażi taxxabbli jew fl-ammont ta' taxxa dovuta (30). Miżura li tinvolvi tnaqqis ta' taxxa jew imposta twassal għal vantaġġ għaliex tqiegħed lill-impriżi li tapplika għalihom f'pożizzjoni finanzjarja iktar favorevoli minn kontribwenti oħrajn u tirriżulta f'telf ta' introjtu għall-Istat (31).

(82)

F'dan il-każ, il-miżura tikkontradixxi l-prinċipju ġenerali li t-taxxa fuq l-introjtu korporattiv tinġabar mill-persuni kollha taxxabbli li jirċievu introjtu derivat minn Ġibiltà jew li jseħħ fiha. Skont dak il-prinċipju, introjtu mill-imgħax passiv u mir-royalties normalment jaqa' fil-kamp ta' applikazzjoni tat-taxxa, suġġett għall-applikazzjoni tal-prinċipju tat-territorjalità. Fir-rigward tar-royalties, wieħed irid jinnota li l-prinċipju tat-territorjalità jqis li imgħax mir-royalties riċevut minn kumpanija f'Ġibiltà jseħħ f'Ġibiltà u huwa derivat minnha. Fir-rigward tal-introjtu minn imgħax passiv, l-applikabilità tat-taxxa għal dan l-introjtu skont is-sistema territorjali tiddependi fuq l-appikazzjoni tar-regola tas-“situs tas-self”, li hija bbażata fuq erba' kriterji kumulattivi (32) li jiffokaw fuq is-sors tal-introjtu. Għaldaqstant, f'numru ta' każijiet, introjtu minn imgħax passiv minn sors barrani jista', anke fin-nuqqas tal-eżenzjoni mit-taxxa kkontestata, ma jkunx suġġett għat-taxxa fuq l-introjtu f'Ġibiltà minħabba s-sistema territorjali. Madankollu, il-ħelsien mit-taxxa skont il-prinċipju tat-territorjalità mhuwiex awtomatiku u jeħtieġ li jitqiesu kriterji oħra minbarra s-sors tal-imgħax (pereżempju l-post tas-sigurtà tad-dejn) biex jiġi determinat jekk l-imgħax ikunx seħħ f'Ġibiltà jew ikunx derivat minnha skont ir-regola tas-“situs tas-self”,

(83)

B'riżultat ta' dan, l-eżenzjoni tintroduċi mitigazzjoni ta' tariffa li kumpaniji li jibbenefikaw mill-eżenzjoni kieku jkollhom iħallsu. Dan iwassal għal vantaġġ minħabba li l-kumpaniji jiġu meħlusa minn spejjeż intrinsiċi għall-attivitajiet ekonomiċi tagħhom u għalhekk jitpoġġew f'pożizzjoni finanzjarja aktar favorevoli minn kontribwenti oħra (li jirċievu introjtu attiv).

(84)

Sabiex titqies bħala għajnuna mill-Istat fit-tifsira tal-Artikolu 107(1) tat-Trattat, il-miżura trid tinstab bħala selettiva fis-sens li tkun tiffavorixxi ċerti impriżi jew il-produzzjoni ta' ċerti oġġetti.

(85)

Bħala rimarka preliminari, fir-rigward tal-kummenti magħmula minn Spanja dwar selettività reġjonali, wieħed irid josserva li, fl-Ewwel Deċiżjoni tal-Ftuħ, il-Kummissjoni ma esprimietx dubji rigward is-selettività reġjonali u qieset li l-qafas ta' referenza għall-valutazzjoni tal-eżenzjoni kien marbut esklussivament mat-territorju ġeografiku ta' Ġibiltà (33). Il-Kummissjoni ssostni l-fehma tagħha li l-eżenzjoni fuq l-imgħax passiv u l-introjtu mir-royalties ma tinvolvix selettività reġjonali. B'mod partikolari, it-tliet kriterji kumulattivi għall-awtonomija (awtonomija istituzzjonali, proċedurali u finanzjarja), kif imfassla mill-Qorti tal-Ġustizzja f'Azores (34) u f'Union General de Trabajadores de la Rioja (35), huma ssodisfati. Għaldaqstant, l-awtoritajiet ta' Ġibiltà huma meqjusa awtonomi biżżejjed mill-gvern ċentrali tar-Renju Unit u l-qafas ta' referenza għaldaqstant jikkorrispondi għal-limiti ġeografiċi tat-territorju ta' Ġibiltà (36).

(86)

Sabiex tiġi stabbilita selettività materjali, hija l-ġurisprudenza stabbilita li, bħala l-ewwel pass, tiġi identifikata l-iskema ta' taxxa komuni jew normali applikabbli fil-ġuriżdizzjoni tat-taxxa rilevanti (“is-sistema ta' referenza”). It-tieni nett, irid ikun determinat jekk miżura partikolari tagħmilx differenza bejn operaturi ekonomiċi li, fid-dawl tal-objettivi intrinsiċi għas-sistema, huma f'sitwazzjoni fattwali u legali komparabbli. Jekk tagħmel dan, il-miżura titqies li tkun selettiva prima facie (37). Wara jrid ikun stabbilit, fit-tielet pass tat-test, jekk din is-selettività prima facie hix ġustifikata min-natura jew l-iskema ġenerali tas-sistema (ta' referenza) (38). Jekk miżura selettiva prima facie hija ġġustifikata bin-natura jew l-iskema ġenerali tas-sistema, din ma titqiesx bħala selettiva u għalhekk mhijiex fil-kamp ta' applikazzjoni tal-Artikolu 107(1) tat-Trattat.

(87)

F'dan il-kuntest, huwa importanti wkoll li wieħed jinnota li sabiex miżura tat-taxxa tikkwalifika bħala selettiva, is-sistema tat-taxxa ma għandhiex għalfejn tkun imfassla b'tali mod li kumpaniji li jibbenefikaw minn vantaġġ selettiv ikunu, b'mod ġenerali, suġġetti għall-istess piż ta' taxxa bħal kumpaniji oħra, imma jibbenefikaw minn regoli ta' deroga, sabiex il-vantaġġ selettiv ikun id-differenza bejn il-piż normali tat-taxxa u dak li jkollhom iħallsu dawn il-kumpaniji (39).

(88)

Fil-fatt, tali fehma ta' selettività tfisser li hija biss sistema tat-taxxa mfassla skont ċerta teknika regolatorja li tista' tikkwalifika bħala selettiva, u li regoli tat-taxxa nazzjonali li kienu mfassla b'mod differenti jevitaw il-kontroll tal-għajnuna mill-Istat, anke jekk dawn jipproduċu l-istess effetti fil-liġi jew fil-fatt. Dan imur kontra l-ġurisprudenza stabbilita, li tistabbilixxi li, meta ssir valutazzjoni ta' selettività, l-Artikolu 107(1) tat-Trattat ma jiddistingwix bejn miżuri b'referenza għall-kawżi jew għall-għanijiet tagħhom, imma minflok jiddefinihom f'relazzjoni mal-effetti tagħhom, u għalhekk b'mod indipendenti mit-tekniki użati (40).

(89)

Is-sistema ta' referenza tikkostitwixxi l-parametru ta' riferiment li bih tiġi vvalutata s-selettività ta' miżura. Din hija komposta minn sett ta' regoli konsistenti li ġeneralment japplikaw abbażi ta' kriterji oġġettivi għall-impriżi kollha li huma fil-kamp ta' applikazzjoni tagħha kif definit mill-objettiv tagħha. Tipikament, dawn ir-regoli ma jiddefinixxux biss il-kamp ta' applikazzjoni tas-sistema, iżda anke l-kundizzjonijiet skont liema tiġi tapplika s-sistema, id-drittijiet u l-obbligi tal-impriżi suġġetti għaliha u t-teknikalitajiet tal-funzjonament tas-sistema (41). Fil-każ tat-taxxi, is-sistema ta' referenza hija bbażata fuq elementi bħall-bażi tat-taxxa, il-persuni taxxabbli, l-avveniment taxxabbli u r-rati tat-taxxa (42).

(90)

F'dan il-każ, is-sistema ta' referenza hija l-ATI tal-2010. It-titlu t-twil ta' dak l-Att jiddiskrivih bħala “Att li Jimponi Taxxa fuq l-Introjtu u li Jirregola l-Ġbir tagħha” (43). Fir-rigward tal-bażi taxxabbli għall-kumpaniji, it-Taqsima 16 tal-ATI tal-2010 tistipula li “ħlief f'każ li jkun stipulat b'mod ieħor aktar 'il quddiem, il-profitti jew qligħ valutabbli ta' kumpaniji għandhom ikunu l-ammont sħiħ tal-profitti jew qligħ tal-kumpanija għal kwalunkwe perjodu kontabilistiku ta' dak il-perjodu”. Bħala riżultat, suġġett għal kwalunkwe aġġustament 'il fuq jew 'l isfel kif stabbilit fl-ATI tal-2010, il-profitti kontabilistiċi jridu jikkostitwixxu l-bażi tal-valutazzjoni għall-kalkolu tat-taxxa fuq l-introjtu korporattiv f'Ġibiltà.

(91)

Min-naħa l-oħra, kif evidenzjaw l-awtoritajiet tar-Renju Unit (44), huwa fil-loġika inerenti tas-sistema territorjali tat-taxxa f'Ġibiltà li l-introjtu kollu, kemm jekk attiv kif ukoll jekk passiv, b'sors barra minn Ġibiltà huwa barra mill-kamp ta' applikazzjoni tat-taxxa ta' Ġibiltà u jibqa' suġġett għat-taxxa fil-ġuriżdizzjoni fejn l-introjtu jkun seħħ jew minn fejn ikun derivat.

(92)

Id-definizzjoni tas-sistema tat-taxxa fuq l-introjtu korporattiv ġenerali ta' Ġibiltà bħala “qafas ta' referenza” hija konsistenti mal-ġurisprudenza tal-Qorti, li sostniet b'mod konsistenti li, fil-każ ta' miżuri li jikkonċernaw id-determinazzjoni ta' obbligazjoni ta' taxxa fuq introjtu korporattiv, is-sistema ta' referenza li trid titqies hija s-sistema tat-taxxa fuq l-introjtu tal-Istat Membru inkwistjoni li tapplika għall-intrapriżi inġenerali, u mhux id-dispożizzjonijiet speċifiċi ta' dik is-sistema applikabbli biss għal ċerti kontribwenti jew ċerti tranżazzjonijiet. Pereżempju, f'World Duty Free, kawża li tikkonċerna r-regoli li jirregolaw l-investimenti f'ishma, il-Qorti sostniet il-pożizzjoni tal-Kummissjoni li s-sistema ta' referenza kienet is-sistema tat-taxxa fuq l-introjtu korporattiv Spanjola, u mhux ir-regoli speċifiċi li jirregolaw it-trattament tat-taxxa ta' dawk l-investimenti (45).

(93)

Filwaqt li l-objettiv tal-ATI tal-2010 huwa li jinġabar dħul minn kontribwenti taxxabbli f'Ġibiltà (jiġifieri kontribwenti li jirċievu introjtu derivat minn Ġibiltà jew li seħħ fiha) (46), l-Iskeda 1 ta' dak l-Att ma inkludietx ċerti kategoriji ta' introjtu fil-kategoriji ta' introjtu taxxabbli f'Ġibiltà (47). Għaldaqstant, l-eżenzjoni tal-imgħax passiv u tal-introjtu fuq royalties ma rriżultatx minn deroga formali mis-sistema tat-taxxa, imma pjuttost min-nuqqas ta' inklużjoni ta' dan l-introjtu fil-kategoriji ta' introjtu li huma fil-kamp ta' applikazzjoni tas-sistema tat-taxxa ta' Ġibiltà (eżenzjoni impliċita).

(94)

Skont is-sistema territorjali tat-taxxa ġeneralment applikabbli f'Ġibiltà (48), introjtu biss li kien derivat minn Ġibiltà jew li jseħħ fiha huwa suġġett għal taxxa fuq l-introjtu korporattiv. L-ATI tal-2010, madankollu, mad-dħul fis-seħħ tiegħu stipula eżenzjoni awtomatika mit-taxxa fuq l-introjtu korporattiv għall-imgħax passiv minn self u l-introjtu mir-royalties, mingħajr konsiderazzjoni għall-elementi li ġeneralment huma rilevanti għad-determinazzjoni tal-kamp ta' applikazzjoni territorjali tat-taxxa f'Ġibiltà, skont il-prinċipju tat-territorjalità. F'dan ir-rigward, huwa partikolarment rilevanti li wieħed jinnota li, fin-nuqqas tal-eżenzjoni għall-introjtu mir-royalties, is-sistema territorjali tat-taxxa tqis l-introjtu mir-royalties riċevut minn kumpanija f'Ġibiltà bħala wieħed li dejjem iseħħ f'Ġibiltà u jkun derivat minnha (49). Rigward imgħax passiv, valutazzjoni każ b'każ tal-prinċipju tat-territorjalità tkun meħtieġa sabiex jiġi determinat il-post tal-attivitajiet li jwasslu għall-introjtu, u għalhekk l-eżistenza jew le ta' introjtu taxxabbli.

(95)

Fl-Ewwel Deċiżjoni tal-Ftuħ, il-Kummissjoni sabet li l-eżenzjoni mit-taxxa fuq l-introjtu korporattiv għall-imgħax passiv u l-introjtu mir-royalties, meta tagħmel differenza bejn kumpaniji f'sitwazzjoni legali u fattwali komparabbli, jenħtieġ li titqies bħala selettiva prima facie fid-dawl tal-objettiv tal-ATI tal-2010, li hu li jintaxxa introjtu li jseħħ f'Ġibiltà jew li huwa derivat minnha.

(96)

Il-Kummissjoni kompliet tinnota fl-Ewwel Deċiżjoni tal-Ftuħ li l-eżenzjoni kienet tidher li tiffavorixxi b'mod sinifikanti lil grupp ta' 529 kumpanija li rċevew imgħax passiv jew introjtu mir-royalties, b'mod partikolari imgħax minn kumpaniji oħra tal-istess grupp jew introjtu mir-royalties. Il-Kummissjoni nnutat ukoll li l-akbar parti tal-imgħax minn self riċevut minn kumpaniji f'Ġibiltà rriżultat minn self bejn il-kumpaniji mogħti lil entitajiet ta' gruppi barranin (50).

(97)

F'każ bħal dan fejn il-miżura ma tirriżultax minn deroga formali mis-sistema tat-taxxa, il-Kummissjoni hija tal-opinjoni li, fil-valutazzjoni tas-selettività, huwa partikolarment rilevanti li jitqiesu l-effetti tal-miżura sabiex ikun valutat jekk il-miżura tiffavorixxix b'mod sinifikanti grupp partikolari ta' intrapriżi.

(98)

Fir-rigward tar-royalties, l-analiżi tal-Kummissjoni tal-effetti tal-miżura (51) turi li din ibbenefikat biss 10 kumpaniji (minn 8 003 kumpanija attiva li joperaw f'Ġibiltà), kollha parti minn gruppi multinazzjonali. Barra minn dan, jidher li mill-anqas tmienja minnhom jappartjenu għal intrapriżi multinazzjonali kbar li joperaw madwar id-dinja. Min-naħa l-oħra, l-ebda kumpanija indipendenti ma rċeviet introjtu mir-royalties f'Ġibiltà.

(99)

Rigward l-imgħax, l-informazzjoni pprovduta mill-awtoritajiet tar-Renju Unit turi li, mill-ammont totali tal-introjtu mill-imgħax fuq self bejn il-kumpaniji riċevut mill-kumpaniji f'Ġibiltà (GBP 1 400 miljun), 99,8 % ġejjin minn self mogħti lil (gruppi ta') kumpaniji barranin. Min-naħa l-oħra, żewġ kumpaniji biss ta' Ġibiltà, li jammontaw għal mhux aktar minn GBP 3 256 834 b'kollox (GBP 222 169 f'termini ta' taxxa mitlufa) (li jikkorrispondu għal 0,2 % tal-ammont totali ta' self bejn il-kumpaniji), ibbenefikaw minn imgħax minn sorsi domestiċi.

(100)

Dawn iċ-ċifri juru li l-miżura kienet tiffavorixxi b'mod sinifikanti lil kumpaniji li jappartjenu għal gruppi multinazzjonali fdati b'ċerti funzjonijiet (l-għoti ta' self fi ħdan grupp u/jew id-dritt li jintużaw drittijiet ta' proprjetà intellettwali (IP)). B'mod partikolari, il-miżura bbenefikat lil (i) għadd żgħir ta' kumpaniji multinazzjonali, li bosta minnhom huma parti minn gruppi multinazzjonali kbar li joperaw madwar id-dinja (li jirċievu introjtu mir-royalties) u (ii) kumpaniji li huma parti minn gruppi multinazzjonali u li jipprovdu self lil kumpaniji barranin li huma parti mill-grupp tagħhom. Fid-dawl tal-objettiv tal-ATI tal-2010 (jiġifieri l-intaxxar ta' introjtu li jseħħ f'Ġibiltà jew huwa derivat minnha), dawn il-kumpaniji huma f'sitwazzjoni legali u fattwali simili bħall-kumpaniji l-oħra kollha f'Ġibiltà li jiġġeneraw introjtu li jseħħ f'Ġibiltà jew huwa derivat minnha (jew li jwettqu attivitajiet li jirrikjedu liċenzja skont il-liġi ta' Ġibiltà, bħas-settur bankarju, l-assigurazzjoni jew il-logħob tal-azzard).

(101)

L-awtoritajiet tar-Renju Unit u Ġibiltà jqisu li l-eżenzjoni tikkostitwixxi miżura ġenerali applikata għall-kumpaniji kollha f'sitwazzjoni simili, irrispettivament mis-settur. Huma jkomplu jsostnu li l-fatt li huwa possibbli li wieħed jidentifika ċerti kumpaniji li jibbenefikaw minn regola tat-taxxa aktar minn oħrajn ma jagħmilx ir-regola selettiva fiha nnifisha. Ir-regola tkun selettiva biss jekk b'mod inerenti setgħet tibbenefika lil kategorija identifikabbli ta' kumpaniji. Fl-opinjoni tal-awtoritajiet tar-Renju Unit u ta' Ġibiltà, dan mhux il-każ bil-miżura inkwistjoni għax ma hemm l-ebda kumpanija oħra f'sitwazzjoni fattwali u legali simili f'Ġibiltà li għaliha ma tapplikax din l-eżenzjoni.

(102)

Il-Kummissjoni tqis li d-dikjarazzjoni tar-Renju Unit li l-miżura prima facie tapplika għall-kumpaniji kollha, irrispettivamnt mis-settur jew l-attività tagħhom, hija irrilevanti għall-iskopijiet ta' valutazzjoni tas-selettività. Hija ġurisprudenza deċiża li l-fatt li l-għadd ta' intrapriżi li jistgħu jiddikjaraw intitolament skont miżura nazzjonali huwa kbir, jew li dawk l-intrapriżi jappartjenu għal diversi setturi ekonomiċi, mhuwiex biżżejjed biex jitfa' dubju fuq in-natura selettiva tal-miżura (52).

(103)

Miżura li tagħmel differenza bejn intrapriżi li, fid-dawl tal-objettiv tas-sistema legali kkonċernata, jinsabu f'sitwazzjoni fattwali u legali komparabbli hija selettiva a priori. F'dan il-każ, ġie stabbilit li l-eżenzjoni mit-taxxa fuq l-introjtu korporattiv għall-imgħax passiv u l-introjtu mir-royalties primarjament tibbenefika lil gruppi multinazzjonali. Kif innutat fil-premessa 100, fid-dawl tal-objettiv tas-sistema tat-taxxa ta' referenza (l-ATI tal-2010), jiġifieri taxxa fuq l-introjtu li jseħħ f'Ġibiltà jew li huwa derivat minnha, gruppi multinazzjonali huma f'sitwazzjoni legali u fattwali simili għall-kumpaniji l-oħra kollha f'Ġibiltà li jiġġeneraw introjtu li jseħħ f'Ġibiltà jew li huwa derivat minnha. Għalhekk, l-eżenzjoni mit-taxxa fuq l-introjtu korporattiv għall-imgħax passiv u l-introjtu mir-royalties hija selettiva prima facie.

(104)

Barra minn dan, wieħed irid jinnota li l-fatt li l-eżenzjoni tibbenefika l-aktar lil gruppi multinazzjonali mhuwiex konsegwenza każwali tal-iskema (53). L-eżenzjoni, f'ġuriżdizzjoni tat-taxxa żgħira bħal Ġibiltà, fejn ma tingħata l-ebda konsiderazzjoni għall-post fejn ikunu twettqu l-attivitajiet ta' R&Ż, min-natura stess tagħha offriet aktar opportunitajiet għal gruppi internazzjonali li, minħabba l-istruttura u d-daqs internazzjonali taħghom, faċilment jistgħu jċaqilqu assi intanġibbli u kapital (u mbagħad jagħtu self u/jew id-dritt tal-użu ta' drittijiet ta' proprjetà intellettwali) fil-grupp. Dawn is-sejbiet juru b'mod suffiċjenti li l-miżura kienet imfassla biex tattira jew tiffavorixxi gruppi ta' kumpaniji u b'mod partikolari gruppi multinazzjonali fdati b'ċerti attivitajiet (l-għoti ta' self fi ħdan grupp u/jew id-dritt li jintużaw drittijiet IP). Fuq dik il-bażi, il-Kummissjoni tikkonkludi li l-miżura hija prima facie selettiva minħabba li l-effetti tagħha, li ffavorixxew b'mod sinifikanti kategorija partikolari ta' kumpaniji, huma l-konsegwenza inevitabbli tat-tfassil tal-miżura.

(105)

Miżura li prima facie hija selettiva tista' tkun ġustifikata min-natura jew l-iskema ġenerali tas-sistema tat-taxxa, jekk din tkun ġejja direttament mill-prinċipji intrinsiċi bażiċi jew ta' gwida jew jekk tkun ir-riżultat ta' mekkaniżmi inerenti meħtieġa għall-funzjonament u l-effettività tagħha. Dan jista' jkun il-każ għall-prinċipju tan-newtralità, l-objettiv tal-ottimizzazzjoni tal-irkupru tad-dejn fiskali jew il-maniġibbiltà amministrattiva.

(106)

L-awtoritajiet tar-Renju Unit argumentaw li l-eżenzjoni hija l-konsegwenza loġika tal-prinċipju tat-territorjalità, li huwa bbażat fuq l-iskop li tiġi evitata t-taxxa doppja. F'dan ir-rigward, il-Kummissjoni tinnota li l-eżenzjoni għall-imgħax passiv u l-introjtu mir-royalties introdotta fl-ATI tal-2010 ma tistax titqies bħala applikazzjoni sempliċi tal-prinċipju tat-territorjalità. B'mod partikolari, kif diġà spjegat fit-Taqsima 7.1.3.2., wieħed irid jinnota li s-sistema territorjali tat-taxxa tqis li introjtu mir-royalties riċevut minn kumpanija f'Ġibiltà jseħħ f'Ġibiltà u jkun derivat minnha. Rigward l-imgħax, valutazzjoni każ b'każ tal-prinċipju tat-territorjalità hija meħtieġa sabiex jiġi determinat il-post tal-attivitajiet li jwasslu għall-introjtu, u għalhekk l-eżistenza jew le ta' introjtu taxxabbli. Għalhekk, l-eżenzjoni għall-imgħax passiv u l-introjtu mir-royalties, kif introdott fl-ATI tal-2010, ma tistax titqies li tirrifletti biss l-applikazzjoni tal-prinċipju tat-territorjalità.

(107)

Barra minn dan, l-argument li l-applikazzjoni tal-prinċipju tat-territorjalità jistrieħ fuq il-ħtieġa ta' prevenzjoni ta' taxxa doppja ma jistax ikun sostnut minħabba li l-entità li tħallas (barranija) ġeneralment hija permessa li tnaqqas l-imgħax jew ir-royalties għal skopijiet ta' taxxa (54). Minbarra dan, fil-qafas tad-Direttiva tal-Kunsill 2003/49/KE (55) (id-Direttiva dwar l-Imgħax u r-Royalties), ċertu imgħax u pagamenti tar-royalties fi ħdan grupp huma eżentati minn taxxi f'ras il-għajn (fil-livell tal-entità barranija li tħallas) fuq il-bażi ta' regoli nazzjonali li jittrasponu d-Direttiva 2003/49/KE msemmija qabel fil-liġi domestika. Għaldaqstant, minħabba r-riskju limitat ta' taxxa doppja, miżura ta' eżenzjoni sħiħa u awtomatika hija sproporzjonata u l-prevenzjoni ta' taxxa doppja ma tistax tidher bħala ġustifikazzjoni aċċettabbli.

(108)

Barra minn hekk, fil-kuntest tal-investigazzjoni formali, l-awtoritajiet tar-Renju Unit argumentaw ukoll li l-eżenzjoni tal-imgħax passiv u l-introjtu mir-royalties hija ġustifikata minn raġunijiet ta' maniġibbiltà amministrattiva, minħabba li d-dħul mit-taxxa ma jkunx biżżejjed biex jiġġustifika l-piż amministrattiv tal-infurzar tal-intaxxar tal-imgħax passiv u l-introjtu mir-royalties. Huma nnutaw f'dan ir-rigward li imgħax minn sorsi barranin ikun eżentat fi kwalunkwe każ skont il-prinċipju tat-territorjalità normali ta' Ġibiltà. Fir-rigward ta' imgħax u royalties minn sorsi f'Ġibiltà, huma jqisu li l-eżenzjoni mit-taxxa hija ġġustifikata mill-fatt li l-ispiża tal-ġbir teċċedi d-dħul mistenni.

(109)

Il-Kummissjoni stiednet lill-awtoritajiet tar-Renju Unit biex isostnu, b'elementi konkreti, id-dikjarazzjoni li l-ispiża amministrattiva tal-infurzar tat-taxxa fuq l-introjtu korporattiv fuq l-imgħax passiv u l-introjtu mir-royalties fil-fatt hija akbar minn kull dħul li jirriżulta. Madankollu, l-awtoritajiet tar-Renju Unit ma ressqu l-ebda element konkret biex jissostanzjaw id-dikjarazzjoni tagħhom. Fin-nuqqas ta' evidenza, il-Kummissjoni ma tistax taċċetta d-dikjarazzjoni li l-eżenzjoni tal-imgħax passiv u tal-introjtu mir-royalties hija ġustifikata minn raġunijiet ta' maniġabbiltà ammnistrattiva.

(110)

Fid-dawl tal-kunsiderazzjonijiet stabbiliti f'din it-taqsima, il-Kummissjoni tqis li l-miżura hija selettiva minħabba li tiffavorixxi b'mod sinifikanti sett partikolari ta' kumpaniji li jappartjenu għal gruppi multinazzjonali fdati b'ċerti funzjonijiet (l-għoti ta' self fi ħdan grupp jew id-dritt li jintużaw drittijiet tal-proprjetà intellettwali), meta mqabbla ma' kumpaniji oħra li huma f'sitwazzjoni fattwali u legali simili skont l-objettiv intrinsiku tal-ATI tal-2010.

(111)

Skont l-Artikolu 107(1) tat-Trattat, sabiex tikkostitwixxi għajnuna mill-Istat, miżura trid tfixkel jew thedded li tfixkel il-kompetizzjoni, u jrid ikollha effett fuq il-kummerċ fl-Unjoni.

(112)

Matul l-investigazzjoni, kien stabbilit li bosta mill-kumpaniji li bbenefikaw mill-eżenzjoni fuq l-imgħax passiv u l-introjtu mir-royalties jiffurmaw parti minn gruppi internazzjonali ta' kumpaniji attivi f'setturi fejn iseħħ il-kummerċ intra-Unjoni (56).

(113)

Anke jekk il-kumpaniji f'Ġibiltà suġġetti għall-eżenzjoni ma kinux involuti fil-kummerċ direttament, il-Qorti tal-Ġustizzja sostniet li meta l-għajnuna tingħata lil intrapriża, u b'hekk issaħħaħ il-pożizzjoni tagħha meta mqabbla ma' kumpaniji oħra involuti f'kummerċ fl-Unjoni, il-miżura jenħtieġ li titqies bħala waħda li taffettwa l-kummerċ u li tfixkel il-kompetizzjoni (57).

(114)

Barra minn dan, wieħed irid jinnota li l-eżenzjoni mit-taxxa fuq l-introjtu korporattiv għall-imgħax passiv u l-introjtu mir-royalties mhix relatata ma' xi investiment speċifiku u sempliċiment teħles lill-benefiċjarji minn spejjeż li normalment kien ikollhom iħallsu fin-negozju tagħhom ta' kuljum. Għalhekk, jekk jinsab li l-eżenzjoni tinvolvi għajnuna mill-Istat, hija tkun tinvolvi għajnuna għall-operat. Huwa aktar probabbli li għajnuna għall-operat tfixkel jew thedded li tfixkel il-kompetizzjoni minħabba li din ma tindirizzax nuqqas partikolari tas-suq, u mhijiex limitata fiż-żmien.

(115)

L-awtoritajiet tar-Renju Unit u dawk ta' Ġibiltà argumentaw ukoll li kull għajnuna li tirriżulta mill-eżenzjoni għal royalties tkun de minimis u ma tkunx fil-kamp ta' applikazzjoni tar-regoli dwar l-għajnuna mill-Istat skont ir-Regolament (UE) Nru 1407/2013. Fil-kuntest tal-investigazzjoni formali, l-awtoritajiet tar-Renju Unit ġew mistiedna juru li ġew issodisfati l-kundizzjonijiet sabiex il-miżura titqies bħala de minimis u għalhekk bħala li mhijiex fil-kamp ta' applikazzjoni tar-regoli tal-għajnuna mill-Istat għall-kumpaniji kollha kkonċernati. Madankollu, l-informazzjoni pprovduta kienet tikkonċerna biss lil numru żgħir ta' kumpaniji u l-awtoritajiet tar-Renju Unit ma ssostanzjawx id-dikjarazzjoni tagħhom li l-kundizzjonijiet de minimis kienu se jkunu ssodisfati għall-benefiċjarji kollha tal-għajnuna. Għalhekk, il-Kummissjoni ma tistax taċċetta l-argument li l-eżenzjoni ma kienet se tinvolvi l-ebda għajnuna fuq il-bażi li l-vantaġġ miksub dejjem kien se jkun de minimis.

(116)

Għaldaqstant, il-Kummissjoni tikkunsidra li l-miżura tfixkel jew thedded li tfixkel il-kompetizzjoni u li għandha effett fuq il-kummerċ fl-Unjoni.

(117)

Minħabba li l-kundizzjonijiet kollha stabbiliti fl-Artikolu 107(1) tat-Trattat huma ssodisfati, il-Kummissjoni għalhekk tikkonkludi li l-iskema ta' eżenzjoni tal-imgħax passiv u tal-introjtu mir-royalties, kif kienet teżisti qabel id-dħul fis-seħħ tal-emenda rilevanti magħmula fl-2013, tikkostitwixxi għajnuna mill-Istat fis-sens ta' dak l-Artikolu.

(118)

Skont l-Artikolu 1(c) tar-Regolament Proċedurali, “għajnuna ġdida” tfisser kull għajnuna, jiġifieri, skemi ta' għajnuna u għajnuna individwali, li mhix għajnuna eżistenti, inkluż tibdiliet għal għajnuna eżistenti. “Għajnuna eżistenti” tirreferi għal għajnuna awtorizzata jew għajnuna li hija meqjusa bħala awtorizzata kif stabbilit fl-Artikolu 1(d) tar-Regolament Proċedurali.

(119)

L-awtoritajiet tar-Renju Unit u ta' Ġibiltà jsostnu li jekk l-eżenzjoni għall-imgħax minn sorsi barranin tikkostitwixxi għajnuna mill-Istat, din tkun għajnuna eżistenti minħabba li l-istatus ta' dan l-imgħax taħt l-eżenzjoni jkun baqa' de facto l-istess bħal dak taħt il-leġiżlazzjoni preċedenti tal-1952 (bħala riżultat tal-prinċipju tat-territorjalità).

(120)

F'dan ir-rigward, il-Kummissjoni tinnota li, skont is-sistema territorjali tat-taxxa, tkun trid titwettaq valutazzjoni każ b'każ tal-introjtu mill-imgħax sabiex ikun determinat jekk kienx hemm xi introjtu taxxabbli. Dan ma jwassalx għal eżenzjoni awtomatika tal-introjtu rilevanti. Għalhekk, l-eżenzjoni għal introjtu minn imgħax passiv (qabel l-1 ta' Lulju 2013), kif introdotta fl-ATI tal-2010, hija sostanzjalment differenti mit-trattament tat-taxxa tal-introjtu minn imgħax passiv qabel l-ATI tal-2010 u ma tistax titqies li jkollha l-istess effett bħalma kellha l-applikazzjoni tal-prinċipju tat-territorjalità.

(121)

Barra minn dan, li kieku l-prinċipju tat-territorjalità jirriżulta effettivament fl-eżenzjoni ta' imgħax minn sors barrani, dan ma jkunx suffiċjenti biex wieħed jistabbilixxi n-natura ta' “għajnuna eżistenti” tal-miżura minħabba li l-eżenzjoni preċedenti ma kinitx limitata għal introjtu minn imgħax minn sorsi barranin (kienet tkopri imgħax minn sorsi barranin u domestiċi). Kull ġustifikazzjoni possibbli għall-eżenzjoni (u l-konformità tagħha mal-prinċipju tat-territorjalità) trid tkun ibbażata fuq raġunament li huwa applikabbli għall-introjtu mill-imgħax kollu, mhux fuq parti speċifika (imgħax minn sors barrani) minnu biss.

(122)

Għajnuna mill-Istat titqies kompatibbli mas-suq intern jekk tkun f'waħda mill-kategoriji elenkati fl-Artikolu 107(2) tat-Trattat (58) u tista' titqies kompatibbli mas-suq intern jekk tkun f'xi waħda mill-kategoriji elenkati fl-Artikolu 107(3) tat-Trattat (59). Madankollu, hu l-Istat Membru li jagħti l-għajnuna li jġorr l-oneru tal-provi li l-għajnuna mill-Istat mogħtija minnu hi kompatibbli mas-suq intern skont l-Artikoli 107(2) jew 107(3) tat-Trattat (60).

(123)

Il-Kummissjoni tinnota li l-awtoritajiet tar-Renju Unit ma pprovdew l-ebda argument dwar għalfejn l-eżenzjoni mit-taxxa fuq l-introjtu korporattiv għall-imgħax passiv u għall-introjtu mir-royalties jenħtieġ li titqies bħala kompatibbli mas-suq intern. B'mod partikolari, ir-Renju Unit ma kkummentax fuq id-dubji espressi fl-Ewwel Deċiżjoni tal-Ftuħ fir-rigward tal-kompatibbiltà tal-miżura.

(124)

Il-Kummissjoni stess ma identifikat l-ebda bażi possibbli għall-kompatibbiltà u tqis li l-ebda waħda mill-eċċezzjonijiet elenkati fl-Artikolu 107(2) jew (3) tat-Trattat ma tapplika, minħabba li l-miżura ma tidhirx li timmira li tikseb xi wieħed mill-objettivi elenkati f'dawk id-dispożizzjonijiet. Barra minn dan, minħabba li l-eżenzjoni mit-taxxa fuq l-introjtu korporattiv għall-imgħax passiv u l-introjtu mir-royalties mhix relatata ma' xi investiment speċifiku u sempliċiment tallevja lill-benefiċjarji minn spejjeż li normalment kien ikollhom iħallsu fin-negozju tagħhom ta' kuljum, din titqies li tinvolvi għajnuna għall-operat. Bħala regola ġenerali, għajnuna ta' dan it-tip normalment ma tistax titqies li tkun kompatibbli mas-suq intern skont l-Artikolu 107(3)(c) tat-Trattat minħabba li ma tiffaċilitax l-iżvilupp ta' ċerti attivitajiet jew ta' ċerti reġjuni ekonomiċi. Barra minn hekk, vantaġġi tat-taxxa f'dan il-każ mhumiex limitati fiż-żmien, fejn jonqsu jew huma proporzjonati għal dak li huwa meħtieġ sabiex ikun irmedjat nuqqas speċifiku tas-suq jew biex ikun issodisfat kwalunkwe objettiv ta' interess ġenerali fl-oqsma kkonċernati. Konsegwentement, il-miżura ma tistax titqies bħala kompatibbli mas-suq intern skont l-Artikolu 107(2) jew (3) tat-Trattat.

(125)

Bħala kwistjoni preliminari, wieħed irid jiftakar li “fin-nuqqas ta' regoli tal-UE li jiggvernaw il-kwistjoni, dan huwa fil-kompetenza tal-Istati Membri jew ta' entitajiet intra Statali li għandhom awtonomija fiskali biex jagħżlu l-bażijiet tal-valutazzjoni u li jxerrdu l-piż tat-taxxa fuq is-setturi varji tal-produzzjoni u s-setturi ekonomiċi” (61). Fl-istess ħin, skont ġurisprudenza stabbilita, “l-eżerċizzju ta' setgħat riservati ma jistax jippermetti l-adozzjoni unilaterali ta' miżuri pprojbiti mit-Trattat” (62).

(126)

B'mod partikolari, il-Kummissjoni ma titfax dubju dwar l-għoti ta' deċiżjonijiet tat-taxxa mill-amministrazzjonijiet tat-taxxa tal-Istati Membri. Hija tirrikonoxxi l-importanza ta' deċiżjonijiet bil-quddiem bħala għodda biex tingħata ċertezza legali lill-kontribwenti. Sakemm dawn ma jagħtux vantaġġ selettiv lil operaturi ekonomiċi speċifiċi, deċiżjonijiet tat-taxxa ma jqajmux kwistjonijiet skont il-liġi tal-Unjoni dwar l-għajnuna mill-Istat (63).

(127)

Madankollu, fejn deċiżjoni tat-taxxa tapprova riżultat li ma jkunx jirrifletti b'mod affidabbli dak li jirriżulta mill-applikazzjoni normali tas-sistema tat-taxxa ordinarja, dik is-sentenza tista' tagħti vantaġġ selettiv lid-destinatarju, sa fejn dan it-trattament selettiv jirriżulta fi tnaqqis tal-obbligazzjonijiet tat-taxxa tad-destinatarju fl-Istat Membru meta mqabbel ma' kumpaniji f'sitwazzjoni legali u fattwali simili (64).

(128)

Fid-Deċiżjoni għall-Estensjoni tal-Proċedimenti, fir-rigward tal-165 deċiżjoni tat-taxxa mogħtija mill-awtoritajiet tat-taxxa ta' Ġibiltà bejn Jannar 2011 u Awwissu 2013, il-Kummissjoni kkonkludiet fuq bażi preliminari li d-deċiżjonijiet tat-taxxa kienu materjalment selettivi minħabba li l-awtoritajiet tat-taxxa ta' Ġibiltà ġeneralment ma wettqux valutazzjoni tajba tal-obbligi tat-taxxa tal-kumpaniji, u eżerċitaw is-setgħat diskrezzjonarji tagħhom. Il-Kummissjoni adottat ukoll il-fehma preliminari li, f'ċerti każijiet, l-awtoritajiet tat-taxxa ta' Ġibiltà kienu joħorġu deċiżjonijiet tat-taxxa li ma kinux konsistenti mad-dispożizzjonijiet tat-taxxa applikabbli (65).

(129)

Bħala fehma preliminari, il-Kummissjoni qieset li, billi taw dawn id-deċiżjonijiet tat-taxxa biss lil ċerti kumpaniji multinazzjonali, għall-kuntrarju ta' kumpaniji oħra domestiċi li ma jitolbux deċiżjoni tat-taxxa, l-awtoritajiet tat-taxxa ttrattaw kumpaniji li kienu f'sitwazzjoni legali u fattwali simili b'mod differenti. Għaldaqstant, tqies li prima facie l-miżuri kienu selettivi. Barra minn dan, il-Kummissjoni ma identifikat l-ebda ġustifikazzjoni aċċettabbli li tirriżulta min-natura jew mill-iskema ġenerali tal-ATI tal-2010.

(130)

Bħala parti mill-investigazzjoni formali, il-Kummissjoni analizzat id-dokumentazzjoni rilevanti pprovduta mill-awtoritajiet tar-Renju Unit rigward il-165 deċiżjoni li huma fil-kamp ta' applikazzjoni tal-investigazzjoni, sabiex jiġu identifikati prattiki diskrezzjonarji possibbli, applikazzjoni ħażina tar-regoli jew nuqqas ta' kontrolli xierqa dwar fejn l-attivitajiet twettqu effettivament. Id-dokumentazzjoni vvalutata mill-Kummissjoni kienet tinkludi dan li ġej:

(131)

Analiżi ta' dik l-informazzjoni ppermettiet lill-Kummissjoni tivvaluta jekk kumpaniji rilevanti ġġenerawx introjtu taxxabbli f'Ġibiltà skont is-sistema territorjali tat-taxxa u/jew jekk kinitx ingħatat jew ġiet implimentata xi deċiżjoni tat-taxxa b'mod li kien inkonsistenti mad-dispożizzjonijiet tat-taxxa applikabbli.

(132)

Fil-parti l-kbira tal-każijiet (160 mill-165 deċiżjoni li qed jiġu investigati), dik l-analiżi ma wrietx li d-deċiżjonijiet kienu ngħataw b'mod li kien inkonsistenti mar-regoli tat-taxxa ġenerali applikabbli. F'bosta każijiet, l-introjtu ġġenerat mill-kumpaniji inkwistjoni ma kienx jissodisfa r-rekwiżiti territorjali biex ikun taxxabbli f'Ġibiltà. B'mod partikolari, ir-rapporti tal-awditjar u d-dokumenti l-oħra pprovduti mill-awtoritajiet tar-Renju Unit urew li l-attivitajiet f'Ġibiltà tal-kumpaniji kienu limitati u b'mod ġenerali ma setgħux iwasslu lill-awtoritajiet tat-taxxa biex jikkonkludu li l-attivitajiet li ġġeneraw l-introjtu fil-fatt kienu seħħew f'Ġibiltà. Fi kliem ieħor, kien hemm evidenza biżżejjed li l-attivitajiet li wasslu għall-profitti ma seħħewx f'Ġibiltà. Diversi deċiżjonijiet ikkonfermaw in-nuqqas ta' ntaxxar ta' imgħax passiv, royalties u/jew dividendi li kien konsistenti mad-dispożizzjonijiet tat-taxxa applikabbli, minħabba li, fiż-żmien meta ngħataw id-deċiżjonijiet tat-taxxa, id-dispożizzjonijiet tat-taxxa applikabbli ma kinux jistipulaw l-intaxxar tar-royalties u tal-introjtu minn imgħax passiv. Kif muri fil-premessi 145 sa 147, ġew ipprovduti ġustifikazjzonijiet xierqa fir-rigward tal-każijiet l-oħra. Il-konklużjonijiet ta' hawn fuq huma spjegati mill-eżempji li ġejjin, li jirriflettu d-diversi kategoriji ta' attività kummerċjali (koperti mill-165 deċiżjoni tat-taxxa) identifikati fid-Deċiżjoni għall-Estensjoni tal-Proċedimenti (66).

(133)

L-ewwel eżempju jirrigwarda deċiżjoni mogħtija lil kumpanija li tipprovdi servizzi ta' maniġment u konsulenza lil lukandi u każinos fl-Afrika. Ir-rapport tal-awditjar ikkonkluda li s-servizzi ġew ipprovduti fl-Afrika minn persunal impjegat mill-kumpanija fl-Afrika. L-awditu wera li l-kumpanija ma wettqet l-ebda attività kummerċjali f'Ġibiltà jew minn Ġibiltà. L-attività tal-kumpanija f'Ġibiltà kienet limitata għal appoġġ amministrattiv bażiku pprovdut minn membru tal-persunal wieħed fir-rwol ta' segretarju amministrattiv, mingħajr ma twettqet l-ebda attività sinifikanti f'Ġibiltà. Instab li dawn ix-xogħlijiet segretarjali bażiċi ma kinux attivitajiet li jiġġeneraw l-introjtu f'Ġibiltà. Dan kien ikkonfermat minn żjara fuq il-post fil-bini tal-kumpanija f'Ġibiltà, li nstab li kien jikkonsisti f'uffiċċju mfassal esklussivament biex jilqa' laqgħat tal-bord. Sorveljanza tal-bini fi ġranet oħra mill-awtoritajiet tat-taxxa wriet li l-bini ma kien jintuża għall-ebda skop ieħor. Fuq dik il-bażi, ir-rapport ikkonkluda li l-kumpanija kienet barra mill-kamp ta' applikazzjoni tat-taxxa f'Ġibiltà minħabba l-fatt li l-ebda introjtu ma kien seħħ f'Ġibiltà jew ġie derivat minnha (għax il-kumpanija ma wettqet l-ebda attività li tiġġenera l-introjtu f'Ġibiltà).

(134)

Fit-tieni eżempju, deċiżjoni ngħatat lil kumpanija li tipprovdi servizzi ta' senserija għal bastimenti lil klijenti f'isem proprjetarji ta' bastimenti. L-awditu kkonferma li s-servizzi twettqu fi jew mid-diversi postijiet tal-grupp f'Londra, Singapor, l-Awstralja jew Monaco, mingħajr ma seħħet ebda attività li tiġġenera l-introjtu f'Ġibiltà L-awditu ma sab l-ebda evidenza li tindika li l-kumpanija kienet wettqet xi attività f'Ġibiltà. Fuq dik il-bażi, ir-rapport tal-awditjar ikkunsidra li l-kumpanija ma kellhiex preżenza jew stabbiliment permanenti f'Ġibiltà apparti s-server tagħha. Għaldaqstant, huwa kkonkluda li l-kumpanija kienet barra mill-kamp ta' applikazzjoni tat-taxxa f'Ġibiltà minħabba l-fatt li l-ebda introjtu ma kien seħħ f'Ġibiltà jew ġie derivat minnha (għax il-kumpanija ma wettqet l-ebda attività li tiġġenera l-introjtu f'Ġibiltà).

(135)

It-tielet eżempju jirrigwarda deċiżjoni mogħtija lil kumpanija li tipprovdi servizzi amministrattivi u ta' appoġġ lil kumpanija relatata fil-Lussemburgu. Is-servizzi twettqu minn tnejn mid-diretturi tagħha residenti f'Ġibiltà. Il-kumpanija kellha wkoll self mogħti lil diversi kumpaniji tal-grupp li prinċipalment jinsabu f'Ġibiltà. It-titoli u l-kollateral għal dan is-self kienu jinsabu barra minn Ġibiltà (67). Ir-rieżami investigattiv imwettaq fl-2015 ikkonkluda li l-kumpanija kellha preżenza fiżika f'Ġibiltà permezz ta' servizzi ta' maniġment professjonali mwettqa mid-diretturi residenti tagħha, li jieħdu deċiżjonijiet maniġerjali. Sat-30 ta' Ġunju 2013, il-kumpanija kienet intaxxata fuq introjtu li jirriżulta minn servizzi amministrattivi u ta' appoġġ biss, minħabba li l-imgħax fuq self bejn il-kumpaniji ma kienx taxxabbli f'Ġibiltà (68) (f'konformità mal-eżenzjoni fuq imgħax passiv skont l-ATI tal-2010). Sa mill-1 ta' Lulju 2013, il-kumpanija hija suġġetta għal taxxa fuq l-introjtu mill-imgħax ukoll (Klassi 1 A, Tabella C tal-Iskeda 1 tal-ATI tal-2010) b'riżultat tal-emenda li daħħlet l-imgħax fuq self bejn il-kumpaniji fil-kamp ta' applikazzjoni tat-taxxa fl-ATI tal-2010. Il-kumpanija ilha mill-1 ta' Lulju 2013 li rregolarizzat ruħha għall-iskopijiet kollha tat-taxxa f'Ġibiltà.

(136)

Bħala r-raba' eżempju, deċiżjoni ngħatat lil kumpanija li, skont ftehim ta' intrapriża konġunta, daħlet f'kuntratt ma' partijiet terzi stabbiliti barra minn Ġibiltà għall-forniment ta' reklamar, marketing u servizzi promozzjonali relatati ma' attivitajiet ta' remote gaming, inkluż l-għarfien u l-iżvilupp tal-marka. Il-kumpanija rċeviet sehem mid-dħul iġġenerat mill-operat ta' negozju ta' remote gaming imwettaq f'Malta mill-kontroparti fil-ftehim ta' intrapriża konġunta. Ir-rieżami, li inkluda żjara fuq il-post u investigazzjoni mobbli magħmula mill-uffiċjali tat-taxxa ta' Ġibiltà fis-setturi tan-negozju finanzjarju, dak bankarju u tal-uffiċċji f'Ġibiltà, uriet li l-kumpanija ma kellhiex preżenza fiżika jew stabbiliment permanenti f'Ġibiltà u li d-diretturi korporattivi tagħha ma wettqu l-ebda attività li tiġġenera l-introjtu f'Ġibiltà jew minn Ġibiltà. Ir-rapport ikkonkluda li l-kumpanija kienet barra mill-kamp ta' applikazzjoni tat-taxxa minħabba l-fatt li l-ebda introjtu ma kien seħħ f'Ġibiltà jew ġie derivat minnha. Id-deċiżjoni kienet revokata mill-awtoritajiet tat-taxxa ta' Ġibiltà fis-17 ta' Lulju 2015 minħabba li r-rappreżentanti tal-kumpanija kkonfermaw matul laqgħa fuq il-post li ma kien għad kellhom l-ebda relazzjoni mal-kumpanija.

(137)

Fil-ħames eżempju, ingħatat deċiżjoni lil kumpanija attiva fil-ksib ta' prodotti tal-petroleum direttament minn raffineriji fl-Asja u fil-ħżin, it-trasportazzjoni u l-kunsinna sussegwenti ta' dawk il-prodotti mit-terminali tal-ħżin tal-kumpanija li jinsabu fl-Asja lil klijenti fl-Italja, fil-Greċja, f'Iżrael u fit-Turkija. Ir-rieżami wera li l-kumpanija ma kellha l-ebda preżenza fiżika jew stabbiliment permanenti f'Ġibiltà, u li d-direttur uniku tagħha ma kienx wettaq attivitajiet li jiġġeneraw introjtu f'Ġibiltà jew minn Ġibiltà. Ir-rieżami sab ukoll li, kif muri mill-websajt tal-grupp li l-kumpanija kienet parti minnu, l-attività kummerċjali twettqet f'diversi postijiet ġeografiċi permezz ta' uffiċċji f'Hong Kong, ir-Renju Unit, Dubai, l-Oman u l-Afganistan. Fuq dik il-bażi, ir-rieżami kkonkluda li l-kumpanija kienet barra mill-kamp ta' applikazzjoni tat-taxxa skont it-Taqsima 11 tal-ATI tal-2010 minħabba l-fatt li l-ebda introjtu ma kien seħħ f'Ġibiltà jew ġie derivat minnha.

(138)

Fis-sitt eżempju, deċiżjoni ngħatat lil kumpanija li twettaq kummerċ fi prodotti mediċi mhux farmaċewtiċi u relatati mas-saħħa mill-Korea t'Isfel lejn il-Ġermanja. L-awditu wera li d-deċiżjonijiet ta' maniġment u kummerċjali kienu ġew delegati barra mill-kumpanija lil persuna residenti fin-Namibja. L-awditu wera wkoll li d-direttur uniku tal-kumpanija li jirrisjedi f'Ġibiltà pprovda servizzi ta' konsulenza ġenerali lill-kumpanija u ma kienx involut b'mod attiv fl-attivitajiet kummerċjali ta' kuljum imwettqa mill-kumpanija. Ma setgħet tkun identifikata l-ebda preżenza fiżika f'Ġibiltà wara li saret żjara fuq il-post, laqgħa mal-kumpanija, risposti għal mistoqsijiet bil-miktub addizzjonali u kontrolli sistematiċi mwettqa fuq l-Internet. Ir-rieżami investigattiv qies li l-kumpanija ma kinitx tagħti servizz f'Ġibiltà jew minn Ġibiltà u għalhekk ikkonkluda li l-kumpanija ma kellha l-ebda sors ta' introjtu li jseħħ f'Ġibiltà jew li huwa derivat minnha.

(139)

Fis-seba' eżempju, il-kumpanija wettqet operat ta' logħob fuq l-Internet permezz ta' sit web. L-introjtu tal-kumpanija kien jinkludi ħlasijiet riċevuti minn utenti finali għal karatteristiċi u drittijiet mhux bażiċi, kummissjonijiet riċevuti minn negozju ta' mħatri b'liċenzja lil fornituri terzi u l-bejgħ ta' prodotti relatati mal-logħob. Analiżi tal-informazzjoni disponibbli wriet li, sal-1 ta' Jannar 2014, l-attivitajiet kollha twettqu barra minn Ġibiltà. B'mod partikolari, l-iżvilupp ta' softwer kien imwettaq mis-sussidjarja tal-kumpanija fi Stat Membru ieħor, filwaqt li l-host server kien jinsab fl-Iżvizzera. Il-funzjoni ta' servizzi lill-konsumatur kienet titwettaq minn tliet individwi freelance fi Stat Membru ieħor u f'pajjiż terz. Il-miżati tar-reġistrazzjoni kienu pproċessati fin-Netherlands. F'dan il-kuntest, ir-rieżami investigattiv qies li l-kumpanija ma kinitx taxxabbli fuq introjtu iġġenerat sal-1 ta' Jannar 2014 (69). Mit-2 ta' Jannar 2014, il-kumpanija kellha preżenza fiżika f'Ġibiltà, u għandha introjtu li jseħħ f'Ġibiltà u huwa derivat minnha, tippreżenta d-dikjarazzjonijiet sħaħ u kompluti tal-introjtu tagħha u hija regolarizzata b'mod sħiħ għall-iskopijiet kollha tat-taxxa f'Ġibiltà. Id-deċiżjoni tat-taxxa kienet revokata f'Jannar 2014.

(140)

Fit-tmien eżempju, l-awditu kkonferma li l-kumpanija wettqet kummerċ f'kimiki agrikoli mill-Ungerija, il-Belġju u Iżrael lil klijenti fl-Eks-Repubblika Jugoslava tal-Maċedonja, il-Bożnija-Ħerzegovina, u s-Slovakkja. Wara li eżamina d-dokumenti kollha ppreżentati mill-kumpanija kif ukoll informazzjoni addizzjonali pprovduta mill-kumpanija bil-miktub u fil-kuntest ta' laqgħa mar-rappreżentanti tal-kumpanija (u fuq il-bażi ta' funzjonijiet investigattivi oħra), l-awditu sab li ma kienet isseħħ l-ebda attività li tiġġenera introjtu f'Ġibiltà (fin-nuqqas ta' servizzi mogħtija f'Ġibiltà jew minn Ġibiltà jew kwalunkwe attività mwettqa f'Ġibiltà jew minn Ġibiltà) u għalhekk ikkonkluda li l-kumpanija kienet barra mill-kamp ta' applikazzjoni tat-taxxa skont it-Taqsima 11 tal-ATI tal-2010.

(141)

Id-disa' u l-aħħar eżempju jirrelata ma' deċiżjoni mogħtija lil kumpanija li tinnoleġġja jott lussuż (irreġistrat fir-Renju Unit) fil-Gżejjer Verġni Brittaniċi. In-negozju kellu websajt li kien juri li n-noleġġ kien iseħħ fil-Karibew. Ir-rieżami tal-awtoritajiet tat-taxxa ta' Ġibiltà wera li l-kumpanija ma wettqet l-ebda kummerċ f'Ġibiltà u ma kellha l-ebda preżenza fiżika jew stabbiliment permanenti f'Ġibiltà. Għaldaqstant ikkonkludiet li ma kien hemm l-ebda attività li tiġġenera introjtu li għaliha l-kumpanija kellha l-obbligu tat-taxxa skont il-prinċipju tat-territorjalità. Id-deċiżjoni skadiet f'Ottubru 2015 għax il-kumpanija kienet tneħħiet mir-Reġistru tal-Kumpaniji mir-Reġistratur tal-Kumpaniji f'Ġibiltà.

(142)

Dawn id-disa' eżempji huma biss illustrattivi. Il-Kummissjoni vvalutat l-informazzjoni u d-dokumenti disponibbli f'relazzjoni mal-160 deċiżjoni biex tiżgura li d-deċiżjonijiet ngħataw f'konformità mar-regoli tat-taxxa applikabbli f'Ġibiltà u li l-attivitajiet imwettqa mill-kumpaniji inkwistjoni kienu jirriflettu b'mod ġust l-attivitajiet deskritti fit-talba għal deċiżjoni.

(143)

Minn dawk il-160 deċiżjoni tat-taxxa, 98 attwalment kienu jirrigwardaw il-prinċipju tat-territorjalità (u r-rieżamijiet magħmula mill-awtoritajiet tat-taxxa ta' Ġibiltà sabu li ma kienet titwettaq l-ebda attività li tiġġenera introjtu f'Ġibiltà). Għaldaqstant, id-dħul iġġenerat mill-kumpaniji kkonċernati fi kwalunkwe każ ma kienx fil-kamp ta' applikazzjoni tas-sistema territorjali tat-taxxa f'Ġibiltà.

(144)

F'34 każ, id-destinatarji kienu qed jirċievu imgħax passiv, royalties u/jew dividendi (70) u jidher li jew is-sitwazzjonijiet tagħhom kienu regolarizzati jew l-attivitajiet tagħhom twaqqfu wara l-emendi tal-2013. Madankollu, sa fejn it-trattament tat-taxxa ta' dawn il-kumpaniji huwa r-riżultat tal-implimentazzjoni tal-iskema ta' għajnuna eżaminata fit-Taqsima 7 ta' din id-Deċiżjoni, il-Kummissjoni tirreferi għal dik it-taqsima. Għaldaqstant, kull għajnuna mogħtija fuq il-bażi ta' dawn id-deċiżjonijiet (matul il-perjodu ta' qabel id-dħul is-seħħ tal-emendi tal-2013) hija trattata fil-parti operazzjonali ta' din id-Deċiżjoni bħala parti mill-iskema ta' għajnuna identifikata fit-Taqsima 7.

(145)

F'19-il każ, jew il-kumpanija ma kinitx inkorporata, jew l-attivitajiet deskritti fit-talbiet tad-deċiżjoni tat-taxxa ma mmaterjalizzawx ruħhom, jew il-kumpanija ma kinitx attiva. Għalhekk ma kien hemm xejn x'jiġi intaxxat f'dawn il-każijiet u, minkejja l-pożizzjoni li ħadu l-awtoritajiet tat-taxxa, id-deċiżjonijiet ma kinux jinvolvu l-għoti ta' xi vantaġġ lill-kumpaniji kkonċernati.

(146)

F'erba' każijiet oħra, id-deċiżjonijiet ikkonkludew li l-introjtu rilevanti seħħ f'Ġibiltà u kien derivat minnha u għalhekk kien taxxabbli skont it-Taqsima 11 tal-ATI tal-2010. F'dan ir-rigward, huwa rilevanti li wieħed jinnota li, f'każijiet bħal dawn, ir-rapporti tal-awditjar mill-awtoritajiet tat-taxxa ta' Ġibiltà enfasizzaw li d-deċiżjonijiet tat-taxxa kienu ġew revokati bħala riżultat ta' tibdil leġiżlattiv jew materjali. Jidher ukoll li r-revoki ma kinux ir-riżultat tal-awditi mwettqa fl-2015 imma ta' eżaminazzjonijiet li saru qabel, pereżempju meta daħlu fis-seħħ l-emendi tal-2013 fir-rigward tal-imgħax u l-introjtu mir-royalties. Fi kliem ieħor, f'dawn l-erba' każijiet, il-kumpaniji rilevanti kellhom iħallsu t-taxxa fuq l-introjtu tagħhom li seħħ f'Ġibiltà jew li kien derivat minnha.

(147)

Il-ħames deċiżjonijiet li baqa' jirrigwardaw kwistjonijiet ta' taxxa fuq l-introjtu personali bħall-intaxxar tal-impjegati. Dawk id-deċiżjonijiet ma jaffetwawx il-livell ta' taxxa tal-kumpaniji rilevanti u għalhekk mhumiex fil-kamp ta' applikazzjoni tat-taxxa fuq l-introjtu korporattiv.

(148)

It-tabella fl-Anness tipprovdi ġabra tas-sejbiet tal-Kummissjoni fir-rigward tal-160 deċiżjoni tat-taxxa li mhumiex problematiċi, b'referenza għall-kategoriji deskritti f'din it-taqsima. Hija turi li ma nstab l-ebda każ fejn xi waħda mid-deċiżjonijiet kienet inkonsistenti mal-applikazzjoni normali tas-sistema tat-taxxa ta' Ġibiltà (71).

(149)

Bħala riżultat, anke kieku nstab li l-awtoritajiet ta' Ġibiltà kienu ħarġu l-160 deċiżjoni tat-taxxa mingħajr ma segwew xi proċedura magħżula jew mingħajr ma wettqu l-ebda analiżi sostanzjali fiż-żmien li ngħataw id-deċiżjonijiet, dan ma kien ikollu l-ebda impatt fil-prattika u ma kienx jirriżulta fl-għoti ta' xi vantaġġ minħabba li l-attivitajiet (jew in-nuqqas ta' attivitajiet) tal-kumpaniji kkonċernati ma ġġenerawx introjtu li għalih kienet dovuta taxxa skont ir-regoli tat-taxxa fuq l-introjtu ta' Ġibiltà (72).

(150)

Għalhekk, wara li eżaminat sew l-evidenza pprovduta mill-awtoritajiet tar-Renju Unit, il-Kummissjoni waslet għall-konklużjoni li l-160 deċiżjoni tat-taxxa rriflettew b'mod affidabbli dak li kien jirriżulta minn applikazzjoni normali tas-sistema tat-taxxa ordinarja ta' Ġibiltà, mingħajr ma kienet involuta l-ebda applikazzjoni ħażina tal-liġi jew indikazzjoni oħra ta' eżistenza ta' għajnuna mill-Istat. Minn dan jirriżulta li l-għoti u l-implimentazzjoni ta' dawn id-deċiżjonijiet ma jqajmux kwistjonijiet ta' għajnuna mill-Istat (73).

(151)

L-investigazzjoni tal-Kummissjoni wriet li ħames deċiżjonijiet mogħtija lis-soċji korporattivi ta' Ġibiltà ta' soċjetajiet Netherlandiżi b'responsabbiltà limitata (Commanditaire vennootschap or “CV”) qajmu kwistjonijiet fir-rigward ta' regoli dwar l-għajnuna mill-Istat.

(152)

Id-deċiżjonijiet rilevanti ngħataw fl-2011 jew fl-2012 u kkonfermaw li r-royalties (u sa ċertu punt, introjtu fuq interess passiv) iġġenerati fil-livell ta' CVs Netherlandiżi ma kinux taxxabbli taħt l-ATI tal-2010. Dawk id-deċiżjonijiet baqgħu fis-seħħ u ma ġewx revokati mill-awtoritajiet tat-taxxa la bħala riżultat tal-emendi għall-ATI tal-2010 fl-2013 li daħħlu l-imgħax u r-royalties fil-kamp ta' applikazzjoni tat-taxxa, u lanqas bħala riżultat tal-awditi mwettqa fl-2015.

(153)

Is-sitwazzjonijiet li hemm referenza għalihom fit-talbiet għal deċiżjoni tipikament kienu jinvolvu l-istruttura li ġejja:

Is-CV Netherlandiża żżomm id-drittijiet tal-PI

Soċju Akkomandanti 1 %

Soċju Solidali 99 %

GIBC02

Royalty

Liċenzja

Il-BV Netherlandiża Tisfrutta d-drittijiet tal-PI

GIBC01

(154)

Skont il-liġi Netherlandiża, CV hija soċjetà b'responsabbiltà limitata, li ġeneralment hija meqjusa bħala entità trasparenti għal skopijiet ta' taxxa u għalhekk mhux taxxabbli fin-Netherlands (74). Għaldaqstant, l-introjtu tas-CV mhuwiex intaxxat fin-Netherlands fil-livell tas-CV imma fil-livell tal-parteċipanti fis-CV, skont is-sehem tagħhom fis-CV. Fi kliem ieħor, obbligu ta' taxxa b'relazzjoni mal-introjtu ta' dawn is-CVs iseħħ fin-Netherland biss jekk partiċipant wieħed jew aktar fis-CV jkunu persuni jew kumpaniji residenti Netherlandiżi.

(155)

Fir-rigward tat-trattament tat-taxxa f'Ġibiltà, jidher mis-sottomissjonijiet tar-Renju Unit li, fin-nuqqas ta' regoli speċifiċi fl-ATI tal-2010, Ġibiltà tapplika prinċipji ta' dritt komuni u għalhekk tqis li s-CVs Netherlandiżi huma entitajiet trasparenti skont ir-regoli u l-ġurisprudenza applikabbli fir-Renju Unit (75). Is-sehem rilevanti ta' kwalunkwe introjtu riċevut mis-CVs għalhekk se jitqies bħala riċevut direttament mill-kumpaniji ta' Ġibiltà b'interess fis-CV Netherlandiża.

(156)

Fin-nuqqas ta' kwalunkwe ftehim tat-taxxa bilaterali bejn Ġibiltà u n-Netherlands, l-obbligu tat-taxxa f'Ġibiltà fil-prinċipju jiddependi fuq jekk is-sehem mill-introjtu rilevanti ġġenerat mis-CV Netherlandiża kienx fil-kamp ta' applikazzjoni tat-taxxa skont l-ATI tal-2010. Minħabba li l-imgħax passiv u l-introjtu mir-royalties ma kienx suġġett għat-taxxa sa Ġunju 2013 (fil-każ ta' imgħax passiv) u Jannar 2014 (fil-każ ta' introjtu mir-royalties), introjtu bħal dan riċevut mis-CV Netherlandiża ma kienx taxxabbli fil-livell tas-soċji ta' Ġibiltà. Min-naħa l-oħra, wara l-emendi tal-ATI tal-2010 fejn introjtu mir-royalties u minn imgħax passiv sar suġġett għal taxxa irrispettivament mis-sors tiegħu (Klassi 1 A u 3 A, Tabella C tal-Iskeda 1 tal-ATI tal-2010), applikazzjoni korretta tar-regoli tat-taxxa ta' Ġibiltà kellha twassal lill-awtoritajiet tat-taxxa ta' Ġibiltà biex iqisu r-roylaties rilevanti (riċevuti mill-1 ta' Jannar 2014) u imgħax passiv (riċevut mill-1 ta' Lulju 2013) bħala introjtu taxxabbli fil-livell tas-soċji ta' Ġibiltà (76).

(157)

Fis-sottomissjoni tagħhom tal-21 ta' Frar 2018, l-awtoritajiet tar-Renju Unit ikkonfermaw li l-Uffiċċju tat-Taxxa fuq l-Introjtu ta' Ġibiltà jħares lejn is-CVs Netherlandiżi bħala entitajiet trasparenti għall-finijiet tat-taxxa. Madankollu, huma kkonkludew li ma hija dovuta l-ebda taxxa f'Ġibiltà minħabba li ma hemm l-ebda dispożizzjoni speċifika fl-ATI tal-2010 li tiddefinixxi u tippreskrivi kif is-soċju f'Ġibiltà jenħtieġ li jkun intaxxat. Ir-raġuni għal dan hija li d-definizzjoni ta' “persuna” fit-Taqsima 74 tal-ATI tal-2010 ma tirreferix espliċitament għal soċjetajiet b'responsabbiltà limitata Netherlandiżi, u għalhekk ma jeżisti l-ebda mekkaniżmu speċifiku dwar kif irid ikun intaxxat introjtu minn ishma f'CV.

(158)

Il-Kummissjoni ma tistax tifhem ir-raġunament tal-awtoritajiet tat-taxxa tar-Renju Unit u ta' Ġibiltà għar-raġunijiet li ġejjin. L-ewwel nett, il-mistoqsija rilevanti hija mhux jekk is-CVs Netherlandiżi jenħtieġx li jkunu ntaxxati f'Ġibiltà jew le, imma jekk is-soċji korporattivi (residenti f'Ġibiltà) ta' dawn is-CVs jenħtieġx li jkunu ntaxxati fuq is-sehem tagħhom tal-introjtu ġġenerat minn dawn is-CVs. Minħabba li CVs huma meqjusa bħala trasparenti għal skopijiet ta' taxxa f'Ġibiltà (skont il-prinċipji tad-dritt komuni), is-soċji korporattivi residenti f'Ġibiltà jenħtieġ li jkunu ntaxxati fuq is-sehem tagħhom tal-introjtu mis-CVs sa fejn dak l-introjtu jkun fil-kamp ta' applikazzjoni tat-taxxa skont l-ATI tal-2010 (għal introjtu minn imgħax, dan ikun il-każ mill-1 ta' Lulju 2013 u għar-royalties, mill-1 ta' Jannar 2014) (77). Il-Kummissjoni esprimiet dubji dwar ir-raġunament ippreżentat mir-Renju Unit imma ma rċeviet l-ebda argument konvinċenti li jappoġġja dan ir-raġunament.

(159)

It-tieni, anke jekk id-definizzjoni ta' “persuna” fit-Taqsima 74 kienet rilevanti għall-każijiet inkwistjoni (fl-opinjoni tal-Kummissjoni, dan huwa l-każ tal-kumpaniji rilevanti f'Ġibiltà b'interess fis-CVs Netherlandiżi biss, mhux għas-CVs Netherlandiżi nfushom), wieħed irid jinnota li d-definizzjoni fit-Taqsima 74 (78) hija ġenerika ħafna u wiesgħa biżżejjed biex tinkludi CV Netherlandiża.

(160)

Il-benefiċjarji tal-ħames deċiżjonijiet tat-taxxa kkontestati huma kif ġej:

(161)

L-ammont ta' profitti magħmula fil-livell tas-CVs u l-ishma rilevanti ta' dawk il-profitti li jistgħu jkunu vvalutati fil-livell ta' dawk il-ħames benefiċjarji (skont l-interessi rispettivi tagħhom fis-CVs) għall-perjodu 2014-2016 (81) huma kif ġej (82):

(162)

L-ishma rilevanti tal-ammonti tal-profitt li hemm referenza għalihom fit-tabella ta' hawn fuq kellhom ikunu inkorporati fil-bażi valutabbli tal-ħames kumpaniji ta' Ġibiltà u ntaxxati skont ir-regoli tat-taxxa normali ta' Ġibiltà.

(163)

Kif diġà spjegat fil-premessa 77, sabiex miżura tkun kategorizzata bħala għajnuna mill-Istat, l-ewwel irid ikun hemm intervent mill-Istat jew permezz ta' riżorsi tal-Istat; it-tieni, l-intervent irid ikun jista' jaffettwa l-kummerċ bejn l-Istati Membri; it-tielet, irid ikun jikkonferixxi għajnuna selettiva lil intrapriża u, ir-raba', irid ikun ifixkel jew jhedded li jfixkel il-kompetizzjoni (83).

(164)

Fir-rigward ta' intervent mill-Istat jew permezz ta' riżorsi mill-Istat, id-deċiżjonijiet tat-taxxa kkontestati kienu maħruġa mill-awtoritajiet tat-taxxa ta' Ġibiltà, li huma parti mill-Gvern ta' Ġibiltà. Id-deċiżjonijiet tat-taxxa kienu jammontaw għal aċċettazzjoni minn dawk l-awtoritajiet ta' trattament tat-taxxa partikolari. Fuq il-bażi ta' dawk id-deċiżjonijiet, il-benefiċjarji tad-deċiżjonijiet iddeterminaw l-obbligu tat-taxxa fuq l-introjtu korporattiv tagħhom f'Ġibiltà (għal kull sena tat-taxxa). Fejn il-benefiċjarju kien mitlub li jissottometti dikjarazzjoni tat-taxxa (84), id-deċiżjoni tat-taxxa sussegwentement intużat mill-benefiċjarju biex jimla' d-dikjarazzjonijiet tiegħu, u dawn id-dikjarazzjonijiet ġew aċċettati mill-awtoritajiet tat-taxxa ta' Ġibiltà bħala parti mill-obbligu tat-taxxa fuq l-introjtu korporattiv tal-benefiċjarju f'Ġibiltà. Fejn ma kien hemm l-ebda rekwiżit biex tkun ippreżentata dikjarazzjoni tat-taxxa minħabba n-nuqqas ta' introjtu valutabbli bħala riżultat tad-deċiżjoni, ma kien hemm l-ebda obbligu ta' taxxa lanqas. Kwalunkwe vantaġġ tat-taxxa mogħti fuq il-bażi tad-deċiżjonijiet tat-taxxa kkontestati għalhekk huwa imputabbli għal Ġibiltà.

(165)

Fir-rigward tal-finanzjament tal-miżuri permezz tar-riżorsi tal-Istat, il-Qorti tal-Ġustizzja sostniet b'mod konsistenti li miżura li biha l-awtoritajiet pubbliċi jagħtu lil ċerti intrapriżi eżenzjoni mit-taxxa li, għalkemm ma tinvolvix trasferiment pożittiv ta' riżorsi tal-Istat, tpoġġi lill-intrapriżi msemmija f'sitwazzjoni finanzjarja aktar favorevoli minn kontribwenti oħrajn, tikkostitwixxi għajnuna mill-Istat (85). F'dan il-każ, id-deċiżjonijiet tat-taxxa kkontestati jikkonfermaw li s-sehem rilevanti tal-introjtu mir-royalties u mill-imgħax iġġenerat mis-sħubiji Netherlandiżi mhuwiex taxxabbli fil-livell tal-kumpaniji residenti ta' Ġibiltà b'interessi f'dawk is-sħubiji. Għaldaqstant, wieħed jista' jgħid li t-trattament tat-taxxa mogħti fuq il-bażi tad-deċiżjonijiet tat-taxxa kkontestati jnaqqas l-obbligu tat-taxxa fuq l-introjtu korporattiv f'Ġibiltà tal-benefiċjarji ta' dawk id-deċiżjonijiet u b'hekk iwassal għal telf ta' riżorsi tal-Istat. Dan huwa għaliex kwalunkwe eżenzjoni mogħtija bħala riżultat tad-deċiżjonijiet tat-taxxa kkontestati tirriżulta f'telf ta' dħul mit-taxxa li alternattivament kien ikun disponibbli għal Ġibiltà fin-nuqqas ta' eżenzjoni (86). Għalhekk, il-miżuri huma ffinanzjati permezz ta' riżorsi tal-Istat.

(166)

Fir-rigward tal-ħtieġa ta' effett fuq il-kummerċ, il-ħames kumpaniji li bbenefikaw mid-deċiżjonijiet tat-taxxa kkontestati huma parti minn gruppi multinazzjonali li joperaw f'diversi swieq f'diversi Stati Membri, għalhekk kwalunkwe għajnuna favur tagħhom hija suxxettibbli li taffettwa l-kummerċ fl-Unjoni. Bl-istess mod, billi pprovdiet trattament tat-taxxa favorevoli lill-gruppi ta' kumpaniji multinazzjonali rilevanti, Ġibiltà potenzjalment ħadet l-investiment mingħand Stati Membri li ma jistgħux jew li ma jridux joffru trattament tat-taxxa daqstant favorevoli. Minħabba li d-deċiżjonijiet tat-taxxa kkontestati jsaħħu l-pożizzjoni kompetittiva tal-benefiċjarji meta mqabbla ma' intrapriżi oħra li jikkompetu f'kummerċ fl-Unjoni, dawn iridu jiġu kkunsidrati bħala suxxettibbli li jaffetwaw dan il-kummerċ (87).

(167)

Bl-istess mod, fir-rigward tal-ħtieġa ta' tfixkil tal-kompetizzjoni, miżura mogħtija minn Stat hija meqjusa li tfixkel jew thedded li tfixkel il-kompetizzjoni fejn hija suxxettibbli li ttejjeb il-pożizzjoni kompetittiva tal-benefiċjarju ta' dik il-miżura meta mqabbel ma' dak ta' intrapriżi oħra li din tikkompeti magħhom (88).

(168)

L-awtoritajiet tar-Renju Unit jargumentaw li ma hemm l-ebda evidenza li xi waħda mid-deċiżjonijiet tat-taxxa fixklet il-kompetizzjoni. Fl-opinjoni tagħhom, miżura tista' tfixkel il-kompetizzjoni biss fis-settur fejn din tapplika, jew f'xi settur relatat mill-qrib. Tfixkil bħal dan mhuwiex ovvju mid-Deċiżjoni għall-Estensjoni tal-Proċedimenti għax id-deċiżjonijiet tat-taxxa japplikaw f'għadd kbir ta' setturi differenti.

(169)

L-investigazzjoni wriet li l-benefiċjarji tal-ħames deċiżjonijiet tat-taxxa kkontestati kollha huma attivi fi swieq globali bħan-nutrizzjoni tat-tfal, it-tiftix eżekuttiv, il-prodotti kimiċi għall-konsumaturi u l-applikazzjonijiet industrijali, kemm f'diversi Stati Membri kif ukoll f'pajjiżi terzi. Dawn kollha huma swieq fejn dawn il-benefiċjarji jaffaċċjaw kompetizzjoni minn intrapriżi oħra. Il-trattament tat-taxxa mogħti fuq il-bażi tad-deċiżjonijiet tat-taxxa kkontestati jeħles lill-benefiċjarji minn obbligu tat-taxxa li kieku kienu ikollhom iġorru fl-immaniġġjar tal-attivitajiet ta' kuljum tagħhom. Għalhekk, l-għajnuna mogħtija fuq il-bażi tad-deċiżjonijiet tat-taxxa jenħtieġ li titqies li tfixkel jew thedded li tfixkel il-kompetizzjoni billi ssaħħaħ il-pożizzjoni finanzjarja tal-benefiċjarji fis-swieq fejn huma joperaw. Billi jeħlishom minn obbligu tat-taxxa li kieku kien ikollhom iħallsu, u li jkollhom iħallsu intrapriżi li jikkompetu magħhom, it-trattament tat-taxxa mogħti fuq il-bażi tad-deċiżjonijiet tat-taxxa kkontestati jillibera riżorsi li l-kumpaniji jkunu jistgħu jużaw, pereżempju, sabiex jinvestu fl-operazzjonijiet kummerċjali tagħhom, jagħmlu aktar investimenti jew itejbu l-ħlas lill-azzjonisti, u għalhekk dan ifixkel il-kompetizzjoni fis-swieq fejn dawn joperaw. Għalhekk, ir-raba' kundizzjoni biex tinstab għajnuna mill-Istat hija ssodisfata wkoll f'dan il-każ.

(170)

Fir-rigward tat-tielet kundizzjoni - l-eżistenza ta' vantaġġ selettiv - wieħed irid jiftakar li l-funzjoni ta' deċiżjoni tat-taxxa tikkonferma bil-quddiem il-mod li bih is-sistema ordinarja tat-taxxa tapplika għal każ partikolari minħabba l-fatti u ċ-ċirkostanzi speċifiċi tiegħu. Madankollu, bħal kull miżura tat-taxxa oħra, it-trattament tat-taxxa mogħti abbażi ta' deċiżjoni tat-taxxa jrid jirrispetta r-regoli tal-għajnuna mill-Istat. Kif diġà spjegat fil-premessa 127, meta deċiżjoni tat-taxxa tappoġġja trattament tat-taxxa li ma jirriflettix dak li jirriżulta minn applikazzjoni normali tas-sistema ordinarja tat-taxxa, mingħajr ġustifikazzjoni, il-miżura tagħti vantaġġ selettiv lill-benefiċjarju tagħha, sa fejn dak it-trattament tat-taxxa jtejjeb il-pożizzjoni finanzjarja ta' dik l-intrapriża fl-Istat Meimbru meta mqabbla ma' intrapriżi oħra f'sitwazzjoni fattwali u legali komparabbli, b'kunsiderazzjoni għall-objettiv tas-sistema tat-taxxa.

(171)

Kull darba li miżura li tiġi adottata mill-Istat ittejjeb il-pożizzjoni finanzjarja nett ta' intrapriża, ikun hemm vantaġġ għall-finijiet tal-Artikolu 107(1) tat-Trattat (89). Meta tiġi stabbilita l-eżistenza ta' vantaġġ, wieħed irid joqgħod attent għall-effett tal-miżura nnifisha (90). Fil-każ ta' miżuri tat-taxxa, vantaġġ jista' jingħata billi jitnaqqas b'diversi modi l-piż tat-taxxa ta' intrapriża u, b'mod partikolari, billi jitnaqqsu l-bażi taxxabbli jew l-ammont tat-taxxa dovuta (91).

(172)

Id-deċiżjonijiet tat-taxxa kkontestati mogħtija fl-2011 jew fl-2012, ikkonfermaw li l-introjtu mir-royalties u imgħax passiv, riċevut minn kumpaniji ta' Ġibiltà permezz tal-intressi tagħhom fis-CVs rilevanti mhuwiex taxxabbli skont l-ATI tal-2010. Dak it-trattament tat-taxxa ddetermina l-obbligu tat-taxxa fuq l-introjtu korporattiv f'Ġibiltà matul il-perjodu kopert mid-deċiżjonijiet tat-taxxa kkontestati (92) u għalhekk seta' jipprovdi vantaġġ selettiv.

(173)

L-Artikolu 107(1) tat-Trattat jipprojbixxi biss għajnuna li “tiffavorixxi ċerti intrapriżi jew il-produzzjoni ta' ċerti oġġetti”, jiġifieri, huwa jipprojbixxi miżuri li jagħtu vantaġġ selettiv (93). Kif imsemmi fil-premessa 86, sabiex tkun ivvalutata s-selettività, huwa meħtieġ li wieħed jistabbilixxi l-qafas ta' referenza u deroga minnu li mhix ġustifikata mil-loġika tas-sistema tat-taxxa.

(174)

Għaldaqstant, l-analiżi tal-eżistenza ta' vantaġġ selettiv trid tibda bl-identifikazzjoni tas-sistema ta' referenza applikabbli fl-Istat Membru jew, f'dan il-każ, fit-territorju barrani inkwistjoni. Għalhekk huwa neċessarju li jkun determinat jekk il-miżura tammontax għal deroga minn dik is-sistema ta' referenza, li twassal għal trattament aktar favorevoli meta mqabbel ma' intrapriżi oħra f'sitwazzjoni fattwali u legali komparabbli, b'kunsiderazzjoni għall-objettivi tas-sistema (selettività prima facie) (94). Fl-aħħar nett, miżura li tikkostitwixxi deroga mill-applikazzjoni tas-sistema ta' referenza tista' madankollu tkun ġustifikata jekk l-Istat Membru kkonċernat jirnexxielu juri li din il-miżura tirriżulta direttament minn prinċipji fundamentali jew ta' gwida ta' dik is-sistema tat-taxxa (95). Jekk dak huwa l-każ, il-miżura tat-taxxa mhijiex selettiva.

(175)

Kif diġà spjegat fil-premessa 89, sistema ta' referenza tinkludi sett koerenti ta' regoli li japplikaw b'mod ġenerali fuq il-bażi ta' kriterji oġġettivi għall-intrapriżi kollha li huma fil-kamp ta' applikazzjoni tagħha kif definit mill-għan tagħha.

(176)

Fir-rigward tal-applikazzjoni tar-regoli dwar it-taxxa fuq l-introjtu korporattiv f'Ġibiltà, kif diġà indikat fil-premessa 90, is-sistema ta' referenza hija l-ATI tal-2010, li l-objettiv tagħha huwa li tiġbor dħul minn kontribwenti li jirċievu introjtu li jseħħ f'Ġibiltà jew li huwa derivat minnha. It-Taqsima 7.1.3.1 tiddefinixxi s-sistema ta' referenza f'aktar dettall.

(177)

It-Taqsima 16(1) tal-ATI tal-2010 tipprovdi li, suġġett għal dispożizzjonijiet oħra tal-ATI tal-2010, il-profitti jew qligħ valutabbli ta' kumpanija f'Ġibiltà għal perjodu kontabilistiku jkun l-ammont kollu tal-profitti jew qligħ tal-kumpanija għal dak il-perjodu kontabilistiku. Skont ir-regoli tad-dritt komuni (96), fir-rigward ta' profitti jew qligħ derivati minn soċjetà (li hija sieħeb fiha kumpanija ta' Ġibiltà), huwa meħtieġ li wieħed iqis is-sehem li għalih hija intitolata l-kumpanija ta' Ġibiltà fil-profitti jew qligħ tas-soċjetà, u li tali profitti jew qligħ jiġu vvalutati skont id-dispożizzjonijiet tal-ATI tal-2010, daqs li kieku tali sehem kien profitti jew qligħ tal-kumpanija ta' Ġibiltà.

(178)

Bħala t-tieni pass, huwa meħtieġ li jkun determinat jekk il-miżura tagħtix deroga mill-applikazzjoni normali tar-regoli tas-sistema ta' referenza favur ċerti intrapriżi li jinstabu f'sitwazzjoni fattwali u legali simili għal intrapriżi oħra, b'kunsiderazzjoni għall-objettiv intrinsiku tas-sistema ta' referenza.

(179)

Fil-kummenti tagħhom dwar id-Deċiżjoni għall-Estensjoni tal-Proċedimenti, is-Soċjetà tal-Kontabilisti ta' Ġibiltà ssottomettiet li l-parti l-kbira mid-deċiżjonijiet elenkati f'dik id-Deċiżjoni kienu nħarġu fi żmien meta introjtu minn imgħax passiv ma kienx valutabbli għat-taxxa skont l-ATI tal-2010, u għalhekk il-maġġor parti tad-deċiżjonijiet tat-taxxa ma setgħux iwasslu għal introjtu minn imgħax valutabbli.

(180)

Kif diġà spjegat fil-premessa 156, huwa tassew il-każ li, fiż-żmien meta ngħataw id-deċiżjonijiet tat-taxxa, dawn kienu konsistenti mad-dispożizzjonijiet tat-taxxa applikabbli, minħabba li d-dispożizzjonijiet tat-taxxa applikabbli ma kinux jistipulaw l-intaxxar ta' introjtu mir-royalties u mill-imgħax passiv.

(181)

Madankollu, kif stabbilit fit-Taqsima 7 ta' din id-deċiżjoni, din l-eżenzjoni li tirriżulta mil-leġiżlazzjoni ta' Ġibiltà kienet skema ta' għajnuna mill-Istat. Għaldaqstant, l-argument imressaq mis-Soċjetà tal-Kontabilisti ta' Ġibiltà juri li t-trattament tat-taxxa pprovdut minn dawn id-deċiżjonijiet kien għajnuna mill-Istat. Fil-fatt, l-applikazzjoni, f'każijiet individwali, ta' skema ta' għajnuna hija miżura ta' għajnuna individwali.

(182)

Barra minn dan, billi ppermettew lill-benefiċjarji tad-deċiżjonijiet biex ikomplu jibbenefikaw mid-deċiżjonijiet wara d-dħul fis-seħħ tal-emendi tal-2013 għall-imgħax u r-royalties, l-awtoritajiet tat-taxxa ta' Ġibiltà tawlu l-eżistenza ta' din l-iskema f'ħames każijiet individwali. Huma naqsu saħansitra milli jikkonformaw mar-regoli nazzjonali. Din il-prolongazzjoni ta' dan it-trattament tat-taxxa favorevoli hija b'mod ċar deroga mis-sistema ordinarja tat-taxxa.

(183)

Fir-rigward tal-perjodu bejn l-1 ta' Jannar 2011 (dħul fis-seħħ tal-ATI tal-2010) u l-jum ta' qabel id-dħul fis-seħħ tal-emendi għall-imgħax passiv u r-royalties (it-30 ta' Ġunju 2013 u l-31 ta' Diċembru 2013 rispettivament), il-parti tad-deċiżjonijiet tat-taxxa li kienet tirrigwarda l-eżenzjoni għall-imgħax passiv u r-royalties ikkonfermat biss l-applikazzjoni tad-dispożizzjonijiet tat-taxxa applikabbli dak iż-żmien (97), jiġifieri, li dan l-introjtu ma kienx fil-kamp ta' applikazzjoni tat-taxxa f'Ġibiltà. Għaldaqstant, l-eżenzjoni mogħtija skont id-deċiżjonijiet tat-taxxa rilevanti (matul il-perjodu li jippreċedi l-emendi tal-2013) għalhekk jenħtieġ li titqies bħala parti mill-għajnuna mill-Istat identifikata fit-Taqsima 7.

(184)

Mill-1 ta' Lulju 2013 u mill-1 ta' Jannar 2014 rispettivament, l-introjtu minn imgħax passiv u royalties kienu parti mill-kategoriji ta' introjtu suġġetti għat-taxxa f'Ġibiltà (98). Għaldaqstant, kull eżenzjoni mogħtija lill-ħames kumpaniji ta' Ġibiltà fuq is-sehem tagħhom mill-introjtu ġġenerat mis-CVs Netherlandiżi ma kinitx tirrifletti l-applikazzjoni normali tas-sistema ordinarja tat-taxxa. It-tkomplija tal-applikazzjoni tad-deċiżjonijiet tat-taxxa, anke wara li daħlu fis-seħħ l-emendi li daħħlu l-imgħax u r-royalties fil-kamp ta' applikazzjoni tat-taxxa, u anke wara l-awditi mwetttqa mill-awtoritajiet ta' Ġibiltà fl-2015 biex jivvalutaw jekk it-trattament tat-taxxa tal-kumpaniji rilevanti kienx jikkonforma mar-regoli tat-taxxa applikabbli, wasslet għal vantaġġ selettiv favur dawk il-ħames kumpaniji.

(185)

Anke jekk l-eżenzjonijiet imsemmija kienu r-riżultat ta' sempliċi applikazzjoni ħażina tal-liġi permezz ta' tkomplija de facto tal-iskemi ta' eżenzjoni preċedenti u ma kinux ir-riżultat dirett tal-ħames deċiżjonijiet tat-taxxa nfushom, dan ma kienx ibiddel din il-konklużjoni minħabba li l-effetti tal-miżura kienu jkunu l-istess.

(186)

Fid-dawl tal-objettiv tas-sistema tat-taxxa fuq l-introjtu korporattiv ta' Ġibiltà (taxxa fuq introjtu li seħħ f'Ġibiltà jew ġie derivat minnha), il-ħames kumpaniji kkonċernati huma f'sitwazzjoni legali u fattwali komparabbli għall-kontribwenti korporattivi kollha (b'introjtu li seħħ f'Ġibiltà jew ġie derivat minnha) suġġetti għat-taxxa fuq l-introjtu korporattiv f'Ġibiltà. Id-deċiżjonijiet tat-taxxa inkwistjoni jirrigwardaw kumpaniji li jirċeivu introjtu mir-royalties u minn imgħax passiv, li kien suġġett għat-taxxa fil-każijiet kollha (suġġett għal-limitu ta' GBP 100 000 fir-rigward tal-imgħax) wara d-dħul fis-seħħ tal-emendi leġiżlattivi rilevanti. F'dan ir-rigward, ma tista' ssir l-ebda differenza ma' kumpaniji oħra li jirċievu l-istess kategoriji ta' introjtu jew li jirċievu kategoriji oħra ta' introjtu suġġett għat-taxxa (inkluż fejn dan l-introjtu jkun riċevut permezz ta' struttura fiskalment trasparenti). Il-fatt li l-introjtu kien miksub permezz ta' interessi f'CVs Netherlandiżi ma jagħmel l-ebda differenza minħabba li r-regoli tat-taxxa ta' Ġibiltà, li huma bbażati fuq il-prinċipji tad-dritt komuni fin-nuqqas ta' regoli speċifiċi għall-intaxxar ta' soċjetajiet, jipprovdi għall-intaxxar ta' tali introjtu fil-livell tas-soċji ta' Ġibiltà. Għalhekk, it-trattament tat-taxxa mogħti fuq il-bażi tad-deċiżjonijiet tat-taxxa kkontestati jagħti vantaġġ lil dawk il-ħames kumpaniji meta mqabbla mal-kontribwenti korporattivi l-oħra kollha li jirċievu introjtu li seħħ f'Ġibiltà jew ġie derivat minnha, fejn dawn tal-aħħar ikunu f'sitwazzjoni legali u fattwali komparabbli fid-dawl tal-objettiv li tipprova tilħaq it-taxxa fuq l-introjtu korporattiv ta' Ġibiltà.

(187)

Fid-dawl ta' dan, il-Kummissjoni tikkonkludi li l-vantaġġi mogħtija fuq il-bażi tad-deċiżjonijiet tat-taxxa kkontestati huma prima facie selettivi.

(188)

Skont ġurisprudenza deċiża, il-kunċett ta' għajnuna mill-Istat ma jirreferix għal miżuri tal-Istat li jiddifferenzjaw bejn intrapriżi u li huma, għalhekk, prima facie selettivi, fejn din id-differenzjazzjoni tirriżulta min-natura u l-loġika tas-sistema, li huwa għall-Istat Membru kkonċernat li juriha (99).

(189)

Miżura li toħloq eċċezzjoni għall-applikazzjoni tas-sistema tat-taxxa ġenerali tista' tkun ġustifikata min-natura u l-istruttura globali tas-sistema tat-taxxa jekk l-Istat Membru kkonċernat jista' juri li l-miżura tirriżulta direttament mill-prinċipji bażiċi jew ta' gwida tas-sistema tat-taxxa tiegħu jew fejn dan ikun ir-riżultat ta' mekkaniżmi inerenti meħtieġa għall-funzjonament u l-effikaċja tas-sistema (100). F'dan ir-rigward, trid issir distinzjoni bejn, fuq naħa, l-għanijiet assenjati lil sistema tat-taxxa partikolari u li huma esterni għaliha u, fuq in-naħa l-oħra, il-mekkaniżmi inerenti għas-sistema tat-taxxa nnifisha li huma meħtieġa għat-twettiq ta' tali għanijiet (101).

(190)

Sa fejn it-trattament tat-taxxa tal-ħames kumpaniji ta' Ġibiltà b'interess fis-CVs Netherlandiżi huwa r-riżultat tal-implimentazzjoni tal-iskema ta' għajnuna eżaminata fit-Taqsima 7 ta' din id-Deċiżjoni, il-Kummissjoni tirreferi għall-parti minn dik it-taqsima li titratta l-ġustifikazzjonijiet allegati ta' din l-iskema.

(191)

Barra minn dan, la r-Renju Unit u lanqas partijiet terzi ma ressqu xi ġustifikazzjoni possibbli għat-trattament favorevoli approvat mid-deċiżjonijiet tat-taxxa kkontestati favur il-ħames kumpaniji ta' Ġibiltà b'interess f'CVs Netherlandiżi. F'dan ir-rigward, il-Kummissjoni tfakkar li l-kompitu li jistabbilixxi tali ġustifikazzjoni huwa tal-Istat Membru. Għalhekk, fin-nuqqas ta' kwalunkwe ġustifikazzjoni mressqa mir-Renju Unit, il-Kummissjoni jkollha tikkonkludi li l-vantaġġ tat-taxxa mogħti lill-ħames benefiċjarji tad-deċiżjonijiet tat-taxxa inkwistjoni ma jistax ikun ġustifikat min-natura jew mill-iskema ġenerali tas-sistema tat-taxxa fuq l-introjtu korporattiv ta' Ġibiltà.

(192)

Fi kwalunkwe każ, il-Kummissjoni ma rnexxielha tidentifika l-ebda bażi possibbli għall-ġustifikazzjoni tat-trattament preferenzjali għall-ħames kumpaniji kkonċernati li jista' jingħad li hija derivata direttament mill-prinċipji intrinsiċi, bażiċi jew ta' gwida tas-sistema ta' referenza, jew li hija r-riżultat ta' mekkaniżmi inerenti meħtieġa għall-funzjonament u l-effikaċja tas-sistema (102).

(193)

Barra minn dan, ir-raġunijiet imressqa mill-awtoritajiet tar-Renju Unit għalfejn ma ntaxxawx l-introjtu ġġenerat fil-livell tas-CVs Netherlandiżi (jiġifieri li ma hemm l-ebda dispożizzjoni speċifika fl-ATI tal-2010 li tiddefinixxi u tippreskrivi kif jenħtieġ li jkun intaxxat sieħeb minn Ġibiltà ta' CV Netherlandiża), ma jikkonformawx mar-regoli tat-taxxa applikabbli ta' Ġibiltà (u l-prinċipji tad-dritt komuni applikabbli) u ma jistgħux jitqiesu li huma ġustifikazzjoni li ġejja direttament mill-prinċipji intrinsiċi, bażiċi jew ta' gwida tas-sistema ta' referenza.

(194)

Biex nikkonkludu, il-vantaġġ tat-taxxa mogħti lill-ħames benefiċjarji tad-deċiżjonijiet tat-taxxa ma jistax ikun ġustifikat min-natura u l-loġika tas-sistema.

(195)

Fid-dawl ta' dan, il-Kummissjoni tikkonkludi li l-vantaġġi tat-taxxa mogħtija lill-ħames kumpaniji identifikati fil-premessa 160 fuq il-bażi tad-deċiżjonijiet tat-taxxa kkontestati huma selettivi fin-natura tagħhom.

(196)

Minħabba li t-trattament tat-taxxa mogħti fuq il-bażi tal-ħames deċiżjonijiet tat-taxxa kkontestati jissodisfa l-kundizzjonijiet kollha tal-Artikolu 107(1) tat-Trattat, wieħed irid iqis li n-nuqqas ta' ntaxxar tal-introjtu mir-royalties u l-imgħax mogħti lill-benefiċjarji tal-ħames deċiżjonijiet tat-taxxa (bħala parti mill-165 deċiżjoni identifikati fid-Deċiżjoni għall-Estensjoni tal-Proċedimenti) li jirċievu tali introjtu permezz tal-interess tagħhom f'CVs Netherlandiżi jikkostitwixxi għajnuna mill-istat fis-sens ta' dik id-dispożizzjoni, jew fuq il-bażi tal-valutazzjoni taħt it-Taqsima 7 ta' din id-Deċiżjoni (rigward il-vantaġġi miksuba mill-benefiċjarji tad-deiżċiżjonijiet tat-taxxa problematiċi qabel id-dħul fis-seħħ tal-emendi tal-2013), jew fuq il-bażi tat-Taqsima 8 (rigward il-vantaġġi mogħtija wara d-dħul fis-seħħ tal-emendi tal-2013).

(197)

Il-Kummissjoni tinnota li l-ħames kumpaniji ta' Ġibiltà kollha li bbenefikaw mid-deċiżjonijiet tat-taxxa kkontestati huma parti minn gruppi multinazzjonali kbar. Il-Kummissjoni tinnota wkoll li l-istruttura korporattiva tal-gruppi li tinvolvi s-CV Netherlandiża, il-BV Netherlandiża u s-soċji ta' Ġibiltà, kif muri fil-premessa 153, tibbenefika lill-proprjetarju tas-soċji ta' Ġibiltà (“il-kumpanija parent”). Minflok ma tesplojta d-drittijiet tal-PI hija stess, il-kumpanija parent tpoġġi d-drittijiet tal-PI fi struttura korporattiva kumplessa (li tinvolvi kumpanija Netherlandiża, soċjetà Netherlandiża u kumpanija holding jew tnejn ta' Ġibiltà) li jippermetti lill-kumpanija parent tiġġenera profitti mill-użu tad-drittijiet tal-PI mingħajr ma dawk il-profitti jiġu ntaxxati. Minħabba n-natura (fiskalment) trasparenti tas-CV Netherlandiża, u l-fatt li l-kumpaniji ta' Ġibiltà ma jwettqu l-ebda attività oħra apparti ż-żamma ta' sehem fis-CV Netherlandiża, il-benefiċjarju aħħari tal-profitti mhux intaxxati li jirriżultaw mill-użu tad-drittijiet tal-PI hija l-kumpanija parent.

(198)

Għall-finijiet tal-applikazzjoni tar-regoli dwar l-għajnuna mill-Istat, entitajiet legali separati jistgħu jitqiesu bħala unità ekonomika waħda. Dik l-unità ekonomika titqies li hi l-intrapriża rilevanti li qed tibbenefika mill-miżura ta' għajnuna. Kif il-Qorti tal-Ġustizzja diġà ddeċidiet, “fil-liġi tal-kompetizzjoni, it-terminu ‘intrapriża’ jrid jinftiehem li jkopri unità ekonomika […] anki jekk fil-liġi dik l-unità ekonomika tikkonsisti f'bosta persuni, fiżiċi jew ġuridiċi” (103) Biex jiġi ddeterminat jekk diversi entitajiet jifformawx unità ekonomika, il-Qorti tal-Ġustizzja tħares lejn l-eżistenza ta' sehem li jagħti kontroll jew ta' rabtiet funzjonali, ekonomiċi jew organiċi (104). F'dan il-każ, l-istruttura korporattiva tal-entitajiet Netherlandiżi u ta' Ġibiltà hija stabilita u kkontrollata b'mod sħiħ mill-kumpanija parent għall-iskopijiet tal-użu tad-drittijiet tal-PI u tal-ottimizzazzjoni tat-taxxa. Għaldaqstant, l-istruttura korporattiva sħiħa, jiġifieri l-BV Netherlandiża, is-CV Netherlandiża, is-soċji ta' Ġibiltà u l-kumpanija parent jiffurmaw unità ekonomika unika u lkoll jenħtieġ li jitqiesu bħala l-intrapriżi li jibbenefikaw mill-miżura ta' għajnuna.

(199)

B'konsegwenza, minbarra is-soċji korporattivi minn Ġibiltà tas-CVs Netherlandiżi li huma l-benefiċjarji tal-għajnuna, il-Kummissjoni tqis ukoll il-BVs Netherlandiżi, is-CVs Netherlandiżi, u l-kumpaniji parent tas-soċji ta' Ġibiltà bħala li jibbenefikaw mill-għajnuna mill-Istat mogħtija abbażi tad-deċiżjonijiet tat-taxxa kkontestati fis-sens tal-Artikolu 107(1) tat-Trattat.

(200)

L-awtoritajiet tar-Renju Unit kif ukoll ta' Ġibiltà, is-Soċjetà tal-Kontabilisti ta' Ġibiltà u l-partijiet terzi li jirrappreżentaw lil uħud mill-kumpaniji elenkati fid-Deċiżjoni għall-Estensjoni tal-Proċedimenti jargumentaw li d-Deċiżjoni għall-Estensjoni tal-Proċedimenti hija bbażata fuq fehma mhux korretta tal-qafas legali applikabbli f'relazzjoni mal-proċedura tad-deċiżjoni tat-taxxa. Għalkemm huma jirrikonoxxu li tali nuqqas ta' ftehim huwa dovut għal informazzjoni mhux korretta pprovduta mill-awtoritajiet tar-Renju Unit (ir-referenza inkoretta għat-Taqsima 42 tal-ATI tal-2010), l-awtoritajiet tar-Renju Unit u ta' Ġibiltà jqisu li kienet dik l-informazzjoni inkorretta li wasslet lill-Kummissjoni biex tassumi li jista' jkun possibbli li d-deċiżjonijiet tat-taxxa mogħtija sa mill-2010 jitqiesu bħala “għajnuna ġdida”.

(201)

F'dan ir-rigward, wieħed irid jinnota li kien biss wara l-adozzjoni tad-Deċiżjoni għall-Estensjoni tal-Proċedimenti li r-Renju Unit u Ġibiltà infurmaw lill-Kummissjoni li l-prattika tad-deċiżjoni kienet ibbażata fuq it-Taqsima 2 tal-ATI tal-2010. Minħabba li t-Taqsima 2 ma tagħtix espliċitament lill-Kummissarju s-setgħa li jagħti deċiżjonijiet, ma kienx ovvju għall-Kummissjoni li din is-setgħa tirriżulta mis-setgħat ġenerali biex jiġi amministrat l-ATI tal-2010 stabbiliti f'dik id-dispożizzjoni.

(202)

It-tieni nett, fl-opinjoni tal-Kummissjoni, dan huwa irrilevanti għall-iskopijiet tal-proċedura ta' investigazzjoni f'dan il-każ, kemm jekk il-prattika tad-deċiżjonijiet tat-taxxa kienet ibbażata fuq it-Taqsima 42 tal-ATI tal-2010 kif ukoll jekk din kienet ibbażata fuq is-setgħa ġenerali tal-Kummissarju tat-Taxxa ta' Ġibiltà sabiex jamministra dak l-Att. Id-Deċiżjoni identifikat b'mod ċar il-prattika tad-deċiżjonijiet tat-taxxa u l-165 deċiżjoni tat-taxxa individwali li kienet relatata għalihom. Għalhekk ir-referenza għat-Taqsima 42 tal-ATI tal-2010 ma setgħetx xekklet lil xi partijiet interessati rigward miżuri li kienu se jiġu investigati fil-proċedura ta' investigazzjoni formali.

(203)

Aktar importanti minn hekk, fl-ebda parti mid-Deċiżjoni ma titpoġġa enfasi fuq il-fatt li ma kien hemm l-ebda dispożizzjoni fl-ATI tal-1952 li tikkorrispondi għat-Taqsima 42 tal-ATI tal-2010 bħala raġuni ta' appoġġ għall-konklużjoni li l-prattika tad-deċiżjonijiet tat-taxxa u l-165 deċiżjoni tat-taxxa individwali kienu jikkostitwixxu “għajnuna ġdida”.

(204)

L-awtoritajiet tar-Renju Unit jiddikjaraw ukoll li d-deċiżjonijiet huma biss parti minn prattika konsistenti li bdiet ħafna qabel ma r-Renju Unit ingħaqad mal-Komunitajiet Ewropej fl-1973. Il-prattika kienet ibbażata fuq it-Taqsima 3(1) tal-ATI tal-1952, issa riprodotta f'forma virtwalment identika fit-Taqsima 2(1) u (2) tal-ATI tal-2010, li tipprovdi lill-Kummissarju tat-Taxxa fuq l-Introjtu b'setgħa ġenerali li jiżgura l-amministrazzjoni dovuta tal-Atti għall-valutazzjoni u l-ġbir ta' taxxa fuq l-introjtu f'Ġibiltà. Għalhekk, fl-opinjoni tar-Renju Unit, jekk jinstab li jkun hemm xi element ta' għajnuna mill-Istat, din neċessarjament tkun “għajnuna eżistenti” u mhux “għajnuna ġdida”. Barra minn dan, l-effetti ekonomiċi, legali u finanzjarji tad-deċiżjonijiet dejjem kienu se jkunu bbażati fuq il-fehim tal-Kummissarju tal-liġi applikabbli u d-deċiżjonijiet ta' qabel l-2010 kienu sostanzjalment identiċi f'kull rispett għad-deċiżjonijiet mogħtija wara t-twaqqif tal-ATI tal-2010. Kummenti simili saru mill-awtoritajiet ta' Ġibiltà u mis-Soċjetà tal-Kontabilisti ta' Ġibiltà.

(205)

L-argumenti mir-Renju Unit u minn ċerti partijiet interessati jassumu li d-Deċiżjoni għall-Estensjoni tal-Proċedimenti tirrigwarda l-prattika nnifisha tal-ħruġ ta' deċiżjonijiet tat-taxxa. Il-Kummissjoni ma taqbilx ma' din il-preżunzjoni minħabba li jidher ċar mit-test ta' dik id-Deċiżjoni li hija tirrigwarda l-165 deċiżjoni tat-taxxa maħruġa fil-perjodu 2011-2013 imsemmija fl-Anness ta' dik id-Deċiżjoni u l-prattika tad-deċiżjonijiet tat-taxxa skont l-ATI tal-2010 kif evidenzjata minn dawk id-deċiżjonijiet. Fid-Deċiżjoni għall-Estensjoni tal-Proċedimenti, il-Kummissjoni ħadet il-pożizzjoni preliminari li d-deċiżjonijiet tat-taxxa kienu jikkostitwixxu għajnuna mill-Istat minħabba li (i) kienu mogħtija mingħajr proċedura ddedikata għat-talba ta' informazzjoni mill-awtoritajiet tat-taxxa ta' Ġibiltà, u (ii) l-awtoritajiet tat-taxxa ta' Ġibiltà żammew lura milli joħorġu valutazzjoni proprja tal-obbligi tat-taxxa tal-kumpaniji, billi eżerċitaw is-setgħat diskrezzjonarji tagħhom. Il-Kummissjoni adottat ukoll il-fehma preliminari li, f'ċerti każijiet, l-awtoritajiet tat-taxxa ta' Ġibiltà ħarġu deċiżjonijiet tat-taxxa li ma kinux konsistenti mad-dispożizzjonijiet tat-taxxa applikabbli.

(206)

Sabiex jirnexxielhom jiddikjaraw li l-prattika tikkostitwixxi “għajnuna eżistenti”, l-awtoritajiet tar-Renju Unit jew partijiet interessati jkollhom jistabbilixxu li, qabel l-1 ta' Jannar 1973, kienet teżisti prattika, li tammonta de facto għal skema ta' għajnuna, li tagħti deċiżjonijiet tat-taxxa li possibbilment japplikaw b'mod ħażin l-ATI tal-1952. L-awtoritajiet tar-Renju Unit ma pprovdew l-ebda indikazzjoni li tali prattika kienet teżisti qabel id-dħul tar-Renju Unit.

(207)

Konsegwentement, anke jekk id-deċiżjonijiet ta' qabel l-adeżjoni kienu bbażati fuq setgħa ġenerali tal-Kummissarju ta' Ġibiltà biex jamministra l-Att dwar it-Taxxa fuq l-Introjtu, li ilu jeżisti sa mill-1953, jidher ċar li dawn mhumiex parti mill-miżuri deskritti fid-Deċiżjoni għall-Estensjoni tal-Proċedimenti. F'dan il-kuntest, wieħed irid jenfasizza li l-qafas legali li skont liema ngħatat l-għajnuna (l-ATI tal-2010) huwa sostanzjalment differenti mill-ATI tal-1952. Il-bidliet jinkludu in-nuqqas ta' ntaxxar ta' introjtu passiv skont l-ATI tal-2010, u r-revoka tal-miżuri favur “kumpaniji eżentati” u “kumpaniji li jikkwalifikaw”, li kienu jeżistu skont l-ATI tal-1952.

(208)

Għajnuna mill-Istat titqies kompatibbli mas-suq intern jekk tkun f'waħda mill-kategoriji elenkati fl-Artikolu 107(2) tat-Trattat u tista' titqies kompatibbli mas-suq intern jekk il-Kummissjoni ssib li hija f'xi waħda mill-kategoriji elenkati fl-Artikolu 107(3) tat-Trattat. Madankollu, hu l-Istat Membru li jagħti l-għajnuna li jġarrab l-oneru tal-provi li l-għajnuna mill-Istat mogħtija minnu hi kompatibbli mas-suq intern skont l-Artikoli 107(2) jew 107(3) tat-Trattat.

(209)

Ir-Renju Unit ma invoka l-ebda waħda mir-raġunijiet għal sejbien ta' kompatibbiltà f'xi waħda minn dawk id-dispożizzjonijiet għall-għajnuna mill-Istat li huwa ta permezz tad-deċiżjonijiet tat-taxxa kkontestati. Lanqas il-partijiet terzi ma invokaw tali raġunijiet.

(210)

Barra minn dan, minħabba li t-trattament tat-taxxa mogħti fuq il-bażi tad-deċiżjonijiet tat-taxxa kkontestati jeħles lill-kumpaniji rilevanti minn obbligu ta' taxxa li kien ikollhom iħallsu fil-ġestjoni ta' kuljum ta' attivitajiet normali, l-għajnuna mogħtija fuq il-bażi ta' dawk id-deċiżjonijiet tat-taxxa tikkostitwixxi għajnuna għall-operat. Bħala regola ġenerali, għajnuna ta' dan it-tip normalment ma tistax titqies li tkun kompatibbli mas-suq intern skont l-Artikolu 107(3) tat-Trattat minħabba li ma tiffaċilitax l-iżvilupp ta' ċerti attivitajiet jew ta' ċerti reġjuni ekonomiċi. Barra minn hekk, il-vantaġġi tat-taxxa inkwistjoni mhumiex limitati fiż-żmien, fejn jonqsu jew huma proporzjonati għal dak li huwa meħtieġ sabiex ikun irmedjat nuqqas speċifiku tas-suq jew sabiex ikun issodisfat xi objettiv ta' interess ġenerali fl-oqsma kkonċernati. Għalhekk, huma ma jistgħux jitqiesu bħala kompatibbli.

(211)

Konsegwentement, l-għajnuna mill-Istat mogħtija lill-ħames kumpaniji rilevanti mill-awtoritajiet tat-taxxa ta' Ġibiltà mhix kompatibbli mas-suq intern.

(212)

Fid-Deċiżjoni għall-Estensjoni tal-Proċedimenti, il-Kummissjoni esprimiet dubji mhux biss fir-rigward tal-165 deċiżjoni tat-taxxa individwali identifikati fl-Anness ta' dik id-Deċiżjoni, imma wkoll b'mod aktar ġenerali fir-rigward tal-prattika tad-deċiżjonijiet tat-taxxa skont l-ATI tal-2010. Dan kien għax l-awtoritajiet tat-taxxa ta' Ġibiltà dehru li japplikaw b'mod ħażin id-dispożizzjonijiet tal-ATI tal-2010 fuq bażi rikorrenti. F'dak ir-rigward, il-Kummissjoni esprimiet il-fehma preliminari li l-165 deċiżjoni tat-taxxa u l-prattika tad-deċiżjonijiet tat-taxxa ta' Ġibiltà kienu jikkostitwixxu miżuri ta' għajnuna mill-Istat għall-iskopijiet tal-Artikolu 107(1) tat-Trattat u esprimiet dubji dwar il-kompatibbiltà tagħhom mas-suq intern.

(213)

Filwaqt li l-Kummissjoni kienet ġustifikata li jkollha dubji fiż-żmien li fetħet il-proċedura ta' investigazzjoni formali, wieħed irid jinnota li s-sejbiet li hemm referenza għalihom fit-Taqsimiet 8.3.1 u 8.3.2 mhumiex biżżejjed biex tintwera l-eżistenza ta' skema ta' għajnuna bbażata fuq il-prattika tad-deċiżjonijiet tat-taxxa f'Ġibiltà. B'mod partikolari, tali sejbiet ma jindikawx prattika rikorrenti ta' applikazzjoni ħażina tal-ATI tal-2010 permezz tal-għoti ta' deċiżjonijiet tat-taxxa.

(214)

Barra minn dan, l-emendi leġiżlattvi u regolatorji implimentati minn Ġibiltà b'relazzjoni mal-proċedura tad-deċiżjonijiet tat-taxxa, il-prinċipju tat-territorjalità u d-dispożizzjoni kontra l-evażjoni (ara t-Taqsima 11 ta' din id-Deċiżjoni), inaqqsu l-livell ta' diskrezzjoni tal-awtoritajiet tat-taxxa ta' Ġibiltà fl-għoti ta' deċiżjonijiet tat-taxxa u fl-infurzar ta' regoli tat-taxxa fuq l-introjtu korporattiv.

(215)

Għaldaqstant, il-Kummissjoni tikkonkludi li l-prattika tad-deċiżjonijiet tat-taxxa, kif investigata f'dan il-każ, ma tinvolvix l-eżistenza ta' skema ta' għajnuna.

(216)

Skont l-Artikolu 108(3) tat-Trattat, l-Istati Membri huma obbligati jinfurmaw lill-Kummissjoni bi kwalunkwe pjan li jagħtu l-għajnuna (l-obbligu ta' notifika) u ma jistgħux idaħħlu fis-seħħ xi miżura ta' għajnuna proposta qabel ma l-Kummissjoni tkun ħadet deċiżjoni finali dwar l-għajnuna inkwistjoni (l-obbligu ta' sospensjoni).

(217)

Il-Kummissjoni tinnota li r-Renju Unit ma nnotifika lill-Kummissjoni dwar l-ebda pjan biex tingħata eżenzjoni fuq l-imgħax passiv u l-introjtu mir-royalties jew id-deċiżjonijiet tat-taxxa kkontestati, u lanqas ma rrispetta l-obbligu ta' sospensjoni stabbilit fl-Artikolu 108(3) tat-Trattat. Għaldaqstant, skont l-Artikolu 1(f) tar-Regolament (UE) 2015/1589, l-eżenzjoni fuq l-imgħax passiv u l-introjtu mir-royalties li kienet teżisti skont l-ATI tal-2010, u t-trattament tat-taxxa mogħti fuq il-bażi tad-deċiżjonijiet tat-taxxa kkontestati jikkostitwixxu għajnuna illegali, imdaħħla fis-seħħ fi ksur tal-Artikolu 108(3) tat-Trattat.

(218)

Skont it-Trattat u l-ġurisprudenza stabbilita tal-Qorti, il-Kummissjoni hija kompetenti biex tiddeċiedi li l-Istat Membru kkonċernat irid jabolixxi jew jibdel l-għajnuna meta tkun sabet li din tkun inkompatibbli mas-suq intern (105). Il-Qorti ddeċidiet b'mod konsistenti li l-obbligu li Stat Membru jabolixxi għajnuna meqjusa mill-Kummissjoni bħala inkompatibbli mas-suq intern huwa mfassal sabiex jistabbilixxi mill-ġdid is-sitwazzjoni kif kienet qabel (106).

(219)

Il-Qorti tal-Ġustizzja ddeċidiet li dan l-għan jinkiseb ladarba l-benefiċjarju jkun ħallas lura l-ammonti mogħtija b'mod illegali, u b'hekk jitlef il-vantaġġ li jkun gawda minnu fis-suq meta mqabbel mal-kompetituri tiegħu, u tiġi stabbilita mill-ġdid is-sitwazzjoni li kienet teżisti qabel il-ħlas tal-għajnuna (107).

(220)

F'konformità mal-ġurisprudenza, l-Artikolu 16(1) tar-Regolament Proċedurali stabbilixxa li “fejn jittieħdu deċiżjonijiet negattivi f'każijiet ta' għajnuna illegali, il-Kummissjoni għandha tiddeċiedi li l-Istat Membru kkonċernat għandu jieħu l-miżuri kollha meħtieġa sabiex jirkupra l-għajnuna mill-benefiċjarju […].”

(221)

Għalhekk, minħabba li l-miżuri inkwistjoni kienu implimentati fi ksur tal-Artikolu 108(3) tat-Trattat, u huma meqjusa li huma għajnuna illegali u inkompatibbli, l-Istat Membru jenħtieġ li jkun meħtieġ li jirkupra l-għajnuna sabiex jistabbilixxi mill-ġdid is-sitwazzjoni li kienet teżisti fis-suq qabel l-għoti ta' dik l-għajnuna. L-irkupru jenħtieġ li jkopri ż-żmien minn meta seħħ il-vantaġġ għall-benefiċjarju, jiġifieri minn meta l-għajnuna tpoġġiet għad-dispożizzjoni tal-benefiċjarju, sal-irkupru effettiv tagħha u s-somom li jridu jiġu rkuprati jenħtieġ li jinżamm imgħax fuqhom sal-irkupru effettiv.

(222)

L-ebda dispożizzjoni tad-dritt tal-Unjoni ma tirrikjedi lill-Kummissjoni, meta tordna l-irkupru ta' għajnuna ddikjarata inkompatibbli mas-suq intern, biex tikkwantifika l-ammont eżatt tal-għajnuna li trid tiġi rkuprata. Minflok, huwa biżżejjed għad-deċiżjoni tal-Kummissjoni li tinkludi l-informazzjoni li tippermetti lid-destinatarju tad-deċiżjoni jikkalkula l-ammont hu stess mingħajr wisq diffikultà (108).

(223)

Fir-rigward tal-għajnuna mill-Istat illegali fil-forma ta' miżuri tat-taxxa, l-ammont li jrid jiġi rkuprat jenħtieġ li jiġi kkalkulat fuq il-bażi ta' tqabbil bejn it-taxxa fil-fatt imħallsa u l-ammont li kellu jitħallas fin-nuqqqas tat-trattament preferenzjali tat-taxxa.

(224)

F'dan il-każ, sabiex jaslu għal ammont ta' taxxa li kellu jitħallas fin-nuqqas ta' trattament preferenzjali tat-taxxa, l-awtoritajiet tar-Renju Unit jenħtieġ li jivvalutaw mill-ġdid l-obbligu tat-taxxa tal-entitajiet li bbenefikaw mill-miżuri inkwistjoni għal kull sena tat-taxxa li għaliha huma bbenefikaw minn dawn il-miżuri.

(225)

Għajnuna individwali jenħtieġ li titqies li titpoġġa għad-dispożizzjoni tal-benefiċjarju fil-jum li t-taxxa mitlufa kienet tkun dovuta, għal kull sena tat-taxxa, fin-nuqqas ta' dawn il-miżuri.

(226)

L-ammont ta' taxxa mitlufa fir-rigward ta' sena tat-taxxa speċifika jenħtieġ li jkun ikkalkulat kif ġej:

(227)

Rigward l-għajnuna mogħtija permezz tal-eżenzjoni fuq l-imgħax passiv u l-introjtu mir-royalties, l-awtoritajiet tar-Renju Unit u ta' Ġibiltà argumentaw li l-irkupru x'aktarx ikun impossibbli għal raġunijiet prattiċi, minħabba n-natura mobbli tal-fondi tal-kumpaniji in kwistjoni, u l-prinċipju tal-liġi internazzjonali li l-qrati ta' Stat wieħed ma jippermettux u ma jinfurzawx pretensjonijiet għal taxxi f'isem Stat ieħor. Madankollu, la l-awtoritajiet tar-Renju Unit u lanqas dawk ta' Ġibiltà ma pprovdew xi provi ta' diffikultajiet konkreti fil-prattika li setgħu jwasslu għall-konklużjoni li huwa assulutament impossibbli li l-għajnuna tiġi rkuprata. Tabilħaqq, hija ġurisprudenza stabbilita li l-kundizzjoni ta' “impossibbiltà assoluta” li tiġi implimentata deċiżjoni ma tiġix issodisfata meta l-Istat Membru konvenut ma jagħmel xejn ħlief jinforma lill-Kummissjoni bid-diffikultajiet legali, politiċi jew prattiċi li l-implimentazzjoni tad-deċiżjoni toħloq, mingħajr ma jieħu l-passi neċessarji fil-konfront tal-impriżi inkwistjoni sabiex jirkupra l-għajnuna u mingħajr ma jipproponi lill-Kummissjoni metodi alternattivi, għall-implimentazzjoni tad-deċiżjoni, li jippermettu li jiġu megħluba dawn id-diffikultajiet (109). Konsegwentement, il-Kummissjoni tikkonkludi li l-awtoritajiet tar-Renju Unit u ta' Ġibiltà ma wrewx li jkun assulutament impossibbli li tiġi rkuprata l-għajnuna mogħtija permezz tal-eżenzjoni.

(228)

Kwalunkwe taxxa mitlufa b'riżultat tal-eżenzjoni tal-imgħax passiv u l-introjtu mir-royalties bejn l-1 ta' Jannar 2011 u l-jum ta' qabel id-dħul fis-seħħ tal-emendi rispettivi li poġġew l-imgħax passiv u r-royalties fil-kamp ta' applikazzjoni tat-taxxa jenħtieġ li tkun irkuprata sa fejn l-introjtu kien seħħ f'Ġibiltà jew ġie derivat minnha (110).

(229)

Kif spjegat fil-premessa 82, introjtu mir-royalties riċevut minn kumpanija ta' Ġibiltà huwa meqjus li jseħħ f'Ġibiltà u li huwa derivat minnha. L-awtoritajiet tar-Renju Unit għalhekk jenħtieġ li jkunu meħtieġa li jirkupraw it-taxxa mitlufa minn kwalunkwe kumpanija ta' Ġibiltà li rċeviet introjtu mir-royalties matul il-perjodu bejn l-1 ta' Jannar 2011 u l-31 ta' Diċembru 2013.

(230)

Rigward l-introjtu fuq imgħax passiv riċevut mill-kumpaniji ta' Ġibiltà matul il-perjodu bejn l-1 ta' Jannar 2011 u t-30 ta' Ġunju 2013, sabiex ikun determinat jekk dan l-introjtu kienx seħħ f'Ġibiltà jew ġie derivat minnha, l-awtoritajiet tar-Renju Unit iridu japplikaw ir-regola tas-“situs tas-self” deskritta fil-premessa 82, skont il-prinċipju tat-territorjalità.

(231)

Fejn l-awtoritajiet tar-Renju Unit jikkonkludu li l-introjtu minn imgħax passiv kien seħħ f'Ġibiltà jew ġie derivat minnha, it-taxxa mitlufa b'riżultat tan-nuqqas ta' ntaxxar ta' dak l-introjtu jenħtieġ li tkun irkuprata mill-kumpanija inkwistjoni.

(232)

L-awtoritajiet tar-Renju Unit jenħtieġ li jkunu meħtieġa li jabolixxu l-prattika li ma jintaxxawx is-sehem ta' kull kumpanija ta' Ġibiltà identifikata fil-premessa 160 mill-introjtu mir-royalties u imgħax passiv iġġenerat mis-CV Netherlandiża li l-kumpanija tipparteċipa fiha.

(233)

L-awtoritajiet tar-Renju Unit jenħtieġ li jkunu wkoll meħtieġa li jirkupraw it-taxxa mitlufa minn dawk il-ħames kumpaniji ta' Ġibiltà bħala riżultat tan-nuqqas ta' ntaxxar tal-ishma tagħhom fl-introjtu mir-royalties u mill-imgħax passiv iġġenerat mis-CVs Netherlandiżi rilevanti.

(234)

L-irkupru jenħtieġ li jkopri t-taxxa mitlufa matul il-perjodu bejn l-1 ta' Jannar 2011 u d-data meta l-awtoritajiet tar-Renju Unit jabolixxu l-prattika li ma jintaxxawx l-introjtu tal-kumpaniji ta' Ġibiltà li jirriżulta mis-sehem tagħhom fis-CVs Netherlandiżi kif riferut fil-premessa 232.

(235)

Rigward l-introjtu mir-royalties tal-kumpaniji ta' Ġibiltà li jirriżulta mis-sehem tagħhom fis-CVs Netherlandiżi, l-awtoritajiet tar-Renju Unit jenħtieġ li jirkupraw l-ammonti li jikkorrispondu mat-taxxa mitlufa b'relazzjoni ma' tali introjtu matul il-perjodu kollu definit fil-premessa preċedenti.

(236)

Rigward l-introjtu mill-imgħax passiv tal-kumpaniji ta' Ġibiltà li jirriżulta mis-sehem tagħhom fis-CVs Netherlandiżi, l-għajnuna jenħtieġ li tkun irkuprata minn dawk il-kumpaniji ta' Ġibiltà kif ġej:

(237)

Fid-dawl tal-osservazzjonijiet fil-premessi fit-Taqsima 8.3.2, il-Kummissjoni tqis li r-Renju Unit, l-ewwel nett, jenħtieġ li jirkupra l-għajnuna illegali u inkompatibbli mogħtija lill-kumpaniji ta' Ġibiltà minn dawk il-kumpaniji ta' Ġibiltà. Jekk ma jkunx possibbli li jkun irkuprat l-ammont sħiħ tal-għajnuna mill-kumpanija rilevanti ta' Ġibiltà, ir-Renju Unit jenħtieġ li jirkupra l-bqija tal-ammont ta' dik l-għajnuna minn entitajiet oħra li jiffurmaw unità ekonomika waħda ma' dik il-kumpanija ta' Ġibiltà, jiġifieri l-BV Netherlandiża rilevanti, is-CV Netherlandiża jew il-kumpanija parent tal-kumpanija ta' Ġibiltà, sabiex ikun żgurat li l-vantaġġ mogħti jiġi eliminat u s-sitwazzjoni li kienet teżisti qabel fis-suq tiġi lura għan-normal permezz tal-irkupru.

(238)

Għalkemm fil-parti l-kbira tal-każijiet l-għoti ta' deċiżjonijiet tat-taxxa li huma fil-kamp ta' applikazzjoni tal-proċedimenti formali ma rriżultax fl-għoti ta' għajnuna mill-Istat, l-investigazzjoni tal-Kummissjoni kixfet ċerti nuqqasijiet fis-sistema tat-taxxa operata f'Ġibiltà, li setgħu jkunu esplojtati minn kumpaniji multinazzjonali għal skopijiet ta' ppjanar tat-taxxa. B'mod partikolari, hija sabet li s-sistema territorjali tat-taxxa operata f'Ġibiltà tista' toħloq opportunitajiet għal ippjanar tat-taxxa bejn il-fruntieri (b'riskju sinifikanti ta' nuqqas ta' ntaxxar tal-profitti tal-kumpaniji rilevanti kemm f'Ġibiltà kif ukoll fil-pajjiżi fejn l-attivitajiet fil-fatt twettqu). Barra minn dan, sabet li s-sistema territorjali tista' potenzjalment tagħti diskrezzjoni wiesgħa żżejjed lill-awtoritajiet tat-taxxa fin-nuqqas ta' linji gwida ċari dwar kif il-prinċipju tat-territorjalità jenħtieħ li jkun applikat fil-prattika.

(239)

Barra minn dan, l-investigazzjoni xeħtet ukoll dawl fuq ċerti nuqqasijiet fil-proċedura għall-għoti ta' deċiżjonijiet tat-taxxa, b'mod partikolari l-assenza ta' xi proċedura magħżula li tipprovdi rekwiżiti ċari kemm għall-applikant kif ukoll għall-awtoritajiet tat-taxxa, u n-nuqqas ta' proċeduri adegwati ta' kontroll ex ante u ex post.

(240)

Fl-aħħar nett, ġew identifikati wkoll nuqqasijiet b'relazzjoni mad-dispożizzjoni ġenerali ta' kontra l-evażjoni, inkluż ir-regoli tal-ipprezzar ta' trasferiment, stabbiliti fit-Taqsima 40 tal-ATI tal-2010 minħabba li l-applikazzjoni tad-dispożizzjoni hija kundizzjonali fuq l-eżistenza ta' “arranġament artifiċjali”.

(241)

L-ebda wieħed minn dawn in-nuqqasijiet ma jikkostitwixxi għajnuna mill-Istat fih innifsu. Madankollu, fin-nuqqas ta' miżuri adegwati biex jiġi indirizzati dawn in-nuqqasijiet, l-awtoritajiet tat-taxxa jistgħu jgawdu minn livell eċċessiv ta' diskrezzjoni fl-infurzar tar-regoli, li jista' jżid ir-riskju tal-għoti ta' għajnuna mill-Istat. Barra minn dan, dawk in-nuqqasijiet ikkontribwew għad-dubji mqajma mill-Kummissjoni fid-Deċiżjoni għall-Estensjoni tal-Proċedimenti.

(242)

Bil-ħsieb li jindirizza dawn in-nuqqasijiet, il-Gvern ta' Ġibiltà qabel li jintroduċi bidliet leġiżlattivi u regolatorji b'relazzjoni mal-proċedura tad-deċiżjoni tat-taxxa tagħhom, il-prinċipju tat-territorjalità u r-regoli ta' kontra l-abbuż/tal-ipprezzar ta' trasferiment. Fl-opinjoni tal-Kummissjoni, il-bidliet, li kienu adottati f'Ottubru 2018, jikkostitwixxu pass sinifikanti 'l quddiem biex tittejjeb it-trasparenza u titnaqqas id-diskrezzjoni fl-applikazzjoni tar-regoli dwar it-taxxa fuq l-introjtu ta' Ġibiltà.

(243)

Il-bidliet, li kienu ppuBblikati u adottati fil-25 ta' Ottubru 2018, jistgħu jinġabru fil-qosor kif ġej:

(244)

Fl-aħħar nett, huwa rilevanti wkoll li wieħed jinnota li Ġibiltà stabbiliet emenda tat-Taqsima 29 tal-ATI tal-2010 (114) li tirrikjedi li l-kumpaniji kollha rreġistrati f'Ġibiltà jippreżentaw dikjarazzjoni tat-taxxa irrispettivament minn jekk il-kumpaniji jkollhomx introjtu li jseħħ f'Ġibiltà u jkun derivat minnha u irrispettivament minn jekk dawn japplikawx għal deċiżjoni tat-taxxa jew le. Din l-emenda daħlet fis-seħħ fl-1 ta' Jannar 2016.

(245)

Il-Kummissjoni tikkonkludi li r-Renju Unit implimenta illegalment l-iskema ta' eżenzjoni tal-imgħax passiv u tal-introjtu mir-royalties f'Ġibiltà, bi ksur tal-Artikolu 108(3) tat-Trattat. Il-Kummissjoni tikkonkludi wkoll li dik l-iskema hija għajnuna mill-Istat li hija inkompatibbli mas-suq intern fis-sens tal-Artikolu 107(1) tat-Trattat.

(246)

Il-Kummissjoni tqis li t-trattament tat-taxxa mogħti mill-Gvern ta' Ġibiltà, fuq il-bażi tad-deċiżjonijiet tat-taxxa favur ħames kumpaniji f'Ġibiltà b'interessi fi sħubiji limitati Netherlandiżi (Commanditaire Vennootschappen) li jirċievu introjtu minn royalties u imgħax passiv, jikkostitwixxi miżuri ta' għajnuna mill-Istat individwali, li kienu implimentati illegalment fi ksur tal-Artikolu 108(3) tat-Trattat u li huma inkompatibbli mas-suq intern fis-sens tal-Artikolu 107(1) tat-Trattat.

(247)

Ir-Renju Unit jenħtieġ li jkun meħtieġ li jirkupra l-għajnuna mill-Istat mingħand il-benefiċjarji skont l-Artikolu 16 tar-Regolament Proċedurali. Ir-Renju Unit jenħtieġ li jiżgura wkoll li ma tingħata l-ebda għajnuna addizzjonali fil-futur lill-benefiċjarji jew lil xi kumpaniji fil-grupp tagħhom b'riżultat ta' eżenzjoni fuq l-imgħax passiv u l-introjtu mir-royalties jew it-trattament tat-taxxa stabbilit fid-deċiżjonijiet tat-taxxa kkontestati.

(248)

Billi fid-29 ta' Marzu 2017, ir-Renju Unit innotifika li beħsiebu joħroġ mill-Unjoni Ewropea, b'konformità mal-Artikolu 50 tat-Trattat tal-Unjoni Ewropea, it-Trattati mhux se jibqgħu japplikaw għar-Renju Unit mid-data li fiha jidħol fis-seħħ il-ftehim dwar l-irtirar jew, jekk dan ma jsirx, wara sentejn min-notifika, sakemm il-Kunsill Ewropew, bi qbil mar-Renju Unit, ma jiddeċidix li jestendi dan il-perjodu. Minħabba f'hekk, u mingħajr preġudizzju għal kwalunkwe dispożizzjoni tal-ftehim dwar l-irtirar, din id-Deċiżjoni tapplika biss sakemm ir-Renju Unit jibqa' Stat Membru.