17.5.2017   

MT

Il-Ġurnal Uffiċjali tal-Unjoni Ewropea

L 124/3

(1)

Ir-Regolament (KE) Nru 474/2006 (2) jistabbilixxi l-lista ta' kumpaniji tal-ajru li huma soġġetti għal projbizzjoni fuq l-operat fl-Unjoni.

(2)

F'konformità mal-Artikolu 4(3) tar-Regolament (KE) Nru 2111/2005, ċerti Stati Membri u l-Aġenzija Ewropea tas-Sikurezza tal-Avjazzjoni (“EASA”) għaddew l-informazzjoni rilevanti lill-Kummissjoni fil-kuntest tal-aġġornament ta' dik il-lista. L-informazzjoni rilevanti ġiet provduta wkoll minn pajjiżi terzi u minn organizzazzjonijiet internazzjonali. Jenħtieġ li l-lista tiġi aġġornata abbażi ta' dik l-informazzjoni.

(3)

Il-Kummissjoni infurmat lill-kumpaniji tal-ajru kollha kkonċernati b'mod dirett jew permezz tal-awtoritajiet responsabbli għas-sorveljanza regolatorja tagħhom, dwar il-fatti u l-kunsiderazzjonijiet essenzjali li jiffurmaw il-bażi ta' deċiżjoni li timponilhom projbizzjoni fuq l-operat fl-Unjoni jew li temenda l-kundizzjonijiet ta' projbizzjoni fuq l-operat imposta fuq kumpanija tal-ajru li tkun inkluża fil-listi fl-Anness A u B tar-Regolament (KE) Nru 474/2006.

(4)

Il-Kummissjoni tat l-opportunità lill-kumpaniji tal-ajru kkonċernati biex jikkonsultaw id-dokumenti pprovduti mill-Istati Membri, biex jissottomettu kummenti bil-miktub u biex jagħmlu preżentazzjoni bil-fomm lill-Kummissjoni u lill-Kumitat stabbilit permezz tar-Regolament tal-Kunsill (KEE) Nru 3922/1991 (3) (il-“Kumitat għas-Sikurezza tal-Ajru”).

(5)

Il-Kumitat għas-Sikurezza tal-Ajru rċieva aġġornamenti mingħand il-Kummissjoni dwar il-konsultazzjonijiet konġunti li għaddejjin, fi ħdan il-qafas tar-Regolament (KE) Nru 2111/2005 u tar-Regolament (KE) Nru 473/2006 (4), mal-awtoritajiet kompetenti u mal-kumpaniji tal-ajru tal-Benin, tal-Bolivja, tal-Indja, tal-Indoneżja, tal-Libja, tal-Mozambique, tan-Niġerja, tal-Pakistan, ta' Saint Vincent u tal-Grenadini, tat-Tajlandja, tal-Ukrajna u taż-Żimbabwe. Il-Kummissjoni pprovdiet ukoll informazzjoni lill-Kumitat għas-Sikurezza tal-Ajru dwar is-sitwazzjoni tas-sikurezza tal-avjazzjoni fl-Afganistan, fl-Angola, fil-Guinea Ekwatorjali, fil-Georgia, fil-Każakistan, fil-Libanu u fin-Nepal u dwar il-konsultazzjonijiet tekniċi mal-Federazzjoni Russa.

(6)

L-EASA ppreżentat ir-riżultati tal-analiżi tar-rapporti tal-awditjar imwettqa mill-Organizzazzjoni tal-Avjazzjoni Ċivili Internazzjonali (“ICAO”) lill-Kummissjoni u lill-Kumitat għas-Sikurezza tal-Ajru, fil-qafas tal-Programm Universali ta' Awditjar tas-Sorveljanza tas-Sikurezza tal-ICAO. F'dan il-kuntest, l-Istati Membri ġew mistiedna biex jagħtu prijorità lill-ispezzjonijiet fir-rampa ta' kumpaniji tal-ajru li ngħataw liċenzja minn Stati li għalihom l-ICAO identifikat Tħassib Sinifikanti dwar is-Sikurezza jew li fir-rigward tagħhom l-EASA kkonkludiet li hemm nuqqasijiet sinifikanti fis-sistema tas-sorveljanza tas-sikurezza. Minbarra l-konsultazzjonijiet li għamlet il-Kummissjoni skont ir-Regolament (KE) Nru 2111/2005, il-prijoritizzazzjoni tal-ispezzjonijiet fir-rampa tipprovdi aktar informazzjoni fir-rigward tal-prestazzjoni tas-sikurezza tal-kumpaniji tal-ajru li ngħataw il-liċenzja f'dawk il-pajjiżi terzi.

(7)

L-EASA infurmat ukoll lill-Kummissjoni u lill-Kumitat għas-Sikurezza tal-Ajru dwar ir-riżultati tal-analiżi tal-ispezzjonijiet fir-rampa li twettqu skont il-programm tal-Valutazzjoni tas-Sikurezza tal-Inġenji tal-Ajru Barranin (“SAFA”) f'konformità mar-Regolament tal-Kummissjoni (UE) Nru 965/2012 (5).

(8)

Barra minn hekk, l-EASA infurmat lill-Kummissjoni u lill-Kumitat għas-Sikurezza tal-Ajru dwar il-proġetti ta' assistenza teknika li twettqu f'pajjiżi terzi milquta minn miżuri jew minn rekwiżiti ta' monitoraġġ stabbiliti bir-Regolament (KE) Nru 2111/2005. L-EASA pprovdiet informazzjoni dwar il-pjanijiet u t-talbiet għal aktar assistenza teknika u kooperazzjoni biex titjieb il-kapaċità amministrattiva u teknika tal-awtoritajiet tal-avjazzjoni ċivili, bil-għan li jiġi solvut in-nuqqas ta' konformità mal-istandards applikabbli tal-avjazzjoni ċivili internazzjonali. L-Istati Membri ġew mistiedna jirrispondu għal talbiet bħal dawn fuq bażi bilaterali b'koordinazzjoni mal-Kummissjoni u mal-EASA. F'dan ir-rigward, il-Kummissjoni saħqet dwar kemm huwa utli li tingħata informazzjoni lill-komunità tal-avjazzjoni internazzjonali, b'mod partikolari permezz tal-bażi tad-dejta “Safety Collaborative Assistance Network” tal-ICAO, dwar l-assistenza teknika pprovduta mill-Unjoni u mill-Istati Membri biex titjieb is-sikurezza tal-avjazzjoni madwar id-dinja.

(9)

Il-Eurocontrol aġġorna lill-Kummissjoni u lill-Kumitat għas-Sikurezza tal-Ajru dwar il-qagħda tal-funzjoni ta' twissija tal-SAFA u dwar l-istatistika attwali għall-messaġġi ta' twissija għal kumpaniji tal-ajru pprojbiti.

(10)

Wara l-analiżi mill-EASA tal-informazzjoni li ħarġet minn spezzjonijiet fir-rampa li twettqu fuq inġenji tal-ajru ta' kumpaniji tal-ajru tal-Unjoni jew minn spezzjonijiet ta' standardizzazzjoni li twettqu mill-EASA, kif ukoll minn spezzjonijiet u verifiki speċifiċi li twettqu mill-awtoritajiet nazzjonali tal-avjazzjoni, diversi Stati Membri ħadu ċerti miżuri ta' infurzar u infurmaw lill-Kummissjoni u lill-Kumitat għas-Sikurezza tal-Ajru dwar dawk il-miżuri. Ir-Renju Unit informa lill-Kummissjoni u lill-Kumitat għas-Sikurezza tal-Ajru dwar l-azzjonijiet li kien ħa fir-rigward tal-kumpanija tal-ajru Blu Halkin Ltd.

(11)

L-Istati Membri tennew li kienu lesti jaġixxu kif meħtieġ jekk xi informazzjoni rilevanti dwar is-sikurezza tindika li hemm riskji imminenti għas-sikurezza minħabba nuqqas ta' konformità min-naħa tal-kumpaniji tal-ajru tal-Unjoni mal-istandards xierqa tas-sikurezza.

(12)

Mid-29 sal-31 ta' Marzu 2017, fil-Benin saret żjara tal-Unjoni fuq il-post biex titwettaq valutazzjoni tas-sikurezza. F'dik iż-żjara ħadu sehem esperti mill-Kummissjoni, mill-EASA u minn Stat Membru wieħed. Matul din iż-żjara, l-Agence Nationale de l'Aviation Civile tal-Benin (l-“ANAC Benin”) uriet li għamlet progress kbir f'dawn l-aħħar snin fl-implimentazzjoni tal-istandards tal-ICAO u l-prattiki rakkomandati.

(13)

L-ANAC Benin hija stabbilita bħala l-awtorità tal-avjazzjoni ċivili b'awtonomija finanzjarja u funzjonali mil-Liġi dwar l-avjazzjoni tal-Benin li kienet adottata fl-2013. L-evidenza tindika li l-ANAC Benin hija kapaċi żżomm u tinforza sistema regolatorja b'saħħitha u jidher li r-regolamenti nazzjonali jiġu kontinwament aġġornati meta jiġu adottati emendi ġodda tal-istandards tal-ICAO u l-prattiki rakkomandati jiġu adottati. Madankollu, matul din iż-żjara ġew identifikati ċerti oqsma fejn jista' jsir titjib, b'mod partikolari fir-rigward tal-ħin meħtieġ għat-tlestija tal-proċess tal-emendar tar-regolamenti nazzjonali. L-ANAC Benin tat evidenza li ġie implimentat proċess sod għar-reklutaġġ u t-taħriġ tal-persunal tagħha. Billi l-għadd ta' spetturi kwalifikati għalkollox jeċċedi r-rekwiżiti fid-dawl tal-livell attwali ta' attivitajiet tal-avjazzjoni fil-Benin, l-ANAC Benin ikkonkludiet programmi ta' skambju tal-ispetturi tagħha mal-pajjiżi ġirien tagħha.

(14)

Matul iż-żjara, l-ANAC Benin ipprovdiet evidenza li ċ-ċertifikazzjoni tal-kumpaniji tal-ajru ssir f'konformità mal-proċess tal-ICAO u li l-attivitajiet kollha jiġu ddokumentati sew. Filwaqt li l-evidenza tindika li l-ANAC Benin għandha l-kapaċitajiet biex tissorvelja l-attivitajiet tal-avjazzjoni fil-Benin, l-effettività ta' dawk l-attivitajiet ta' sorveljanza tista' tkun saħansitra aħjar jekk dawn jibbażaw ruħhom aktar fuq ir-riżultati ta' valutazzjoni tar-riskju tas-sikurezza solida.

(15)

Fis-26 ta' April 2017, l-ANAC Benin ippreżentat lill-Kummissjoni u lill-Kumitat għas-Sikurezza tal-Ajru l-azzjonijiet korrettivi meħuda biex jindirizzaw l-osservazzjonijiet li saru waqt iż-żjara ta' valutazzjoni fuq il-post tal-Unjoni. L-ANAC Benin infurmathom ukoll dwar għadd ta' miżuri li ħadet biex tkompli ttejjeb is-sikurezza tal-avjazzjoni fil-Benin. Dawk il-miżuri jinkludu t-tisħiħ tal-implimentazzjoni tal-elementi kritiċi tas-sorveljanza tas-sikurezza, kif ukoll il-konklużjoni ta' għadd ta' arranġamenti ta' ħidma ma' awtoritajiet ta' pajjiżi oħra għall-provvista ta' aktar spetturi jekk il-livell tal-operazzjonijiet ikun jeħtieġ dan.

(16)

Abbażi tal-informazzjoni kollha disponibbli bħalissa, inklużi r-riżultati taż-żjara li saret f'Marzu 2017, il-Kummissjoni tqis li l-ANAC Benin għamlet titjib dejjiem fuq perjodu ta' żmien kontinwu. Huwa rrikonoxxut ukoll li ma kienx hemm nuqqas ta' rieda min-naħa tal-ANAC Benin li tiddjaloga fuq bażi kontinwa mal-Kummissjoni. L-informazzjoni disponibbli twassal għall-konklużjoni li l-ANAC Benin għandha l-kapaċità li żżomm mar-responsabbiltajiet tagħha fir-rigward tas-sorveljanza tal-kumpaniji tal-ajru ċċertifikati fil-Benin.

(17)

Għaldaqstant, f'konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li l-lista tal-kumpaniji tal-ajru li huma soġġetti għal projbizzjoni tal-operat fl-Unjoni jeħtieġ li tiġi emendata biex il-kumpaniji tal-ajru kollha ċċertifikati fil-Benin jitneħħew mill-Anness A tar-Regolament (KE) Nru 474/2006.

(18)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fil-Benin, skont ir-Regolament (UE) Nru 965/2012.

(19)

Jekk xi informazzjoni rilevanti tas-sikurezza tindika li hemm riskji imminenti tas-sikurezza b'konsegwenza ta' nuqqas ta' konformità ma' standards internazzjonali tas-sikurezza, il-Kummissjoni tista' tkun obbligata tieħu azzjoni ulterjuri b'konformità mar-Regolament (KE) Nru 2111/2005.

(20)

Ma ġewx identifikati problemi kbar tas-sikurezza għat-trasportaturi tal-ajru rreġistrati fil-Bolivja f'dawn l-aħħar snin. Madankollu, l-inċident fatali tat-trasportatur bl-ajru LaMia, fid-29 ta' Novembru 2016, qajjem tħassib dwar il-mod li bih l-awtoritajiet tal-Bolivja qed iwettqu s-sorveljanza tas-sikurezza fuq il-kumpaniji tal-ajru taħt ir-responsabbiltà tagħhom.

(21)

Fit-23 ta' Marzu 2017, saret laqgħa ta' konsultazzjoni teknika bejn ir-rappreżentanti tal-Kummissjoni, tal-EASA, u ta' Stat Membru u r-rappreżentanti għolja mid-Direttorat Ġenerali tal-Bolivja għall-Avjazzjoni Ċivili (“DGAC”). Matul din il-laqgħa, id-DGAC spjega l-bidliet f'termini ta' riorganizzazzjoni u l-pjanijiet tiegħu biex jimplimenta kultura tas-sikurezza b'saħħitha, biex tiġi stabbilita sistema tas-sikurezza globali u transsettorjali, biex tinħoloq bażi tad-dejta komprensiva tas-sikurezza li tiffoka fuq ir-riskji u biex jittejbu l-proċeduri tas-sorveljanza u t-taħriġ tal-persunal tiegħu.

(22)

Id-DGAC spjega li, anki qabel ma seħħ l-inċident ta' LaMia, il-gvern Bolivjan kien adotta deċiżjonijiet biex itejjeb l-istruttura maniġerjali tad-DGAC sabiex jissaħħaħ il-karattru ċivili tad-DGAC vis-à-vis l-approċċ militari preċedenti. Barra minn hekk, il-gvern bħalissa qed jinvesti f'mekkaniżmi sabiex itejbu s-sorveljanza tas-sikurezza u jimmodifikaw il-qafas legali nazzjonali biex id-DGAC jkun jista' jieħu miżuri effikaċi ta' infurzar fejn ikun meħtieġ. Dawn il-miżuri juru r-rieda tal-awtoritajiet Bolivjani biex isaħħu l-kapaċitajiet tagħhom tas-sorveljanza tas-sikurezza, għalkemm l-effikaċja tagħhom se tiddependi minn kif jiġu implimentati u għad hemm lok konsiderevoli għall-awtoritajiet Bolivjani biex ikomplu jsaħħu l-kapaċitajiet ta' sorveljanza tas-sikurezza tad-DGAC.

(23)

Fuq talba tal-Kummissjoni u wara l-laqgħa ta' konsultazzjoni teknika, id-DGAC ipprovda informazzjoni utli dwar il-liċenzjar, l-attivitajiet ta' ċertifikazzjoni u sorveljanza u dwar il-kwalifiku u t-taħriġ tal-persunal responsabbli mis-sorveljanza tas-sikurezza. Id-DGAC ipprovda wkoll informazzjoni dwar l-aċċidenti u l-inċidenti serji li seħħew fl-2016 u l-2017.

(24)

Fuq il-bażi tal-informazzjoni attwalment disponibbli, inkluża l-informazzjoni pprovduta matul u wara l-laqgħa ta' konsultazzjoni teknika tat-23 ta' Marzu 2017, huwa vvalutat li bħalissa m'hemm l-ebda nuqqas ta' kapaċità jew rieda min-naħa tad-DGAC tal-Bolivja biex jindirizza kwalunkwe nuqqasijiet tas-sikurezza.

(25)

Għalhekk, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan il-ħin m'hemmx raġunijiet biex tinbidel il-lista tal-kumpaniji tal-ajru li huma soġġetti għal projbizzjoni tal-operat fl-Unjoni billi jiġu inklużi l-kumpaniji tal-ajru mill-Bolivja.

(26)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fil-Bolivja, skont ir-Regolament (UE) Nru 965/2012.

(27)

Jekk xi informazzjoni rilevanti tas-sikurezza tindika li hemm riskji imminenti tas-sikurezza b'konsegwenza ta' nuqqas ta' konformità ma' standards internazzjonali tas-sikurezza, il-Kummissjoni tista' tkun obbligata tieħu azzjoni ulterjuri b'konformità mar-Regolament (KE) Nru 2111/2005.

(28)

Fit-28 ta' Marzu 2017, saret laqgħa ta' konsultazzjoni teknika bejn il-Kummissjoni, l-EASA, l-Istati Membri u r-rappreżentanti mid-Direttorat Ġenerali tal-Indja għall-Avjazzjoni Ċivili (“DGCA tal-Indja”). Dik il-laqgħa saret fil-kuntest ta' ftehim preċedenti mad-DGCA tal-Indja, skont l-Artikolu 3(2) tar-Regolament (KE) Nru 473/2006, li jitwettqu konsultazzjonijiet tekniċi regolari mal-Kummissjoni sabiex jiġu diskussi l-obbligi tad-DGCA tal-Indja fir-rigward taċ-ċertifikazzjoni u tas-sorveljanza tal-kumpaniji tal-ajru li ġew iċċertifikati minnu.

(29)

Matul dik il-laqgħa, id-DGCA tal-Indja pprovda informazzjoni dwar l-analiżi tiegħu dwar il-prestazzjoni skont il-Programm SAFA tal-kumpaniji tal-ajru ċċertifikati fl-Indja, inkluż tqabbil tad-dejta tal-prestazzjoni mill-2016 u mill-2017 u informazzjoni speċifika dwar is-sorveljanza tal-kumpanija tal-ajru Air India, iċċertifikata fl-Indja. Id-DGCA tal-Indja pprovda wkoll informazzjoni dwar l-iżviluppi rigward il-kapaċità tas-sorveljanza tiegħu, inkluż l-iżvilupp ta'“bażi tad-dejta tal-spezzjonijiet fir-rampa”.

(30)

Matul dik il-laqgħa, il-Kummissjoni tenniet lid-DGCA tal-Indja għadd ta' elementi fir-rigward tal-obbligi taċ-ċertifikazzjoni u tas-sorveljanza tiegħu. B'mod partikolari, filwaqt li semmiet il-mod trasparenti li bih id-DGCA tal-Indja pprovda informazzjoni marbuta mas-sikurezza lill-Kummissjoni, huwa enfasizza l-importanza tal-iżvilupp kontinwu tal-kapaċità taċ-ċertifikazzjoni u tas-sorveljanza tad-DGCA tal-Indja, inkluż ir-reklutaġġ u t-taħriġ tal-persunal tekniku, kif ukoll il-ħtieġa li jiġu żviluppati għodod li jippermettu t-traċċar u l-monitoraġġ sistematiku tas-sorveljanza tas-sikurezza.

(31)

Fuq il-bażi tal-informazzjoni attwalment disponibbli, inkluża l-informazzjoni pprovduta mid-DGCA tal-Indja fil-laqgħa ta' konsultazzjoni teknika tat-28 ta' Marzu 2017, huwa vvalutat li bħalissa m'hemm l-ebda nuqqas ta' kapaċità jew rieda min-naħa tad-DGAC tal-Indja biex jindirizza n-nuqqasijiet tas-sikurezza.

(32)

Għalhekk, skont il-kriterji komuni stabbiliti fl-Anness tar-Regolament (KE) Nru 2111/2005, jitqies li f'dan l-istadju m'hemmx raġunijiet biex isiru emendi għal-lista tal-kumpaniji tal-ajru li huma soġġetti għal projbizzjoni tal-operat fl-Unjoni billi jiġu inklużi kumpaniji tal-ajru mill-Indja.

(33)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fl-Indja, skont ir-Regolament (UE) Nru 965/2012.

(34)

Jekk xi informazzjoni rilevanti tas-sikurezza tindika li hemm riskji imminenti tas-sikurezza b'konsegwenza ta' nuqqas ta' konformità ma' standards internazzjonali tas-sikurezza, il-Kummissjoni tista' tkun obbligata tieħu azzjoni ulterjuri b'konformità mar-Regolament (KE) Nru 2111/2005.

(35)

Il-konsultazzjonijiet bejn il-Kummissjoni u d-Direttorat Ġenerali tal-Avjazzjoni Ċivili tal-Indoneżja (id-“DGCA tal-Indoneżja”) se jissoktaw bl-għan li jiġi ssorveljat il-progress tad-DGCA tal-Indoneżja biex ikun żgurat li s-sistema tas-sorveljanza tas-sikurezza tal-avjazzjoni fl-Indoneżja tkun konformi mal-istandards internazzjonali tas-sikurezza. F'dak il-kuntest, permezz tal-ittra tas-16 ta' Marzu 2017, id-DGCA tal-Indoneżja pprovda informazzjoni addizzjonali lill-Kummissjoni u aġġornament dwar l-istatus tal-avjazzjoni u l-attivitajiet ta' sorveljanza tas-sikurezza tal-Indoneżja.

(36)

Id-DGCA tal-Indoneżja pprovda informazzjoni għall-perjodu minn Novembru 2016 sa Marzu 2017, fuq il-kumpaniji tal-ajru ċċertifikati fl-Indoneżja, is-sorveljanza tas-sikurezza ta' dawk il-kumpaniji tal-ajru, l-azzjonijiet ta' infurzar li ttieħdu mid-DGCA tal-Indoneżja, l-iżvilupp ta' regolamenti tal-avjazzjoni tal-Indoneżja, lista tal-inċidenti serji li ġraw matul dak il-perjodu u l-assistenza teknika pprovduta mid-DGCA tal-Indoneżja.

(37)

Fil-perjodu minn Novembru 2016 sa Marzu 2017, l-ebda kumpanija tal-ajru ġdida ma ġiet iċċertifikata u l-ebda ċertifikat tal-operazzjoni tal-ajru ma ġie rrevokat mid-DGCA tal-Indoneżja. Fl-ittra tas-16 ta' Marzu 2017, id-DGCA tal-Indoneżja qal li l-prijorità ewlenija tiegħu hija t-tħejjija għall-Missjoni Koordinata ta' Validazzjoni tal-ICAO (“ICVM”) li se ssir f'Ottubru 2017. Ir-riżultati ta' din l-ICVM mistennija jagħtu indikazzjoni tajba tal-iżvilupp tas-sistema tas-sorveljanza tas-sikurezza fl-Indoneżja. Id-DGCA tal-Indoneżja ma tax evidenza li s-sorveljanza tas-sikurezza tal-kumpaniji tal-ajru li bħalissa huma inklużi fil-lista tal-kumpaniji tal-ajru li huma soġġetti għal projbizzjoni tal-operat fl-Unjoni hija żgurata f'konformità mal-istandards internazzjonali tas-sikurezza.

(38)

Għalhekk, skont il-kriterji komuni stabbiliti fl-Anness tar-Regolament (KE) Nru 2111/2005, jitqies li f'dan l-istadju m'hemmx raġunijiet biex isiru emendi għal-lista tal-kumpaniji tal-ajru li huma soġġetti għal projbizzjoni tal-operat fl-Unjoni billi jiġu inklużi jew billi jitneħħew kumpaniji tal-ajru mill-Indoneżja.

(39)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fl-Indoneżja, skont ir-Regolament (UE) Nru 965/2012.

(40)

Fis-6 ta' Marzu 2017, saret laqgħa ta' konsultazzjoni teknika bejn il-Kummissjoni, l-EASA, Stat Membru u l-Awtorità tal-Avjazzjoni Ċivili tal-Libja (“LYCAA”).

(41)

Matul dik il-laqgħa, il-LYCAA pprovdiet informazzjoni dwar l-attivitajiet ta' sorveljanza tagħha, inklużi l-pjanijiet tagħha f'dak li jikkonċerna r-reklutaġġ u t-taħriġ tal-persunal tekniku, u l-approċċ strateġiku tagħha għall-iżvilupp teknoloġiku fil-kuntest tal-bini tal-kapaċità tas-sikurezza tal-avjazzjoni. L-LYCAA tenniet li, fil-limiti ta' ambjent operattiv diffiċli, hija timpenja ruħha li twettaq l-obbligi internazzjonali tagħha fir-rigward tas-sikurezza tal-avjazzjoni.

(42)

Il-Kummissjoni tirrikonoxxi l-isforzi li qed isiru mit-tmexxija tal-LYCAA u l-fatt li l-LYCAA verament qed turi impenn biex tikkoopera mal-Kummissjoni, sabiex jiġu pprovduti aġġornamenti dwar l-istatus tal-obbligi tagħha ta' sorveljanza.

(43)

Madankollu, il-Kummissjoni tinnota l-isfida tal-ambjent operazzjonali kontinwu fil-Libja u l-konsegwenzi għal-LYCAA rigward l-abilità tagħha li taqdi l-obbligi tagħha ta' sorveljanza tas-sikurezza. Għalhekk, il-Kummissjoni tqis li, abbażi tal-informazzjoni disponibbli kollha, fil-preżent il-Libja ma tistax tissodisfa l-obbligi internazzjonali tagħha fir-rigward tas-sikurezza tal-avjazzjoni.

(44)

Għalhekk, f'konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li fil-preżent m'hemmx raġunijiet biex tiġi emendata l-lista tal-Unjoni tal-kumpaniji tal-ajru li huma soġġetti għall-projbizzjoni fuq l-operat fl-Unjoni fir-rigward tal-kumpaniji tal-ajru mil-Libja.

(45)

Mis-6 sal-10 ta' Frar 2017, fil-Mozambique saret żjara tal-Unjoni fuq il-post biex titwettaq valutazzjoni tas-sikurezza. F'dik iż-żjara ħadu sehem esperti mill-Kummissjoni, mill-EASA u mill-Istati Membri. Waqt dik iż-żjara, l-Istitut tal-Avjazzjoni Ċivili tal-Mozambique (l-“IACM”) wera li kien għamel progress konsiderevoli f'dawn l-aħħar snin. L-IACM għamel enfasi fuq l-implimentazzjoni tal-istandards tal-ICAO u l-prattiki rakkomandati. L-ICAM għandu approċċ tradizzjonali fir-rigward tas-sikurezza tal-avjazzjoni bbażat fuq il-konformità u reċentement beda jimplimenta tekniki kontemporanji ta' ġestjoni tas-sikurezza fl-avjazzjoni, inkluż Programm tal-Istat għas-Sikurezza.

(46)

Wara ż-żjara ta' valutazzjoni fuq il-post preċedenti tal-Unjoni f'April 2015, sar progress sinifikanti bl-introduzzjoni tal-liġi tal-avjazzjoni l-ġdida fil-Mozambique u l-istatut il-ġdid tal-IACM. Wara l-adozzjoni tal-liġi l-ġdida dwar l-avjazzjoni, ħafna regolamenti addizzjonali u r-rekwiżiti oħra, kif ukoll manwali u proċeduri, issa qegħdin jiġu aġġornati biex jinġiebu f'konformità mal-liġi tal-avjazzjoni l-ġdida u mal-aħħar emendi tal-istandards internazzjonali tas-sikurezza. In-numru tal-persunal tal-IACM żdied u hemm iktar spetturi kwalifikati għalkollox disponibbli biex jissorveljaw l-attivitajiet tal-avjazzjoni fil-Mozambique. Qed jiġu mħarrġa aktar spetturi u l-pjan tal-persunal attwali huwa biżżejjed għal-livell tal-attivitajiet tal-avjazzjoni tal-Mozambique. Il-faċilitajiet tal-IACM tjiebu wkoll. L-IACM hu stabbilit bħala awtorità tal-avjazzjoni ċivili b'awtonomija amministrattiva, finanzjarja, patrimonjali u funzjonali.

(47)

L-evidenza tindika li l-IACM għandu l-kapaċitajiet biex jissorvelja l-attivitajiet tal-avjazzjoni fil-Mozambique u biex iżżomm sistema regolatorja tajba u li l-IACM jimplimenta u jinforza r-regolamenti tal-avjazzjoni eżistenti, sabiex jiġi indirizzat kwalunkwe nuqqas tas-sikurezza. Is-sistema tas-sorveljanza tas-sikurezza hija stabbilita sewwa fil-Mozambique, għalkemm għad hemm xi attivitajiet għaddejjin biex ikomplu jtejbu s-sistema u biex jiżguraw li huma konformi mal-emendi reċenti li saru fl-isstandards internazzjonali tas-sikurezza.

(48)

Biex jittieħed kampjun rilevanti, saret żjara fi tliet kumpaniji tal-ajru ċċertifikati fil-Mozambique waqt iż-żjara ta' valutazzjoni tal-Unjoni fuq il-post, jiġifieri l-akbar żewġ kumpaniji tal-ajru tal-Mozambique u kumpanija tal-ajru li topera l-ħelikopters. B'riżultat taż-żjarat f'dawn it-tliet kumpaniji tal-ajru ġie osservat li żviluppaw sistemi ta' ġestjoni tal-kwalità u tas-sikurezza, li għandhom kontroll tal-manutenzjoni u tal-ajrunavigabbiltà kontinwa u li jwettqu operazzjonijiet f'konformità mar-regolamenti applikabbli fil-Mozambique. L-istandards internazzjonali tas-sikurezza jiġu implimentati mill-kumpaniji tal-ajru u l-kumpaniji tal-ajru għandhom il-kapaċità u wrew rieda li jindirizzaw in-nuqqasijiet tas-sikurezza.

(49)

Fis-17 ta' Marzu 2017, saret laqgħa ta' konsultazzjoni teknika bejn il-Kummissjoni, l-EASA u l-IACM. L-IACM aġġorna lill-Kummissjoni dwar il-progress li sar mindu saret iż-żjara ta' valutazzjoni tal-Unjoni fuq il-post u ġie maqbul li l-IACM se jipprovdi aktar informazzjoni dwar l-azzjonijiet korrettivi meħuda fir-rigward tal-osservazzjonijiet li saru matul iż-żjara. L-IACM spjega li uża dawk l-osservazzjonijiet sabiex isemmi s-sejbiet mal-kumpaniji tal-ajru kkonċernati u li talab li jsiru azzjonijiet korrettivi mingħand l-operaturi.

(50)

Fil-21 ta' April 2017, l-IACM ipprovda informazzjoni dwar il-pjan ta' azzjoni korrettiva tiegħu u dak ta' tliet kumpaniji tal-ajru li saritilhom żjara waqt iż-żjara ta' valutazzjoni tal-Unjoni fuq il-post, inkluż dwar ir-riżoluzzjoni ta' dawk is-sejbiet imsemmija mill-IACM. Il-pjan ta' azzjoni korrettiva jindirizza b'mod xieraq l-osservazzjonijiet li saru matul iż-żjara u jinkludi skedi ta' żmien realistiċi. L-evidenza ta' sostenn ipprovduta hija rilevanti għar-riżoluzzjoni tas-sejbiet.

(51)

L-IACM u l-ikbar kumpanija tal-ajru rreġistrata fil-Mozambique, Linhas Aéreas de Moçambique, ingħataw l-opportunità ta' smigħ fis-26 ta' April 2017 quddiem il-Kummissjoni u l-Kumitat għas-Sikurezza tal-Ajru f'konformità mal-Artikolu 7 mar-Regolament (KE) Nru 2111/2005.

(52)

Waqt is-seduta, ir-rappreżentant tal-gvern tal-Mozambique esprima l-impenn qawwi minn dan il-gvern biex tittejjeb is-sikurezza tat-trasport fil-Mozambique b'mod ġenerali u b'mod partikolari biex tittejjeb kontinwament l-implimentazzjoni tal-istandards internazzjonali tas-sikurezza tal-avjazzjoni.

(53)

Matul is-seduta, l-IACM ipprovda informazzjoni fuq is-settur tal-avjazzjoni fil-Mozambique u l-kapaċitajiet tal-IACM bħala awtorità tal-avjazzjoni ċivili awtonoma. Din l-informazzjoni inkludiet dettalji dwar l-organizzazzjoni tiegħu, il-mekkaniżmi ta' finanzjament, l-għadd ta' spetturi tas-sorveljanza tas-sikurezza, l-iżvilupp tal-leġiżlazzjoni u tar-regolamenti u l-ippjanar futur tal-IACM.

(54)

Matul is-seduta, il-Linhas Aéreas de Moçambique pprovdiet informazzjoni dwar il-flotta preżenti tagħha u l-objettivi tagħha għas-snin li ġejjin. Spjegat li qed tikkonċentra fuq l-iżvilupp tar-rotot tagħha fis-suq domestiku u f'dak reġjonali. Il-Linhas Aéreas de Moçambique ipprovdiet ukoll tagħrif dwar is-sistema tal-ġestjoni tas-sikurezza tagħha.

(55)

Abbażi tal-informazzjoni kollha disponibbli, inkluż ir-riżultati taż-żjara tal-Unjoni fuq il-post biex titwettaq valutazzjoni tas-sikurezza u tal-informazzjoni pprovduta waqt is-smigħ tas-26 ta' April 2017, jitqies li l-IACM għamel titjib sostnut fuq perjodu kontinwu ta' żmien. Huwa wkoll rikonoxxut li l-IACM wera li hu lest li jimpenja ruħu fuq bażi kontinwa mal-Kummissjoni. Ġie vvalutat li l-IACM għandu l-kapaċità li jżomm mar-responsabbiltajiet tiegħu fir-rigward tas-sorveljanza tal-kumpaniji tal-ajru ċċertifikati fil-Mozambique. Waqt is-smigħ, il-gvern tal-Mozambique impenja ruħu li jidħol bis-sħiħ fi djalogu kontinwu dwar is-sikurezza mal-Kummissjoni, inkluż permezz ta' laqgħat addizzjonali, jekk u meta dan jitqies li jkun meħtieġ mill-Kummissjoni.

(56)

Għaldaqstant, f'konformità mal-kriterji komuni stabbiliti fl-Anness tar-Regolament (KE) Nru 2111/2005, jitqies li l-lista tal-Unjoni tal-kumpaniji tal-ajru li huma soġġetti għal projbizzjoni tal-operat fl-Unjoni jeħtieġ li tiġi emendata biex il-kumpaniji tal-ajru kollha ċċertifikati fil-Mozambique jitneħħew mill-Anness A tar-Regolament (KE) Nru 474/2006.

(57)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fil-Mozambique, skont ir-Regolament (UE) Nru 965/2012.

(58)

Jekk xi informazzjoni rilevanti tas-sikurezza tindika li hemm riskji imminenti tas-sikurezza b'konsegwenza ta' nuqqas ta' konformità ma' standards internazzjonali tas-sikurezza, il-Kummissjoni tista' tkun obbligata tieħu azzjoni ulterjuri b'konformità mar-Regolament (KE) Nru 2111/2005.

(59)

Fil-25 ta' Novembru 2015, il-kumpanija tal-ajru Med-View Airline, iċċertifikata fin-Niġerja, applikat għand l-EASA għal awtorizzazzjoni ta' Operatur minn Pajjiż Terz (“TCO”). L-EASA vvalutat l-applikazzjoni skont ir-rekwiżiti stabbiliti fir-Regolament tal-Kummissjoni (UE) Nru 452/2014 u qajmet tħassib fundamentali dwar il-Med-View Airline li naqset milli turi konformità mar-rekwiżiti applikabbli stabbiliti fl-Artikolu 3 tar-Regolament (UE) Nru 452/2014. Għaldaqstant, l-EASA kkonkludiet li valutazzjoni ulterjuri ma kinitx se twassal għall-ħruġ ta' awtorizzazzjoni ta' TCO għal Med-View Airline għaliex din ma kinitx tissodisfa dawk ir-rekwiżiti. Għalhekk, fis-17 ta' Novembru 2016, l-EASA rrifjutat l-applikazzjoni minħabba raġunijiet ta' sikurezza

(60)

Fl-24 ta' Frar 2017, il-Kummissjoni talbet informazzjoni mingħand l-Awtorità tal-Avjazzjoni Ċivili Niġerjana (“NCAA”) dwar il-miżuri li ttieħdu wara li l-EASA ċaħdet l-applikazzjoni ta' TCO li saret mill-Med-View Airline. Fl-ittra tagħha tat-22 ta' Marzu 2017 lill-Kummissjoni, l-NCAA ma pprovdietx l-informazzjoni neċessarja biex ikun żgurat li l-azzjonijiet li ttieħdu kienu adatti biex jindirizzaw, min-naħa tal-NCAA, it-tħassib imqajjem mill-EASA hija u tevalwa l-applikazzjoni għal TCO tal-Med-View Airline.

(61)

Fl-10 u fl-24 ta' April 2017, il-Med-View Airline ipprovdiet lill-Kummissjoni bl-informazzjoni dwar il-miżuri korrettivi li ttieħdu sabiex jiġi indirizzat it-tħassib imqajjem mill-EASA.

(62)

Kemm l-NCAA kif ukoll il-Med-View Airline ngħataw l-opportunità ta' smigħ fil-25 ta' April 2017 quddiem il-Kummissjoni u l-Kumitat għas-Sikurezza tal-Ajru f'konformità mal-Artikolu 7 mar-Regolament (KE) Nru 2111/2005.

(63)

Matul din is-seduta, l-NCAA pprovdiet biss informazzjoni limitata dwar elementi bħad-data tal-istabbiliment tagħha, ir-riżultati tal-awditi tal-ICAO fl-2006 u f'Marzu 2016, l-istatus tagħha skont il-programm tal-Valutazzjoni Internazzjonali tas-Sikurezza tal-Avjazzjoni tal-FAA, l-għadd tal-operazzjonijiet ta' titjir u tal-ispetturi tal-ajrunavigabbiltà u n-numru ta' detenturi taċ-ċertifikat ta' operatur tal-ajru fin-Niġerja. It-tweġibiet tal-NCAA għall-mistoqsijiet dwar il-kapaċità tagħha li tidentifika u tissorvelja n-nuqqasijiet tas-sikurezza indikaw li din il-kapaċità mhijiex adegwata. Huwa meqjus li l-NCAA teħtieġ tieħu miżuri sabiex ittejjeb il-kwalità meħtieġa tas-sorveljanza tas-sikurezza fuq il-kumpaniji tal-ajru li hija responsabbli għalihom.

(64)

Matul is-seduta, hija u telabora fuq l-informazzjoni li kienet ipprovdiet qabel, il-Med-View Airline għarrfet lill-Kummissjoni u lill-Kumitat tas-Sikurezza tal-Ajru dwar il-miżuri korrettivi li ttieħdu sabiex jiġi indirizzat it-tħassib serju identifikat mill-EASA bħala parti mill-valutazzjoni tas-sikurezza tat-TCO tagħha, bħal operazzjonijiet ta' titjir barra mill-kamp ta' applikazzjoni taċ-ċertifikat tal-operatur tal-ajru approvat u l-ispeċifikazzjonijiet tal-operazzjonijiet assoċjati, il-kontroll tal-ajrunavigabbiltà u tal-manutensjoni, l-implimentazzjoni u l-monitoraġġ tad-direttivi dwar l-ajrunavigabbiltà u s-sistema tal-ġestjoni tas-sikurezza u tal-kwalità. Madankollu, il-Med-View Airline wriet nuqqas ċar ta' għarfien u komprensjoni dwar is-serjetà tat-tħassib dwar is-sikurezza imqajjem mill-EASA. Barra minn hekk, il-miżuri meħuda minn Med-View Airline juru nuqqas ta' analiżi xierqa tal-kawżi ewlenin u nuqqas ta' pjan ta' azzjoni korrettiva xieraq biex ma jerġax ikun hemm l-istess nuqqasijiet ta' konformità li wasslu għal dan it-tħassib jew oħrajn simili.

(65)

L-informazzjoni disponibbli fil-preżent, ibbażata fuq is-sejbiet tal-valutazzjoni tas-sikurezza tat-TCO tal-EASA flimkien mal-informazzjoni ppreżentata mill-NCAA u minn Med-View Airline, turi li hemm evidenza ta' nuqqasijiet ta' sikurezza serji min-naħa tal-Med-View Airline. L-informazzjoni turi wkoll lill-Med-View Airline mhijiex kapaċi tindirizza dawk in-nuqqasijiet ta' sikurezza, kif muri, inter alia mill-pjan ta' azzjoni korrettiv mhux adatt u mhux suffiċjenti li ppreżentat bħala tweġiba għas-sejbiet tal-valutazzjoni ta' sikurezza tat-TCO.

(66)

Għaldaqstant, f'konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li l-lista tal-kumpaniji tal-ajru li huma soġġetti għal projbizzjoni operattiva fl-Unjoni tiġi emendata biex il-kumpanija tal-ajru Med-View Airline tiġi inkluża fl-Anness A tar-Regolament (KE) Nru 474/2006.

(67)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fil-Mozambique, skont ir-Regolament (UE) Nru 965/2012.

(68)

Jekk xi informazzjoni rilevanti tas-sikurezza tindika li hemm riskji imminenti tas-sikurezza b'konsegwenza ta' nuqqas ta' konformità ma' standards internazzjonali tas-sikurezza, il-Kummissjoni tista' tkun obbligata tieħu azzjoni ulterjuri b'konformità mar-Regolament (KE) Nru 2111/2005.

(69)

Permezz ta' ittra tat-23 ta' Jannar 2017, il-Kummissjoni talbet lill-Awtorità tal-Avjazzjoni Ċivili tal-Pakistan (“PCAA”) biex tipprovdi informazzjoni dwar l-azzjonijiet ta' segwitu tagħha rigward l-inċident tas-7 ta' Diċembru 2016 bl-inġenju tal-ajru ATR tal-kumpanija tal-ajru Pakistan International Airlines Corporation Ltd, iċċertifikata fil-Pakistan. F'dik l-ittra, il-Kummissjoni nnotat ukoll, li fit-13 ta' Jannar 2016, l-EASA rrifjutat l-applikazzjoni ta' TCO li saret mit-trasportatur tal-merkanzija bl-ajru AHS International (Pvt) Ltd, iċċertifikat ukoll fil-Pakistan, minħabba raġunijiet ta' sikurezza. Barra minn hekk, f'dik l-ittra l-Kummissjoni indikat li beħsiebha tissokta bil-konsultazzjonijiet uffiċjali tagħha mal-PCAA, skont id-dispożizzjonijiet stabbiliti fl-Artikolu 3(2) tar-Regolament (KE) Nru 473/2006.

(70)

Fit-18 ta' April 2017, saret laqgħa ta' konsultazzjoni teknika bejn il-Kummissjoni, l-EASA, Stat Membru u rappreżentanti mill-PCAA. Matul dik il-laqgħa, il-PCAA pprovdiet informazzjoni, inkluża ħarsa ġenerali lejn l-obbligi tagħha ta' sorveljanza u ċertifikazzjoni u sommarju tad-dejta tal-ispezzjonijiet għall-perjodu mill-2011 sal-2016. B'mod partikolari, f'dik il-laqgħa ġew diskussi r-responsabbiltajiet tal-PCAA rigward is-sorveljanza tas-sikurezza tal-Pakistan International Airlines Corporation Ltd.

(71)

Matul dik il-laqgħa, il-Kummissjoni ikkomunikat lill-PCAA għadd ta' elementi fir-rigward tal-obbligi ta' ċertifikazzjoni u ta' sorveljanza tagha. B'mod partikolari, filwaqt li jitqies il-mod trasparenti li bih il-PCAA ipprovdiet l-informazzjoni relatata mas-sikurezza lill-Kummissjoni, il-Kummissjoni enfasizzat li l-PCAA jeħtieġ tagħti attenzjoni xierqa lit-titjib kontinwu tas-sistemi tas-sikurezza tiegħu. Barra minn hekk, il-Kummissjoni kkomunikat lill-PCAA li hija mistennija li tkun kompletament konxja mir-rekwiżiti tar-Regolament tal-Kummissjoni (UE) Nru 452/2014 u l-implikazzjonijiet relatati għall-kumpaniji tal-ajru ċċertifikati fil-Pakistan.

(72)

Fuq il-bażi tal-informazzjoni attwalment disponibbli, inkluża l-informazzjoni pprovduta mill-PCAA fil-laqgħa ta' konsultazzjoni teknika tat-18 ta' April 2017, huwa vvalutat li bħalissa m'hemm l-ebda nuqqas ta' kapaċità jew rieda min-naħa tal-PCAA biex tindirizza n-nuqqasijiet tas-sikurezza.

(73)

Għalhekk, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan il-ħin m'hemmx raġunijiet biex tinbidel il-lista tal-kumpaniji tal-ajru li huma soġġetti għal projbizzjoni tal-operat fl-Unjoni billi jiġu inklużi l-kumpaniji tal-ajru mill-Pakistan.

(74)

L-Istati Membri għandhom jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fil-Pakistan, skont ir-Regolament (UE) Nru 965/2012.

(75)

Jekk xi informazzjoni rilevanti tas-sikurezza tindika li hemm riskji imminenti tas-sikurezza b'konsegwenza ta' nuqqas ta' konformità mal-standards internazzjonali tas-sikurezza, il-Kummissjoni tista' tkun obbligata tieħu azzjoni ulterjuri b'konformità mar-Regolament (KE) Nru 2111/2005.

(76)

Matul l-aħħar sitt xhur, il-Kummissjoni, l-EASA u l-awtoritajiet kompetenti tal-Istati Membri komplew jissorveljaw mill-qrib il-prestazzjoni tas-sikurezza tal-kumpaniji tal-ajru li ġew iċċertifikati fir-Russja u li joperaw fl-Unjoni, inkluż permezz tal-prijoritizzazzjoni tal-ispezzjonijiet fir-rampa li jridu jitwettqu fuq ċerti kumpaniji tal-ajru Russi f'konformità mar-Regolament (UE) Nru 965/2012.

(77)

Fis-17 ta' Marzu 2017, rappreżentanti tal-Kummissjoni, tal-EASA u ta' Stat Membru, iltaqgħu mar-rappreżentanti tal-Aġenzija Federali tat-Trasport tal-Ajru Russa (“FATA”). L-għan tal-laqgħa kien li jsir rieżami tal-prestazzjoni tas-sikurezza tal-kumpaniji tal-ajru ċċertifikati fir-Russja abbażi tar-rapporti dwar l-ispezzjoni fir-rampa għall-perjodu bejn il-11 ta' Marzu 2016 u l-10 ta' Marzu 2017 u li jiġu identifikati każijiet fejn l-attivitajiet ta' sorveljanza mill-FATA għandhom jiġu msaħħa.

(78)

Waqt dik il-laqgħa, il-Kummissjoni eżaminat mil-ġdid ir-riżultati tal-ispezzjonijiet fir-rampa tas-SAFA ta' sitt kumpaniji tal-ajru ċċertifikati fir-Russja f'iktar dettall. Filwaqt li l-ebda tħassib dwar is-sikurezza ma ġie identifikat, il-FATA infurmat lill-Kummissjoni li, minħabba n-numru limitat ta' spezzjonijiet imwettqa fuq xi wħud mill-kumpaniji tal-ajru, se jsiru iktar spezzjonijiet fit-tliet xhur li ġejjin fuq tnejn minn dawn il-kumpaniji tal-ajru.

(79)

Fuq il-bażi tal-informazzjoni attwalment disponibbli, inkluża l-informazzjoni pprovduta mill-FATA fil-laqgħa ta' konsultazzjoni teknika tas-17 ta' Marzu 2017, huwa vvalutat li bħalissa m'hemm l-ebda nuqqas ta' kapaċità jew rieda min-naħa tal-FATA biex jindirizza n-nuqqasijiet tas-sikurezza. Fuq din il-bażi, il-Kummissjoni kkonkludiet li ma kinitx meħtieġa seduta ta' smigħ quddiem il-Kummissjoni u l-Kumitat għas-Sikurezza tal-Ajru tal-awtoritajiet tal-avjazzjoni Russi jew ta' kwalunkwe kumpanija tal-ajru ċċertifikata fir-Russja.

(80)

Għalhekk, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan il-ħin, m'hemmx raġunijiet biex tinbidel il-lista tal-kumpaniji tal-ajru li huma soġġetti għal projbizzjoni tal-operat fl-Unjoni biex tinkludi l-kumpaniji tal-ajru mir-Russja.

(81)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fir-Russja, skont ir-Regolament (UE) Nru 965/2012.

(82)

Jekk dawk l-ispezzjonijiet jindikaw riskju imminenti għas-sikurezza minħabba nuqqas ta' konformità mal-istandards rilevanti tas-sikurezza, il-Kummissjoni tista' tkun obbligata li tieħu azzjoni kontra l-kumpaniji tal-ajru mir-Russja, f'konformità mar-Regolament (KE) Nru 2111/2005.

(83)

Fis-16 ta' April 2015, il-kumpanija tal-ajru Mustique Airways, irreġistrata f'Saint Vincent u l-Grenadini, applikat għal awtorizzazzjoni ta' TCO mal-EASA. L-EASA vvalutat l-applikazzjoni skont ir-rekwiżiti stabbiliti fir-Regolament (UE) Nru 452/2014 u qajmet tħassib fundamentali rigward in-nuqqas mill-Mustique Airways, li turi konformità mar-rekwiżiti applikabbli stabbiliti fl-Artikolu 3 tar-Regolament (UE) Nru 452/2014. Għaldaqstant, l-EASA kkonkludiet li valutazzjoni ulterjuri ma kinitx se twassal għall-ħruġ ta' awtorizzazzjoni ta' TCO għall-Mustique Airways, għaliex din ma kinitx tissodisfa dawk ir-rekwiżiti. Għalhekk, fl-4 ta' Ottubru 2016, l-EASA rrifjutat l-applikazzjoni ta' TCO minħabba raġunijiet ta' sikurezza.

(84)

Fit-30 ta' Jannar 2017, il-Kummissjoni talbet informazzjoni mingħand l-awtorità kompetenti ta' Saint Vincent u l-Grenadini, l-Awtorità tal-Avjazzjoni Ċivili tal-Karibew tal-Lvant (“ECCAA”) dwar il-miżuri li ttieħdu wara r-rifjut mill-EASA tal-applikazzjoni tat-TCO li saret mill-Mustique Airways. Fl-24 ta' Frar 2017, l-ECCAA infurmat lill-Kummissjoni li il-Mustique Airways kienet reġgħet applikat mal-EASA għal awtorizzazzjoni ta' TCO fit-2 ta' Frar 2017, għar-raġuni li, skont il-Mustique Airways, il-kwistjonijiet marbuta mas-sikurezza li wasslu għaċ-ċaħda mill-EASA setgħu jiġu solvuti b'mod sodisfaċenti.

(85)

Peress li la l-Mustique Airways u lanqas l-ECCAA ma pprovdew l-ebda evidenza li l-kwistjonijiet ta' sikurezza li jirriżultaw mill-valutazzjoni tas-sikurezza tat-TCO mill-EASA fil-fatt kienet ġiet solvuta, kemm l-ECCAA u kif ukoll il-Mustique Airways ġew mogħtija l-opportunità li jinstemgħu mill-Kummissjoni u mill-Kumitat tas-Sikurezza tal-Ajru fis-26 ta' April 2017 skont l-Artikolu 7 tar-Regolament (KE) Nru 2111/2005.

(86)

L-awtorità ma weġbitx għall-istedina għas-smigħ u ma pparteċipatx fis-smigħ. Bl-istess mod, l-ECCAA ma pprovdietx informazzjoni dwar il-miżuri meħuda minħabba s-sejbiet tat-TCO fir-rigward tal-Mustique Airways jew tal-attivitajiet ta' superviżjoni tagħha.

(87)

Fl-24 ta' April 2017 saret laqgħa teknika tal-EASA mal-Mustique Airways biex tiġi diskussa l-applikazzjoni mill-ġdid tagħha. Fid-dawl tal-perjodu qasir ta' żmien bejn din il-laqgħa u s-seduta tas-smigħ, ma kienx possibbli li l-EASA twettaq valutazzjoni sħiħa tal-applikazzjoni mill-ġdid. Madankollu, l-EASA kienet f'pożizzjoni li tikkonferma lill-Kummissjoni u lill-Kumitat dwar is-Sikurezza tal-Ajru li l-kawżi bażiċi prinċipali li wasslu għan-nuqqasijiet serji u ripetuti fil-qasam tas-sikurezza li l-EASA kienet identifikat fl-ewwel valutazzjoni tat-TCO, għadhom preżenti.

(88)

Waqt is-seduta tas-26 ta' April 2017, il-Mustique Airways ipprovdiet informazzjoni dwar in-negozju u l-faċilitajiet tal-kumpanija u, sa ċertu punt biss, fuq l-aspetti marbuta mas-sikurezza. L-informazzjoni pprovduta mill-Mustique Airways dwar il-progress li sar fir-rigward tal-iżvilupp ta' sistemi tal-ġestjoni tas-sikurezza u tal-kwalità tagħha indikat li dawn mhumiex żviluppati biżżejjed. Filwaqt li r-rieda tal-Mustique Airways biex timpenja ruħha fi djalogu aktar effettiv mal-EASA dwar l-applikazzjoni mill-ġdid mill-Mustique Airways għal awtorizzazzjoni ta' TCO intlaqgħet b'sodisfazzjon, instab li elementi essenzjali tas-sikurezza, bħal sistema bażika tal-ġestjoni tas-sikurezza, mhumiex preżenti. Barra minn hekk, il-Mustique Airways uriet nuqqas ta' għarfien u fehim tan-natura serja tas-sejbiet li qajmet l-EASA. Finalment, deher ċar li l-kultura tas-sikurezza tal-kumpanija tal-ajru hija ta' natura reattiva aktar milli ta' natura proattiva.

(89)

L-informazzjoni disponibbli attwalment, inkluż dik ipprovduta mill-EASA fil-qafas tal-applikazzjoni tat-TCO irrifjutata tal-Mustique Airways, u fil-qafas tal-applikazzjoni mill-ġdid li għaddejja, kif ukoll l-informazzjoni kollha pprovduta mill-kumpanija tal-ajru Mustique Airways, turi li hemm evidenza ta' nuqqasijiet serji tas-sikurezza min-naħa tal-Mustique Airways. Bħalissa, il-Mustique Airways mhijiex kapaċi biżżejjed tindirizza n-nuqqasijiet tas-sikurezza tagħha. Fil-fatt, l-azzjonijiet ta' sikurezza tagħha li huma għaddejjin fil-biċċa l-kbira għadhom fl-istadju ta' żvilupp, u l-pjan ta' azzjoni korrettiva li l-Mustique Airways ippreżentat bi tweġiba għas-sejbiet identifikati waqt il-valutazzjoni tas-sikurezza tat-TCO mhuwiex b'saħħtu biżżejjed, b'mod partikolari fir-rigward tal-analiżi tal-kawżi ewlenin meħtieġa.

(90)

Għaldaqstant, f'konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li l-lista tal-kumpaniji tal-ajru li huma soġġetti għal projbizzjoni operattiva fl-Unjoni tiġi emendata biex il-kumpanija tal-ajru Mustique Airways tiġi inkluża fl-Anness A tar-Regolament (KE) Nru 474/2006.

(91)

L-Istati Membri jridu jibqgħu jivverifikaw il-konformità effettiva mal-istandards rilevanti tas-sikurezza bil-prijoritizzazzjoni tal-ispezzjonijiet fir-rampa li jridu jsiru fuq il-kumpaniji tal-ajru ċċertfikati f'Saint Vincent u l-Grenadini skont ir-Regolament (UE) Nru 965/2012.

(92)

Jekk xi informazzjoni rilevanti tas-sikurezza tindika li hemm riskji imminenti tas-sikurezza b'konsegwenza ta' nuqqas ta' konformità ma' standards internazzjonali tas-sikurezza, il-Kummissjoni tista' tkun obbligata tieħu azzjoni ulterjuri b'konformità mar-Regolament (KE) Nru 2111/2005.

(93)

Fis-17 ta' Marzu 2017 saret laqgħa teknika bejn il-Kummissjoni, l-EASA u l-Awtorità tal-Avjazzjoni Ċivili tat-Tajlandja (“CAAT”). Matul dik il-laqgħa, is-CAAT aġġornat lill-Kummissjoni dwar il-progress li sar minn Settembru 2016 'l hawn, b'mod partikolari fir-rigward tas-sistema tat-trasport bl-ajru fit-Tajlandja, il-pjan direzzjonali lejn il-konformità tas-CAAT lejn il-konformità u l-istatus attwali tal-implimentazzjoni tal-pjan ta' azzjoni korrettiva tagħha.

(94)

L-elementi ewlenin tal-progress huma l-Att dwar l-Avjazzjoni Ċivili l-ġdid tat-Tajlandja, li mistenni jidħol fis-seħħ fl-aħħar tliet xhur tal-2017, l-emenda tar-regolamenti tas-CAAT, l-organizzazzjoni aġġornata tagħha, il-mekkaniżmi ta' finanzjament sostenibbli u l-programm imtejjeb tal-persunal u tat-taħriġ tal-ispetturi tagħha. Il-proċessi, il-manwali u l-għodod tas-CAAT, inkluż is-sistema tal-IT ġew imtejba u l-programm ta' sorveljanza tas-sikurezza tagħha ġie aġġornat sabiex ikun hemm garanzija ta' sorveljanza sħiħa u kontinwa tal-kumpaniji tal-ajru ċċertifikati fit-Tajlandja. Is-CAAT ħolqot ukoll dipartiment tal-assigurazzjoni tal-kwalità, inkarigat mill-monitoraġġ tal-konformità tas-CAAT mal-istandards tas-sikurezza tal-avjazzjoni internazzjonali u nazzjonali.

(95)

Is-CAAT tat ukoll informazzjoni dwar l-iżvilupp tal-Programm għas-Sikurezza tal-Istat tagħha u s-sitwazzjoni fir-rigward tas-sejbiet imqajma matul il-verifika tal-ICAO f'Jannar 2015, inkluż Tħassib Sinifikanti dwar is-Sikurezza rigward iċ-ċertifikazzjoni tal-operaturi tal-ajru bbażata fuq dawk is-sejbiet. Barra minn hekk, is-CAAT tat informazzjoni dwar il-progress li sar rigward il-pjan ta' sostenibilità tagħha u l-kooperazzjoni internazzjonali li s-CAAT hija involuta fiha.

(96)

Element importanti tal-pjan ta' azzjoni korrettiva tas-CAAT huwa ċ-ċertifikazzjoni mill-ġdid tal-kumpaniji fit-Tajlandja, wara l-approċċ strutturat tal-ICAO b'ħames fażijiet għaċ-ċertifikazzjoni tal-kumpaniji tal-ajru. Fi Frar 2017, l-ewwel waħda minn dawk il-kumpaniji tal-ajru li topera internazzjonalment ġiet tċċertifikata mill-ġdid u sal-aħħar ta' Ġunju 2017, is-CAAT tistenna li se tiċċertifika mill-ġdid 12-il kumpanija tal-ajru oħra involuti fit-trasport internazzjonali bl-ajru. Matul il-proċess ta' ċertifikazzjoni mill-ġdid, is-CAAT ħadet miżuri ta' infurzar fir-rigward ta' ċerti applikanti għaċ-ċertifikazzjoni mill-ġdid.

(97)

Il-gvern tat-Tajlandja u s-CAAT urew impenn ċar biex itejbu s-sistema ta' sorveljanza tas-sikurezza fit-Tajlandja. Is-CAAT ipprovdiet evidenza li tul l-aħħar sitt xhur inkiseb progress relevanti. L-informazzjoni disponibbli bħalissa dwar is-sikurezza fuq il-kumpaniji tal-ajru ċċertifikati fit-Tajlandja ma tappoġġax deċiżjoni li jiġu imposti projbizzjoni jew restrizzjonijiet operazzjonali. Sabiex tiġi ssorveljata mill-qrib is-sitwazzjoni, se jibqgħu jsiru konsultazzjonijiet mal-awtoritajiet tat-Tajlandja b'konformità mal-Artikolu 3(2) tar-Regolament (KE) Nru 473/2006.

(98)

Għalhekk, f'konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju m'hemmx raġunijiet għala għandha tiġi emendata l-lista tal-kumpaniji tal-ajru li huma soġġetti għall-projbizzjoni fuq l-operat fl-Unjoni fir-rigward tal-kumpaniji tal-ajru mit-Tajlandja.

(99)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fit-Tajlandja skont ir-Regolament (UE) Nru 965/2012.

(100)

Jekk xi informazzjoni rilevanti tas-sikurezza tindika li hemm riskji imminenti tas-sikurezza b'konsegwenza ta' nuqqas ta' konformità ma' standards internazzjonali tas-sikurezza, il-Kummissjoni tista' tkun obbligata tieħu azzjoni ulterjuri b'konformità mar-Regolament (KE) Nru 2111/2005.

(101)

Fid-29 ta' Awwissu 2014, il-kumpanija tal-ajru International Joint-Stock Aviation Company “URGA”, iċċertifikata fl-Ukrajna, applikat għal awtorizzazzjoni ta' TCO mal-EASA. L-EASA vvalutat l-applikazzjoni skont ir-rekwiżiti stabbiliti bir-Regolament (UE) Nru 452/2014 u qajmet tħassib fundamentali rigward in-nuqqas mill-International Joint-Stock Aviation Company “URGA” li turi konformità mar-rekwiżiti applikabbli stabbiliti fl-Artikolu 3 tar-Regolament (UE) Nru 452/2014. Għalhekk, l-EASA kkonkludiet li valutazzjoni ulterjuri ma kinitx se twassal għall-ħruġ ta' awtorizzazzjoni ta' TCO għall-International Joint-Stock Aviation Company “URGA” għaliex din ma kinitx tissodisfa dawk ir-rekwiżiti. Għalhekk, fis-15 ta' Settembru 2016, l-EASA rrifjutat l-applikazzjoni ta' TCO minħabba raġunijiet ta' sikurezza

(102)

Fil-15 ta' Frar 2016, il-kumpanija tal-ajru Air Company “Black Sea Airlines” LLC, irreġistrata fl-Ukrajna applikat għal awtorizzazzjoni ta' TCO mal-EASA. L-EASA vvalutat l-applikazzjoni skont ir-rekwiżiti stabbiliti fir-Regolament (UE) Nru 452/2014 u qajmet tħassib fundamentali rigward in-nuqqas mill-Air Company “Black Sea Airlines” LLC, li turi konformità mar-rekwiżiti applikabbli stabbiliti fl-Artikolu 3 tar-Regolament (UE) Nru 452/2014. Għalhekk, l-EASA kkonkludiet li valutazzjoni ulterjuri ma kinitx se twassal għall-ħruġ ta' awtorizzazzjoni ta' TCO għall-Air Company “Black Sea Airlines” LLC għaliex din ma kinitx tissodisfa dawk ir-rekwiżiti. Għalhekk, fit-13 ta' Ottubru 2016, l-EASA rrifjutat l-applikazzjoni ta' TCO minħabba raġunijiet ta' sikurezza

(103)

Fis-6 ta' Marzu 2017, il-Kummissjoni talbet informazzjoni mill-Ammistrazzjoni tal-Avjazzjoni tal-Istat tal-Ukrajna (“SAAU”) dwar il-miżuri li ħadet wara r-rifjut mill-EASA tal-applikazzjonijiet ta' TCO magħmula mill-International Joint-Stock Aviation Company “URGA” u mill-Air Company “Black Sea Airlines” LLC. Dik l-ittra fetħet konsultazzjonijiet uffiċjali mas-SAAU, skont id-dispożizzjonijiet stabbiliti fl-Artikolu 3(2) tar-Regolament (KE) Nru 473/2006. Billi t-tħassib tas-sikurezza li jirriżulta mill-valutazzjoni tas-sikurezza ta' TCO mill-EASA ma ġiex solvut, is-SAAU, l-International Joint-Stock Aviation Company “URGA” u l-Air Company “Black Sea Airlines” LLC ingħataw l-opportunità li jinstemgħu fil-25 ta' April 2017 mill-Kummissjoni u l-Kumitat għas-Sikurezza tal-Ajru skont l-Artikolu 7 tar-Regolament (KE) Nru 2111/2005.

(104)

Fit-3 ta' April 2017, is-SAAU rrevokat iċ-ċertifikat ta' operatur tal-ajru tal-Air Company “Black Sea Airlines” LLC. Din id-deċiżjoni temmet il-konsultazzjoni uffiċjali miftuħa fis-6 ta' Marzu 2017 fir-rigward ta' dik il-kumpanija tal-ajru.

(105)

Is-SAAU u l-International Joint-Stock Aviation Company “URGA” nstemgħu mill-Kummissjoni u mill-Kumitat għas-Sikurezza tal-Ajru fil-25 ta' April 2017. Fost elementi oħra, is-SAAU rrappurtat li l-attivitajiet ta' sorveljanza fuq il-kumpaniji tal-ajru li ġew iċċertifikati fl-Ukrajna huma aġġustati mar-rekords SAFA kif ukoll bi kwalunkwe informazzjoni li ħarġet mill-proċess ta' awtorizzazzjoni ta' TCO. Is-SAAU pprovdiet ukoll informazzjoni dwar l-adozzjoni ta' azzjonijiet possibbli fuq perjodu qasir bħas-sospensjoni, il-limitazzjoni jew ir-revoka taċ-ċertifikat ta' operatur tal-ajru tal-kumpaniji tal-ajru b'reazzjoni għal ċaħda ta' applikazzjoni għal awtorizzazzjoni ta' TCO mill-EASA. Barra minn hekk, is-SAAU pprovdiet informazzjoni dwar azzjonijiet fit-tul bl-għan li jittejbu l-proċessi interni tagħha relatati mal-attivitajiet ta' ċertifikazzjoni u ta' sorveljanza tagħha fir-rigward tal-kumpaniji tal-ajru ċċertifikati fl-Ukrajna.

(106)

Matul is-seduta, hija u telabora fuq l-informazzjoni li kienet ipprovdiet qabel, l-International Joint-Stock Aviation Company “URGA” tat informazzjoni oħra dwar il-miżuri korrettivi li ttieħdu sabiex jiġu indirizzati l-preokkupazzjonijiet serji identifikati mill-EASA bħala parti mill-valutazzjoni tas-sikurezza ta' TCO tagħha, bħall-ġestjoni kontinwa tal-ajrunavigabbiltà u l-eżekuzzjoni tal-attivitajiet ta' manutenzjoni. Il-kumpanija tal-ajru rrapportat ukoll dwar awditu addizzjonali li sar f'Marzu 2017 minn entità privata biex jiġi ddeterminat l-istatus attwali tal-konformità tagħha mal-istandards internazzjonali tas-sikurezza tal-avjazzjoni. Dak l-awditu kkonferma n-nuqqasijiet sistemiċi li kienu ġew identifikati preċedentement mill-EASA fis-sistema ta' dokumentazzjoni eżistenti tal-kumpanija tal-ajru.

(107)

Matul is-seduta, l-International Joint-Stock Aviation Company “URGA” spjegat ukoll li kienet reġgħet applikat għal awtorizzazzjoni ta' TCO fid-19 ta' April 2017. Il-Kummissjoni u l-Kumitat tas-Sikurezza tal-Ajru ħadu nota ta' dan u laqgħu b'sodisfazzjon il-konferma tal-kumpanija tal-ajru u anki tal-EASA li l-ipproċessar ta' din l-applikazzjoni għat-TCO l-ġdida se tingħata l-attenzjoni kollha dovuta fi ħdan il-qafas tar-Regolament (UE) Nru 452/2014.

(108)

L-informazzjoni disponibbli bħalissa, ibbażata fuq valutazzjoni tas-sikurezza ta' TCO mill-EASA tal-International Joint-Stock Aviation Company “URGA”, flimkien mal-informazzjoni pprovduta mis-SAAU u l-International Joint-Stock Aviation Company “URGA”, turi li l-implimentazzjoni tal-azzjonijiet korrettivi biex jindirizzaw it-tħassib fil-qasam tas-sikurezza li tqajjem mill-EASA għadha mhix kompluta biżżejjed. Dik l-informazzjoni turi wkoll li l-kumpanija tal-ajru bħalissa mhijiex kapaċi tidentifika hi stess in-nuqqasijiet ta' konformità fil-proċessi u fl-attivitajiet kollha tagħha.

(109)

Għalhekk, f'konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li l-lista tal-kumpaniji tal-ajru li huma soġġetti għall-projbizzjoni fuq l-operat fl-Unjoni jenħtieġ li tiġi emendata biex il-kumpanija tal-ajru, l-International Joint-Stock Aviation Company “URGA”, tiġi inkluża fl-Anness A tar-Regolament (KE) Nru 474/2006.

(110)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fl-Ukrajna, skont ir-Regolament (UE) Nru 965/2012.

(111)

Jekk xi informazzjoni rilevanti tas-sikurezza tindika li hemm riskji imminenti tas-sikurezza b'konsegwenza ta' nuqqas ta' konformità ma' standards internazzjonali tas-sikurezza, il-Kummissjoni tista' tkun obbligata tieħu azzjoni ulterjuri b'konformità mar-Regolament (KE) Nru 2111/2005.

(112)

Fit-12 ta' April 2016, il-kumpanija tal-ajru Air Zimbabwe (Pvt) Ltd, irreġistrata fiż-Żimbabwe, applikat għal awtorizzazzjoni ta' TCO mal-EASA. L-EASA vvalutat l-applikazzjoni skont ir-rekwiżiti stabbiliti fir-Regolament (UE) Nru 452/2014 u qajmet tħassib fundamentali rigward in-nuqqas mill-Air Zimbabwe Pvt Ltd, li turi konformità mar-rekwiżiti applikabbli stabbiliti fl-Artikolu 3 tar-Regolament (UE) Nru 452/2014. Għaldaqstant, l-EASA kkonkludiet li valutazzjoni ulterjuri ma kinitx se twassal għall-ħruġ ta' awtorizzazzjoni ta' TCO għall-Air Zimbabwe Pvt Ltd, għaliex din ma kinitx tissodisfa dawk ir-rekwiżiti. Għalhekk, fis-7 ta' Novembru 2016, l-EASA rrifjutat l-applikazzjoni ta' TCO minħabba raġunijiet ta' sikurezza

(113)

Fit-3 ta' Marzu 2017, il-Kummissjoni talbet informazzjoni mill-Awtorità tal-Avjazzjoni Ċivili taż-Żimbabwe (“CAAZ”) dwar il-miżuri li ħadet wara r-rifjut mill-EASA tal-applikazzjoni ta' TCO tal-Air Zimbabwe Pvt Ltd. Dik l-ittra fetħet konsultazzjonijiet uffiċjali mas-CAAZ, skont id-dispożizzjonijiet stabbiliti fl-Artikolu 3(2) tar-Regolament (KE) Nru 473/2006. Billi t-tħassib dwar is-sikurezza tal-Air Zimbabwe Pvt Ltd, ma ġiex solvut, mill-valutazzjoni ta' sikurezza ta' TCO mill-EASA, kemm is-CAAZ u kemm l-Air Zimbabwe Pvt Ltd ingħataw l-opportunità ta' smigħ fis-26 ta' April 2017 quddiem il-Kummissjoni u l-Kumitat għas-Sikurezza tal-Ajru f'konformità mal-Artikolu 7 tar-Regolament (KE) Nru 2111/2005.

(114)

Waqt dak is-smigħ, fost elementi oħra, is-CAAZ tat informazzjoni dwar ir-responsabbiltajiet ta' sorveljanza tagħha fir-rigward tal-Air Zimbabwe (Pvt) Ltd. Is-CAAZ tat sommarju tal-azzjonijiet meħuda f'rabta mar-rifjut minħabba raġunijiet ta' sikurezza mill-EASA tal-applikazzjoni għal awtorizzazzjoni TCO mill-Air Zimbabwe (Pvt) Ltd. L-EASA tat informazzjoni dwar it-tħassib serju dwar is-sikurezza li kien il-bażi għad-deċiżjoni negattiva dwar it-TCO.

(115)

Matul din is-seduta, l-Air Zimbabwe (Pvt) Ltd ipprovdiet informazzjoni dwar l-azzjonijiet korrettivi li ġew mibdija u li għadhom għaddejjin mindu l-applikazzjoni għal TCO ta' dik il-kumpanija tal-ajru kienet ġiet miċħuda mill-EASA. Madankollu, l-informazzjoni pprovduta mill-Air Zimbabwe (Pvt) Ltd, inklużi l-elementi dwar il-progress limitat li għamlet fir-rigward tal-iżvilupp tas-sistemi tal-ġestjoni tas-sikurezza u tal-kwalità tagħha, ma kinitx biżżejjed sabiex ittaffi t-tħassib imqajjem.

(116)

L-informazzjoni disponibbli attwalment, inkluż l-informazzjoni marbuta mal-valutazzjoni tas-sikurezza TCO tal-EASA tal-Air Zimbabwe (Pvt) Ltd, flimkien mal-informazzjoni mogħtija mill-CAAZ u mill-Air Zimbabwe (Pvt) Ltd, juru biċ-ċar li hemm nuqqasijiet serji fil-qasam tas-sikurezza min-naħa tal-Air Zimbabwe (Pvt) Ltd. L-Air Zimbabwe (Pvt) Ltd fil-preżent titqies li mhijiex kapaċi tindirizza dawk in-nuqqasijiet tas-sikurezza. Fil-fatt, l-azzjonijiet tas-sikurezza tal-Air Zimbabwe (Pvt) Ltd li għaddejjin, fil-biċċa l-kbira għadhom fl-istadju ta' żvilupp u l-pjan ta' azzjoni korrettiva li l-Air Zimbabwe (Pvt) Ltd ippreżentat bi tweġiba għas-sejbiet identifikati waqt il-valutazzjoni tas-sikurezza TCO, mhux robust, b'mod partikolari fir-rigward tal-analiżi meħtieġa tal-kawżi ewlenin.

(117)

Għalhekk, f'konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li l-lista tal-kumpaniji tal-ajru li huma soġġetti għall-projbizzjoni fuq l-operat fl-Unjoni jenħtieġ li tiġi emendata biex il-kumpanija tal-ajru Air Zimbabwe Pvt Ltd tiġi inkluża fl-Anness A tar-Regolament (KE) Nru 474/2006.

(118)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fiż-Żimbabwe, skont ir-Regolament (UE) Nru 965/2012.

(119)

Jekk xi informazzjoni rilevanti tas-sikurezza tindika li hemm riskji imminenti tas-sikurezza b'konsegwenza ta' nuqqas ta' konformità ma' standards internazzjonali tas-sikurezza, il-Kummissjoni tista' tkun obbligata tieħu azzjoni ulterjuri b'konformità mar-Regolament (KE) Nru 2111/2005.

(120)

Għalhekk ir-Regolament (KE) Nru 474/2006 għandu jiġi emendat skont dan,

(121)

Il-miżuri previsti f'dan ir-Regolament huma skont l-opinjoni tal-Kumitat għas-Sikurezza tal-Ajru,

(1)

L-Anness A jinbidel bit-test stabbilit fl-Anness I ta' dan ir-Regolament;

(2)

L-Anness B jinbidel bit-test stabbilit fl-Anness II ta' dan ir-Regolament.