28.10.2017   

MT

Il-Ġurnal Uffiċjali tal-Unjoni Ewropea

L 280/1

(1)

Il-gass naturali (gass) jibqa' komponent essenzjali tal-provvista tal-enerġija tal-Unjoni Ewropea. Proporzjon kbir ta' tali gass huwa importat fl-Unjoni minn pajjiżi terzi.

(2)

Interruzzjoni gravi ta' provvista tal-gass tista' taffettwa lill-Istati Membri kollha, lill-Unjoni u lill-Partijiet Kontraenti għat-Trattat li jistabbilixxi l-Komunità tal-Enerġija, iffirmat f'Ateni fil-25 ta' Ottubru 2005. Tista' tagħmel ukoll ħsara kbira lill-ekonomija tal-Unjoni u jista' jkollha impatt soċjali gravi, b'mod partikolari fuq gruppi vulnerabbli ta' klijenti.

(3)

Dan ir-Regolament għandu l-għan li jiżgura li jittieħdu l-miżuri kollha meħtieġa sabiex tiġi salvagwardata provvista ta' gass mingħajr interruzzjoni madwar l-Unjoni kollha, b'mod partikolari lill-klijenti protetti f'każ ta' kondizzjonijiet klimatiċi diffiċli jew ta' interruzzjonijiet tal-provvista tal-gass. Dawk l-objettivi jenħtieġ li jinkisbu permezz tal-aktar miżuri kosteffettivi u b'tali mod li ma jkunx hemm distorsjoni tas-swieq tal-gass.

(4)

Id-dritt tal-Unjoni, b'mod partikolari d-Direttiva 2009/72/KE tal-Parlament Ewropew u tal-Kunsill (3), id-Direttiva 2009/73/KE tal-Parlament Ewropew u tal-Kunsill (4), ir-Regolament (KE) Nru 713/2009 tal-Parlament Ewropew u tal-Kunsill (5), ir-Regolament (KE) Nru 714/2009 tal-Parlament Ewropew u tal-Kunsill (6), ir-Regolament (KE) Nru 715/2009 tal-Parlament Ewropew u tal-Kunsill (7) u r-Regolament (UE) Nru 994/2010 tal-Parlament Ewropew u tal-Kunsill (8), diġà kellu impatt pożittiv sinifikanti fuq is-sigurtà tal-provvista tal-gass fl-Unjoni, kemm f'termini ta' tħejjija kif ukoll ta' mitigazzjoni. L-Istati Membri huma ppreparati aħjar sabiex jiffaċċaw kriżi tal-provvista issa li huma meħtieġa jistabbilixxu pjanijiet ta' azzjoni preventiva u pjanijiet ta' emerġenza, u huma mħarsa aħjar issa li huma meħtieġa jissodisfaw għadd ta' obbligi dwar il-kapaċità tal-infrastruttura u l-provvista tal-gass. Madankollu, ir-rapport dwar l-implimentazzjoni tal-Kummissjoni tar-Regolament (UE) Nru 994/210 ta' Ottubru 2014 enfasizza oqsma li fihom titjib lil dak ir-Regolament li jista' jkompli jsaħħaħ is-sigurtà ta' provvista tal-gass fl-Unjoni.

(5)

Il-komunikazzjoni tal-Kummissjoni tas-16 ta' Ottubru 2014 dwar ir-reżiljenza fuq perijodu qasir ta' żmien tas-sistema tal-gass Ewropea analizzat l-effetti ta' interruzzjoni parzjali jew kompleta tal-provvisti tal-gass mir-Russja u kkonkludiet li l-approċċi purament nazzjonali mhumiex effettivi ħafna f'każ ta' interruzzjoni serja, minħabba l-ambitu tagħhom, li fin-natura tiegħu huwa limitat. It-test tal-istress wera kif approċċ aktar kooperattiv fost l-Istati Membri jista' jnaqqas b'mod sinifikanti l-impatt tax-xenarji ta' interruzzjonijiet serji ħafna fl-aktar Stati Membri vulnerabbli.

(6)

Is-sigurtà tal-enerġija tikkostitwixxi wieħed mill-objettivi tal-Istrateġija tal-Unjoni tal-Enerġija, kif deskritta fil-komunikazzjoni tal-Kummissjoni tal-25 ta' Frar 2015 dwar “Qafas Strateġiku għal Unjoni tal-Enerġija Reżiljenti b'Politika dwar il-Bidla fil-Klima li tħares 'il quddiem” li enfasizzat ukoll il-prinċipju “l-effiċjenza enerġetika tiġi l-ewwel” kif ukoll il-ħtieġa li l-atti legali eżistenti tal-Unjoni dwar l-enerġija jiġu implimentati b'mod sħiħ. Il-komunikazzjoni enfasizzat il-fatt li l-Unjoni tal-Enerġija hi msejsa fuq is-solidarjetà, li hi mnaqqxa fl-Artikolu 194 tat-Trattat dwar il-Funzjonament tal-Unjoni Ewropea (TFUE), u l-fiduċja, li huma karatteristiċi ewlenin tas-sigurtà tal-enerġija. Dan ir-Regolament hu maħsub biex isaħħaħ is-solidarjetà u l-fiduċja fost l-Istati Membri u jistabbilixxi l-miżuri meħtieġa biex jintlaħqu dawn l-għanijiet. Meta tivvaluta l-pjanijiet ta' azzjoni preventiva u l-pjanijiet ta' emerġenza stabbiliti mill-Istati Membri, il-Kummissjoni jenħtieġ li tkun kapaċi wkoll tiġbed l-attenzjoni tal-Istati Membri għall-objettivi tal-Unjoni tal-Enerġija.

(7)

Suq intern tal-gass li jaħdem tajjeb huwa l-aħjar garanzija sabiex tiġi żgurata s-sigurtà tal-provvista tal-gass madwar l-Unjoni u sabiex titnaqqas l-espożizzjoni ta' Stati Membri individwali għall-effetti ta' ħsara tal-interruzzjonijiet tal-provvista tal-gass. Fejn is-sigurtà tal-provvista tal-gass ta' Stat Membru tkun mhedda, hemm riskju li miżuri żviluppati b'mod unilaterali minn dak l-Istat Membru jistgħu jipperikolaw il-funzjonament tajjeb tas-suq intern tal-gass u jagħmlu ħsara lill-provvista tal-gass għall-klijenti fi Stati Membri oħrajn. Sabiex is-suq intern tal-gass jitħalla jiffunzjona anke meta jkun hemm nuqqas ta' provvista, għandha ssir dispożizzjoni għas-solidarjetà u l-koordinazzjoni fit-tweġiba għall-kriżijiet tal-provvista, kemm fir-rigward ta' azzjoni preventiva kif ukoll fir-rigward tar-reazzjoni għal interruzzjonijiet attwali tal-provvista tal-gass.

(8)

Suq intern tal-enerġija li jkun tassew interkonness u li jkollu punti ta' dħul multipli u flussi f'direzzjonijiet opposti jista' jinħoloq biss billi l-grilji tal-gass tiegħu jiġu interkonnessi kompletament, billi jinbnew ċentri tal-gass naturali likwifikat (LNG) fir-reġjuni tan-Nofsinhar u tal-Lvant tal-Unjoni, billi jitlestew il-kurituri tal-Gass bejn it-Tramuntana u n-Nofsinhar u tan-Nofsinhar u billi tiġi żviluppata aktar il-produzzjoni domestika. Għaldaqstant, jeħtieġ li jkun hemm żvilupp aċċellerat ta' interkonnessjonijiet u proġetti li jkollhom l-għan li jiddiversifikaw is-sorsi ta' provvista, kif diġà ġew magħżula fl-Istrateġija għas-Sigurtà tal-Enerġija.

(9)

S'issa, il-potenzjal għal miżuri aktar effiċjenti u b'inqas spejjeż permezz ta' kooperazzjoni reġjonali ma ġiex sfruttat għal kollox. Dan għandu x'jaqsam mhux biss ma' koordinazzjoni aħjar ta' azzjonijiet ta' mitigazzjoni nazzjonali f'sitwazzjonijiet ta' emerġenza, iżda wkoll ma' miżuri preventivi nazzjonali, bħall-ħażna nazzjonali jew il-politiki relatati mal-LNG, li jistgħu jkunu ta' importanza strateġika f'ċerti reġjuni tal-Unjoni.

(10)

Fi spirtu ta' solidarjetà, jenħtieġ li l-kooperazzjoni reġjonali, li tinvolvi kemm lill-awtoritajiet pubbliċi kif ukoll lill-impriżi tal-gass naturali, tkun il-prinċipju gwida ta' dan ir-Regolament, sabiex jittaffew ir-riskji identifikati u sabiex jiġu ottimizzati l-benefiċċji tal-miżuri kkoordinati u sabiex jiġu implimentati l-aktar miżuri kosteffettivi għall-konsumaturi tal-Unjoni. Jenħtieġ li l-kooperazzjoni reġjonali tkun ikkomplementata gradwalment minn perspettiva tal-Unjoni aktar b'saħħitha, li tippermetti l-użu tal-provvisti u l-għodod kollha disponibbli fis-suq intern tal-gass kollu. Il-valutazzjoni tal-kurituri tal-provvista ta' emerġenza fil-livell tal-Unjoni jenħtieġ li tiġi inkorporata fil-kooperazzjoni reġjonali.

(11)

Approċċ ibbażat fuq ir-riskju għall-valutazzjoni tas-sigurtà tal-provvista u għall-istabbiliment ta' miżuri preventivi u ta' mitigazzjoni jippermetti l-koordinazzjoni tal-isforzi u jġib miegħu benefiċċji sinifikanti f'termini tal-effikaċja tal-miżuri u l-ottimizzazzjoni tar-riżorsi. Dan japplika b'mod partikolari għal miżuri mfassla biex jiggarantixxu provvista kontinwa, taħt kondizzjonijiet ebsin ħafna, lill-klijenti protetti, u lil miżuri biex inaqqsu l-impatt ta' emerġenza. Il-valutazzjoni tar-riskji korrelatati b'mod konġunt fi gruppi ta' riskju, li hija aktar komprensiva kif ukoll aktar preċiża, ser tiżgura li l-Istati Membri jkunu ppreparati aħjar għal kull kriżi. Barra minn hekk, f'emerġenza, approċċ ikkoordinat u miftiehem minn qabel għas-sigurtà tal-provvista jiżgura rispons konsistenti u jnaqqas ir-riskju ta' effetti sekondarji negattivi li jista' jkollhom miżuri purament nazzjonali fi Stati Membri ġirien.

(12)

Għall-iskop tal-approċċ ibbażat fuq ir-riskju, jenħtieġ li l-gruppi ta' riskju jiġu definiti abbażi tar-riskji transnazzjonali kbar għas-sigurtà tal-provvista tal-gass fl-Unjoni. Tali riskji ġew identifikati fil-komunikazzjoni tal-Kummissjoni tas-16 ta' Ottubru 2014 dwar ir-reżiljenza fuq perijodu qasir ta' żmien tas-sistema tal-gass Ewropea u l-valutazzjoni inkluża fil-Pjan l-aktar reċenti ta' Għaxar Snin għall-Iżvilupp tan-Netwerk (TYNDP) żviluppat min-Netwerk Ewropew tal-Operaturi tas-Sistemi ta' Trasmissjoni tal-Gass (ENTSOG). Sabiex ikun hemm valutazzjoni aktar preċiża li tkun iffukata aħjar għall-iskopijiet ta' dan ir-Regolament, jenħtieġ li l-gruppi ta' riskju jissawru abbażi tas-sorsi u r-rotot ewlenin tal-provvista tal-gass.

(13)

Biex jiġi pprovdut l-input għall-valutazzjonijiet tar-riskji komuni u nazzjonali, l-ENTSOG, f'konsultazzjoni mal-Grupp ta' Koordinazzjoni dwar il-Gass (GCG) u man-Netwerk Ewropew għall-Operaturi tas-Sistema ta' Trasmissjoni tal-Elettriku (ENTSO-E), jenħtieġ li jwettaq simulazzjoni fl-Unjoni kollha tax-xenarji ta' interruzzjoni tal-provvista tal-gass u tal-infrastruttura. Jenħtieġ li tali simulazzjoni tiġi ripetuta tal-inqas kull sentejn. Bħala mezz ta' tisħiħ tal-kooperazzjoni reġjonali billi tipprovdi informazzjoni dwar il-flussi tal-gass kif ukoll billi tipprovdi għarfien espert tekniku u operazzjonali, jenħtieġ li s-Sistema ta' Koordinazzjoni Reġjonali għall-Gass (Sistema ReCo għall-Gass), stabbilita mill-ENTSOG u magħmula minn gruppi permanenti ta' esperti, tkun involuta fit-twettiq ta' simulazzjonijiet. Jenħtieġ li l-ENTSOG jiżgura livell adatt ta' trasparenza u aċċess għall-preżunzjonijiet tal-mudell li jintużaw fix-xenarji tiegħu.

(14)

Jenħtieġ li l-Kummissjoni jkollha s-setgħa li taġġorna l-kompożizzjoni tal-gruppi ta' riskju permezz ta' att delegat abbażi tal-evoluzzjoni tar-riskji transnazzjonali kbar għas-sigurtà tal-provvista tal-gass fl-Unjoni u l-impatt tagħha fuq l-Istati Membri, b'kont meħud tar-riżultat tas-simulazzjoni fl-Unjoni kollha u tad-diskussjoni fil-GCG.

(15)

Biex il-kooperazzjoni reġjonali ssir fattibbli, jenħtieġ li l-Istati Membri jiftiehmu fuq mekkaniżmu ta' kooperazzjoni fi ħdan kull grupp ta' riskju. Jenħtieġ li tali mekkaniżmu jiġi żviluppat fil-ħin biżżejjed biex tkun tista' ssir il-valutazzjoni tar-riskju komuni u biex jiġu diskussi u jintlaħaq qbil dwar miżuri transkonfinali xierqa u effettivi, li ser jeħtieġu l-qbil ta' kull Stat Membru kkonċernat, li għandhom jiġu inklużi fil-kapitoli reġjonali tal-pjanijiet ta' azzjoni preventiva u l-pjanijiet ta' emerġenza, wara li tiġi kkonsultata l-Kummissjoni. L-Istati Membri huma liberi li jiftiehmu fuq mekkaniżmu ta' kooperazzjoni li hu l-iktar addattat għal grupp ta' riskju partikolari. Jenħtieġ li l-Kummissjoni tkun tista' jkollha rwol ta' faċilitazzjoni fil-proċess globali u taqsam l-aħjar prattiki għall-organizzazzjoni tal-kooperazzjoni reġjonali bħal pereżempju rwol ta' koordinazzjoni b'rotazzjoni fi ħdan il-gruppi ta' riskju għall-preparazzjoni tad-dokumenti differenti jew biex jiġu stabbiliti korpi dedikati. Jekk ma jkunx hemm qbil fuq il-mekkaniżmu ta' kooperazzjoni, jenħtieġ li l-Kummissjoni tipproponi mekkaniżmu ta' kooperazzjoni xieraq għal grupp ta' riskju partikolari.

(16)

Meta jwettqu l-valutazzjoni tar-riskju komuni, jenħtieġ li l-awtoritajiet kompetenti jivvalutaw il-fatturi ta' riskju rilevanti kollha li jistgħu jwasslu biex jimmaterjalizza r-riskju transnazzjonali kbir li għalih inħoloq il-grupp ta' riskju, inkluż interruzzjoni tal-provvista tal-gass mill-akbar fornitur uniku. Jenħtieġ li dawk il-fatturi ta' riskju jiġu indirizzati b'miżuri transkonfinali adatti miftiehma mill-awtoritajiet kompetenti tal-Istat Membru kkonċernat. Jenħtieġ li l-miżuri transkonfinali jiġu inklużi fil-kapitoli reġjonali tal-pjanijiet ta' azzjoni preventiva u l-pjanijiet ta' emerġenza. Barra minn hekk, jenħtieġ li l-awtoritajiet kompetenti jwettqu valutazzjoni tar-riskju nazzjonali komprensiva u jivvalutaw ir-riskji naturali, teknoloġiċi, kummerċjali, finanzjarji, soċjali, politiċi u dawk relatatimas-suq, kif ukoll kull riskju rilevanti ieħor. Jenħtieġ li r-riskji kollha jiġu indirizzati b'miżuri effettivi, proporzjonati u nondiskriminatorji li għandhom jiġu żviluppati fil-pjanijiet ta' azzjoni preventiva u fil-pjanijiet ta' emerġenza. Jenħtieġ li r-riżultati tal-valutazzjonijiet tar-riskju komuni u nazzjonali jikkontribwixxu wkoll għall-valutazzjonijiet tar-riskju tal-perikli kollha previsti fl-Artikolu 6 tad-Deċiżjoni Nru 1313/2013/UE tal-Parlament Ewropew u tal-Kunsill (9) u jenħtieġ jittieħed kont tagħhom b'mod sħiħ fil-valutazzjonijiet tar-riskju nazzjonali.

(17)

Sabiex jiġi żgurat stat ta' tħejjija massimu, biex tiġi evitata interruzzjoni tal-provvista tal-gass u biex jittaffew l-effetti tagħha jekk xorta waħda sseħħ, jenħtieġ li l-awtoritajiet kompetenti ta' grupp ta' riskju partikolari, wara li jikkonsultaw mal-partijiet kkonċernati, jistabbilixxu pjanijiet ta' azzjoni preventiva u pjanijiet ta' emerġenza li jkollhom fihom il-kapitoli reġjonali. Jenħtieġ li dawn jitfasslu b'tali mod li jindirizzaw ir-riskji nazzjonali b'mod li jisfrutta b'mod sħiħ l-opportunitajiet ipprovduti mill-kooperazzjoni reġjonali. Il-pjanijiet jenħtieġ li jkunu ta' natura teknika u operattiva, bil-funzjoni tagħhom tkun li jgħinu fil-prevenzjoni li tiġri jew tmur għall-agħar emerġenza jew sabiex jittaffew l-effetti tagħha. Il-pjanijiet jenħtieġ li jqisu s-sigurtà tas-sistemi tal-elettriku u jenħtieġ li jkunu konsistenti mal-ippjanar strateġiku u l-għodod tar-rappurtar tal-Unjoni tal-Enerġija.

(18)

Meta jistabbilixxu u jimplimentaw il-pjanijiet ta' azzjoni preventiva u l-pjanijiet ta' emerġenza, l-awtoritajiet kompetenti jenħtieġ li jqisu, f'kull ħin, l-operazzjoni sikura tas-sistema tal-gass fil-livelli reġjonali u nazzjonali. Jenħtieġ li huma jindirizzaw u jistabbilixxu f'dawk il-pjanijiet il-limitazzjonijiet tekniċi li jaffettwaw l-operazzjoni tan-netwerk, inkluża kwalunkwe raġuni teknika u ta' sigurtà għat-tnaqqis tal-flussi f'każ ta' emerġenza.

(19)

Jenħtieġ li l-Kummissjoni tivvaluta l-pjanijiet ta' azzjoni preventiva u l-pjanijiet ta' emerġenza filwaqt li tqis debitament il-fehmiet espressi fil-GCG u tirrakkomanda li jiġu eżaminati, b'mod partikolari jekk il-pjanijiet ma jindirizzawx b'mod effettiv ir-riskji identifikati fil-valutazzjoni tar-riskju, jekk joħolqu distorsjoni tal-kompetizzjoni jew ixekklu l-funzjonament tas-suq intern tal-enerġija, jekk jipperikolaw is-sigurtà tal-provvista tal-gass ta' Stati Membri oħrajn jew jekk ma jikkonformawx mad-dispożizzjonijiet ta' dan ir-Regolament jew liġijiet oħrajn tal-Unjoni. Jenħtieġ li l-awtorità kompetenti tal-Istat Membru tqis ir-rakkomandazzjonijiet tal-Kummissjoni. Meta, wara l-pożizzjoni finali tal-awtorità kompetenti, il-Kummissjoni tikkonkludi li l-miżura kkonċernata tipperikola s-sigurtà tal-provvista tal-gass ta' Stat Membru ieħor jew tal-Unjoni, jenħtieġ li l-Kummissjoni tkompli d-djalogu mal-Istat Membru kkonċernat biex dan jaqbel li jemenda jew jirtira l-miżura.

(20)

Il-pjanijiet ta' azzjoni preventiva u l-pjanijiet ta' emerġenza jenħtieġ li jiġu aġġornati b'mod regolari u jiġu ppubblikati. Sabiex jiġi żgurat li l-pjanijiet ta' emerġenza jkunu dejjem aġġornati u effettivi, jenħtieġ li l-Istati Membri jwettqu għallinqas test wieħed bejn l-aġġornamenti tal-pjanijiet billi jagħmlu simulazzjoni ta' xenarji ta' impatt għoli u medju u reazzjonijiet f'ħin reali. Jenħtieġ li l-awtoritajiet kompetenti jippreżentaw ir-riżultati tat-testijiet fil-GCG.

(21)

Il-mudelli komprensivi obbligatorji li jinkludu r-riskji kollha li għandhom jiġu koperti mill-valutazzjoni tar-riskju u l-komponenti kollha tal-pjanijiet ta' azzjoni preventiva u l-pjanijiet ta' emerġenza huma meħtieġa biex jiffaċilitaw il-valutazzjoni tar-riskju u t-tħejjija tal-pjanijiet u l-valutazzjoni tagħhom mill-Kummissjoni.

(22)

Sabiex tiġi ffaċilitata l-komunikazzjoni bejn l-Istati Membri u l-Kummissjoni, jenħtieġ li l-valutazzjonijiet tar-riskju, il-pjanijiet ta' azzjoni preventiva, il-pjanijiet ta' emerġenza u d-dokumenti u l-iskambji ta' informazzjoni l-oħrajn kollha previsti f'dan ir-Regolament jiġu nnotifikati permezz ta' sistema ta' notifika elettronika sikura u standardizzata.

(23)

Ċerti klijenti, li jinkludu unitajiet domestiċi u klijenti li jipprovdu servizzi soċjali essenzjali, huma partikolarment vulnerabbli u jistgħu jeħtieġu protezzjoni mill-effetti negattivi ta' interruzzjoni tal-provvista tal-gass. Id-definizzjoni ta' tali klijenti protetti jenħtieġ li ma tkunx konfliġġenti mal-mekkaniżmi ta' solidarjetà tal-Unjoni.

(24)

Huwa xieraq li ssir aktar speċifika d-definizzjoni ta' klijenti protetti mill-mekkaniżmu ta' solidarjetà. Dan hu meħtieġ mill-obbligu tal-Istati Membri li jagħtu solidarjetà f'każ ta' ċirkostanzi estremi u għal ħtiġijiet essenzjali. Għaldaqstant, jenħtieġ li d-definizzjoni ta' klijenti protetti mis-solidarjetà tkun limitata għal unitajiet domestiċi filwaqt li xorta tkun tista' tinkludi, f'kondizzjonijiet speċifiċi, ċerti servizzi soċjali essenzjali u installazzjonijiet tat-tisħin distrettwali. Għaldaqstant hu possibbli li l-Istati Membri, skont dak il-qafas, jittrattaw il-kura tas-saħħa, il-kura soċjali essenzjali, is-servizzi ta' emerġenza u dawk ta' sigurtà bħala klijenti protetti mis-solidarjetà, inkluż fejn dawk is-servizzi jingħataw minn amministrazzjoni pubblika.

(25)

Ir-responsabbiltà għas-sigurtà tal-provvista tal-gass jenħtieġ li tinqasam bejn l-impriżi tal-gass naturali, l-Istati Membri, li jaġixxu permezz tal-awtoritajiet kompetenti tagħhom, u l-Kummissjoni, fl-ambiti ta' kompetenza rispettivi tagħhom. Tali responsabbiltà maqsuma teħtieġ kooperazzjoni mill-qrib ħafna bejn dawk il-partijiet. Madankollu, il-klijenti li jkunu qegħdin jużaw il-gass għall-ġenerazzjoni tal-elettriku jew għal skopijiet industrijali jistgħu wkoll ikollhom rwol importanti x'jaqdu fis-sigurtà tal-provvista tal-gass, peress li jistgħu jwieġbu għal kriżi billi jieħdu miżuri min-naħa tad-domanda, pereżempju kuntratti li jistgħu jiġu interrotti u bdil tal-karburant, li jkollhom impatt immedjat fuq il-bilanċ tad-domanda u tal-provvista. Barra minn hekk, is-sigurtà tal-provvista tal-gass lil ċerti klijenti li jużaw il-gass għall-ġenerazzjoni tal-elettriku tista' titqies ukoll essenzjali f'xi każijiet. F'emerġenza, jenħtieġ li jkun possibbli għal Stat Membru li jagħti prijorità lill-provvista tal-gass lil tali klijenti taħt ċerti kondizzjonijiet anke qabel il-provvista tal-gass lill-klijenti protetti. F'ċirkostanzi ta' eċċezzjoni l-provvista tal-gass lil xi wħud minn dawn il-klijenti mogħtija prijorità f'emerġenza qabel il-klijenti protetti tista' tkompli wkoll fi Stat Membru li jagħti solidarjetà biex jevita ħsara serja lill-funzjonament tas-sistema tal-elettriku jew tal-gass f'dak l-Istat Membru. Tali miżura speċifika jenħtieġ li tkun mingħajr preġudizzju għad-Direttiva 2005/89/KE tal-Parlament Ewropew u tal-Kunsill (10).

(26)

Jenħtieġ li l-awtoritajiet kompetenti jikkooperaw mill-qrib ma' awtoritajiet nazzjonali rilevanti oħrajn, b'mod partikolari mal-awtoritajiet regolatorji nazzjonali, meta jwettqu l-kompiti speċifikati f'dan ir-Regolament.

(27)

L-istandard tal-infrastruttura jenħtieġ li jobbliga lill-Istati Membri jżommu livell minimu ta' infrastruttura bħal pereżempju biex jiżguraw ċertu allokazzjoni addizzjonali fis-sistema f'każ ta' interruzzjoni tal-akbar infrastruttura unika tal-gass. Minħabba li analiżi magħmula abbażi tal-formula N – 1 tikkostitwixxi approċċ purament ibbażat fuq il-kapaċità, ir-riżultati tal-formula N – 1 jenħtieġ li jkunu kkomplementati b'analiżi dettaljata li tittratta wkoll il-flussi tal-gass.

(28)

Ir-Regolament (UE) Nru 994/2010 jeħtieġ li l-operaturi tas-sistema ta' trasmissjoni jippermettu kapaċità bidirezzjonali fiżika permanenti fuq l-interkonnessjonijiet transkonfinali kollha sakemm ma tkunx ingħatat eżenzjoni minn dak l-obbligu. Dan għandu l-għan li jiżgura li l-benefiċċji possibbli tal-kapaċità bidirezzjonali permanenti jitqiesu dejjem meta tkun qed tiġi ppjanata interkonnessjoni ġdida. Madankollu, il-kapaċità bidirezzjonali tista' tintuża biex tipprovdi gass kemm lill-Istat Membru ġar kif ukoll lil oħrajn tul il-kuritur tal-provvista tal-gass. Il-benefiċċji għas-sigurtà tal-provvista tal-gass li jirriżultaw jekk tiġi permessa kapaċità bidirezzjonali fiżika permanenti jeħtieġ li jitqiesu minn perspettiva usa', fi spirtu ta' solidarjetà u kooperazzjoni msaħħa. Jenħtieġ li titwettaq analiżi komprensiva tal-ispejjeż imqabbla mal-benefiċċji li tqis il-kuritur kollu tat-trasport, meta jkun qiegħed jiġi kkunsidrat jekk tiġix implimentata kapaċità bi-direzzjonali. L-awtoritajiet kompetenti kkonċernati jenħtieġ li jkunu obbligati jirrieżaminaw l-eżenzjonijiet mogħtija taħt ir-Regolament (UE) Nru 994/2010 abbażi tar-riżultati tal-valutazzjonijiet tar-riskju komuni. Jenħtieġ li l-objettiv ġenerali jkun li jkun hemm kapaċità bidirezzjonali dejjem tikber u li l-kapaċità f'direzzjoni waħda fi proġetti transkonfinali futuri tinżamm f'livell l-aktar baxx possibbli.

(29)

Il-kapaċità f'punt ta' interkonnessjoni ma' Stat Membru tista' tikkompeti mal-kapaċità f'punti ta' ħruġ mill-grilja tal-gass għal faċilità ta' ħżin tal-gass. Bħala konsegwenza, tista' tirriżulta sitwazzjoni fejn ir-riżerva kostanti tal-kapaċità ta' ħruġ għall-ħżin tnaqqas il-kapaċità teknikament disponibbli li tiġi allokata f'punt ta' interkonnessjoni. Sabiex jiġi żgurat livell ogħla ta' sigurtà tal-enerġija f'emerġenza, jenħtieġ li dan ir-Regolament jipprevedi regola ċara ta' prijorità. Jenħtieġ li kwalunkwe kapaċità riżervata fil-punti ta' interkonnessjoni tingħata prijorità qabel kapaċità li tkun qed tikkompeti f'punt ta' ħruġ għal faċilità ta' ħżin, u b'hekk l-operatur tas-sistema ta' trasmissjoni jkun jista' jalloka l-kapaċità teknika massima fil-punt ta' interkonnessjoni sabiex ikunu possibbli flussi akbar ta' gass fl-Istat Membru ġar li jkun iddikjara emerġenza. Dan jista' jkollu l-konsegwenza li l-injezzjonijiet ta' gass f'faċilitajiet ta' ħżin ma jkunux jistgħu jsiru jew ikunu jistgħu jsiru biss b'volumi mnaqqsa minkejja li jkunu ġew riżervati b'mod kostanti minn qabel. Biex jikkumpensa għat-telf finanzjarju li jirriżulta, jenħtieġ li dan ir-Regolament jipprevedi kumpens ġust li jiġi applikat direttament u minnufih bejn l-utenti tas-sistema milqutin. Jenħtieġ li l-operaturi tas-sistema ta' trasmissjoni kkonċernati jikkooperaw skont l-atti legali rilevanti sabiex tiġi applikata dik ir-regola ta' prijorità.

(30)

Id-Direttiva tal-Kunsill 2008/114/KE (11) tistabbilixxi proċess li għandu l-għan li jtejjeb is-sigurtà ta' infrastrutturi kritiċi Ewropej speċifikati, inkluża ċerta infrastruttura tal-gass, fl-Unjoni. Id-Direttiva 2008/114/KE flimkien ma' dan ir-Regolament tikkontribwixxi biex jinħoloq approċċ komprensiv għas-sigurtà tal-Enerġija tal-Unjoni.

(31)

Dan ir-Regolament jistabbilixxi standards għas-sigurtà tal-provvista li huma armonizzati biżżejjed u jkopru tal-inqas is-sitwazzjoni li seħħet f'Jannar 2009 meta l-provvista tal-gass mir-Russja ġiet interrotta. Dawk l-istandards iqisu d-differenza bejn l-Istati Membri, l-obbligi tas-servizz pubbliku u l-miżuri ta' protezzjoni tal-klijenti, kif jissemmew fl-Artikolu 3 tad-Direttiva 2009/73/KE. Jenħtieġ li l-istandards tas-sigurtà tal-provvista jkunu stabbli, sabiex jipprovdu ċ-ċertezza legali meħtieġa, jenħtieġ li jkunu definiti b'mod ċar u jenħtieġ li ma jimponux piż mhux raġonevoli u sproporzjonat fuq l-impriżi tal-gass naturali. Jenħtieġ li dawn jiggarantixxu wkoll aċċess ugwali għall-impriżi tal-gass naturali tal-Unjoni għall-konsumaturi nazzjonali. Jenħtieġ li l-Istati Membri jistabbilixxu miżuri li, b'mod effettiv u proporzjonat, jiżguraw li l-impriżi tal-gass naturali jikkonformaw ma' tali standard, inkluża l-possibbiltà li jistabbilixxu multi fuq il-fornituri, fejn iqisu li dan ikun adatt.

(32)

Ir-rwoli u r-responsabbiltajiet tal-impriżi kollha tal-gass naturali u l-awtoritajiet kompetenti jenħtieġ li jkunu definiti preċiżament biex is-suq intern tal-gass jibqa' jaħdem tajjeb, b'mod partikolari f'każ ta' interruzzjonijiet tal-provvista u kriżijiet. Tali rwoli u responsabbiltajiet jenħtieġ li jkunu stabbiliti b'tali mod li jiżguraw li jiġi rrispettat approċċ fuq tliet livelli li jkun jinvolvi, l-ewwel, l-impriżi tal-gass naturali u l-industrija rilevanti, it-tieni, l-Istati Membri fil-livell nazzjonali jew reġjonali, u t-tielet, l-Unjoni. Jenħtieġ li dan ir-Regolament jippermetti lill-impriżi tal-gass naturali u lill-klijenti jistrieħu fuq mekkaniżmi bbażati fuq is-suq għall-itwal żmien possibbli meta jindirizzaw l-interruzzjonijiet. Madankollu, jenħtieġ ukoll li jipprevedi mekkaniżmi li għandhom jintużaw meta s-swieq weħidhom ma jibqgħux f'pożizzjoni li jindirizzaw b'mod adegwat interruzzjoni tal-provvista tal-gass.

(33)

F'każ ta' interruzzjoni tal-provvista tal-gass, il-parteċipanti fis-suq jenħtieġ li jingħataw opportunità suffiċjenti sabiex iwieġbu għas-sitwazzjoni b'miżuri bbażati fuq is-suq. Fejn miżuri tas-suq ikunu ġew eżawriti u xorta jkunu għadhom insuffiċjenti, l-Istati Membri u l-awtoritajiet kompetenti tagħhom jenħtieġ li jieħdu miżuri sabiex jitneħħew jew jittaffew l-effetti ta' interruzzjoni tal-provvista tal-gass.

(34)

Fejn l-Istati Membri jkollhom pjan li jintroduċu miżuri mhux ibbażati fuq is-suq, l-introduzzjoni ta' tali miżuri tenħtieġ li tkun akkumpanjata minn deskrizzjoni tal-impatt ekonomiku tagħhom. Dan jiżgura li l-klijenti jkollhom l-informazzjoni li jkollhom bżonn dwar l-ispejjeż ta' tali miżuri u jiżgura li l-miżuri jkunu trasparenti, b'mod speċjali fir-rigward tal-impatt tagħhom fuq il-prezz tal-gass.

(35)

Jenħtieġ li l-Kummissjoni jkollha s-setgħa tiżgura li miżuri preventivi ġodda mhux ibbażati fuq is-suq ma jipperikolawx is-sigurtà tal-provvista tal-gass ta' Stati Membri oħrajn jew fl-Unjoni. Minħabba li miżuri bħal dawn jistgħu jkunu partikolarment ta' ħsara għas-sigurtà tal-provvista tal-gass, huwa xieraq li jidħlu fis-seħħ biss meta jiġu approvati mill-Kummissjoni jew meta jkunu ġew emendati skont deċiżjoni tal-Kummissjoni.

(36)

Miżuri min-naħa tad-domanda, bħall-bdil tal-karburant jew it-tnaqqis tal-provvista tal-gass lil klijenti industrijali kbar skont ordni ekonomikament effiċjenti, jista' jkollhom rwol siewi sabiex jiżguraw is-sigurtà tal-provvista tal-gass, jekk dawn ikunu jistgħu jiġu applikati malajr u jnaqqsu d-domanda b'mod sinifikanti b'reazzjoni għal interruzzjoni tal-provvista tal-gass. Jenħtieġ li jsir iktar biex jiġi promoss l-użu effiċjenti tal-enerġija, partikolarment fejn ikun hemm bżonn miżuri min-naħa tad-domanda. Jenħtieġ li jitqies l-impatt ambjentali ta' kwalunkwe miżura min-naħa tad-domanda u tal-provvista proposta, u tingħata kemm jista' jkun possibbli preferenza għall-miżuri li għandhom l-inqas impatt fuq l-ambjent. Fl-istess ħin, jenħtieġ li jiġu kkunsidrati aspetti tas-sigurtà tal-provvista tal-gass u l-kompetittività.

(37)

Huwa neċessarju li tiġi żgurata l-prevedibbiltà tal-azzjoni li għandha tittieħed f'każ ta' emerġenza, biex il-parteċipanti kollha tas-suq ikun jista' jkollhom opportunità suffiċjenti sabiex jirreaġixxu u jippreparaw għal ċirkostanzi bħal dawn. Bħala regola, għalhekk, l-awtoritajiet kompetenti jenħtieġ li jimxu skont il-pjan ta' emerġenza tagħhom. F'ċirkostanzi eċċezzjonali debitament ġustifikati, jenħtieġ li huma jkunu jistgħu jieħdu azzjoni li tiddevja minn dawk il-pjanijiet. Huwa importanti wkoll li l-mod li bih jiġu ddikjarati l-emerġenzi jkun iktar trasparenti u prevedibbli. L-informazzjoni dwar il-pożizzjoni ta' bbilanċjar tas-sistema (l-istatus ġenerali tan-netwerk ta' trasmissjoni), li l-qafas tagħha jinsab fir-Regolament tal-Kummissjoni (UE) Nru 312/2014 (12), jista' jkollha rwol importanti f'dak ir-rigward. Dik l-informazzjoni jenħtieġ li tkun disponibbli għall-awtoritajiet kompetenti u, fejn dawn ma jkunux l-awtoritajiet kompetenti, għall-awtoritajiet regolatorji nazzjonali, f'ħin reali.

(38)

Kif muri fil-kuntest tal-eżerċizzju ta' test tal-istress ta' Ottubru 2014, hija meħtieġa solidarjetà sabiex tiġi żgurata s-sigurtà tal-provvista tal-gass madwar l-Unjoni. Din tifrex l-effetti b'mod aktar ekwu u tnaqqas l-effetti ġenerali ta' interruzzjoni serja. Il-mekkaniżmu ta' solidarjetà hu mfassal biex jindirizza sitwazzjonijiet estremi li fihomil-provvista għal klijenti protetti mis-solidarjetà, bħala bżonn essenzjali u prijorità meħtieġa, tkun mhedda fi Stat Membru. Is-solidarjetà tiżgura kooperazzjoni ma' Stati Membri aktar vulnerabbli. Fl-istess waqt, is-solidarjetà hi miżura li għandha tintuża bħala l-aħħar għażla li tapplika biss f'emerġenza u b'kondizzjonijiet restrittivi biss. Jekk tkun iddikjarata emerġenza fi Stat Membru, jenħtieġ għalhekk li jiġi applikat approċċ gradwali u proporzjonat biex tiġi żgurata s-sigurtà tal-provvista tal-gass. Jenħtieġ li l-Istat Membru li jkun iddikjara l-emerġenza jimplimenta, b'mod partikolari, il-miżuri ta' emerġenza kollha previsti fil-pjan ta' emerġenza tiegħu sabiex tiġi żgurata provvista tal-gass lill-klijenti tiegħu protetti mis-solidarjetà. Fl-istess ħin, l-Istati Membri kollha li jkunu introduċew standard ta' provvista ogħla jenħtieġ li jnaqqsuh temporanjament għall-istandard ta' provvista normali sabiex is-suq tal-gass isir aktar likwidu, fil-każ li l-Istat Membru li jiddikjara l-emerġenza jindika li hija meħtieġa azzjoni transkonfinali. Jekk dawk iż-żewġ settijiet preċedenti ta' miżuri ma jipprovdux il-provvista neċessarja, jenħtieġ li jittieħdu miżuri ta' solidarjetà mill-Istati Membri konnessi direttament biex tiġi żgurata provvista tal-gass lill-klijenti protetti mis-solidarjetà fl-Istat Membru li jkun għaddej mill-emerġenza, fuq it-talba ta' dak l-Istat Membru. Tali miżuri ta' solidarjetà jenħtieġ li jinvolvu l-iżgurar li l-provvista tal-gass lil klijenti li mhumiex klijenti protetti mis-solidarjetà fit-territorju tal-Istat Membru li jipprovdi s-solidarjetà ma titnaqqasx jew ma tkomplix, sabiex isiru liberi volumi ta' gass, sa fejn ikun meħtieġ u sakemm il-provvista tal-gass għal klijenti protetti mis-solidarjetà fl-Istat Membru li jitlob is-solidarjetà ma tkunx sodisfatta. Xejn f'dan ir-Regolament ma għandu jinftiehem bħala li qed jitlob jew jippermetti li Stat Membru jeżerċita awtorità pubblika fi Stat Membru ieħor.

(39)

Jenħtieġ li jittieħdu miżuri ta' solidarjetà bħala l-aħħar għażla wkoll fejn Stat Membru jkun konness ma' Stat Membru ieħor permezz ta' pajjiż terz sakemm il-flussi ma jkunux ristretti mill-pajjiż terz, u fejn ikun hemm qbil mill-Istati Membri rilevanti, li jenħtieġ li jinvolvu, kif xieraq, lill-pajjiż terz li huma konnessi permezz tiegħu.

(40)

Fejn jittieħdu miżuri ta' solidarjetà bħala l-aħħar għażla, jenħtieġ li t-tnaqqis jew il-waqfien tal-provvista tal-gass fl-Istat Membru li jipprovdi s-solidarjetà, fejn ikun meħtieġ biex l-Istat Membru jikkonforma mal-obbligi ta' solidarjetà tiegħu, u sabiex jiġi evitat trattament diskriminatorju, ikun applikabbli għall-klijenti kollha li mhumiex klijenti protetti mis-solidarjetà, irrispettivament minn jekk jirċevux gass direttament jew permezz ta' installazzjonijiet ta' tisħin distrettwali protetti mis-solidarjetà fl-għamla ta' sħana. Jenħtieġ li tiġi żgurata l-istess ħaġa viċe versa b'rabta mal-klijenti li mhumiex klijenti protetti mis-solidarjetà fl-Istat Membru li jirċievi l-gass fil-qafas tal-mekkaniżmu ta' solidarjetà.

(41)

Fejn jittieħdu miżuri ta' solidarjetà bħala l-aħħar għażla, ikun preferibbli li l-konsum tal-gass fl-Istat Membru li jipprovdi solidarjetà, bħala l-ewwel pass, jitnaqqas fuq bażi volontarja, permezz ta' miżuri bbażati fuq is-suq, bħall-miżuri volontarji min-naħa tad-domanda jew l-irkant invers, fejn ċerti klijenti bħall-klijenti industrijali jindikaw lill-operatur tas-sistema ta' trasmissjoni jew awtorità oħra responsabbli l-prezz fejn huma jnaqqsu jew iwaqqfu l-konsum tal-gass tagħhom. Jekk jirriżulta li l-miżuri bbażati fuq is-suq ma jkunux biżżejjed biex jindirizzaw id-defiċit fil-provvista tal-gass meħtieġa, u minħabba l-importanza ta' miżuri ta' solidarjetà bħala l-aħħar għażla, jenħtieġ li l-Istat Membru li jipprovdi solidarjetà, bħala t-tieni pass, ikun jista' juża miżuri mhux ibbażati fuq is-suq, inkluża l-limitazzjoni ta' ċerti gruppi ta' klijenti, sabiex iħares l-obbligi ta' solidarjetà tiegħu.

(42)

Il-miżuri ta' solidarjetà tal-aħħar għażla jenħtieġ li jiġu pprovduti abbażi ta' kumpens. Jenħtieġ li l-Istat Membru li jipprovdi solidarjetà jingħata kumpens ġust minnufih mill-Istat Membru li jirċievi solidarjetà, inkluż għall-gass ikkonsenjat fit-territorju tiegħu u l-ispejjeż l-oħrajn kollha rilevanti u raġonevoli li jiġġarrbu meta tiġi pprovduta solidarjetà. Il-miżuri ta' solidarjetà tal-aħħar għażla jenħtieġ li jkunu soġġetti għall-kondizzjoni li l-Istat Membru li jitlob solidarjetà jieħu impenn li jagħti tali kumpens ġust u immedjat. Dan ir-Regolament ma jarmonizzax l-aspetti kollha tal-kumpens ġust. L-Istati Membri kkonċernati jenħtieġ li jadottaw il-miżuri meħtieġa, b'mod partikolari arranġamenti tekniċi, legali u finanzjarji, biex jimplimentaw id-dispożizzjonijiet dwar kumpens immedjat u ġust bejniethom.

(43)

Meta jieħdu miżuri ta' solidarjetà skont id-dispożizzjonijiet ta' dan ir-Regolament, l-Istati Membri jkunu qed jimplimentaw id-dritt tal-Unjoni u għaldaqstant ikunu marbutin li jirrispettaw id-drittijiet fundamentali garantiti mid-dritt tal-Unjoni. Tali miżuri jistgħu għaldaqstant iwasslu għal obbligu li Stat Membru jħallas kumpens lil dawk milqutin mill-miżuri tiegħu. Għaldaqstant jenħtieġ li l-Istati Membri jiżguraw li jkunu fis-seħħ regoli nazzjonali dwar il-kumpens li jkunu konformi mad-dritt tal-Unjoni, b'mod partikolari mad-drittijiet fundamentali. Barra minn hekk, jenħtieġ li jiġi żgurat li l-Istat Membru li jirċievi solidarjetà fl-aħħar mill-aħħar iġarrab l-ispejjeż raġonevoli kollha li jirriżultaw mill-obbligu msemmi lejn l-Istat Membru li jipprovdi solidarjetà, tal-għoti ta' kumpens u spejjeż raġonevoli oħrajn imġarrba mill-ħlas tal-kumpens skont ir-regoli nazzjonali dwar il-kumpens imsemmijin.

(44)

Peress li jista' jkun hemm aktar minn Stat Membru wieħed li jipprovdi solidarjetà lil Stat Membru rikjedenti, jenħtieġ li jkun hemm mekkaniżmu ta' kondiviżjoni tal-piżijiet. Fil-qafas ta' dak il-mekkaniżmu, l-Istat Membru li jitlob solidarjetà jenħtieġ li, wara li jikkonsulta lill-Istati Membri kollha kkonċernati, ifittex l-aktar offerta vantaġġjuża fuq il-bażi tal-ispejjeż, il-veloċità tal-konsenja, l-affidabbiltà u d-diversifikazzjoni tal-provvisti tal-gass minn Stati Membri differenti. L-Istati Membri jenħtieġ li jagħmlu tali offerti fuq il-bażi ta' miżuri volontarji min-naħa tad-domanda kemm jista' jkun possibbli u għall-itwal żmien possibbli, qabel ma jduru għal miżuri mhux ibbażati fuq is-suq.

(45)

Dan ir-Regolament jintroduċi, għall-ewwel darba, tali mekkaniżmu ta' solidarjetà bejn l-Istati Membri bħala strument biex jittaffew l-effetti ta' emerġenza serja fl-Unjoni inkluż mekkaniżmu ta' kondiviżjoni tal-piżijiet. Għaldaqstant, jenħtieġ li l-Kummissjoni teżamina l-mekkaniżmu ta' kondiviżjoni tal-piżijiet u l-mekkaniżmu ta' solidarjetà b'mod ġenerali fid-dawl tal-esperjenza futura fit-tħaddim tagħhom, u tipproponi, fejn ikun xieraq, modifiki għalihom.

(46)

L-Istati Membri jenħtieġ li jadottaw il-miżuri neċessarji għall-implimentazzjoni tad-dispożizzjonijiet dwar il-mekkaniżmu ta' solidarjetà, inkluż bil-qbil bejn l-Istati Membri kkonċernati dwar arranġamenti tekniċi, legali u finanzjarji. Jenħtieġ li l-Istati Membri jiddeskrivu d-dettalji ta' dawk l-arranġamenti fil-pjanijiet ta' emerġenza tagħhom. Jenħtieġ li l-Kummissjoni tħejji gwida legalment mhux vinkolanti rigward l-elementi ewlenin li jenħtieġ li jiġu inklużi f'tali arranġamenti.

(47)

Sakemm Stat Membru jkun jista' jkopri l-konsum tal-gass tal-klijenti tiegħu protetti mis-solidarjetà mill-produzzjoni tiegħu stess u għalhekk ma jkollux bżonn jitlob solidarjetà, huwa għandu jkun eżenti mill-obbligu tal-konklużjoni ta' arranġamenti tekniċi, legali u finanzjarji ma' Stati Membri oħra bl-iskop li jirċievi solidarjetà. Jenħtieġ li dan ma jaffettwax l-obbligu tal-Istat Membru rilevanti li jipprovdi solidarjetà lil Stati Membri oħra.

(48)

Jenħtieġ li jkun hemm salvagwardja fil-każ li l-Unjoni tista' ġġarrab spejjeż minħabba responsabbiltà, għajr għal atti illegali jew kondotta illegali skont it-tieni paragrafu tal-Artikolu 340 TFUE, fir-rigward ta' miżuri li l-Istati Membri jkunu meħtieġa jieħdu skont id-dispożizzjonijiet ta' dan ir-Regolament dwar il-mekkaniżmu ta' solidarjetà. Fir-rigward ta' tali każijiet, hu xieraq li l-Istat Membru li jirċievi solidarjetà jħallas lura l-ispejjeż tal-Unjoni.

(49)

Jenħtieġ ukoll li s-solidarjetà, fejn meħtieġ, tieħu l-forma ta' assistenza tal-protezzjoni ċivili pprovduta mill-Unjoni u l-Istati Membri tagħha. Tali assistenza jenħtieġ li tiġi ffaċilitata u kkoordinata mill-Mekkaniżmu tal-Unjoni għall-Protezzjoni Ċivili stabbilit bid-Deċiżjoni Nru 1313/2013/UE li għandha l-għan li ssaħħaħ il-kooperazzjoni bejn l-Unjoni u l-Istati Membri u biex tiffaċilita l-koordinazzjoni fil-qasam tal-protezzjoni ċivili biex ittejjeb l-effikaċja tas-sistemi għall-prevenzjoni, il-preparamenti u r-rispons għal diżastri naturali u dawk ikkawżati mill-bniedem.

(50)

Sabiex tiġi evalwata s-sigurtà tal-provvista tal-gass ta' Stat Membru jew f'parti mill-Unjoni jew fl-Unjoni kollha, l-aċċess għall-informazzjoni rilevanti huwa essenzjali. B'mod partikolari, l-Istati Membri u l-Kummissjoni jeħtieġu aċċess regolari għall-informazzjoni mill-impriżi tal-gass naturali rigward il-parametri ewlenin tal-provvista tal-gass, inkluż kejl preċiż tar-riżervi maħżuna disponibbli, bħala input fundamentali fit-tfassil ta' politiki ta' sigurtà tal-provvista tal-gass. Għal raġunijiet raġonevoli, irrispettivament minn dikjarazzjoni ta' emerġenza, jenħtieġ li jkun possibbli wkoll l-aċċess għal informazzjoni addizzjonali meħtieġa għall-valutazzjoni tas-sitwazzjoni ġenerali tal-provvista tal-gass. Dik l-informazzjoni addizzjonali normalment tkun informazzjoni dwar il-konsenja tal-gass li ma tkunx relatata mal-prezz, bħall-volumi ta' gass minimi u massimi, il-punti ta' konsenja jew il-kondizzjonijiet għas-sospensjoni tal-konsenji tal-gass.

(51)

Jenħtieġ li mekkaniżmu effiċjenti u mmirat għall-aċċess mill-Istati Membri u l-Kummissjoni għall-kuntratti ewlenin għal forniment tal-gass jiżgura valutazzjoni komprensiva tar-riskji rilevanti li jistgħu jwasslu għal interruzzjoni tal-provvista tal-gass jew jistgħu jinterferixxu mal-miżuri ta' mitigazzjoni neċessarji jekk xorta waħda jkun hemm kriżi. Fil-qafas ta' dak il-mekkaniżmu, jenħtieġ li tingħata notifika awtomatika dwar ċerti kuntratti ewlenin għal forniment tal-gass, irrispettivament mill-oriġini tal-gass, fl-Unjoni jew barra minnha, lill-awtoritajiet kompetenti tal-Istati Membri l-aktar affettwati. Jenħtieġ li kuntratti jew modifiki ġodda jiġu notifikati immedjatament wara l-konklużjoni tagħhom. Sabiex jiġu żgurati t-trasparenza u l-affidabilità, jenħtieġ li tingħata notifika wkoll dwar il-kuntratti eżistenti. L-obbligu ta' notifika jenħtieġ li jkopri wkoll il-ftehimiet kummerċjali kollha li huma rilevanti għall-eżekuzzjoni tal-kuntratt għal forniment tal-gass, fosthom ftehimiet rilevanti li jistgħu jkunu marbutin mal-infrastruttura, il-ħżin u kwalunkwe aspett importanti ieħor għas-sigurtà tal-provvista tal-gass.

(52)

Kwalunkwe obbligu biex kuntratt jiġi nnotifikat b'mod awtomatiku lill-awtorità kompetenti jeħtieġ ikun proporzjonat. Bl-applikazzjoni ta' dak l-obbligu għal kuntratti bejn fornitur u xerrej li jkopru l-ekwivalenti ta' 28 % jew aktar tal-konsum tal-gass fis-sena fis-suq nazzjonali jinħoloq il-bilanċ it-tajjeb f'termini ta' effiċjenza amministrattiva u trasparenza u jiġu stipulati obbligi ċari għall-parteċipanti tas-suq. Jenħtieġ li l-awtorità kompetenti tivvaluta l-kuntratt għall-finijiet ta' sigurtà tal-provvista tal-gass u tippreżenta r-riżultatital-valutazzjoni lill-Kummissjoni. Jekk l-awtorità kompetenti jkollha dubji dwar jekk kuntratt iqegħidx f'riskju s-sigurtà tal-provvista tal-gass ta' Stat Membru jew reġjun, jenħtieġ li tinnotifika l-kuntratt lill-Kummissjoni għall-valutazzjoni. Dan ma jfissirx li kuntratti oħrajn għal forniment tal-gass mhumiex rilevanti għas-sigurtà tal-provvista tal-gass. Għalhekk, fejn l-awtorità kompetenti tal-Istat Membru l-aktar affettwat jew il-Kummissjoni tqis li kuntratt għal forniment tal-gass li ma jkunx soġġett għal notifika awtomatika taħt dan ir-Regolament jista', minħabba l-ispeċifiċità tiegħu, il-grupp ta' klijenti moqdi, jew ir-rilevanza tiegħu għas-sigurtà għall-provvista tal-gass, iqiegħed f'riskju s-sigurtà tal-provvista tal-gass ta' Stat Membru, ta' reġjun fl-Unjoni jew tal-Unjoni, jenħtieġ li l-awtorità kompetenti jew il-Kummissjoni tkun tista' titlob dak il-kuntratt sabiex tivvaluta l-impatt tiegħu fuq is-sigurtà tal-provvista tal-gass. Dan jista' jintalab, pereżempju, f'każ ta' bdil fil-mudell tal-provvista tal-gass lil xerrej jew xerrejja partikolari fi Stat Membru li ma jkunx mistenni jekk is-swieq ikunu qegħdin jiffunzjonaw b'mod normali u li jista' jaffettwa l-provvista tal-gass tal-Unjoni jew partijiet minnha. Tali mekkaniżmu jiżgura li jkun garantit l-aċċess għal kuntratti ewlenin oħra għal forniment tal-gass rilevanti għas-sigurtà tal-provvista. Jenħtieġ li għal tali talba jingħataw ir-raġunijiet, b'kont meħud tal-bżonn li jiġi limitat kemm jista' jkun il-piż amministrattiv ta' dik il-miżura.

(53)

Il-Kummissjoni tista' tipproponi li l-Istati Membri jemendaw il-valutazzjonijiet tar-riskju u l-pjanijiet ta' azzjoni preventiva u l-pjanijiet ta' emerġenza sabiex dawn jieħdu kont tal-informazzjoni miksuba mill-kuntratti. Id-dispożizzjonijiet ta' dan ir-Regolament jenħtieġ li jkunu bla ħsara għad-dritt tal-Kummissjoni li tniedi proċedimenti ta' ksur skont l-Artikolu 258 tat-TFUE u li tinforza r-regoli tal-kompetizzjoni, inklużi dawk dwar l-għajnuna mill-Istat.

(54)

Il-kuntratti kollha jew l-informazzjoni kuntrattwali kollha riċevuta f'dak il-qafas, inklużi l-valutazzjonijiet mill-awtoritajiet kompetenti jew il-Kummissjoni, jenħtieġu li jibqgħu kunfidenzjali, partikolarment sabiex tiġi protetta informazzjoni kummerċjalment sensittiva, l-integrità u l-funzjonament korrett tas-sistema tal-iskambju ta' informazzjoni. Din il-kunfidenzjalità tista' tkun rilevanti wkoll għas-sigurtà pubblika minħabba l-importanza li prodott bażiku essenzjali bħall-gass naturali jista' jkollu għall-Istati Membri. Barra minn hekk, valutazzjonijiet sinifikanti u komprensivi mill-awtoritajiet kompetenti jew il-Kummissjoni ser ikun fihom, b'mod partikolari, informazzjoni marbuta mas-sigurtà pubblika, informazzjoni kummerċjali jew referenzi għalihom. Għaldaqstant hu meħtieġ li tiġi żgurata l-kunfidenzjalità tal-valutazzjonijiet. Huwa daqstant importanti li dawk li jirċievu informazzjoni kunfidenzjali skont dan ir-Regolament ikunu marbutin bl-obbligu tas-segretezza professjonali. Jenħtieġ li l-Kummissjoni, l-awtoritajiet kompetenti u l-awtoritajiet regolatorji nazzjonali, il-korpi jew il-persuni li jirċievu informazzjoni kunfidenzjali skont dan ir-Regolament jiżguraw il-kunfidenzjalità tal-informazzjoni li jirċievu.

(55)

Jenħtieġ li jkun hemm sistema proporzjonata ta' maniġġar ta' kriżijiet u skambju ta' informazzjoni msejsa fuq tliet livelli ta' kriżi: twissija bikrija, allert u emerġenza. Fejn l-awtorità kompetenti ta' Stat Membru tiddikjara wieħed mil-livelli ta' kriżi, jenħtieġ li minnufih tgħarraf lill-Kummissjoni kif ukoll lill-awtoritajiet kompetenti tal-Istati Membri li magħhom l-Istat Membru ta' dik l-awtorità kompetenti huwa direttament konness. Fil-każ ta' dikjarazzjoni ta' emerġenza, l-Istati Membri fil-grupp ta' riskju wkoll jenħtieġ li jiġu mgħarrfa. Jenħtieġ li l-Kummissjoni tiddikjara emerġenza reġjonali jew tal-Unjoni fuq it-talba ta' mill-inqas żewġ awtoritajiet kompetenti li jkunu ddikjaraw emerġenza. Biex jiġi żgurat livell xieraq ta' skambju ta' informazzjoni u kooperazzjoni fil-każ ta' emerġenza reġjonali jew tal-Unjoni, jenħtieġ li l-Kummissjoni tikkoordina l-azzjoni tal-awtoritajiet kompetenti, filwaqt li tqis b'mod sħiħ l-informazzjoni rilevanti minn, u r-riżultati ta', il-konsultazzjoni tal-GCG. Jenħtieġ li l-Kummissjoni tiddikjara t-tmiem tal-emerġenza reġjonali jew tal-Unjoni jekk, wara valutazzjoni tas-sitwazzjoni, tikkonkludi li dikjarazzjoni ta' emerġenza ma għadhiex ġustifikata.

(56)

Jenħtieġ li l-GCG jaġixxi bħala konsulent għall-Kummissjoni sabiex jgħin fil-koordinazzjoni tas-sigurtà tal-miżuri tal-provvista tal-gass f'każ ta' emerġenza tal-Unjoni. Jenħtieġ li jissorvelja wkoll l-adegwatezza u l-idoneità tal-miżuri li għandhom jittieħdu skont dan ir-Regolament, inkluż il-konsistenza tal-pjanijiet ta' azzjoni preventiva u l-pjanijiet ta' emerġenza mfassla mill-gruppi ta' riskju differenti.

(57)

Kriżi tal-gass tista' testendi lil hinn mill-fruntieri tal-Unjoni, u tinvolvi wkoll lil Partijiet Kontraenti tal-Komunità tal-Enerġija. Bħala Parti għat-Trattat dwar il-Komunità tal-Enerġija, l-Unjoni tenħtieġ li tippromwovi emendi għal dak it-Trattat bl-għan li jinħoloq suq integrat u spazju regolatorju waħdani billi tipprovdi qafas regolatorju xieraq u stabbli. Sabiex sadanittant jiġi żgurat maniġġar effiċjenti tal-kriżijiet fil-fruntieri bejn l-Istati Membri u l-Partijiet Kontraenti, huma mistednin jikkooperaw mill-qrib fil-prevenzjoni, it-tħejjija għal u t-trattament ta' kriżi tal-gass.

(58)

Minħabba li l-provvisti tal-gass minn pajjiżi terzi huma fundamentali għas-sigurtà tal-provvista tal-gass fl-Unjoni, jenħtieġ li l-Kummissjoni tikkoordina l-azzjoni fir-rigward ta' pajjiżi terzi, taħdem ma' pajjiżi fornituri u ta' tranżitu fuq arranġamenti għall-maniġġar tas-sitwazzjonijiet ta' kriżi u tiżgura fluss ta' gass stabbli lejn l-Unjoni.Jenħtieġ li l-Kummissjoni tkun intitolata tuża task force biex tissorvelja l-flussi tal-gass fl-Unjoni f'sitwazzjonijiet ta' kriżi wara konsultazzjoni mal-Istati Membri u l-pajjiżi terzi involuti u, fejn tinħoloq kriżi minħabba diffikultajiet f'pajjiż terz, sabiex taġixxi bħala medjatur u faċilitatur. Jenħtieġ li l-Kummissjoni tirrapporta regolarment lill-GCG.

(59)

Fejn ikun hemm informazzjoni affidabbli dwar sitwazzjoni barra l-Unjoni li thedded is-sigurtà tal-provvista tal-gass ta' Stat Membru wieħed jew aktar u li tista' tagħti bidu għal mekkaniżmu ta' twissija bikrija li jinvolvi lill-Unjoni u pajjiż terz, il-Kummissjoni jenħtieġ li tinforma lill-GCG mingħajr dewmien u l-Unjoni għandha tieħu azzjoni xierqa sabiex tipprova ttaffi s-sitwazzjoni.

(60)

Minħabba li l-għan ta' dan ir-Regolament, jiġifieri li jissalvagwarda s-sigurtà tal-provvista tal-gass fl-Unjoni, ma jistax jinkiseb b'mod suffiċjenti billi l-Istati Membri jaġixxu waħedhom, iżda pjuttost jista', minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta' sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju ta' proporzjonalità, kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-għan.

(61)

Sabiex ikun possibbli rispons rapidu tal-Unjoni għaċ-ċirkostanzi li jkunu qed jinbidlu fir-rigward tas-sigurtà tal-provvista tal-gass, jenħtieġ li s-setgħa sabiex jiġu adottati atti skont l-Artikolu 290 tat-TFUE tiġi ddelegata lill-Kummissjoni fir-rigward tal-kompożizzjoni tal-gruppi ta' riskju kif ukoll il-mudelli għall-valutazzjonijiet tar-riskju u għall-pjanijiet ta' azzjoni preventiva u l-pjanijiet ta' emerġenza. Huwa ta' importanza partikolari li l-Kummissjoni twettaq konsultazzjonijiet xierqa matul il-ħidma ta' tħejjija tagħha, anke fil-livell ta' esperti, u li dawk il-konsultazzjonijiet jitwettqu f'konformità mal-prinċipji stabbiliti fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (13). B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess b'mod sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(62)

Id-dritt tal-Istati Membri li jiddeterminaw il-kondizzjonijiet biex jiġu sfruttati r-riżorsi tal-enerġija tagħhom skont l-Artikolu 194(2) tat-TFUE mhuwiex milqut minn dan ir-Regolament.

(63)

Jenħtieġ li jitħassar ir-Regolament (UE) Nru 994/2010. Madankollu, sabiex tiġi evitata inċertezza legali, il-pjanijiet ta' azzjoni preventiva u l-pjanijiet ta' emerġenza mfassla skont dak ir-Regolament jenħtieġ li jibqgħu fis-seħħ sa meta l-pjanijiet ta' azzjoni preventiva u l-pjanijiet ta' emerġenza ġodda mfassla skont dan ir-Regolament jiġu adottati għall-ewwel darba,

(1)

“sigurtà” tfisser sigurtà kif definita fil-punt 32 tal-Artikolu 2 tad-Direttiva 2009/73/KE;

(2)

“klijent” tfisser klijent kif definita fil-punt 24 tal-Artikolu 2 tad-Direttiva 2009/73/KE;

(3)

“klijent domestiku” tfisser klijent domestiku kif definita fil-punt 25 tal-Artikolu 2 tad-Direttiva 2009/73/KE;

(4)

“servizz soċjali essenzjali” tfisser servizz relatat ma' kura tas-saħħa, kura soċjali essenzjali, emerġenza, sigurtà, amministrazzjoni edukattiva jew pubblika;

(5)

“klijent protett” tfisser klijent domestiku li jkun konness ma' netwerk ta' distribuzzjoni tal-gass u, barra minn hekk, fejn l-Istat Membru kkonċernat jiddeċiedi dan, tista' tfisser ukoll waħda jew aktar minn dawn li ġejjin, dment li intrapriżi jew servizzi msemmijin fil-punti (a) u (b) ma jirrappreżentawx flimkien aktar minn 20 % tal-konsum finali annwali totali tal-gass f'dak l-Istat Membru:

(6)

“klijent protett mis-solidarjetà” tfisser klijent domestiku li jkun konness ma' netwerk ta' distribuzzjoni tal-gass, u addizzjonalment jista' jinkludi waħda minn, jew it-tnejn ta', dawn li ġejjin:

(7)

“awtorità kompetenti” tfisser awtorità governattiva nazzjonali jew awtorità regolatorja nazzjonali nominata minn Stat Membru biex tiżgura l-implimentazzjoni tal-miżuri previsti f'dan ir-Regolament;

(8)

“awtorità regolatorja nazzjonali” tfisser awtorità regolatorja nazzjonali nominata skont l-Artikolu 39(1) tad-Direttiva 2009/73/KE;

(9)

“impriża tal-gass naturali” tfisser impriża tal-gass naturali kif definita fil-punt 1 tal-Artikolu 2 tad-Direttiva 2009/73/KE;

(10)

“kuntratt għal forniment tal-gass” tfisser kuntratt għal forniment tal-gass kif definita fil-punt 34 tal-Artikolu 2 tad-Direttiva 2009/73/KE;

(11)

“trasmissjoni” tfisser trasmissjoni kif definita fil-punt 3 tal-Artikolu 2 tad-Direttiva 2009/73/KE;

(12)

“operatur tas-sistema ta' trasmissjoni” tfisser operatur tas-sistema ta' trasmissjoni kif definita fil-punt 4 tal-Artikolu 2 tad-Direttiva 2009/73/KE;

(13)

“distribuzzjoni” tfisser distribuzzjoni kif definita fil-punt 5 tal-Artikolu 2 tad-Direttiva 2009/73/KE;

(14)

“operatur tas-sistema tad-distribuzzjoni” tfisser operatur tas-sistema tad-distribuzzjoni kif definita fil-punt 6 tal-Artikolu 2 tad-Direttiva 2009/73/KE;

(15)

“interkonnettur” tfisser interkonnettur kif definita fil-punt 17 tal-Artikolu 2 tad-irettiva 2009/73/KE;

(16)

“kurituri tal-provvista ta' emerġenza” tfisser rotot tal-provvista tal-gass tal-Unjoni li jgħinu lill-Istati Membri jtaffu aħjar l-effetti ta' interruzzjoni potenzjali tal-provvista jew tal-infrastruttura;

(17)

“kapaċità ta' ħżin” tfisser kapaċità ta' ħżin kif definita fil-punt 28 tal-Artikolu 2 tar-Regolament (KE) Nru 715/2009;

(18)

“kapaċità teknika” tfisser kapaċità teknika kif definita fil-punt 18 tal-Artikolu 2 tar-Regolament (KE) Nru 715/2009 tal-Parlament Ewropew u tal-Kunsill;

(19)

“kapaċità kostanti” tfisser kapaċità kostanti kif definita fil-punt 16 tal-Artikolu 2 tar-Regolament (KE) Nru 715/2009 tal-Parlament Ewropew u tal-Kunsill;

(20)

“kapaċità interruttibbli” tfisser kapaċità interruttibbli kif definita fil-punt 13 tal-Artikolu 2 tar-Regolament (KE) Nru 715/2009 tal-Parlament Ewropew u tal-Kunsill;

(21)

“kapaċità ta' faċilità LNG” tfisser il-kapaċità ta' faċilità LNG kif definita fil-punt 24 tal-Artikolu 2 tar-Regolament (KE) Nru 715/2009 tal-Parlament Ewropew u tal-Kunsill;

(22)

“faċilità tal-LNG” tfisser faċilità tal-LNG kif definita fil-punt 11 tal-Artikolu 2 tad-Direttiva 2009/73/KE;

(23)

“faċilità tal-ħżin” tfisser faċilità tal-ħżin kif definita fil-punt 9 tal-Artikolu 2 tad-Direttiva 2009/73/KE;

(24)

“sistema” tfisser sistema kif definita fil-punt 13 tal-Artikolu 2 tad-Direttiva 2009/73/KE;

(25)

“utent tas-sistema” tfisser utent tas-sistema kif definita fil-punt 23 tal-Artikolu 2 tad-Direttiva 2009/73/KE;

(26)

“servizzi anċillari” tfisser servizzi anċillari kif definita fil-punt 14 tal-Artikolu 2 tad-Direttiva 2009/73/KE.

(a)

is-sigurtà tal-provvista tal-gass, f'kull ħin u b'mod aktar speċifiku fil-każ ta' emerġenza;

(b)

l-informazzjoni kollha rilevanti għas-sigurtà tal-provvista tal-gass f'livell nazzjonali, reġjonali u tal-Unjoni;

(c)

l-aħjar prattiki u linji gwida possibbli lill-partijiet ikkonċernati kollha;

(d)

il-livell ta' sigurtà tal-provvista tal-gass, il-livelli ta' riferiment u l-metodoloġiji ta' valutazzjoni;

(e)

ix-xenarji nazzjonali, reġjonali u tal-Unjoni u l-ittestjar tal-livelli ta' tħejjija;

(f)

il-valutazzjoni tal-pjanijiet ta' azzjoni preventiva u l-pjanijiet ta' emerġenza, il-koerenza bejn diversi pjanijiet, u l-implimentazzjoni tal-miżuri previsti fihom;

(g)

il-koordinazzjoni ta' miżuri li jindirizzaw emerġenza fl-Unjoni, mal-Partijiet Kontraenti tal-Komunità tal-Enerġija u ma' pajjiżi terzi oħrajn;

(h)

assistenza meħtieġa mill-Istati Membri l-aktar affettwati.

(a)

fil-każ ta' konnessjonijiet għall-faċilitajiet tal-produzzjoni, għall-faċilitajiet LNG u għan-netwerks ta' distribuzzjoni; jew

(b)

fejn tkun ingħatat eżenzjoni minn dak l-obbligu, wara valutazzjoni ddettaljata u wara konsultazzjoni mal-Istati Membri l-oħra u mal-Kummissjoni f'konformità mal-Anness III.

(a)

valutazzjoni tad-domanda tas-suq;

(b)

projezzjonijiet tad-domanda u l-provvista;

(c)

l-impatt ekonomiku possibbli fuq l-infrastruttura eżistenti;

(d)

studju tal-fattibbiltà;

(e)

l-ispejjeż għall-kapaċità bidirezzjonali li jinkludu r-rinfurzar neċessarju tas-sistema ta' trasmissjoni; u

(f)

il-benefiċċji għas-sigurtà tal-provvista tal-gass filwaqt li jitqies il-kontribut possibbli tal-kapaċità bidirezzjonali biex jintlaħaq l-istandard fl-infrastruttura stabbilit f'dan l-Artikolu.

(a)

ikollu mill-inqas żewġ interkonnetturi ma' Stati Membri oħrajn;

(b)

ikollu mill-inqas żewġ sorsi differenti ta' provvista tal-gass; u

(c)

ma jkollu l-ebda faċilità ta' ħżin tal-gass fit-territorju tiegħu.

(a)

ikollha mill-inqas żewġ interkonnetturi ma' Stati Membri oħrajn;

(b)

ikollha mill-inqas żewġ sorsi differenti ta' provvista tal-gass; u

(c)

ma jkollha l-ebda faċilità ta' ħżin tal-gass jew faċilità ta' LNG fit-territorju tagħha.

(a)

ma jkollha l-ebda tranżitu ta' gass għall-Istati Membri l-oħrajn fit-territorju tagħha;

(b)

ikollha konsum annwali gross intern tal-gass ta' inqas minn 2 Mtoe; u

(c)

ikollha inqas minn 5 % tal-konsum totali tal-enerġija primarja mill-gass.

(a)

temperaturi estremi waqt perijodu bl-ogħla valuri ta' sebat ijiem bi probabbiltà statistika ta' darba f'20 sena;

(b)

kwalunkwe perijodu ta' 30 ġurnata ta' domanda eċċezzjonalment għolja ta' gass, li jseħħ bi probabbiltà statistika ta' darba f'20 sena;

(c)

għal perijodu ta' 30 ġurnata f'każ ta' interruzzjoni tal-akbar infrastruttura unika tal-gass f'kondizzjonijiet xitwin medji.

(a)

ikun konformi mal-Artikolu 8(1);

(b)

ma jkollux impatt negattiv fuq il-kapaċità ta' kwalunkwe Stat Membru ieħor li jipprovdi l-gass lill-klijenti protetti tiegħu skont dan l-Artikolu fil-każ ta' emerġenza nazzjonali, reġjonali jew tal-Unjoni; u

(c)

ikun konformi mal-Artikolu 12(5) fil-każ ta' emerġenza reġjonali jew tal-Unjoni.

(a)

bl-użu tal-istandards speċifikati fl-Artikoli 5 u 6. Il-valutazzjoni tar-riskju għandha tiddeskrivi l-kalkolu tal-formula N – 1 fil-livell nazzjonali u fejn adatt tinkludi kalkolu tal-formula N – 1 fil-livell reġjonali. Il-valutazzjoni tar-riskju għandha tinkludi wkoll il-preżunzjonijiet użati, inkluż fejn applikabbli dawk għall-kalkolu tal-formula N – 1 fil-livell reġjonali, u d-data meħtieġa għal tali kalkolu. Il-kalkolu tal-formula N – 1 fil-livell nazzjonali għandu jkun akkumpanjat minn simulazzjoni ta' interruzzjoni tal-akbar infrastruttura unika tal-gass bl-użu ta' mudell idrawliku għat-territorju nazzjonali kif ukoll minn kalkolu tal-formula N – 1 b'kont meħud tal-livell ta' gass f'ħażniet ta' 30 % u 100 % tal-volum ta' ħidma massimu;

(b)

b'kont meħud taċ-ċirkostanzi nazzjonali u transnazzjonali rilevanti kollha, b'mod partikolari d-daqs tas-suq, il-konfigurazzjoni tan-netwerk, il-flussi attwali, inkluż il-flussi ta' ħruġ mill-Istat Membru kkonċernat, il-possibbiltà ta' flussi fiżiċi ta' gass fiż-żewġ direzzjonijiet inkluż il-ħtieġa potenzjali għal rinfurzar konsegwenti tas-sistema ta' trasmissjoni, il-preżenza ta' produzzjoni u ħażna u r-rwol tal-gass fit-taħlitiet tal-enerġija, b'mod partikolari rigward it-tisħin distrettwali u l-ġenerazzjoni tal-elettriku u għall-operazzjoni tal-industriji, u konsiderazzjonijiet tal-kwalità tas-sigurtà u tal-gass;

(c)

b'simulazzjoni tax-xenarji varji ta' domanda eċċezzjonalment għolja ta' gass u interruzzjoni tal-provvista tal-gass, filwaqt li jitqiesu l-istorja, il-probabbiltà, l-istaġun, il-frekwenza u t-tul tal-okkorrenza tagħhom u l-valutazzjoni tal-konsegwenzi probabbli tagħhom, bħal:

(d)

bl-identifikazzjoni tal-interazzjoni u l-korrelazzjoni ta' riskji fost l-Istati Membri fil-grupp ta' riskju u ma' Stati Membri oħrajn jew gruppi ta' riskju oħrajn, kif adatt, inkluż fir-rigward ta' interkonnessjonijiet, provvisti transkonfinali, aċċess transkonfinali għal faċilitajiet ta' ħżin u kapaċità bidirezzjonali;

(e)

billi jitqiesu r-riskji marbuta mal-kontroll tal-infrastruttura rilevanti għas-sigurtà tal-provvista tal-gass sa fejn jistgħu jinvolvu, fost affarijiet oħra, riskji ta' sottoinvestiment, theddida għad-diversifikazzjoni, l-użu ħażin tal-infrastruttura eżistenti jew ksur tad-dritt tal-Unjoni;

(f)

b'kont meħud tal-kapaċità massima tal-interkonnessjoni ta' kull punt ta' dħul u ħruġ fil-fruntiera u d-diversi livelli ta' mili għall-ħżin.

(a)

pjan ta' azzjoni preventiva li jkollu fih il-miżuri meħtieġa biex jitneħħew jew jittaffew ir-riskji identifikati, inkluż miżuri marbutin mal-effetti tal-effiċjenza enerġetika u l-miżuri min-naħa tad-domanda fil-valutazzjonijiet tar-riskju komuni u nazzjonali u skont l-Artikolu 9;

(b)

pjan ta' emerġenza li jkollu fih il-miżuri li għandhom jittieħdu biex jitneħħa jew jittaffa l-impatt ta' interruzzjoni tal-provvista tal-gass skont l-Artikolu 10.

(a)

huwa ma jkunx effettiv sabiex itaffi r-riskji kif identifikati fil-valutazzjoni tar-riskju;

(b)

huwa jkun inkonsistenti max-xenarji tar-riskju vvalutati jew mal-pjanijiet ta' Stat Membru ieħor jew grupp ta' riskju;

(c)

huwa ma jkunx jikkonforma mar-rekwiżit stabbilit fil-paragrafu 1 li m'għandux joħoloq indebitament distorsjoni tal-kompetizzjoni jew tal-funzjonament effettiv tas-suq intern;

(d)

huwa ma jkunx konformi mad-dispożizzjonijiet ta' dan ir-Regolament jew ma' dispożizzjonijiet oħrajn tal-liġi tal-Unjoni.

(a)

ir-riżultati tal-valutazzjoni tar-riskju u sommarju tax-xenarji kkunsidrati, kif imsemmijin fil-punt (c) tal-Artikolu 7(4);

(b)

id-definizzjoni ta' klijenti protetti u l-informazzjoni deskritta fit-tieni subparagrafu tal-Artikolu 6(1);

(c)

il-miżuri, il-volumi u l-kapaċitajiet meħtieġa sabiex jiġu sodisfatti l-istandards tal-infrastruttura u tal-provvista tal-gass stabbiliti fl-Artikoli 5 u 6, inkluż, fejn applikabbli, il-punt sa fejn il-miżuri min-naħa tad-domanda jistgħu jikkumpensaw b'mod suffiċjenti, fil-ħin, għal interruzzjoni tal-provvista tal-gass kif imsemmi fl-Artikolu 5(2), l-identifikazzjoni tal-akbar infrastruttura unika tal-gass ta' interess komuni fil-każ tal-applikazzjoni tal-Artikolu 5(3), il-volumi tal-gass neċessarji għal kull kategorija ta' klijenti protetti u għal kull xenarju kif imsemmi fl-Artikolu 6(1), u kwalunkwe standard tal-provvista tal-gass miżjud inkluż kwalunkwe ġustifikazzjoni li turi konformità mal-kondizzjonijiet stabbiliti fl-Artikolu 6(2) u deskrizzjoni ta' mekkaniżmu sabiex jitnaqqas temporanjament kwalunkwe standard tal-provvista tal-gass miżjud jew obbligu addizzjonali skont l-Artikolu 11(3);

(d)

obbligi imposti fuq l-impriżi tal-gass naturali, impriżi tal-elettriku meta jkun xieraq, u korpi rilevanti oħrajn li probabbli jkollhom impatt fuq is-sigurtà tal-provvista tal-gass, bħal obbligi għall-operazzjoni mingħajr periklu tas-sistema tal-gass;

(e)

miżuri preventivi oħrajn imfasslin sabiex jindirizzaw ir-riskji identifikati fil-valutazzjoni tar-riskju, bħal dawk relatati mal-ħtieġa sabiex jissaħħu l-interkonnessjonijiet bejn l-Istati Membri ġirien, biex tkompli tittejjeb l-effiċjenza enerġetika, biex titnaqqas id-domanda għall-gass u l-possibbiltà li jiġu diversifikati r-rotot tal-gass u s-sorsi tal-provvista tal-gass u l-użu reġjonali tal-kapaċitajiet eżistenti ta' ħżin u tal-LNG, jekk ikun adatt, biex tinżamm provvista tal-gass għall-klijenti kollha sa fejn ikun possibbli;

(f)

informazzjoni fuq l-impatt ekonomiku, l-effikaċja u l-effiċjenza tal-miżuri li jinsabu fil-pjan, inklużi l-obbligi msemmijin fil-punt (k);

(g)

deskrizzjoni tal-effetti tal-miżuri li hemm fil-pjan dwar il-funzjonament tas-suq intern tal-enerġija kif ukoll swieq nazzjonali, inklużi l-obbligi msemmijin fil-punt (k);

(h)

deskrizzjoni tal-impatt tal-miżuri fuq l-ambjent u fuq il-klijenti;

(i)

il-mekkaniżmi li għandhom jintużaw għal kooperazzjoni mal-Istati Membri l-oħrajn, inkluż il-mekkaniżmi għat-tħejjija u l-implimentazzjoni tal-pjanijiet ta' azzjoni preventiva u pjanijiet ta' emerġenza;

(j)

informazzjoni dwar l-interkonnessjonijiet u l-infrastruttura eżistenti u futuri, inklużi dawk li jipprovdu aċċess għas-suq intern, il-flussi transkonfinali, l-aċċess transkonfinali għal ħżin u faċilitajiet ta' LNG u l-kapaċità bidirezzjonali, b'mod partikolari fil-każ ta' emerġenza;

(k)

informazzjoni dwar l-obbligi kollha ta' servizz pubbliku relatati mas-sigurtà tal-provvista tal-gass.

(a)

l-impatt potenzjali fuq l-iżvilupp tas-suq tal-gass nazzjonali u l-kompetizzjoni fil-livell nazzjonali;

(b)

l-impatt potenzjali fuq is-suq intern tal-gass;

(c)

l-impatt potenzjali fuq is-sigurtà tal-provvista tal-gass ta' Stati Membri ġirien, b'mod partikolari għal dawk il-miżuri li jistgħu jnaqqsu l-likwidità fis-swieq reġjonali jew jillimitaw il-flussi lejn Stati Membri ġirien;

(d)

l-ispejjeż u l-benefiċċji, ivvalutati meta mqabbla ma' miżuri alternattivi bbażati fuq is-suq;

(e)

valutazzjoni tan-neċessità u l-proporzjonalità meta mqabbla ma' miżuri possibbli bbażati fuq is-suq;

(f)

apprezzament dwar jekk il-miżura tiżgurax possibbiltajiet indaqs għall-parteċipanti kollha tas-suq;

(g)

strateġija ta' eliminazzjoni gradwali, it-tul mistenni tal-miżura prevista u kalendarju adatt ta' rieżami.

(a)

jibbaża fuq il-livelli ta' kriżi msemmija fl-Artikolu 11(1);

(b)

jiddefinixxi r-rwol u r-responsabbiltajiet tal-impriżi tal-gass naturali, l-operaturi tas-sistemi ta' trasmissjoni għall-elettriku jekk rilevanti u tal-klijenti tal-gass industrijali inkluż il-produtturi rilevanti tal-elettriku, waqt li jqis il-livelli differenti sa fejn ikunu affettwati f'każ ta' interruzzjoni tal-provvista tal-gass, u l-interazzjoni tagħhom mal-awtoritajiet kompetenti u fejn adatt mal-awtoritajiet regolatorji nazzjonali f'kull wieħed mil-livelli ta' kriżi msemmija fl-Artikolu 11(1);

(c)

jiddefinixxi r-rwol u r-responsabbiltajiet tal-awtoritajiet kompetenti u tal-korpi l-oħrajn li lilhom ikunu ġew delegati l-kompiti kif imsemmi fl-Artikolu 3(2) f'kull wieħed mil-livelli ta' kriżi msemmija fl-Artikolu 11(1);

(d)

jiżgura li l-impriżi tal-gass naturali u l-klijenti tal-gass industrijali inkluż il-produtturi rilevanti tal-elettriku jingħataw opportunità biżżejjed sabiex iwieġbu għal-livelli ta' kriżi msemmija fl-Artikolu 11(1);

(e)

jidentifika, jekk ikun adatt, il-miżuri u l-azzjonijiet li għandhom jittieħdu sabiex jittaffa l-impatt potenzjali ta' interruzzjoni tal-provvista tal-gass fuq it-tisħin distrettwali u l-provvista tal-elettriku ġġenerata mill-gass, inkluż permezz ta' perspettiva integrata tal-operazzjonijiet tas-sistemi tal-enerġija tal-elettriku u l-gass jekk rilevanti;

(f)

jistabbilixxi proċeduri u miżuri dettaljati li għandhom jiġu segwiti għal-livelli ta' kriżi msemmija fl-Artikolu 11(1), inklużi l-iskemi korrispondenti dwar il-flussi ta' informazzjoni;

(g)

jinnomina maniġer ta' kriżi u jiddefinixxi r-rwol tiegħu;

(h)

jidentifika l-kontribut tal-miżuri abbażi tas-suq biex tiġi indirizzata s-sitwazzjoni f'livell ta' allert u biex tittaffa s-sitwazzjoni f'livell ta' emerġenza;

(i)

jidentifika l-kontribut ta' miżuri mhux ibbażati fuq is-suq ippjanati jew li għandhom jiġu implimentati għal-livell ta' emerġenza, u jivvaluta l-livell ta' kemm l-użu ta' tali miżuri mhux ibbażati fuq is-suq huwa meħtieġ sabiex tiġi indirizzata kriżi. L-effetti tal-miżuri mhux ibbażati fuq is-suq għandhom jiġu vvalutati u jiġu identifikati l-proċeduri għall-implimentazzjoni tagħhom. Miżuri mhux ibbażati fuq is-suq għandhom jintużaw biss meta mekkaniżmi bbażati fuq is-suq weħidhom ma jistgħux jibqgħu jiżguraw il-provvisti, b'mod partikolari lill-klijenti protetti, jew għall-applikazzjoni tal-Artikolu 13;

(j)

jiddeskrivi l-mekkaniżmi li jintużaw għall-kooperazzjoni mal-Istati Membri l-oħra għal-livelli ta' kriżi msemmija fl-Artikolu 11(1) u l-arranġamenti għall-iskambju tal-informazzjoni bejn l-awtoritajiet kompetenti;

(k)

jiddeskrivi l-obbligi ta' rappurtar imposti fuq l-impriżi tal-gass naturali u, fejn xieraq, l-impriżi tal-elettriku fil-livelli ta' allert u ta' emerġenza;

(l)

jiddeskrivi l-arranġamenti tekniċi jew legali fis-seħħ sabiex jipprevjenu konsum mhux dovut tal-gass minn klijenti li jkunu konnessi ma' netwerk ta' distribuzzjoni jew ta' trasmissjoni tal-gass iżda li ma jkunux klijenti protetti;

(m)

jiddeskrivi l-arranġamenti tekniċi, legali u finanzjarji fis-seħħ sabiex jiġu applikati l-obbligi tas-solidarjetà stabbiliti fl-Artikolu 13;

(n)

jagħti stima tal-volumi tal-gass li jistgħu jiġu kkunsmati mill-konsumaturi protetti mis-solidarjetà li tkopri mill-inqas il-każijiet deskritti fl-Artikolu 6(1).

(o)

jistabbilixxi lista ta' azzjonijiet predefiniti sabiex jagħmel il-gass disponibbli fil-każ ta' emerġenza, inkluż ftehimiet kummerċjali bejn il-partijiet involuti f'tali azzjonijiet u l-mekkaniżmi ta' kumpens għall-impriżi tal-gass naturali fejn adatt, waqt li titqies il-kunfidenzjalità tad-data sensittiva. Azzjonijiet bħal dawn jistgħu jinvolvu ftehimiet transkonfinali bejn l-Istati Membri u/jew l-impriżi tal-gass naturali.

(a)

livell ta' twissija bikrija (“twissija bikrija”): fejn ikun hemm informazzjoni konkreta, serja u affidabbli li avveniment li probabbilment jirriżulta f'deterjorament sinifikanti tas-sitwazzjoni tal-provvista tal-gass jista' jseħħ u li probabbilment iwassal biex jiġi azzjonat il-livell ta' allert jew ta' emerġenza; il-livell ta' twissija bikrija jista' jiġi attivat b'mekkaniżmu ta' twissija bikrija;

(b)

livell ta' allert (“allert”): fejn interruzzjoni tal-provvista tal-gass jew domanda eċċezzjonalment għolja ta' gass li tirriżulta f'deterjorament sinifikanti tas-sitwazzjoni tal-provvista tal-gass isseħħ iżda s-suq xorta jkun għadu jlaħħaq ma' dik l-interruzzjoni jew domanda mingħajr il-ħtieġa li jirrikorri għall-miżuri mhux ibbażati fuq is-suq;

(c)

livell ta' emerġenza (“emerġenza”): fejn jkun hemm domanda eċċezzjonalment għolja ta' gass, interruzzjoni sinifikanti tal-provvista tal-gass jew deterjorament sinifikanti ieħor tas-sitwazzjoni tal-provvista tal-gass u l-miżuri kollha rilevanti bbażati fuq is-suq ikunu ġew implimentati iżda l-provvista tal-gass ma tkunx suffiċjenti sabiex tlaħħaq mal-bqija tad-domanda tal-gass biex b'hekk ikollhom jiġu introdotti addizzjonalment miżuri mhux ibbażati fuq iss-suq bil-ħsieb li, b'mod partikolari, jiġu salvagwardati l-provvisti tal-gass lill-klijenti protetti skont l-Artikolu 6.

(a)

m'għandha tiġi introdotta l-ebda miżura li tillimita bla bżonn il-fluss tal-gass fis-suq intern f'kull ħin;

(b)

ma għandha tiġi introdotta l-ebda miżura li probabbilment tipperikola serjament is-sitwazzjoni tal-provvista tal-gass fi Stat Membru ieħor; u

(c)

l-aċċess transkonfinali għall-infrastruttura f'konformità mar-Regolament (KE) Nru 715/2009 jinżamm kemm jista' jkun mil-lat tekniku u ta' sikurezza fil-każ ta' emerġenza, skont il-pjan ta' emerġenza.

(a)

jista' jirrizulta fi ħsarat serji fil-funzjonament tas-sistema tal-elettriku; jew

(b)

ixekkel il-produzzjoni u/jew it-trasport tal-gass.

(a)

tiżgura l-iskambju tal-informazzjoni;

(b)

tiżgura l-konsistenza u l-effikaċja tal-azzjoni fil-livell tal-Istat Membru u dak reġjonali b'rabta mal-livell tal-Unjoni;

(c)

tikkoordina l-azzjonijiet fir-rigward ta' pajjiżi terzi.

(a)

ma tiġi introdotta l-ebda miżura li tirrestrinġi bla bżonn il-fluss tal-gass fi ħdan is-suq intern fi kwalunkwe ħin; b'mod partikolari l-fluss tal-gass lis-swieq affettwati;

(b)

ma għandha tiġi introdotta l-ebda miżura li probabbilment tipperikola serjament is-sitwazzjoni tal-provvista tal-gass fi Stat Membru ieħor; u

(c)

l-aċċess transkonfinali għall-infrastruttura f'konformità mar-Regolament (KE) Nru 715/2009 jinżamm kemm jista' jkun mil-lat tekniku u ta' sikurezza fil-każ ta' emerġenza, skont il-pjan ta' emerġenza.

(a)

ma kienx kapaċi jkopri n-nuqqas fil-provvista tal-gass għall-klijenti tiegħu protetti s-solidarjetà minkejja l-applikazzjoni tal-miżura msemmija fl-Artikolu 11(3);

(b)

ikun eżawrixxa l-miżuri kollha bbażati fuq is-suq u l-miżuri kollha previsti fil-pjan ta' emerġenza tiegħu;

(c)

ikun innotifika talba espliċita lill-Kummissjoni u lill-awtoritajiet kompetenti tal-Istati Membri kollha li magħhom huwa konness direttament jew skont il-paragrafu 2 permezz ta' pajjiż terz, akkumpanjata minn deskrizzjoni tal-miżuri implimentati msemmija fil-punt (b) ta' dan il-paragrafu;

(d)

ikun impenja ruħu li jħallas kumpens ġust minnufih lill-Istat Membru li jipprovdi solidarjetà skont il-paragrafu 8.

(a)

il-gass konsenjat fit-territorju tal-Istat Membru rikjedenti;

(b)

l-ispejjeż rilevanti u raġonevoli kollha l-oħra mġarrba meta tiġi pprovduta s-solidarjetà, inkluż, fejn xieraq, l-ispejjeż ta' tali miżuri li setgħu ġew stabbiliti minn qabel;

(c)

rimborż għal kwalunkwe kumpens li jirrizulta minn proċedimenti ġudizzjarji, proċedimenti ta' arbitraġġ jew proċedimenti simili u soluzzjonijiet u spejjeż relatati ta' tali proċedimenti li jinvolvu lill-Istat Membru li jipprovdi solidarjetà fil-konfront ta' entitajiet involuti fl-għoti ta' tali solidarjetà.

(a)

is-sikurezza operazzjonali tan-netwerks;

(b)

il-prezzijiet tal-gass li għandhom jiġu applikati u/jew il-metodoloġija għall-iffissar tal-prezzijiet, filwaqt li jittieħed kont tal-impatt fuq il-funzjonament tas-suq;

(c)

l-użu tal-interkonnessjonijiet, inkluż il-kapaċità bidirezzjonali u l-ħżin tal-gass taħt l-art;

(d)

il-volumi tal-gass jew il-metodoloġija għall-iffissar tal-volumi;

(e)

il-kategoriji tal-ispejjeż li jridu jiġu koperti permezz ta' kumpens ġust u fil-pront, li jistgħu jinkludu danni għall-industrija affettwata;

(f)

indikazzjoni tal-metodu li bih jista' jiġi kkalkulat kumpens ġust.

(a)

it-tbassir dwar id-domanda u l-provvista ta' kuljum għall-gass għat-tlitt ijiem sussegwenti, f'miljuni ta' metri kubiċi kuljum (mcm/d);

(b)

il-fluss ta' gass ta' kuljum fil-punti kollha ta' dħul u ħruġ transkonfinali kif ukoll il-punti kollha li jikkonnettjaw faċilità ta' produzzjoni, faċilità ta' ħżin jew terminal LNG man-netwerk, f'miljuni ta' metri kubiċi kuljum (mcm/d);

(c)

il-perijodu, indikat fi ġranet, li għalih huwa mistenni li tkun tista' tiġi ggarantita l-provvista tal-gass lill-klijenti protetti.

(a)

l-informazzjoni stipulata fil-paragrafu 1;

(b)

informazzjoni dwar il-miżuri ppjanati li għandhom isiru u dawk diġà implimentati mill-awtorità kompetenti sabiex tittaffa l-emerġenza, u l-informazzjoni dwar l-effikaċja tagħhom;

(c)

it-talbiet li saru għal miżuri addizzjonali li għandhom jittieħdu minn awtoritajiet kompetenti oħrajn;

(d)

il-miżuri implimentati fuq it-talba ta' awtoritajiet kompetenti oħrajn.

(a)

lill-awtorità kompetenti kkonċernata, id-dettalji li ġejjin tal-kuntratti għal forniment tal-gass b'dimensjoni transkonfinali u tul ta' żmien ta' aktar minn sena li hija tkun ikkonkludiet biex takkwista l-gass:

(b)

lill-awtorità kompetenti tal-Istat Membru l-aktar affettwat immedjatament wara l-konklużjoni jew il-modifika tal-kuntratti għal forniment tal-gass tagħha li jkunu itwal minn sena konklużi jew modifikati fi jew wara l-1 ta' Novembru 2017 li individwalment jew b'mod kumulattiv ma' kuntratti tagħha mal-istess fornitur jew l-affiljati tiegħu jkunu ekwivalenti għal 28 % jew aktar tal-konsum tal-gass naturali fis-sena f'dak l-Istat Membru li għandu jiġi kkalkulat abbażi tal-aktar data reċenti disponibbli. Barra minn hekk, sat-2 ta' Novembru 2018 l-impriżi tal-gass naturali għandhom jinnotifikaw lill-awtorità kompetenti bil-kuntratti eżistenti kollha li jissodisfaw l-istess kondizzjonijiet. L-obbligu ta' notifika ma għandux ikopri informazzjoni dwar il-prezz u ma għandux japplika għall-modifiki relatati biss mal-prezz tal-gass. L-obbligu ta' notifika għandu japplika wkoll għall-ftehimiet kummerċjali kollha li huma rilevanti għall-eżekuzzjoni tal-kuntratt għal forniment tal-gass eskluża l-informazzjoni dwar il-prezz.

(a)

persuni li jaħdmu jew li kienu jaħdmu mal-Kummissjoni;

(b)

awdituri u esperti mogħtija struzzjonijiet mill-Kummissjoni;

(c)

persuni li jaħdmu jew li kienu jaħdmu mal-awtoritajiet kompetenti u mal-awtoritajiet regolatorji nazzjonali jew ma' awtoritajiet rilevanti oħrajn;

(d)

awdituri u esperti mogħtija struzzjonijiet mill-awtoritajiet kompetenti u mill-awtoritajiet regolatorji nazzjonali jew minn awtoritajiet rilevanti oħrajn.

(a)

għall-punt 5 tal-Artikolu 2, l-Artikolu 3(2), l-Artikolu 7(5) u l-punt (a) tal-Artikolu 14(6): 12-il xahar;

(b)

għall-Artikolu 6(1): 18-il xahar;

(c)

għall-Artikolu 8(7): 24 xahar;

(d)

għall-Artikolu 5(4): 36 xahar;

(e)

għall-Artikolu 5(1): 48 xahar.