31.10.2017   

MT

Il-Ġurnal Uffiċjali tal-Unjoni Ewropea

L 281/21

(1)

Sabiex tiġi mħarsa s-saħħa tal-pubbliku u dik tal-annimali, il-prodotti mill-Unjoni li jiġu ttrasferiti bil-ħażna jew mingħajrha minn pajjiżi terzi, huma meqjusa bħala li m'għadhomx konformi mar-rekwiżiti għal dawk il-prodotti stipulati fil-leġiżlazzjoni tal-Unjoni. Għaldaqstant, id-Direttiva tal-Kunsill 97/78/KE (3) tistipula li l-Istati Membri huma obbligati li jiżguraw li l-verifiki veterinarji jitwettqu fuq il-kunsinni ta' dawn il-prodotti introdotti fl-Unjoni minn pajjiżi terzi.

(2)

Ir-Regolament (KE) Nru 853/2004 jistipula regoli speċifiċi dwar l-iġjene tal-ikel li joriġina mill-annimali għall-operaturi fin-negozju tal-ikel, inklużi regoli għall-prodotti tas-sajd. Barra minn hekk, ir-Regolament (KE) Nru 854/2004 jistabbilixxi regoli għal verifiki uffiċjali li jridu jitwettqu fuq prodotti li joriġinaw mill-annimali maħsuba għall-konsum uman. Ir-Regolament (KE) Nru 854/2004 jistipula li għandu jkun hemm dokument li jissodisfa ċerti rekwiżiti li jakkumpanja l-kunsinni ta' prodotti li joriġinaw mill-annimali meta jidħlu fl-Unjoni u għandu jkun hemm kontrolli uffiċjali ta' dawk il-prodotti skont ir-Regolament.

(3)

Ir-Regolament tal-Kummissjoni (KE) Nru 2074/2005 (4) jistabbilixxi mudelli taċ-ċertifikati tas-saħħa u dokumenti għall-importazzjonijiet ta' ċerti prodotti li joriġinaw mill-annimali għall-għanijiet tar-Regolamenti (KE) Nru 853/2004 u (KE) Nru 854/2004, inkluż wieħed għall-importazzjonijiet ta' prodotti tas-sajd fl-Anness VI tiegħu.

(4)

L-Istati Membri u l-organizzazzjonijiet tal-partijiet ikkonċernati talbu lill-Kummissjoni biex tistabbilixxi mudell ta' ċertifikat tas-saħħa għal kunsinni ta' prodotti tas-sajd maħsuba għall-konsum uman maqbuda minn bastimenti li jtajjru l-bandiera ta' Stat Membru u li qed jiġu ttrasferiti f'pajjiżi terzi, bil-ħażna jew mingħajrha, li jrid jiġi ffirmat mill-awtorità kompetenti fil-pajjiż terz sabiex tiġi armonizzata l-informazzjoni li għandha tiġi pprovduta meta dawn il-kunsinni jkunu dieħlin fit-territorju tal-Unjoni.

(5)

Il-mudell taċ-ċertifikat tas-saħħa għandu jirreferi speċifikament għad-dispożizzjonijiet rilevanti dwar l-iżbark, il-ħatt u l-ħażna tal-prodotti tal-ħut stabbiliti fil-Kapitoli II u VII tat-Taqsima VIII tal-Anness III tar-Regolament (KE) Nru 853/2004.

(6)

Il-mudell taċ-ċertifikat tas-saħħa għandu jkun ukoll kompatibbli biex jintuża mas-sistema kompjuterizzata veterinarja integrata (TRACES) (5) użata għall-iskambju ta' ċertifikati tas-saħħa bejn il-pajjiżi terzi u l-Istati Membri.

(7)

Huwa għalhekk xieraq li jiġi stabbilit mudell armonizzat ta' ċertifikat tas-saħħa li għandu jiġi ffirmat mill-awtorità kompetenti fil-pajjiż terz minn fejn il-prodotti tas-sajd jiġu ttrasferiti, qabel ma jintbagħtu lejn l-Unjoni.

(8)

Ir-Regolament (KE) Nru 2074/2005 għandu jiġi emendat skont dan.

(9)

Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(a)

Jiddaħħal l-Artikolu 6c li ġej:

“Artikolu 6c

Rekwiżiti li jikkonċernaw il-verifiki uffiċjali fuq prodotti tas-sajd maqbuda minn bastimenti li jtajjru l-bandiera ta' Stati Membri li jidħlu fl-Unjoni wara li jiġu trasferiti f'pajjiżi terzi bil-ħażna jew mingħajrha

1.   Prodotti tas-sajd maħsuba għall-konsum uman maqbuda minn bastimenti li jtajjru l-bandiera ta' Stat Membru, mhux imħatta, bil-ħażna jew mingħajrha, f'pajjiżi terzi qabel ma jidħlu fl-Unjoni permezz ta' mezz differenti ta' trasport, iridu jkunu akkompanjati b'ċertifikat tas-saħħa maħruġ mill-awtorità kompetenti ta' dak il-pajjiż terz u mimli skont il-mudell taċ-ċertifikat tas-saħħa stipulat fl-Appendiċi VIII tal-Anness VI.

2.   Il-pajjiż terz fejn it-trasferiment iseħħ irid ikun elenkat kif previst fl-Artikolu 11(1) tar-Regolament (KE) Nru 854/2004.

3.   Jekk il-prodotti tas-sajd imsemmija fil-paragrafu 1 jinħattu u jiġu ttrasportati lejn faċilità ta' ħażna li tkun tinsab fil-pajjiż terz imsemmi f'dak il-paragrafu, dik il-faċilità tal-ħażna għandha tidher f'lista kif previst fl-Artikolu 12 tar-Regolament (KE) Nru 854/2004.

4.   Jekk il-prodotti tas-sajd imsemmija fil-paragrafu 1 jitgħabbew fuq bastiment li jtajjar il-bandiera ta' pajjiż terz, dak il-pajjiż terz irid ikun elenkat kif previst fl-Artikolu 11(1) tar-Regolament (KE) Nru 854/2004 u l-bastiment irid jidher f'lista kif previst fl-Artikolu 12 tar-Regolament (KE) Nru 854/2004.

Il-bastimenti tal-kontejners użati għat-trasport ta' prodotti tas-sajd ikkontejnerizzati huma esklużi minn dan ir-rekwiżit”.

(b)

L-Anness VI huwa emendat skont l-Anness ta' dan ir-Regolament.