31.10.2017   

MT

Il-Ġurnal Uffiċjali tal-Unjoni Ewropea

L 281/1

(1)

Ir-Regolament (UE) Nru 1380/2013 tal-Parlament Ewropew u tal-Kunsill (1) jesiġi li jiġu adottati miżuri ta' konservazzjoni filwaqt li jitqiesu l-pariri xjentifiċi, tekniċi u ekonomiċi disponibbli, inkluż, fejn rilevanti, rapporti mfassla mill-Kumitat Xjentifiku, Tekniku u Ekonomiku għas-Sajd u minn korpi konsultattivi oħra, kif ukoll fid-dawl ta' kwalunkwe parir mogħti minn Kunsilli Konsultattivi stabbiliti għaż-żoni ġeografiċi jew oqsma ta' kompetenza rilevanti u rakkomandazzjonijiet konġunti li jsiru mill-Istati Membri.

(2)

Il-Kunsill għandu r-responsabbiltà li jadotta miżuri dwar l-iffissar u l-allokazzjoni tal-opportunitajiet tas-sajd, inkluż ċerti kondizzjonijiet li huma marbutin magħhom b'mod funzjonali, skont il-każ. L-opportunitajiet tas-sajd jenħtieġ li jiġu allokati lill-Istati Membri b'mod li tiġi żgurata l-istabbiltà relattiva tal-attivitajiet tas-sajd ta' kull Stat Membru għal kull stokk ta' ħut jew attività tas-sajd filwaqt li jitqiesu kif xieraq l-għanijiet tal-Politika Komuni tas-Sajd (PKS) stipulati fir-Regolament (UE) Nru 1380/2013.

(3)

Ir-Regolament (UE) Nru 1380/2013 jipprevedi li l-għan tal-PKS ikun li tintlaħaq ir-rata ta' sfruttament tar-rendiment massimu sostenibbli (MSY) sal-2015 sa fejn possibbli u, fuq bażi progressiva u inkrementali sa mhux aktar tard mill-2020 għal kull stokk.

(4)

Għalhekk, il-qabdiet totali permissibbli (TACs) jenħtieġ li jiġu stabbiliti, f'konformità mar-Regolament (UE) Nru 1380/2013, abbażi tal-pariri xjentifiċi disponibbli, b'kont meħud tal-aspetti bijoloġiċi u soċjoekonomiċi filwaqt li jiġi żgurat trattament ġust bejn is-setturi tas-sajd, kif ukoll wara li jiġu kkunsidrati l-opinjonijiet espressi matul il-konsultazzjoni mal-partijiet ikkonċernati.

(5)

Ir-Regolament (UE) 2016/1139 tal-Parlament Ewropew u tal-Kunsill (2) jistabbilixxi pjan pluriennali għall-istokkijiet tal-bakkaljaw, l-aringi u l-laċċ ikħal fil-Baħar Baltiku u għas-sajd li jisfrutta dawk l-istokkijiet (“il-pjan”). Il-pjan għandu l-għan li jiżgura li l-isfruttament tar-riżorsi bijoloġiċi ħajjin tal-baħar ireġġa' lura u jżomm lill-popolazzjonijiet tal-ispeċijiet maqbuda f'livelli ogħla minn dawk li jistgħu jipproduċu l-MSY. Għal dak il-għan, il-mortalità mis-sajd fil-mira għall-istokkijiet ikkonċernati, espressa f'meded, għandha tintlaħaq kemm jista' jkun malajr u, fuq bażi progressiva u inkrementali, sal-2020. Huwa xieraq li l-limiti ta' qbid applikabbli fl-2018 għall-istokkijiet tal-bakkaljaw, l-aringi u l-laċċ ikħal fil-Baħar Baltiku jiġu stabbiliti bil-ħsieb li jintlaħqu l-għanijiet tal-pjan.

(6)

Skont il-pjan, meta l-parir xjentifiku jindika li l-bijomassa riproduttiva tal-istokk ta' kwalunkwe stokk ikkonċernat tkun taħt il-punti ta' referenza tal-bijomassa riproduttiva tal-istokk stipulati fl-Anness II tar-Regolament (UE) 2016/1139, kull miżura ta' rimedju xierqa għandha tiġi adottata sabiex jiġi żgurat li l-istokk ikkonċernat jitreġġa' lura malajr għal livelli ogħla minn dak li jista' jipproduċi l-MSY. Il-Kunsill Internazzjonali għall-Esplorazzjoni tal-Baħar (ICES) indika li l-bijomassa tal-bakkaljaw tal-Baltiku tal-Punent (Gadus morhua) u tal-aringi tal-Baltiku tal-Punent (Clupea harengus) hija anqas mill-punti ta' referenza dwar konservazzjoni stipulati fl-Anness II ta' dak ir-Regolament. Konsegwentement, huwa xieraq li l-opportunitajiet ta' sajd għall-bakkaljaw tal-Baltiku tal-Punent u għall-aringi tal-Baltiku tal-Punent jiġu stabbiliti taħt il-medda tal-mortalità mis-sajd fl-Anness I, kolonna B, tar-Regolament (UE) 2016/1139, f'livell li jqis it-tnaqqis tal-bijomassa. Għal dak l-għan, huwa neċessarju li jitqiesu l-iskeda ta' żmien għall-kisba tal-għanijiet tal-PKS u tal-pjan, partikolarment minħabba l-effett mistenni tal-miżuri ta' rimedju meħuda, filwaqt li fl-istess ħin iżommu mal-għanijiet tal-ksib tal-benefiċċji ekonomiċi, soċjali u ta' impjieg, kif stipulati fl-Artikolu 2 tar-Regolament (UE) Nru 1380/2013.

(7)

Fir-rigward tal-bakkaljaw tal-Baltiku tal-Punent, jenħtieġ li jittieħdu miżuri ta' rimedju ulterjuri. Iż-żamma tal-perijodu ta' għeluq ta' tmien ġimgħat applikabbli bħalissa tkompli tipprovdi protezzjoni għall-aggregazzjonijiet riproduttivi tal-bakkaljaw. Skont il-parir xjentifiku, is-sajd rikreattiv tal-bakkaljaw tal-Baltiku tal-Punent jikkontribwixxi b'mod sinifikanti għall-mortalità mis-sajd globali ta' dak l-istokk. Filwaqt li jitqies l-istat attwali ta' dak l-istokk, huwa xieraq li jinżammu ċerti miżuri li huma applikabbli bħalissa dwar is-sajd rikreattiv. Jenħtieġ li japplika limitu tal-qabda ta' kuljum għal kull sajjied, u li dak il-limitu jkun aktar restrittiv matul żmien ir-riproduzzjoni tal-ħut. Dak huwa mingħajr preġudizzju għall-prinċipju tal-istabbiltà relattiva applikabbli għall-attivitajiet ta' sajd kummerċjali.

(8)

Fir-rigward tal-bakkaljaw tal-Baltiku tal-Lvant (Gadus morhua), minħabba bidliet fil-bijoloġija tiegħu, l-ICES ma setax jistabbilixxi punti ta' referenza bijoloġiċi. Huwa xieraq, għalhekk, li sabiex jingħata kontribut għall-kisba tal-għanijiet tal-pjan, it-TAC għall-bakkaljaw tal-Baltiku tal-Lvant jiġi ffissat f'konformità mal-approċċ prekawzjonarju kif stabbilit fl-Artikolu 9(2) tar-Regolament (UE) Nru 1380/2013. Barra minn hekk, jenħtieġ li jiġi introdott perijodu ta' għeluq ta' tmien ġimgħat biex tingħata protezzjoni għall-aggregazzjonijiet riproduttivi tal-bakkaljaw tal-Baltiku tal-Lvant fis-sottodiviżjonijiet 25-26.

(9)

Barra minn hekk, jekk bastimenti ta' tul totali ta' anqas minn 12-il metru jitħallew jistadu f'żoni fejn il-fond tal-ilma hu anqas minn 20 metru, ikun possibbli li għadd limitat ta' sajjieda jkunu jkomplu l-operazzjonijiet ta' sajd tagħhom u jkollhom fil-mira speċijiet oħrajn għajr il-bakkaljaw. Għaldaqstant huwa proporzjonat li bastimenti ta' tul totali ta' anqas minn 12-il metru jingħataw id-dritt li jistadu f'żoni fejn il-fond tal-ilma hu anqas minn 20 metru.

(10)

Fir-rigward tal-aringa tal-Golf tal-Bothnia, l-ICES wettaq valutazzjoni tal-istokk bl-użu tal-iktar data reċenti u l-iktar informazzjoni aġġornata u rreveda l-meded ta' mortalità mis-sajd li jikkorrispondu għall-MSY. Filwaqt li hemm diskrepanza fil-meded ta' mortalità mis-sajd stabbilita fil-parir xjentifiku u fil-pjan, li kienet ibbażata wkoll fuq l-aħjar pariri xjentifiċi disponibbli fiż-żmien tal-adozzjoni tagħha, il-pjan huwa legalment vinkolanti u fis-seħħ u għalhekk jenħtieġ li jiġi segwit għall-iffissar tal-opportunitajiet tas-sajd għal dak l-istokk. Billi l-bijomassa riproduttiva tal-istokk ta' dak l-istokk hija ogħla mill-punt ta' referenza tal-bijomassa stipulat fil-kolonna A tal-Anness II għar-Regolament (UE) 2016/1139, huwa xieraq li t-TAC tiġi ffissata skont il-meded ta' mortalità mis-sajd stipulati fil-kolonna B tal-Anness I ta' dak ir-Regolament sabiex jiġu limitati l-varjazzjonijiet fl-opportunitajiet tas-sajd bejn snin konsekuttivi skont il-punt (c) tal-Artikolu 4(4) ta' dak ir-Regolament. Barra minn hekk, TAC għal dak l-istokk issa tkopri s-sottodiviżjonijiet 30 u 31. Peress li l-pjan ma jiddefinixxix medda għas-sottodiviżjoni 31, jiġi applikat l-approċċ tal-MSY fir-rigward ta' dik iż-sottodiviżjoni f'konformità mal-parir xjentifiku.

(11)

L-użu tal-opportunitajiet tas-sajd stipulati f'dan ir-Regolament huwa soġġett għar-Regolament tal-Kunsill (KE) Nru 1224/2009 (3), u b'mod partikolari għall-Artikoli 33 u 34 tiegħu li jikkonċernaw id-dokumentazzjoni tal-qabdiet u l-isforz tas-sajd, u għat-trażmissjoni tad-data dwar l-eżawriment tal-opportunitajiet tas-sajd lill-Kummissjoni. Għalhekk, jenħtieġ li dan ir-Regolament jispeċifika l-kodiċijiet marbuta mal-ħatt l-art tal-istokkijiet soġġetti għal dan ir-Regolament li għandhom jintużaw mill-Istati Membri meta jibagħtu d-data lill-Kummissjoni.

(12)

Ir-Regolament tal-Kunsill (KE) Nru 847/96 (4) introduċa kondizzjonijiet addizzjonali għal tmexxija minn sena għal sena tat-TACs inkluż, skont l-Artikoli 3 u 4, dispożizzjonijiet dwar il-flessibbiltà għat-TACs prekawzjonarji u analitiċi. Skont l-Artikolu 2 ta' dak ir-Regolament, meta jiġu stabbiliti t-TACs, il-Kunsill irid jiddeċiedi liema huma l-istokkijiet li għalihom ma għandux japplika l-Artikolu 3 jew 4, b'mod partikolari abbażi tal-istatus bijoloġiku tal-istokkijiet. Aktar reċentement, permezz tal-Artikolu 15(9) tar-Regolament (UE) Nru 1380/2013iddaħħal il-mekkaniżmu ta' flessibbiltà minn sena għal sena għall-istokkijiet kollha li huma soġġetti għall-obbligu ta' ħatt l-art. Għalhekk, sabiex tiġi evitata flessibilità eċċessiva li ddgħajjef il-prinċipju ta' sfruttament razzjonali u responsabbli tar-riżorsi bijoloġiċi tal-baħar ħajjin, ixxekkel il-kisba tal-miri tal-PKS u twassal biex tmur għall-agħar il-qagħda bijoloġika tal-istokkijiet, jenħtieġ li l-Artikoli 3 u 4 tar-Regolament (KE) Nru 847/96 japplikaw għat-TACs analitiċi biss meta l-flessibilità minn sena għal sena prevista fl-Artikolu 15(9) tar-Regolament (UE) Nru 1380/2013 ma tintużax.

(13)

Abbażi ta' parir xjentifiku ġdid, jenħtieġ li tiġi stabbilita TAC preliminari għall-merluzz tan-Norveġja fiż-żona 3a tal-ICES u fl-ilmijiet tal-Unjoni taż-żona 2a u s-subżona 4 tal-ICES għall-perijodu mill-1 ta' Novembru 2017 sal-31 ta' Ottubru 2018. Għalhekk jenħtieġ li r-Regolament tal-Kunsill (UE) 2017/127 (5) jiġi emendat skont dan.

(14)

Sabiex tiġi evitata l-interruzzjoni tal-attivitajiet tas-sajd u jiġi żgurat l-għajxien tas-sajjieda tal-Unjoni, jenħtieġ li dan ir-Regolament japplika mill-1 ta' Jannar 2018. Madankollu, jenħtieġ li dan ir-Regolament japplika għall-merluzz tan-Norveġja mill-1 ta' Novembru 2017. Għal raġunijiet ta' urġenza, jenħtieġ li dan ir-Regolament jidħol fis-seħħ immedjatament wara l-pubblikazzjoni tiegħu,

(1)

“sottodiviżjoni” tfisser sottodiviżjoni tal-ICES tal-Baħar Baltiku kif iddefinita fl-Anness I għar-Regolament tal-Kunsill (KE) Nru 2187/2005 (6);

(2)

“qabda totali permissibbli” (TAC) tfisser il-kwantità ta' kull stokk li tista' tinqabad fuq perijodu ta' sena;

(3)

“kwota” tfisser proporzjon mit-TAC allokata lill-Unjoni, lil Stat Membru jew lil pajjiż terz;

(4)

“sajd rikreattiv” tfisser attivitajiet tas-sajd mhux kummerċjali li jisfruttaw ir-riżorsi bijoloġiċi tal-baħar għal rikreazzjoni, turiżmu jew sport.

(a)

skambji magħmula skont l-Artikolu 16(8) tar-Regolament (UE) Nru 1380/2013;

(b)

tnaqqis u riallokazzjonijiet magħmula skont l-Artikolu 37 tar-Regolament (KE) Nru 1224/2009;

(c)

ħatt l-art addizzjonali permess skont l-Artikolu 3 tar-Regolament (KE) Nru 847/96 jew skont l-Artikolu 15(9) tar-Regolament (UE) Nru 1380/2013;

(d)

kwantitajiet miżmuma skont l-Artikolu 4 tar-Regolament (KE) Nru 847/96 jew trasferiti skont l-Artikolu 15(9) tar-Regolament (UE) Nru 1380/2013;

(e)

tnaqqis magħmul skont l-Artikoli 105 u 107 tar-Regolament (KE) Nru 1224/2009.