This document is an excerpt from the EUR-Lex website
Document 32018D0491
Commission Implementing Decision (EU) 2018/491 of 21 March 2018 on the compliance of the joint proposal submitted by the Member States concerned for the extension of the North Sea Mediterranean rail freight corridor with Article 5 of Regulation (EU) No 913/2010 of the European Parliament and of the Council (notified under document C(2018) 1634)
Deċiżjoni ta' Implimentazzjoni tal-Kummissjoni (UE) 2018/491 tal-21 ta' Marzu 2018 dwar il-konformità tal-proposta konġunta mressqa mill-Istati Membri kkonċernati għall-estensjoni tal-kuritur ferrovjarju tal-merkanzija bejn il-Baħar tat-Tramuntana u l-Mediterran mal-Artikolu 5 tar-Regolament (UE) Nru 913/2010 tal-Parlament Ewropew u tal-Kunsill (notifikata bid-dokument C(2018) 1634)
Deċiżjoni ta' Implimentazzjoni tal-Kummissjoni (UE) 2018/491 tal-21 ta' Marzu 2018 dwar il-konformità tal-proposta konġunta mressqa mill-Istati Membri kkonċernati għall-estensjoni tal-kuritur ferrovjarju tal-merkanzija bejn il-Baħar tat-Tramuntana u l-Mediterran mal-Artikolu 5 tar-Regolament (UE) Nru 913/2010 tal-Parlament Ewropew u tal-Kunsill (notifikata bid-dokument C(2018) 1634)
C/2018/1634
ĠU L 81, 23.3.2018, p. 23–24
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
23.3.2018 |
MT |
Il-Ġurnal Uffiċjali tal-Unjoni Ewropea |
L 81/23 |
DEĊIŻJONI TA' IMPLIMENTAZZJONI TAL-KUMMISSJONI (UE) 2018/491
tal-21 ta' Marzu 2018
dwar il-konformità tal-proposta konġunta mressqa mill-Istati Membri kkonċernati għall-estensjoni tal-kuritur ferrovjarju tal-merkanzija bejn il-Baħar tat-Tramuntana u l-Mediterran mal-Artikolu 5 tar-Regolament (UE) Nru 913/2010 tal-Parlament Ewropew u tal-Kunsill
(notifikata bid-dokument C(2018) 1634)
(It-testi bil-Franċiż, bl-Ingliż u bl-Olandiż biss huma awtentiċi)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 913/2010 tal-Parlament Ewropew u tal-Kunsill tat-22 ta' Settembru 2010 dwar netwerk ferrovjarju Ewropew għat-trasport ta' merkanzija kompetittiv (1), u b'mod partikolari l-Artikolu 5(6) tiegħu,
Billi:
(1) |
Skont l-Artikolu 5(5) tar-Regolament (UE) Nru 913/2010, il-ministeri responsabbli għat-trasport ferrovjarju fil-Belġju, fi Franza, fil-Lussemburgu, fin-Netherlands u fir-Renju Unit bagħtu ittra ta' intenzjoni lill-Kummissjoni, li waslet fl-14 ta' Ġunju 2017. L-ittra ta' intenzjoni ġiet iffirmata wkoll mill-Iżvizzera, li diġà qiegħda tipparteċipa bħala pajjiż terz f'dan il-kuritur ferrovjarju tal-merkanzija abbażi tal-Anness tar-Regolament (UE) Nru 913/2010. L-ittra tinkludi proposta biex jiġi estiż il-kuritur ferrovjarju tal-merkanzija bejn il-Baħar tat-Tramuntana u l-Mediterran għal Ġinevra. |
(2) |
Il-Kummissjoni eżaminat il-proposta inkluża fl-ittra ta' intenzjoni skont l-Artikolu 5(6) tar-Regolament (UE) Nru 913/2010 u tqis li l-proposta hija konformi mal-Artikolu 5 ta' dak ir-Regolament għar-raġunijiet stipulati hawn taħt. |
(3) |
Il-proposta tqis il-kriterji stipulati fl-Artikolu 4 tar-Regolament (UE) Nru 913/2010. L-għadd totali ta' pajjiżi parteċipanti fil-kuritur jibqa' sitta, u ħamsa minnhom huma Stati Membri tal-Unjoni. L-allinjament ġenerali tal-kuritur mal-Kuritur tan-Netwerk Ewlieni bejn il-Baħar tat-Tramuntana u l-Mediterran jibqa' l-istess. L-estensjoni proposta hija konsistenti man-netwerk TEN-T u hija konformi mar-rekwiżiti tat-TEN-T li ġejjin: elettrifikazzjoni sħiħa tal-binarji tal-linja, mill-inqas 22,5 tunnellata ta' tagħbija fuq il-fus, veloċità tal-linja ta' 100 km fis-siegħa u l-possibbiltà li joperaw ferroviji b'tul ta' 740 metru. |
(4) |
L-istudju tas-suq tat-trasport inkluż fl-ittra ta' intenzjoni jindika li l-estensjoni hija mistennija twassal għal volumi addizzjonali ta' trasport ferrovjarju internazzjonali u toħloq bidla modali mit-triq għall-ferrovija billi tipprovdi rotta iqsar mill-portijiet marittimi Franċiżi tal-Baħar Mediterran u lejhom, għal prodotti u materja prima li jidħlu l-Iżvizzera jew li joħorġu minnha, li twassal għal benefiċċji soċjoekonomiċi sinifikanti billi jitnaqqsu l-emissjonijiet tal-karbonju u l-konġestjoni fit-toroq. |
(5) |
L-estensjoni proposta hija konsistenti mal-għan li jitwaqqaf netwerk ferrovjarju Ewropew għall-merkanzija kompetittiva. L-estensjoni se tgħaqqad is-setturi ekonomiċi ewlenin miż-żona ta' Ġinevra mal-portijiet marittmi Ewropej importanti bħal Amsterdam, Antwerp, Dunkirk, Marsilja, Rotterdam u Zeebrugge, u għaldaqstant issaħħaħ l-interkonnessjoni tan-netwerk TEN-T mal-Iżvizzera, pajjiż terz ewlieni. |
(6) |
Il-maniġers tal-infrastruttura u l-applikanti kkonċernati ġew ikkonsultati dwar din l-estensjoni skont l-Artikolu 5(5) tar-Regolament (UE) Nru 913/2010. |
(7) |
Il-miżuri previsti f'din id-Deċiżjoni huma konformi mal-opinjoni tal-Kumitat stabbilit skont l-Artikolu 21 tar-Regolament (UE) Nru 913/2010, |
ADOTTAT DIN ID-DEĊIŻJONI:
Artikolu 1
Il-proposta dwar l-estensjoni tal-kuritur ferrovjarju tal-merkanzija bejn il-Baħar tat-Tramuntana u l-Mediterran lejn Ġinevra, inkluża fl-ittra ta' intenzjoni li waslet fl-14 ta' Ġunju 2017, mibgħuta b'mod konġunt lill-Kummissjoni mill-ministeri responsabbli għat-trasport ferrovjarju fil-Belġju, fi Franza, fil-Lussemburgu, fin-Netherlands, fir-Renju Unit u fl-Iżvizzera, hija konformi mal-Artikolu 5 tar-Regolament (UE) Nru 913/2010.
Artikolu 2
Din id-Deċiżjoni hija indirizzata lir-Renju tal-Belġju, lir-Repubblika Franċiża, lill-Gran Dukat tal-Lussemburgu, lir-Renju tan-Netherlands, lir-Renju Unit tal-Gran Brittanja u l-Irlanda ta' Fuq u lill-Konfederazzjoni Żvizzera.
Magħmul fi Brussell, il-21 ta' Marzu 2018.
Għall-Kummissjoni
Violeta BULC
Membru tal-Kummissjoni
(1) ĠU L 276, 20.10.2010, p. 22.