(1)

Is-suġġett tal-proposta ta' inizjattiva taċ-ċittadini intitolata “#NewRightsNow - It-tisħiħ tad-drittijiet tal-ħaddiema ‘uberizzati’” jirreferi għal dan li ġej: “It-tisħiħ tad-drittijiet tal-ħaddiema ‘uberizzati’, b'mod partikolari billi jiddaħħal l-obbligu li l-pjattaformi diġitali jħallsu dħul minimu garantit lill-persuni 'li jaħdmu għal rashom' li jaħdmu għalihom fuq bażi regolari.”

(2)

L-objettivi tal-proposta ta' inizjattiva taċ-ċittadini jirreferu għal dan li ġej: “Nixtiequ nistabbilixxu obbligu li l-pjattaformi diġitali jħallsu dħul minimu garantit lill-persuni ‘li jaħdmu għal rashom’ li jaħdmu għalihom fuq bażi regolari. Din il-miżura ta' ġustizzja soċjali tissalvagwardja u tistabbilizza d-dħul tagħhom, u tindirizza speċifikament il-prekarjetà fis-suq tax-xogħol. B'mod aktar ġenerali, nixtiequ nsaħħu d-drittijiet soċjali tal-ħaddiema ‘uberizzati’.”

(3)

It-Trattat dwar l-Unjoni Ewropea (TUE) isaħħaħ iċ-ċittadinanza tal-Unjoni u jqawwi iktar il-funzjonament demokratiku tal-Unjoni billi jipprevedi, fost l-oħrajn, li kull ċittadin ikollu d-dritt li jipparteċipa fil-ħajja demokratika tal-Unjoni permezz ta' inizjattiva taċ-ċittadini Ewropej.

(4)

Għal dan l-għan, jenħtieġ li l-proċeduri u l-kundizzjonijiet meħtieġa għall-inizjattiva taċ-ċittadini jkunu ċari, sempliċi, faċli biex jintużaw u proporzjonati man-natura tal-inizjattiva taċ-ċittadini sabiex titħeġġeġ il-parteċipazzjoni taċ-ċittadini u biex l-Unjoni ssir iktar aċċessibbli.

(5)

Jistgħu jiġu adottati, għall-fini tal-implimentazzjoni tat-Trattati, atti legali tal-Unjoni għall-koordinazzjoni tad-dispożizzjonijiet leġiżlattivi, regolamentari u amministrattivi tal-Istati Membri dwar il-bidu u t-tkomplija tal-attivitajiet ta' dawk li jaħdmu għal rashom, abbażi tal-Artikoli 53(1) u 62 (TFUE).

(6)

Għal dawn ir-raġunijiet, il-proposta ta' inizjattiva taċ-ċittadini ma taqax manifestament barra mill-qafas tas-setgħat tal-Kummissjoni li tressaq proposta għal att legali tal-Unjoni għall-fini tal-implimentazzjoni tat-Trattati, f'konformità mal-Artikolu 4(2)(b) tar-Regolament.

(7)

Barra minn hekk, issawwar il-kumitat taċ-ċittadini u l-persuni ta' kuntatt inħatru f'konformità mal-Artikolu 3(2) tar-Regolament u l-proposta ta' inizjattiva taċ-ċittadini la hija manifestament abbużiva, frivola jew vessatorja u lanqas ma tmur manifestament kontra l-valuri tal-Unjoni, kif stipulati fl-Artikolu 2 TUE.

(8)

Jenħtieġ għalhekk li l-proposta ta' inizjattiva taċ-ċittadini intitolata “#NewRightsNow - It-tisħiħ tad-drittijiet tal-ħaddiema ‘uberizzati’” tiġi rreġistrata.