Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32017R1261

    Regolament tal-Kummissjoni (UE) 2017/1261 tat-12 ta' Lulju 2017 li jemenda r-Regolament (UE) Nru 142/2011 fir-rigward ta' metodi alternattivi għall-ipproċessar ta' ċerti xaħmijiet immaċinati (Test b'rilevanza għaż-ŻEE. )

    C/2017/2910

    ĠU L 182, 13.7.2017, p. 31–33 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/reg/2017/1261/oj

    13.7.2017   

    MT

    Il-Ġurnal Uffiċjali tal-Unjoni Ewropea

    L 182/31

    REGOLAMENT TAL-KUMMISSJONI (UE) 2017/1261

    tat-12 ta' Lulju 2017

    li jemenda r-Regolament (UE) Nru 142/2011 fir-rigward ta' metodi alternattivi għall-ipproċessar ta' ċerti xaħmijiet immaċinati

    (Test b'rilevanza għaż-ŻEE)

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat ir-Regolament (KE) Nru 1069/2009 tal-Parlament Ewropew u tal-Kunsill tal-21 ta' Ottubru 2009 li jistabbilixxi regoli tas-saħħa li jirrigwardaw prodotti sekondarji tal-annimali jew derivati minnhom mhux maħsuba għall-konsum mill-bniedem u li jħassar ir-Regolament (KE) Nru 1774/2002 (1), u b'mod partikolari l-Artikolu 20(11)(a), tiegħu,

    Billi:

    (1)

    Ir-Regolament tal-Kummissjoni (UE) Nru 142/2011 (2), jistabbilixxi r-regoli li jimplimentaw ir-Regolament (KE) Nru 1069/2009 inklużi l-proċeduri għall-adozzjoni ta' metodu ta' pproċessar alternattiv.

    (2)

    Wara talba tal-awtorità kompetenti tal-Finlandja għal awtorizzazzjoni ta' metodu alternattiv għall-użu jew ir-rimi ta' prodotti sekondarji tal-annimali jew ta' prodotti derivati, kif imsemmi fl-Artikolu 20 tar-Regolament (KE) Nru 1069/2009, l-Awtorità Ewropea dwar is-Sigurtà fl-Ikel (EFSA) ippubblikat Opinjoni Xjentifika dwar l-użu kontinwu ta' idrotrattament katalitiku fi stadji multipli għall-ipproċessar ta' xaħam immaċinat tal-annimali (Kategorija 1) (3). Dan il-metodu għandu jintuża għall-produzzjoni tad-diżil rinovabbli, karburanti rinnovabbli tal-avjazzjoni, propan rinovabbli u petrol rinovabbli. Dan il-metodu ġie evalwat mill-EFSA bħala metodu alternattiv għall-ipproċessar sikur ta' xaħmijiet immaċinati tal-Kategorija 1 u l-prodotti jistgħu jiġu ddikjarati bħala l-punt aħħari fil-katina tal-manifattura.

    (3)

    L-Anness IV tar-Regolament (UE) Nru 142/2011 għandu għalhekk jiġi emendat skont dan.

    (4)

    Prodotti derivati mill-proċessar tal-Kategoriji 1 u 2 għandhom ikunu mmarkati dejjem biex tiġi żgurata t-traċċabilità u jiġi evitat li jidħlu fil-katina tal-ikel u tal-għalf. L-Anness VIII tar-Regolament (UE) Nru 142/2011 jistabbilixxi rekwiżiti dwar l-immarkar tal-prodotti derivati. Madankollu, f'konformità mal-punt 3(e) tal-Kapitolu V tal-Anness VIII ta' dak ir-Regolament, l-immarkar mhuwiex meħtieġ għall-karburanti rinovabbli msemmija fil-punt J tat-Taqsima 2 tal-Kapitolu IV tal-Anness IV tiegħu.

    (5)

    Billi l-idrotrattament katalitiku fi stadji multipli għall-ipproċessar tax-xaħam immaċinat tal-annimali (il-Kategorija 1) inaqqas ir-riskji għas-saħħa tal-annimali u tal-pubbliku b'livell ta' effiċjenza daqs tal-metodu stabbilit fil-Punt J tat-Taqsima 2 tal-Kapitolu IV tal-Anness IV tar-Regolament (UE) Nru 142/2011, għandu jiġi eskluż ukoll mir-rekwiżiti tal-immarkar billi tiżdied referenza għal dan il-metodu fil-punt 3(e) tal-Kapitolu V tal-Anness VIII ta' dak ir-Regolament.

    (6)

    L-Anness VIII tar-Regolament (UE) Nru 142/2011 għandu għalhekk jiġi emendat skont dan.

    (7)

    Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

    ADOTTAT DAN IR-REGOLAMENT:

    Artikolu 1

    Fl-Artikolu 3 tar-Regolament (UE) Nru 142/2011, jiżdied il-punt (k) li ġej:

    “(k)

    diżil rinovabbli, karburanti rinnovabbli tal-avjazzjoni, propan rinovabbli u petrol rinovabbli li jissodisfaw ir-rekwiżiti speċifiċi għal prodotti ġejjin mill-idrotrattament katalitiku fi stadji multipli għall-produzzjoni tal-karburanti rinnovabbli stabbiliti fil-punt 2(f) tat-Taqsima 3 tal-Kapitolu IV tal-Anness IV.”

    Artikolu 2

    L-Annessi IV u VIII tar-Regolament (UE) Nru 142/2011 huma emendati skont it-test fl-Anness ta' dan ir-Regolament.

    Artikolu 3

    Dan ir-Regolament jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

    Dan ir-Regolament għandu jorbot fl-intier tiegħu u japplika direttament fl-Istati Membri kollha.

    Magħmul fi Brussell, it-12 ta' Lulju 2017.

    Għall-Kummissjoni

    Il-President

    Jean-Claude JUNCKER

    (1)  ĠU L 300, 14.11.2009, p. 1.

    (2)  Ir-Regolament tal-Kummissjoni (UE) Nru 142/2011 tal-25 ta' Frar 2011 li jimplimenta r-Regolament (KE) Nru 1069/2009 tal-Parlament Ewropew u tal-Kunsill li jistabbilixxi regoli tas-saħħa li jirrigwardaw prodotti sekondarji tal-annimali jew derivati minnhom mhux maħsuba għall-konsum mill-bniedem u li jimplimenta d-Direttiva tal-Kunsill 97/78/KE li tistabbilixxi l-prinċipji li jirregolaw l-organizzazzjoni tal-verifiki veterinarji fuq prodotti li jidħlu fil-Komunità minn pajjiżi terzi skont dik id-Direttiva (ĠU L 54, 26.2.2011, p. 1).

    (3)  EFSA Journal 2015;13(11):4307.

    ANNESS

    L-Annessi IV u VIII tar-Regolament (UE) Nru 142/2011 huma emendati kif ġej:

    (1)

    Fl-Anness IV, il-Kapitolu IV huwa emendat kif ġej:

    (a)

    Fit-Taqsima 1, il-punt 1(d) jiġi mibdul b'dan li ġej:

    “(d)

    il-fjuwils li jistgħu jiġġeddu prodotti minn xaħmijiet immaċinati, li huma dderivati minn materjali tal-Kategorija 1 u tal-Kategorija 2, skont il-punti J u L.”

    (b)

    Fit-Taqsima 2, jiżdied il-punt L li ġej:

    “L.   idrotrattament katalitiku fi stadji multipli għall-produzzjoni ta' fjuwils li jistgħu jiġġeddu

    1.   Il-materjali tal-bidu

    Għal dan il-proċess, jistgħu jintużaw il-materjali li ġejjin:

    (a)

    xaħmijiet maħlula derivati minn materjal tal-Kategorija 1, li ġew ipproċessati permezz tal-metodu tal-ipproċessar 1 (sterilizzazzjoni bill-pressjoni);

    (b)

    xaħmijiet immaċinati u żejt tal-ħut li jikkonformaw mal-punt J(1)(a) ta' din it-Taqsima.

    2.   Metodu ta' pproċessar

    (a)

    Ix-xaħam immaċinat għandu jiġi trattat minn qabel u dan it-trattament għandu jikkonsisti minn tal-inqas fl-ibbliċjar tal-materjali tal-bidu, inklużi xaħmijiet immaċinati, bl-aċidu fil-preżenza ta' tafal għall-ibbliċjar u t-tneħħija sussegwenti ta' tafal tal-ibbliċjar użat u l-impuritajiet li ma jinħallux permezz tal-filtrazzjoni;

    Qabel dan it-trattament ix-xaħam immaċinat tista' titneħħilu l-gomma b'aċidu u/jew sustanza kawstika sabiex jitneħħew l-impuritajiet mix-xaħam immaċinat billi jiffurmaw gomom u sussegwentement jiġu sseparati l-imsemmija gomom permezz ta' ċentrifugazzjoni.

    (b)

    Il-materjali trattati minn qabel għandhom jiġu sottomessi għal proċess ta' idrotrattament li jikkonsisti minn stadju ta' idrotrattament katalitiku, stadju ta' tqaxxir u warajh stadju ta' isomerizzazzjoni.

    Il-materjali għandhom jiġu sottomessi għal pressjoni ta' mill-inqas 30 bar f'temperatura ta' mill-inqas 265 °C għal mill-inqas 20 minuta.”

    (c)

    Fit-Taqsima 3(2), jiżdied il-punt (f) li ġej:

    “(f)

    l-idrotrattament katalitiku fi stadji multipli għall-produzzjoni ta' fjuwils rinnovabbli jista':

    (i)

    fil-każ ta' diżil rinnovabbli, fjuwil tal-avjazzjoni rinnovabbli, propan rinnovabbli u gażolina rinnovabbli li jirriżultaw mill-proċess, użat bħala fjuwil mingħajr restrizzjonijiet skont dan ir-Regolament (punt ta' tmiem);

    (ii)

    fil-każ ta' ħama tal-gomma u tafal tal-ibbliċjar użat mill-proċess ta' trattament minn qabel imsemmi fil-punt L(2)(a) tat-Taqsima 2:

    —

    jintremew skont l-Artikolu 12(a) jew (b) tar-Regolament (KE) Nru 1069/2009,

    —

    jintremew permezz ta' rdim f'miżbla awtorizzata,

    —

    jinbidlu f'bijogass, bil-kundizzjoni li r-residwi tad-diġestjoni minn trasformazzjoni ta' bijogass jiġu eliminati permezz ta' inċinerazzjoni, ko-inċinerazzjoni jew rdim f'miżbla awtorizzata.

    —

    użati għall-iskopijiet tekniċi msemmija fl-Artikolu 36(a)(i) tar-Regolament (KE) Nru 1069/2009.”

    (2)

    Fl-Anness VIII, il-Kapitolu V, punt 3(e) qiegħed jiġi sostitwit b'dan li ġej:

    “(e)

    fjuwils rinnovabbli prodotti minn xaħmijiet immaċinati, li huma derivati minn materjali tal-Kategorija 1 u tal-Kategorija 2, skont il-punti J u L tat-Taqsima 2 tal-Kapitolu IV tal-Anness IV.”
    Top