1.   Dan ir-Regolament jistabbilixxi l-iskeda għall-mobilitazzjoni tas-Sistema Ewropea tal-Ġestjoni tat-Traffiku Ferrovjarju (“ERTMS”) fil-kurituri tan-netwerk ewlieni kif stabbilit fl-Anness I.

2.   Dan ir-Regolament ma japplikax għall-implimentazzjoni abbord tal-ERTMS kif stipulata fil-punt 7.3.3 tal-Anness III tad-Deċiżjoni 2012/88/UE.

1.   Il-ġesturi tal-infrastruttura tal-ferrovija għandhom jgħammru l-kurituri tan-netwerk ewlieni bl-ERTMS u jħaddmu l-ERTMS f'dawk il-kurituri mhux aktar tard mid-dati speċifikati fl-Anness I ta' dan ir-Regolament, inkluż fl-istazzjonijiet tal-ferrovija u fil-ġunzjonijiet. Il-link ferrovjarju mal-elementi elenkati fl-Anness II tar-Regolament (UE) Nru 1315/2013 u mal-komponenti ta' infrastruttura kif imsemmi fl-Artikolu 11 tar-Regolament (UE) Nru 1315/2013 li jinsabu fuq il-kuritur tan-netwerk ewlieni għandu jiġi mgħammar u jitħaddem fid-data speċifikata għas-sezzjoni ta' kuritur tan-netwerk ewlieni rispettiva.

Il-mobilitazzjoni għandha tkun konformi mal-Artikoli 1(4), 7(2c) u 39(3) tar-Regolament (UE) Nru 1315/2013.

2.   Kuritur ta' netwerk ewlieni għandu jitqies mgħammar bl-ERTMS meta l-ERTMS tiġi awtorizzata għat-tqegħid fis-servizz skont l-Artikolu 15 tad-Direttiva 2008/57/KE tal-Parlament Ewropew u tal-Kunsill (6) jew l-Artikolu 18 tad-Direttiva (UE) 2016/797 tal-Parlament Ewropew u tal-Kunsill (7), biex b'hekk it-traffiku tal-passiġġieri u tal-merkanzija jopera fiż-żewġ direzzjonijiet, b'mod partikolari fil-każ ta' xogħlijiet jew tfixkil, u, sal-limitu meħtieġ għall-operazzjonijiet ta' vetturi mgħammra biss bl-ERTMS, u ta' binarji żgħar (sidings).

3.   Il-ġesturi tal-infrastruttura tal-ferrovija, huma u jaġixxu flimkien, għandhom jagħmlu sforz biex jgħammru u jħaddmu l-ERTMS fuq is-sezzjonijiet transfruntiera simultanjament, b'mod teknikament konsistenti. Il-ġesturi tal-infrastruttura tal-ferrovija, wara konsultazzjoni mal-impriżi ferrovjarji affettwati, għandhom jiffirmaw ftehim dwar l-aspetti tekniċi u operazzjonali tal-mobilitazzjoni għal kull waħda mis-sezzjonijiet transfruntiera. Il-ġesturi tal-infrastruttura tal-ferrovija għandhom jikkonkludu ftehim bħal dan mhux iktar tard minn sena qabel l-ewwel data mid-dati ta' mobilitazzjoni għas-sezzjoni transfruntiera kkonċernata. Dan il-ftehim għandu jistipula dispożizzjonijiet tranżitorji li jqiesu l-ħtiġijiet tal-operazzjonijiet transfruntiera tal-impriżi tal-ferrovija. F'każ ta' nuqqas ta' qbil, l-Istati Membri kkonċernati għandhom jagħtu bidu għal djalogu attiv sabiex jinstabu soluzzjonijiet komuni ta' konverġenza. Jistgħu jitolbu l-appoġġ tal-Kummissjoni. L-Istati Membri għandhom jinnotifikaw tali ftehimiet lill-Kummissjoni mhux aktar tard minn xahar wara l-konklużjoni.

4.   Id-dati tat-tlestija stabbiliti fi ftehimiet għal proġetti kofinanzjati mill-Unjoni li huma aktar kmieni mid-dati stipulati fl-Anness I għandhom jipprevalu fuq dawk id-dati.

5.   L-Istati Membri jistgħu jiddeċiedu li jżommu s-sistemi eżistenti tal-Klassi B, kif iddefinit fil-punt 2.2 tal-Anness tar-Regolament (UE) 2016/919. Madankollu, sad-dati stabbiliti fl-Anness I, il-vetturi msemmija fil-punt 1.1 tal-Anness tar-Regolament (UE) 2016/919 li huma mgħammra bl-ERTMS f'verżjoni kompatibbli mat-tagħmir ta' maġenb il-binarji, għandhom jingħataw aċċess għal dawk il-linji u għall-komponenti tal-infrastruttura kif imsemmija fl-Artikolu 11 tar-Regolament (UE) Nru 1315/2013 mingħajr ma jkollhom għalfejn ikunu mgħammra b'sistema ta' Klassi B.

1.   Meta l-ERTMS titqiegħed fis-servizz fuq kuritur tan-netwerk ewlieni, l-Istat Membru kkonċernat għandu jinnotifika lill-Kummissjoni b'dak il-fatt fi żmien xahar, permezz tas-sistemi stabbiliti skont l-Artikolu 49(1) tar-Regolament (UE) Nru 1315/2013 u l-Artikolu 5(1) tad-Deċiżjoni ta' Implimentazzjoni tal-Kummissjoni 2014/880/UE (8).

2.   L-Istati Membri għandhom jinnotifikaw lill-Kummissjoni bi kwalunkwe dewmien meta l-ERTMS titqiegħed fis-servizz f'sezzjoni ta' kuritur tan-netwerk ewlieni partikolari li tkun trid tiġi mgħammra. Il-ġesturi tal-infrastruttura tal-ferrovija għandhom jgħarrfu lill-Istati Membri dwar dan id-dewmien skont dan.

3.   Meta ssir in-notifika dwar id-dewmien imsemmija fil-paragrafu 2, l-Istat Membru kkonċernat għandu jikkomunika lill-Kummissjoni fajl li jinkludi deskrizzjoni teknika tal-proġett u li jispeċifika data ġdida biex l-ERTMS titqiegħed fis-servizz. Il-fajl għandu jispeċifika r-raġunijiet għad-dewmien u għandu jindika l-miżuri korrettivi meħuda mill-ġestur tal-infrastruttura tal-ferrovija.

4.   Jekk id-dewmien jirriżulta minn ċirkustanza eċċezzjonali, il-Kummissjoni tista' taċċetta li tipposponi d-data rilevanti b'massimu ta' tliet snin. Jekk tintlaqa' t-talba ta' posponiment, l-Istat Membru għandu jagħmel l-emendi meħtieġa lill-pjan ta' implimentazzjoni nazzjonali tiegħu kif imsemmi fil-punt 7.4.4 tal-Anness tar-Regolament (UE) 2016/919 fi żmien xahar minn meta tintlaqa' t-talba tal-posponiment.

Ċirkustanza eċċezzjonali, kif imsemmija fl-ewwel subparagrafu, tfisser ċirkustanza li tirriżulta mill-fażi tal-ippjanar u li hija marbuta ma' konstatazzjonijiet speċifiċi ġeografiċi, ambjentali jew ta' protezzjoni tal-ispeċijiet, sejbiet arkeoloġiċi, proċeduri ta' permessi, l-implimentazzjoni ta' valutazzjoni tal-impatt ambjentali skont id-Direttiva 2014/52/UE tal-Parlament Ewropew u tal-Kunsill (9); jew ċirkustanza li tirriżulta mill-kostruzzjoni u mill-fażijiet ta' awtorizzazzjoni li huma lil hinn mill-kontroll tal-promotur tal-proġett u ma jaqgħux taħt il-kategorija ta' riskji normali li għandhom jiġu indirizzati fil-livell tal-ġestjoni tal-proġett f'dan it-tip ta' proġetti.

5.   Jekk l-ispeċifikazzjonijiet tal-ERTMS stabbiliti fir-Regolament (UE) 2016/919 jinbidlu b'att leġiżlattiv b'mod mhux kompatibbli, l-Istati Membri għandhom jipprovdu lill-Kummissjoni analiżi tal-impatt tal-applikazzjoni tar-referenza legali modifikata fuq in-netwerk tagħhom u fuq l-ippjanar tal-ERMTS mingħajr dewmien bla bżonn, iżda mhux iktar tard minn dakinhar tal-opinjoni formali tal-Kumitat imsemmi fl-Artikolu 51 tad-Direttiva (UE) 2016/797. Jekk jista' jiġi ppruvat li hemm impatt dirett tat-tibdiliet f'termini ta' kost jew ta' skeda ta' żmien għal implimentazzjonijiet speċifiċi, l-Anness I għandu jiġi adattat skont dan.