(1)

Fil-bidu tal-2012, id-Danimarka bdiet djalogu mal-Kummissjoni biex tiddiskuti l-problemi li Vestjysk Bank A/S (“Vestjysk Bank” jew “il-Bank”) kien qiegħed jaffaċċja f'dak iż-żmien.

(2)

Fil-25 ta' April 2012, il-Kummissjoni adottat id-Deċiżjoni fil-Każ SA.34423 (“id-Deċiżjoni ta' Salvataġġ”) (2) fejn sabet tliet miżuri favur Vestjysk Bank u Aarhus Lokalbank (li kien assorbit minn Vestjysk Bank fit-30 ta' Marzu 2012 permezz ta' fużjoni) li jikkostitwixxu għajnuna mill-Istat fis-sens tal-Artikolu 107(1) tat-Trattat iżda kompatibbli temporanjament mas-suq intern għal raġunijiet ta' stabbiltà finanzjarja. Għaldaqstant, il-miżuri ġew approvati għal sitt xhur jew, jekk id-Danimarka ssottomettiet pjan ta' ristrutturar estensiv fi żmien sitt xhur mid-data ta' din id-Deċiżjoni, sakemm il-Kummissjoni tkun adottat deċiżjoni finali dwar dak il-pjan ta' ristrutturar.

(3)

Fit-18 ta' April 2012, id-Danimarka ssottomettiet verżjoni preliminari tal-pjan ta' ristrutturar għal Vestjysk Bank, li inkluda abbozz ta' sett ta' impenji bħala l-punt tat-tluq għal diskussjonijiet dwar il-pjan ta' ristrutturar.

(4)

Bejn April tal-2012 u Diċembru tal-2015, il-Kummissjoni u d-Danimarka ddiskutew il-pjan ta' ristrutturar, li ġie aġġornat diversi drabi, f'serje ta' laqgħat, konferenzi telefoniċi u korrispondenza bil-miktub. Bejn Awwissu tal-2013 u April tal-2014, id-Danimarka pprovat tbigħ is-sehem tagħha fil-Bank. Bħala riżultat, id-diskussjonijiet dwar il-pjan ta' ristrutturar kienu posposti matul dak il-perjodu. L-attentat ma rnexxiex minħabba nuqqas ta' offerenti interessati.

(5)

Permezz ta' ittra datata l-4 ta' Diċembru 2015, il-Kummissjoni infurmat lid-Danimarka li kienet iddeċidiet li tibda l-proċedura skont l-Artikolu 108(2) tat-Trattat fir-rigward tal-għajnuna (“id-Deċiżjoni tal-Ftuħ”).

(6)

Fis-7 ta' Jannar 2016, il-Kummissjoni rċeviet kummenti mid-Danimarka dwar id-Deċiżjoni tal-Ftuħ.

(7)

F'April tal-2016, id-Danimarka bdiet proċess tal-bejgħ miftuħ, bla kundizzjonijiet u trasparenti bl-għan li tbigħ is-sehem tagħha fil-Bank.

(8)

Fis-17 ta' Ġunju 2016, id-Deċiżjoni tal-Ftuħ ġiet ippubblikata f'Il-Ġurnal Uffiċjali tal-Unjoni Ewropea (3). Il-Kummissjoni talbet lill-partijiet interessati jippreżentaw il-kummenti tagħhom. Il-Kummissjoni ma rċeviet l-ebda kumment mingħand il-partijiet interessati.

(9)

Wara li l-proċess tal-bejgħ kien naqas milli jattira xi offerta għall-Bank, fit-23 ta' Novembru 2016, id-Danimarka infurmat lill-Kummissjoni li l-Bank Daniż Nykredit kien esprima interess li jibni konsorzju ta' investituri mhux bankarji sabiex jakkwista u jikkapitalizza mill-ġdid il-Bank. Fil-fehma tad-Danimarka, dik it-tranżazzjoni, flimkien ma' sforzi ta' ristrutturar oħrajn, ireġġgħu lura l-vijabbiltà fit-tul tal-Bank.

(10)

Bejn it-23 ta' Novembru 2016 u l-bidu ta' Ġunju 2017, il-Kummissjoni u d-Danimarka ddiskutew il-pjan il-ġdid ta' ristrutturar f'serje ta' laqgħat, konferenzi telefoniċi u korrispondenza bil-miktub.

(11)

Fl-14 ta' Ġunju 2017, id-Danimarka ssottomettiet il-verżjoni finali tal-pjan il-ġdid ta' ristrutturar kif ukoll il-ftehim iffirmat mal-konsorzju tal-investitur privat biex takkwista s-sehem tal-Bank. Sussegwentement, il-konsorzju tal-investitur nieda offerta pubblika ta' xiri għall-bqija tal-ishma tal-Bank (li ġiet organizzata mill-partijiet privati), bid-data tal-għeluq tkun it-18 ta' Lulju 2017.

(12)

Bl-ittra datata t-12 ta' Ġunju 2017, id-Danimarka qablet li tirrinunzja għad-drittijiet tagħha li joħorġu mill-Artikolu 342 tat-Trattat flimkien mal-Artikolu 3 tar-Regolament Nru 1 (4) u li d-deċiżjoni preżenti tiġi adottata u nnotifikata bl-Ingliż.

(13)

Vestjysk Bank, li ġie stabbilit fl-1874, huwa kklassifikat bħala istituzzjoni finanzjarja importanti b'mod mhux sistematiku mill-Awtorità Superviżorja Finanzjarja Daniża (“DFSA”) u attwalment huwa l-ħmistax l-akbar bank fid-Danimarka, b'sehem tas-suq ta' inqas minn 0,3 %. Abbażi tal-aktar data disponibbli riċentement (mill-31 ta' Marzu 2017), il-Bank għandu karta bilanċjali ta' DKK 19,5 biljun (EUR 2,6 biljun), DKK 14-il biljun ta' depożiti (EUR 1,9 biljun), DKK 12,4 biljun ta' self totali (EUR 1,7 biljun), 15-il fergħa u 438 impjegat (ekwivalenti full-time “FTE”).

(14)

L-Istat Daniż huwa l-azzjonist prinċipali tal-Bank, u jikkontrolla 81,47 % tal-kapital azzjonarju u d-drittijiet tal-vot f'Vestjysk Bank. Vestjysk Bank huwa elenkat fil-Borża ta' Copenhagen.

(15)

Il-mudell kummerċjali tal-Bank jikkombina self bl-imnut lokali b'esponiment kbir għas-setturi agrikoli u kummerċjali tal-proprjetà immobbli. Prinċipalment, il-Bank huwa attiv fir-Reġjun ta' Jutland tad-Danimarka.

(16)

Fl-2012, Vestjysk Bank irċieva għajnuna mill-Istat sabiex jingħaqad ma' Aarhus Lokalbank, bank reġjonali ieħor Daniż attiv fir-Reġjun ta' Jutland. Fi tmiem l-2011, Vestjysk Bank kellu karta bilanċjali ta' DKK 29,2 biljun (EUR 3,9 biljun) u Aarhus Lokalbank kellu DKK 4,4 biljun (EUR 600 miljun) rispettivament.

(17)

Fl-2009, kemm Vestjysk Bank kif ukoll Aarhus Lokalbank irċevew għajnuna skont l-iskema Daniża tar-rikapitalizzazzjoni. L-għajnuna mogħtija lill-Bank ingħatat fil-forma ta' kapital ibridu ta' DKK 1 438 miljun (5) u DKK 177,8 miljun (6) li jammontaw għal DKK 1 615,8 miljun (kważi EUR 216 miljun) u li jikkorrispondu għal 6,2 % tal-Assi Mwieżna għar-Riskju (RWA). Bħala konsegwenza, l-Istat Daniż diġà kien l-azzjonarju ewlieni fiż-żewġ banek (dan kellu sehem ta' 53,1 % f'Vestjysk Bank u 45,2 % f'Aarhus Lokalbank) qabel il-fużjoni (7).

(18)

Fit-28 ta' Frar 2012, id-Danimarka infurmat lill-Kummissjoni li Vestjysk Bank u Aarhus Lokalbank kienu waslu biex jingħaqdu peress li kull wieħed minnhom iffaċċja żieda fir-riskju li jsiru bank f'diffikultà. Il-fużjoni taż-żewġ banek kienet maħsuba biex tiġġieled l-isfidi tal-finanzjament tal-banek billi toħloq entità waħda kontinwa, Vestjysk Bank, u ssaħħaħ il-pożizzjoni tiegħu bħala bank reġjonali.

(19)

Sabiex tiġi eżegwita l-fużjoni, fir-rigward ta' Vestjysk Bank, id-Danimarka nnotifikat il-miżuri li ġejjin lill-Kummissjoni:

(20)

Fil-25 ta' April 2012, il-Kummissjoni approvat b'mod temporanju l-Miżuri 1, 3 u 4 bħala għajnuna għas-salvataġġ għal perjodu ta' sitt xhur jew, jekk id-Danimarka tissottometti pjan ta' ristrutturar fi żmien sitt xhur mid-data tad-Deċiżjoni, sakemm il-Kummissjoni tkun adottat deċiżjoni finali dwar dak il-pjan ta' ristrutturar. Il-Miżura 2 ġiet iffinanzjata kompletament minn investituri privati u, bħala riżultat, instab li din ma kkostitwietx għajnuna mill-Istat.

(21)

Fit-28 ta' Ġunju 2012, Vestjysk Bank irċieva impenn vinkolanti finali mill-Kumpanija Daniża tal-Istabbiltà Finanzjarja (8) fir-rigward tal-Miżura 4, li llimita l-garanziji individwali mill-Istat għal obbligazzjonijiet għal DKK 6,8 biljun (EUR 914 miljun).

(22)

Ir-rikavati gross mill-Miżura 1 ammontaw għal DKK 318,7 miljun, (rikavati netti ta' DKK 300 miljun) u l-parteċipazzjoni tal-Istat ammontat għal DKK 166 miljun (EUR 22 miljun). Il-miżura 3 tat lok għal effett ta' salvataġġ tal-kapital ta' 0,60 % billi naqqset l-Ass Imwieżen għar-Riskju tal-Bank.

(23)

L-ammont finali ta' appoġġ li jirriżulta mill-implimentazzjoni tat-tliet miżuri deskritti fid-Deċiżjoni ta' Salvataġġ kien DKK 7 293,7 miljun (EUR 979 miljun).

(24)

Fit-18 ta' April 2012, id-Danimarka ssottomettiet verżjoni preliminari tal-pjan ta' ristrutturar għal Vestjysk Bank fuq bażi awtonoma, li inkludiet abbozz ta' dokument għall-impenji possibbli. Dik is-sottomissjoni kienet segwita b'diversi aġġornamenti u emendi, bl-għan li tiġi pprovduta azzjoni addizzjonali biex titreġġa' lura l-vijabbiltà fit-tul tal-Bank, peress li dan tal-aħħar ma rnexxielux jilħaq il-profittabbiltà proġettata tiegħu.

(25)

F'Awwissu 2013, id-Danimarka infurmat lill-Kummissjoni li din ippjanat li tbigħ Vestjysk Bank u għalhekk, id-diskussjonijiet dwar ir-ristrutturar tal-Bank fuq bażi awtonoma ġew sospiżi.

(26)

F'April 2014, id-Danimarka infurmat lill-Kummissjoni li l-bejgħ tal-Bank ġie kkanċellat peress li l-ebda xerrej potenzjali ma ssottometta offerta. Għalhekk, id-diskussjonijiet dwar ir-ristrutturar tal-Bank fuq bażi awtonoma tkomplew. Madankollu, dawn id-diskussjonijiet ma pproduċew l-ebda pjan ta' ristrutturar finali u robust li jista' jiżgura li l-vijabbiltà tal-bank tista' tiġi restawrata u l-Kummissjoni ddeċidiet li tniedi l-proċedura ta' investigazzjoni formali skont l-Artikolu 108(2) tat-Trattat.

(27)

Fid-Deċiżjoni ta' Ftuħ tagħha tal-4 ta' Diċembru 2015, il-Kummissjoni ddubitat jekk

(28)

Fit-tweġiba tagħha, id-Danimarka kkonfermat li din taċċetta li l-Miżura 4 hija għajnuna mill-Istat, iżda rrepetiet ukoll il-pożizzjoni li ressqet fiż-żmien tad-Deċiżjoni ta' Salvataġġ, li tikkontesta li l-Miżuri 1 u 3 jikkostitwixxu għajnuna mill-Istat skont it-tifsira tal-Artikolu 107(1) tat-Trattat. B'mod aktar speċifiku, id-Danimarka tissottometti dan li ġej:

(29)

Id-Danimarka ssottomettiet li Vestjysk Bank huwa vijabbli, iżda f'dan il-waqt huwa bank vulnerabbli. Fl-opinjoni tad-Danimarka, il-Bank wasal fit-tmiem tal-fażi ta' ristrutturar u jinsab fil-proċess li jidħol f'fażi ta' stabilizzazzjoni.

(30)

Barra minn hekk, id-Danimarka ssostni fis-sottomissjoni tagħha li l-Bank għandu bażi solida għall-kontinwazzjoni tal-qligħ ewlieni, iżda minħabba l-bafer baxx tas-solvenza, il-Bank huwa vulnerabbli għal fatturi makroekonomiċi esterni, prinċipalment fatturi li jinfluwenzaw is-settur agrikolu minħabba l-esponiment kbir għal dan is-segment.

(31)

Id-Danimarka tqis li l-Bank ħadem b'mod attiv biex inaqqas l-impronta kummerċjali tiegħu billi jnaqqas il-karta bilanċjali ġenerali u s-self gross u jiffoka n-negozju tiegħu fuq ir-reġjun ewlieni tiegħu magħmul minn partijiet ta' Jutland. Barra minn hekk, il-Bank naqqas b'mod sostanzjali l-għadd ta' fergħat u l-impjegati full-time tiegħu kif ukoll naqqas l-ispejjeż operatorji tiegħu.

(32)

Barra minn hekk, min-nofs tal-2012, il-Bank ikkonforma ma' għadd ta' miżuri ta' mġiba u regoli ta' governanza korporattiva, li d-Danimarka kienet ipproponiet fil-kuntest tal-abbozz tal-pjan ta' ristrutturar imsemmi fil-premessa 24, bl-għan li jillimita d-distorsjonijiet tal-kompetizzjoni.

(33)

Għalhekk, id-Danimarka tikkonkludi li l-passi li diġà ttieħdu kienu aktar minn adegwati biex tiġi limitata d-distorsjoni tal-kompetizzjoni prodotta mill-miżura tal-għajnuna mill-Istat.

(34)

Id-Danimarka ssostni li l-qsim tal-piżijiet ġie implimentat b'mod korrett matul il-proċess ta' ristrutturar. Id-Danimarka rċeviet skont fir-rata tal-abbonament li żgura rimunerazzjoni adegwata għall-parteċipazzjoni tagħha fiż-żieda kapitali kif ukoll kummissjoni ta' garanzija bbażata fuq ir-riskju għall-garanzija individwali li hija ferm ogħla mir-rekwiżiti fil-Komunikazzjoni ta' Estensjoni tal-2011 (10).

(35)

B'referenza għal wieħed minn għadd ta' eżerċizzji dwar il-ġestjoni tal-obbligazzjonijiet imwettqa mill-2012 li fihom tħallas prezz ogħla mill-prezz massimu teoretiku għar-riakkwist ta' kapital subordinat, id-Danimarka tinnota li l-ammont ta' tali prezz żejjed għall-benefiċċju tal-kreditur (u mhux tal-Bank) ammonta għal 2 % tas-somma kapitali ewlenija li tikkorrispondi għal NOK 800 000 (madwar EUR 108 000). Bħala konsegwenza, il-Bank ħallas ammont ekwivalenti lid-Danimarka u b'hekk ġie kontrobilanċjat kwalunkwe qsim tal-piżijiet inadegwat li dan l-ammont relattivament żgħir seta' kkawża. L-ammont tħallas kollu fil-bidu tal-2014.

(36)

Fuq talba tal-Kummissjoni, f'Marzu tal-2016, l-Awtorità Superviżorja Finanzjarja Daniża wettqet test tal-istress fuq il-Bank. It-test tal-istress twettaq mingħajr dewmien u f'konformità mal-istandards tal-Awtorità Bankarja Ewropea (“EBA”). Dan ikkonkluda li jekk jitqiegħed taħt stress, ir-rekwiżit tas-solvenza individwali ta' Vestjysk Bank jista' jinkiser.

(37)

F'Mejju tal-2016, id-Danimarka infurmat lill-Kummissjoni li din kienet qiegħda tmexxi proċess mal-konsulent finanzjarju tagħha (SEB) bl-għan li tbigħ il-Bank. Fil-bidu, suppost il-proċess kellu jiġi konkluż sal-aħħar tas-sajf tal-2016 iżda eventwalment dam sal-aħħar tal-ħarifa tal-2016 (ara wkoll il-premessa 52). Id-diskussjonijiet dwar il-pjan ta' ristrutturar twaqqfu matul dak il-proċess peress li l-kontenut ta' tali pjan ikollu jqis il-pjanijiet li xerrej potenzjali tal-Bank jista' jkollu. F'dan ir-rigward, għandu jiġi nnutat li d-Danimarka kkunsidrat li tbigħ il-Bank jew lil bank ieħor (li possibbilment jintegra fl-operazzjonijiet tiegħu stess) jew lil investitur finanzjarju (li possibbilment iżommu bħala entità awtonoma). Għalhekk, il-pjan ta' ristrutturar kien jiddependi wkoll fuq it-tip ta' xerrej.

(38)

Fit-23 ta' Novembru 2016, id-Danimarka infurmat lill-Kummissjoni li l-bank Daniż Nykredit esprima interess li jibni konsorzju ta' investituri mhux bankarji biex jakkwista u jirrikapitalizza l-Bank.

(39)

Wara diversi skambji minn Novembru 2016 'il quddiem, fid-29 ta' April 2017, id-Danimarka infurmat lill-Kummissjoni li Nykredit irċieva biżżejjed impenji sodi minn għadd ta' investituri biex jeżegwixxi l-pjan ġdid ta' ristrutturar. Fl-14 ta' Ġunju 2017, id-Danimarka ssottomettiet lill-Kummissjoni l-impenn irrevokabbli ffirmat mid-Danimarka u konsorzju ta' investituri privati fuq il-bejgħ tal-parteċipazzjoni azzjonarja tal-Istat Daniż fil-Vestjysk, soġġett għan-nuqqas ta' kwalunkwe offerta aktar vantaġġuża li tista' tiġi sottomessa minn xerrejja prospettivi oħrajn qabel it-18 ta' Lulju 2017.

(40)

Pjan ta' ristrutturar ġdid ġie abbozzat minn Nykredit f'kollaborazzjoni ma' Vestjysk u ġie ppreżentat lill-Kummissjoni mid-Danimarka (“Pjan ta' Nykredit”). Dan għandu l-għan li jindirizza l-ħtiġijiet tal-kapital u l-vijabbiltà fit-tul tal-Bank. L-elementi ewlenin tal-pjan ta' Nykredit kienu:

(41)

Il-pjan kummerċjali tal-Bank li jispeċifika t-tnaqqis fl-ispejjeż imsemmi fil-premessa 40(e) jinkludi, fost oħrajn, il-projezzjonijiet li ġejjin għas-snin 2017, 2018 u 2019:

Tabella 1

Pjan kummerċjali għall-perjodu 2017-2019 u ċ-ċifri attwali għall-2012 u l-2016

(42)

Fit-12 ta' Ġunju 2017, it-tranżazzjonijiet proposti deskritti fil-punti (a) sa (d) tal-premessa 40 tħabbru lis-suq u lill-azzjonisti tal-Bank. Fl-istess ġurnata, l-Istat Daniż ħabbar li huwa kien aċċetta b'mod kondizzjonali l-offerta volontarja tal-Konsorzju għas-sehem tiegħu ta' 81,47 % fil-Bank. Il-partijiet terzi xorta waħda għandhom il-possibbiltà li jissottomettu offerta finanzjarjament aktar vantaġġuża (ara wkoll il-premessa 57) qabel ma tiskadi l-offerta tal-Konsorzju (jiġifieri qabel it-18 ta' Lulju 2017). Fid-19 ta' Ġunju 2017, ġew ippreżentati dokument formali tal-offerta b'aktar dettall ta' kull element tal-proposta u skeda ta' żmien lill-azzjonisti kollha tal-Bank. Il-ħruġ tal-ishma u l-finanzjament mill-ġdid tal-kapital tal-Grad 1 Addizzjonali huma mistennija li jiġu ffinalizzati fil-ħarifa tal-2017.

(43)

Fit-13 ta' Ġunju 2017, fuq talba tal-Kummissjoni, id-Danimarka stqarret b'ittra li t-tranżazzjoni proposta ma tinkludi l-ebda miżura ġdida (pereżempju, garanziji) li tista' tinvolvi xi għajnuna mill-Istat u ssottomettiet il-ftehim mal-Konsorzju lill-Kummissjoni. Fl-istess ġurnata, id-DFSA kkonfermat b'ittra, wara mistoqsija mill-Kummissjoni, li l-politika tar-riskju tal-kreditu ta' Vestjysk hija konformi mal-aħjar prattiki ta' banek simili. B'mod partikolari, abbażi tas-superviżjoni kontinwa tagħha tal-Bank, inkluż l-eżaminazzjoni tal-ġestjoni tar-riskju tal-kreditu tal-bank f'erba' spezzjonijiet mill-2012, id-DFSA kkonkludiet li l-politika tar-riskju tal-kreditu ta' Vestjysk Bank timplimenta l-ordni Eżekuttiva Daniża dwar il-Ġestjoni u l-Kontroll tal-Banek (13).

(44)

Sabiex issostni r-ritorn tal-Bank għall-vijabbiltà u tkompli tillimita distorsjonijiet potenzjali tal-kompetizzjoni, id-Danimarka tat għadd ta' impenji li huma mqassra fil-punti (a) sa (j) (it-test kollu tal-impenji huwa inkluż fl-Anness ta' din id-Deċiżjoni):

(45)

Il-Kummissjoni għandha tistabbilixxi l-eżistenza ta' għajnuna mill-Istat skont it-tifsira tal-Artikolu 107(1) tat-Trattat, li jipprovdi li kwalunkwe għajnuna mogħtija minn Stat Membru jew permezz tar-riżorsi tal-Istat fi kwalunkwe forma li toħloq distorsjoni jew thedded li toħloq distorsjoni fil-kompetizzjoni billi tiffavorixxi ċertu impriżi jew il-produzzjoni ta' ċerti oġġetti għandha tkun kompatibbli mas-suq intern, sa fejn taffettwa l-kummerċ bejn l-Istati Membri.

(46)

Għaldaqstant biex miżura tikkwalifika bħala għajnuna mill-Istat irid jiġi preżunt li l-kundizzjonijiet kumulattivi li ġejjin huma ssodisfati: trid tkun imputabbli għall-Istat u ffinanzjata minn Stat Membru jew permezz ta' riżorsi tal-Istat, trid tkun tagħti vantaġġ selettiv suxxettibbli li tiffavorixxi ċerti impriżi jew il-produzzjoni ta' ċerti oġġetti u trid tkun tali li toħloq distorsjoni jew thedded li toħloq distorsjoni fil-kompetizzjoni u jkollha l-potenzjal li taffettwa l-kummerċ bejn l-Istati Membri.

(47)

Fil-premessi 47 sa 67 tad-Deċiżjoni tas-Salvataġġ u fil-premessa 50 tad-Deċiżjoni tal-Ftuħ, il-Kummissjoni diġà vvalutat il-miżuri taħt skrutinju u kkonkludiet li l-Miżuri 1, 3 u 4 ikkostitwixxew għajnuna mill-Istat skont it-tifsira tal-Artikolu 107(1) tat-Trattat.

(48)

Id-Danimarka ma ppreżentat l-ebda argument matul l-investigazzjoni formali li ma kinitx ippreżentat diġà fl-2012. Il-valutazzjoni u l-konklużjoni fid-Deċiżjoni tas-Salvataġġ tal-Kummissjoni li l-Miżuri 1, 3 u 4 (kif ġie deskritt fil-premessa 19 tad-Deċiżjoni tas-Salvataġġ) ikkostitwixxew għajnuna mill-Istat skont it-tifsira tal-Artikolu 107(1) tat-Trattat għalhekk jibqgħu l-istess.

(49)

Barra minn hekk, il-Kummissjoni vvalutat id-dokumenti sottomessi mid-Danimarka, u b'mod partikolari l-impenn irrevokabbli msemmi fil-premessa 39, li ma jinkludu l-ebda referenza għal kwalunkwe użu tal-fondi pubbliċi (pereżempju, appoġġ kapitali jew garanziji pprovduti mill-Istat) fil-kuntest tal-bejgħ tal-ishma.

(50)

Il-bejgħ ta' istituzzjoni ta' kreditu megħjuna jista' jinvolvi l-għajnuna mill-Istat lix-xerrejja, sakemm il-bejgħ ma jkunx organizzat permezz ta' offerta kompetittiva miftuħa, nondiskriminatorja u bla kundizzjonijiet fejn l-assi jinbiegħu lill-ogħla offerent (14). Għal din ir-raġuni, il-Kummissjoni għandha tivvaluta (15) jekk: (a) il-proċess ta' bejgħ huwiex miftuħ, bla kundizzjonijiet u nondiskriminatorju; (b) il-bejgħ isirx bil-kundizzjonijiet tas-suq; (c) l-istituzzjoni ta' kreditu jew il-gvern, skont l-istruttura magħżula, jimmassimizzaw il-prezz tal-bejgħ.

(51)

Fir-raba' kwart tal-2013, id-Danimarka ppruvat tbigħ is-sehem tagħha f'Vestjysk Bank. Id-Danimarka investigat ukoll jekk jistax jinstab xerrej għall-attivitajiet tal-Bank fir-Reġjun ta' Aarhus. Minkejja l-interess inizjali minn diversi banek Daniżi (16), ma kienx possibbli li titlesta tranżazzjoni, prinċipalment minħabba li, wara akkwiżizzjoni, ix-xerrejja potenzjali — abbażi tad-diliġenza dovuta tagħhom tal-assi tal-Bank — antiċipaw valwazzjonijiet negattivi sinifikanti addizzjonali.

(52)

Fit-tieni kwart tal-2016, id-Danimarka nediet it-tieni proċess tal-bejgħ, wara li ġiet avviċinata mill-investitur finanzjarju Daniż […]. Il-proposta ta' […] (ara wkoll il-premessa 55) kienet, madankollu, soġġetta għal esklussività. Għalhekk, id-Danimarka ddeċidiet li l-ewwel tagħti lix-xerrejja potenzjali rilevanti l-oħra kollha (17) l-opportunità li jissottomettu offerta. Id-Danimarka kkuntrattat konsulent espert dwar l-investimenti, SEB, biex jimmaniġġja l-proċess. Il-proċess sar fit-tieni u t-tielet kwart tal-2016. Fl-aħħar, l-ebda wieħed mix-xerrejja kkuntrattati (18) ma għamel offerta minħabba li kienu mistennija valwazzjonijiet negattivi sinifikanti addizzjonali. […], li mbagħad kellu esklussività de facto, beda d-diliġenza dovuta tiegħu f'Ottubru 2016, iżda temm il-proċess f'Novembru 2016, mingħajr ma għamel offerta.

(53)

Kemm fl-2013 kif ukoll fl-2016, il-proċess tal-bejgħ ġie mfassal kif ġej:

(54)

Nykredit ġie kkuntattjat fiż-żewġ proċessi ta' bejgħ. Fl-2013, dan inizjalment wera interess fil-Bank kollu kemm hu bħala parti minn konsorzju, iżda l-konsorzju ma kienx kapaċi jissottometti offerta. Sussegwentement, Nykredit kien interessat li jakkwista parti mill-Bank (Reġjun ta' Aarhus), iżda ma ssottomettiex offerta wara diliġenza dovuta. Fit-tieni kwart tal-2016, Nykredit esprima interess li joħloq konsorzju, iżda ma daħalx fil-proċess. Madankollu, f'Ottubru tal-2016, Nykredit ippreżenta konsiderazzjonijiet preliminari dwar qafas għal rikapitalizzazzjoni ta' Vestjysk Bank. F'Novembru 2016, Nykredit ġie mbagħad ingaġġat minn Vestjysk Bank biex jesplora l-potenzjal għall-ġbir tal-kapital minn investituri esterni. Dan l-isforz irriżulta fil-pjan ta' Nykredit, l-offerta mill-Konsorzju, u t-tranżazzjonijiet deskritti fil-premessa 40.

(55)

Il-Konsorzju offra li jakkwista l-parteċipazzjoni azzjonarja kollha kemm hi ta' 81,47 % tal-Istat bi prezz ta' 1 DKK għal kull sehem. Meta l-offerta ġiet imħabbra fit-12 ta' Ġunju 2017, il-prezz fil-Borża ta' Copenhagen għal sehem fil-Bank kien ta' DKK 14,90 (20). Madankollu, peress li l-ebda offerta oħra ma ġiet ippreżentata fil-kuntest taż-żewġ proċessi ta' bejgħ miftuħa, jista' jitqies li l-prezz offrut mill-Konsorzju huwa l-massimu li seta' jinkiseb fis-sitwazzjoni attwali. Din il-konklużjoni hija kkonfermata wkoll mill-valutazzjoni ta' proposta alternattiva (ara wkoll il-premessa 52) li ġiet ittestjata b'mod informali minn […] fi Frar 2016. Inizjalment, dak l-investitur ikkunsidra li jakkwista kontroll ta' Vestjysk billi jixtri ishma li għadhom kif ħarġu bi prezz ta' 1 DKK għal kull sehem u kkonferma dik il-proposta f'Settembru 2016 (21). Madankollu, dik il-proposta alternattiva ma seħħitx peress li […] eventwalment irtira wara li beda d-diliġenza dovuta f'Ottubru 2016. Dan jikkostitwixxi punt ta' riferiment addizzjonali (anke 1 DKK għal kull sehem) sabiex jiġi konkluż li l-proposta tal-Konsorzju hija dik li timmassimizza l-prezz tal-bejgħ u li t-tranżazzjoni se ssir b'termini tas-suq.

(56)

Id-Danimarka ssottomettiet ukoll opinjoni dwar il-korrettezza mħejjija minn espert indipendenti fuq talba tagħha. L-opinjoni dwar il-korrettezza tikkonkludi li l-konsiderazzjoni tal-offerta ta' 1 DKK għal kull sehem hija, f'dan il-waqt, l-aħjar prezz tas-suq possibbli li jista' jinkiseb. Biex wasal għal din il-konklużjoni, l-espert qies, fost affarijiet oħrajn, l-informazzjoni miksuba permezz taż-żewġ proċessi ta' bejgħ preċedenti, is-sitwazzjoni tal-kapital attwali tal-Bank u l-inċertezza dwar il-każ dwar l-għajnuna mill-Istat li dak iż-żmien kien għadu pendenti.

(57)

Finalment, skont il-ftehim mal-Konsorzju, l-Istat Daniż għandu l-possibbiltà li jaċċetta offerta li tikkompeti aktar vantaġġuża (22) minn parti terza bona fide. Madankollu, tali offerta li tikkompeti għandha tagħmel l-indirizzar ta' kwistjonijiet passati dwar l-għajnuna mill-Istat realistikament possibbli, għandha twassal għall-ħlas lura tal-kapital tal-Grad 1 Addizzjonali ffinanzjat mill-Istat u ma għandhiex twassal għal aktar għajnuna mill-Istat. Fi kliem ieħor, offerta li tikkompeti għandha mill-inqas tkun ekwivalenti għall-offerta tal-Konsorzju f'dak li għandu x'jaqsam mat-treġġigħ lura tas-solvenza u l-profittabbiltà tal-Bank. Jekk issir offerta li tikkompeti, il-Konsorzju għandu l-possibbiltà li jagħmel kontrofferta. Bħala riżultat, kwalunkwe parti li lesta tinvesti fil-Bank bi prezz ogħla għandha l-opportunità li tagħmel dan. L-att legali li jippermetti lill-Ministeru tal-Finanzi jikkonkludi l-bejgħ għall-Konsorzju jsemmi l-possibbiltà ta' offerti li jikkompetu b'offerta aktar attraenti matul il-perjodu tal-offerta, u dik il-possibbiltà ġiet magħrufa wkoll pubblikament (23). Il-Kummissjoni tqis li dan jipprovdi aktar riassigurazzjoni li d-Danimarka għamlet kull sforz possibbli biex timmassimizza l-prezz tal-bejgħ u tat lill-partijiet interessati kollha l-opportunità li jagħmlu offerta. Madankollu, minħabba n-nuqqas ta' suċċess fl-attentati preċedenti li tbigħ il-Bank, jidher improbabbli ħafna li se ssir offerta li tikkompeti.

(58)

Fuq il-bażi ta' dak li ssemma hawn fuq, il-Kummissjoni tqis li l-proċess biex tbigħ is-sehem tad-Danimarka f'Vestjysk kien miftuħ, nondiskriminatorju u bla kundizzjonijiet, filwaqt li rriżulta fil-massimizzazzjoni tal-prezz tal-bejgħ għall-Istat Daniż. Tabilħaqq, minkejja diversi opportunitajiet biex isir dan (fl-2013 u l-2016), ma saret l-ebda offerta li tirriżulta fi prezz tal-bejgħ ogħla u li tippermetti lill-Istat joħroġ kompletament mill-Bank. Peress li l-Kummissjoni ma għandha ebda raġuni biex temmen li l-offerta li saret u l-prezz li tħallas ma jirriflettux il-prezz tas-suq tal-Bank, jista' jiġi konkluż li x-xerrej privat tal-ishma tal-Istat f'Vestjysk mhuwiex benefiċjarju tal-miżuri ta' għajnuna u b'hekk ma jirċevix għajnuna.

(59)

Għalhekk, huwa konkluż li l-uniku benefiċjarju tal-miżuri ta' għajnuna huwa Vestjysk Bank.

(60)

B'mod ġenerali, kif ġie stabbilit fil-premessi 49 u 59, ġie konkluż li jenħtieġ li din id-Deċiżjoni sempliċiment tivvaluta l-kompatibbiltà tal-miżuri tal-2012 mogħtija lill-entità Vestjysk.

(61)

L-Artikolu 107(3)(b) tat-Trattat jagħti s-setgħa lill-Kummissjoni sabiex issib li l-għajnuna hija kompatibbli mas-suq intern jekk din tkun intiża “biex tirrimedja taqlib serju fl-ekonomija ta' Stat Membru”. Il-Kummissjoni rrikonoxxiet li l-kriżi finanzjarja globali tista' toħloq taqlib serju fl-ekonomija ta' Stat Membru u li miżuri ta' sostenn lill-banek jistgħu jkunu kapaċi jirrimedjaw dak it-taqlib. Dan ġie ddettaljat u żviluppat b'suċċess fis-seba' Komunikazzjonijiet tal-Kriżi (24).

(62)

F'konformità mal-prinċipju ġenerali tal-liġi tempus regit actum, li jirrikjedi li stat tad-dritt ma għandux ikun retroattiv u bil-ġurisprudenza stabbilita tal-Qrati tal-Unjoni, il-kompatibbiltà ta' miżura ta' għajnuna mill-Istat għandha tiġi vvalutata skont il-qafas legali fis-seħħ fiż-żmien tal-implimentazzjoni tiegħu. Il-punt 90 tal-Komunikazzjoni dwar il-Banek tal-2013 ikompli jispeċifika li n-notifiki li ġew irreġistrati mill-Kummissjoni qabel l-1 ta' Awwissu 2013, se jiġu analizzati fid-dawl tal-kriterji fis-seħħ fil-mument ta' din in-notifika.

(63)

Il-miżuri ġew innotifikati fit-13 ta' April 2012. Għaldaqstant, jenħtieġ dawn il-miżuri jiġu vvalutati fid-dawl tal-pjan il-ġdid ta' ristrutturar, wara li tkun ġiet ikkunsidrata l-Komunikazzjoni dwar ir-Ristrutturar, il-Komunikazzjoni dwar il-Banek tal-2008 u l-Komunikazzjonijiet dwar l-Estensjoni tal-2010 u l-2011.

(64)

Fid-Deċiżjoni tal-Ftuħ, il-Kummissjoni kienet tal-fehma preliminari li tranżazzjoni ta' riakkwist li twettqet fit-13 ta' Ġunju 2013 ma kinitx konformi mal-għan tal-Komunikazzjoni dwar ir-Ristrutturar li jiġi żgurat qsim tal-piżijiet adegwat (25). It-tranżazzjoni twettqet bi prezz medju ta' 62 % tas-somma kapitali ewlenija, 2 punti perċentwali aktar mill-prezz tas-suq ta' 50 % flimkien mal-primjum ta' 10 %. B'hekk, Vestjysk Bank ħallas żejjed lid-detenturi tal-istrumenti tad-dejn subordinat b'ammont li jikkorrispondi għal 2 % tas-somma kapitali ewlenija (jew NOK 800 000, madwar EUR 108 000).

(65)

Fit-tweġiba tagħha għad-Deċiżjoni tal-Ftuħ, id-Danimarka sostniet li l-ħlas żejjed li kien sar, tħallas lura mill-Bank lill-Istat Daniż fil-bidu tal-2014 u b'hekk ġie kontrobilanċjat kwalunkwe qsim tal-piżijiet inadegwat li dak l-ammont relattivament żgħir seta' kkawża.

(66)

Il-Kummissjoni tinnota li l-pagament tal-ħlas żejjed mill-Bank lill-Istat ma jistax, bħala tali, jirrimedja qsim tal-piżijiet insuffiċjenti. Il-ħlas żejjed jikkonċerna r-relazzjonijiet finanzjarji bejn il-Bank u l-kredituri (fil-kuntest tal-qsim tal-piżijiet), u mhux ir-relazzjonijiet finanzjarji bejn il-Bank u l-Istat (li jiddeterminaw l-ammont tal-għajnuna mill-Istat). Madankollu, din iċ-ċirkostanza meħuda flimkien ma' sett ta' ċirkostanzi oħra tal-każ preżenti jippermettu lill-Kummissjoni tikkonkludi li kien hemm qsim tal-piżijiet adegwat. B'mod partikolari, dawk iċ-ċirkostanzi l-oħra jikkonċernaw il-fatt li l-ammont tal-prezz żejjed kien minimu (EUR 108 000 biss) u li l-livell limitu ta' 60 % ma ġiex ipprovdut bħala tali fil-Komunikazzjoni dwar ir-Ristrutturar, li hija espressa b'mod pjuttost flessibbli, (26) iżda f'dokument tal-persunal tal-Kummissjoni (27).

(67)

Fid-dawl ta' dan li ssemma hawn fuq, il-Kummissjoni tqis li d-dubji li tqajmu fid-Deċiżjoni tal-Ftuħ dwar il-konformità mar-rekwiżiti tal-qsim tal-piżijiet ġew eliminati għalkollox.

(68)

Il-Bank illimita l-impronta kummerċjali tiegħu billi kompla jnaqqas in-netwerk tal-fergħa tiegħu bi tliet fergħat addizzjonali meta mqabbla ma dak li ġie sottomess mid-Danimarka fit-tweġiba tagħha għad-Deċiżjoni tal-Ftuħ, filwaqt li dan irriżulta fi tnaqqis totali ta' disa' fergħat mill-għajnuna għas-salvataġġ (il-Bank kellu 24 fergħa fl-2012, 18-il fergħa fl-2015 u 15 mit-tmiem tal-2016 'il quddiem u b'hekk kien hemm tnaqqis totali ta' 37,5 % mill-2012). Tali tnaqqis tan-netwerk tal-fergħa, flimkien mal-karatteristiċi tas-suq bankarju Daniż jaffettwa l-kapaċità tal-Bank li jiġġenera negozju ġdid u li jiġbor depożiti ġodda, u b'hekk jikkontribwixxi għal-limitazzjoni tad-distorsjonijiet tal-kompetizzjoni.

(69)

Il-pjan ta' Nykredit juri wkoll tnaqqis akbar fl-għadd tal-persunal tal-Bank (tnaqqis ta' [30-40] % sal-2017 u tnaqqis ta' [35-45] % sal-2018) minn dak li kien ippjanat fiż-żmien tad-Deċiżjoni tal-Ftuħ (tnaqqis ta' [20-30] % sal-2017). Din iż-żieda fit-tnaqqis tirriżulta mill-isforzi tal-Bank biex ikompli jnaqqas l-ispejjeż u t-titjib fl-effiċjenza li jirriżultaw mit-tnaqqis tan-netwerk tal-fergħa.

(70)

Fiż-żmien tad-Deċiżjoni tal-Ftuħ (ara l-premessa 98 ta' dik id-Deċiżjoni) il-Kummissjoni kienet infurmata biss bi tnaqqis tan-netwerk tal-fergħa bi [10-20] % (minn 24 fergħa għal [18-22]) u tnaqqis tal-persunal ta' [20-30] %. Wara li qieset l-ammont kbir ta' għajnuna riċevuta mill-Bank, il-Kummissjoni ddubitat jekk il-fergħa pproġettata u t-tnaqqis tal-persunal bejn l-2012 u l-2017 jillimitawx b'mod suffiċjenti d-distorsjoni tal-kompetizzjoni. Filwaqt li tqis il-miri l-ġodda tat-tnaqqis, il-Kummissjoni tqis li l-Bank għamel sforz addizzjonali importanti biex ikompli jnaqqas l-impronta kummerċjali tiegħu u jżid l-effiċjenza tiegħu. It-Tabella 2 turi s-sitwazzjoni attwali fl-2012 u l-2016, il-proposti magħrufa f'dak iż-żmien tad-Deċiżjoni tal-Ftuħ u l-pjanijiet attwali għas-snin li ġejjin.

Tabella 2

Evoluzzjoni tat-tnaqqis fil-fergħat, FTEs u proporzjon tal-ispejjeż għall-introjtu

(71)

Vestjysk ma kienx kapaċi jespandi n-negozju tiegħu peress li dan irċieva l-għajnuna għas-salvataġġ minħabba l-prestazzjoni ħażina tiegħu. Fl-aħħar ħames snin, id-daqs tal-karta bilanċjali tal-Bank kien qiegħed jonqos, bi tnaqqis ta' 39,5 % minn DKK 32 865 miljun fit-tmiem tal-2012 għal DKK 19 895 miljun fit-tmiem tal-2016. L-istess tendenza tista' tiġi osservata fil-ktieb tas-self tal-Bank: is-self gross naqas b'madwar 36 % fl-istess perjodu, is-self gross għall-agrikoltura naqas b'madwar 26 %, filwaqt li s-self gross għall-kostruzzjoni u s-setturi tal-proprjetà immobbli naqas b'48 % u 44 % rispettivament.

(72)

L-assi mwieżna għar-riskju naqsu wkoll minn DKK 25 600 miljun fit-tmiem tal-2012 għal DKK 16 081 miljun fit-tmiem tal-2016 (– 37 %), filwaqt li fl-istess perjodu l-forza tax-xogħol tal-Bank naqset minn 621 għal 459 FTEs (– 26 %).

(73)

Iċ-ċifri kollha li jidhru fil-premessi 71 u 72 jissuġġerixxu li l-impronta tal-Bank diġà tnaqqset matul l-aħħar ħames snin, parzjalment minħabba neċessità. Madankollu, l-ammont tal-għajnuna riċevuta fl-2012 kien sinifikanti fir-rigward tar-RWA tal-Bank (8,1 %) u bħala tali għandhom jiġu previsti miżuri speċifiċi sabiex jiġu indirizzati d-distorsjonijiet tal-kompetizzjoni. Fl-istess ħin, jenħtieġ li jiġu rikonoxxut li l-Bank se jkun naqqas il-persunal tiegħu bi kważi [30-40] % sat-tmiem tal-2017 u diġà naqqas il-fergħat tiegħu b'37,5 % sat-tmiem tal-2016.

(74)

Minbarra l-miżuri implimentati qabel l-adozzjoni ta' din id-Deċiżjoni, id-Danimarka offriet impenji (ara l-premessa 44) bl-għan li jiġu limitati aktar id-distorsjonijiet tal-kompetizzjoni matul il-perjodu tar-ristrutturar.

(75)

L-ewwel, id-daqs tal-karta bilanċjali tal-Bank huwa limitat għall-2017 fil-livell tiegħu tal-2016, għall-2018 b'DKK 20 300 miljun u għall-2019, jekk ikun applikabbli, għal DKK 21 000 miljun. Dawk il-limiti massimi jillimitaw b'mod espliċitu l-possibbiltà tal-Bank li jiġbor depożiti ġodda u jagħti self ġdid matul il-perjodu ta' ristrutturar. Il-kapaċità tal-Bank li jakkwista l-ishma tas-suq għad-detriment tal-kompetituri tiegħu hija għalhekk ristretta b'tali mod li jiżgura l-limitazzjoni ta' distorsjonijiet tal-kompetizzjoni.

(76)

Barra minn hekk, il-Bank mhux se jagħti self ġdid barra d-Danimarka, u jista' jipprovdi biss self ġdid barra r-Reġjun ta' Jutland jekk il-klijent jipprovdi finanzjament proprju ta' mill-inqas [35-45] % u s-self ikun kollateralizzat. Dak l-impenn jimpedixxi b'mod effettiv il-potenzjal tal-Bank li jespandi n-negozju tiegħu barra mir-reġjun ta' attività ewlieni tiegħu fejn dan għandu wkoll il-bażi storika tiegħu, filwaqt li jerġa' jipproteġi lill-atturi tas-suq minn imġiba aggressiva potenzjali mill-bank.

(77)

Finalment, il-Bank huwa soġġett għal projbizzjoni fuq l-akkwist. L-akkwisti huma mod standard għal attur tas-suq biex jespandi attivitajiet, prodotti jew oqsma kummerċjali ġodda. Għalhekk, il-projbizzjoni fuq l-akkwist ta' kwalunkwe sehem fi kwalunkwe impriża, tostakola b'mod ċar il-potenzjal tal-espansjoni tal-Bank. Il-Bank huwa soġġett ukoll għal projbizzjoni fuq l-użu ta' miżuri ta' għajnuna għall-finijiet ta' reklamar, li tipproteġi wkoll lill-kompetituri.

(78)

Kif ġie spjegat fil-premessi minn 68 sa 70 u kif ġie spjegat fil-qosor fit-Tabella 2, il-Bank għamel sforz addizzjonali importanti (meta mqabbel ma' dak li kien previst fiż-żmien tad-Deċiżjoni tal-Ftuħ) biex ikompli jnaqqas l-impronta kummerċjali tiegħu, peress li huwa attur lokali żgħir u biex iżid l-effiċjenza tiegħu. B'dan il-mod, ir-riskju tad-distorsjonijiet tal-kompetizzjoni se jiġi limitat b'mod suffiċjenti sat-tmiem tal-2017. Madankollu, permezz tal-impenji mogħtija mid-Danimarka, il-Bank ħa wkoll miżuri addizzjonali sostantivi biex jillimita d-distorsjonijiet tal-kompetizzjoni matul il-bqija tal-perjodu ta' ristrutturar li jispiċċa sa mhux aktar tard mit-tmiem tal-2019. Għal din ir-raġuni, il-Kummissjoni tqis li d-dubji fid-Deċiżjoni tal-Ftuħ dwar id-distorsjonijiet tal-kompetizzjoni ġew indirizzati b'mod suffiċjenti.

(79)

Fid-Deċiżjoni tal-Ftuħ tagħha, il-Kummissjoni esprimiet dubji dwar jekk l-abbozz tal-pjan ta' ristrutturar li kien sottomess f'dak iż-żmien, ipprovdiex biżżejjed raġunijiet biex jiżgura l-vijabbiltà tal-Bank fi ħdan il-perjodu ta' ristrutturar. B'mod partikolari, il-Kummissjoni ddubitat xi wħud mis-suppożizzjonijiet sottostanti tal-pjan ta' ristrutturar u qieset li xorta waħda għad hemm inċertezzi konsiderevoli. Finalment, il-Kummissjoni ddubitat jekk il-pożizzjoni kapitali tal-Bank kinitx b'saħħitha biżżejjed biex jiffaċċja indebolimenti addizzjonali.

(80)

Fl-1 ta' Jannar 2017, il-Bank kellu proporzjon kapitali totali ta' 13,1 %. Madankollu, minħabba l-introduzzjoni tar-rekwiżit tal-bafer kapitali ta' konservazzjoni (“CCB”), ir-rekwiżit tal-kapital totali tal-Bank żdied għal 13,8 %, filwaqt li rriżulta f'defiċit kapitali ta' madwar 0,7 % jew DKK 116 miljun (madwar EUR 15,6 miljun). Jekk ma tittieħed l-ebda azzjoni, il-Bank ikompli jkollu defiċit kapitali (minkejja li iżgħar) fl-1 ta' Jannar 2018 (jiġifieri 0,4 % tal-proporzjon kapitali totali jew DKK 63 miljun). Wara l-ħruġ tas-sehem u l-finanzjament mill-ġdid tal-istrumenti kapitali subordinati tiegħu, il-Bank mhux se jibqa' jkollu defiċit kapitali. B'mod partikolari, fl-1 ta' Jannar 2018, il-Bank jistenna li jkollu surplus kapitali ta' madwar DKK 667 miljun (madwar EUR 90 miljun) jew bafer ta' 4,3 % 'l fuq mir-rekwiżit tal-proporzjon kapitali totali. Barra minn hekk, id-Danimarka impenjat ruħha (ara l-premessa 44) li l-Bank se jżomm ammont speċifiku ta' kapital żejjed 'il fuq mill-ammont meħtieġ regolatorju.

(81)

Il-Bank irreveda wkoll l-istrateġija tiegħu u se jkompli jnaqqas l-ispejjeż operatorji tiegħu (ara wkoll it-Tabella 1). B'mod partikolari, il-Bank naqqas l-għadd ta' fergħat tiegħu minn 24 fl-2012 għal sempliċiment 15 fit-tmiem tal-2016. Fiż-żmien tad-Deċiżjoni tal-Ftuħ, il-Bank kien ippjana biss li jnaqqas l-għadd ta' fergħat għal [18-22]. Matul l-istess perjodu ta' żmien, il-Bank naqqas il-forza tax-xogħol tiegħu minn 621 FTE għal [460-490] FTE (– [20-30] %). Sat-tmiem tal-2017, dan l-għadd se jkompli jonqos għal [374-425] FTE (– [30-40] %) u l-għan huwa li jintlaħaq [340-390] FTE sat-tmiem tal-2018 (kważi – [30-40] %). Il-pjan ta' ristrutturar tal-Bank fiż-żmien tad-Deċiżjoni tal-Ftuħ ippreveda livell tal-persunal ta' [460-490] FTE fit-tmiem tal-2017 (li jikkorrispondi biss għal tnaqqis ta' [20-30] % meta mqabbel mat-tmiem tal-2012). Dawn il-miżuri ta' tnaqqis fl-ispejjeż addizzjonali sinifikanti huma riflessi fil-proporzjon tal-introjtu relatat mal-ispejjeż tal-Bank li naqas minn 55,3 % fl-2012 għal 50,3 % fl-2016. Huwa mistenni li dan il-proporzjon ikompli jonqos għal [45-55] % fit-tmiem tal-2017 u saħansitra għal [40-50] % sat-tmiem tal-2018. Fiż-żmien tad-Deċiżjoni tal-Ftuħ, il-Bank xorta waħda mmira lejn proporzjon tal-introjtu relatat mal-ispejjeż ta' [50-60] % fl-2017. Għalhekk, huwa ċar li l-Bank għamel sforzi ta' tnaqqis fl-ispejjeż addizzjonali sinifikanti meta mqabbla ma' dawk previsti fiż-żmien tad-Deċiżjoni tal-Ftuħ. Dawn l-isforzi żejda se jikkontribwixxu għall-profittabbiltà tal-Bank u għalhekk għall-vijabbiltà tiegħu. Miri tal-ispejjeż operatorji speċifiċi previsti fl-impenji se jgħinu jiżguraw li l-Bank jimplimenta t-tnaqqis fl-ispejjeż li jifdal kif previst sabiex tiġi żgurata l-vijabbiltà tiegħu.

(82)

Il-Bank jippjana wkoll li jkompli jnaqqas l-ispejjeż tal-imgħax tiegħu (diġà inqas minn DKK 727 miljun fl-2012 għal DKK 185 miljun fl-2016) b'[35-50] % sa tmiem l-2017 u saħansitra b'[45-60] % sat-tmiem tal-2018. Dan it-tnaqqis sinifikanti jkun xprunat prinċipalment mis-sostituzzjoni ta' depożiti b'terminu li jiskadi b'rata tal-imgħax medja ta' [0-5] % b'depożiti ġodda b'rata ta' sempliċiment madwar [0-5] %. Huwa mistenni li jsir aktar iffrankar fuq l-ispiża tal-imgħax permezz tar-rifinanzjament tal-bażi kapitali subordinata tal-Bank, bħala parti mill-pjan ta' ristrutturar (ara l-premessa 40). Il-Bank issottometta evidenza li turi li dan l-iffrankar jista' jintlaħaq u se jkollu wkoll impatt pożittiv fuq il-profittabbiltà u l-vijabbiltà tal-Bank. Il-Bank jista' jnaqqas ukoll faċilment ir-rata tal-imgħax fuq id-depożiti tiegħu mingħajr ma jxekkel il-finanzjament tiegħu peress li dan għandu surplus tad-depożitu sinifikanti (28). Minkejja t-tnaqqis sinifikanti fir-rimunerazzjoni tad-depożiti, il-Bank ma jipproġetta l-ebda tnaqqis sostanzjali fis-surplus tad-depożiti tiegħu peress li t-tnaqqis fid-depożiti huwa mistenni li jkun aktar baxx mit-tnaqqis tal-ktieb tas-self.

(83)

Il-fattur kruċjali għall-vijabbiltà u l-profittabbiltà tal-Bank se jkun ir-rata ta' indeboliment matul is-snin li ġejjin. Attwalment, il-Bank jistenna li l-provvediment tat-telf mis-self tiegħu se jonqos minn DKK 416 miljun fl-2016 għal DKK [200-300] miljun fl-2017 u għal DKK [200-300] miljun fl-2018. Ir-raġuni ewlenija għat-tnaqqis sinifikanti fl-ammont tal-provvista baġitarja hija l-aspettattiva tal-Bank li l-portafoll agrikolu tiegħu, li ammonta għall-akbar parti ta' indebolimenti fis-snin riċenti (29), se jmur aħjar. Din l-aspettattiva hija bbażata fuq is-suppożizzjoni li l-prezzijiet għall-prodotti agrikoli ewlenin (bħall-ħalib u l-majjal) se jiżdiedu wara tnaqqis qawwi fl-2015-2016 u s-suppożizzjoni li din it-tendenza mhux se titreġġa' lura matul is-snin li ġejjin. Il-projezzjonijiet proprji tal-Kummissjoni (30) jindikaw li l-prezzijiet agrikoli irkupraw tassew wara tnaqqis qawwi fl-2015-2016, iżda wara l-2017 se jibqgħu xi ftit jew wisq fissi. Il-Bank jistenna wkoll tnaqqis żgħir fl-indebolimenti għas-settur tal-proprjetà immobbli filwaqt li għas-setturi l-oħrajn flimkien, hija mistennija żieda modesta.

(84)

B'mod ġenerali, jekk is-suppożizzjonijiet tal-Bank jimmaterjalizzaw, il-profittabbiltà tiegħu se titjieb b'mod sinifikanti matul is-snin li ġejjin. B'mod partikolari, ir-redditu tal-Bank fuq l-ekwità wara t-taxxa (31) se jiżdied minn 5,4 % fl-2016, għal [7-11] % fl-2017 u [7-11] % fl-2018 (ara wkoll it-Tabella 1). Din iż-żieda sinifikanti fil-profittabbiltà tal-Bank hija prinċipalment xprunata mit-tnaqqis tal-ispejjeż u mit-tnaqqis tat-telf mis-self. Tabilħaqq, l-introjtu ewlieni tal-Bank (l-aktar l-introjtu mill-imgħax u mill-miżati) se jibqa' xi ftit jew wisq fiss (ara t-Tabella 1). Il-Kummissjoni tqis li t-tnaqqis ipproġettat fl-ispiża tal-imgħax u l-ispejjeż tal-persunal u dawk amministrattivi jistgħu f'ċirkostanzi normali jinkisbu fiż-żmien previst mill-Bank.

(85)

Fir-rigward tat-tnaqqis fil-provvediment tat-telf mis-self, il-Kummissjoni hija tal-fehma li t-tbassir tal-Bank jiddependi fuq suppożizzjonijiet ottimistiċi. Il-Kummissjoni tinnota b'mod pożittiv li, wara diversi spezzjonijiet mid-DFSA, il-Bank ġab il-politika tar-riskju ta' kreditu tiegħu f'konformità mal-aħjar prattiki ta' banek simili, kif ġie ddikjarat mid-DFSA lill-Kummissjoni (ara l-premessa 43).

(86)

Il-Kummissjoni tinnota li l-Bank aċċetta, fid-diskussjonijiet ma' Nykredit, diliġenza dovuta mwettqa minn Deloitte fit-tmiem tal-2016, li rriżultat fl-ibbukkjar ta' indebolimenti addizzjonali għal ammont ta' madwar DKK [50-150] miljun (32). Dan għandu jnaqqas l-inċertezza dwar it-tkomplija tal-ħtiġijiet tal-provvediment.

(87)

Madankollu, it-tnaqqis fit-telf mis-self li huwa mistenni se jiddependi ħafna fuq kondizzjonijiet makroekonomiċi u b'mod partikolari fuq il-prestazzjoni tas-settur agrikolu. Minħabba d-daqs tal-iskoperturi agrikoli tal-Bank u l-impatt kbir li l-provvedimenti tat-telf mis-self kellu fuq il-profittabbiltà tal-Bank fil-passat, il-Kummissjoni wettqet analiżi tas-sensittività fejn il-provvedimenti tat-telf mis-self jinbidlu għal aktar livelli prudenti. F'dik l-analiżi, il-provvedimenti tat-telf mis-self huma stabbiliti 20 % aktar mill-ammonti bbaġitjati rispettivi għas-snin 2017 u 2018. Taħt is-suppożizzjoni riveduta, ir-redditu tal-Bank fuq l-ekwità jinżel b'[0-5] % u [0-5] % fl-2017 u l-2018 rispettivament iżda jibqa' f'livelli ta' profittabbiltà fejn, jekk ikun meħtieġ, jenħtieġ li l-Bank ikun kapaċi li jkun sors ta' kapital ulterjuri mis-sorsi tas-suq. Madankollu, il-bafer kapitali komdu tal-Bank (ara l-premessa 80) ikun suffiċjenti biex jassorbi t-telf mis-self addizzjonali jew aspetti negattivi oħra u biex iżomm il-Bank solventi. Għal din ir-raġuni, iċ-ċansijiet li l-Bank ikun jeħtieġ kapital ġdid jew għajnuna mill-Istat fis-snin li ġejjin jidhru li huma ferm limitati.

(88)

Anke f'xenarju ta' stress imfassal mid-DFSA, il-Bank ikompli jkollu bafer kapitali għoli biżżejjed wara l-injezzjoni ta' ekwità tal-investituri privati. Ix-xenarju tad-DFSA jassumi, fost oħrajn, introjtu tal-imgħax aktar baxx, amortizzamenti ogħla u b'kollox DKK [400-600] miljun ta' indebolimenti addizzjonali meta mqabbla ma dak li kien previst matul is-snin 2018 u 2019. Filwaqt li l-Bank ikun qiegħed jagħmel telf f'dawk is-sentejn, il-proporzjonijiet ta' solvenza tiegħu jibqgħu bil-wisa' 'l fuq mir-rekwiżiti regolatorji. Fi kliem ieħor, ir-rati attwali ta' indeboliment jistgħu jkunu saħansitra ogħla mingħajr ma tinħoloq problema ta' solvenza għall-Bank fis-snin li ġejjin. Bħala riżultat, anke f'xenarju ta' stress, x'aktarx il-Bank mhux se jkollu bżonn kapital ġdid jew mhux se jkun jirrikjedi għajnuna mill-Istat biex jiżgura s-solvenza tiegħu.

(89)

Abbażi ta' dan t'hawn fuq, il-Kummissjoni tqis li r-RoE tal-Bank ipproġettat għall-2017 ikun biżżejjed biex terġa' titreġġa' lura l-vijabbiltà tal-Bank. Għalhekk, il-Bank jissodisfa r-rekwiżit stabbilit fil-punt 15 tal-Komunikazzjoni dwar ir-Ristrutturar li r-ristrutturar ma għandux idum aktar minn ħames snin. Madankollu, minħabba l-vulnerabbiltà tal-Bank għax-xokkijiet makroekonomiċi (b'mod partikolari għas-settur agrikolu) u l-fatt li l-Bank innifsu jippjana aktar ristrutturar, il-Kummissjoni tqis li jkun xieraq u prudenti li taċċetta l-impenji mid-Danimarka li jwasslu sat-tmiem tal-2018 (u li jistgħu jiġu estiżi b'sena jekk ikun meħtieġ).

(90)

Il-Kummissjoni tinnota li l-impenji mressqa mid-Danimarka (ara l-premessa 44) jipprovdu salvagwardja addizzjonali dwar il-vijabbiltà fit-tul tal-Bank. B'mod partikolari, f'każ li l-Bank ma jiksibx RoE ta' [7-11] % sat-2018, il-perjodu ta' ristrutturar se jiġi estiż b'sena u l-miżuri addizzjonali se jiġu implimentati sabiex tiġi żgurata l-vijabbiltà fit-tul tal-Bank. B'mod aktar speċifiku, f'każ ta' tali estensjoni tal-perjodu ta' ristrutturar, il-Bank se jkun meħtieġ jipprezza(mill-ġdid) kull relazzjoni mal-klijenti (b'xi eċċezzjonijiet limitati) b'tali mod li dan jilħaq il-miri ta' profittabbiltà ddefiniti minn qabel għal kull klijent (33). B'dan il-mod, il-Bank issaħħaħ id-dħul tiegħu f'każ li r-RoE tiegħu ma jkunx laħaq il-mira ta' [7-11] % fl-2018. Peress li l-Bank diġà impenja ruħu għal miżuri ta' tnaqqis fl-ispejjeż sinifikanti, filwaqt li dan ma jikkontrollax bis-sħiħ il-livell ta' telf mis-self (li jiddependi fuq kondizzjonijiet makroekonomiċi), din il-miżura tidher li hija adegwata sabiex issaħħaħ il-profittabbiltà tal-Bank jekk ikun hemm bżonn. Għalhekk, il-Kummissjoni tqis li l-impenji jipprovdu kumdità ulterjuri fir-rigward tal-vijabbiltà fit-tul tal-Bank.

(91)

Abbażi ta' dan, il-Kummissjoni ma għadx għandha dubji dwar l-adegwatezza tal-vijabbiltà fit-tul tal-Bank. B'mod partikolari, wara ż-żieda kapitali, il-Bank se jkollu bafer komdu ogħla mir-rekwiżiti kapitali regolatorji u se jkun kapaċi jassorbi indebolimenti addizzjonali, jekk dawn joriġinaw, mingħajr ma jikser dawk ir-rekwiżiti. Barra minn hekk, l-iffrankar fl-ispejjeż żejjed (it-tnaqqis fl-ispejjeż tal-imgħax u l-ispejjeż operatorji se jikkontribwixxi għal titjib fil-profittabbiltà tal-Bank. B'mod ġenerali, bħala riżultat tal-azzjonijiet kollha previsti fil-miżuri tal-pjan ta' ristrutturar, il-profittabbiltà tal-Bank se tiżdied b'mod suffiċjenti biex tippermetti lill-Bank jiġġenera aktar kapital fis-suq jekk ikun hemm bżonn. Finalment, l-impenji se jiżguraw li l-miżuri ta' tnaqqis fl-ispejjeż li jifdal jiġu implimentati, li jinżammu bafers kapitali adegwati, u li l-introjtu jiżdied jekk il-profittabbiltà tal-Bank ma tilħaqx il-mira RoE ta' [7-11] %. Għalhekk, il-Kummissjoni tqis li l-pjan ta' ristrutturar l-aktar riċenti tal-Bank jipprovdi biżżejjed raġunijiet biex tiġi żgurata l-vijabbiltà tal-Bank u jiġu indirizzati d-dubji espressi fid-Deċiżjoni tal-Ftuħ.

(92)

Fuq il-bażi ta' din il-valutazzjoni, id-dubji tal-Kummissjoni espressi fid-Deċiżjoni tal-Ftuħ ġew eliminati. Għalhekk jenħtieġ li l-għajnuna mill-Istat inkwistjoni tiġi ddikjarata kompatibbli mas-suq intern skont l-Artikolu 107(3)(b) tat-Trattat.