(1)

Fis-7 ta' Ottubru 2016, il-Kummissjoni Ewropea (“il-Kummissjoni”) imponiet dazju proviżorju antidumping fuq l-importazzjonijiet fl-Unjoni Ewropea (“l-Unjoni”) ta' prodotti ċatti ta' azzar illigat jew mhux illigat (bl-esklużjoni tal-azzar inossidabbli, azzar tas-siliċju-elettriku, azzar tal-għodda u azzar għal veloċità għolja), b'laminazzjoni termali, mhux miksijin, indurati jew mgħottijin, mhux f'kolji, bi ħxuna ta' aktar minn 10 mm u wisa' ta' 600 mm jew aktar jew bi ħxuna ta' 4,75 mm jew aktar iżda mhux aktar minn 10 mm u wisa' ta' 2 050 mm jew aktar (“pjanċa tqila”) li joriġinaw mir-Repubblika tal-Poplu taċ-Ċina (“ir-RPĊ”) permezz tar-Regolament ta' Implimentazzjoni tal-Kummissjoni (UE) 2016/1777 (2).(“ir-Regolament proviżorju”).

(2)

Il-Kummissjoni bdiet l-investigazzjoni fit-13 ta' Frar 2016 billi ppubblikat Notifika ta' Bidu f'Il-Ġurnal Uffiċjali tal-Unjoni Ewropea (“in-Notifika ta' Bidu”) wara lment ippreżentat fl-4 ta' Jannar 2016 mill-Assoċjazzjoni Ewropea tal-Azzar, (“il-Eurofer”) f'isem il-produtturi li jirrappreżentaw aktar minn 25 % tal-produzzjoni totali tal-Unjoni ta' pjanċa tqila.

(3)

Kif imsemmi fil-premessi (28) u (29) tar-Regolament proviżorju, l-investigazzjoni ta' dumping u ħsara kopriet il-perjodu mill-1 ta' Jannar 2015 sal-31 ta' Diċembru 2015 (“il-perjodu ta' investigazzjoni” jew “PI”) u l-analiżi tax-xejriet rilevanti għall-valutazzjoni tal-ħsara kopriet il-perjodu mill-1 ta' Jannar 2012 sa tmiem il-perjodu tal-investigazzjoni (“il-perjodu kkunsidrat”).

(4)

Il-Kummissjoni għamlet l-importazzjonijiet ta' pjanċi tqal li joriġinaw mir-RPĊ soġġetti għar-reġistrazzjoni mill-11 ta' Awwissu 2016 bir-Regolament ta' Implimentazzjoni tal-Kummissjoni (UE) 2016/1357 (3) (“ir-Regolament ta' reġistrazzjoni”). Ir-reġistrazzjoni tal-importazzjonijiet waqfet mal-impożizzjoni ta' miżuri proviżorji fit-8 ta' Ottubru 2016.

(5)

Il-partijiet interessati kellhom 20 jum wara l-bidu tar-reġistrazzjoni biex jibgħatu l-kummenti. Ma wasal l-ebda kumment.

(6)

Wara d-divulgazzjoni tal-fatti essenzjali u l-kunsiderazzjonijiet li fuq il-bażi tagħhom ġie impost dazju antidumping proviżorju (“id-divulgazzjoni proviżorja”), Eurofer, assoċjazzjoni ta' produtturi tal-azzar mir-RPĊ (“CISA”), produttur esportatur fir-RPĊ, importatur ta' pjanċa tqila fl-Unjoni msemmi fil-premessa (34) tar-Regolament proviżorju (importatur wieħed) u assoċjazzjoni ad-hoc tal-utenti tal-industrija downstream (torrijiet tat-turbini tar-riħ) għamlu preżentazzjonijiet bil-miktub biex juru l-fehmiet tagħhom dwar il-konklużjonijiet proviżorji.

(7)

Il-partijiet li talbu li jinstemgħu ngħataw din l-opportunità. Saru seduti ma' produttur esportatur wieħed mir-RPĊ, is-CISA u importatur wieħed.

(8)

Il-Kummissjoni kkunsidrat il-kummenti verbali u bil-miktub ippreżentati mill-partijiet interessati u, fejn xieraq, indirizzathom hawn taħt.

(9)

Il-Kummissjoni kompliet tfittex u tivverifika l-informazzjoni kollha li dehrilha li kienet meħtieġa għall-konklużjonijiet definittivi tagħha. Sabiex jiġu vverifikati t-tweġibiet għall-kwestjonarju tal-importaturi mhux relatati, saru żjarat ta' verifika fl-istabbilimenti tal-partijiet li ġejjin:

(10)

Il-Kummissjoni għarrfet lill-partijiet kollha bil-fatti u l-kunsiderazzjonijiet essenzjali, li abbażi tagħhom kien biħsiebha timponi dazju antidumping definittiv fuq importazzjonijiet fl-Unjoni ta' pjanċi tqal li joriġinaw mir-RPĊ u tiġbor b'mod definittiv l-ammonti garantiti permezz ta' dazju proviżorju (“id-divulgazzjoni finali”).

(11)

Il-partijiet kollha ngħataw perjodu li fih setgħu jagħmlu l-kummenti tagħhom dwar id-divulgazzjoni finali. Eurofer, CISA u importatur wieħed għamlu l-kummenti tagħhom fi preżentazzjonijiet bil-miktub b'segwitu għad-divulgazzjoni finali u waqt seduta ta' smigħ. Il-kummenti ppreżentati mill-partijiet interessati ġew ikkunsidrati u fejn xieraq tqiesu.

(12)

Is-CISA sostniet li kampjun ta' produtturi tal-Unjoni li jirrappreżentaw 28,5 % tal-bejgħ totali tal-industrija tal-Unjoni kien żgħir wisq u ma jkoprix biżżejjed bejgħ.

(13)

Kif iddikjarat fil-premessa (12) tar-Regolament proviżorju il-kampjun tal-produtturi tal-Unjoni kien magħmul fuq il-bażi tal-akbar volum ta' bejgħ fl-Unjoni matul il-perjodu tal-investigazzjoni li seta' b'mod raġonevoli jiġi investigat fiż-żmien disponibbli.

(14)

Diġà għal dik ir-raġuni, l-argument irid jinċaħad. Kif indikat fil-premessa (197) hawn taħt, hemm kważi qbil komplet ta' aktar minn 90 % (f'volum) u madwar 70 % (bin-Numru ta' kontroll tal-Prodott (PCN) użat biex jiddifferenzja t-tipi ta' prodotti għal raġunijiet ta' investigazzjoni) bejn it-tipi ta' prodotti esportati mill-produtturi esportaturi fil-kampjun mir-RPĊ u t-tipi ta' prodotti mibjugħin mill-produtturi tal-Unjoni fil-kampjun fis-suq tal-Unjoni.

(15)

Wara d-divulgazzjoni finali is-CISA rritornat għal din il-kwistjoni fil-kummenti tagħha u waqt is-seduta ta' smigħ, u ddikjarat li huwa diffiċli ħafna biex wieħed jemmen li hemm tqabbil kważi totali tal-PCNs jekk il-maġġoranza tal-PCNs mhumiex mibjugħa mit-tliet produtturi tal-Unjoni fil-kampjun. Il-Kummissjoni tinnota li t-tqabbil tal-PCNs sussegwentement ġie vverifikat mill-ġdid, u l-perċentwali mogħtija fil-premessa (14) hawn fuq instab li huma korretti.

(16)

Il-Kummisjoni tosserva f'dan il-kunterst li “tqabbil” tfisser li għal tip ta' prodott esportat mill-produtturi esportaturi mir-RPĊ fil-kampjun, hemm mill-inqas tranżazzjoni waħda għat-tip ta' prodott taħt l-istess PCN għall-produtturi tal-Unjoni fil-kampjun. Tqabbil ta' 90 % bil-volum ifisser li 90 % tat-tranżazzjonijiet tal-importazzjoni tal-produtturi esportaturi mir-RPĊ fil-kampjun matul il-perjodu tal-investigazzjoni jaqgħu taħt PCN li għalih hemm mill-inqas tranżazzjoni waħda għall-produtturi tal-Unjoni fil-kampjun. Tqabbil ta' 70 % bil-PCN ifisser li għal 70 % tat-tipi ta' prodott huma importati taħt PCN partikolari, hemm mill-inqas tranżazzjoni waħda li taqbel tal-produtturi tal-Unjoni fil-kampjun.

(17)

Il-Kummissjoni tikkonkludi għalhekk li l-kampjun tal-produtturi tal-Unjoni huwa rappreżentattiv, anke jekk il-fatt biss li huwa bbażat fuq l-akbar volum li jista' raġonevolment ikun investigat ma kienx suffiċjenti.

(18)

Fin-nuqqas ta' kummenti ulterjuri rigward il-metodu ta' kampjunar, il-konklużjonijiet proviżorji stabbiliti fil-premessi (11) sa (24) tar-Regolament proviżorju huma kkonfermati.

(19)

Il-premessa (25) tar-Regolament proviżorju nnutat li seba' produtturi esportaturi fir-RPĊ indikaw li xtaqu jitolbu eżami individwali skont l-Artikolu 17(3) tar-Regolament bażiku.

(20)

Filwaqt li l-ebda wieħed minn dawn il-produtturi esportaturi ma wieġeb għall-kwestjonarju u għalhekk ġie meqjus li ma waslet l-ebda talba, wieħed minn dawn is-seba' produtturi esportaturi bagħat lura l-formola ta' talba tat-Trattament ta' Ekonomija tas-Suq (“TES”) u wara l-pubblikazzjoni tar-Regolament proviżorju, talab li l-Kummissjoni tivvaluta t-talba tiegħu għal TES.

(21)

Minħabba li l-produttur esportatur ma rritornax il-kwestjonarju, it-talba tal-kumpanija għal trattament individwali ġiet miċħuda, peress li l-produttur esportatur ma weriex li din tissodisfa l-kundizzjonijiet biex tingħata eżami individwali. F'dan il-kuntest ġiet infurmata li l-preżentazzjoni ta' formola ta' talba għal TES waħedha ma kinitx biżżejjed biex issostni t-talba tagħha. Il-Kummissjoni ma vvalutatx it-talba tagħha għal TES, skont l-Artikolu 2(7)(d) tar-Regolament bażiku, peress li ma kinitx fil-kampjun, u lanqas ma kien irnexxielha tikseb trattament individwali.

(22)

Fin-nuqqas ta' kummenti ulterjuri rigward eżami individwali, il-konklużjonijiet proviżorji stipulati fil-premessa (25) tar-Regolament proviżorju huma kkonfermati.

(23)

Il-premessi (30) u (31) tar-Regolament proviżorju jistabbilixxu d-definizzjoni proviżorja tal-prodott ikkonċernat.

(24)

Il-premessi (34) u (41) tar-Regolament proviżorju jistabbilixxu l-pretensjonijiet ta' importatur ta' pjanċa tqila fl-Unjoni u l-valutazzjoni tal-Kummissjoni rigward l-ambitu tal-prodott.

(25)

Wara l-impożizzjoni ta' miżuri proviżorji importatur wieħed u s-CISA ippreżentaw talbiet ulterjuri fuq l-istess linji ta' argument li ċerti tipi ta' prodotti, jiġifieri:

imsemmija minnhom bħala “pjanċa tqila speċjali” għandha tiġi eskluża mill-ambitu tal-prodott.

(26)

Il-Kummissjoni tinnota li kemm “il-pjanċa tqila speċjali” kif ukoll pjanċa tqila oħra jistgħu jsiru għall-qies, għalhekk dan mhuwiex kriterju relevanti biex issir differenza bejniethom.

(27)

Ġew ippreżentati għadd ta' argumenti li appoġġaw din it-talba għal esklużjoni, u huma analizzati fuq bażi individwali hawn taħt.

(28)

Sa mill-bidu, il-Kummissjoni tfakkar li skont il-każistika, la r-Regolament bażiku u lanqas il-Ftehim Antidumping tad-WTO ma jispeċifikaw l-ambitu tal-kunċett tal-“prodott ikkunsidrat”. Il-Qorti għalhekk tqis li l-Kummissjoni għandha diskrezjoni wiesgħa biex tiddefinixxi l-prodott ikkunsidrat. B'mod partikolari, ma hekk l-ebda rekwiżit għall-omoġeneità jew similarità bejn il-prodotti fil-kwistjoni. Pjuttost, il-Qrati tal-Unjoni kkunsidrawha relevanti jekk il-prodotti kollha fil-kwistjoni jikkondividux l-istess karatteristiċi fiżiċi u tekniċi bażiċi. Il-Qorti Ġenerali qieset ukoll li l-użu finali u l-interkambjabbiltà jistgħu jikkostitwixxu kriterji rilevanti.

(29)

Il-Kummissjoni l-ewwel se tistipula l-analiżi ta' dawk il-kriterji fil-każ preżenti u mbagħad se tispjega kif iddeċidiet li tħaddem id-duskrezzjoni wiesgħa tagħha fuq dik il-bażi.

(30)

Importatur wieħed iddikjara li “pjanċa tqila speċjali” tista' faċilment tingħaraf minn “pjanċa tqila tal-komoditajiet” permezz tal-proprjetajiet kimiċi bħall-kontenut tal-karbonju, il-proprjetajiet fiżiċi bħalma hi s-saħħa b'rendiment jew l-indiċi tal-ebusija Brinell, il-proprjetajiet tekniċi bħalma huma d-deżinjazzjonijiet tal-grad jew il-ħxuna.

(31)

Is-CISA, iddikjarat li l-aktar kriterju importanti (bil-volum tal-esportazzjoni) biex jiddistingwi l-“pjanċa tqila speċjali” huwa l-ħxuna tal-pjanċa, li tjopri aktar minn nofs il-prodotti li jridu jiġu esklużi. Is-CISA ibbażat dan l-argument għal esklużjoni mill-ambitu tal-prodott fuq l-istruttura tal-PCN użat biex jiġu aggruppati t-tipi differenti ta' prodotti għall-iskop tal-investigazzjoni.

(32)

L-istruttura tal-PCN tintuża biex jiġi żgurat li l-prodotti b'kosti u prezzijiet komparabbli jiġu pparagunati — hija ma tgħid xejn dwar l-użu tal-prodott jew dwar l-interkambjabbiltà tal-prodott. Fil-każ tal-ħxuna, ukoll hija ma tgħid xejn dwar il-proprjetajiet fiżiċi, kimiċi jew tekniċi tal-prodott. B'mod partikolari, l-ebda wieħed mill-partijiet interessati ma seta' juri li pjanċa tqila bi ħxuna ta' 155 mm ma jkollhiex l-istess użu finali u ma tkunx interkambjabbli ma' pjanċa tqila bi ħxuna ta' 145 mm, meta l-parametri l-oħra kollha jkunu l-istess.

(33)

Barra minn hekk, filwaqt li tabilħaqq jista' jkun hemm dawn id-differenzi speċifiċi fil-proprjetajiet speċifiċi msemmija fil-premessa (30) hawn fuq, dan ma jurix li “pjanċa tqila speċjali” ma għandhiex l-istess karatteristiċi bħall-“pjanċa tqila tal-komoditajiet”.

(34)

L-Eurofer talbet li d-definizzjoni tal-prodott ma tinbidilx u appoġġat l-argumenti tal-Kummissjoni stabbiliti fil-premessi (36) u (41) tar-Regolament proviżorju.

(35)

Hija ssottomettiet ukoll li l-importazzjonijiet oġġett ta' dumping mir-RPĊ jinkludu firxa wiesgħa ta' gradi u dimensjonijiet tal-azzar, u jkopru pjanċi tqal tal-azzar kemm illigat kif ukoll tal-azzar mhux illigat. Hija fl-aħħar nett tinnota li ma hemm l-ebda “rekwiżit speċifiku ta' omoġenejità jew xebh bejn il-prodotti” koperti mill-ambitu tal-prodott ikkonċernat.

(36)

Tabilħaqq, il-Kummissjoni tinnota li hija ħaġa komuni f'investigazzjonijiet antidumping li ambitu tal-prodott ikopri mijiet jew anke eluf ta' tipi ta' prodotti li mhumiex identiċi jew omoġenji, iżda xorta waħda għandhom l-istess karatteristiċi bażiċi, kif inhu l-każ f'din l-investigazzjoni.

(37)

B'segwitu għad-divulgazzjoni finali is-CISA, l-Eurofer u importatur wieħed irritornaw għal din il-kwistjoni fil-kummenti tagħhom u waqt is-seduta ta' smigħ.

(38)

Fir-rigward tal-kummenti msemmija hawn fuq, il-Kummissjoni tinnota li kif inhu l-każ fil-biċċa l-kbira tal-investigazzjonijiet, id-definizzjoni tal-prodott ikkonċernat tkopri varjetà wiesgħa ta' tipi ta' prodott li għandhom karatteristiċi fiżiċi, tekniċi u kimiċi bażiċi li huma simili. Il-fatt li dawn il-karatteristiċi jistgħu jvarjaw minn tip ta' prodott għal tip ta' prodott ieħor jista' tabilħaqq iwassal biex tiġi koperta medda wiesgħa ta' tipi.

(39)

Il-Kummissjoni tinnota wkoll li anki jekk tipi differenti ta' pjanċa tqila jkollhom ħxuna differenti, il-gradi tal-azzar differenti, eċċ., is-CISA u importatur wieħed naqsu milli juru u milli jippreżentaw xi evidenza jew argument sostanzjali li l-ħxuna ta' 150 mm tkun distinzjoni xierqa bejn “pjanċa tqila speċjali” u “pjanċa tqila tal-komoditajiet” għal raġunijiet ta' karatteristiċi fiżiċi, kimiċi u tekniċi jew l-użu finali u l-interkambjabbiltà (ara t-taqsima 2.1.2 hawn taħt).

(40)

Abbażi ta' dak ta' hawn fuq, il-Kummissjoni tikkonkludi li l-“pjanċa tqila speċjali” u l-“pjanċa tqila tal-komoditajiet” għandhom l-istess proprjetajiet fiżiċi, kimiċi u tekniċi bażiċi.

(41)

Is-CISA u importatur wieħd allegaw ukoll li l-importazzjonijiet ta' “pjanċa tqila speċjali” għandha użu finali kompletament differenti, u li mhumiex interkambjabbli ma' “pjanċa tqila tal-komoditajiet”. Is-CISA argumentat li l-importazzjonijiet ta' “pjanċa tqila speċjali” huma essenzjalment għall-industrija tal-Unjoni tal-iffurmar tal-metall, li tiddependi minn dawn l-importazzjonijiet.

(42)

Fl-istess ħin importatur wieħed issottometta li l-“pjanċa tqila speċjali” tintuża minn firxa wiesgħa ta' industriji, inklużi l-magni għat-tħaffir u ċ-ċaqliq tal-art (yellow goods), it-tagħmir għall-krejnijiet u għall-irfigħ, il-kostruzzjonijiet ta' pontijiet, it-torrijiet tat-turbini tar-riħ, is-settur tal-enerġija, eċċ.

(43)

L-ebda utent fl-Unjoni jew l-industriji msemmijin fil-premessi (41) u (42) hawn fuq ma appoġġaw l-argument stipulat fil-premessa (40) hawn fuq. Għall-kuntrarju, b'mod partikolari rigward it-torrijiet tat-turbini tar-riħ, l-evidenza li pprovda dan l-importatur u partijiet oħra interessati turi li l-produtturi tat-torrijiet tat-turbini tar-riħ fil-fatt jixtru pjanċa tqila, li ma taqax fid-definizzjoni ta' “pjanċa tqila speċjali” kif propost minn importatur wieħed jew mis-CISA, iżda pjuttost fid-definizzjoni tagħhom ta' “pjanċa tqila tal-komoditajiet”.

(44)

Il-Kummissjoni tinnota li hemm fil-fatt għadd kbir ta' użi finali differenti ta' “pjanċa tqila speċjali”. Madankollu, il-partijiet interessati ma pprovdewx evidenza ddettaljata (bħal pereżempju fatturi lill-utenti f'dawn l-industriji li juru li dawn l-industriji attwalment qed jużaw dawn il-prodotti) li kienet tippermetti lill-Kummissjoni biex tagħmel valutazzjoni dwar jekk dawk l-utenti finali tal-“pjanċa tqila speċjali” u l-“pjanċa tqila tal-komoditajiet” humiex differenti, jew jekk fir-realtà l-biċċa l-kbira tal-utenti finali jew kollha kemm huma jistgħux jissostitwixxu waħda bl-oħra. Barra minn hekk, ma ġiet ippreżentata l-ebda evidenza li turi li l-“pjanċa tqila speċjali” mhijiex interkambjabbli ma' pjanċa tqila oħra.

(45)

B'segwitu għad-divulgazzjoni finali is-CISA, l-Eurofer u importatur wieħed irritornaw għal din il-kwistjoni fil-kummenti tagħhom u waqt is-seduta ta' smigħ. Is-CISA ma ppreżentat l-ebda argument sostanzjali ġdid. Importatur wieħed sostna li l-użu ta' pjanċa tqila jiddependi fuq valuri strutturali kkalkulati u fuq impatti mekkaniċi (relatati ma' proprjetajiet fiżiċi u kimiċi) u fuq aspetti kummerċjali (relatati mal-prezzijiet u l-kosti tal-proċessi ta' produzzjoni).

(46)

Sabiex isostnu l-argumenti tagħhom semmew:

(47)

Il-Kummissjoni tinnota li kemm is-CISA kif ukoll l-importatur naqsu milli jippreżentaw xi evidenza biex tikkonferma li d-distinzjoni oġġettiva bejn il-“pjanċa tqila speċjali” u l-“pjanċa tqila tal-komoditajiet” hija jekk il-pjanċa jkollhiex ħxuna ta' aktar jew anqas minn 150 mm.

(48)

Barra minn hekk, ma ġiet ippreżentata l-ebda evidenza li ma ma hemmx trikkib u kompetizzjoni bejn is-segmenti li jmissu ma' xulxin ta' pjanċi tqal, pereżempju bejn dawk ta' ħxuna ta' 155 mm u 145 mm. Għall-kuntrarju, diversi fatturi ppreżentati minn importatur wieħed urew li l-“pjanċa tqila tal-komoditajiet” u l-“pjanċa tqila speċjali” nbiegħu fuq l-istess fattura lill-istess klijent.

(49)

Wara d-divulgazzjoni finali importatur wieħed issottometta wkoll li l-Kummissjoni tista' toħloq kodiċi TARIC separat ġdid biex tagħmel distinzjoni bejn il-“pjanċa tqila tal-komoditajiet” u l-“pjanċa tqila speċjali” billi tirreferi għall-proprjetajiet fiżiċi u kimiċi kif ukoll għall-ħxuna. Din il-parti ssuġġeriet ukoll li jkun hemm rekwiżit formali ta' rapport ta' spezzjoni ta' stħarriġ indipendenti tal-kumpanija sabiex jiċċertifika d-distinzjoni msemmija hawn fuq fl-ikklerjar doganali.

(50)

Peress li l-parametru ta' ħxuna ta' 150 mm bħala punt ta' qtugħ bejn il-“pjanċa tqila speċjali” u l-“pjanċa tqila tal-komoditajiet” mhijiex iġġustifikata kif jixraq, l-argument dwar id-definizzjoni tal-kodiċi doganali u tal-ispezzjoni formali, kif issuġġerit mill-importatur, ma hemmx għalfejn jiġi indirizzat. Il-Kummissjoni taqbel, madankollu, li, bħala prinċipju, huwa possibbli li jiġu esklużi ċerti prodotti mill-ambitu tal-prodott mill-aspett tekniku. Il-kwistjoni deċiżiva hija, madankollu, jekk abbażi ta' kunsiderazzjonijiet legali, ekonomiċi u politiċi, din l-esklużjoni hijiex ġustifikata (ara fuq dan il-punt fit-taqsima li ġejja).

(51)

Fil-kummenti tiegħu dwar id-divulgazzjoni finali, importatur wieħed kompla jippreżenta għadd ta' fatturi anonimizzati u ddeskrivihom bħala bejgħ tiegħu ta' “pjanċa tqila speċjali” lill-utenti tal-magni għat-tħaffir u ċ-ċaqliq tal-art (yellow goods), it-tagħmir għall-krejnijiet u għall-irfigħ, il-kostruzzjonijiet ta' pontijiet, it-torrijiet tat-turbini tar-riħ, is-settur tal-enerġija eċċ. Dan l-importatur offra wkoll li jaqbel mal-arranġamenti tal-Kummissjoni għall-verifika ta' din id-data.

(52)

Il-Kummissjoni tqis li tali verifika mhix meħtieġa f'dan il-każ. Minħabba li l-offerta ġiet tard ħafna, kien ikun prattikament diffiċli ħafna, jekk mhux impossibbli li tiġi implimentata.

(53)

Madankollu, kif indikat fil-premessa (47) hawn fuq, ħafna mill-fatturi ppreżentati minn dan l-importatur urew li l-“pjanċa tqila tal-komoditajiet” u l-“pjanċa tqila speċjali” inbiegħet fuq l-istess fattura lill-istess klijent. Dan juri b'mod ċar li l-istess klijenti jistgħu u qegħdin jużaw iż-żewġ tipi ta' pjanċa tqila.

(54)

Fil-kummenti tiegħu dwar id-divulgazzjoni finali importatur wieħed irrefera wkoll għall-pubblikazzjoni Stahl-Informations-Zentrum li turi l-użi differenti tal-pjanċa tqila. Il-Kummissjoni tiegħu nota ta' dan ir-rapport u hija konxju mill-użi differenti tal-pjanċa tqila. Madankollu kif imsemmi fil-premessa (44) hawn fuq l-ebda evidenza ma ġiet ippreżentata li turi li l-“pjanċa tqila speċjali” mhijiex interkambjabbli ma' pjanċa tqila oħra.

(55)

Fl-aħħar nett, fil-kummenti tiegħu dwar id-divulgazzjoni finali, importatur wieħed irrefera għal miżuri antidumping fuq pjanċa tqila fl-Awstralja u fl-Istati Uniti tal-Amerika, fejn ġew introdotti esklużjonijiet fuq ċertu tip ta' prodott abbażi tal-gradi u l-ħxuna.

(56)

Il-Kummissjoni tinnota madankollu li dawn l-esklużjonijiet seħħew fl-istadju tal-bidu ta' dawn il-proċeduri, u ma ngħata l-ebda raġunament dwar għalfejn din l-esklużjoni ġiet deċiża. Fi kwalunkwe każ, id-deċiżjonijiet minn membri oħra tad-WTO ma jippreġudikawx is-sitwazzjoni fl-Unjoni.

(57)

Fil-kummenti tagħha wara d-divulgazzjoni finali l-Eurofer qalet li l-gradi ddeżinjati minn importatur wieħed u s-CISA bħala “pjanċa tqila speċjali” hija bbażata biss fuq il-klassifikazzjoni arbitrarja tagħhom stess. Biex turi dan l-Eurofer irreferiet għal żewġ eżempji li jikkonfermaw il-konklużjoni tal-Kummissjoni fil-premessa (47) hawn fuq:

(58)

Abbażi ta' dan, il-Kummissjoni tiċħad l-argument li l-“pjanċa tqila speċjali” għandha użu finali differenti u mhijiex interkambjabbli ma' prodotti oħra suġġetti għall-investigazzjoni.

(59)

Il-Kummissjoni tinnota li l-fatt li fl-ambitu tal-prodott li huwa pjanċa tqila jistgħu jsiru diversi distinzjonijiet bejn tipi, gradi u kwalitajiet, eċċ. ta' pjanċa tqila u li jista' jkun hemm differenzi fil-metodi tal-produzzjoni u fl-ispejjeż, ma jeskludix li dawn jistgħu jiġu kkunsidrati bħala prodott wieħed, sakemm dawn ikollhom l-istess karatteristiċi bażiċi fiżiċi, tekniċi u/jew kimiċi. F'dan ir-rigward, il-Kummissjoni tirreferi għall-każistika kkwotata fil-premessa (28) hawn fuq.

(60)

Barra minn hekk, il-Kummissjoni tirrikonoxxi wkoll likieku qieset xieraq tali kors ta' azzjoni, hija setgħet teskludi ċerti prodotti mill-ambitu tal-investigazzjoni, bħalma għamlu awtoritajiet investigattivi fi Stati Membri oħra tad-WTO.

(61)

Madankollu, il-Kummissjoni tqis li, abbażi tal-valutazzjoni tal-fatti kollha stabbiliti matul l-investigazzjoni, din l-esklużjoni ma hijiex iġġustifikata.

(62)

Is-CISA ssottomettiet kalkolu li juri li l-esklużjoni ta' “pjanċa tqila speċjali” tkun tammonta għal 9,2 % tal-importazzjonijiet totali mir-RPĊ. Abbażi ta' dan, hija allegat li l-esklużjoni ta' “pjanċa tqila speċjali” mill-ambitu tal-prodott “se jkollha impatt limitat ħafna fuq id-determinazzjoni globali tal-investigazzjoni” u li “ma tipperikolax l-effett ġenerali ta' miżuri antidumping fuq importazzjonijiet ta' pjanċa tqila oġġett ta' dumping”, peress li “l-pjanċi tqal tal-komoditajiet” ser jibqgħu jkunu soġġetti għall-miżuri.

(63)

Analiżi tal-bejgħ tal-esportazzjoni tal-produtturi esportaturi fil-kampjun mir-RPĊ fuq il-bażi tal-PCN turi li l-“pjanċa tqila speċjali” fil-fatt twaqqa' l-prezzijiet tal-bejgħ tal-industrija tal-Unjoni u b'hekk jikkontribwixxi għall-ħsara mġarrba mill-industrija tal-Unjoni.

(64)

Minħabba li ma jistax jiġi stabbilit li l-“pjanċa tqila speċjali” għandha użu finali differenti mill-“pjanċa tqila tal-komoditajiet” u mhijiex interkambjabbli magħha, il-kwantità limitata attwali ta' dan il-bejgħ ma tistax tintuża' bħala indikazzjoni li l-esklużjoni tagħha ma tipperikolax l-effettività tal-miżuri. Tabilħaqq, kieku l-“pjanċa tqila speċjali” kellha tiġi eskluża mill-ambitu tal-prodott, l-utenti li bħalissa jixtru l-“pjanċa tqila tal-komoditajiet” jistgħu jibdlu għall-“pjanċa tqila speċjali”, biex b'hekk jevitaw id-dazji u jipperikolaw l-effettività tal-miżuri.

(65)

Barra minn hekk, kuntrarjament għas-sitwazzjoni fi Stati Membri oħra tad-WTO, it-tipi kollha ta' pjanċi tqal huma prodotti fi kwantitajiet sinifikanti mill-produtturi tal-Unjoni, u dawk il-prodotti kollha jbatu minn dumping dannuż.

(66)

Abbażi ta' dan, il-Kummissjoni tiċħad l-argument li l-esklużjoni tal-“pjanċa tqila speċjali” ma tipperikolax l-effettività tal-miżuri antidumping.

(67)

Abbażi ta' dak ta' hawn fuq, il-Kummissjoni tikkonkludi li l-ebda wieħed mill-argumenti mressqa mis-CISA u minn importatur wieħed ma juri li l-“pjanċa tqila speċjali” għandha tiġi eskluża mill-ambitu tal-prodott tal-investigazzjoni.

(68)

Fin-nuqqas ta' kummenti ulterjuri rigward l-ambitu tal-prodott il-Kummissjoni tikkonferma d-definizzjoni tal-prodott ikkonċernat kif stipulat fil-premessi (30) u (31) tar-Regolament proviżorju.

(69)

Kif stipulat fil-premessa (43) tar-Regolament proviżorju, ħadd mill-produtturi esportaturi fil-kampjun ma talab MET u ma ġew aċċettati l-ebda talbiet għal MET.

(70)

Fir-Regolament proviżorju, il-Kummissjoni għażlet l-Awstralja bħala l-pajjiż analogu b'konformità mal-Artikolu 2(7) tar-Regolament bażiku.

(71)

Wara l-pubblikazzjoni tar-Regolament proviżorju, is-CISA nnutat li fi preżentazzjoni magħmula fil-bidu tal-investigazzjoni hija kienet ikkummentat dwar l-użu potenzjali tal-Istati Uniti tal-Amerika, fejn esprimiet tħassib kbir minħabba li din l-għażla twassal biex il-Kummissjoni tagħmel użu minn data ta' kumpaniji relatati mal-industrija tal-Unjoni. Is-CISA nnutat li l-Kummissjoni għandha tuża biss data minn pajjiżi oħra u li l-Istati Uniti tal-Amerika tintuża bħala l-aħħar rimedju, fin-nuqqas ta' kooperazzjoni minn pajjiżi oħra.

(72)

Wara l-pubblikazzjoni tar-Regolament proviżorju, l-Eurofer, produttur esportatur wieħed fir-RPĊ u s-CISA għamlu kummenti dwar l-għażla tal-Awstralja u talbu li l-Kummissjoni tuża lill-Istati Uniti tal-Amerika minflok.

(73)

L-Eurofer u l-produttur esportatur mir-RPĊ issuġġerew li l-Kummissjoni tuża data mill-Istati Uniti tal-Amerika għaliex kien hemm aktar produtturi domestiċi jikkompetu ma' xulxin, u għalhekk ikun hemm data għal aktar tipi ta' prodotti minn dik li kienet disponibbli mingħand l-uniku produttur Awstraljan.

(74)

Minħabba li kien hemm biss produttur mill-Istati Uniti kkoopera fl-investigazzjoni, id-data minn produtturi oħra ma kinitx tkun disponibbli kieku l-Istati Uniti kellhom jintagħżlu bħala l-pajjiż analogu.

(75)

Is-CISA talbet li l-Kummissjoni tikkalkula l-marġni tad-dumping bl-użu ta' data mingħand l-uniku produttur tal-Istati Uniti li kkoopera, u jekk ir-riżultat ikun “kompletament differenti” minn dak misjub fl-istadju proviżorju meta ntużat l-Awstralja, il-Kummissjoni għandha tiddeċiedi li l-Awstralja mhijiex “pajjiż analogu validu” u tuża lill-Istati Uniti tal-Amerika minflok.

(76)

Din it-talba ġiet miċħuda. Kif stipulat fil-premessi (44) sa (52) tar-Regolament proviżorju l-Awstralja ġiet magħżula bħala l-pajjiż analogu, u l-argumenti l-ġodda tagħhom ma urewx li l-Awstralja mhix xierqa.

(77)

B'segwitu għad-divulgazzjoni finali s-CISA ippreżentat kummenti ulterjuri għall-idoneità tal-Awstralja bħala l-pajjiż analogu.

(78)

L-ewwel nett, huma nnotaw li l-marġni tad-dumping ikkalkulat għall-produtturi esportaturi mir-RPĊ kienu ogħla mill-marġnijiet ta' ħsara, u għalhekk il-valur normali fl-Awstralja kien ogħla mill-prezz mhux dannuż tal-industrija tal-Unjoni, jekk jittieħed bħala medja. Abbażi ta' dan is-CISA kkonkludiet li l-Awstralja “fl-ebda każ ma tista' titqies bħala pajjiż analogu validu”.

(79)

Dan l-argument huwa miċħud. Il-livell tal-valur normali, ibbażat fuq il-prezzijiet jew l-ispejjeż fil-pajjiż b'ekonomija tas-suq ikkonċernat, hija l-informazzjoni vverifikata wara li ssir l-għażla tal-pajjiż analogu. Il-valur normali huwa l-prezz domestiku tal-prodott simili fis-suq domestiku ta' pajjiż b'ekonomija tas-suq u mhuwiex ir-raġuni biex jl-Awstralja ma tiġix ikkunsidrata bħala l-pajjiż analogu.

(80)

It-tieni nett, is-CISA għamlet referenza għal każ riċenti kontra r-RPĊ (high fatigue performance steel concrete reinforcement bars — HFP rebar) (12) fejn sostniet li l-Kummissjoni kienet neħħiet ċerti tipi ta' prodotti mill-valur normali fil-pajjiż analogu wara li “partijiet interessati kkontestaw il-prezzijiet domestiċi u l-kost tal-produzzjoni għoljin ħafna”.

(81)

L-eżempju kkwotat mis-CISA ma għandu l-ebda rilevanza għal din l-investigazzjoni. Fil-każ dwar l-HFP rebar il-Kummissjoni identifikat ċerti tipi ta' prodotti magħmula fuq l-istandards tal-pajjiż analogu u mhux f'kompetizzjoni mat-tipi ta' prodotti esportati mir-RPĊ. Dawn it-tipi ta' prodotti partikolari ma ġewx ikkunsidrati fit-tqabbil tal-valur normali mal-prezz tal-esportazzjoni tal-produtturi esportaturi mir-RPĊ.

(82)

Peress li s-CISA ma għamlet l-ebda dikjarazzjoni li l-produttur fl-Awstralja jimmanifattura tipi ta' prodotti li mhumiex f'kompetizzjoni mat-tipi ta' prodotti esportati mir-RPĊ lejn l-Unjoni, l-eżempju ma għandu l-ebda rilevanza.

(83)

Fin-nuqqas ta' kummenti oħra fir-rigward tal-pajjiż analogu, il-konklużjoni proviżorji tal-Kummissjoni li tuża lill-Awstralja bħala l-pajjiż analogu, kif stabbilit fil-premessa (52) tar-Regolament proviżorju hija għalhekk ikkonfermata.

(84)

L-Eurofer ikkummentat dwar il-metodoloġija proviżorji tal-Kummissjoni stabbilita fil-premessa (68) tar-Regolament proviżorju fir-rigward ta' tipi ta' prodotti mhux mibjugħa mill-produttur analogu. Hija talbet li l-Kummissjoni għandha “tinkludi aġġustament biex jitqiesu l-ispejjeż ogħla” ta' prodotti mhux mibjugħa fis-suq domestiku tal-pajjiż analogu.

(85)

Il-Kummissjoni tiċħad din it-talba peress li l-unika data disponibbli rigward il-kost jew il-prezz tal-pjanċa tqila fl-Awstralja hija d-data vverifikata tal-produttur tal-pajjiż analogu. Fejn il-produttur ma kienx jimmanifattura tip ta' prodott partikolari esportat minn produttur esportatur mir-RPĊ, l-ebda data għaldaqstant ma hija disponibbli biex isir tali aġġustament.

(86)

Fin-nuqqas ta' xi kummenti ulterjuri rigward il-valur normali, il-konklużjonijiet stabbiliti fil-premessi minn (53) sa (68) tar-Regolament proviżorju huma kkonfermati.

(87)

Fin-nuqqas ta' kummenti rigward il-prezz tal-esportazzjoni, il-konklużjonijiet stabbiliti fil-premessi (69) u (70) tar-Regolament proviżorju huma kkonfermati.

(88)

Fin-nuqqas ta' kummenti oħra rigward tqabbil, il-konklużjonijiet stabbiliti fil-premessi minn (71) sa (73) tar-Regolament proviżorju huma kkonfermati.

(89)

Fin-nuqqas ta' kummenti rigward il-marġnijiet tad-dumping, il-marġnijiet tad-dumping proviżorji stabbiliti fit-Tabella 2 tar-Regolament proviżorju huma kkonfermati.

(90)

Fin-nuqqas ta' xi kummenti fir-rigward tad-definizzjoni tal-industrija tal-Unjoni u l-produzzjoni tal-Unjoni il-konklużjonijiet stabbiliti fil-premessi (82) sa (85) tar-Regolament proviżorju huma kkonfermati.

(91)

Fin-nuqqas ta' kummenti fir-rigward tal-konsum tal-Unjoni il-konklużjonijiet stabbiliti fil-premessi minn (86) sa (89) tar-Regolament proviżorju huma kkonfermati.

(92)

Fin-nuqqas ta' kummenti fir-rigward tal-volum u s-sehem mis-suq tal-importazzjonijiet mir-RPĊ, il-konklużjonijiet stabbiliti fil-premessi minn 90 sa 94 tar-Regolament proviżorju huma kkonfermati.

(93)

L-Eurofer qalet li “il-Kummissjoni għandha toqgħod attenta li ma tissottovalutax il-marġni tat-twaqqigħ tal-prezzijiet billi tagħmel aġġustamenti għoljin iżżejjed għall-ispejjeż ta' wara l-importazzjoni.”

(94)

Il-Kummissjoni tinnota madankollu li l-ammonti għall-ispejjeż ta' wara l-importazzjoni ġew ikkonfermati matul il-verifiki fuq il-post u għalhekk ma jistgħux jiġu kkunsidrati bħala għoljin iżżejjed.

(95)

L-Eurofer qalet ukoll li “l-prezzijiet tal-industrija tal-Unjoni ma għandhomx jitnaqqsu għal kummissjonijiet li jirrigwardaw parti imħallsa fi grupp ta' impriżi.”

(96)

Il-Kummissjoni tinnota li tnaqqis għal kummissjonijiet huwa ġġustifikat meta l-kumpannija li tintervjeni fi tranżazzjoni twettaq il-funzjonijiet ta' aġent, irrispettivament minn jekk il-kumpanija hijiex relatata jew le. Barra minn hekk la l-Eurofer u l-ebda produttur individwali tal-Unjoni ma pprovdew xi argument li dan mhuwiex il-każ. Il-Kummissjoni għalhekk issostni l-pożizzjoni li t-tnaqqis huwa ġġustifikat.

(97)

L-Eurofer sostniet ukoll li “l-produtturi esportaturi Ċiniżi ħafna drabi jżidu ċerti ammonti ta' boron jew kromju mal-azzar normali strutturali sabiex jikkwalifikaw għal rifużjonijiet tat-taxxa Ċiniża iżda mbagħad ibigħu l-azzar,fis-suq tal-Unjoni bħala azzar strutturali normali mhux liga (eż. gradi S235, S275 u S355)”. Huma talbu li l-Kummissjoni tiżgura li “dawn il-prodotti jiġu kkombinati kif suppost ma' bejgħ tal-industrija tal-Unjoni tal-gradi S235, S275 u S355 f'din l-analiżi tat-twaqqigħ tal-prezzijiet”.

(98)

L-analiżi tat-twaqqigħ tal-prezzijiet tqabbel il-prezzijiet tal-importazzjoni mir-RPĊ mal-prezzijiet tal-Unjoni fuq il-bażi tan-numru ta' kontroll tal-prodott (Product Control Number — PCN) li huwa komuni għall-partijiet kollha tal-investigazzjoni. Il-grad tal-azzar jifforma parti mill-PCN u ġie vverifikat matul iż-żjarat ta' verifika għand il-produtturi esportaturi Mir-RPĊ fil-kampjun u l-produtturi tal-Unjoni. Għalhekk l-istess gradi tal-azzar kienu mqabbla għall-analiżi tat-twaqqigħ tal-prezzijiet.

(99)

Fin-nuqqas ta' xi kumment ulterjuri fir-rigward tal-prezz tal-importazzjonijiet mir-RPĊ u t-twaqqigħ tal-prezzijiet il-konklużjonijiet stabbiliti fil-premessi minn (95) sa (99) tar-Regolament proviżorju huma kkonfermati.

(100)

Fil-premessa (104) tar-Regolament proviżorju l-Kummissjoni tosserva li wieħed mill-produtturi tal-Unjoni fil-kampjun issospenda l-produzzjoni tal-pjanċa tqila f'Diċembru tal-2015.

(101)

Wieħed mill-produtturi esportaturi fir-RPĊ iddikjara li l-Kummissjoni għandha teskludi lil dan il-produttur tal-Unjoni fil-kampjun mill-analiżi tal-ħsara minħabba “l-potenzjal għal distorsjoni jibqa', b'tali mod li jew issir analiżi riveduta mingħajr l-informazzjoni dwar il-kumpanija li għalqet, jew tinġabar data minn produttur ieħor tal-UE”.

(102)

Din is-sospensjoni tal-produzzjoni ma għandha l-ebda impatt fuq xi indikatur tal-ħsara peress li seħħet fl-aħħar ġranet tal-perjodu tal-investigazzjoni u għalhekk iż-żewġ settijiet tad-data jiġifieri d-data makroekonomika li tirrigwarda l-produtturi kollha tal-Unjoni u l-indikaturi mikroekonomiċi li jirrigwardaw il-produtturi tal-Unjoni fil-kampjun instabu li huma rappreżentattivi tas-sitwazzjoni ekonomika tal-industrija tal-Unjoni.

(103)

Fin-nuqqas ta' xi kummenti rigward il-kummenti ġenerali dwar is-sitwazzjoni ekonomika tal-industrija tal-Unjoni l-konklużjonijiet stabbiliti fil-premessi minn (100) sa (104) tar-Regolament proviżorju huma kkonfermati.

(104)

Fin-nuqqas ta' xi kummenti fir-rigward tal-produzzjoni, tal-kapaċità tal-produzzjoni u tal-użu tal-kapaċità tal-industrija tal-Unjoni il-konklużjonijiet stabbiliti fil-premessi minn (105) sa (110) tar-Regolament proviżorju huma kkonfermati.

(105)

Is-CISA stqarret li hija ma taqbilx mal-metodoloġija ta' paragun bejn il-““punt ta' bidu” (2012) u l-“punt ta' tmiem” (2015, jiġifieri l-PI)” tal-indikatur tal-ħsara tal-volum tal-bejgħ u l-konklużjoni li tirriżulta li l-volum tal-bejgħ tal-industrija tal-Unjoni naqas b' 7 %. Fl-opinjoni tas-CISA data iżjed riċenti hija aktar rilevanti biex tiġi stabbilita l-ħsara. Is-CISA issostni wkoll li l-Kummissjoni kellha “żżid tagħti iżjed piż lix-xejra reċenti fil-volum tal-bejgħ tal-industrija tal-Unjoni, li ma wera ebda tnaqqis matul l-aħħar tliet snin”, jiġifieri bejn l-2013 u l-2015.

(106)

Il-Kummissjoni tiċħad dan l-argument għar-raġunijiet li ġejjin:

(107)

L-ewwel nett, il-Kummissjoni tfakkar fil-premessa (3) hawn fuq li tipprovdi li l-eżami tax-xejriet rilevanti għall-valutazzjoni tal-ħsara kopra l-perjodu mill-1 ta' Jannar 2012 sa tmiem il-perjodu ta' investigazzjoni.

(108)

Il-Kummissjoni eżaminat l-indikaturi kollha ta' ħsara billi ppreżentat ix-xejriet tagħhom matul il-perjodu kkunsidrat kollu, kif ukoll analiżi ta' sena b'sena, fejn rilevanti.

(109)

It-tieni, il-premessa (112) tar-Regolament proviżorju tiddikjara li “wara tnaqqis ta' 7 % bejn l-2012 u l-2013 u saħansitra tnaqqis ieħor fl-2014 b'2 punti perċentwali l-volum tal-bejgħ żdied bi ftit b'2 punti perċentwali matul il-PI”. Għaldaqstant huwa ċar li l-Kummissjoni ma wettqitx sempliċi paragun tal-““punt ta' bidu” (2012) u l-“punt ta' tmiem” (2015, jiġifieri l-PI)” kif hu allegat, iżda twettqet paragun komprensiv tas-snin kollha fil-perjodu kkunsidrat.

(110)

It-tielet, wieħed irid jara l-volum stabbli tal-bejgħ bejn l-2013 u l-2015 fil-kuntest ta' żieda qawwija fil-konsum ta' 11-il punt perċentwali, kif iddikjarat fit-Tabella 3 tar-Regolament proviżorju. Għaldaqstant il-bejgħ stabbli tal-volum tal-bejgħ ma pprevjeniex telf sinifikanti fis-sehem mis-suq ta' 9,3 punti perċentwali fl-istess żmien, kif iddikjarat fit-Tabella 7 tar-Regolament proviżorju. Huwa għalhekk ikkunsidrat li l-volum stabbli tal-bejgħ bejn l-2013 u l-2015 huwa sinjal tal-ħsara, peress li l-volum tal-bejgħ jeħtieġ jiġi analizzat fil-kuntest ta' konsum li qed jikber u ta' sehem mis-suq li qed jonqos.

(111)

Fin-nuqqas ta' xi kummenti ulterjuri fir-rigward tal-volum tal-bejgħ u s-sehem mis-suq tal-industrija tal-Unjoni, il-konklużjonijiet stabbiliti fil-premessi minn (111) sa (114) tar-Regolament proviżorju huma kkonfermati.

(112)

Fin-nuqqas ta' kummenti fir-rigward tal-impjiegi u l-produttività tal-industrija tal-Unjoni, il-konklużjonijiet stabbiliti fil-premessi (115) sa (117) tar-Regolament proviżorju huma kkonfermati.

(113)

Fin-nuqqas ta' kummenti fir-rigward tal-prezzijiet lavorattivi tal-industrija tal-Unjoni, il-konklużjonijiet stabbiliti fil-premessi (118) u (119) tar-Regolament proviżorju huma kkonfermati.

(114)

Fin-nuqqas ta' kumment fir-rigward tat-tkabbir, il-konklużjonijiet stabbiliti fil-premessi (120) u (121) tar-Regolament proviżorju huma kkonfermati.

(115)

Fin-nuqqas ta' kummenti dwar il-kobor tal-marġni tad-dumping u l-irkupru mid-dumping tal-imgħoddi, il-konklużjonijiet stabbiliti fil-premessi (122) u (124) tar-Regolament proviżorju huma kkonfermati.

(116)

Fin-nuqqas ta' kummenti fir-rigward tal-prezzijiet u l-fatturi li għandhom impatt fuq il-prezzijiet tal-produtturi tal-Unjoni fil-kampjun, il-konklużjonijiet stabbiliti fil-premessi (125) sa (127) tar-Regolament proviżorju huma kkonfermati.

(117)

Fin-nuqqas ta' kummenti ulterjuri fir-rigward tal-inventarji tal-produtturi tal-Unjoni fil-kampjun, il-konklużjonijiet stabbiliti fil-premessi minn (128) sa (130) tar-Regolament proviżorju huma kkonfermati.

(118)

Is-CISA sostniet li matul il-perjodu kkunsidrat, minkejja l-volum tal-importazzjonijiet mir-RPĊ, l-ispejjeż tal-produzzjoni ta' unità tal-produtturi tal-Unjoni fil-kampjun dejjem kienu ogħla mill-prezzijiet tal-bejgħ tagħhom.

(119)

It-Tabella 10 tar-Regolament proviżorju tippreżenta x-xejriet kemm tal-prezzijiet tal-bejgħ u l-kost unitarju tal-produzzjoni tal-produtturi tal-Unjoni fil-kampjun matul il-perjodu kkunsidrat. Kif imsemmi fil-premessa (126) tar-Regolament proviżorju il-“prezzijiet tal-bejgħ bdew jonqsu b'rata aktar mgħaġġla u bħala medja, baqgħu dejjem anqas mill-kost unitarju tal-produzzjoni”.

(120)

Is-CISA sostniet ukoll li huma ma tifhimx għaliex meta fl-2012 il-kost tal-produzzjoni ta' unità kienet ogħla mill-prezz medju tal-bejgħ ta' unità, il-produtturi tal-Unjoni fil-kampjun għamlu profitt.

(121)

L-ispiża medja tal-produzzjoni fit-Tabella 10 tar-Regolament proviżorju hija tabilħaqq ogħla mill-prezz medju tal-bejgħ għall-2012. Dan normalment ikun jindika telf għal din is-sena. Madankollu, il-profitt stabbilit fit-Tabella 12 tar-Regolament proviżorju għall-2012 huwa dovut għal dħul ta' wieħed mill-produtturi tal-Unjoni li huwa relatat mal-produzzjoni ta' pjanċa tqila, iżda mhux rifless fis-sistema kontabilistika tal-kumpanija u għalhekk mhuwiex inkluż fit-Tabella 10 tar-Regolament proviżorju.

(122)

Wara d-divulgazzjoni finali, is-CISA staqsiet għaliex id-dħul ta' wieħed mill-produtturi tal-Unjoni fil-kampjun li huwa rrelatat mal-produzzjoni ta' pjanċa tqila ma kienx rifless fis-sistema ta' kontabbiltà tal-kosti interni (is-sistema tal-prezz tal-kost tal-prodott) tal-kumpanija.

(123)

Bħalma dan il-produttur tal-Unjoni fil-kampjun iddikjara, u l-Kummissjoni vverifikat, dan huwa minħabba li dan il-profitt jikkonsisti kollu kemm hu minn aġġustament ta' tmiem is-sena skont l-Istandards Internazzjonali tal-Kontabilità (“IAS”) f'dak li jirrigwarda l-attività ordinarja tal-kumpanija. Bħala tali, mhuwiex inkluż fir-rekords tal-prezz tal-kost tal-prodotti maħduma matul is-sena, iżda jinsab inkluż f'diversi partiti fid-dikjarazzjoni tal-profitt u t-telf (kif definit fl-IAS 1). Jekk wieħed ma jqisx dan il-qligħ, l-industrija tal-Unjoni tkun qed tagħmel it-telf anki fl-2012 (telf ta' inqas minn 1 %).

(124)

Barra minn hekk, il-prezz medju tal-kost tal-produzzjoni fit-Tabella 10 tar-Regolament proviżorju huwa għall-volum tal-produzzjoni totali tal-produtturi tal-Unjoni fil-kampjun, filwaqt li l-prezz medju tal-bejgħ huwa biss għall-bejgħ tal-produtturi tal-Unjoni fil-kampjun lil klijenti mhux relatati fl-Unjoni. Dawn iż-żewġ medji mhumiex direttament komparabbli minħabba r-raġunijiet li ġejjin:

(125)

Wara d-divulgazzjoni finali, is-CISA staqsiet jekk il-volum tal-bejgħ u s-sehem mis-suq fit-Tabella 7 tar-Regolament proviżorju jirreferux għal bejgħ lil klijenti mhux relatati, jew kemm lil klijenti relatati kif ukoll lil klijenti mhux relatati. Il-Kummissjoni tfakkar fil-premessa (102) tar-Regolament proviżorju li jipprevedi li indikaturi makroekonomiċi bħall-produzzjoni jew il-volum tal-bejgħ huma vvalutati fil-livell tal-industrija kollha tal-Unjoni. Bħala tali d-data fit-Tabella 7 tirreferi għall-bejgħ lill-ewwel klijent mhux relatat, kif irrappurtat minn Eurofer. Biex jiġi inkluż il-bejgħ lil partijiet relatati ikun jinvolvi r-riskju tal-għadd doppju.

(126)

Is-CISA kompliet tallega fil-kummenti tagħha għad-divulgazzjoni finali li d-differenza bejn il-volum tal-produzzjoni tal-industrija tal-Unjoni u l-volum tal-bejgħ lill-ewwel klijent mhux relatat fl-Unjoni huwa dovut għall-bejgħ sinifikanti lill-klijenti relatati. Fuq din il-bażi is-CISA iddeduċiet ulterjormant li l-Kummissjoni naqset milli tiġbor u tippreżenta informazzjoni dwar il-volum tal-bejgħ lill-klijenti relatati u b'hekk iddivulgat biss parti mill-istampa fis-suq tal-Unjoni.

(127)

Dawn l-allegazzjonijiet huma bbażati fuq suppożizzjoni żbaljata. Il-Kummissjoni tfakkar li d-differenza bejn il-volum ta' produzzjoni u volum ta' bejgħ lill-klijenti mhux relatati fl-Unjoni mhix ġejja biss mill-bejgħ lill-klijenti relatati, iżda wkoll mill-bejgħ lil konsumaturi barra l-Unjoni. Barra minn hekk, għall-produtturi tal-Unjoni mhux fil-kampjun jista' jkun hemm differenza kkawżata mill-bejgħ lill-ewwel klijenti mhux relatati li jista' jkun li ma ġiex irrappurtat minn Eurofer, kif ġie vverifikat mill-Kummissjoni, minħabba l-metodu ta' rappurtar deskritt fil-premessa (125) hawn fuq biex jiġi evitat ir-riskju tal-għadd doppju. It-Tabella 7 tar-Regolament proviżorju tirreferi għall-volum tal-bejgħ u sehem mis-suq fis-suq tal-Unjoni biss.

(128)

Is-CISA irreferiet ukoll għal żewġ każijiet fejn il-Kummissjoni għamlet analiżi separata għal klijenti relatati u mhux relatati, jiġifieri l-investigazzjoni li tikkonċerna rebars bi prestazzjoni għolja li joriġina mir-RPĊ (13) u l-investigazzjoni dwar prodotti tal-azzar irrumblati ċatt fil-kiesaħ li joriġinaw mir-RPĊ u mir-Russja (14).

(129)

Il-Kummissjoni tfakkar li f'dawk il-każijiet l-analiżi kienet tikkonċerna l-użu ristrett (fil-każ ta' prodotti tal-azzar irrumblati ċatt fil-kiesaħ) jew bejgħ lil utenti relatati (fil-każ ta' rebars bi prestazzjoni għolja), mhux il-bejgħ lil klijenti relatati bħalma huma kumpaniji tal-bejgħ relatati. Kif imsemmi fil-premessa (89) tar-Regolament proviżorju, l-użu ristrett mill-produtturi tal-Unjoni huwa insinifikanti.

(130)

Il-Kummissjoni fl-aħħar nett tfakkar li f'dak li jirrigwarda l-prezzijiet u l-profittabbiltà fis-suq tal-Unjoni, dawn huma relevanti biss jekk il-prezzijiet ikunu ta' bejgħ li sar bejn partijiet mhux relatati.

(131)

Fin-nuqqas ta' kummenti ulterjuri fir-rigward tal-profittabbiltà, il-fluss tal-flus, l-investimenti, ir-redditu fuq l-investimenti u l-kapaċità li jiġi ġġenerat il-kapital mill-produtturi tal-Unjoni fil-kampjun, il-konklużjonijiet stabbiliti fil-premessi (131) sa (138) tar-Regolament proviżorju huma kkonfermati.

(132)

Fin-nuqqas ta' kummenti oħra, il-konklużjonijiet dwar il-ħsara stabbiliti fil-premessi minn (139) sa (147) tar-Regolament proviżorju huma kkonfermati.

(133)

L-Eurofer qalet li l-importazzjonijiet mir-RPĊ li kienu oġġett ta' dumping jirrappreżentaw “l-aktar fattur uniku importanti li għandu impatt fuq l-industrija tal-Unjoni matul il-perjodu kkunsidrat”. Hija nnutat ukoll li l-“volum ta' importazzjonijiet mir-RPĊ irdoppja bejn l-2013 u l-2014, imbagħad reġa' rdoppja bejn l-2014 u l-2015” u li fl-2015 il-volum tal-importazzjonijiet mir-RPĊ “qabeż il-volum tal-importazzjonijiet mill-pajjiżi terzi l-oħra kollha flimkien”.

(134)

L-Eurofer osservat ukoll tendenzi simili għall-ishma mis-suq tal-importazzjonijiet mir-RPĊ li kienu l-oġġett ta' dumping filwaqt li nnutat li dawn “żdiedu minn 4,1 % fl-2013 għal 14,4 % fl-2015, filwaqt li fl-istess ħin, is-sehem mis-suq tal-importazzjonijiet mill-pajjiżi terzi l-oħra kollha naqas minn 13,2 % fl-2013 għal 12,2 % fl-2015”.

(135)

L-Eurofer fl-aħħar nett ikkonkludiet li “kważi l-gwadann kollu tas-sehem mis-suq tal-importazzjonijiet Ċiniżi li kienu oġġett ta' dumping sar għad-detriment tas-sehem mis-suq tal-industrija tal-Unjoni”. Hija kompliet li l-prezz tal-importazzjonijiet Ċiniżi oġġett ta' dumping naqsu bi kważi 30 % matul il-perjodu kkunsidrat, u instab li dawn l-importazzjonijiet kienu qed iwaqqgħu l-prezzijiet tal-industrija tal-Unjoni b'medja ta' 29 %.

(136)

Dan jikkonferma li l-konklużjonijiet tal-premessa (151) tar-Regolament proviżjorju li ż-żieda kważi kontinwa tal-importazzjonijiet mir-RPĊ fi prezzijiet imnaqqsa ħafna kellha impatt negattiv ċar fuq il-prestazzjoni tal-industrija tal-Unjoni wara l-2013.

(137)

Fin-nuqqas ta' kummenti oħra fir-rigward tal-effetti tal-importazzjonijiet li huma oġġett ta' dumping, il-konklużjonijiet stabbiliti fil-premessi minn (150) sa (157) tar-Regolament proviżorju huma kkonfermati.

(138)

Fin-nuqqas ta' kummenti fir-rigward tal-effetti tal-kompetizzjoni ħarxa kkaġunata mill-problemi ta' domanda fis-suq tal-Unjoni, il-konklużjonijiet stabbiliti fil-premessi minn (158) sa (163) tar-Regolament proviżorju huma kkonfermati.

(139)

Fin-nuqqas ta' kummenti dwar l-effetti tal-użu baxx tal-kapaċità tal-produtturi tal-Unjoni, il-konklużjonijiet stabbiliti fil-premessi minn (164) sa (166) tar-Regolament proviżorju huma kkonfermati.

(140)

Is-CISA sostniet li “il-Kummissjoni analizzat separatament l-importazzjonijiet mir-Russja u mill-Ukrajna u għalhekk ma sabet l-ebda indikazzjoni li l-importazzjonijiet minn dawn iż-żewġ pajjiżi kienu qed jikkaġunaw ħsara lill-industrija tal-Unjoni”.

(141)

Is-CISA kompliet issostni li l-Kummissjoni kellha twettaq “valutazzjoni kumulattiva tal- importazzjonijiet mill-Ukrajna u mir-Russja”u anke “valutazzjoni kumulattiva tal-importazzjonijiet mit-tliet pajjiżi (iċ-Ċina, ir-Russja u l-Ukrajna)” bl-argument li “matul il-PI il-volum tal-importazzjonijiet mill-Ukrajna u mir-Russja mhuwiex negliġibbli jekk imqabbel tas-suq tal-Unjoni” u li “il-prezzijiet medji tal-importazzjonijiet miż-żewġ pajjiżi kienu aktar baxxi minn dawk miċ-Ċina”.

(142)

Fuq il-bażi ta' dan ta' hawn fuq is-CISA ppreżentat il-konklużjoni li “jekk instab li l-importazzjonijiet miċ-Ċina waqqgħu l-prezzijiet tal-industrija tal-Unjoni, dawk mill-Ukrajna u mir-Russja għaldaqstant waqqgħu l-prezzijiet tal-industrija tal-UE b'mod aktar prevalenti. Kieku l-Kummissjoni kellha ssegwi l-istess metodoloġija kif applikat għaċ-Ċina, jiġifieri paragun bejn il-“punt ta' bidu” u l-“punt ta' tmiem”, il-Kummissjoni kienet issib li l-volum tal-bejgħ u s-sehem mis-suq tal-importazzjonijiet minn dawn iż-żewġ pajjiżi żdied b'41 % u 2,2 punti perċentwali rispettivament”.

(143)

Il-Kummissjoni tirreferi għall-Artikolu 3(4) tar-Regolament bażiku li jipprevedi li huma biss l-importazzjonijiet suġġetti għal investigazzjonijiet antidumping li jistgħu jiġu evalwati b'mod kumulattiv. L-importazzjonijiet mill-Ukrajna u mir-Russja mhumiex suġġetti għal investigazzjonijiet antidumping u għalhekk ma jistgħux jiġu kumulati mal-importazzjonijiet mir-RPĊ.

(144)

Il-prezzijiet medji mill-Ukrajna, mir-Russja u mir-RPĊ wkoll mhumiex neċessarjament direttament komparabbli, peress li l-prezz medju huwa affettwat minn taħlita tal-prodott. Aktar rilevanti minn hekk huma t-tendenzi tal-prezzijiet matul il-perjodu kkunsidrat. It-Tabella 13 tar-Regolament proviżorju turi b'mod ċar li l-prezzijiet medji tal-importazzjonijiet mill-Ukrajna u mir-Russja naqsu b'rata ħafna aktar kajmana mill-prezzijiet ta' importazzjoni mir-RPĊ matul il-perjodu kkunsidrat.

(145)

Is-sehem mis-suq tal-importazzjonijiet minn pajjiżi terzi oħrajn baqa' relattivament stabbli matul il-perjodu kkunsidrat filwaqt li dak tal-importazzjonijiet mir-RPĊ żdied b'aktar mit-triplu. Fil-kuntest tal-konsum tal-Unjoni li żdied b'5 % u s-sehem mis-suq tal-industrija tal-Unjoni li naqas b'10 punti perċentwali matul il-perjodu kkunsidrat dan ifisser li l-importazzjonijiet mir-RPĊ iggwadanjaw sehem mis-suq mill-industrija tal-Unjoni biss.

(146)

Fl-aħħar nett, filwaqt li l-volum tal-importazzjonijiet mir-RPĊ żdied bi kważi miljun tunnellata matul il-perjodu kkunsidrat, il-volum tal-importazzjonijiet mill-Ukrajna żdied b'madwar 160 000 tunnellata, dak mir-Russja b'madwar 75 000 tunnellata.

(147)

Fuq il-bażi ta' dan li ntqal hawn fuq, u minħabba volumi ta' importazzjoni ferm iżgħar mill-Ukrajna u r-Russja meta mqabblin ma' dawk mir-RPĊ, ma hemm ebda indikazzjoni li l-importazzjonijiet minn dawn iż-żewġ pajjiżi kienu qed jiksru r-rabta kawżati bejn l-importazzjonijiet oġġett ta' dumping għar-RPĊ u l-ħsara għall-industrija tal-Unjoni.

(148)

Fin-nuqqas ta' kummenti oħra dwar l-effetti tal-importazzjonijiet minn pajjiżi terzi oħra, il-konklużjonijiet stabbiliti fil-premessi minn (167) sa (178) tar-Regolament proviżorju huma kkonfermati.

(149)

Fin-nuqqas ta' kummenti fir-rigward tal-effetti tal-prestazzjoni tal-bejgħ tal-esportazzjonijiet tal-industrija tal-Unjoni, il-konklużjonijiet stabbiliti fil-premessi minn (179) sa (183) tar-Regolament proviżorju huma kkonfermati.

(150)

Fin-nuqqas ta' xi kummenti oħra dwar l-effetti tal-kompetizzjoni bejn il-produtturi tal-Unjoni integrati vertikalment u r-riromblaturi fl-Unjoni, il-konklużjonijiet stabbiliti fil-premessi minn (184) sa (189) tar-Regolament proviżorju huma kkonfermati.

(151)

Is-CISA sostniet ukoll li, bejn l-2013 u l-perjodu tal-investigazzjoni il-produtturi tal-Unjoni inklużi fil-kampjun baqgħu fil-biċċa l-kbira mhux profittabbli u li ġarrbu l-ogħla telf fl-2013, li hija eżattament is-sena meta l-importazzjoni ta' pjanċi tqal mir-RPĊ laħqet l-aktar livell baxx.

(152)

Dan l-argument huwa indirizzat fil-premessa (134) tar-Regolament proviżorju, fejn huwa spjegat li “filwaqt li t-telf kbir ta' 12,2 % fl-2013 huwa influwenzat mid-domanda partikolarment baxxa f'dik is-sena, il-pressjoni konsiderevoli fuq il-prezzijiet u l-volumi eżerċitata fuq l-industrija tal-Unjoni mill-importazzjonijiet dejjem aktar mir-RPĊ matul l-2014 u l-perjodu tal-investigazzjoni ma ħallewx lill-industrija tibbenefika mit-tkabbir dinamiku tal-konsum tal-Unjoni bi 11-il punt perċentwali.” Kif indikat fil-premessa (93) tar-Regolament proviżorju dan it-tkabbir kien assorbit kważi għalkollox mill-importazzjonijiet oġġett ta' dumping mir-RPĊ.

(153)

Il-Kummissjoni għaldaqstant tikkonkludi li t-telf għoli fl-2013 ma kienx dovut għall-kwalità baxxa tal-importazzjonijiet mir-RPĊ, iżda għad-domanda partikolarment baxxa fis-suq tal-Unjoni. It-telf imġarrab mill-industrija tal-Unjoni fl-2014 u fl-2015 huwa madankollu kkaġunat minn volum dejjem jiżdied ta' importazzjonijiet oġġett ta' dumping mir-RPĊ.

(154)

Barra minn hekk, il-Kummissjoni tinnota li l-industrija tal-Unjoni kienet profittabbli fis-snin 2011 u 2012. Fl-2011, l-industrija tal-Unjoni uriet marġni ta' profitt ta' 7,9 %, fi żmien meta l-importazzjonijiet mir-RPĊ ma kinux għadhom isiru fi kwantitajiet sinifikanti kif indikat fil-premessa (221) tar-Regolament proviżorju. Fl-2012, il-marġni tal-profitt kien diġà ħafna aktar baxx fil-livell ta' 1,6 %, minħabba l-preżenza sinifikanti ta' importazzjonijiet oġġett ta' dumping mir-RPĊ. Huwa nnutat li l-ebda parti interessata ma kkummentat dwar il-profittabbiltà tal-industrija tal-Unjoni fl-2011 u fl-2012.

(155)

Is-CISA tikkunsidra li hemm “fatturi oħra importanti” apparti l-importazzjonijiet li huma oġġett ta' dumping mir-RPĊ “li qed jikkawżaw il-ħsara allegata lill-industrija tal-Unjoni” u li “dan jista' jikser ir-rabta kawżali bejn l-importazzjonijiet li huma allegatament l-oġġett ta' dumping” mir-RPĊ u l-ħsara. Is-CISA talbet lill-Kummissjoni biex tirrevedi l-analiżi tagħha tal-kawżalità u tikkunsidra l-fatturi l-oħrajn kollha.

(156)

F'dan ir-rigward, wieħed jinnota li s-sitt fatturi l-oħra elenkati hawn fuq ġew indirizzati jew fir-Regolament proviżorju jew f'dan ir-Regolament. Huwa għalhekk ċar li l-Kummissjoni analizzat fid-dettall il-fatturi kollha identifikati mill-partijiet interessati. Is-CISA lanqas biss identifikat liema “fatturi importanti oħra”, apparti s-sitt fatturi analizzati diġà fid-dettall għandhom jiġu analizzati. Is-CISA semmiet biss li dawn huma “ovvji” mingħajr ma tat aktar informazzjoni. Għaldaqstant il-Kummissjoni tiċħad dan l-argument.

(157)

Abbażi ta' dan ta' hawn fuq u fin-nuqqas ta' kummenti oħra, il-konklużjonijiet stabbiliti fil-premessi minn (190) sa (194) tar-Regolament proviżorju huma kkonfermati.

(158)

Is-CISA sostniet li matul il-perjodu kkunsidrat, il-produtturi tal-Unjoni kellhom iktar minn 70 % tas-suq tal-Unjoni. Hija allegat li tikkontrolla s-suq tal-Unjoni filwaqt li l-uniċi sorsi serji ta' kompetizzjoni huma l-importazzjonijiet mir-RPĊ.

(159)

Il-Kummissjoni tinnota li s-CISA ma tirrikonoxxix il-fatt li l-produtturi tal-Unjoni jikkompetu ma' xulxin u mal-importazzjonijiet mir-RPĊ u minn pajjiżi terzi oħra li għandhom sehem mis-suq ta' 12,2 % kif indikat fit-Tabella 13 tar-Regolament proviżorju. Barra minn hekk, ma hemm l-ebda indikazzjoni li hemm nuqqas ta' kompetizzjoni bejn il-produtturi tal-Unjoni.

(160)

Wara li ttieħdu l-miżuri proviżorji importatur wieħed ukoll issottometta li l-impożizzjoni ta' miżuri antidumping se tnaqqas b'mod artifiċjali l-kompetizzjoni fis-suq tal-Unjoni u se twassal għal suq oligopolistiku fis-swettur tal-“pjanċa tqila speċjali” peress li dan is-settur diġà huwa ddominat minn attur wieħed.

(161)

Il-Kummissjoni tinnota madankollu li din il-parti naqset milli tippreżenta xi evidenza biex issostni din l-allegazzjoni. Għall-kuntrarju, l-informazzjoni mibgħuta minn Eurofer fil-kummenti tagħha lid-divulgazzjoni finali telenka bosta produtturi tal-Unjoni li joffru tipi differenti ta' “pjanċa tqila speċjali”.

(162)

Il-Kummissjoni tirrikonoxxi li l-impożizzjoni tad-dazji tista' tnaqqas l-għadd ta' kompetituri f'ċerti setturi ta' “pjanċa tqila speċjali” fis-suq tal-Unjoni. Madankollu, investigazzjoni antidumping ma tagħtix definizzjoni tas-swieq tal-prodotti u dawk ġeografiċi, u ma tivvalutax is-saħħa fis-suq u l-iżvilupp probabbli tagħha. Għalhekk, ma setgħu jsiru u lanqas kellhom isiru konklużjonijiet f'din l-investigazzjoni dwar jekk hemmx riskju li tinħoloq jew li tissaħħaħ pożizzjoni dominanti f'wieħed minn dawn is-swieq fis-sens tad-dritt tal-kompetizzjoni.

(163)

Il-Kummissjoni hija obbligata, fil-kuntest tal-analiżi tal-interess tal-Unjoni, biex tqis politiki oħra tal-Unjoni, bħalma hija l-politika tal-kompetizzjoni. Madankollu, huwa biss fejn ikun hemm evidenza konkreta ta' pożizzjoni dominanti u l-abbuż possibbli tagħha li dawn il-kunsiderazzjonijiet ikunu jeħtieġu investigazzjoni ulterjuri. Dak il-limitu ma ġietx issodisfat mis-preżentazzjonijiet tal-partijiet interessati.

(164)

Fi kwalunkwe każ, il-Kummissjoni tfakkar d-dazji antidumping qed jiġu imposti biex jeliminaw l-effett dannuż tad-dumping li nstab fis-setturi kollha tal-pjanċa tqila, u li pożizzjoni dominanti f'suq ma tfissirx li qed tkun abbużata. Jekk il-partijiet interessati josservaw xi mġiba futura li tista' tikser ir-regoli tal-kompetizzjoni, jistgħu jużaw id-dritt tagħhom li jagħmlu lment lill-awtorità kompetenti tal-kompetizzjoni.

(165)

B'segwitu għall-miżuri proviżorji, importatur wieħed sostna li l-impożizzjoni ta' miżuri antidumping ma għandhiex twassal għal żieda fil-prezzijiet fis-suq tal-Unjoni.

(166)

Il-Kummissjoni tfakkar li l-għan tal-miżuri antidumping huwa li jeliminaw l-effetti ta' distorsjoni fil-kummerċ maħluq mid-dumping dannuż. L-effetti ta' dawn il-miżuri fuq il-prezzijiet jiddependi fuq id-deċiżjonijiet ta' pprezzar ta' diversi operaturi tas-suq, u b'hekk huwa impossibbli li jitbassru. Żieda fil-prezzijiet tista' sseħħ meta l-forzi tas-suq iqisu li fuq suq mingħajr distorsjoni tali prezzijiet ogħla għandhom jipprevalu.

(167)

Is-CISA sostniet ukoll li l-utenti tal-Unjoni jeħtieġu sorsi ta' provvista kompetittiva u stabbli u li l-impożizzjoni ta' miżuri antidumping “x'aktarx li tirriżulta f'telf kbir u/jew ċaqliq ta' impjiegi 'lil hinn mill-Unjoni Ewropea fl-industrija downstream”.

(168)

Kien hemm madankollu 30 produttur fl-Unjoni matul il-perjodu tal-investigazzjoni u l-importazzjonijiet minn għadd ta' pajjiżi, inklużi r-Russja u l-Ukrajna, li jiżguraw forniment kontinwu ta' pjanċa tqila lill-utenti tal-Unjoni. Barra minn hekk, l-ebda utent fl-industriji downstream ma pprovda evidenza li ma kienx se jkun jista' jsib pjanċa tqila minħabba l-impożizzjoni ta' miżuri antidumping. Rigward ir-riskju ta' telf kbir u/jew ċaqliq ta' impjiegi lil hinn mill-Unjoni, industrija downstream waħda biss għamlet dikjarazzjoni simili, jiġifieri l-produttur tat-torrijiet tat-turbini tar-riħ. Din it-talba hija indirizzata hawn taħt.

(169)

L-assoċjazzjoni ad hoc ta' utenti f'industrija downstream (it-torrijiet tat-turbini tar-riħ) sostniet li l-impożizzjoni ta' miżuri fuq il-pjanċa tqila se tirriżulta f'riskju ta' rilokazzjoni tal-produzzjoni tat-torrijiet tat-turbini tar-riħ lejn ir-RPĊ u problemi fil-futur għas-sigurtà tal-provvisti tat-torrijiet tat-turbini tar-riħ maħdumin lesti jew nofshom lesti. Dan l-argument tqajjem ukoll minn imporatur fil-kummenti tiegħu għad-divulgazzjoni finali fir-rigward tat-torrijiet tat-turbini tar-riħ kif ukoll ta' partijiet oħra tas-sistemi ta' enerġija mir-riħ.

(170)

Il-Kummissjoni tiċħad dawn l-argumenti peress li dawn il-partijiet interessati naqsu milli jissostanzjaw it-talba tagħhom b'xi evidenza jew analiżi, pereżempju billi dawn il-produtturi tat-torrijiet tat-turbini tar-riħ jippreżentaw rwieħhom fiż-żmien stipulat fin-Notifika ta' bidu u jimlew kwestjonarju fejn jispeċifikaw it-tipi ta' pjanċa tqila użata f'din l-industrija biex jinbnew it-torrijiet tat-turbini tar-riħ, u jipprovdu analiżi ta' jekk dawn it-tipi ta' pjanċa tqila humiex interkambjabbli mat-tipi ta' pjanċa tqila użata f'industriji oħra.

(171)

il-Kummissjoni tinnota li l-informazzjoni fil-fajl turi li l-produtturi tat-torrijiet tat-turbini tar-riħ ma setgħux jibbenefikaw mill-esklużjoni tal-“pjanċa tqila speċjali” mill-ambitu tal-prodott, kif deskritt fil-premessa (42) hawn fuq. Għaldaqstant, hija biss esklużjoni tat-torrijiet tat-turbini tar-riħ għal raġunijiet ta' interess tal-Unjoni li tista' tindirizza t-tħassib tagħhom. Madankollu, f'dan l-istadju, il-produtturi tat-torrijiet tat-turbini tar-riħ ma pprovdew l-ebda analiżi konkreta u dettaljata, inkluża spjegazzjoni tal-impożizzjoni tad-dazji fuq il-kost ta' produzzjoni tagħhom u l-kapaċità tagħhom li jgħaddu dawk il-kosti lill-konsumaturi, li tista' tiġġustifika tali esklużjoni.

(172)

Il-Kummissjoni tinnota wkoll l-produtturi tat-torrijiet tat-turbini tar-riħ jistgħu jitolbu, jekk ikun sostanzjat kif xieraq, għal rieżami interim dwar l-interess tal-Unjoni rigward il-miżuri fuq il-pjanċa tqila. Barra minn hekk, l-investigazzjoni ma żvelat ebda indikazzjoni li l-industrija tal-Unjoni tista' tipperikola l-operazzjonijiet tal-utenti. Tali mġieba mhijiex mistennija fl-andament normali tal-forzi tas-suq.

(173)

Importatur wieħed qal li l-esklużjoni tal-“pjanċa tqila speċjali” mill-ambitu tal-prodott huwa fl-interess tal-Unjoni minħabba li allegatament “ħafna industriji ewlenin” bħal dik tal-“bini tal-magni u tas-settur tal-enerġija” fl-Unjoni jiddependu fuq l-importazzjoni tal-“pjanċa tqila speċjali” mir-RPĊ. Madankollu, l-ebda wieħed mill-utenti f'dawn l-industriji ma ppreżenta ruħu biex jikkonferma din id-dikjarazzjoni.

(174)

Dan l-importatur sostna wkoll li “pjanċa tqila speċjali” bi ħxuna ta' aktar minn 150 mm hija maħduma minn tliet produtturi biss fl-Unjoni. Għal pjanċa ta' saħħa b'rendiment għoli, pjanċa mkessħa u ttemprata u pjanċa tqila reżistenti għall-brix il-produzzjoni hija allegatament ikkontrollata minn erba' produtturi tal-Unjoni biss. Fuq din il-bażi, huma jallegaw li l-industrija downstream tal-Unjoni “diġà qed issofri minn nuqqas fil-provvista u minn żieda drammatika fil-prezzijiet tal-bejgħ” u li dan jista' jiġi żbilanċjat biss mill-importazzjonijiet ta' “pjanċa tqila speċjali” mir-RPĊ.

(175)

Is-CISA argumentat li l-utenti tal-“pjanċa tqila speċjali” fl-industrija tal-iffurmar tal-metall — minħabba l-għadd limitat ta' produtturi Ewropej tal-“pjanċa tqila speċjali” — jistgħu jbatu l-istess minn nuqqas ta' provvista. Madankollu, ħadd mill-utenti f'din l-industrija downstream ma' qajjem il-kwistjoni ta' nuqqas tal-provvista.

(176)

Il-Kummissjoni tiċħad l-argumenti mseemijin fil-premessi (173) sa (175) hawn fuq peress li anki l-partijiet interessati naqsu milli jissostanzjaw l-allegazzjoni tagħhom b'xi evidenza jew analiżi. Għall-kuntrarju, l-investigazzjoni stabbilixxiet tnaqqis sinifikanti fil-prezzijiet tal-pjanċa tqila fl-Unjoni matul il-perjodu kkunsidrat. Aktar minn dan, l-investigazzjoni uriet li l-industrija tal-Unjoni kellha kapaċità żejda sinifikanti minħabba tnaqqis kontinwu fil-kapaċità tal-utilizzazzjoni. Barra minn hekk, skont is-CISA il-volum ta' “pjanċa tqila speċjali” esportata mir-RPĊ huwa żgħir.

(177)

B'segwitu għad-divulgazzjoni finali importatur wieħed irritorna għal din il-kwistjoni fil-kummenti tiegħu għad-divulgazzjoni finali. Madankollu, ma sar l-ebda argument ġdid.

(178)

Fl-assenza ta' xi evidenza fattwali dwar nuqqas allegat ta' provvista minħabba l-impożizzjoni ta' miżuri antidumping, il-Kummissjoni ma tistax tikkonkludi li l-impożizzjoni ta' tali miżuri se twassal għal nuqqas ta' provvista tal-“pjanċa tqila speċjali”.

(179)

Fil-qosor, l-ebda argument imressaq mill-partijiet interessati ma juri li hemm raġunijiet konvinċenti kontra l-impożizzjoni ta' miżuri fuq l-importazzjonijiet tal-prodott ikkonċernat mir-RPĊ.

(180)

Kwalunkwe effett negattiv fuq l-utenti mhux relatati jittaffa permezz tad-disponibbiltà ta' sorsi alternattivi ta' provvista. L-effetti pożittivi tal-miżuri antidumping fuq is-suq tal-Unjoni, b'mod partikolari fuq l-industrija tal-Unjoni, jegħlbu l-effett potenzjalment negattiv fuq il-gruppi ta' interess l-oħra.

(181)

Fl-assenza ta' kummenti oħrajn rigward l-interess tal-Unjoni, il-konklużjonijiet milħuqa fil-premessi minn (195) sa (215) tar-Regolament proviżorju huma kkonfermati.

(182)

Kif imsemmi fil-premessa (4) hawn fuq, wara talba tal-Eurofer, il-Kummissjoni għamlet l-importazzjonijiet ta' pjanċi tqal li joriġinaw mir-RPĊ soġġetti għar-reġistrazzjoni. Importazzjonijiet li saru bejn il-11 ta' Awwissu 2016 u l-impożizzjoni ta' miżuri proviżorji, jiġifieri s-7 ta' Ottubru 2016, ġew irreġistrati.

(183)

Skont l-Artikolu 10(4)(d) tar-Regolament bażiku, id-dazji jistgħu jiġu imposti retroattivament jekk ikun hemm “flimkien mal-livell tal-importazzjonijiet li kkawżaw ħsara matul il-perjodu tal-investigazzjoni, żieda oħra sostanzjali fl-importazzjonijiet li, fid-dawl ta' meta sseħħ u l-volum u ċirkustanzi oħra, x'aktarx taħdem b'mod serju kontra l-effett ta' rimedju tad-dazju kontra l-bejgħ taħt il-prezz li għandu jiġi applikat”.

(184)

Is-CISA sostniet li kull miżura retroattiva possibbli jkollha impatt negattiv fuq l-importaturi minħabba li dawn “jaffaċċaw spejjeż addizzjonali bla bżonn” peress li jħallsu d-dazji antidumping. Skont is-CISA l-importaturi “ma' għandhom l-ebda intenzjoni li jaħżnu l-prodott ikkonċernat” mir-RPĊ u li l-importazzjonijiet li ġew irreġistrati kienu l-parti li fadal minn kuntratti antiki li kienu ġew konklużi qabel il-bidu tal-proċediment. Is-CISA fl-aħħar argumentat li “dazju mhux mistenni se joħloq telf” għall-importaturi u għall-utenti fl-Unjoni.

(185)

Is-CISA fl-aħħar nett sostniet li “r-reġistrazzjoni tal-importazzjonijiet u t-theddida ta' impożizzjoni ta' miżuri b'mod retroattiv ma hu xejn għajr il-ħolqien ta' ostaklu ieħor biex jiddefendi l-kummerċ sabiex l-importaturi tal-UE ma jibqgħux jimportaw miċ-Ċina anki qabel ma ġie ppruvat li dawn l-importazzjonijiet jikkawżaw ħsara lill-industrija tal-Unjoni”.

(186)

L-istatistiċi tal-importazzjoni tal-Eurostat ippreżentati fit-Tabella 1 hawn taħt juru li l-importazzjonijiet ta' pjanċi tqal mir-RPĊ naqsu b'mod sinifikanti wara l-perjodu ta' investigazzjoni.

Tabella 1

Żvilupp tal-volum ta' importazzjonijiet medji ta' kull xahar

(187)

Il-Kummissjoni tikkonkludi li minħabba li ma kien hemm l-ebda żieda sostanzjali fl-importazzjonijiet il-kundizzjoni legali għall-ġbir retroattiv tad-dazji skont l-Artikolu 10(4)(d) tar-Regolament bażiku ma ntlaħqitx. Għaldaqstant id-dazji jeħtieġ li ma jinġabrux b'mod retroattiv fuq l-importazzjonijiet irreġistrati.

(188)

Kif muri fil-premessa (222) tar-Regolament proviżorju, il-Kummissjoni ddeterminat il-livell tal-eliminazzjoni tal-ħsara fuq il-bażi ta' paragun tal-prezz ta' importazzjoni medju ponderat tal-produtturi esportaturi tar-RPĊ fil-kampjun, debitament aġġustat għall-ispejjeż ta' wara l-importazzjoni u d-dazji doganali, mal-prezz medju ponderat mhux dannuż tal-prodott simili mibjugħ mill-produtturi tal-Unjoni fil-kampjun fis-suq tal-Unjoni matul il-perjodu tal-investigazzjoni.

(189)

Is-CISA ressqet għadd ta' kummenti dwar il-metodoloġija biex jiġi kkalkulat il-prezz mhux dannuż tal-prodott simili mibjugħ mill-produtturi tal-Unjoni fil-kampjun fis-suq tal-Unjoni matul il-perjodu tal-investigazzjoni f'dan il-każ.

(190)

L-ewwel nett is-CISA talbet għaliex il-Kummissjoni użat il-metodoloġija li mal-prezzijiet tal-bejgħ tal-industrija tal-Unjoni tgħodd t-telf imġarrab matul il-perjodu ta' investigazzjoni u sussegwentement tgħodd il-marġni ta' profitt fil-mira ta' 7,9 % minflok ma tgħodd il-profitt fil-mira mal-kost tal-produzzjoni.

(191)

L-għażla bejn iż-żewġ metodoloġiji użati mill-Kummissjoni biex ikun iddeterminat il-livell tal-eliminazzjoni tal-ħsara saret fuq bażi ta' każ b'każ. Fin-nuqqas ta' bejgħ paragunabbli mill-industrija tal-Unjoni, il-prezz mhux dannuż huwa ħafna drabi stabbilit billi jiżdied il-profitt fil-mira mal-kost totali. Fil-każ preżenti, madankollu, il-bejgħ paragunabbli kien disponibbli.

(192)

Dan huwa minħabba l-fatt li l-prodott simili mibjugħ mill-industrija tal-Unjoni kien jikkonsisti f'mijiet ta' tipi ta' prodott u l-produtturi tal-Unjoni fil-kampjun kellhom netwerk estensiv ta' kumpaniji relatati, inkluż ċentri ta' servizz għall-azzar, li jiġġenera kosti, u li ma humiex irreġistrati fil-kotba tal-produtturi tal-Unjoni fil-kampjun f'mod li jistgħu faċilment jiġu allokati lil numri PCN differenti. Għal dawn ir-raġunijiet kien impossibbli li tinġabar l-informazzjoni dwar il-kosti għal kull PCN mhux biss mill-kumpaniji tal-produzzjoni, iżda wkoll mill-kumpaniji tal-bejgħ kollha relatati (b'mod partikolari iċ-ċentri ta' servizz għall-azzar) fl-Unjoni sabiex jintlaħaq kost totali għal kull PCN.

(193)

Għalhekk, minflok, il-Kummissjoni stabbiliet il-kost totali ta' kull PCN billi għaddet mal-prezz tal-bejgħ medju ponderat it-telf medju ponderat li ġġarrab mill-produtturi tal-Unjoni inklużi fil-kampjun. Imbagħad, il-mira tal-marġni ta' profitt ta' 7,9 %, li dwaru ma waslu ebda kummenti wara l-miżuri proviżorji, ġie magħdud mal-kost totali hekk stabbilit.

(194)

Fl-aħħar nett is-CISA sostniet ukoll li l-metodoloġija użata kienet “żbaljata” u li ż-żewġ metodoloġiji “jwasslu għal riżultati kompletament differenti”. Hija pprovdiet eżempju billi użat kost ipotetiku ta' produzzjoni u prezz tal-bejgħ ipotetiku, li allegatament kien juri li l-kalkolu tal-prezz immirat abbażi tal-prezz tal-bejgħ huwa żbaljat.

(195)

Il-Kummissjoni tinnota li, peress li ħafna mill-informazzjoni użata fl-eżempju hija ipotetika, u ma tirreferix għal data attwali, ir-riżultat ta' dan l-eżempju ma jistax juri li l-metodoloġija użata f'dan il-każ partikolari hija żbaljata. Għalhekk, il-Kummissjoni ma tistax tikkunsidra dan l-argument bħala evidenza. Kieku l-istess livell ta' informazzjoni dettaljata kienet disponibbli, iż-żewġ metodoloġiji kienu jwasslu għal riżultati simili.

(196)

Is-CISA fl-aħħar nett sostniet li “jekk il-maġġoranza ta' PCNs esportati mill-produtturi esportaturi Ċiniżi jinbiegħu minn inqas minn tliet produtturi tal-Unjoni fil-kampjun, wieħed għandu jiddubita r-rappreżentattività tad-data dwar il-bejgħ li waslet mingħand il-produtturi tal-Unjoni inklużi fil-kampjun u għalhekk tikkonkludi li l-kalkolu tal-marġni tat-twaqqigħ tal-prezzijiet abbażi tagħha huwa dibattibbli. Dan apparti l-fatt li l-ħsara bilkemm tista tiġi ppruvata jekk l-industrija tal-Unjoni lanqas biss tipproduċi/tbigħ it-tipi esportati mill-produtturi esportaturi Ċiniżi.”

(197)

Il-Kummissjoni tinnota li minkejja li tliet produtturi tal-Unjoni ġew inklużi fil-kampjun il-fatt “li l-maġġoranza ta' PCNs esportati mill-produtturi esportaturi Ċiniżi huma mibjugħa minn inqas minn tliet produtturi tal-Unjoni fil-kampjun” ma jfissirx li l-industrija tal-Unjoni jew anki l-produtturi tal-Unjoni fil-kampjun ma jbigħuhom xejn. Dan ifisser biss li mhux it-tliet produtturi tal-Unjoni fil-kampjun ibigħu PCNs esportati mill-produtturi esportaturi fil-kampjun mir-RPĊ.

(198)

Il-Kummissjoni tinnota wkoll li mhux il-produtturi esportaturi kollha mir-RPĊ fil-kampjun esportaw lejn l-Unjoni l-istess PCNs. Tabilħaqq, il-maġġoranza l-kbira tal-PCNs esportati mill-produtturi esportaturi fil-kampjun lejn l-Unjoni (li jammontaw għal iktar minn 90 % ta' dawn l-esportazzjonijiet bil-volum) hija magħmula minn produttur wieħed jew iktar tal-Unjoni fil-kampjun.

(199)

B'segwitu għad-divulgazzjoni finali is-CISA lrritornat għal din il-kwistjoni fil-kummenti tagħha u waqt is-seduta ta' smigħ.

(200)

Is-CISA ddeduċiet li l-industrija tal-Unjoni setgħet ma rrappurtatx iċ-ċifri korretti u li bbenefikat minn trattament favorevoli bi ksur tad-drittijiet ta' partijiet oħrajn għal investigazzjoni oġġettiva, imparzjali u nondiskriminatorja. Dan l-allegat trattament favur l-industrija tal-Unjoni jidher ukoll mill-klemenza tal-Kummissjoni lejhom meta naqsu milli jipprovdu ċerta informazzjoni importanti (is-CISA irreferiet għal-livell ta' informazzjoni dwar il-kost tal-produzzjoni).

(201)

F'dak li jirrigwarda l-allegazzjoni ta' trattament favorevoli, din l-allegazzjoni tiġi miċħuda. Il-kwistjoni involuta tirrigwarda l-għażla tal-kliem fil-premessi (191) sa (193) hawn fuq. F'dawn il-premessi, il-Kummissjoni ddikjarat ir-raġuni għall-għażla bejn iż-żewġ metodoloġiji użati mill-Kummissjoni biex jiġi stabbilit il-livell ta' eliminazzjoni tal-ħsara.

(202)

Fl-assenza ta' xi kummenti oħra dwar il-livell tal-eliminazzjoni tal-ħsara, il-konklużjonijiet stabbiliti fil-premessi minn (217) sa (223) tar-Regolament proviżorju huma kkonfermati.

(203)

Wara d-divulgazzjoni finali, produttur esportatur fir-RPĊ ippreżenta offerta ta' impenn għall-prezz lill-Kummissjoni. Din l-offerta ffissat prezzijiet minimi ta' importazzjoni (minimum importation prices — “MIPs”) għat-tipi ta' pjanċa tqila mibjugħa lill-Unjoni mill-produttur esportatur mir-RPĊ, u offriet ukoll metodu ta' indiċjar ta' dawn l-MIPs imsejsa fuq il-prezzijiet tal-materja prima ewlenija.

(204)

Il-Kummissjoni ċaħdet l-offerta ta' impenn għall-prezz minħabba r-riskju għoli ta' kontrokumpens minħabba li d-differenza fl-MIPs bejn tipi differenti iżda mhux faċilment distingwibbli kienet wiesgħa wisq u l-metodu ta' indiċjar kien kumpless wisq. Barra minn hekk, l-istruttura tal-kanali tal-bejgħ bl-esportazzjoni tal-produttur esportatur u l-bejgħ bl-esportazzjoni parallel ta' prodotti oħra ma setgħux jippermett monitoraġġ xieraq u, b'hekk, il-possibbiltà ta' kontrokumpens permezz ta' prodotti oħra mibjugħa minn kumpaniji relatati tal-produtturi esportaturi kienet għolja wisq.

(205)

Il-produttur esportatur kien infurmat bir-raġunijiet għaċ-ċaħda tal-offerta tiegħu għal impenn u ingħata l-possibbiltà li jikkummenta.

(206)

Fid-dawl tal-konklużjonijiet li saru fir-rigward tad-dumping, il-ħsara, il-kawżalità u l-interess tal-Unjoni, u f'konformità mal-Artikolu 9(4) tar-Regolament bażiku, għandhom jiġu imposti miżuri antidumping definittivi fuq l-importazzjonijiet tal-prodott ikkonċernat fil-livell tal-eliminazzjoni tal-ħsara, f'konformità mar-regola tad-dazju inferjuri.

(207)

Fuq il-bażi ta' hawn fuq, ir-rati li bihom se jiġi impost id-dazju definittiv antidumping huma stabbilita kif jidhru fit-Tabella 2 hawn taħt:

Tabella 2

Il-marġni ta' dumping, il-livell ta' eliminazzjoni tal-ħsara u r-rata ta' dazju

(208)

Ir-rati tad-dazju antidumping ta' kumpaniji individwali speċifikati f'dan ir-Regolament ġew stabbiliti abbażi tal-konklużjonijiet tal-investigazzjoni preżenti. Għalhekk, huma jirriflettu s-sitwazzjoni li nstabet matul l-investigazzjoni fir-rigward ta' dawn il-kumpaniji. Dawn ir-rati tad-dazju (għall-kuntrarju tad-dazju applikabbli fil-pajjiż kollu għall-“kumpaniji l-oħrajn kollha”) huma għalhekk applikabbli esklużivament għal importazzjonijiet tal-prodott ikkonċernat li joriġina mir-RPĊ u maħdum mill-kumpaniji u għalhekk mill-entitajiet ġuridiċi speċifiċi msemmija. Il-prodott importat ikkonċernat maħdum minn kwalunkwe kumpanija oħra mhux imsemmija speċifikament fil-parti operattiva ta' dan ir-Regolament, bl-isem u bl-indirizz tagħha, inklużi l-entitajiet relatati ma' dawk imsemmijin speċifikament, ma jistax jibbenifika minn dawn ir-rati u għandu jkun soġġett għar-rata tad-dazju applikabbli għall-“kumpaniji l-oħrajn kollha”.

(209)

Kull dikjarazzjoni li titlob l-applikazzjoni ta' dawn ir-rati ta' dazju antidumping tal-kumpaniji individwali (eż. wara bidla fl-isem tal-entità jew wara t-twaqqif ta' entitajiet ġodda tal-produzzjoni jew tal-bejgħ) għandha tiġi indirizzata lill-Kummissjoni (15) flimkien mal-informazzjoni kollha rilevanti, b'mod partikolari kwalunkwe tibdil fl-attivitajiet tal-kumpanija marbuta mal-produzzjoni, mal-bejgħ domestiku u esportat, assoċjat per eżempju ma' dik il-bidla fl-isem jew ma' dik il-bidla fl-entità tal-produzzjoni jew tal-bejgħ. Jekk ikun xieraq, ir-Regolament se jiġi emendat kif meħtieġ billi tiġi aġġornata l-lista tal-kumpaniji li jibbenefikaw minn rati tad-dazju individwali.

(210)

Sabiex jiġi żgurat infurzar xieraq tad-dazju antidumping, il-livell tad-dazju tal-“kumpaniji l-oħra kollha” ma għandux japplika biss għall-produtturi esportaturi li ma kkooperawx, iżda wkoll għal dawk il-produtturi li ma kellhomx esportazzjonijiet lejn l-Unjoni matul il-perjodu ta' investigazzjoni.

(211)

Minħabba l-marġnijiet ta' dumping misjuba u fid-dawl tal-livell ta' ħsara kkaġunata lill-industrija tal-Unjoni, l-ammonti ggarantiti permezz tad-dazju antidumping proviżorju impost mir-Regolament proviżorju għandhom jinġabru definittivament,

(212)

Il-miżuri previsti f'dan ir-Regolament huma skont l-opinjoni tal-Kumitat stabbilit bl-Artikolu 15(1) tar-Regolament (UE) 2016/1036,