(1)

Il-manifattur BMW AG (“l-Applikant”) ressaq applikazzjoni għall-approvazzjoni tal-funzjoni tal-engine idle coasting bħala ekoinnovazzjoni fit-23 ta' Ġunju 2016. Il-kompletezza ta' dik l-applikazzjoni ġiet ivvalutata skont l-Artikolu 4 tar-Regolament ta' Implimentazzjoni (UE) Nru 725/2011. Instab li l-applikazzjoni kienet sħiħa.

(2)

L-applikazzjoni ġiet ivvalutata skont l-Artikolu 12 tar-Regolament (KE) Nru 443/2009, skont ir-Regolament ta' Implimentazzjoni tal-Kummissjoni (UE) Nru 725/2011 u skont il-Linji Gwida Tekniċi għat-tħejjija tal-applikazzjonijiet għall-approvazzjoni ta' teknoloġiji innovattivi skont ir-Regolament (KE) Nru 443/2009 (3). Minħabba l-kumplessità tat-teknoloġija, il-perjodu ta' valutazzjoni ġie estiż b'ħames xhur b'konformità mal-Artikolu 10(4) tar-Regolament ta' Implimentazzjoni (UE) Nru 725/2011, jiġifieri sat-23 ta' Awwissu 2017.

(3)

L-applikazzjoni tirreferi għall-funzjoni tal-BMW AG “engine idle coasting” li tintuża fil-vetturi BMW M1 b'sistema ta' mototrażmissjoni konvenzjonali kif ukoll trażmissjoni awtomatika. Il-prinċipju bażiku ta' din it-teknoloġija innovattiva huwa li magna tal-kombusjoni tiġi skonnessa mis-sistema tal-mototrażmissjoni u b'hekk tiġi evitata d-deċellerazzjoni permezz tal-ibbrejkjar tal-magna. Il-funzjoni għandha tiġi attivata awtomatikament fil-modalità ta' sewqan predominanti, li hija l-modalità magħżula awtomatikament meta tinxtegħel il-vettura. B'hekk il-coasting jintuża biex tiżdied id-distanza li tibqa' miexja l-vettura meta ma jkunx hemm propulsjoni u ma jkunx meħtieġ tnaqqis bil-mod tal-veloċità. Waqt il-“coasting”, l-enerġija kinetika u potenzjali tal-vettura tintuża direttament biex tingħeleb ir-reżistenza tas-sewqan u, bħala konsegwenza, sabiex jitnaqqas il-konsum tal-fjuwil. Biex tinkiseb deċellerazzjoni inqas b'saħħitha, il-magna tiġi skonnessa mis-sistema ta' motopropulsjoni billi jinfetaħ klaċċ. Dan isir b'mod awtomatiku minn unità ta' kontroll tat-trażmissjoni awtomatika. Matul dawn il-fażijiet tal-coasting il-magna tkun qed taħdem fuq idle (“engine idle coasting”).

(4)

Permezz tad-Deċiżjoni (UE) 2015/1132 (4), il-Kummissjoni approvat applikazzjoni minn Porsche AG li tikkonċerna l-funzjoni tal-coasting maħsuba għall-użu f'vetturi Porsche fis-segment S M1 (tat-tip sport coupé) biss. L-applikazzjoni tal-BMW AG li tirrigwarda funzjoni “engine idle coasting” hija maħsuba għall-użu fil-vetturi BMW M1 b'sistema ta' mototrażmissjoni konvenzjonali kif ukoll trażmissjoni awtomatika.

(5)

L-applikant ipprovda metodoloġija għall-ittestjar tat-tnaqqis tas-CO2 mill-użu tal-funzjoni tal-engine idle coasting, inkluż għaċ-ċiklu tat-test NEDC modifikat sabiex il-karozza tkun tista' tibqa' miexja mingħajr ma tkun konnessa mal-magna. Biex tqabbel vettura mgħammra bil-funzjoni tal-engine idle coasting ma' vettura ta' referenza meta l-funzjoni tal-coasting ma tkunx ġiet installata, fejn il-funzjoni ma tkunx disponibbli fil-modalità ta' sewqan predominanti inkella tkun diżattivata għall-finijiet tal-ittestjar, iż-żewġ vetturi għandhom jiġu ttestjati fuq l-istess taċ-ċiklu tat-test NEDC modifikat. Madankollu, fid-dawl tad-diffikultajiet li kellha l-vettura ta' referenza biex issegwi l-ispeedtrace taċ-ċiklu tat-test NEDC modifikat, it-test tal-vettura ta' referenza isir fuq l-NEDC standard f'kundizzjonijiet standard ta' startjar sħun, filwaqt li l-kondizzjonijiet modifikati jiġu kkunsidrati permezz ta' fattur ta' konverżjoni li jiġi applikat għall-kalkolu tal-iffrankar ta' CO2. Id-determinazzjoni tal-fattur ta' konverżjoni huwa speċifiku għall-vettura u huwa relatat prinċipalment mal-konfigurazzjoni tal-hardware tas-sistema ta' mototrażmissjoni. Abbażi ta' studji preċedenti, il-fattur ta' konverżjoni jidher li jaqa' fil-medda bejn 0,96 u 0,99. L-applikant talab li l-fattur ta' konverżjoni jkun stabbilit fil-livell ta' 0,98. Il-Kummissjoni tqis madankollu li l-applikant ma pprovdiex biżżejjed evidenza biex jiġi ġġustifikat fattur ta' konverżjoni ogħla minn 0,96. Fid-dawl ta' dan, huwa kkunsidrat xieraq li jinżamm fattur ta' konverżjoni fin-naħa l-baxxa tal-medda identifikata, jiġifieri l-valur ta' 0,96, skont il-fattur ta' konverżjoni definit fid-Deċiżjoni ta' Implimentazzjoni (UE) 2015/1132.

(6)

Element ewlieni fid-determinazzjoni tal-iffrankar ta' CO2 huwa l-proporzjon tad-distanza li tivvjaġġa vettura li fih tkun attivata l-funzjoni tal-coasting, filwaqt li jitqies li l-funzjoni tal-coasting tista' tiġi diżattivata f'modalitajiet ta' sewqan differenti mill-modalità ta' sewqan dominanti. L-applikant ippropona fattur tal-użu ta' 0,7 li huwa marbut mad-distanza osservata koperta f'kundizzjonijiet ta' coasting f'testijiet tas-sewqan fid-dinja reali meta mqabbla mad-distanza tal-coasting f'kundizzjonijiet modifikati tan-NEDC. Madankollu, il-fattur tal-użu propost irriżulta bħala valur fl-aqwa każ mingħajr analiżi ta' sostenn robusta. Abbażi ta' analiżi addizzjonali u fid-dawl tal-analiżi magħmula għall-finijiet tad-Deċiżjoni ta' Implimentazzjoni (UE) 2015/1132, huwa xieraq li jitqies fattur tal-użu aktar konservattiv ugwali għal 0,62.

(7)

L-istudju tal-każ imwettaq mill-BMW AG, ikkonċerna żewġ vetturi li kellhom it-teknoloġija tal-engine idle coasting attiva sa 40 km/h. Fi-dawl tal-produzzjoni fil-futur qrib ta' mudelli tal-BMW li kapaċi jużaw il-funzjoni tal-coasting sa 15 km/h, l-applikant ippropona metodu analitiku biex l-ambitu jiġi estiż biex ikopri wkoll dan il-perjodu itwal li fih tkun attivata l-funzjoni. Madankollu, l-influwenza ta' perjodu ta' coasting itwal fuq il-fattur tal-użu ma ġietx analizzata mill-applikant. Għalhekk, huwa xieraq li l-funzjoni tal-coasting titqies bħala attiva għall-inqas sa 40 km/h.

(8)

L-informazzjoni pprovduta fl-applikazzjoni turi li ġew issodisfati l-kundizzjonijiet definiti fl-Artikoli 2 u 4 tar-Regolament ta' Implimentazzjoni (UE) Nru 725/2011 u li l-kriterji msemmija fl-Artikolu 12 tar-Regolament (KE) Nru 443/2009 ġew issodisfati għal mill-inqas waħda miż-żewġ vetturi ppreżentat fl-istudju tal-każ. Barra minn hekk, l-applikazzjoni għandha l-appoġġ ta' rapport ta' verifika stabbilit minn korp iċċertifikat u indipendenti skont l-Artikolu 7 tar-Regolament ta' Implimentazzjoni (UE) Nru 725/2011.

(9)

Abbażi tal-informazzjoni pprovduta ma' din l-applikazzjoni, u fid-dawl tal-esperjenza miksuba mill-valutazzjoni tat-talba dwar l-approvazzjoni tal-funzjoni għall-coasting tal-Porsche AG fil-qafas tad-Deċiżjoni ta' Implimentazzjoni (UE) 2015/1132, intwera b'mod sodisfaċenti li l-funzjoni tal-BMW engine idle coasting tista' tipprovdi tnaqqis fl-emissjonijiet tas-CO2 ta' mill-inqas 1 g ta' CO2/km skont l-Artikolu 9 tar-Regolament (UE) Nru 725/2011 għal ċerti vetturi BMW. Huwa għalhekk meħtieġ li l-awtorità tal-approvazzjoni tat-tip tivverifika li l-limitu massimu ta' 1gCO2/km speċifikat fl-Artikolu 9 tar-Regolament ta' Implimentazzjoni (UE) Nru 725/2011 hwua ssodisfat għaċ-ċertifikazzjoni tal-iffrankar ta' CO2 minn vetturi BMW mgħammra bil-funzjoni engine idle coasting.

(10)

F'dan l-isfond, il-Kummissjoni tqis li ma għandha tagħmel l-ebda oġġezzjoni fir-rigward tal-approvazzjoni tat-teknoloġija innovattiva inkwistjoni.

(11)

Sabiex jiġi ċċertifikat l-iffrankar ta' CO2 mill-funzjoni tal-engine idle coasting tal-BMW AG, il-manifattur BMW AG għandu jipprovdi rapport ta' verifika minn korp ta' verifika indipendenti u ċċertifikat li jikkonferma l-konformità tal-vettura mgħammra bil-funzjoni mal-kundizzjonijiet stipulati f'din id-Deċiżjoni flimkien mal-applikazzjoni għaċ-ċertifikazzjoni lill-awtorità tal-approvazzjoni tat-tip.

(12)

Bil-għan li jiġi stabbilit il-kodiċi ġenerali tal-ekoinnovazzjoni li għandu jintuża fid-dokumenti tal-approvazzjoni tat-tip rilevanti skont l-Annessi I, VIII u IX tad-Direttiva 2007/46/KE tal-Parlament Ewropew u tal-Kunsill (5), għandu jiġi speċifikat il-kodiċi individwali li għandu jintuża għat-teknoloġija innovattiva,

(a)

it-teknoloġija innovattiva tiġi installata f'vetturi BMW M1 b'sistema ta' motopropulsjoni konvenzjonali u bi trażmissjoni awtomatika mgħammra u l-funzjoni tal-BMW engine idle coasting tiġi attivata awtomatikament fil-modalità ta' sewqan predominanti; din hija l-modalità ta' sewqan li tintgħażel dejjem meta tinxtegħel il-vettura indipendentement mil-modalità tat-tħaddim tal-vettura meta din tkun intfiet l-aħħar; il-funzjoni tal-BMW engine idle coasting ma tistax tiġi diżattivata fil-modalità ta' sewqan predominanti mis-sewwieq jew minn interventi esterni;

(b)

il-funzjoni tal-BMW engine idle coasting tkun attiva mill-inqas sa 40 km/h;

(c)

għal vetturi bil-kapaċità li jibqgħu mexjin waħedhom f'deċellerazzjoni sa veloċità ta' inqas minn 40 km/h, il-funzjoni tal-BMW engine idle coasting għandha tiġi diżattivata f'veloċità ta' 40 km/h għall-iskop tat-test imniżżel fl-Anness.