18.5.2018   

MT

Il-Ġurnal Uffiċjali tal-Unjoni Ewropea

L 123/85

(1)

Biex tiġi ddeterminata l-aħjar metodoloġija skont l-Artikolu 7(3) tad-Direttiva 2014/94/UE, u wara li saret sejħa għall-offerti, il-Kummissjoni talbet lill-Aġenzija tal-Enerġija Ġermaniża (dena) biex twettaq studju li jidentifika l-għażliet possibbli biex tinsab metodoloġija komuni għat-tqabbil tal-prezzijiet ta' unitajiet ta' karburanti alternattivi (2).

(2)

Fl-istudju ġew analizzati erba' għażliet prinċipali. Il-Kummissjoni qiset dawk l-għażliet kollha. Kien jidher, abbażi ta' dejta li tista' titkejjel, li l-iktar għażla komprensiva hija dik li biha l-prezzijiet tal-karburanti jingħataw bħala ammonti tal-valuta li tkun tapplika, għal kull 100 km, meta jitqies il-prezz ta' kull unità tal-karburant kif imsemmi fid-Direttiva 98/6/KE tal-Parlament Ewropew u tal-Kunsill (3) u l-konsum tal-vetturi skont kif ikun indikat fiċ-ċertifikat tal-konformità. Dik l-għażla tqis mhux biss il-kontenut ta' enerġija li jkun fih il-karburant, iżda wkoll fatturi oħra li huma rilevanti għall-prezz tal-karburant imqabbel mad-distanza li tinsaq il-vettura, b'mod partikolari l-effiċjenza fl-użu tal-enerġija tat-teknoloġiji rispettivi li jkunu marbutin mal-użu tal-karburanti diversi fil-vetturi.

(3)

Skont stħarriġ dwar it-tqabbil tal-prezzijiet tal-karburanti (4), li twettaq mill-Fédération Internationale de l'Automobile wara li saret sejħa għall-offerti, l-iktar metodoloġija li qablu magħha l-konsumaturi kienet waħda li tagħti l-prezzijiet bħala ammonti tal-valuta li tkun tapplika għal kull 100 km.

(4)

Il-metodoloġija li tintgħażel għandha tippermetti lill-utenti jagħmlu tqabbil faċli tal-aktar fatturi rilevanti, anki biex jiddeċiedu fuq il-vetturi li jkunu se jixtru. Għaldaqstant, il-metodoloġija jidher li hija l-aktar addattata biex iżżid is-sensibilizzazzjoni tal-konsumaturi u biex iżżid it-trasparenza tal-prezzijiet tal-karburanti. Hija l-iżjed waħda addattata wkoll għall-għanijiet ġenerali tad-Direttiva 2014/94/UE, li wkoll tqiset fl-Istrateġija Ewropea għal mobbiltà b'emissjonijiet baxxi (5), li ġiet adottata fil-kuntest tal-Unjoni tal-Enerġija, jiġifieri biex tikkontribwixxi lejn diversifikazzjoni tas-sorsi tal-enerġija fit-trasport u lejn it-tnaqqis ta' emissjonijiet tad-diossidu tal-karbonju (CO2) u emissjonijiet oħrajn li jniġġsu f'dan il-qasam.

(5)

Jenħtieġ li jintuża l-valur tal-konsum tal-karburant li jingħata fiċ-ċertifikati tal-konformità tal-vetturi biex jiġu kkalkulati l-prezzijiet tal-karburanti. Dan il-valur huwa bbażat fuq il-proċedura ta' ttestjar armonizzata fuq livell dinji għall-vetturi ħfief (WLTP) (6) li nbdiet minn Settembru tal-2017 għat-tipi ġodda ta' vetturi u li se tinbeda minn Settembru tal-2018 għall-vetturi l-ġodda kollha. Din il-proċedura ta' ttestjar tissostitwixxi iċ-Ċiklu l-Ġdid tas-Sewqan Ewropew (New European Drive Cycle -NEDC). Il-proċedura ta' ttestjar armonizzata fuq livell dinji għall-vetturi ħfief tipprevedi kundizzjonijiet ta' ttestjar aktar stretti u konsum ta' karburanti aktar realistiku li jibbenefikaw lill-konsumaturi. Ir-referenza għal dawn il-valuri hija konsistenti mal-informazzjoni għall-konsumaturi prevista skont id-Direttiva 1999/94/KE tal-Parlament Ewropew u tal-Kunsill (7) relatata mad-disponibilità ta' tagħrif għall-konsumatur dwar l-ekonomija tal-karburanti u emissjonijiet tad-diossidu tal-karbonju (CO2) rigward il-marketing ta' karozzi tal-passiġġieri ġodda, u minħabba r-Rakkomandazzjoni tal-Kummissjoni (UE) 2017/948 (8) wkoll.

(6)

Billi ma jingħatawx valuri tal-konsum tal-karburanti fejn għandu x'jaqsam mat-taħlitiet ta' bijokarburanti mal-petrol jew mad-diżil fiċ-ċertifikat ta' konformità tal-vetturi (9), l-Istati Membri jistgħu jużaw id-dejta li jkollhom huma biex jiddeterminaw dawn il-valuri.

(7)

Biex il-metodoloġija tkun tista' titħaddem dejjem, il-prezz tal-karburant li jrid jitqies jeħtieġ li jkun il-prezz medju tal-karburant rilevanti għal kull unità konvenzjonali għall-massimu tul l-aħħar tliet xhur tal-kalendarju qabel ma jsir il-kalkolu.

(8)

Minħabba d-diffikultajiet li jeżistu biex jintwerew it-tqabbiliet fil-pompi tal-karburanti, jeħtieġ li jiġi speċifikat li l-użu ta' din il-metodoloġija jippreżumi l-istabbiliment ta' kampjuni ta' karrozzi tal-passiġġieri li jkunu jistgħu jitqabblu, mill-inqas mil-lat tal-piż u tal-qawwa tal-magna tagħhom, iżda li jużaw karburanti differenti.

(9)

Biex ikun aktar faċli t-tqabbil ibbażat fuq il-metodoloġija stabbilita f'dan ir-Regolament, l-Istati Membri għandhom l-għażla li jużaw l-opportunitajiet li toffri d-diġitalizzazzjoni, bħalma huma l-għodod online. Dawn l-għodod jeħtieġ li jkunu jistgħu joffru l-opportunità li wieħed jikseb l-informazzjoni individwali dwar il-mudelli kollha tal-vetturi li jkun hemm fis-suq jew dwar il-biċċa l-kbira minnhom. Din l-għodda tkun toffri wkoll il-possibbiltà li tinżied informazzjoni oħra.

(10)

Il-Programm ta' Ħidma Pluriennali tal-Kummissjoni għall-assistenza finanzjarja fil-qasam tal-Faċilità Nikkollegaw l-Ewropa - fis-settur tat-Trasport għall-perjodu 2014-2020 (10) jipprevedi azzjoni li l-għan tagħha huwa li tgħin lill-Istati Membri biex jimplimentaw id-Direttiva 2014/94/UE. Skont il-Programm ta' Ħidma, b'mod notevoli l-għan huwa l-appoġġ għall-implimentazzjoni konsistenti tal-Artikolu 7(3) ta' dik id-Direttiva fl-Istati Membri kollha u l-appoġġ għall-Istati Membri biex jippubblikaw l-informazzjoni għall-konsumaturi permezz tal-għodod diġitali.

(11)

Il-miżuri previsti f'dan ir-Regolament huma skont l-opinjoni tal-kumitat stabbilit bl-Artikolu 9(1) tad-Direttiva 2014/94/UE.