Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32017D1460

Deċiżjoni ta' Implimentazzjoni tal-Kummissjoni (UE) 2017/1460 tat-8 ta' Awwissu 2017 li temenda d-Deċiżjoni ta' Implimentazzjoni (UE) 2016/2008 dwar miżuri ta' kontroll tas-saħħa tal-annimali fir-rigward tal-marda tal-infafet fil-ġilda f'ċerti Stati Membri (notifikata bid-dokument C(2017) 5471) (Test b'rilevanza għaż-ŻEE. )

C/2017/5471

ĠU L 208, 11.8.2017, pp. 42–45 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document No longer in force, Date of end of validity: 20/04/2021

ELI: http://data.europa.eu/eli/dec_impl/2017/1460/oj

11.8.2017   

MT

Il-Ġurnal Uffiċjali tal-Unjoni Ewropea

L 208/42

DEĊIŻJONI TA' IMPLIMENTAZZJONI TAL-KUMMISSJONI (UE) 2017/1460

tat-8 ta' Awwissu 2017

li temenda d-Deċiżjoni ta' Implimentazzjoni (UE) 2016/2008 dwar miżuri ta' kontroll tas-saħħa tal-annimali fir-rigward tal-marda tal-infafet fil-ġilda f'ċerti Stati Membri

(notifikata bid-dokument C(2017) 5471)

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 89/662/KEE tal-11 ta' Diċembru 1989 dwar spezzjonijiet veterinarji fil-kummerċ intra-Komunitarju bil-ħsieb tat-tlestija tas-suq intern (1), u b'mod partikolari l-Artikolu 9(4) tagħha,

Wara li kkunsidrat id-Direttiva tal-Kunsill 90/425/KEE tas-26 ta' Ġunju 1990 dwar l-iċċekkjar veterinarju u żootekniku applikabbli għall-kummerċ intra-Komunitarju ta' ċertu annimali ħajjin u prodotti bil-ħsieb tat-tlestija tas-suq intern (2), u b'mod partikolari l-Artikolu 10(4) tagħha,

Wara li kkunsidrat id-Direttiva tal-Kunsill 92/119/KEE tas-17 ta' Diċembru 1992 li tintroduċi miżuri ġenerali Komunitarji għall-kontroll ta' ċertu mard tal-annimali u l-miżuri speċifiċi li għandhom x'jaqsmu mal-marda vexxikolari tal-ħnieżer (3), u b'mod partikolari l-Artikolu 14(2), l-Artikolu 19(1)(a) u (3)(a) u l-Artikolu 19(4) u (6) tagħha,

Wara li kkunsidrat id-Direttiva tal-Kunsill 2002/99/KE tas-16 ta' Diċembru 2002 li tistabbilixxi r-regoli sanitarji għall-annimali u li jiddeterminaw il-produzzjoni, l-ipproċessar, id-distribuzzjoni u l-introduzzjoni ta' prodotti li joriġinaw mill-annimali u li huma għall-konsum uman (4), u b'mod partikolari l-Artikolu 4(3) tagħha,

Billi:

(1)

Id-Direttiva 92/119/KEE tistabbilixxi miżuri ġenerali ta' kontroll li jridu jiġu applikati fil-każ ta' tifqigħa ta' ċertu mard tal-annimali, inkluża l-marda tal-infafet fil-ġilda (LSD). Dawn il-miżuri ta' kontroll jinkludu t-twaqqif ta' żoni ta' protezzjoni u ta' sorveljanza madwar l-impriża agrikola infettata, filwaqt li jipprovdu wkoll it-tilqim ta' emerġenza f'każ ta' tifqigħa ta' LSD bħala suppliment għal miżuri oħra ta' kontroll.

(2)

Id-Deċiżjoni ta' Implimentazzjoni tal-Kummissjoni (UE) 2016/2008 (5) tistabbilixxi miżuri ta' kontroll tas-saħħa tal-annimali fir-rigward tal-okkorrenza tal-marda tal-infafet fil-ġilda f'ċerti Stati Membri jew f'partijiet minnhom kif elenkati fl-Anness I tagħha, inkluż ir-rekwiżiti minimi għal programmi ta' tilqim kontra l-marda tal-infafet fil-ġilda ppreżentati mill-Istati Membri lill-Kummissjoni għall-approvazzjoni. Tiddefinixxi “żoni infettati” bħala l-partijiet mit-territorju ta' Stat Membru elenkat fil-Parti II tal-Anness I ta' dik id-Deċiżjoni ta' Implimentazzjoni u dan jinkludi ż-żoni fejn il-marda tal-infafet fil-ġilda ġiet ikkonfermata u kull żona ta' sorveljanza u protezzjoni stabbiliti skont id-Direttiva 92/119/KEE, u fejn it-tilqim kontra l-marda tal-infafet fil-ġilda jista' jiġi implimentat wara l-approvazzjoni ta' programmi ta' tilqim. Tiddefinixxi wkoll “żoni ħielsa bit-tilqim” bħala l-partijiet tat-territorju ta' Stat Membru elenkat fil-Parti I ta' dak l-Anness li jinkludu ż-żoni barra ż-“żoni infettati”, fejn it-tilqim kontra l-marda tal-infafet fil-ġilda huwa implimentat wara l-approvazzjoni ta' programmi ta' tilqim.

(3)

Id-Deċiżjoni ta' Implimentazzjoni (UE) 2016/2008 tistipula miżuri speċifiċi ta' mitigazzjoni u restrizzjonijiet kummerċjali fir-rigward ta' annimali bovini ħajjin u ruminanti selvaġġi miżmuma fil-magħluq, il-prodott ġerminali tagħhom, u prodotti oħra ta' dawk l-annimali li għandhom jitqiegħdu fil-post fiż-“żoni infettati” u “żoni ħielsa bit-tilqim”, bil-ħsieb li jiġi minimizzat kull riskju ta' tixrid tal-marda tal-infafet fil-ġilda.

(4)

Ir-Rapport tal-Awtorità Ewropea dwar is-Sigurtà fl-Ikel (EFSA) dwar il-marda tal-infafet fil-ġilda, approvat fis-27 ta' Marzu 2017 (6) (Rapport tal-EFSA tal-2017), jindika li r-riżultati mill-analiżi tad-dejta epidemjologika disponibbli dwar il-marda tal-infafet fil-ġilda fl-Ewropa sal-2016 tagħti x'tifhem li l-kampanji ta' tilqim kontra l-marda tal-infafet fil-ġilda (LSD), fejn ġew implimentati kif xieraq, rażżnu tajjeb il-marda billi pprevjenu l-okkorrenza ta' tifqigħat ġodda. Dawn ir-riżultati jikkonfermaw ir-riżultati preċedenti ta' parir urġenti dwar il-marda tal-infafet fil-ġilda, adottat mill-EFSA fid-29 ta' Lulju 2016 (7) (il-Parir tal-EFSA tal-2016), li kien wasal għall-konklużjoni li t-tilqim bil-massa huwa l-iktar miżura effettiva għall-kontroll tal-marda tal-infafet fil-ġilda, speċjalment jekk tkun diġà ġiet żviluppata l-protezzjoni tal-annimali mlaqqma qabel id-dħul tal-marda, jiġifieri permezz ta' tilqim preventiv.

(5)

L-effikaċja tal-kampanji ta' tilqim reċenti kontra l-marda tal-infafet fil-ġilda, kif ikkonfermat mill-Parir tal-EFSA tal-2016 u r-Rapport tal-EFSA tal-2017, tagħti x'tifhem li annimali bovini mlaqqma kif xieraq jistgħu jiġu spustati minn “żona ħielsa bit-tilqim” ta' Stat Membru għal Stat Membru ieħor jew pajjiż terz jew fi ħdan iż-“żona ħielsa bit-tilqim” jew “żona infettata” tal-istess Stat Membru li juża regoli li huma inqas restrittivi. Għall-istess raġuni, regoli inqas restrittivi għandhom japplikaw għal spustamenti ta' għoġġiela mhux imlaqqma li twieldu minn ommijiet imlaqqma meta jiġu spustati fi ħdan l-istess żona tal-istess Stat Membru. Regoli inqas restrittivi bl-istess mod għandhom japplikaw għall-ispustamenti ta' annimali bovini mhux imlaqqma u ruminanti selvaġġi miżmuma fil-magħluq fi ħdan l-istess “żona ħielsa bit-tilqim” tal-istess Stat Membru, meta dawn ikunu impurtati minn Stati Membri jew pajjiżi terzi jew żoni tagħhom, li mhumiex soġġetti għal restrizzjonijiet marbuta mal-marda tal-infafet fil-ġilda, peress li dawn it-tipi ta' spustamenti jistgħu jitqiesu bħala ta' riskju baxx għat-tixrid ta' mard.

(6)

Il-Kroazja, il-Bulgarija u l-Greċja, it-tliet Stati Membri li bħalissa jimplimentaw it-tilqim kontra l-marda tal-infafet fil-ġilda, u elenkati fl-Anness I tad-Deċiżjoni (UE) 2016/2008, talbu biex dik id-Deċiżjoni ta' Implimentazzjoni tiġi emendata u b'mod partikolari l-Artikoli 4, 5 u 6 tagħha sabiex tinkludi regoli inqas restrittivi għall-ispustament ta' annimali bovini u ruminanti selvaġġi miżmuma fil-magħluq imlaqqma soġġetti għal tilqim mill-ġdid kif ukoll għall-ispustamenti ta' għoġġiela mwielda minn ommijiet imlaqqma. Barra minn hekk il-Kroazja talbet regoli inqas restrittivi għall-ispustamenti ta' annimali bovini u ruminanti selvaġġi miżmuma fil-magħluq mhux imlaqqma li joriġinaw minn Stati Membri jew pajjiżi terzi jew minn żoni tagħhom li mhumiex soġġetti għal restrizzjonijiet minħabba l-konferma tal-preżenza tal-marda tal-infafet fil-ġilda jew tat-tilqim kontriha.

(7)

Ir-riskju tat-tixrid tal-marda tal-infafet fil-ġilda minħabba l-ispustament ta' annimali bovini ħajjin u ruminanti selvaġġi miżmuma fil-magħluq imlaqqmin kontra l-marda tal-infafet fil-ġilda huwa ikbar meta jirċievu tilqima għall-ewwel darba bi tqabbil mal-istess riskju meta jirċievu tilqima mill-ġdid filwaqt li jibqgħu immuni minħabba tilqim preċedenti. Għaldaqstant ir-riskju tat-tixrid tal-marda tal-infafet fil-ġilda huwa ikbar meta l-impriża ta' oriġini ta' dawn l-annimali tkun mlaqqma għall-ewwel darba bi tqabbil mal-istess riskju meta l-impriża tkun imlaqqma mill-ġdid fil-perjodu meta l-annimali eżistenti għadhom immuni minħabba tilqim preċedenti. Huwa għalhekk xieraq li ssir distinzjoni bejn ir-regoli ta' restrizzjoni applikabbli f'kull waħda mis-sitwazzjonijiet deskritti hawn fuq meta titqies id-durata tal-immunità provokata mit-tilqim kontra l-marda tal-infafet fil-ġilda skont l-istruzzjonijiet tal-manifatturi tat-tilqima.

(8)

Ir-rekwiżiti li jikkonċernaw id-derogi u l-kundizzjonijiet speċjali għall-ispedizzjoni ta' annimali bovini ħajjin u ruminanti selvaġġi miżmuma fil-magħluq minn u fi ħdan “iż-żoni ħielsa bit-tilqim” u ż-“żoni infettati” għandhom għalhekk jiġu emendati u l-Artikoli 4, 5, 6 u 12 tad-Deċiżjoni ta' Implimentazzjoni (UE) 2016/2008 jiġu emendati skont dan.

(9)

Il-miżuri previsti f'din id-Deċiżjoni huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DIN ID-DEĊIŻJONI:

Artikolu 1

Id-Deċiżjoni ta' Implimentazzjoni (UE) 2016/2008 hija emendata kif ġej:

(1)

fl-Artikolu 4, il-paragrafu 1 huwa emendat kif ġej:

(a)

fil-punt (a), il-punt (i) huwa sostitwit b'dan li ġej:

“(i)

 l-annimali ġew imlaqqma kontra l-marda tal-infafet fil-ġilda mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni, u ġejjin minn impriża ta' oriġini fejn ikunu ilhom residenti għal perjodu ta' mill-anqas 28 jum. F'din l-impriża ta' oriġini l-annimali kollha tal-ispeċi suxxettibbli ġew imlaqqma kontra l-marda tal-infafet fil-ġilda mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni jew jibqgħu fi ħdan il-perjodu tal-immunità pprovokata mill-immunità tat-tilqima preċedenti jew mill-immunità materna fid-data tal-ispedizzjoni;”;

(b)

fil-punt (b), il-punt (i) huwa sostitwit b'dan li ġej:

“(i)

 l-annimali ġew imlaqqma kontra l-marda tal-infafet fil-ġilda mill-inqas tliet xhur qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni. Fl-l-impriża ta' oriġini ta' dawn l-annimali, l-annimali kollha tal-ispeċi suxxettibbli ġew imlaqqma kontra l-marda tal-infafet fil-ġilda mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni jew jibqgħu fi ħdan il-perjodu tal-immunità pprovokata mill-immunità tat-tilqima preċedenti jew mill-immunità materna fid-data tal-ispedizzjoni;”;

(c)

fil-punt (c), il-punt (ii) huwa sostitwit b'dan li ġej:

“(ii)

 l-annimali ġew imlaqqma kontra l-marda tal-infafet fil-ġilda mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni. Fl-impriża ta' oriġini ta' dawn l-annimali, l-annimali kollha tal-ispeċi suxxettibbli ġew imlaqqma kontra l-marda tal-infafet fil-ġilda mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni jew jibqgħu fi ħdan il-perjodu tal-immunità pprovokata mill-immunità tat-tilqima preċedenti jew mill-immunità materna fid-data tal-ispedizzjoni;”.

(2)

Fl-Artikolu 5(1), il-punt (b) jinbidel b'dan li ġej:

“(b)

 l-annimali ġew imlaqqma kontra l-marda tal-infafet fil-ġilda mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni. Fl-impriża ta' oriġini ta' dawn l-annimali, l-annimali kollha tal-ispeċi suxxettibbli ġew imlaqqma kontra l-marda tal-infafet fil-ġilda mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni jew jibqgħu fi ħdan il-perjodu tal-immunità pprovokata mill-immunità tat-tilqima preċedenti jew mill-immunità materna fid-data tal-ispedizzjoni;”.

(3)

L-Artikolu 6 jinbidel b'dan li ġej:

“Artikolu 6

Kundizzjonijiet speċjali għall-ispedizzjoni ta' annimali bovini ħajjin u ruminanti selvaġġi mrobbija fiż-żoni elenkati fil-Parti II tal-Anness I tal-istess Stat Membru

1.   B'deroga mill-projbizzjoni prevista fil-punt (a) tal-Artikolu 3, u soġġett għall-konformità mal-paragrafu 2 ta' dan l-Artikolu, l-awtorità kompetenti tista' tawtorizza l-ispedizzjoni ta' konsenji ta' annimali bovini ħajjin u ruminanti selvaġġi mrobbija minn impriżi li jinsabu f'żona elenkata fil-Parti II tal-Anness I lejn destinazzjoni li tinsab fi ħdan żona oħra elenkata fil-Parti II tal-Anness I tal-istess Stat Membru.

2.   Id-deroga prevista fil-paragrafu 1 għandha tapplika biss għal konsenji ta' annimali bovini ħajjin u ruminanti selvaġġi miżmuma fil-magħluq sakemm dawn l-annimali jikkonformaw ma' tal-inqas waħda mill-kundizzjonijiet li ġejjin:

(a)

l-annimali ġew imlaqqma kontra l-marda tal-infafet fil-ġilda mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni. Fl-impriża ta' oriġini ta' dawn l-annimali l-annimali kollha tal-ispeċi suxxettibbli ġew imlaqqma kontra l-marda tal-infafet fil-ġilda mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni jew jibqgħu fi ħdan il-perjodu tal-immunità pprovokata mill-immunità tat-tilqima preċedenti jew mill-immunità materna fid-data tal-ispedizzjoni;

(b)

l-annimali, irrispettivament mill-istatus ta' tilqim individwali tagħhom jew mit-tilqim fl-impriża ta' oriġini tagħhom kontra l-marda tal-infafet fil-ġilda jistgħu jiġu mċaqlqa għal qtil ta' emerġenza lejn biċċerija, diment li l-impriża ta' oriġini mhix soġġetta għal xi waħda mir-restrizzjonijiet previsti fid-Direttiva 92/119/KEE fir-rigward tal-marda tal-infafet tal-ġilda, li tipprojbixxi tali ċaqliq;

(c)

l-annimali huma frieħ mhux imlaqqma ta' inqas minn sitt xhur imwielda minn ommijiet imlaqqma mill-anqas 28 jum qabel ma jwelldu li baqgħu fi ħdan il-perjodu tal-immunità skont il-manifattur tat-tilqima fid-data tal-ħlas u jistgħu jiġu mċaqalqa lejn impriża oħra jew lejn biċċerija għal qatla immedjata. Fl-impriża ta' oriġini ta' dawn l-annimali, l-annimali kollha tal-ispeċi suxxettibbli ġew imlaqqma mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni jew jibqgħu fi ħdan il-perjodu tal-immunità pprovokata mill-immunità tat-tilqima preċedenti jew mill-immunità materna fid-data tal-ispedizzjoni, u l-impriża mhix soġġetta għal xi restrizzjonijiet stipulati fid-Direttiva 92/119/KEE fir-rigward tal-marda tal-infafet fil-ġilda, li jipprojbixxu tali ċaqliq.”.

(4)

L-Artikolu 6a li ġej jidħol wara l-Artikolu 6:

“Artikolu 6a

Kundizzjonijiet speċjali għall-ispedizzjoni ta' annimali bovini ħajjin u ruminanti selvaġġi miżmuma fil-magħluq minn żoni elenkati fil-Parti I tal-Anness I lejn żoni elenkati fil-Parti I jew fil-Parti II tal-Anness I tal-istess Stat Membru

1.   B'deroga mill-projbizzjoni stipulata fil-punt (a) tal-Artikolu 3, u soġġett għall-konformità mal-paragrafu 2 ta' dan l-Artikolu, l-awtorità kompetenti tista' tawtorizza l-ispedizzjoni ta' konsenji ta' annimali bovini ħajjin u ruminanti selvaġġi miżmuma fil-magħluq minn impriżi li jinsabu f'żona elenkata fil-Parti I tal-Anness I lejn destinazzjoni li tinsab fi ħdan żona oħra elenkata fil-Parti I jew fil-Parti II tal-Anness I tal-istess Stat Membru.

2.   Id-deroga prevista fil-paragrafu 1 għandha tapplika biss għal konsenji ta' annimali bovini ħajjin u ruminanti selvaġġi miżmuma fil-magħluq sakemm dawn l-annimali jikkonformaw ma' tal-inqas waħda mill-kundizzjonijiet li ġejjin:

(a)

l-annimali ġew imlaqqma kontra l-marda tal-infafet fil-ġilda mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni. Fl-impriża ta' oriġini ta' dawn l-annimali l-annimali kollha tal-ispeċi suxxettibbli ġew imlaqqma kontra l-marda tal-infafet fil-ġilda mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni jew jibqgħu fi ħdan il-perjodu tal-immunità pprovokata mill-immunità tat-tilqima preċedenti jew mill-immunità materna fid-data tal-ispedizzjoni;

(b)

l-annimali, irrispettivament mill-istatus ta' tilqim individwali tagħhom jew mit-tilqim fl-impriża ta' oriġini tagħhom kontra l-marda tal-infafet fil-ġilda jistgħu jiġu mċaqlqa għal qtil ta' emerġenza lejn biċċerija, diment li l-impriża ta' oriġini mhix soġġetta għal xi waħda mir-restrizzjonijiet previsti fid-Direttiva 92/119/KEE fir-rigward tal-marda tal-infafet tal-ġilda, li tipprojbixxi tali ċaqliq;

(c)

l-annimali huma frieħ mhux imlaqqma ta' inqas minn sitt xhur imwielda minn ommijiet imlaqqma mill-anqas 28 jum qabel ma jwelldu li baqgħu fi ħdan il-perjodu tal-immunità skont il-manifattur tat-tilqima fid-data tal-ħlas u jistgħu jiġu mċaqalqa lejn impriża oħra jew lejn biċċerija għal qatla immedjata. Fl-impriża ta' oriġini ta' dawn l-annimali l-annimali kollha tal-ispeċi suxxettibbli ġew imlaqqma mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni jew jibqgħu fi ħdan il-perjodu tal-immunità pprovokata mill-immunità tat-tilqima preċedenti jew mill-immunità materna fid-data tal-ispedizzjoni, u l-impriża mhix soġġetta għal xi restrizzjonijiet stipulati fid-Direttiva 92/119/KEE fir-rigward tal-marda tal-infafet fil-ġilda, li jipprojbixxu tali ċaqliq.

(d)

l-annimali ġew introdotti fl-impriża inqas minn tliet xhur ilu minn Stat Membru ieħor jew minn pajjiż terz jew minn żona tiegħu li ma kienx soġġett għal xi restrizzjonijiet minħabba konferma tal-marda tal-infafet fil-ġilda jew it-tilqim kontra l-marda tal-infafet fil-ġilda u jistgħu jiġu mċaqalqa lejn biċċerija għal qatla immedjata. Fl-impriża ta' oriġini ta' dawn l-annimali l-annimali kollha tal-ispeċi suxxettibbli ġew imlaqqma mill-inqas 28 jum qabel id-data tal-ispedizzjoni u jibqgħu fi ħdan il-perjodu tal-immunità skont il-manifattur tat-tilqima fid-data tal-ispedizzjoni jew jibqgħu fi ħdan il-perjodu tal-immunità pprovokata mill-immunità tat-tilqima preċedenti jew mill-immunità materna fid-data tal-ispedizzjoni, u l-impriża mhix soġġetta għal xi restrizzjonijiet stipulati fid-Direttiva 92/119/KEE fir-rigward tal-marda tal-infafet fil-ġilda, li jipprojbixxu tali ċaqliq.”

(5)

Fl-Artikolu 12, il-frażi ta' introduzzjoni tinbidel b'dan li ġej:

“L-awtorità kompetenti għandha tiżgura li l-proċedura ta' gwida għat-trasport ta' annimali bovini ħajjin u ruminanti selvaġġi miżmuma fil-magħluq, ta' prodotti sekondarji mhux proċessati tal-annimali u tal-ġlud u tal-ġilda mhux trattati kif kopert mid-derogi previsti fl-Artikoli 4, 5, 8 u 9 tkun konformi mar-rekwiżiti li ġejjin:”.

Artikolu 2

Din id-Deċiżjoni hija indirizzata lill-Istati Membri.

Magħmul fi Brussell, it-8 ta' Awwissu 2017.

Għall-Kummissjoni

Vytenis ANDRIUKAITIS

Membru tal-Kummissjoni

(1)   ĠU L 395, 30.12.1989, p. 13.

(2)   ĠU L 224, 18.8.1990, p. 29.

(3)   ĠU L 62, 15.3.1993, p. 69.

(4)   ĠU L 18, 23.1.2003, p. 11.

(5)  Id-Deċiżjoni ta' Implimentazzjoni tal-Kummissjoni (UE) 2016/2008 tal-15 ta' Novembru 2016 dwar miżuri ta' kontroll tas-saħħa tal-annimali fir-rigward tal-marda tal-infafet fil-ġilda f'ċerti Stati Membri (ĠU L 310, 17.11.2016, p. 51).

(6)   EFSA Journal 2017;15(4):4773.

(7)   EFSA Journal 2016;14(8):4573.

Top