7.11.2017   

MT

Il-Ġurnal Uffiċjali tal-Unjoni Ewropea

L 288/36

(1)

Skont ir-Regolament (UE) Nru 305/2011, l-istandards armonizzati previsti fl-Artikolu 17 għandhom jissodisfaw ir-rekwiżiti tas-sistema armonizzata stabbiliti f'dan ir-Regolament jew permezz tiegħu.

(2)

F'Jannar 2011, il-Kumitat Ewropew għall-Istandardizzazzjoni (CEN) adotta l-istandard armonizzat EN 13341:2005 + A1: 2011 “Tankijiet statiċi termoplastiċi għall-ħażna 'l fuq mill-art ta' żjut tat-tisħin domestiċi pitrolju u fjuwils tad-diżil — Tankijiet b'polimerizzazzjoni anjonika tal-polietelin ipplażmat bl-infiħ, polietelin ipplażmat b'rotazzjoni u poliamid 6 — Rekwiżiti u metodi ta' ttestjar”. Ir-referenza tal-istandard ġiet ippubblikata sussegwentement f'Il-Ġurnal Uffiċjali tal-Unjoni Ewropea  (2). Ir-referenza tal-istandard ġiet ippubblikata diversi drabi, u l-aħħar darba li sar dan kien fl-2017 (3).

(3)

Fil-21 ta' Awwissu 2015, il-Ġermanja nediet proċedura ta' oġġezzjoni formali fir-rigward tal-istandard armonizzat EN 13341:2005 + A1:2011. L-oġġezzjoni formali kienet ibbażata fuq in-nuqqas ta' metodi armonizzati f'dak l-istandard biex jiġu żgurati r-reżistenza mekkanika, il-kapaċità tat-tagħbija, l-istabbiltà u r-reżistenza għall-frammentazzjoni jew għat-tgħaffiġ tal-prodott ikkonċernat, meta dan jiġi installat f'żoni suxxettibbli għat-terremoti jew għall-għargħar. B'konsegwenza, il-Ġermanja talbet li titneħħa r-referenza tal-istandard minn Il-Ġurnal Uffiċjali tal-Unjoni Ewropea billi jiġu esklużi ż-żoni suxxettibbli għat-terremoti jew għall-għargħar mill-kamp tal-applikazzjoni tiegħu, inkella billi r-referenza tal-istandard titneħħa kompletament.

(4)

Skont il-Ġermanja, dak l-istandard ma jinkludi l-ebda dispożizzjoni biex tiġi aċċertata l-prestazzjoni tal-prodotti għall-bini kkonċernati meta jiġu installati f'żoni fejn hemm riskju ta' terremoti jew għargħar. Il-metodi ta' valutazzjoni meħtieġa għal dawk il-finijiet ma jinsabu mkien kull fejn huma kkonċernati d-disinn, il-bini tal-pedamenti jew l-ankrar tat-tankijiet. Barra minn hekk, lanqas ma jista' jiġi vvalutat il-livell ta' assorbiment tal-impatti li jirriżultaw minn tagħbijiet f'każijiet ta' terremoti jew għargħar.

(5)

Il-Ġermanja kkunsidrat li dawn in-nuqqasijiet jikkostitwixxu ksur tal-Artikolu 17(3) tar-Regolament (UE) Nru 305/2011, minħabba li l-istandard inkwistjoni ma ssodisfax għalkollox ir-rekwiżiti stabbiliti fil-mandat rilevanti kif previst fl-Artikolu 18 ta' dak ir-Regolament.

(6)

Waqt il-valutazzjoni tal-ammissibbiltà tal-pretensjonijiet li tressqu, jenħtieġ jiġi nnutat li l-ħtiġijiet addizzjonali allegati mill-Ġermanja jirrigwardaw l-installazzjoni u l-użu sussegwenti tal-prodotti kkonċernati, f'żoni fejn hemm riskju ta' terremoti jew għargħar.

(7)

Madankollu, skont l-Artikolu 17(3) tar-Regolament (UE) Nru 305/2011, l-istandards armonizzati għandhom jipprovdu l-metodi u l-kriterji għall-valutazzjoni tal-prestazzjoni tal-prodotti koperti minnhom. L-għan tas-sistema armonizzata, stabbilita fir-Regolament inkella permezz tiegħu, huwa li tistabilixxi kundizzjonijiet armonizzati għall-kummerċjalizzazzjoni ta' prodotti tal-bini, u mhux li tipprovdi regoli għall-installazzjoni jew l-użu tagħhom.

(8)

Id-drittijiet biex jitressqu oġġezzjonijiet formali skont l-Artikolu 18 tar-Regolament (UE) Nru 305/2011 ma jistgħux, madankollu, jiġu estiżi għal pretensjonijiet li jiffokaw fuq kwistjonijiet oħra għajr il-kontenut tal-istandards inkwistjoni. Pretensjonijiet bħal dawn għalhekk għandhom jitqiesu bħala inammissibbli fil-kuntest ta' oġġezzjonijiet formali.

(9)

Għaldaqstant, u peress li l-ewwel talba tal-Ġermanja, li tiġi limitata r-referenza tal-istandard billi jiġu esklużi żoni suxxettibbli għat-terremoti jew l-għargħar mill-kamp tal-applikazzjoni tiegħu, tiffoka fuq kwistjonijiet oħra għajr il-kontenut tal-istandard inkwistjoni, din jenħtieġ li titqies bħala inammissibbli.

(10)

It-talba alternattiva ġenerali tal-Ġermanja, li r-referenza tal-istandard tiġi rtirata kompletament, hija bbażata l-aktar fuq l-inadegwatezza tal-istandard kif inhu bħalissa, partikolarment fir-rigward tal-instalazzjoni u l-użu sussegwenti tal-prodotti inkwistjoni f'żoni suxxettibbli għat-terremoti jew l-għargħar.

(11)

Madankollu, l-Istati Membri jibqgħu kompletament intitolati jirregolaw il-kundizzjonijiet speċifiċi għall-installazzjoni jew l-użu tal-prodotti tal-bini, jekk dawn il-kundizzjonijiet ma jinvolvux rekwiżiti għall-valutazzjoni tal-prestazzjoni tal-prodotti bi ksur tas-sistema armonizzata. L-Istati Membri b'hekk huma kapaċi jipprojbixxu jew jillimitaw l-installazzjoni jew l-użu tal-prodotti inkwistjoni f'żoni suxxettibbli għat-terremoti jew l-għargħar, kif inhu l-każ bħalissa fil-Ġermanja.

(12)

Abbażi tal-kontenut ta' EN 13341:2005 + A1:2011 kif ukoll tal-informazzjoni ppreżentata mill-Ġermanja, mis-CEN u mill-industrija, u wara li ġew ikkonsultati l-kumitati stabbiliti bl-Artikolu 64 tar-Regolament (UE) Nru 305/2011 u bl-Artikolu 22 tar-Regolament (UE) Nru 1025/2012 tal-Parlament Ewropew u tal-Kunsill (4), jeżisti qbil ġenerali li r-referenza għal dak l-istandard jenħtieġ li tinżamm f'Il-Ġurnal Uffiċjali tal-Unjoni Ewropea.

(13)

Għaldaqstant jenħtieġ li n-natura allegatament inkompleta ta' dak l-istandard ma tkunx meqjusa bħala raġuni biżżejjed sabiex titneħħa kompletament ir-referenza tal-istandard EN 13341:2005 + A1:2011 minn Il-Ġurnal Uffiċjali tal-Unjoni Ewropea.

(14)

Għalhekk, jenħtieġ li r-referenza tal-istandard EN 13341:2005 + A1:2011 tinżamm f'Il-Ġurnal Uffiċjali tal-Unjoni Ewropea,