(1)

Id-Direttiva tal-Kunsill 2006/112/KE (3) tistipula li l-Istati Membri jistgħu japplikaw rati mnaqqsin tat-taxxa fuq il-valur miżjud (VAT) għall-pubblikazzjonijiet fuq kwalunkwe mezz fiżiku ta' appoġġ. Madankollu, rata mnaqqsa tal-VAT ma tistax tiġi applikata għall-pubblikazzjonijiet ipprovduti elettronikament, li jridu jiġu ntaxxati bir-rata tal-VAT standard.

(2)

Bi qbil mal-komunikazzjoni tal-Kummissjoni tas-6 ta' Mejju 2015 dwar Strateġija għal Suq Uniku Diġitali għall-Ewropea u biex jibqgħu aġġornati mal-progress teknoloġiku fl-ekonomija diġitali, l-Istati Membri għandhom jingħataw il-fakultà li jallinjaw ir-rati tal-VAT fuq il-pubblikazzjonijiet ipprovduti elettronikament b'rati tal-VAT aktar baxxi fuq il-pubblikazzjonijiet fuq kwalunkwe mezz fiżiku ta' appoġġ.

(3)

Fil-komunikazzjoni tagħha tas-7 ta' April 2016 dwar pjan ta' azzjoni dwar il-VAT, il-Kummissjoni spjegat li l-pubblikazzjonijiet ipprovduti elettronikament għandhom ikunu jistgħu jibbenefikaw mill-istess trattament ta' rata tal-VAT preferenzjali bħall-pubblikazzjonijiet li huma pprovduti fuq mezz fiżiku ta' appoġġ. Fid-deċiżjoni reċenti tagħha fil-kawża C-390/15 (4), il-Qorti tal-Ġustizzja kkunsidrat li l-provvista ta' pubblikazzjonijiet diġitali fuq mezz fiżiku ta' appoġġ u l-provvista ta' pubblikazzjonijiet diġitali elettronikament jikkostitwixxu sitwazzjonijiet komparabbli. Għaldaqstant, ikun xieraq li tiġi introdotta l-possibbiltà għall-Istati Membri kollha li japplikaw rata mnaqqsa ta' VAT għall-provvista ta' kotba, gazzetti u perjodiċi, irrispettivament minn jekk dawn jiġux ipprovduti fuq mezz fiżiku ta' appoġġ jew elettronikament. Għall-istess raġunijiet, huwa xieraq li dawk l-Istati Membri li, f'konformità mal-liġi tal-Unjoni, attwalment japplikaw rati ta' VAT aktar baxxi mill-minimu stabbilit fl-Artikolu 99 tad-Direttiva 2006/112 jew li jagħtu eżenzjonijiet bil-possibbiltà tat-tnaqqis tal-VAT li tkun tħallset fl-istadju preċedenti għal ċerti kotba, gazzetti jew perjodiċi pprovduti fuq mezz fiżiku ta' appoġġ, ikunu jistgħu japplikaw l-istess trattament tal-VAT għal dawn il-kotba, gazzetti jew perjodiċi meta jiġu pprovduti elettronikament.

(4)

Mill-1 ta' Jannar 2015, il-VAT fuq is-servizzi kollha pprovduti elettronikament ġiet imposta fl-Istat Membru fejn ikun ibbażat il-klijent. Bl-implimentazzjoni tal-prinċipju ibbażat fuq id-destinazzjoni, ma għadx hemm il-bżonn li tiġi applikata r-rata standard għall-pubblikazzjonijiet ipprovduti elettronikament sabiex jiġi żgurat l-istabbiliment u l-funzjonament tas-suq intern u biex tiġi evitata d-distorsjoni tal-kompetizzjoni.

(5)

Sabiex jevitaw l-użu estensiv ta' rati tal-VAT imnaqqsin fuq il-kontenut awdjoviżiv, l-Istati Membri għandhom jingħataw il-fakultà li japplikaw rata mnaqqsa għall-kotba, għall-gazzetti u għall-perjodiċi biss jekk dawk il-pubblikazzjonijiet, iirispettivament mill-fatt li ġew ipprovduti fuq mezz fiżiku ta' appoġġ jew elettronikament, ma jikkonsistux kompletament jew b'mod predominanti minn kontenut ta' mużika jew ta' vidjo.

(6)

Jenħtieġ li l-Istati Membri jżommu d-diskrezzjoni li jiffissaw ir-rati tal-VAT għall-pubblikazzjonijiet u jirrestrinġu l-kamp ta' applikazzjoni tar-rati mnaqqsa tal-VAT, inkluż, soġġett għal ġustifikazzjoni oġġettiva, meta l-pubblikazzjonijiet diġitali joffru l-istess kontenut għall-qari.

(7)

Minħabba li l-għan ta' din id-Direttiva, jiġifieri li l-Istati Membri jkunu jistgħu japplikaw l-istess rati ta' VAT għall-pubblikazzjonijiet ipprovduti elettronikament bħar-rati tal-VAT li qed japplikaw attwalment għal pubblikazzjonijiet fuq kwalunkwe mezz fiżiku ta' appoġġ, ma jistax jinkiseb b'mod suffiċjenti mill-Istati Membri, iżda jista' jinkiseb aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta' sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju ta' proporzjonalità, kif stabbilit f'dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkiseb dak l-għan.

(8)

Għalhekk, jenħtieġ li d-Direttiva 2006/112/KE tiġi emendata skont dan,