(1)

Huwa importanti li jiġu adottati standards tekniċi regolatorji biex jiġu identifikati b'mod ċar il-kundizzjonijiet meta l-istrutturi ta' kolokazzjoni u ta' tariffi użati minn postijiet tan-negozjar jistgħu jitqiesu ġusti u mhux diskriminatorji.

(2)

Id-Direttiva 2014/65/UE testendi r-rekwiżiti relatati mal-istrutturi ta' kolokazzjoni u ta' tariffi għal faċilitajiet multilaterali tan-negozjar u faċilitajiet organizzati tan-negozjar. Għaldaqstant huwa importanti li jiġi żgurat li dawn iċ-ċentri jkunu wkoll fil-kamp ta' applikazzjoni ta' dan ir-Regolament.

(3)

Sabiex jiġu żgurati kundizzjonijiet armonizzati, għandhom japplikaw rekwiżiti komuni għat-tipi kollha ta' servizzi ta' kolokazzjoni u għaċ-ċentri tan-negozjar li jorganizzaw iċ-ċentri tad-dejta tagħhom stess jew li jużaw iċ-ċentri tad-dejta li huma ġestiti jew huma proprjetà ta' partijiet terzi.

(4)

Iċ-ċentri tan-negozjar għandu jkollhom l-abbiltà li jiddeterminaw il-politika kummerċjali tagħhom f'dak li għandu x'jaqsam mal-kolokazzjoni u jiddeterminaw lil liema tipi ta' parteċipanti fis-suq iridu jagħtu aċċess għal dawk is-servizzi diment li l-politika kummerċjali tagħhom tkun ibbażata fuq kriterji oġġettivi, trasparenti u mhux diskriminatorji. Iċ-ċentri tan-negozjar ma għandhomx ikunu meħtieġa li jestendu l-kapaċitajiet ta' kolokazzjoni tagħhom lil hinn mil-limiti tal-ispazju, tal-enerġija, tat-tkessiħ jew faċilitajiet simili disponibbli u għandu jkollhom id-diskrezzjoni li jiddeċiedu jekk għandhomx jespandu l-ispazju ta' kolokazzjoni tagħhom jew le.

(5)

Servizzi ġusti u mhux diskriminatorji ta' kolokazzjoni u ta' tariffi jirrikjedu ċertu livell ta' trasparenza suffiċjenti sabiex jiżguraw li ma ssirx ċirkomvenzjoni tal-obbligi stabbiliti fid-Direttiva 2014/65/UE. Għalhekk, iċ-ċentri tan-negozjar għandhom jużaw kriterji oġġettivi meta jiġu ddeterminati roħsijiet, inċentivi u diżinċentivi.

(6)

L-istrutturi ta' tariffi li jikkontribwixxu għall-kundizzjonijiet li jwasslu għal kundizzjonijiet ta' negozjar diżordinati permezz tal-inkoraġġiment ta' negozjar intensiv u li jista' jwassal għal stress fl-infrastrutturi tas-suq għandhom jiġu pprojbiti. Għaldaqstant, għandhom ikunu permessi skontijiet fuq il-kwantità, diment li, bħala skemi ta' divrenzjar tal-prezzijiet, dawn ikunu bbażati fuq il-volum totali tan-negozjar, l-għadd totali tan-negozjar jew it-tariffi akkumulati tan-negozjar iġġenerati minn membru wieħed fejn in-negozjar marġinali eżegwit sussegwentament biex jintlaħaq il-limitu biss ikun eżegwit bi prezz imnaqqas.

(7)

Għal raġunijiet ta' konsistenza u sabiex ikun żgurat il-funzjonament bla xkiel tas-swieq finanzjarji, jeħtieġ li d-dispożizzjonijiet stabbiliti f'dan ir-Regolament u d-dispożizzjonijiet nazzjonali relatati li jittrasponu d-Direttiva 2014/65/UE japplikaw mill-istess data.

(8)

Dan ir-Regolament huwa bbażat fuq l-abbozz tal-istandards tekniċi regolatorji sottomess mill-Awtorità Ewropea tat-Titoli u s-Swieq lill-Kummissjoni.

(9)

L-Awtorità Ewropea tat-Titoli u s-Swieq wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqhom huwa bbażat dan ir-Regolament, analizzat il-kosti u l-benefiċċji potenzjali relatati u talbet l-opinjoni tal-Grupp tal-Partijiet Konċernati tat-Titoli u s-Swieq stabbilit mill-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (2),

(a)

lista ta' servizzi pprovduti li tagħti informazzjoni dwar l-ispazju, l-enerġija, it-tkessiħ, it-tul tal-kejbil, l-aċċess għad-dejta, il-konnettività tas-suq, it-teknoloġija, l-appoġġ tekniku, it-tipi ta' messaġġi, it-telekomunikazzjoni u prodotti u servizzi relatati;

(b)

l-istruttura tat-tariffi għal kull servizz kif stabbilit fl-Artikolu 3(2);

(c)

il-kundizzjonijiet għall-aċċess għas-servizz, inklużi r-rekwiżiti tal-IT u arranġamenti operazzjonali;

(d)

it-tipi differenti ta' latenza ta' aċċess disponibbli;

(e)

il-proċedura għall-allokazzjoni tal-ispazju ta' kolokazzjoni;

(f)

ir-rekwiżiti għal fornituri ta' parti terza ta' servizzi ta' kolokazzjoni, fejn applikabbli.