(1)

Permezz tad-Deċiżjoni tal-Kunsill 2006/42/KE (2) il-Latvja ġiet awtorizzata sal-31 ta' Diċembru 2009 biex tapplika miżura speċjali ta' deroga mill-Artikolu 21(1)(a) tad-Direttiva 77/388/KEE (3), biex tinnomina lir-riċevitur bħala l-persuna responsabbli li tħallas it-taxxa fuq il-valur miżjud (VAT) fil-każ ta' tranżazzjonijiet tal-injam. Permezz tad-Deċiżjoni ta' Implimentazzjoni tal-Kunsill 2009/1008/UE (4), il-Latvja kienet awtorizzata sal-31 ta' Diċembru 2012 biex tapplika miżura speċjali ta deroga mill-Artikolu 193 tad-Direttiva 2006/112/KE sabiex tkompli tinnomina lir-riċevitur bħala l-persuna responsabbli biex tħallas il-VAT fil-każ ta' tranżazzjonijiet tal-injam (“il-miżura speċjali”). L-awtorizzazzjoni biex tiġi applikata l-miżura speċjali ġiet sussegwentement estiża bid-Deċiżjoni ta' Implimentazzjoni tal-Kunsill 2013/55/UE (5) sal-31 ta' Diċembru 2015 u bid-Deċiżjoni ta' Implimentazzjoni tal-Kunsill (UE) 2015/2396 (6) sal-31 ta' Diċembru 2018.

(2)

Permezz ta' ittra rreġistrata mal-Kummissjoni fl-20 ta' Ġunju 2018, il-Latvja talbet l-awtorizzazzjoni biex tkompli tapplika l-miżura speċjali. Permezz ta' ittra rreġistrata mal-Kummissjoni fis-17 ta' Awwissu 2018, il-Latvja ppreżentat rapport dwar l-applikazzjoni tal-miżura kif meħtieġ mit-tieni paragrafu tal-Artikolu 2 tad-Deċiżjoni ta' Implimentazzjoni 2009/1008/UE.

(3)

B'konformità mat-tieni subparagrafu tal-Artikolu 395(2) tad-Direttiva 2006/112/KE, il-Kummissjoni bagħtet it-talba magħmula mill-Latvja lill-Istati Membri l-oħra, permezz tal-ittri datati s-7 ta' Settembru 2018. Bl-ittra tal-10 ta' Settembru 2018, il-Kummissjoni nnotifikat lil-Latvja li hija kellha l-informazzjoni kollha meħtieġa biex tqis it-talba.

(4)

Skont il-Latvja, is-suq tal-injam, li huwa wieħed mill-aktar setturi importanti tal-ekonomija tagħha, huwa partikolarment sensittiv għall-frodi tal-VAT għaliex huwa ddominat minn għadd kbir ta' operaturi lokali żgħar u minn fornituri individwali. In-natura tas-suq u tan-negozji involuti ġġenerat frodi tal-VAT, li l-awtoritajiet tat-taxxa Latvjani sabuha diffiċli biex jikkontrollaw. Sabiex jiġġieldu dan l-abbuż, huma introduċew il-mekkaniżmu tar-reverse charge għat-tranżazzjonijiet tal-injam, li wera li huwa effettiv ferm u naqqas b'mod sinifikanti l-frodi f'dan is-settur.

(5)

Sabiex jiġu evitati ċerti forom ta' evażjoni tat-taxxa, il-Latvja jenħtieġ li tkun awtorizzata li tapplika l-miżura speċjali għal perjodu ta' żmien limitat ulterjuri sal-31 ta' Diċembru 2021.

(6)

B'mod ġenerali, id-derogi jiġu awtorizzati għal perjodu ta' żmien limitat biex ikun jista' jiġi vvalutat jekk il-miżuri speċjali humiex xierqa u effettivi. Id-derogi jagħtu żmien lill-Istati Membri biex jintroduċu miżuri konvenzjonali oħra biex jindirizzaw il-problema inkwistjoni sakemm jiskadu l-miżuri speċjali, u b'hekk l-estensjoni ta' deroga ma tibqax valida. Deroga li tippermetti li jsir użu mill-mekkaniżmu tar-reverse charge tingħata biss eċċezzjonalment għal oqsma speċifiċi fejn isir frodi u tikkostitwixxi mezz tal-aħħar għażla. Għaldaqstant, il-Latvja jenħtieġ li timplimenta miżuri konvenzjonali oħra biex tiġġieled u tipprevjeni l-frodi tal-VAT fir-rigward ta' provvisti tal-injam sal-iskadenza tad-deroga speċjali u konsegwentement ma hemmx għalfejn tkompli tidderoga mill-Artikolu 193 tad-Direttiva 2006/112/KE fir-rigward ta' tali provvisti.

(7)

Il-miżura speċjali mhu ser ikollha l-ebda impatt negattiv fuq ir-riżorsi proprji tal-Unjoni li jirriżultaw mill-VAT.

(8)

Għaldaqstant, jenħtieġ li d-Deċiżjoni ta' Implimentazzjoni 2009/1008/UE tiġi emendata skont dan,