EUR-Lex Access to European Union law
This document is an excerpt from the EUR-Lex website
Document 32017D0369
Council Implementing Decision (EU) 2017/369 of 27 February 2017 on subjecting methyl 2-[[1-(cyclohexylmethyl)-1H-indole-3-carbonyl]amino]-3,3-dimethylbutanoate (MDMB-CHMICA) to control measures
Deċiżjoni ta' Implimentazzjoni tal-Kunsill (UE) 2017/369 tas-27 ta' Frar 2017 li tissottoponi il-metil-2-[[1-(ċikloħeksilmetil)-1H-indol-3-karbonil]amino]-3,3-dimetilbutanoat (MDMB-CHMICA) għal miżuri ta' kontroll
Deċiżjoni ta' Implimentazzjoni tal-Kunsill (UE) 2017/369 tas-27 ta' Frar 2017 li tissottoponi il-metil-2-[[1-(ċikloħeksilmetil)-1H-indol-3-karbonil]amino]-3,3-dimetilbutanoat (MDMB-CHMICA) għal miżuri ta' kontroll
ĠU L 56, 3.3.2017, p. 210–212
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
3.3.2017 |
MT |
Il-Ġurnal Uffiċjali tal-Unjoni Ewropea |
L 56/210 |
DEĊIŻJONI TA' IMPLIMENTAZZJONI TAL-KUNSILL (UE) 2017/369
tas-27 ta' Frar 2017
li tissottoponi il-metil-2-[[1-(ċikloħeksilmetil)-1H-indol-3-karbonil]amino]-3,3-dimetilbutanoat (MDMB-CHMICA) għal miżuri ta' kontroll
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra d-Deċiżjoni tal-Kunsill 2005/387/ĠAI tal-10 ta' Mejju 2005 dwar l-iskambju ta' informazzjoni, il-valutazzjoni tar-riskju u l-kontroll fuq sustanzi psikoattivi ġodda (1), u b'mod partikolari l-Artikolu 8(3) tagħha,
Wara li kkunsidra l-proposta mill-Kummissjoni Ewropea,
Wara li kkunsidra l-opinjoni tal-Parlament Ewropew (2),
Billi:
(1) |
Tfassal rapport dwar il-valutazzjoni tar-riskji dwar is-sustanza psikoattiva ġdida metil-2-[[1-(ċikloħeksilmetil)-1H-indol-3-karbonil]amino]-3,3-dimetilbutanoat (MDMB-CHMICA) skont l-Artikolu 6 tad-Deċiżjoni 2005/387/ĠAI minn sessjoni speċjali tal-Kumitat Xjentifiku estiż taċ-Ċentru Ewropew għall-Monitoraġġ tad-Droga u d-Dipendenza fuq id-Droga, u sussegwentement dan intbagħat lill-Kummissjoni u lill-Kunsill fit-28 ta' Lulju 2016. |
(2) |
MDMB-CHMICA hija kklassifikata bħala agonist sintetiku tar-riċettur kannabinojdi. Agonisti sintetiċi tar-riċettur kannabinojdi, imsejħin ukoll kannabinojdi sintetiċi, huma grupp kimikament varjat ta' sustanzi funzjonalment simili għal Δ9-tetraħidrokannabinol (Δ9-THC), il-prinċipju psikoattiv ewlieni tal-kannabis. Il-(Δ9-THC) u l-kannabinojdi sintetiċi naftalen-1-yl(1-pentil-1H-indol-3-yl)metanon (JWH-018) u 1-(5-flworopentil)-1H-indol-3-yl]-(naftalen-1-yl)-metanon (AM-2201) huma agonisti tar-riċettur kannabinojdi kkontrollati taħt il-Konvenzjoni tan-Nazzjonijiet Uniti tal-1971 dwar Sustanzi Psikotropiċi. |
(3) |
Il-qawwa kbira tal-MDMB-CHMICA u l-varjabilità kbira tal-ammonti tal-kompost fi “stimulanti legali” jikkostitwixxu riskju kbir ta' tossiċità akuta. |
(4) |
MDMB-CHMICA ilha disponibbli fis-suq tad-droga fl-Unjoni mill-inqas minn Awwissu 2014 u nstabet fi 23 Stat Membru. Hija mibjugħa bħala “stimulant legali” b'marka kummerċjali f'headshops, kif ukoll fuq l-Internet bħala sostitut “legali” għall-kannabis. L-informazzjoni disponibbli tissuġġerixxi li t-trabijiet fil-massa tal-MDMB-CHMICA huma prodotti minn kumpaniji kimiċi bbażati fiċ-Ċina. Dawn jiġu importati fl-Unjoni fejn jew jiġu pproċessati jew jiġu ppakkjati f'taħlitiet tat-tipjip kummerċjali jew mibjugħa bħala trab. Ma hemm l-ebda informazzjoni li tindika li hemm produzzjoni ta' MDMB-CHMICA fl-Unjoni. |
(5) |
MDMB-CHMICA hija tipikament amministrata permezz tat-tipjip ta' taħlita erbali li jew tiġi minn “stimulant legali” kummerċjali lest għall-użu jew, f'każijiet aktar rari, titħejja mill-utent stess. Fil-prodotti kummerċjali, ġeneralment mhuwiex iddikjarat jekk il-prodott ikunx fih MDMB-CHMICA jew xi agonisti sintetiċi tar-riċettur kannabinojdi oħra. Għalhekk, bosta individwi esposti għal MDMB-CHMICA jistgħu ma jkunux jafu li qegħdin jużaw is-sustanza. Barra minn hekk, tali konsumaturi jistgħu ma jkunux jafu d-doża li qed jużaw. Il-proċess tal-manifattura jista' wkoll iwassal għal distribuzzjoni żbilanċjata tas-sustanza fil-materjal tal-pjanti, bir-riżultat li xi prodotti jkun fihom “partijiet jaħarqu” fejn il-kannabinojd ikun ikkonċentrat ħafna, u dan iżid ir-riskju ta' tossiċità akuta u ta' tifqigħat ta' avvelenament tal-massa. |
(6) |
Id-dejta disponibbli tindika li l-MDMB-CHMICA tintuża minn utenti tal-kannabis, “psikonawti” u dawk li huma regolarment sottoposti għal proċeduri ta' testijiet tad-droga, inklużi dawk fil-ħabs. |
(7) |
Filwaqt li ma hemm l-ebda informazzjoni speċifika dwar l-effetti possibbli tal-MDMB-CHIMICA fuq l-ambjent soċjali dirett jew fuq is-soċjetà kollha kemm hi, bosta rapporti indikaw il-possibbiltà ta' vjolenza u aggressjoni bħala konsegwenza tal-użu tagħha. Barra minn hekk, is-sejbien ta' MDMB-CHIMICA f'każijiet ta' suspett ta' sewqan taħt l-influwenza indikaw potenzjal ta' riskju akbar għas-sigurtà pubblika. |
(8) |
Tmien Stati Membri rrappurtaw total ta' 28 mewt u 25 intossikazzjoni akuta assoċjati fejn il-MDMB-CHMICA ġie individwat. Kieku l-MDMB-CHMICA kellha ssir aktar disponibbli u tibda tintuża aktar, l-implikazzjonijiet għas-saħħa individwali u pubblika jistgħu jkunu sinifikanti. |
(9) |
Hemm ftit informazzjoni li tissuġġerixxi l-involviment potenzjali tal-kriminalità organizzata fil-manifattura, fid-distribuzzjoni, fit-traffikar u fil-forniment tal-MDMB-CHMICA fl-Unjoni. |
(10) |
L-MDMB-CHMICA mhijiex elenkata għall-kontroll skont il-Konvenzjoni Unika tan-Nazzjonijiet Uniti tal-1961 dwar id-Drogi Narkotiċi jew skont il-Konvenzjoni tan-Nazzjonijiet Uniti tal-1971 dwar Sustanzi Psikotropiċi. Madankollu, hija elenkata fost is-sustanzi kkunsidrati għar-rieżami fit-38 Kumitat tal-Esperti tal-WHO dwar id-Dipendenza mid-Droga li jagħmel rakkomandazzjonijiet lill-Kummissjoni tan-Nazzjonijiet Uniti dwar Drogi Narkotiċi fuq il-miżuri ta' kontroll li huwa jqis xierqa. |
(11) |
Il-MDMB-CHIMICA ma għandha l-ebda użu mediku tal-bniedem jew veterinarju stabbilit jew rikonoxxut. Minbarra l-użu tagħha f'materjali ta' referenza analitiċi u fir-riċerka xjentifika li tinvestiga l-kimika, il-farmakoloġija u t-tossikoloġija tagħha bħala riżultat tal-feġġ tagħha fis-suq tad-droga, ma hemm l-ebda indikazzjoni li qed tintuża għal skopijiet oħra. |
(12) |
Ir-rapport dwar il-valutazzjoni tar-riskji juri li hemm evidenza xjentifika limitata disponibbli fuq il-MDMB-CHMICA u jindika li tkun meħtieġa aktar riċerka. Madankollu, l-evidenza u l-informazzjoni disponibbli dwar ir-riskji għas-saħħa u soċjali li toħloq is-sustanza jipprovdu raġunijiet suffiċjenti biex MDMB-CHMICA tiġi sottoposta għal miżuri ta' kontroll fl-Unjoni kollha. |
(13) |
Billi 10 Stati Membri jikkontrollaw l-MDMB-CHMICA taħt il-leġiżlazzjoni nazzjonali f'konformità mal-obbligi tagħhom taħt il-Konvenzjoni tan-Nazzjonijiet Uniti tal-1971 dwar Sustanzi Psikotropiċi u billi ħames Stati Membri jużaw miżuri leġiżlattivi oħrajn biex jikkontrollawha, l-obbligu li din is-sustanza tkun sottoposta għal miżuri ta' kontroll fl-Unjoni kollha jista' jgħin biex jiġi evitat il-feġġ ta' ostakli fl-infurzar tal-liġi u l-kooperazzjoni ġudizzjarja transfruntieri, u jgħin fil-protezzjoni mir-riskji li d-disponibbiltà u l-użu tagħha jistgħu joħolqu. |
(14) |
Id-Deċiżjoni 2005/387/ĠAI tikkonferixxi setgħat ta' implimentazzjoni lill-Kunsill bil-ħsieb li jkun hemm reazzjoni rapida u bbażata fuq kompetenza esperta fil-livell tal-Unjoni għal meta jfiġġu sustanzi psikoattivi ġodda individwati u rrappurtati mill-Istati Membri, billi tissottoponi dawk is-sustanzi għal miżuri ta' kontroll fl-Unjoni kollha. Billi l-kondizzjonijiet u l-proċedura biex jiġi attivat l-eżerċizzju ta' tali setgħat ta' implimentazzjoni ġew issodisfati, għandha tiġi adottata deċiżjoni ta' implimentazzjoni sabiex il-MDMB-CHMICA titqiegħed taħt kontroll fl-Unjoni kollha. |
(15) |
Id-Danimarka hi marbuta bid-Deċiżjoni 2005/387/ĠAI u għalhekk qed tieħu sehem fl-adozzjoni u l-applikazzjoni ta' din id-Deċiżjoni li timplimenta d-Deċiżjoni 2005/387/ĠAI. |
(16) |
L-Irlanda hi marbuta bid-Deċiżjoni 2005/387/ĠAI u għalhekk qed tieħu sehem fl-adozzjoni u l-applikazzjoni ta' din id-Deċiżjoni li timplimenta d-Deċiżjoni 2005/387/ĠAI. |
(17) |
Ir-Renju Unit mhuwiex marbut bid-Deċiżjoni 2005/387/ĠAI u għalhekk mhux qed jieħu sehem fl-adozzjoni ta' din id-Deċiżjoni li timplimenta d-Deċiżjoni 2005/387/ĠAI u mhuwiex marbut biha jew soġġett għall-applikazzjoni tagħha, |
ADOTTA DIN ID-DEĊIŻJONI:
Artikolu 1
Is-sustanza psikoattiva l-ġdida metil 2-[[1-(ċikloħeksilmetil)-1H-indol-3-karbonil]amino]-3,3-dimetilbutanoat (MDMB-CHMICA) għandha tkun sottoposta għal miżuri ta' kontroll fl-Unjoni kollha.
Artikolu 2
Mill-aktar fis possibbli, iżda mhux aktar tard mill-4 ta' Marzu 2018, l-Istati Membri għandhom jieħdu l-miżuri meħtieġa, skont il-liġi nazzjonali tagħhom, biex is-sustanza psikoattiva l-ġdida msemmija fl-Artikolu 1 tkun sottoposta għal miżuri ta' kontroll u pieni kriminali, kif previst taħt il-leġiżlazzjoni tagħhom, f'konformità mal-obbligi tagħhom taħt il-Konvenzjoni tan-Nazzjonijiet Uniti tal-1971 dwar is-Sustanzi Psikotropiċi.
Artikolu 3
Din id-Deċiżjoni għandha tidħol fis-seħħ fid-data wara dik tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Din id-Deċiżjoni għandha tapplika f'konformità mat-Trattati.
Magħmul fi Brussell, is-27 ta' Frar 2017.
Għall-Kunsill
Il-President
K. MIZZI
(1) ĠU L 127, 20.5.2005, p. 32.
(2) Opinjoni tal-14 ta' Frar 2017 (għadu mhux ippubblikat fil-Ġurnal Uffiċjali).