This document is an excerpt from the EUR-Lex website
Document 32017D1388
Council Decision (EU) 2017/1388 of 17 July 2017 on the conclusion of the Framework Agreement between the European Union and Kosovo (This designation is without prejudice to positions on status, and is in line with UNSCR 1244(1999) and the ICJ Opinion on the Kosovo declaration of independence. ) on the general principles for the participation of Kosovo in Union programmes
Deċiżjoni tal-Kunsill (UE) 2017/1388 tas-17 ta' Lulju 2017 dwar il-konklużjoni tal-Ftehim Qafas bejn l-Unjoni Ewropea u l-Kosovo (Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244(1999) u l-Opinjoni tal-QIĠ dwar id-dikjarazzjoni tal-indipendenza tal-Kosovo. ) dwar il-prinċipji ġenerali għall-parteċipazzjoni tal-Kosovo fi programmi tal-Unjoni
Deċiżjoni tal-Kunsill (UE) 2017/1388 tas-17 ta' Lulju 2017 dwar il-konklużjoni tal-Ftehim Qafas bejn l-Unjoni Ewropea u l-Kosovo (Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244(1999) u l-Opinjoni tal-QIĠ dwar id-dikjarazzjoni tal-indipendenza tal-Kosovo. ) dwar il-prinċipji ġenerali għall-parteċipazzjoni tal-Kosovo fi programmi tal-Unjoni
ĠU L 195, 27.7.2017, p. 1–2
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
ELI: http://data.europa.eu/eli/dec/2017/1388/oj
|
27.7.2017 |
MT |
Il-Ġurnal Uffiċjali tal-Unjoni Ewropea |
L 195/1 |
DEĊIŻJONI TAL-KUNSILL (UE) 2017/1388
tas-17 ta' Lulju 2017
dwar il-konklużjoni tal-Ftehim Qafas bejn l-Unjoni Ewropea u l-Kosovo (*1) dwar il-prinċipji ġenerali għall-parteċipazzjoni tal-Kosovo fi programmi tal-Unjoni
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 212, flimkien mal-punt (a) tat-tieni subparagrafu tal-Artikolu 218(6) u l-Artikolu 218(7) tiegħu,
Wara li kkunsidra l-proposta mill-Kummissjoni Ewropea,
Wara li kkunsidra l-approvazzjoni tal-Parlament Ewropew (1),
Billi:
|
(1) |
Skont id-Deċiżjoni tal-Kunsill (UE) 2016/2053 (2), il-Ftehim Qafas bejn l-Unjoni Ewropea u l-Kosovo dwar il-prinċipji ġenerali għall-parteċipazzjoni tal-Kosovo fi programmi tal-Unjoni (“il-Ftehim”) ġie ffirmat fil-25 ta' Novembru 2016, soġġett għall-konklużjoni tiegħu f'data aktar tard. |
|
(2) |
Fl-14 ta' Diċembru 2010 l-Kunsill iddikjara li kien qiegħed jistenna b'interess proposta tal-Kummissjoni li tkun tippermetti l-parteċipazzjoni tal-Kosovo fi programmi tal-Unjoni. Tali parteċipazzjoni għandha ssir possibbli permezz tal-konklużjoni tal-Ftehim. |
|
(3) |
L-għan tal-Ftehim huwa li l-Unjoni twettaq miżuri ta' kooperazzjoni ekonomika, finanzjarja u teknika mal-Kosovo skont l-Artikolu 212 tat-Trattat dwar l-Unjoni Ewropea. |
|
(4) |
Il-konklużjoni tal-Ftehim ma tippreġudikax il-pożizzjoni tal-Istati Membri dwar l-istatus tal-Kosovo, li ser tiġi deċiża skont il-prassi nazzjonali tagħhom u d-dritt internazzjonali. L-ebda terminu, formulazzjoni jew definizzjoni użata f'din id-Deċiżjoni, il-Ftehim, inkluż l-Anness tiegħu, jew fil-programmi tal-Unjoni, ma jikkostitwixxu rikonoxximent tal-Kosovo mill-Unjoni bħala Stat indipendenti u lanqas ma jikkostitwixxu rikonoxximent tal-Kosovo f'dik il-kapaċità minn Stati Membri individwali fejn huma ma jkunux għamlu tali pass. |
|
(5) |
Il-Ftehim jenħtieġ li jiġi approvat, |
ADOTTA DIN ID-DEĊIŻJONI:
Artikolu 1
Il-Ftehim Qafas bejn l-Unjoni Ewropea u l-Kosovo dwar il-prinċipji ġenerali għall-parteċipazzjoni tal-Kosovo fi programmi tal-Unjoni huwa b'dan approvat f'isem l-Unjoni.
It-test tal-Ftehim huwa mehmuż ma' din id-Deċiżjoni.
Artikolu 2
Il-President tal-Kunsill għandu, f'isem l-Unjoni Ewropea, jagħti n-notifika prevista fl-Artikolu 10 tal-Ftehim (3).
Artikolu 3
Il-Kummissjoni hija awtorizzata tiddetermina, f'isem l-Unjoni, it-termini u l-kondizzjonijiet speċifiċi applikabbli għall-parteċipazzjoni tal-Kosovo f'kull programm partikolari tal-Unjoni, inkluż il-kontribuzzjoni finanzjarja li għandha titħallas, f'konformità mal-Artikolu 5 tal-Ftehim. Il-Kummissjoni għandha żżomm lill-grupp ta' ħidma rilevanti tal-Kunsill infurmat.
Artikolu 4
Din id-Deċiżjoni għandha tidħol fis-seħħ fil-jum wara dak tal-adozzjoni tagħha.
Magħmul fi Brussell, is-17 ta' Lulju 2017.
Għall-Kunsill
Il-President
F. MOGHERINI
(*1) Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244(1999) u l-Opinjoni tal-QIĠ dwar id-dikjarazzjoni tal-indipendenza tal-Kosovo.
(1) L-Approvazzjoni tal-4 ta' Lulju 2017 (għadha mhix ippubblikata fil-Ġurnal Uffiċjali).
(2) Id-Deċiżjoni tal-Kunsill (UE) 2016/2053 tal-14 ta' Novembru 2016 dwar l-iffirmar, f'isem l-Unjoni, tal-Ftehim Qafas bejn l-Unjoni Ewropea u l-Kosovo* dwar il-prinċipji ġenerali għall-parteċipazzjoni tal-Kosovo fi programmi tal-Unjoni (ĠU L 319, 25.11.2016, p. 1).
(3) Id-data tad-dħul fis-seħħ tal-Ftehim ser tiġi ppubblikata f'Il-Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.