This document is an excerpt from the EUR-Lex website
Document 32017D1424
Council Decision (CFSP) 2017/1424 of 4 August 2017 in support of OSCE activities to reduce the risk of illicit trafficking and excessive accumulation of small arms and light weapons and conventional ammunition in the former Yugoslav Republic of Macedonia and Georgia
Deċiżjoni tal-Kunsill (PESK) 2017/1424 tal-4 ta' Awwissu 2017 b'appoġġ għall-attivitajiet tal-OSKE biex jitnaqqas ir-riskju tat-traffikar illeċitu u l-akkumulazzjoni eċċessiva ta' armi ħfief u ta' kalibru żgħir u munizzjon konvenzjonali fl-Eks-Repubblika Jugoslava tal-Maċedonja u l-Georgia
Deċiżjoni tal-Kunsill (PESK) 2017/1424 tal-4 ta' Awwissu 2017 b'appoġġ għall-attivitajiet tal-OSKE biex jitnaqqas ir-riskju tat-traffikar illeċitu u l-akkumulazzjoni eċċessiva ta' armi ħfief u ta' kalibru żgħir u munizzjon konvenzjonali fl-Eks-Repubblika Jugoslava tal-Maċedonja u l-Georgia
ĠU L 204, 5.8.2017, pp. 82–89
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 06/03/2021: This act has been changed. Current consolidated version:
29/06/2020
|
5.8.2017 |
MT |
Il-Ġurnal Uffiċjali tal-Unjoni Ewropea |
L 204/82 |
DEĊIŻJONI TAL-KUNSILL (PESK) 2017/1424
tal-4 ta' Awwissu 2017
b'appoġġ għall-attivitajiet tal-OSKE biex jitnaqqas ir-riskju tat-traffikar illeċitu u l-akkumulazzjoni eċċessiva ta' armi ħfief u ta' kalibru żgħir u munizzjon konvenzjonali fl-Eks-Repubblika Jugoslava tal-Maċedonja u l-Georgia
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea, u b'mod partikolari l-Artikoli 28(1) u 31(1) tiegħu,
Billi:
|
(1) |
Fil-15 u s-16 ta' Diċembru 2005, il-Kunsill Ewropew adotta l-Istrateġija tal-UE għall-ġlieda kontra l-akkumulazzjoni u t-traffikar illeċiti ta' armi ħfief u ta' kalibru żgħir (“SALW”) u l-munizzjon tagħhom (“Strateġija SALW tal-UE”). L-Istrateġija SALW tal-UE enfasizzat li sabiex ikun minimizzat ir-riskju kkawżat mill-kummerċ illeċitu fi u l-akkumulazzjoni eċċessiva ta' SALW, jenħtieġ li tingħata attenzjoni partikolari lill-akkumulazzjoni enormi ta' SALW maħżuna f'xi partijiet tax-Xlokk u tal-Lvant tal-Ewropa, u l-modi ta' kif dawn jixxerdu f'żoni ta' konflitt. |
|
(2) |
L-Istrateġija SALW tal-UE tidentifika fost l-objettivi tagħha t-trawwim ta' multilateraliżmu effettiv sabiex jissawru mekkaniżmi, kemm internazzjonali, reġjonali jew fl-Unjoni u l-Istati Membri tagħha, kontra l-forniment u t-tixrid destabbilizzanti ta' SALW u l-munizzjon tagħhom. Fil-Pjan ta' Azzjoni tagħha, l-Istrateġija SALW tal-UE tirreferi b'mod partikolari għall-Organizzazzjoni għas-Sigurtà u l-Kooperazzjoni fl-Ewropa (OSKE) bħala waħda mill-organizzazzjonijiet reġjonali li jenħtieġ li tiġi żviluppata l-kooperazzjoni magħha. |
|
(3) |
L-Istrateġija SALW tal-UE fiha dispożizzjonijiet speċifiċi dwar l-appoġġ li għandu jingħata lill-azzjoni tal-OSKE fil-ġlieda kontra l-kummerċ illeċitu ta' SALW u l-munizzjon tagħhom u fil-qerda tal-ħażniet żejda tal-Istati parteċipanti tal-OSKE. B'mod partikolari, l-Unjoni qed tipparteċipa fl-isforzi biex jitnaqqsu l-ħażniet żejda ta' SALW u munizzjon konvenzjonali li fadal mill-Gwerra l-Bierda fil-Lvant tal-Ewropa permezz tal-kooperazzjoni mal-OSKE li ntalbet għall-għajnuna tagħha mill-Istati parteċipanti konċernati. |
|
(4) |
Fl-2000, l-Istati parteċipanti tal-OSKE adottaw id-Dokument tal-OSKE dwar SALW li permezz tiegħu huma ntrabtu li jikkumbattu t-traffikar illeċitu ta' SALW fl-aspetti kollha tiegħu. Dak id-Dokument jenfasizza wkoll l-effetti destabbilizzanti li l-akkumulazzjoni eċċessiva ta' SALW u l-ġestjoni u s-sigurtà mhux adegwati tal-ħażniet jista' jkollhom fuq is-sigurtà nazzjonali, reġjonali u internazzjonali. |
|
(5) |
Barra minn hekk, fl-2003 l-Istati parteċipanti tal-OSKE adottaw id-dokument tal-OSKE dwar il-Ħażniet ta' Munizzjon Konvenzjonali (SCA) u b'hekk irrikonoxxew ir-riskji għas-sigurtà u għas-sikurezza kkawżati mill-akkumulazzjoni eċċessiva ta' munizzjon konvenzjonali. Sabiex jiġu indirizzati dawn ir-riskji, huma ddeċidew li jistabbilixxu proċedura prattika għall-għoti ta' għajnuna għall-qerda ta' ħażniet żejda ta' munizzjon konvenzjonali u/jew it-titjib tal-prattiki tal-ġestjoni u s-sigurtà tal-ħażniet. |
|
(6) |
Id-Dokumenti tal-OSKE dwar SALW u SCA jidentifikaw il-qerda bħala l-metodu ppreferit għar-rimi ta' SALW u munizzjon konvenzjonali żejda; |
|
(7) |
Fl-2016, l-Eks-Repubblika Jugoslava tal-Maċedonja u l-Georgia indirizzaw lill-Istati parteċipanti tal-OSKE fil-Forum għall-Kooperazzjoni fis-Sigurtà tal-OSKE b'talba għall-għajnuna fil-qafas tad-Dokumenti tal-OSKE dwar SALW u SCA għat-titjib tas-sigurtà ta' SALW u l-qerda ta' munizzjon konvenzjonali. |
|
(8) |
L-Unjoni preċedentement kienet appoġġat l-attivitajiet tal-OSKE permezz tad-Deċiżjoni tal-Kunsill 2012/662/PESK (1). Id-Deċiżjoni, li l-implimentazzjoni tagħha ntemmet fl-2015, iffinanzjat attivitajiet bħall-qerda ta' SALW żejda, it-titjib tas-sigurtà u l-ġestjoni tal-ħażniet tal-armi, l-iżvilupp ta' għodod xierqa għaż-żamma ta' reġistri tal-armi, u t-tisħiħ tal-kontrolli fuq it-trasferimenti ta' armi konvenzjonali. |
|
(9) |
Fid-19 ta' Diċembru 2016 il-Kunsill adotta d-Deċiżjoni (PESK) 2016/2356 (2). Il-fażi l-ġdida tal-proġett taċ-Ċentru tax-Xlokk u tal-Lvant tal-Ewropa għall-Kontroll tal-Armi Ħfief u ta' Kalibru Żgħir (“SEESAC”) ser tibni fuq il-kisbiet fil-qafas tad-Deċiżjoni tal-Kunsill 2013/730/PESK (3) filwaqt li żżomm l-approċċ olistiku għall-indirizzar tat-theddida li SALW joħolqu fir-reġjun. B'mod partikolari, il-proġett ser jaħdem biex ikun hemm koordinazzjoni mal-inizjattivi fl-Eks-Repubblika Jugoslava tal-Maċedonja li jipprovaw iżidu l-kapaċitajiet tal-pulizija fil-ġestjoni tal-ħażniet, |
ADOTTA DIN ID-DEĊIŻJONI:
Artikolu 1
1. Għall-fini tal-promozzjoni tal-paċi u s-sigurtà, u tal-multilateraliżmu effettiv fil-livelli globali u reġjonali, l-Unjoni għandha taħdem għall-objettivi li ġejjin:
|
— |
it-tisħiħ tal-paċi u s-sigurtà fil-viċinat tal-Unjoni, billi tnaqqas it-theddida li t-traffikar illeċitu u l-akkumulazzjoni eċċessiva ta' SALW u munizzjon konvenzjonali joħolqu fir-reġjun tal-OSKE; |
|
— |
l-appoġġ għal multilateraliżmu effettiv fil-livell reġjonali billi tappoġġa l-azzjoni tal-OSKE għall-prevenzjoni tat-traffikar illeċitu u l-akkumulazzjoni eċċessiva ta' SALW u munizzjon konvenzjonali. |
2. Sabiex jinkiseb l-objettiv imsemmi fil-paragrafu 1, l-Unjoni għandha tieħu l-miżuri li ġejjin:
|
— |
tnaqqis tar-riskju tal-proliferazzjoni illeċita ta' SALW fl-Eks-Repubblika Jugoslava tal-Maċedonja; |
|
— |
rimi ta' munizzjon żejjed fil-Georgia. |
Deskrizzjoni ddettaljata tal-proġetti msemmijin f'dan il-paragrafu tidher fl-Anness.
Artikolu 2
1. Ir-Rappreżentant Għoli tal-Unjoni għall-Affarijiet Barranin u l-Politika ta' Sigurtà (“RGħ”) għandu jkun responsabbli għall-implimentazzjoni ta' din id-Deċiżjoni.
2. L-implimentazzjoni teknika tal-proġetti msemmijin fl-Artikolu 1(2) għandha titwettaq mis-Segretarjat tal-OSKE.
3. Is-Segretarjat tal-OSKE għandu jwettaq il-kompitu tiegħu taħt ir-responsabbiltà tar-RGħ. Għal dan il-għan, ir-RGħ għandu jidħol fl-arranġamenti meħtieġa mas-Segretarjat tal-OSKE.
Artikolu 3
1. L-ammont ta' referenza finanzjarja għall-implimentazzjoni tal-proġett imsemmija fl-Artikolu 1(2) għandu jkun ta' EUR 1 353 878,52.
2. In-nefqa ffinanzjata mill-ammont stipulat fil-paragrafu 1 għandha tkun amministrata f'konformità mal-proċeduri u r-regoli applikabbli għall-baġit ġenerali tal-Unjoni.
3. Il-Kummissjoni għandha tissorvelja l-amministrazzjoni xierqa tan-nefqa msemmija fil-paragrafu 1. Għal dan il-għan, hija għandha tikkonkludi ftehim ta' finanzjament mas-Segretarjat tal-OSKE. Il-ftehim ta' finanzjament għandu jistipula li s-Segretarjat tal-OSKE jrid jiżgura l-viżibbiltà tal-kontribuzzjoni tal-Unjoni, adatta għad-daqs tagħha.
4. Il-Kummissjoni għandha tagħmel ħilitha biex tikkonkludi l-ftehim ta' finanzjament imsemmi fil-paragrafu 3 malajr kemm jista' jkun wara d-dħul fis-seħħ ta' din id-Deċiżjoni. Hija għandha tinforma lill-Kunsill bi kwalunkwe diffikultà f'dak il-proċess u bid-data tal-konklużjoni tal-ftehim ta' finanzjament.
Artikolu 4
Ir-RGħ għandu jirrapporta lill-Kunsill dwar l-implimentazzjoni ta' din id-Deċiżjoni abbażi ta' rapporti regolari mħejjija mis-Segretarjat tal-OSKE. Dawn ir-rapporti għandhom jiffurmaw il-bażi għall-evalwazzjoni mwettqa mill-Kunsill. Il-Kummissjoni għandha tirrapporta dwar l-aspetti finanzjarji tal-implimentazzjoni tal-proġetti msemmija fl-Artikolu 1(2).
Artikolu 5
1. Din id-Deċiżjoni għandha tidħol fis-seħħ fid-data tal-adozzjoni tagħha.
2. Din id-Deċiżjoni għandha tiskadi 36 xahar wara d-data tal-konklużjoni tal-ftehim ta' finanzjament imsemmi fl-Artikolu 3(3). Madankollu, din id-Deċiżjoni għandha tiskadi sitt xhur wara d-data tad-dħul fis-seħħ tagħha jekk dak il-ftehim ta' finanzjament ma jkunx ġie konkluż sa dak iż-żmien.
Magħmul fi Brussell, l-4 ta' Awwissu 2017.
Għall-Kunsill
Il-President
M. MAASIKAS
(1) Deċiżjoni tal-Kunsill 2012/662/PESK tal-25 ta' Ottubru 2012 b'appoġġ għall-attivitajiet biex jitnaqqas ir-riskju tal-kummerċ illeċitu fi, u l-akkumulazzjoni eċċessiva ta' Armi Ħfief u ta' Kalibru Żgħir fir-reġjun kopert mill-Organizzazzjoni għas-Sigurtà u l-Kooperazzjoni fl-Ewropa (OSKE) (ĠU L 297, 26.10.2012, p. 29).
(2) Deċiżjoni tal-Kunsill (PESK) 2016/2356 tad-19 ta' Diċembru 2016 b'appoġġ għall-attivitajiet tas-SEESAC rigward id-diżarm u l-kontroll tal-armi fix-Xlokk tal-Ewropa fil-qafas tal-Istrateġija tal-UE għall-ġlieda kontra l-akkumulazzjoni u t-traffikar illeċiti ta' SALW u l-munizzjon tagħhom (ĠU L 348, 21.12.2016, p. 60).
(3) Deċiżjoni tal-Kunsill 2013/730/PESK tad-9 ta' Diċembru 2013 b'appoġġ għall-attivitajiet ta' SEESAC ta' diżarm u ta' kontroll ta' armi fix-Xlokk tal-Ewropa fil-qafas tal-Istrateġija tal-UE għall-Ġlieda kontra l-Akkumulazzjoni u t-Traffikar Illeċiti ta' SALW u l-Munizzjon tagħhom (ĠU L 332, 11.12.2013, p. 19).
ANNESS
1. Sfond
Fl-2016, żewġ Stati parteċipanti tal-OSKE — l-Eks-Repubblika Jugoslava tal-Maċedonja u l-Georgia — talbu appoġġ għal attivitajiet marbutin maż-żieda ta' sigurtà għall-armi ħfief u ta' kalibru żgħir (SALW) u r-rimi ta' munizzjon konvenzjonali żejjed.
Fl-2016, l-Eks-Repubblika Jugoslava tal-Maċedonja ddikjarat li kienet teħtieġ għajnuna biex tiżdied is-sigurtà fiżika u dik tal-IT ta' kmamar ta' ħżin ta' SALW u munizzjon fi 15-il għassa tal-pulizija fil-fruntiera (“border police stations” — BPS) u f'ċentru reġjonali wieħed għall-affarijiet tal-fruntieri (“regional centre for border affairs” — RCBA). Barra minn hekk, it-talba identifikat il-ħtieġa li tiżdied il-kapaċità tal-Ministeru għall-Affarijiet Interni (MoIA) billi jittejbu l-proċeduri ta' ġestjoni tal-ħażniet ta' armi tas-servizz. Il-Missjoni tal-OSKE fi Skopje (OMSk) tat appoġġ kontinwu lill-MoIA fil-qasam tas-sigurtà billi ffaċilitat eżerċizzji konġunti transkonfinali u organizzat taħriġ dwar il-ġlieda kontra l-kriminalità organizzata, l-osservazzjoni tal-fruntieri ħodor, it-twettiq ta' rikonoxximent tal-wiċċ, u t-tfassil ta' profili. Filwaqt li bena fuq il-kooperazzjoni eżistenti, il-MoIA identifika l-OMSk bħala sieħeb għall-implimentazzjoni ta' aġġornamenti tas-sigurtà u l-bini tal-kapaċitajiet.
Wara l-Gwerra l-Bierda, il-Ministeru għad-Difiża tal-Georgia kien fadallu ħażniet sostanzjali ta' munizzjon konvenzjonali tal-era Sovjetika. Xi wħud minn dawn il-ħażniet tnaqqsu bħala parti minn sforzi nazzjonali, kif ukoll proġetti ta' għajnuna internazzjonali u bilaterali. Għaldaqstant, mill-2005 sal-2013 tlestew tliet proġetti għar-rimi ta' rokits iggwidati u mhux iggwidati bl-appoġġ tal-Aġenzija ta' Manutenzjoni u Provvista tan-NATO u d-Dipartiment tal-Istat tal-Istati Uniti. Fl-2007, l-2011 u l-2012, l-OSKE u l-Programm ta' Żvilupp tan-Nazzjonijiet Uniti (UNDP) appoġġaw ukoll proġetti għall-użu, l-ipproċessar u r-rimi tal-ammonti żejda li kien fadal ta' rokits iggwidati u mhux iggwidati tal-inġenji tal-ajru u l-komponenti perikolużi tagħhom. Barra minn hekk, l-OSKE tat għajnuna għar-rimi ta' munizzjonijiet dispersivi, bombi u balal ta' artillerija mill-2012 sal-2016.
Fl-2016, il-Georgia ppreżentat talba ġdida għal għajnuna lill-Forum għall-Kooperazzjoni fis-Sigurtà (FSC) tal-OSKE għar-rimi ta' 461 tunnellatta ta' munizzjon konvenzjonali żejjed, li jinkludi 121 tunnellata ta' balal ta' artillerija u 340 tunnellata ta' bombi. Għalkemm l-OSKE bħalissa ma għandhiex preżenza fuq il-post fil-Georgia, l-Organizzazzjoni għandha rekord ta' suċċess fl-implimentazzjoni ta' proġetti ta' rimi ta' munizzjon fil-pajjiż. L-OSKE u l-Georgia ħolqu qafas għall-kooperazzjoni bl-iżvilupp ta' programm bl-isem “Programme for Demilitarisation Works of Outdated, Written off and Obsolete Ammunition Existing at the Military Bases in Georgia”. F'April 2014, is-Segretarjat tal-OSKE u l-Georgia ffirmaw Memorandum ta' Qbil (MtQ), li jirregola dettalji addizzjonali dwar l-implimentazzjoni tal-Programm.
Bħala tkomplija tal-implimentazzjoni b'suċċess tad-Deċiżjoni 2012/662/PESK, il-proġetti attwali jikkonċentraw fuq it-tisħiħ ulterjuri tal-kontroll nazzjonali fuq SALW u munizzjon u l-għajnuna lill-Eks-Repubblika Jugoslava tal-Maċedonja u l-Georgia biex dawn iħarsu l-impenji internazzjonali tagħhom f'dan il-qasam.
2. Objettiv ġenerali
Biex tissaħħaħ is-sigurtà fir-reġjuni tax-Xlokk tal-Ewropa u l-Kawkasu tan-Nofsinhar billi titnaqqas it-theddida mill-proliferazzjoni mhux kontrollata ta' SALW u munizzjon konvenzjonali.
3. Deskrizzjoni tal-proġetti
Il-proġetti jibnu fuq l-attivitajiet tal-OSKE fl-imgħoddi u fuq dawk li għaddejjin bħalissa biex inaqqsu l-ħażniet żejda, itejbu s-sigurtà, u jipprevjenu s-serq ta' SALW u munizzjon, u b'hekk jagħtu kontribut għall-isforzi kontra t-terroriżmu billi jagħmlu possibbli li l-Istati parteċipanti tal-OSKE jindirizzaw wieħed mis-sorsi ta' provvista lin-netwerks terroristiċi.
3.1 Proġett 1: Tnaqqis tar-riskju ta' proliferazzjoni illeċita ta' SALW fl-Eks-Repubblika Jugoslava tal-Maċedonja
3.1.1 Objettiv
Li tiżdied il-kapaċità tal-MoIA tal-Eks-Repubblika Jugoslava tal-Maċedonja biex iżomm sikuri l-ħażniet ta' SALW u munizzjon biex b'hekk jitnaqqas ir-riskju tal-proliferazzjoni illeċita tagħhom, inkluż għal skopijiet terroristiċi.
3.1.2 Deskrizzjoni
Fit-talba għall-għajnuna lill-OSKE, l-MoIA identifika l-vulnerabbiltà tal-kmamar ta' ħżin ta' SALW u munizzjon fi 15-il għassa tal-pulizija fil-fruntiera u f'ċentru reġjonali wieħed għall-affarijiet tal-fruntieri. L-attakk kontra l-għassa tal-pulizija fil-fruntiera qrib Gosince f'April 2015, li rriżulta fis-serq ta' armi u munizzjon, wassal għal eżami komprensiv tas-sigurtà fil-kmamar ta' ħżin ta' SALW fl-għases tal-pulizija fil-fruntiera. Bi tweġiba għat-talba għall-għajnuna, il-Missjoni tal-OSKE fi Skopje wettqet valutazzjoni tal-ħtiġijiet, li kienet tinkludi żjarat fil-15-il għassa tal-pulizija fil-fruntiera kollha u fiċ-ċentru reġjonali għall-affarijiet tal-fruntieri. L-OSKE identifikat għadd ta' sfidi marbutin mas-sigurtà ta' SALW f'dawn l-għases, fosthom il-ħtieġa li tittejjeb is-sigurtà fiżika tal-kmamar ta' ħżin eżistenti, li jissaħħu l-proċeduri ta' żamma ta' reġistri, li tiżdied il-kapaċità tal-persunal għall-ġestjoni ta' SALW tas-servizz u kkonfiskati, u li tiżdied il-ħila tal-MoIA li jipprevjeni l-proliferazzjoni ta' SALW mill-ħażniet tiegħu.
3.1.3 Riżultati mistennija
B'din l-attività l-Missjoni tal-OSKE fi Skopje (OMSk) qed tkompli bl-isforzi tagħha biex tibni l-kapaċitajiet tal-Ministeru għall-Affarijiet Interni fl-oqsma tal-ġlieda kontra l-kriminalità organizzata u t-terroriżmu. Dan il-proġett ser jikkontribwixxi għall-kisba tar-riżultati speċifiċi li ġejjin:
|
|
Riżultat 1: Aktar sigurtà fiżika u tal-IT għall-ħażniet ta' SALW u munizzjon fi 15-il għassa tal-pulizija fil-fruntiera u ċentru reġjonali wieħed għall-affarijiet tal-fruntieri Indikaturi:
|
|
|
Riżultat 2: Kapaċità miżjuda tal-MoIA biex jimplimenta l-ġestjoni ta' ħażniet ta' SALW. Indikaturi:
|
3.1.4 Tim għall-Implimentazzjoni tal-Proġett
It-tim għall-implimentazzjoni tal-proġett (PIT) ser ikun jikkonsisti minn Koordinatur tal-Proġett tal-Infurzar tal-Liġi (LEPC) kif ukoll assistent tal-proġett. Il-PIT ser ikun responsabbli għall-ġestjoni taċ-ċiklu kollu tal-proġett, inkluż l-istabbiliment tal-oqfsa legali, ta' ġestjoni, ta' monitoraġġ u ta' verifika, għall-kisba effettiva tar-riżultati u r-rappurtar.tal-proġett.
3.1.5 Attivitajiet
3.1.5.1 Dokumentazzjoni ta' offerti
Id-dokumentazzjoni għall-offerta pubblika għal titjib fis-sigurtà ta' 15-il BPS u RCBA wieħed ser tkun ibbażata fuq l-ispeċifikazzjonijiet tad-disinn tal-kostruzzjoni, kif mogħtija fir-regolamenti nazzjonali u l-aħjar prattiki tal-OSKE għall-ħażniet ta' SALW u ta' munizzjon konvenzjonali. L-OMSk ser takkwista s-servizzi ta' kumpannija biex tiżviluppa l-ispeċifikazzjonijiet tad-disinn tal-kostruzzjoni. Il-fornitur magħżul ser jelabora u jagħti lill-OMSk u lill-MoIA d-dokumentazzjoni rilevanti kollha tad-disinn tal-kostruzzjoni, waqt li jiżgura li din tkun ikkoordinata u approvata mill-awtoritajiet regolatorji nazzjonali kollha u konformi mar-regoli u l-proċeduri tal-OSKE.
3.1.5.2 Titjib fis-sigurtà
L-OMSk ser tiżviluppa d-dokumentazzjoni meħtieġa għal offerti kompetittivi miftuħa u tmexxi t-talba għall-offerti għax-xogħlijiet ta' kostruzzjoni u l-forniment ta' tagħmir tas-sigurtà tal-IT f'konformità mar-regoli u r-regolamenti tal-OSKE. Il-kuntrattur magħżul ser jimplimenta l-miżuri ta' sigurtà f'konformità mad-disinn tal-kostruzzjoni approvat. Il-PIT ser jorganizza l-monitoraġġ u s-superviżjoni teknika tal-implimentazzjoni tal-miżuri ta' sigurtà u l-verifika tal-konformità tagħhom mar-rekwiżiti tekniċi rilevanti.
3.1.5.3 L-iżvilupp tal-SOPs fil-ġestjoni ta' armi u munizzjoni tas-servizz
Il-PIT ser jistabbilixxi grupp ta' ħidma magħmul minn rappreżentanti tal-OSKE u d-dipartimenti rilevanti fi ħdan il-MoIA, inklużi l-Punt Fokali SALW, Unità għall-Esplojtazzjoni, Kriptoloġija u CCTV, Dipartiment tal-Ġestjoni tal-Kostruzzjoni, Dipartiment Legali, Settur għall-Affarijiet tal-Fruntiera u l-Migrazzjoni, u l-Uffiċċju għas-Sigurtà Pubblika. Il-grupp ta' ħidma ser ikollu erba' laqgħat għall-iżvilupp tal-SOPs u ser ikunu appoġġat minn espert nazzjonali u ieħor internazzjonali. L-SOPs ser jipprovdu pariri u gwida lill-persunal tal-MoIA dwar kif għandhom jużaw l-għodod tekniċi u tal-IT ġodda b'mod standardizzat.
3.1.5.4 Taħriġ
Il-PIT ser jiġġestixxi l-iżvilupp ta' manwal tat-taħriġ dwar l-SOPs il-ġodda, inkluż ir-reklutaġġ ta' espert għall-iżvilupp, l-istampar u t-tqassim tiegħu lil persunal rilevanti tal-MoIA, kif ukoll it-traduzzjoni għall-Ingliż. Kopji bl-Ingliż ser jitqassmu lil Operazzjonijiet fuq il-Post oħra tal-OSKE kif ukoll lis-Segretarjat tal-OSKE sabiex jiġu pprovduti viżibbiltà u materjal għal referenza futura.
Il-PIT ser jorganizza l-kors għat-taħriġ ta' min iħarreġ għal 30 rappreżentant nominat minn erba' Ċentri Reġjonali għall-Affarijiet tal-Fruntiera u tmien Setturi għall-Affarijiet Interni, bil-għan li jiżdied l-għarfien tagħhom tal-użu tas-sistemi l-ġodda għas-sigurtà u l-IT fil-kmamar għall-ħażna rinnovati. Sussegwentement, dawk li jtemmu l-kors ser jagħtu taħriġ fil-pajjiż kollu fiċ-ċentri reġjonali u s-setturi rispettivi tagħhom, biex b'hekk tiġi żgurata sostenibbiltà tal-attività.
3.1.5.5 Viżibbiltà tal-Unjoni
L-għan tal-attivitajiet ta' viżibbiltà ser ikun li jippubbliċizzaw l-appoġġ tal-Unjoni billi jitnaqqsu tar-riskji tal-proliferazzjoni ta' armi u munizzjon permezz tal-attivitajiet implimentati mill-OSKE. L-avvenimenti ta' viżibbiltà ser jiffokaw fuq is-sensibilizzazzjoni fost udjenzi magħżula kif ukoll fost il-pubbliku ġenerali dwar l-implimentazzjoni ta' attivitajiet speċifiċi fi ħdan il-proġett, l-impatt tagħhom fuq it-tnaqqis tat-theddida minn proliferazzjoni mhux ikkontrollata, u l-istabbiltà ġenerali tar-reġjun. L-attivitajiet ta' viżibbiltà ser isegwu pjan għall-viżibbiltà tal-proġett. Huwa previst li jiġu żviluppati diversi tipi ta' materjali ta' viżibbiltà sabiex ir-riżultati tal-proġett jiġu ppreżentati lill-udjenza fil-mira. Huma ser jinkludu roll-ups, strixxuni, fuljetti, materjal fotografiku, videos kif ukoll il-promozzjoni tar-riżultati fl-avvenimenti ta' viżibbiltà.
3.2 Proġett 2: Rimi ta' munizzjon żejjed fil-Georgia
3.2.1 Objettiv
L-appoġġ għall-proċess ta' titjib tal-ġestjoni tal-ħażniet tal-munizzjon fil-Georgia permezz tar-rimi ta' 461 tunnellata ta' munizzjon żejjed.
3.2.2 Deskrizzjoni
Fl-2016, il-Georgia talbet assistenza għar-rimi ta' 461 tunnellata ta' ħażniet żejda ta' munizzjon konvenzjonali f'konformità mal-“Programme for Demilitarisation Works of Outdated, Written off and Obsolete Ammunitions Existing at the Military Bases in Georgia” (“il-Programm”). Bħala segwitu għall-proġetti tal-OSKE implimentati fl-2007, 2011–2012, u 2014–2016, is-Segretarjat tal-OSKE ser jappoġġa lill-Georgia fl-isforzi tagħha biex iżżid il-kapaċità tagħha għall-ġestjoni ta' ħażniet ta' munizzjon.
3.2.3 Riżultati mistennija
Riżultat 1: Tnaqqis ta' ħażniet żejda disponibbli ta' munizzjon konvenzjonali b'mod sikur u mhux dannuż għall-ambjent.
Indikaturi:
|
— |
Rimi ta' 461 tunnellata ta' munizzjon żejjed. |
|
— |
Iffirmar tal-ftehim ta' sħubija għall-implimentazzjoni. |
|
— |
Reklutaġġ tal-persunal tal-proġett. |
|
— |
Żvilupp tal-Programm ta' Assigurazzjoni tal-Kwalità. |
|
— |
Rapporti ta' progress trimestrali. |
|
— |
Rapporti ambjentali trimestrali. |
3.2.4 Tim għall-Implimentazzjoni tal-Proġett
It-tim għall-implimentazzjoni tal-proġett (PIT) ser jikkonsisti minn amministratur tal-proġett, assistent għall-proġett, konsulent lokali wieħed u żewġ konsulenti internazzjonali. L-amministratur tal-proġett ser ikun uffiċjal tal-OSKE taħt pożizzjoni eżistenti b'kuntratt. L-assistent għall-proġett, il-konsulent lokali u dawk internazzjonali ser jingħataw kuntratt f'konformità mar-regoli u r-regolamenti eżistenti tal-OSKE. Il-PIT ser ikun responsabbli għall-istabbiliment ta' oqfsa legali, ta' ġestjoni, monitoraġġ u verifika għall-kisba effettiva tar-riżultati tal-proġett u l-eżekuzzjoni ta' Programm ta' Assigurazzjoni tal-Kwalità (QAP).
3.2.5 Sieħeb tal-Implimentazzjoni
Il-Georgia fdat l-implimentazzjoni tal-attivitajiet taħt il-Programm lic-Ċentru Xjentifiku-Tekniku Militari tal-Istat (“DELTA”). Fil-Georgia, DELTA għandu drittijiet esklużivi għad-demilitarizzazzjoni tal-munizzjon u l-attivitajiet ta' qerda ta' munizzjon, li ngħataw bid-Digriet Nru 321 tal-Ministru għad-Difiża tal-Georgia fl-2005. Minn dak iż-żmien 'l hawn, DELTA kien is-sieħeb tal-implimentazzjoni sottokuntrattat mill-organizzazzjonijiet internazzjonali kollha parteċipanti fl-appoġġ għall-attivitajiet ta' rimi, inkluż in-NATO, l-UNDP u l-OSKE. Għalhekk, fl-2016 DELTA lesta proġett, bl-appoġġ tal-OSKE, għar-rimi ta' 620 tunnellata ta' rokits tal-inġenji tal-ajru, bombi u balal tal-artillerija.
3.2.6 Attivitajiet
3.2.6.1 Rimi ta' munizzjon żejjed
DELTA wettaq riċerka dwar il-munizzjon li għandu jintrema u żviluppa teknoloġiji, struzzjonijiet u dokumentazzjoni għall-proċess tar-rimi. Barra minn hekk, DELTA beda l-proċess għat-trasport ta' 340 tunnellata ta' bombi żejda mill-post tal-ħażna tagħhom lejn il-faċilità tar-rimi ta' Phonichala, ipprovda taħriġ lill-persunal tal-proġett u beda l-proċess ta' żarmar. Il-komponenti splussivi ser jintremew b'detonazzjoni f'ħofra miftuħa fil-faċilità tal-isparar ta' Vaziani. Ir-rimi ta' 121 tunnellata ta' balal tal-artillerija ser issir fil-faċilità ta' Dedoplitskaro. Delta qed jagħmel monitoraġġ tal-effetti ambjentali tal-operazzjonijiet ta' rimi billi jwettaq testijiet ta' kull xahar.
3.2.6.2 Viżibbiltà tal-Unjoni
L-attivitajiet ta' viżibbiltà ser jiffokaw fuq is-sensibilizzazzjoni fost udjenzi magħżula kif ukoll fost il-pubbliku ġenerali dwar l-implimentazzjoni tal-operazzjonijiet ta' rimi tal-munizzjon u l-impatt tagħhom għaż-żieda tal-kapaċità tal-ġestjoni tal-ħażniet fil-Georgia.
4. Benefiċjarji
Il-benefiċjarji diretti tal-proġetti ser ikunu tal-istituzzjonijiet nazzjonali tal-Eks-Repubblika Jugoslava tal-Maċedonja u l-Georgia responsabbli għal SALW is-sigurtà u l-ġestjoni tal-munizzjon. L-attivitajiet tal-proġett huma konformi mal-istrateġiji nazzjonali dwar SALW u munizzjon u huma allinjati mal-impenn internazzjonali taż-żewġ pajjiżi. Il-popolazzjoni taż-żewġ pajjiżi, il-popolazzjoni fix-Xlokk tal-Ewropa, fil-Kawkasu tan-Nofsinhar u fl-Unjoni, li huma f'riskju tal-proliferazzjoni ta' SALW u munizzjon, ukoll ser jibbenefikaw indirettament mill-attivitajiet tal-proġett.
5. Tul ta' żmien
It-tul ta' żmien totali tal-proġetti hu stmat li jkun ta' 36 xahar.
6. Entità tal-Implimentazzjoni Teknika
L-implimentazzjoni teknika ġenerali ta' din id-Deċiżjoni ser tkun fdata lis-Segretarjat tal-OSKE.
7. Kumitat ta' Tmexxija
Il-Kumitat ta' Tmexxija għal dan il-proġett ser ikun magħmul minn rappreżentant tar-Rappreżentant Għoli u mill-entità ta' implimentazzjoni msemmija fil-paragrafu 6 ta' dan l-Anness. Il-Kumitat ta' Tmexxija ser jeżamina l-implimentazzjoni ta' din id-Deċiżjoni tal-Kunsill regolarment, tal-anqas darba kull sitt xhur, inkluż bl-użu ta' mezzi elettroniċi ta' komunikazzjoni.
8. Rappurtar
Is-Segretarjat tal-OSKE ser jipprovdi rapporti narrattivi fuq bażi trimestrali biex jiġi rivedut il-progress lejn it-tlestija tar-riżultati tal-proġetti. Is-Segretarjat tal-OSKE ser jippreżenta rapporti narrattivi u finanzjarji annwali u rapport finali fi żmien sitt xhur wara tmiem il-perijodu ta' implimentazzjoni.
9. Spiża totali stmata tal-proġetti u l-kontribut finanzjarju tal-Unjoni
L-istima tal-ispiża totali tal-programm hija EUR 1 353 878,52.