(1)

Id-Direttiva tal-Kummissjoni 2001/87/KE (2) inkludiet il-pimetrożina bħala sustanza attiva fl-Anness I tad-Direttiva tal-Kunsill 91/414/KEE (3).

(2)

Is-sustanzi attivi inklużi fl-Anness I tad-Direttiva 91/414/KEE jitqiesu li ġew approvati skont ir-Regolament (KE) Nru 1107/2009 u huma elenkati fil-Parti A tal-Anness tar-Regolament ta' Implimentazzjoni tal-Kummissjoni (UE) Nru 540/2011 (4).

(3)

Kif stipulat fil-Parti A tal-Anness tar-Regolament ta' Implimentazzjoni (UE) Nru 540/2011, l-approvazzjoni tas-sustanza attiva pimetrożina tiskadi fit-30 ta' Ġunju 2019.

(4)

Ġiet ippreżentata applikazzjoni għat-tiġdid tal-approvazzjoni tal-pimetrożina skont l-Artikolu 4 tar-Regolament tal-Kummissjoni (UE) Nru 1141/2010 (5) fil-perjodu ta' żmien stipulat fl-istess Artikolu.

(5)

L-applikant ressaq id-dossiers supplimentari meħtieġa skont l-Artikolu 9 tar-Regolament tal-Kummissjoni (UE) Nru 1141/2010. L-Istat Membru relatur sab li l-applikazzjoni kienet sħiħa.

(6)

L-Istat Membru relatur ħejja rapport ta' valutazzjoni tat-tiġdid b'konsultazzjoni mal-Istat Membru korelatur u ppreżentah lill-Awtorità Ewropea dwar is-Sigurtà fl-Ikel (minn hawn 'il quddiem “l-Awtorità”) u lill-Kummissjoni fit-28 ta' Ġunju 2013.

(7)

L-Awtorità bagħtet ir-rapport ta' valutazzjoni tat-tiġdid lill-applikanti u lill-Istati Membri għall-kummenti tagħhom, u għaddiet il-kummenti li rċeviet lill-Kummissjoni. L-Awtorità qagħdet ukoll id-dossier tas-sommarju supplimentari għad-dispożizzjoni tal-pubbliku.

(8)

Fit-28 ta' Awwissu 2014, l-Awtorità bagħtet lill-Kummissjoni l-konklużjoni (6) tagħha dwar jekk jistax ikun mistenni li l-pimetrożina tissodisfa l-kriterji ta' approvazzjoni previsti fl-Artikolu 4 tar-Regolament (KE) Nru 1107/2009. L-Awtorità kkonkludiet li hemm potenzjal elevat li għall-użi rappreżentattivi vvalutati jkun hemm riżultat ta' esponiment tal-ilma ta' taħt l-art ogħla mil-limitu parametriku tal-ilma tax-xorb ta' 0,1μg/L permezz tal-metabolit tossikoloġikament rilevanti CGA371075 f'sitwazzjonijiet irrappreżentati mix-xenerji pertinenti kollha tal-ilma ta' taħt l-art. L-awtorità kkonkludiet ukoll li diversi metaboliti tossikoloġikament rilevanti oħra tal-pimetrożina wkoll mistennija li jseħħu 'l fuq minn 0,1 mg/L f'xenarji pertinenti kollha jew xi wħud minnhom taħt l-art għall-użi rappreżentattivi vvalutati. Hija kkonkludiet ukoll li l-profil tossikoloġiku tal-metaboliti inklużi fid-definizzjoni tar-residwu għall-valutazzjoni tar-riskju ta' pjanti ma setax jiġi kkonfermat u li l-valutazzjoni tar-riskju għall-organiżmi akkwatiċi mill-esponiment għall-metabolit M3MF ma setgħatx tiġi ffinalizzata għall-użi rappreżentattivi kollha li tqiesu fuq il-bażi tal-informazzjoni disponibbli fil-fajl.

(9)

Barra minn hekk, l-Awtorità kkonkludiet li l-pimetrożina kkawżat effetti negattivi fuq l-organi endokrinali fost speċijiet u skedi ta' żmien differenti. Madankollu, l-evalwazzjoni xjentifika tal-proprjetajiet potenzjali ta' tħarbit endokrinali tal-pimetrożina ma setgħetx tiġi ffinalizzata mill-Awtorità fuq il-bażi tal-informazzjoni disponibbli fid-dossier.

(10)

Il-Kummissjoni stiednet lill-applikant biex iressaq il-kummenti tiegħu dwar il-konklużjoni tal-Awtorità u, dwar l-abbozz tar-rapport ta' rieżami skont l-Artikolu 17(1) tar-Regolament (UE) Nru 1141/2010. L-applikant ippreżenta l-kummenti tiegħu, u dawn ġew eżaminati bir-reqqa.

(11)

Madankollu, minkejja l-argumenti mressqa mill-applikant, it-tħassib relatat mas-sustanza ma setax jiġi eliminat.

(12)

B'konsegwenza ta' dan, fir-rigward ta' wieħed jew iktar mill-użi rappreżentattivi ta' mill-inqas prodott wieħed għall-protezzjoni tal-pjanti ma ġiex stabbilit li l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 ġew issodisfati. Huwa għalhekk xieraq li ma tiġġeddidx l-approvazzjoni tal-pimetrożina f'konformità mal-Artikolu 20(1)(b) ta' dak ir-Regolament.

(13)

Għalhekk, ir-Regolament ta' Implimentazzjoni (UE) Nru 540/2011 jenħtieġ li jiġi emendat skont dan.

(14)

Jenħtieġ li l-Istati Membri jingħataw żmien biżżejjed biex jirtiraw l-awtorizzazzjonijiet tal-prodotti għall-protezzjoni tal-pjanti li fihom il-pimetrożina.

(15)

Rigward il-prodotti għall-protezzjoni tal-pjanti li fihom il-pimetrożina, meta l-Istati Membri jagħtu xi perjodu ta' grazzja f'konformità mal-Artikolu 46 tar-Regolament (KE) Nru 1107/2009, dan il-perjodu jenħtieġ li jiskadi sa mhux aktar tard mit-30 ta' Jannar 2020.

(16)

Ir-Regolament ta' Implimentazzjoni tal-Kummissjoni (UE) 2018/917 (7) estenda d-data ta' skadenza tal-pimetrożina sat-30 ta' Ġunju 2019 biex jippermetti li l-proċess ta' tiġdid jitlesta qabel ma tiskadi l-approvazzjoni ta' dik is-sustanza. Madankollu, billi qed tittieħed deċiżjoni qabel din id-data ta' skadenza estiża, dan ir-Regolament jenħtieġ li japplika minnufih.

(17)

Dan ir-Regolament ma jipprevenix il-preżentazzjoni ta' applikazzjoni oħra għall-approvazzjoni tal-pimetrożina skont l-Artikolu 7 tar-Regolament (KE) Nru 1107/2009.

(18)

Il-Kumitat Permanenti dwar il-Pjanti, l-Annimali, l-Ikel u l-Għalf ma tax opinjoni fil-limitu taż-żmien stabbilit mill-President tiegħu. Att ta' implimentazzjoni tqies bħala neċessarju u l-presidenza ssottomettiet l-abbozz tal-att ta' implimentazzjoni lill-kumitat tal-appell għal aktar deliberazzjoni. Il-kumitat ta' appell ma' tax opinjoni,