2.3.2017   

MT

Il-Ġurnal Uffiċjali tal-Unjoni Ewropea

L 55/12

(1)

Fl-2012–2013 rapporti mill-istampa u informazzjoni mibgħuta miċ-ċittadini ġibdu l-attenzjoni tal-Kummissjoni għal allegazzjonijiet li l-gvern reġjonali ta' Valencia (“Generalitat Valenciana”) kien ta għajnuna mill-Istat fil-forma ta' garanziji għal self favur tliet klabbs tal-futbol f'Valencia. Valencia Club de Fútbol Sociedad Anónima Deportiva (“Valencia CF”), Hércules Club de Fútbol Sociedad Anónima Deportiva (“Hercules CF”) u Elche Club de Fútbol Sociedad Anónima Deportiva (“Elche CF”). Skont dawn ir-rapporti, il-garanzija favur Valenzja CF ġiet sussegwentement miżjuda talanqas darbtejn, sabiex jiġu koperti l-kapital, l-imgħax u l-ispejjeż li kienu għadhom ma tħallsux. Fit-8 ta' April 2013 Spanja ntalbet tikkummenta dwar dawn ir-rapporti. Spanja bagħtet informazzjoni lill-Kummissjoni fis-27 ta' Mejju u fit-3 ta' Ġunju 2013.

(2)

Permezz ta' ittra datata t-18 ta' Diċembru 2013, il-Kummissjoni infurmat lil Spanja li kienet iddeċidiet li tibda l-proċedura stabbilita fl-Artikolu 108(2) tat-Trattat dwar il-Funzjonament tal-Unjoni Ewropea (“TFUE”) fir-rigward tal-għajnuna (“id-deċiżjoni tal-ftuħ”). Spanja ppreżentat kummenti dwar id-deċiżjoni tal-ftuħ permezz ta' ittra datata l-10 ta' Frar 2014.

(3)

Il-Kummissjoni talbet informazzjoni lil Spanja permezz ta' ittra tal-1 ta' Awwissu 2014, li għaliha wieġbet fit-30 ta' Settembru u fit-13 ta' Ottubru 2014. Il-Kummissjoni talbet informazzjoni addizzjonali lil Spanja permezz ta' ittra tat-23 ta' Jannar 2015, li għaliha wieġbet fis-27 ta' April 2015.

(4)

L-Instituto Valenciano de Finanzas (“IVF”), l-istituzzjoni finanzjarja tal-Generalitat Valenciana, ippreżenta kummenti fit-3 ta' Novembru u fil-15 ta' Diċembru 2014, fl-20 ta' Frar, fil-25 ta' Frar, fil-31 ta' Marzu u fit-18 ta' Mejju 2015. IVF ippreżenta informazzjoni addizzjonali permezz ta' emails tat-3, 5, 13, 19, 20, 26 u tat-30 ta' Novembru 2015, tal-1, 11, 14, 15, 16, 17 u tat-18 ta' Diċembru 2015, u tal-4 u tat-13 ta' Mejju 2016.

(5)

Id-deċiżjoni tal-ftuħ ġiet ippubblikata f'Il-Ġurnal Uffiċjali tal-Unjoni Ewropea  (2) fis-7 ta' Marzu 2014. Il-Kummissjoni stiednet lill-partijiet interessati biex jippreżentaw il-kummenti tagħhom dwar il-miżuri. Il-Kummissjoni rċeviet osservazzjonijiet mingħand tliet partijiet interessati: Mil-Liga Nacional de Fútbol Profesional fis-7 ta' April 2014; mingħand Valencia CF fis-7 ta' April, fis-16 ta' Ġunju, fit-30 ta' Ottubru u fil-15 ta' Diċembru 2014, u fit-12 ta' Mejju 2015; u mingħand Fundaciόn Valencia Club de Fútbol (“Fundacion Valencia”) fid-19 ta' Mejju 2015. Bagħtithom lil Spanja, li ngħatat l-opportunità li tirreaġixxi; il-kummenti ta' Spanja waslu permezz ta' ittri datati t-30 ta' Settembru u t-13 ta' Ottubru 2014 u t-3 ta' Lulju 2015. Valencia CF ippreżenta kjarifiki ulterjuri fl-14 ta' Diċembru 2015 u fis-26 ta' Jannar 2016. Fid-29 ta' Jannar 2015 saret laqgħa fi Brussell bil-parteċipazzjoni tas-servizzi tal-Kummissjoni, tal-awtoritajiet Spanjoli, tar-rappreżentanti ta' IVF u tar-rappreżentanti ta' Valencia CF.

(6)

Fil-5 ta' Novembru 2009, IVF ipprovda garanzija għal self bankarju ta' EUR 75 miljun minn Bancaja (issa Bankia) lil Fundacion Valencia. IVF huwa istituzzjoni pubblika ta' finanzjament taħt il-kontroll tal-Generalitat Valenciana, u r-rappreżentanti ta' dan tal-aħħar jipparteċipaw ukoll fil-Kunsill Ġenerali u fil-Kumitat ta' Investiment ta' IVF.

(7)

L-għan speċifiku tas-self, kif iddikjarat fid-deċiżjoni dwar l-għoti tal-garanzija tal-IVF lil Fundacion Valencia, kien li jiġi ffinanzjat l-akkwist ta' ishma ta' Valencia CF minn Fundacion Valencia, fil-kuntest tad-deċiżjoni minn Valencia CF biex iwettaq żieda fil-kapital ta' EUR 92,4 miljun għall-ħruġ ta' 1 922 250 sehem ġdid (li wassal biex l-għadd totali ta' ishma jlaħħaq iż-2 114 475). L-ishma l-ġodda kienu sottoskritti b'parità ma' dawk eżistenti, għal valur nominali ta' EUR 48,08 għal kull sehem. Permezz ta' dan is-self, Fundacion Valencia akkwista 70,6 % tal-ishma totali ta' Valencia CF għall-prezz imsemmi hawn fuq ta' EUR 48,08 għal kull sehem. Parteċipazzjonijiet oħra fl-istess żieda fil-kapital laħħqu l-ammont ta' EUR 18,8 miljuni. Sussegwentement, minn dawn l-ishma, 52 212-il sehem inbiegħu għall-prezz ta' EUR 56,50 kull sehem matul is-sena finanzjarja 2010–2011, 878 sehem inbiegħu għall-prezz ta' EUR 57,00 kull sehem matul is-sena finanzjarja 2011–2012, u 1 481 368 sehem inbiegħu għall-prezz ta' EUR 67,50 kull sehem fis-sena finanzjarja 2013–2014.

(8)

Il-garanzija minn IVF kopriet 100 % tas-somma kapitali ewlenija tas-self, flimkien mal-imgħax u l-ispejjeż tat-tranżazzjoni garantita. Kien hemm primjum annwali ta' garanzija ta' 0,5 % għall-IVF u tariffa ta' impenn ta' darba ta' 1 % (3), li kellha titħallas minn Fundacion Valencia. Bħala kontrogaranzija, IVF irċieva rahan subordinat wara Bankia fuq l-ishma ta' Valencia CF proprjetà ta' Fundacion Valencia. It-tul tas-self sottostanti kien ta' sitt snin, li matulu kien hemm perjodu ta' grazzja (għall-ħlas tal-kapital tas-self) ta' erba' snin. Ir-rata tal-imgħax tas-self sottostanti kienet ekwivalenti għal: (a) 6 % sas-26 ta' Awwissu 2010 (l-ewwel sena tas-self); u (b) mis-26 ta' Awwissu 2010 'l quddiem, Euribor sena + marġini ta' 3,5 % b'rata minima ta' 6 %. L-iskeda miftiehma ta' ħlasijiet tal-kapital tas-self ipprevediet ħlasijiet lura annwali tal-imgħax li kellhom jibdew f'Awwissu 2010, filwaqt li fir-rigward tal-kapital tas-self ġie miftiehem li fis-26 ta' Awwissu 2014 jitħallsu EUR 37,5 miljuni u EUR 37,5 miljun fis-26 ta' Awwissu 2015. Il-ħlas lura tal-prinċipal u tal-imgħax tas-self kien previst li kien se jiġi ffinanzjat mid-dħul mill-bejgħ tal-ishma li Fundacion Valencia kien akkwista f'Valencia CF.

(9)

Fis-26 ta' Lulju 2010, IVF ipprovda garanzija għal self bankarju ta' EUR 18-il miljun minn Caja de Ahorros del Mediterráneo lil Fundacion Hercules. L-għan speċifiku tas-self, kif iddikjarat fid-deċiżjoni dwar l-għoti tal-garanzija tal-IVF lil Fundacion Hercules, kien li jiġi ffinanzjat l-akkwist ta' ishma ta' Hercules CF minn Fundacion Valencia, fil-kuntest taż-żieda fil-kapital deċiża minn Hercules CF, permezz ta' injezzjoni ta' kapital. Il-garanzija kopriet 100 % tas-somma kapitali ewlenija tas-self, flimkien mal-imgħax u l-ispejjeż tat-tranżazzjoni garantita. Kien hemm primjum ta' garanzija ta' 1 % għal IVF, li kellu jitħallas mill-Fundacion Hercules. Bħala kontrogaranzija, IVF irċieva rahan fuq l-ishma ta' Hercules CF propjetà ta' Fundacion Hercules; b'mod proviżorju sar-rahan tal-ishma, IVF irċieva garanzija mingħand is-sid tal-istadju José Rico Pérez, Aligestión Integral SA, u r-rahan tal-ishma f'Hercules CF proprjetà ta' Aligestión Integral SA. It-tul tas-self sottostanti kien ta' ħames snin. Ir-rata tal-imgħax tas-self sottostanti kienet ekwivalenti għal: (a) rata fissa ta' 4 % fl-ewwel 36 xahar; u (b) Euribor sena + marġini ta' 2 % matul l-aħħar 24 xahar. Kien hemm ukoll tariffa ta' impenn ta' 0,5 %. Il-ħlas lura tas-self garantit (kapital u mgħax) kien previst li kien se jsir permezz tal-bejgħ tal-ishma akkwistati f'Hercules CF.

(10)

Wara l-għoti tal-garanzija tal-Istat minn IVF, Fundacion Hercules ma ħallasx lura s-self sottostanti. Bħala riżultat, fl-24 ta' Jannar 2012, IVF, li kellu jissodisfa l-obbligu ġuridiku tiegħu bħala garanti, ħallas lura l-ammont ta' EUR 18,4 miljuni lill-bank mutwanti, issostitwixxa lil dan tal-aħħar bħala l-kreditur tas-self inkwistjoni u sussegwentement beda proċedimenti legali kontra Fundacion Hercules CF sabiex jirkupra l-ammont imsemmi hawn fuq.

(11)

Fis-17 ta' Frar 2011, IVF ipprovda żewġ garanziji għal żewġ kuntratti ta' self bankarju li laħħqu l-EUR 14-il miljun, mingħand Caja de Ahorros del Mediterráneo (EUR 9 miljuni) u mingħand Banco de Valencia (EUR 5 miljuni), lil Fundacion Elche. L-għan speċifiku taż-żewġ kuntratti ta' self, kif iddikjarat fid-deċiżjoni dwar l-għoti tal-garanzija ta' IVF lil Fundacion Elche, kien li jiġi ffinanzjat l-akkwist ta' ishma ta' Elche CF minn Fundacion Elche, fil-kuntest taż-żieda fil-kapital deċiża minn Elche CF, permezz ta' injezzjoni ta' kapital. Il-garanziji koprew 100 % tas-somma kapitali ewlenija tas-self, flimkien mal-imgħax u l-ispejjeż tat-tranżazzjoni garantita. Kien hemm primjum ta' garanzija ta' 1 % għal IVF, li kellu jitħallas mill-Fundacion Elche. Bħala kontrogaranzija, IVF irċieva rahan fuq l-ishma ta' Elche CF, proprjetà ta' Fundacion Elche. It-tul tas-self sottostanti kien ta' ħames snin. Ir-rata tal-imgħax tas-self sottostanti kienet ekwivalenti għal Euribor sena + marġini ta' 3,5 %. Kien hemm ukoll tariffa ta' impenn ta' 0,5 %. Il-ħlas lura tas-self garantit (kapital u mgħax) kien previst li kien se jsir permezz tal-bejgħ tal-ishma akkwistati f'Elche CF.

(12)

Fl-10 ta' Novembru 2010, IVF żied il-garanzija tiegħu lil Fundacion Valencia b'EUR 6 miljuni. L-iskop taż-żieda fil-garanzija kien biex tiġi koperta żieda fis-self eżistenti ta' EUR 6 miljuni ta' Bankia bl-għan li jitħallsu l-kapital, l-imgħax u l-ispejjeż li kienu għadhom ma tħallsux, li kienu ġejjin mill-pagament ta' imgħax inadempjenti tas-26 ta' Awwissu 2010 tas-self garantit. Bħala riżultat ta' din iż-żieda, l-iskeda inizjali tal-ħlas tal-kapital tas-self sottostanti (ara l-premessa 7 hawn fuq) inbidlet u pprevediet ħlasijiet lura ta' EUR 40,5 miljuni fis-26 ta' Awwissu 2014 u ta' EUR 40,5 miljuni fis-26 ta' Awwissu 2015. Ir-rata tal-imgħax tas-self baqgħet l-istess.

(13)

Skont is-sottomissjonijiet tal-awtoritajiet Spanjoli u ta' Valencia CF matul il-proċedura ta' investigazzjoni formali, fi Frar 2013 IVF ħallas EUR 4,9 miljuni sabiex ikopri l-invokazzjoni parzjali tal-garanzija mill-Istat minn Bankia minħabba li ma kienx sar il-ħlas parzjali tal-imgħax tas-26 ta' Awwissu 2012. F'Diċembru 2013 il-Kummissjoni, abbażi tal-informazzjoni disponibbli dak iż-żmien, fetħet il-proċedura ta' investigazzjoni formali, abbażi tal-konvinzjoni li fi Frar 2013 IVF kien żied il-garanzija eżistenti tiegħu b'mod simili għaż-żieda fil-garanzija tal-10 ta' Novembru 2010.

(14)

Valencia CF huwa klabb tal-futbol professjonali Spanjol ibbażat f'Valencia u twaqqaf fl-1919. Jipparteċipa fl-ewwel lîg Spanjol (“La Liga”) u huwa wieħed mill-akbar klabbs tal-futbol fil-futbol Spanjol u dak Ewropew. Valencia CF rebaħ sitt titoli tal-La Liga u seba' trofei tal-Copa del Rey. Fit-tabella globali ta' kull żmien tal-La Liga, Valencia jinsab fit-tielet pożizzjoni wara Real Madrid CF u FC Barcelona. Wasal ukoll fil-finali ta' tmien kampjonati Ewropej kbar, u rebaħ ħamsa minnhom. Valencia CF kien ukoll membru tal-grupp G-14 tal-aqwa klabbs tal-futbol Ewropej. Fi Spanja huwa t-tielet l-aktar klabb tal-futbol favorit tal-partitarji. Huwa wkoll wieħed mill-akbar klabbs fid-dinja f'termini ta' għadd ta' membri (partitarji abbonati reġistrati), b'aktar minn 50 000 detentur ta' biljetti staġjonali u aktar minn 20 000 persuna fuq il-lista ta' stennija għal biljett staġjonali, u jilgħab il-partiti ġewwa pajjiżu (home) fl-istadju Mestalla li jiflaħ 55 000 spettatur.

(15)

It-Tabella 1 hawn taħt tinkludi d-data dwar il-prestazzjoni finanzjarja ta' Valencia CF matul il-perjodu ta' bejn Ġunju 2007 u Ġunju 2012.

Tabella 1

Data finanzjarja ewlenija ta' Valencia CF bejn Ġunju 2007– Ġunju 2012

(16)

Fundacion Valencia huwa fondazzjoni mingħajr skop ta' qligħ li l-għan li fuqha hija msejsa huwa li dak li “tippreserva, ixxerred u tippromwovi l-aspetti kulturali u soċjali, relatati mal-isports ta' Valenzja Club de Fútbol u r-rabta bejn il-Klabb u l-partitarji tiegħu”. Fundacion Valencia ġie stabbilit fl-1996 u ilu minn dakinhar azzjonist f'Valencia CF. L-attivitajiet ta' Fundacion Valencia huma relatati, fost oħrajn, mal-promozzjoni tal-futbol, il-ġestjoni tat-timijiet taż-żgħażagħ ta' Valencia CF u l-promozzjoni tal-futbol tan-nisa u dak amatorjali. Wara l-injezzjoni ta' kapital inkwistjoni (ara l-premessa 7 hawn fuq), Fundacion Valencia akkwista interess kontrollanti f'Valencia CF, b'mod partikolari 72 % kontra 1,6 % li kien jikkontrolla qabel l-injezzjoni ta' kapital, u sar l-entità prinċipali ta' Valencia CF (4). Barra minn hekk, il-membri kollha tal-Bord tad-Diretturi ta' Valencia CF kienu wkoll membri tal-Bord ta' Fundacion Valencia.

(17)

It-Tabella 2 hawn taħt tinkludi d-data finanzjarja ta' Fundacion Valencia fil-perjodu ta' bejn Ġunju 2008 u Ġunju 2011.

Tabella 2

Data finanzjarja ewlenija ta' Fundacion Valencia Ġunju 2008– Ġunju 2011

(18)

Hercules CF huwa klabb tal-futbol professjonali Spanjol ibbażat f'Alicante, fir-reġjun ta' Valencia. Twaqqaf fl-1922, u attwalment jilgħab fit-tielet diviżjoni Spanjola (“Segunda División B”), u jilgħab il-partiti ġewwa pajjiżu fl-istadju José Rico Pérez li jiflaħ 30 000 spettatur. Fiż-żmien tal-miżuri taħt skrutinju (Lulju 2010), Hercules CF kien għadu kif ikkwalifika għal-La Liga bħala runner-up tat-tieni diviżjoni Spanjola (“Segunda División”) tal-istaġun 2009–2010. Kif ippreżentat mill-awtoritajiet Spanjoli, fil-25 ta' Jannar 2012, Hercules CF daħal fi ftehim mal-maġġoranza tal-kredituri privati tiegħu li kienu bdew proċedimenti ta' insolvenza li bdew fil-5 ta' Lulju 2011 (“concurso de acreedores”), li kien jinkludi valwazzjoni negattiva tad-dejn ta' 50 % tat-talbiet tagħhom u differiment ta' seba' snin tal-ħlasijiet ta' pretensjonijiet ordinarji, li seta' jiġi estiż b'sentejn f'każ li jitlef l-istatus professjonali tiegħu. It-Tabella 3 hawn taħt tinkludi d-data dwar il-prestazzjoni finanzjarja ta' Hercules CF fil-perjodu ta' bejn Ġunju 2008 u Ġunju 2012.

Tabella 3

Data finanzjarja ewlenija ta' Hercules CF Ġunju 2008– Ġunju 2012

(19)

Fundaciόn Hércules de Alicante (“Fundacion Hercules”) huwa organizzazzjoni li l-missjoni tagħha huwa li tippromwovi l-benessri soċjali u kwistjonijiet relatati ma' Hercules CF, u mhijiex involuta f'attivitajiet ekonomiċi. Bl-injezzjoni ta' kapital inkwistjoni (ara l-premessa 9 hawn fuq), Fundacion Hercules akkwista 81,96 % u b'hekk interess kontrollanti f'Hercules CF, bl-azzjonist ikklassifikat fit-tieni pożizzjoni jippossjedi 16,99 % (qabel l-injezzjoni ta' kapital, Fundacion Hercules ma kellux ishma). Barra minn hekk, kif previst mill-istatuti u mir-regolamenti lokali ta' Fundacion Hercules, il-membri tal-Bord tad-Diretturi ta' Hercules CF huma legalment membri tal-korp governattiv ta' Fundacion Hercules (“Patronato”). It-Tabella 4 hawn taħt tinkludi d-data finanzjarja ta' Fundacion Hercules fil-perjodu ta' bejn Ġunju 2009 u Ġunju 2011.

Tabella 4

Data finanzjarja ewlenija ta' Fundacion Hercules Ġunju 2009–Ġunju 2011

(20)

Elche CF huwa klabb tal-futbol professjonali Spanjol ibbażat f'Elche, fil-provinċja ta' Alicante, fir-reġjun ta' Valencia. Twaqqaf fl-1923, u attwalment jilgħab fit-tieni diviżjoni Spanjola, u jilgħab il-partiti f'pajjiżu (home) fl-istadju Manuel Martínez Valero li jiflaħ 38 750 spettatur. Fiż-żmien li fih ingħataw il-miżuri inkwistjoni (Frar 2011), kien qiegħed jilgħab fit-tieni diviżjoni, filwaqt li sussegwentement fl-istaġuni 2013–14 u 2014–15 lagħab fil-La Liga. It-Tabella 5 hawn taħt tinkludi d-data dwar il-prestazzjoni finanzjarja ta' Elche CF fil-perjodu ta' bejn Ġunju 2007 u Ġunju 2011. Kif ippreżentat mill-awtoritajiet Spanjoli, fis-6 ta' Awwissu 2015 Elche CF daħal fi proċedimenti ta' insolvenza.

Tabella 5

Data finanzjarja ewlenija ta' Elche CF Ġunju 2007– Ġunju 2011

(21)

Fundaciόn Elche Club de Fútbol (“Fundacion Elche”) huwa organizzazzjoni mingħajr skop ta' qligħ fir-reġjun ta' Valencia, li l-missjoni tagħha huwa li tippromwovi u tiżviluppa attivitajiet relatati mal-isport, u mhijiex involuta f'attivitajiet ekonomiċi. Bl-injezzjoni ta' kapital inkwistjoni (ara l-premessa 10 hawn fuq), Fundacion Elche akkwista interess kontrollanti ta' 63,45 % bħala l-uniku azzjonist ta' Elche CF b'aktar minn 10 % (qabel l-injezzjoni ta' kapital ma kellux ishma). Barra minn hekk, il-maġġoranza tal-membri tal-Bord tad-Diretturi ta' Elche CF kienu wkoll membri tal-Bord ta' Fundacion Elche.

(22)

It-Tabella 6 hawn taħt tinkludi d-data finanzjarja ta' Fundacion Elche fil-perjodu ta' bejn Ġunju 2009 u Ġunju 2011.

Tabella 6

Data finanzjarja ewlenija ta' Fundacion Elche Diċembru 2009–Diċembru 2011

(23)

Skont l-awtoritajiet Spanjoli, id-deċiżjoni ta' IVF li jagħti l-garanzija tal-2009 favur Valencia CF ittieħdet abbażi ta' “pjan ta' vijabbiltà” datat Mejju 2009. Dak il-pjan ta' vijabbiltà kien jinkludi:

Tabella 7

Data finanzjarja prevista ta' Valencia CF Ġunju 2010–Ġunju 2015, kif ippreżentata fil-“pjan ta' vijabbiltà”

(24)

Skont il-kummenti ta' Spanja, Fundacion Valencia u Valencia CF, wara li irċevew approvazzjoni mingħand IVF (tali approvazzjoni kienet klawsola fil-garanzija ta' IVF), f'Jannar 2014 Fundacion Valencia ħabbar pubblikament l-intenzjoni tiegħu li jniedi proċess biex ibigħ l-ishma tiegħu f'Valenzja CF. Fi Frar 2014 twaqqaf Kumitat ta' Ġestjoni biex jissorvelja l-proċess, li kien magħmul minn rappreżentanti ta' Bankia, tal-Generalitat Valenciana (rappreżentant minn IVF), ta' Valencia CF u ta' Fundacion Valenzja. Il-proċess ta' bejgħ kien ġestit minn KPMG (maħtura minn Bankia) u minn PwC. Kien hemm is-seba' offerenti segwenti, miċ-Ċina, mill-Istati Uniti, mill-Arabja Sawdija, minn Singapor, mir-Russja u mill-Kosta Rica:

(25)

Il-kriterji ewlenin għall-valutazzjoni tal-offerti kienu:

(26)

KPMG u PwC bagħtu struzzjonijiet lill-investituri magħżula sabiex jiksbu offerti vinkolanti. Wara l-iskadenza għas-sottomissjoni tal-offerti vinkolanti, l-offerti nfetħu u l-Kumitat ta' Ġestjoni eżaminahom għal konformità mar-rekwiżiti tal-proċess tal-offerta. L-offerti tat-tliet investituri interessati li ġejjin ġew eliminati: […] (irtirar), […] (irtirar) u […] (ma ġietx ippreżentata informazzjoni dwar is-solvenza). Ġie stabbilit perjodu ta' tliet ġimgħat mill-iskadenza tas-sottomissjoni sabiex jintgħażel l-aħjar investitur. Fl-istadju tal-aħħar, il-Kumitat ta' Ġestjoni u l-korpi konsultattivi PwC u KPMG ivvalutaw l-erba' offerti li kien għad fadal. Il-Bord ta' Fundacion Valencia għamel id-deċiżjoni finali minn fost l-investituri magħżula.

(27)

L-offerta magħżula kienet dik ippreżentata minn Meriton Holdings Limited, li kienet tinkludi prezz tax-xiri ta' EUR 100 miljun għal 70,06 % tal-parteċipazzjoni azzjonarja f'Valencia CF, jiġifieri 1 481 368 sehem jew EUR 67,5 għal kull sehem, rifinanzjament fit-tul tad-dejn ta' Valencia CF ta' EUR 229 miljun lil Bankia, linja ta' kreditu azzjonarja ta' EUR 100 miljun u impenn biex ma jiddgħajfux l-ishma ta' azzjonisti minoritarji.

(28)

Wara li Fundacion Valencia ġabar il-prezz imsemmi hawn fuq, f'Ottubru 2014 dan tal-aħħar ħallas lura lil Bankia l-ammont totali tas-self tal-2009 ta' EUR 75 miljun flimkien maż-żieda tiegħu ta' EUR 6 miljuni tal-2010, flimkien mal-imgħax pendenti u spejjeż u obbligi oħra. Sussegwentement il-garanzija tal-Istat ta' IVF ġiet ikkanċellata. Wara l-ħlas lura tas-self ta' Bankia, Fundacion Valencia kien għad baqagħlu bilanċ favorevoli ta' EUR 6 miljuni.

(29)

Fit-18 ta' Diċembru 2013, il-Kummissjoni ddeċidiet li tiftaħ il-proċedura ta' investigazzjoni formali. Fid-deċiżjoni tagħha dwar il-ftuħ tal-proċedura ta' investigazzjoni formali, il-Kummissjoni waslet għall-opinjoni preliminari li Valencia CF, Hercules CF u Elche CF setgħu jitqiesu bħala ditti f'diffikultà fiż-żmien meta ngħataw il-miżuri identifikati. Il-Kummissjoni esprimiet ukoll dubji dwar l-allinjament tal-miżuri mal-Avviż tal-Kummissjoni dwar l-applikazzjoni tal-Artikoli 87 u 88 tat-Trattat tal-KE għall-għajnuna mill-Istat fil-forma ta' garanziji (5) (“L-Avviż ta' Garanzija tal-2008”) u b'mod preliminari kkonkludiet li l-miżuri kienu taw vantaġġ lill-benefiċjarji.

(30)

Barra minn hekk, fid-deċiżjoni tal-ftuħ tagħha l-Kummissjoni kienet tal-opinjoni preliminari li l-Istat Spanjol, permezz tal-Generalitat Valenciana, kellu influwenza ċara u diretta fuq IVF u b'mod preliminari kkonkludiet li l- miżuri kienu imputabbli għall-Istat.

(31)

Abbażi ta' dan ta' hawn fuq, il-Kummissjoni esprimiet dubji fir-rigward tal-erba' miżuri li qed jiġu vvalutati u waslet għall-konklużjoni preliminari li kollha kienu jinkludu għajnuna mill-Istat.

(32)

Barra minn hekk, il-Kummissjoni qieset li l-entitajiet li finalment ibbenefikaw mis-self garantit mill-Istat kienu Valencia CF, Hercules CF u Elche CF peress li s-self u l-garanziji ngħataw għax-xiri tal-ishma li l-klabbs kienu għadhom kemm ħarġu biex iżidu l-kapital propju. Il-Kummissjoni waslet ukoll għall-opinjoni preliminari li ma setax jiġi eskluż li Fundacion Valenzja, Fundacion Hercules u Fundacion Elche ma bbenefikawx ukoll mill-miżuri identifikati pjuttost milli kienu sempliċiment intermedjarji, bejn l-Istat u l-klabbs, għall-għoti tal-għajnuna.

(33)

Il-Kummissjoni esprimiet ukoll dubji dwar il-kompatibbiltà mas-suq intern tal-erba' miżuri li qegħdin jiġu vvalutati, b'mod partikolari minħabba li l-awtoritajiet Spanjoli ma pprovdew ebda raġuni possibbli għall-kompatibbiltà.

(34)

Fid-dawl tan-natura tal-miżuri inkwistjoni u tal-fatt li Valencia CF, Hercules CF u Elche CF jistgħu jitqiesu bħala ditti f'diffikultà fiż-żmien li ngħataw il-miżuri, il-Kummissjoni nnotat li l-kompatibbiltà tal-miżuri tista' tiġi vvaluta biss skont l-Artikolu 107(3)(c) tat-TFUE, u b'mod partikolari fid-dawl tal-linji gwida tal-Komunità tal-2004 dwar l-għajnuna mill-Istat għas-salvataġġ u għar-ristrutturar ta' ditti f'diffikultà (6) (“Il-Linji Gwida R&R tal-2004”). Il-Kummissjoni l-ewwel nett innotat li l-kundizzjonijiet għall-għajnuna għas-salvataġġ stabbiliti fit-Taqsima 3.1 tal-Linji Gwida R&R tal-2004 jidher li ma ġewx issodisfati. Fir-rigward tal-għajnuna għar-ristrutturar kif definit fit-Taqsima 3.2 tal-Linji Gwida R&R tal-2004, il-Kummissjoni osservat li l-miżuri identifikati kienu ngħataw fin-nuqqas ta' pjan kredibbli ta' ristrutturar li jissodisfa l-kundizzjonijiet stabbiliti fil-Linji Gwida R&R tal-2004.

(35)

Fl-aħħar nett, il-Kummissjoni nnotat li jidher li waqt li kien f'diffikultà Valencia CF bbenefika minn miżuri ripetuti favur tiegħu, u b'hekk il-kundizzjoni “tal-ewwel u l-aħħar darba” taħt it-taqsima 3.3 tal-Linji Gwida S&R tal-2004 tidher li ma ġietx issodisfata.

(36)

Kemm l-awtoritajiet Spanjoli kif ukoll IVF (bħala strument tal-Generalitat Valenciana u li ta wkoll l-awtorità tal-miżuri inkwistjoni) ippreżentaw kummenti matul il-proċedura ta' investigazzjoni formali. Fil-biċċa l-kbira dawk il-kummenti jikkoinċidu u għalhekk se jiġu ppreżentati flimkien fil-premessi li ġejjin. Se jiġu ppreżentati bħala l-kummenti ta' Spanja peress li IVF jikkostitwixxi entità li tappartjeni u taqa' taħt il-kontroll tal-Generalitat Valenciana.

(37)

Spanja tqis li l-miżuri 1, 2, 3 u 4 ma kinux jinvolvu għajnuna mill-Istat skont l-Artikolu 107(1) tat-TFUE minħabba li l-għoti tal-garanziji inkwistjoni kif ukoll it-termini u l-kundizzjonijiet tagħhom kienu konformi mal-baġits approvati bid-dispożizzjonijiet u bil-limiti previsti mil-leġiżlazzjoni Spanjola (7).

(38)

Spanja tinnota wkoll li l-miżuri 1, 2, 3 u 4 ma kinux jinvolvu vantaġġ indebitu lill-benefiċjarji tal-garanziji inkwistjoni skont l-Artikolu 107(1) tat-TFUE minħabba li d-dispożizzjonijiet tal-Avviż ta' Garanzija tal-2008 kienu ssodisfati, b'mod partikolari:

(39)

Barra minn hekk, Spanja ssostni li d-deċiżjoni tal-2009 ta' Fundacion Valencia li jinvesti fl-ishma ta' Valencia CF kienet konformi mal-prinċipju ta' investitur f'ekonomija tas-suq, u li għalhekk skont l-Artikolu 107(1) tat-TFUE ma kien ingħata l-ebda vantaġġ indebitu, għar-raġunijiet li ġejjin:

(40)

Barra minn hekk, Spanja targumenta li l-miżuri taħt skrutinju ma jissodisfawx il-kriterju tad-distorsjoni tal-kompetizzjoni u tal-effett fuq il-kummerċ bejn l-Istati Membri skont l-Artikolu 107(1) tat-TFUE peress li:

(41)

Spanja ssostni li, skont il-pjan għall-ħlas lura tas-self garantit lil Fundacion Valencia, dan tal-aħħar kellu l-obbligu li sat-30 ta' Ġunju 2015 ibigħ l-ishma kollha akkwistati f'Valencia CF, kif ġej: (a) fil-Fażi 1, li kellha tiġi konkluża fil-31 ta' Diċembru 2010, Fundacion Valencia kellu jbigħ talanqas 47 663 sehem bil-prezz ta' EUR 53,5 għal kull sehem; u (b) fil-Fażi 2, li kellha tiġi konkluża fit-30 ta' Ġunju 2015, Fundacion Valencia kellu jbigħ 852 452 sehem. L-obbligu ta' Fundacion Valencia kien li juża d-dħul mill-bejgħ tal-ishma għall-ħlas lura tas-self garantit.

(42)

Spanja ma toġġezzjonax għas-sejbiet preliminari tal-Kummissjoni (u saħansitra tirrikonoxxi) li d-deċiżjonijiet ta' IVF li jagħti l-miżuri inkwistjoni kienu imputabbli għall-Istat, u li Valencia CF, Hercules CF u Elche CF kienu f'diffikultà fiż-żmien tal-għoti tal-miżuri inkwistjoni. Barra minn hekk, Spanja tirrikonoxxi li f'kull każ il-garanziji mogħtija minn IVF għas-self lil Fundacion Valenzja, Fundacion Hercules u Fundacion Elche kienu jkopru 100 % tal-obbligazzjonijiet sottostanti, flimkien mal-imgħax u l-kost tat-tranżazzjoni garantita.

(43)

Spanja ppreżentat ukoll raġunijiet dwar il-kompatibbiltà tal-miżuri 1 u 4 (favur Valencia CF u Fundacion Valencia) skont il-Linji Gwida R&R tal-2004, fil-każ li l-Kummissjoni kellha tikkonkludi li dawn jammontaw għal għajnuna mill-Istat.

(44)

Fir-rigward tar-ritorn għall-vijabbiltà, Spanja tqis li l-pjan ta' vijabbiltà tal-2009 jiżgura l-vijabbiltà fit-tul ta' Valencia CF Barra minn hekk, Spanja hija tal-fehma li l-bejgħ tal-aktar plejers ta' valur ta' Valencia CF huwa miżura ta' kumpens adatta u proporzjonata. Barra minn hekk, fir-rigward ta' għajnuna limitata għall-minimu (kontribuzzjoni proprja), Spanja ssostni li l-parteċipazzjoni ta' xerrejja privati fiż-żieda fil-kapital tal-2009, li laħħqet it-EUR 18,8 miljuni, għandha tiġi aċċettata bħala kontribuzzjoni proprja. Fl-aħħar nett, fir-rigward tal-prinċipju “tal-ewwel u l-aħħar darba”, Spanja hija tal-fehma li din kienet rispettata peress li l-miżura 4 tinkludi biss iż-żieda tat-10 ta' Novembru 2010 tal-garanzija eżistenti b'EUR 6 miljuni, li għalhekk ma tistax titqies bħala garanzija ġdida u għalhekk għajnuna ġdida mill-Istat lil Valencia CF. Skont Spanja, il-miżura 4 ma tinkludi ebda garanzija oħra tal-Istat, peress li fi Frar 2013 IVF ħallas biss EUR 4,9 miljuni sabiex ikopri l-invokazzjoni parzjali tal-garanzija tal-Istat minn Bankia minħabba li ma kienx sar il-ħlas parzjali tal-imgħax tas-26 ta' Awwissu 2012.

(45)

Fl-aħħar nett, il-Kummissjoni tinnota li fiż-żmien meta ngħataw il-garanziji tal-Istat favur Hercules CF u Elche CF (2010 u 2011) Spanja ma kinitx ipprovdiet pjan dwar il-prospetti finanzjarji tagħhom. Barra minn hekk, Spanja ma pprovdiet ebda kumment fuq ebda bażi għall-kompatibbiltà tal-miżuri 2 u 3 mas-suq intern.

(46)

Matul il-proċedura ta' investigazzjoni formali, il-Kummissjoni irċeviet kummenti mingħand Valencia CF u Fundacion Valencia, li fil-biċċa l-kbira jikkoinċidu mal-kummenti li saru minn Spanja u minn IVF (ara l-premessi 36-45 hawn fuq). Minbarra dawk l-argumenti li jikkoinċidu, dawk il-partijiet interessati argumentaw dan li ġej:

(47)

Il-Kummissjoni rċeviet ukoll kummenti mil-Liga Nacional de Fútbol Profesional (il-Lîg tal-Futbol Professjonali “LFP”), jiġifieri l-assoċjazzjoni tal-isports magħmula mill-kumpaniji pubbliċi kollha tal-isports b'responsabbiltà limitata u l-klabbs tal-futbol fl-Ewwel u fit-Tieni Diviżjoni ta' Spanja li jipparteċipaw f'kompetizzjonijiet professjonali uffiċjali fuq skala nazzjonali.

(48)

Fil-kummenti tagħha, l-LFP tappoġġja li qari inizjali tad-deċiżjoni tal-ftuħ ma jipprovdix iċ-ċarezza li suppost jipprovdi dwar l-effett possibbli fuq il-kompetizzjoni li jista' jirriżulta mill-għajnuna potenzjali, u lanqas ma jipprovdi tali ċarezza dwar l-effett fuq il-kummerċ bejn l-Istati Membri. Barra minn hekk, l-LFP targumenta li s-settur sportiv inġenerali u b'mod partikolari s-settur tal-futbol, speċjalment minħabba l-popolarità tiegħu fost iż-żgħażagħ, jenħtieġ li jkunu soġġetti għal trattament speċjali, kif rikonoxxut mill-Artikolu 165 tat-TFUE. Fl-aħħar nett, l-LFP issostni li l-attivitajiet sportivi li jsiru mill-klabbs professjonali tal-isport jaqdu funzjoni inkontestabbli ta' servizz pubbliku, u tistabbilixxi li skont l-Artikolu 106(2) tat-TFUE, l-applikazzjoni tar-regoli dwar il-kompetizzjoni għal dawn il-klabbs ma għandhiex tfixkel it-twettiq, “fid-dritt jew fil-fatt”, tal-kompiti partikolari assenjati lilhom. F'dan il-kuntest, l-LFP targumenta li l-eċċezzjoni prevista fl-Artikolu 107(3)(c) tat-TFUE li tiddikjara l-kompatibbiltà mas-suq intern ta' “għajnuna maħsuba sabiex tiffaċilita l-iżvilupp ta' ċerti attivitajiet ekonomiċi jew […] basta dik l-għajnuna ma tfixkilx il-kondizzjonijiet tal-kummerċ sa grad li jkun kuntrarju għall-interess komuni” kjarament twieġeb għal din l-idea. Barra minn hekk, l-LFP tappoġġja li l-fatt li sal-lum il-Kummissjoni għadha ma adottatx linji gwida dwar l-applikazzjoni tar-regoli dwar l-għajnuna mill-Istat fit-Trattat għall-attivitajiet sportivi kummerċjali jirrappreżenta diffikultà fil-valutazzjoni tal-każ preżenti, minħabba li s-sempliċi applikazzjoni analoga ta' diversi normi ġeneriċi u eteroġeni minn barra s-settur taħt skrutinju ma tistax tipprovdi soluzzjoni xierqa, peress li hemm riskju ċar u evidenti ta' valutazzjoni preġudikata u parzjali tal-każ, minbarra l-inċertezza legali li din tinvolvi. Fl-aħħar nett, l-LFP issostni li sabiex tivvaluta l-allegata għajnuna u l-legalità tagħha taħt id-dritt tal-Unjoni, il-Kummissjoni għandha tieħu ċerti regoli tal-LFP inkunsiderazzjoni, li b'mod partikolari jirreferu għall-aċċettazzjoni tal-baġits tal-klabbs, il-limiti fuq l-infiq tal-klabbs, il-kapaċità ekonomika u finanzjarja tal-klabbs, il-protezzjoni tal-kredituri, ir-razzjonalità fil-finanzi tal-klabbs, il-promozzjoni ta' nfiq responsabbli u l-protezzjoni tal-vijabbiltà u tas-sostenibbiltà fit-tul tal-klabbs.

(49)

Fl-osservazzjonijiet tagħha dwar il-kummenti ppreżentati mill-partijiet interessati, Spanja tenniet il-pożizzjoni tagħha kif ippreżentata fl-ittra tagħha tas-27 ta' April 2015, li kienet tinkludi ħafna mill-argumenti deskritti fil-premessi minn 36 sa 45 hawn fuq.

(50)

Bis-saħħa tal-Artikolu 107(1) TFUE, kull għajnuna mogħtija minn Stat Membru jew permezz ta' riżorsi tal-Istat fi kwalunkwe forma li twassal għal distorsjoni jew theddida ta' distorsjoni għall-kompetizzjoni, billi tiffavorixxi ċerti impriżi jew ċerti produtturi għandha, sakemm tolqot il-kummerċ bejn l-Istati Membri, tkun inkompatibbli mas-suq intern.

(51)

Sabiex jiġi konkluż jekk hemmx għajnuna mill-Istat preżenti, il-Kummissjoni trid tivvaluta jekk il-kriterji kumulattivi stabbiliti fl-Artikoli 107(1) tat-TFUE (jiġifieri t-trasferiment ta' riżorsi tal-Istat, vantaġġ selettiv, theddida ta' distorsjoni tal-kompetizzjoni u effett fuq il-kummerċ ġewwa l-UE) ġewx issodisfati għal kull waħda mill-erba' miżuri li qed jiġu vvalutati.

(52)

Sabiex titqies bħala għajnuna fis-sens tal-Artikolu 107(1) tat-TFUE, miżura trid tingħata direttament jew indirettament mir-riżorsi tal-Istat u trid tkun imputabbli għall-Istat. Skont il-ġurisprudenza, ir-riżorsi ta' impriża għandhom jitqiesu bħala riżorsi tal-Istat jekk l-Istat ikun jista', billi jeżerċita l-influwenza dominanti tiegħu fuq dawk l-impriżi, jidderieġi l-użu tar-riżorsi tagħhom (11).

(53)

It-trasferiment ta' riżorsi tal-Istat jista' jieħu ħafna forom, inklużi garanziji tal-Istat. Dawn tal-aħħar ipoġġu r-riżorsi tal-Istat f'riskju, peress li x-xiri tagħhom isir permezz tal-baġit tal-Istat. Barra minn hekk, kull garanzija li ma tkunx remunerata sew timplika telf ta' riżorsi finanzjarji għall-Istat. Barra minn hekk, il-ħolqien ta' riskju konkret minħabba l-impożizzjoni ta' piż addizzjonali fuq l-Istat fil-futur, permezz ta' garanzija, huwa biżżejjed għall-finijiet tal-Artikolu 107(1) (12).

(54)

Il-Kummissjoni l-ewwel nett tinnota li l-miżuri kollha taħt skrutinju kienu sottoskritti fl-intier tagħhom minn IVF. Skont l-informazzjoni istituzzjonali pprovduta fuq is-sit web ta' IVF (13), IVF inħoloq mil-Liġi 7/1990 (fit-28 ta' Diċembru 1990), bħala entità regolata mil-liġi pubblika soġġetta għall-Gvern ta' Valencia, u hija maħsuba biex taġixxi bħala l-istrument ewlieni tal-politika ta' kreditu pubbliku u tikkontribwixxi għall-eżerċizzju tas-setgħat tal-Gvern ta' Valencia fuq is-sistema finanzjarja. IVF huwa istituzzjoni pubblika ta' finanzjament taħt il-kontroll tal-Generalitat Valenciana, u r-rappreżentanti ta' dan tal-aħħar jipparteċipaw ukoll fil-Kunsill Ġenerali u fil-Kumitat ta' Investiment ta' IVF. Attwalment, IVF huwa marbut mad-Dipartiment tal-Finanzi tal-Generalitat Valenciana (14).

(55)

Abbażi ta' dan ta' hawn fuq, il-Kummissjoni tosserva li l-objettiv stess ta' IVF huwa marbut mill-qrib mal-amministrazzjoni pubblika u mal-implimentazzjoni tad-deċiżjonijiet ta' awtorità pubblika. In-natura pubblika tal-attivitajiet tal-impriża hija indikatur importanti tal-imputabbiltà tal-aġir ta' impriża għall-Istat (15), partikolarment safejn l-intrapriża tintuża mill-Istat bħala mezz għall-implimentazzjoni ta' politika (16) pjuttost milli għall-eżerċizzju ta' għan purament kummerċjali (17). Spanja ma ppreżentat ebda argument fir-rigward ta' dan l-indikatur. Barra minn hekk, ġie nnotat li r-rappreżentanti tal-Generalitat Valenciana jipparteċipaw fil-Kunsill Ġenerali ta' IVF (ara l-premessa 6 hawn fuq).

(56)

Abbażi tal-kunsiderazzjonijiet ta' hawn fuq, il-Kummissjoni tqis li l-Istat kellu influwenza ċara u diretta fuq IVF. Dan mhuwiex ikkontestat minn Spanja. B'referenza partikolari għal IVF, din tal-aħħar issostni wkoll li l-għoti tal-garanziji inkwistjoni kif wkoll it-termini u l-kundizzjonijiet tagħhom kienu konformi mal-baġits approvati bid-dispożizzjonijiet u bil-limiti previsti mil-leġiżlazzjoni Spanjola (ara l-premessa 37), li juri li l-miżuri inkwistjoni kienu jinvolvu riżorsi tal-Istat. Fid-dawl ta' dan ta' hawn fuq, il-Kummissjoni hija tal-fehma li l-miżuri mogħtija minn IVF jikkostitwixxu riżorsi tal-Istat u huma imputabbli għal Spanja.

(57)

Il-miżuri tal-Istat taħt skrutinju jipprovdu vantaġġ selettiv minħabba li huma għall-benefiċċju ta' impriżi individwali. Fil-każ attwali, il-miżuri tal-Istat inkwistjoni ppermettew il-finanzjament tal-akkwist ta' ishma mill-Fundaciones rispettivi fit-tliet klabbs taħt skrutinju, permezz ta' injezzjonijiet ta' kapital.

(58)

Fir-rigward tal-eżistenza ta' vantaġġ, Spanja ssostni li minħabba l-pjan ta' vijabbiltà tal-2009 id-deċiżjoni dwar l-għoti tal-miżura 1 kienet konformi mal-prinċipju ta' investitur li jopera f'ekonomija tas-suq. Il-Kummissjoni ma tistax taċċetta din id-dikjarazzjoni għar-raġunijiet li ġejjin:

(59)

Abbażi ta' dan ta' hawn fuq, il-Kummissjoni tqis li l-pjan ta' vijabbiltà tal-2009 ma wera l-ebda prospett li Valencia CF kien sejjer iħallas lura s-self garantit tal-2009, peress li ma kien jinkludi l-ebda element ta' rkupru ta' Valencia CF mit-telf annwali tiegħu jew mil-livelli konsiderevolment għoljin ta' dejn u ma kienx jinkludi previżjonijiet finanzjarji kredibbli u elaborati li għandu jinkludi pjan ta' vijabbiltà kredibbli u sod.

(60)

Barra minn hekk, Valencia CF jargumenta li l-proċess ta' offerti miftuħ li tnieda minn Fundacion Valencia, l-għadd kbir ta' offerenti u l-prezz tax-xiri mħallas minn Meriton Holdings Limited ikkonfermaw li l-valur ekonomiku reali ta' Valencia CF jmur lil hinn mill-valur nett rifless fil-kontijiet annwali ta' Valencia CF u jinkludi l-valur tas-suq tal-plejers tiegħu, il-marka kummerċjali tal-klabb u l-projezzjoni internazzjonali tiegħu. Il-Kummissjoni ma tistax taċċetta dan l-argument peress li l-bejgħ tal-ishma tal-klabb lil Meriton Holdings Limited seħħ fl-2014, jiġifieri ħames snin wara l-2009, iż-żmien li fih ingħatat il-miżura 1, u aktar minn tliet snin wara li ngħatat il-miżura 4, u għalhekk mhuwiex rilevanti għall-valutazzjoni tas-sitwazzjoni finanzjarja ta' Valencia CF fl-2009.

(61)

Valencia CF isostni wkoll li l-bejgħ tal-ishma li Fundacion Valencia kien akkwista fl-2009 — li kienu nbiegħu bi prezz ogħla mill-prezz tax-xiri ta' EUR 48,08 għal kull sehem — u l-fatt li dawn l-ishma kienu mirhuna minn IVF għall-garanzija tiegħu, juru li IVF bħala garanti aġixxa skont il-prinċipju ta' investitur li jopera f'ekonomija tas-suq minħabba li l-valur ta' dawk l-ishma kien sejjer ikopri r-riskju ta' IVF bħala garanti. Il-Kummissjoni ma tistax taċċetta din id-dikjarazzjoni minħabba li l-bejgħ tal-ishma inkwistjoni seħħ wara r-rahan tagħhom minn IVF, fis-snin finanzjarji 2010–2011, 2011–2012 u 2013–2014. Għalhekk il-prezzijiet li bihom sar dak il-bejgħ ma jistgħux jitqiesu bħala indikattivi tal-valur tal-ishma inkwistjoni fl-2009.

(62)

Fir-rigward tal-miżura 4 u b'mod partikulari l-parti tagħha li tirrigwarda l-allegata żieda tal-garanzija eżistenti fi Frar 2013, li dwarha l-Kummissjoni fetħet il-proċedura ta' investigazzjoni formali, il-Kummissjoni tinnota li matul il-proċedura ta' investigazzjoni formali l-awtoritajiet Spanjoli ċċaraw li din kienet pagament ta' EUR 4,9 miljuni minn IVF li sar fi Frar 2013 sabiex tiġi koperta l-invokazzjoni parzjali tal-garanzija tal-Istat minn Bankia minħabba li ma kienx sar il-ħlas parzjali tal-imgħax tas-26 ta' Awwissu 2012. Il-Kummissjoni tqis li dan il-ħlas kien it-twettiq tal-obbligu ta' IVF bħala garanti u mhux miżura ġdida favur il-benefiċjarju. Għalhekk, il-Kummissjoni tqis li dan il-pagament ta' Frar 2013 ma kienx ta vantaġġ addizzjonali lill-benefiċjarju u għalhekk ma jikkostitwixxix għajnuna mill-Istat.

(63)

Fir-rigward tal-identifikazzjoni tal-benefiċjarji, il-Kummissjoni tinnota li, skont ġurisprudenza stabbilita, entità li tippossjedi parteċipazzjoni azzjonarja kontrollanti f'kumpanija trid titqies bħala parteċipanti fl-attività ekonomika ta' din tal-aħħar jekk effettivament teżerċita dan il-kontroll billi tinvolvi ruħha direttament jew indirettament fil-ġestjoni tagħha, jekk: a) il-membri tal-bord(ijiet) tagħha jkunu maħtura fil-bord(ijiet) tal-kumpanija kkontrollata; u b) ikun hemm arranġamenti ta' finanzjament fis-seħħ bejn iż-żewġ entitajiet (18).

(64)

Fil-każ attwali, l-injezzjonijiet ta' kapital ippermettew lit-tliet Fundaciones li jakkwistaw parteċipazzjoni azzjonarja kontrollanti fil-klabbs tal-futbol rispettivi tagħhom. B'mod partikolari, Fundacion Valencia sar l-azzjonist ta' 72 % (kontra 1,6 % li kien jikkontrolla qabel l-injezzjoni ta' kapital). Barra minn hekk, ir-rapport annwali ta' Valencia CF (ta' Ġunju 2012) jgħid li Valencia CF jagħmel parti minn grupp ta' kumpaniji li l-kumpanija prinċipali jew azzjonarja tiegħu hija Fundacion Valencia.

(65)

Fir-rigward ta' Fundacion Hercules, huwa akkwista 81,96 %, bl-azzjonist ikklassifikat fit-tieni pożizzjoni jippossjedi 16,99 % (qabel l-injezzjoni ta' kapital Fundacion Hercules ma kellux ishma).

(66)

Fl-aħħar nett, Fundacion Elche akkwista 63,45 % u sar l-uniku azzjonist ta' Elche CF b'aktar minn 10 % (qabel l-injezzjoni ta' kapital ma kellux ishma).

(67)

Fir-rigward tal-membri tal-bordijiet tal-Fundaciones u tal-klabbs tal-futbol, il-Kummissjoni tinnota li: (a) il-membri kollha tal-Bord tad-Diretturi ta' Valencia CF kienu wkoll membri tal-Bord ta' Fundacion Valencia; (b) il-maġġoranza tal-membri tal-Bord tad-Diretturi ta' Elche CF kienu wkoll membri tal-Bord ta' Fundacion Elche; u (c) kif previst mill-istatuti u mir-regolamenti lokali ta' Fundacion Hercules, il-membri tal-Bord tad-Diretturi ta' Hercules CF huma legalment membri tal-korp governattiv ta' Fundacion Hercules (“Patronato”). Fl-aħħar nett, rigward l-arranġamenti ta' finanzjament bejn il-Fundaciones u l-klabbs tal-futbol rispettivi tagħhom, il-Kummissjoni tinnota li tal-ewwel kienu involuti fil-ħlas lura tas-self li kien iffinanzja l-klabbs, pereżempju permezz tal-bejgħ tal-ishma li kienu, b'hekk, akkwistaw. Għalhekk il-Fundaciones kellhom rwol attiv u kontinwu fil-finanzjament tal-klabbs, mhux biss bħala l-partijiet li kienu ffinanzjaw iż-żidiet fil-kapital tal-klabbs iżda wkoll bħala l-partijiet li sservisjaw is-self li permezz tiegħu dawn il-klabbs kienu kisbu dak il-kapital. Dan ta' hawn fuq jindika li t-tliet Fundaciones, bħala entitajiet prinċipali jew azzjonarji, kienu involuti fil-ġestjoni tal-klabbs tal-futbol rispettivi tagħhom.

(68)

Fl-istess ħin, il-Kummissjoni tinnota li, kif iddikjarat fil-kuntratti tas-self u tal-garanziji, il-garanziji għas-self ta' EUR 75 miljun lil Fundacion Valencia, ta' EUR 18-il miljun lil Fundacion Hercules u ta' EUR 14-il miljun lil Fundacion Elche ngħataw minn IVF bl-għan waħdieni sabiex il-Fundaciones jiksbu ishma f'Valenzja CF, f'Hercules CF u f'Elche CF, rispettivament. Il-Kummissjoni tinnota li l-għan ta' din il-kostruzzjoni finanzjarja kien li jiġi ffaċilitat il-finanzjament taż-żidiet fil-kapital tal-klabbs tal-futbol billi l-Fundaciones jintużaw bħala vetturi finanzjarji, u għalhekk l-għan tal-miżuri ma kienx għall-benefiċċju tal-Fundaciones, iżda pjuttost għall-benefiċċju tal-klabbs rispettivi. F'dan ir-rigward, il-Kummissjoni tinnota wkoll li s-sitwazzjoni finanzjarja tal-Fundaciones fiż-żmien li fih ingħataw il-miżuri inkwistjoni (ara t-tabelli 2, 4 u 6) turi li l-pożizzjoni tal-Fundaciones ma tjibitx bis-saħħa tal-garanziji inkwistjoni, iżda baqgħet bħalma kienet qabel, u kompliet tkun karatterizzata minn dħul baxx, telf jew riżultati żero, valur baxx tal-assi u żieda relattiva fid-dejn. Barra minn hekk, minkejja l-fatt li l-Fundaciones kienu l-mutwatarji-debituri tas-self u l-entitajiet koperti mill-garanziji, ir-riskju għall-attivazzjoni tal-garanziji kien marbut mal-prestazzjoni tal-klabbs, peress li l-ħlas lura tas-self garantit (prinċipal u mgħax) kien previst li jseħħ permezz tal-bejgħ tal-ishma akkwistati fil-klabbs tal-futbol. Dan huwa minnu wkoll għall-miżura 4, peress li din tal-aħħar kienet ikkawżata mid-dewmien fil-Fażi 1 tal-bejgħ tal-ishma akkwistati f'Valenzja CF, li kien ippjanat li jiffinanzja l-amortizzazzjoni tas-self.

(69)

Abbażi ta' dan ta' hawn fuq, il-Kummissjoni tqis li l-benefiċjarji tal-miżuri ta' għajnuna inkwistjoni huma Valencia CF għall-miżuri 1 u 4, Hercules CF għall-miżura 2, Elche CF għall-miżura 3.

(70)

Fir-rigward tad-diffikultajiet finanzjarji tal-benefiċjarji, kif diġà ġie nnotat, il-miżuri taħt skrutinju kienu maħsuba sabiex jiġi ffinanzjat il-finanzjament taż-żidiet fil-kapital tal-klabbs tal-futbol u r-riskju għall-attivazzjoni tal-garanziji kien marbut mal-prestazzjoni tal-klabbs tal-futbol, peress li l-ħlas lura tas-self garantit kien previst li jseħħ permezz tal-bejgħ tal-ishma akkwistati fil-klabbs tal-futbol. Abbażi ta' dan ta' hawn fuq, l-analiżi li ġejja hija bbażata fuq id-data finanzjarja ta' Valencia CF, ta' Hercules CF u ta' Elche CF, fil-waqt li tqiesu l-merti individwali ta' kull benefiċjarju individwali.

(71)

Sabiex jiġi stabbilit valur referenzjarju għall-prezz tal-miżuri tal-Istat implimentati konformi mas-suq (u għalhekk sabiex jiġi determinat jekk il-garanziji tal-Istat jikkostitwixxux vantaġġ għall-klabbs), il-Kummissjoni trid tiddetermina l-klassifikazzjoni tal-kreditu tal-benefiċjarji. Spanja ma pprovdietx informazzjoni dwar il-klassifikazzjoni tal-kreditu tal-benefiċjarji, li kienet tapplika fiż-żmien li fih ingħataw il-miżuri. Madankollu, il-Kummissjoni tosserva li, kif stabbilit fid-dettall fit-Tabelli 1, 3 u 5 hawn fuq Valencia CF, Hercules CF u Elche CF kienu f'diffikultà finanzjarja qabel ġew implimentati l-miżuri taħt skrutinju.

(72)

Il-Linji Gwida R&R tal-2004 jipprovdu għad-definizzjoni ta' impriżi f'diffikultà applikata fil-perjodu li fih ingħataw il-miżuri. Il-punt 10(a) tal-Linji Gwida R&R tal-2004 jistabbilixxi li kumpanija tkun f'diffikultà meta “aktar minn nofs il-kapital irreġistrat tagħha jkun għeb u aktar minn kwart ta' dak il-kapital ikun intilef matul it-12-il xahar preċedenti”. Din id-dispożizzjoni tirrifletti s-suppożizzjoni li kumpanija li tkun qiegħda tesperjenza telf kbir fil-kapital reġistrat tagħha ma tkunx kapaċi twaqqaf it-telf li kważi ċertament iwassalha biex toħroġ min-negozju fi żmien qasir jew medju (kif stabbilit fil-punt 9 tal-Linji Gwida R&R tal-2004).

(73)

Fil-każ ta' Valencia CF, kif jidher fir-rapporti finanzjarji tiegħu, fil-perjodu ta' bejn Ġunju 2007 — Ġunju 2009 il-kapital reġistrat tiegħu ma ntilifx iżda baqa' stabbli. Madankollu, ir-rapporti finanzjarji ta' Valencia CF għat-tliet snin fiskali qabel l-għoti tal-garanzija tal-Istat (is-snin finanzjarji li għalqu f'Ġunju 2007, f'Ġunju 2008 u f'Ġunju 2009) juru li f'Ġunju 2007 u f'Ġunju 2009 il-kumpanija kellha ekwità totali negattiva minħabba telf sostanzjali fis-snin rispettivi. Għal din ir-raġuni l-Kummissjoni tqis li japplika l-punt 10(a) tal-Linji Gwida R&R tal-2004, minħabba li l-kapital kollu kien għeb u aktar minn kwart minnu kien intilef fis-sena fiskali li għalqet f'Ġunju 2009. F'każijiet preċedenti, (19) il-Kummissjoni kkonkludiet li, meta kumpanija jkollha ekwità negattiva, ikun hemm suppożizzjoni a priori li l-kriterji tal-punt 10(a) jkunu ssodisfati. F'sentenza riċenti (20), il-Qorti Ġenerali kkonkludiet ukoll li kumpanija b'ekwità negattiva tista' titqies bħala kumpanija f'diffikultà fis-sens tal-Linji Gwida R&R tal-2004. “l-eżistenza ta' kapital proprju negattiv li […] tista' titqies bħala indikatur importanti li impriża tinsab f'sitwazzjoni finanzjarja diffiċli”.

(74)

Il-Kummissjoni tqis li fil-perjodu bejn Ġunju 2007–Ġunju 2009 il-kapital reġistrat ta' Valencia CF jidher li huwa stabbli għaliex matul dak il-perjodu l-klabb ma adotta l-ebda miżura xierqa mmirata sabiex tbiddel l-ekwità proprja minn negattiva għal pożittiva u, fl-istess ħin, iżidha għal livell adegwat. Tali miżuri xierqa jistgħu jkunu jew il-kapitalizzazzjoni tat-telf jew żieda fil-kapital jew it-tnejn. F'dan ir-rigward, il-Kummissjoni tqis li kapitalizzazzjoni tat-telf kien iwassal għat-telf tal-kapital reġistrat kollu tal-klabb, peress li t-telf akkumulat kien ogħla mill-kapital reġistrat. Għal din ir-raġuni l-Kummissjoni tqis li f'dan il-każ il-kriterji fil-punt 10(a) tal-Linji Gwida dwar is-Salvataġġ u l-R&R ġew issodisfati.

(75)

Barra minn hekk, fir-rigward tal-kriterji fil-punt 11 tal-Linji Gwida R&R, il-Kummissjoni tinnota li fis-snin finanzjarji li għalqu f'Ġunju 2007 u f'Ġunju 2009 Valencia CF ġarrab telf sinifikanti, b'telf ta' EUR 26,1 miljuni u EUR 59,2 miljuni, rispettivament. Barra minn hekk, il-fatturat ta' Valencia CF naqas b'aktar minn 20 % minn EUR 107,6 miljuni fis-sena fiskali li għalqet f'Ġunju 2007 għal EUR 99,4 miljuni f'Ġunju 2008 u 'l isfel għal EUR 82,4 miljuni f'Ġunju 2009. Barra minn hekk, Valencia CF kellu livelli sinifikanti ta' dejn, kif jista' jidher mill-proporzjon ta' Dejn-Ekwità tiegħu li f'Ġunju 2008 kien ta' 73,5 u negattiv fl-2007 u fl-2009. Fuq l-istess suġġett, il-Kummissjoni tinnota li wara Ġunju 2010 il-proporzjon tad-Dejn-Ekwità ta' Valencia CF inbidel għal wieħed pożittiv, filwaqt li fis-snin fiskali preċedenti kien negattiv. Madankollu dak l-iżvilupp kien dovut biss għall-injezzjoni ta' kapital li seħħet fl-2009 bis-saħħa tal-garanzija tal-Istat inkwistjoni u mhux bħala riżultat tal-operazzjonijiet tal-klabb. Barra minn hekk, il-Kummissjoni tinnota li minkejja li fis-sena li għalqet f'Ġunju 2010 il-proporzjon tad-Dejn-Ekwità ta' Valencia CF inbidel għal wieħed pożittiv, matul l-istess sena baqa' f'livell għoli, li juri l-livell għoli ta' dejn tal-klabb.

(76)

Barra minn hekk, fis-sena li għalqet f'Ġunju 2011 (is-sena li fiha ngħatat il-miżura 4) Valencia CF kellu żieda fil-fatturat u ppreżenta l-qligħ. Madankollu, il-livell tal-profitti tal-klabb baqa' qrib iż-żero, filwaqt li d-dejn tiegħu baqa' f'livelli sinifikanti.

(77)

L-elementi hawn fuq juru li sa minn Ġunju 2007 u fiż-żmien li fih ingħataw il-miżuri 1 u 4 Valencia CF kien f'diffikultà fis-sens tal-punt 11 tal-Linji Gwida R&R tal-2004 li jgħid li ditta tista' titqies f'diffikultà “meta jkunu preżenti s-sinjali normali […], bħal żieda fit-telf, tnaqqis fil-fatturat, tkabbir fl-inventarju tal-istokk, eċċess ta' kapaċità, tnaqqis fil-fluss tal-flus, żieda fid-dejn, żieda fl-imposta tal-imgħax u tnaqqis fil-valur nett tal-assi jew valur nett tal-assi ta' żero”.

(78)

Fir-rigward ta' Hercules CF, skont id-data finanzjarja tiegħu (ara t-Tabella 3 hawn fuq), fis-snin finanzjarji li għalqu f'Ġunju 2008, 2009 u 2010 it-telf tiegħu baqa' jiżdied (minn EUR 5,7 miljuni fis-sena li għalqet f'Ġunju 2008 għal EUR 17,6 miljuni fis-sena finanzjarja li għalqet f'Ġunju 2010). Dan it-telf wassal għal ekwità negattiva fl-istess snin (ta' EUR 22,6 miljuni, ta' EUR 29,6 miljuni u ta' EUR 29,4 miljuni, rispettivament). Dan juri li fiż-żmien qabel ġiet implimentata l-miżura 2, Hercules CF kien f'diffikultà finanzjarja fis-sens tal-punt 10(a) (bl-istess mod bħal fil-każ ta' Valencia CF, ara l-premessi 74-75 hawn fuq) u 11 tal-Linji Gwida R&R tal-2004.

(79)

Fir-rigward ta' Elche CF, kif jidher fir-rapporti finanzjarji tiegħu (ara t-Tabella 5 hawn fuq), fis-sena finanzjarja li għalqet f'Ġunju 2009 il-klabb kellu tnaqqis fil-fatturat (mill-2008 sal-2010), QQT negattiv fis-snin finanzjarji li għalqu f'Ġunju 2007, 2008, 2009 u 2010, u ekwità proprja negattiva fis-snin li għalqu f'Ġunju 2009 u 2010 (EUR – 10,2 miljuni fis-sentejn finanzjarji). Id-data finanzjarja tal-klabb tjiebet matul is-sena finanzjarja li għalqet f'Ġunju 2011, meta għall-ewwel darba minn Ġunju 2007 ħabbar profitti u għall-ewwel darba minn Ġunju 2009 l-ekwità proprja nbidlet minn negattiva għal waħda pożittiva (EUR 4,3 miljuni). Madankollu dan it-titjib kien dovut għall-injezzjoni ta' kapital li saret fl-istess sena finanzjarja bis-saħħa tal-garanzija tal-Istat inkwistjoni (il-miżura 3). Dawn l-elementi juru li fiż-żmien tal-miżura 3 Elche CF kien f'diffikultà finanzjarja fis-sens tal-punti 10(a) u 11 tal-Linji Gwida R&R tal-2004.

(80)

Fl-istess ħin, il-Kummissjoni tinnota li fis-snin qabel ingħataw il-miżuri taħt skrutinju, Valencia CF, Hercules CF u Elche CF ma kinux f'sitwazzjoni estremament diffiċli, fis-sens tal-punt 2.2 u tal-punt 4.1 l-ittra (a) tal-Avviż ta' Garanzija tal-2008. Wieħed ma jistax jinjora l-fatt li fis-sena finanzjarja li għalqet f'Ġunju 2008 Valencia CF kellu profitti ta' EUR 12,4 miljuni u kellu assi intanġibbli ta' valur sinifikanti fil-forma ta' kuntratti tal-plejers tal-futbol. B'mod partikulari: (a) il-valur kontabilistiku aggregat (il-kost tax-xiri bit-tnaqqis tal-amortizzament annwali) tal-kuntratti tal-plejers ta' Valencia CF, kif rifless fil-kontijiet annwali tiegħu tal-2008/09, kien ta' EUR 95,7 miljuni; (b) f'Ġunju 2009 il-valur globali stmat tas-suq tal-kuntratti tal-plejers ta' Valencia CF kien ta' madwar EUR 235,7 miljuni; u (c) fis-sena finanzjarja li għalqet f'Ġunju 2010 il-kuntratti tal-plejers inbiegħu għal EUR 78,7 miljuni (filwaqt li n-nefqa fuq plejers ġodda laħħqet l-EUR 14,5 miljuni). Fir-rigward ta' Hercules CF, il-klabb wera żieda ta' 35 % fil-fatturat annwali tiegħu, minn EUR 4 miljuni fis-sena li għalqet f'Ġunju 2008 għal EUR 5,4 miljuni fis-sena li għalqet f'Ġunju 2010. Fl-aħħar nett, Elche CF kellu tnaqqis ta' 82 % fit-telf, minn EUR 6,2 miljuni fis-sena li għalqet f'Ġunju 2007 għal EUR 1,1 miljuni fis-sena li għalqet f'Ġunju 2010.

(81)

Barra minn hekk, il-Kummissjoni tinnota li l-metodoloġija standard tal-aġenziji ta' klassifikazzjoni huwa li tqis li debituri f'kontumaċja jaqgħu taħt il-klassifikazzjoni CCC (jew kwalunkwe klassifikazzjoni tal-kategorija C). Pereżempju, id-definizzjoni ta' Standard & Poor's (21) għall-klassifikazzjoni C għal emittenti ta' dejn fuq terminu qasir tittratta debituri “vulnerabbli” (22), filwaqt li d-definizzjoni għall-klassifikazzjonijiet R u SD-D li jaqgħu eżattament taħtha tittratta, rispettivament, debituri “taħt sorveljanza regolatorja” (23) jew f'inadempjenza selettiva jew f'kontumaċja (24). Għalhekk, peress li la Valencia CF, la Hercules CF u lanqas Elche CF ma kienu qegħdin fi proċedimenti ta' insolvenza jew f'kontumaċja fiż-żmien meta ngħataw il-miżuri inkwistjoni, il-Kummissjoni tqis li f'dak iż-żmien il-klassifikazzjoni tagħhom ma kinitx taqa' taħt il-kategorija CCC.

(82)

Fl-aħħar nett, il-Kummissjoni tinnota li l-valur kontabilistiku relattivament għoli tal-plejers tal-futbol ta' Valencia (assi) ma jistax ifisser li l-klabb ma kienx f'diffikultà finanzjarja. Filwaqt li l-valur kontabilistiku tal-plejers ta' Valencia CF kien wieħed konsiderevoli, kif muri fir-rapporti finanzjarji tiegħu, il-valur tal-bejgħ bl-għaġġla tal-istess plejers ikun relattivament baxx minħabba li l-akkwirenti jużaw il-fatt magħruf tad-diffikultajiet tal-bejjiegħ (Valencia CF) sabiex jippruvaw jiksbu prezzijiet baxxi. Barra minn hekk, il-valur tas-suq tal-plejers jiddependi fuq avvenimenti aleatorji bħal korrimenti eċċ, li jagħmel lil dan il-valur tas-suq konsiderevolment volatili. Abbażi ta' dan ta' hawn fuq, il-Kummissjoni ssostni li fiż-żmien li fih ingħataw il-miżuri 1 u 4 Valencia CF kien jinsab f'diffikultà.

(83)

Bħala konklużjoni l-Kummissjoni tqis li minħabba l-fatt li fiż-żmien qabel ġew implimentati l-miżuri t-tliet klabbs kienu f'diffikultà finanzjarja dawn jistgħu jitqiesu li għandhom klassifikazzjoni fil-kategorija CCC (25).

(84)

Valencia CF jappoġġja l-fatt li valur aggregat tas-suq tal-plejers tiegħu flimkien mal-fatt li l-kapital reġistrat tiegħu fil-perjodu ta' bejn l-2007–2009 ma naqasx iżda baqa' stabbli u l-fatt li fl-2011 u fl-2012 l-klabb reġa' beda jagħmel il-qligħ jista' jkun biżżejjed biex tiġi konfutata l-preżunzjoni li Valencia CF kien f'diffikultajiet finanzjarji minħabba li kellu ekwità negattiva matul il-perjodu bejn l-2007–2009. Għar-raġunijiet diġà spjegati fil-premessi 70–83, il-Kummissjoni ma tistax taċċetta l-argumenti ppreżentati hawn fuq.

(85)

Rigward l-element ta' għajnuna fil-miżuri, li kollha jinvolvu garanziji tal-Istat, il-Kummissjoni tieħu inkunsiderazzjoni l-Avviż ta' Garanzija tal-2008, it-Taqsimiet 2.2 u 3.2. L-Avviż ta' Garanzija tal-2008 jistabbilixxi li t-twettiq ta' ċerti kundizzjonijiet jista' jkun biżżejjed għall-Kummissjoni biex teskludi l-preżenza ta' għajnuna mill-Istat, bħall-fatt li l-mutwatarju ma jkunx f'diffikultà finanzjarja u li l-garanzija ma tkoprix aktar minn 80 % tas-self pendenti jew ta' obbligu finanzjarju ieħor. Madankollu, meta mutwatarju ma jħallasx prezz li jġorr riskju għall-garanzija, dan ikun kiseb vantaġġ. Barra minn hekk, meta l-mutwatarju jkun ditta f'diffikultà finanzjarja, mingħajr garanzija tal-Istat ma jirnexxilux isib istituzzjoni finanzjarja li tkun lesta li ssellfu, ikunu xi jkunu l-kundizzjonijiet.

(86)

F'dan ir-rigward, il-Kummissjoni ma taqbilx mal-argument ta' Spanja li l-kundizzjonijiet tal-Avviż ta' Garanzija tal-2008 huma ssodisfati. Bl-applikazzjoni ta' dawn il-kriterji għall-każ inkwistjoni, il-Kummissjoni ssib li:

(87)

Abbażi ta' dan ta' hawn fuq, il-Kummissjoni tikkonkludi li l-miżuri 1, 2, 3 u 4 ma rrispettawx il-kundizzjonijiet stabbiliti fl-Avviż ta' Garanzija tal-2008 u għalhekk tasal għall-fehma li l-benefiċjarji ma kinux jiksbu l-miżuri taħt l-istess termini fis-suq u li għalhekk dawn il-miżuri taw vantaġġ indebitu lill-benefiċjarji.

(88)

Għalhekk, fid-dawl ta' dan ta' hawn fuq, il-Kummissjoni tqis li l-miżuri 1, 2, 3 u 4, mogħtija mill-Istat fl-2009, fl-2010 u fl-2011 taw vantaġġ indebitu lill-benefiċjarji.

(89)

Il-vantaġġ għal klabb professjonali li jilgħab fl-ogħla lîg jew fit-tieni lîg nazzjonali jista' jkollu effett fuq il-kompetizzjoni u fuq il-kummerċ bejn l-Istati Membri. Klabbs professjonali tal-ewwel u tat-tieni lîgs jikkompetu għal preżenza f'kampjonati Ewropej, fi Spanja permezz tal-Koppa Spanjola (“Copa del Rey”) li fiha jikkompetu timijiet mil-La Liga u mis-Segunda A u mis-Segunda B, u r-rebbieħ jipparteċipa fil-UEFA Europa League (sakemm ma jikkwalifikax għall-UEFA Champions League). Fiż-żmien tal-miżuri taħt skrutinju, Valencia CF ipparteċipa f'kompetizzjonijiet internazzjonali (fl-Europa League fl-istaġuni tal-2008–2009 u tal-2009–2010), filwaqt li Hercules CF kien għadu kemm ikkwalifika bħala runner up għas-Segunda División u Elche CF kien qiegħed jilgħab fis-Segunda División (fl-istaġun tal-2013–2014 lagħab f'La Liga). Fiż-żmien tal-miżuri 2 u 3 Hercules CF u Elche CF ipparteċipaw ukoll fil-Copa del Rey. Barra minn hekk, klabbs professjonali fl-ewwel u fit-tieni lîgs huma attivi wkoll fis-swieq tal-merchandising u tad-drittijiet televiżivi. Id-drittijiet tax-xandir, il-merchandising u l-isponsorjar huma sorsi ta' dħul li għalihom dawn il-klabbs jikkompetu ma' klabbs oħra kemm f'pajjiżhom kif ukoll barra minn pajjiżhom. Aktar ma l-klabbs ikollhom fondi disponibbli biex jattiraw l-aqwa plejers possibbli akbar ikun iċ-ċans tagħhom li jirnexxu f'kompetizzjonijiet sportivi, li jipprometti aktar introjtu mill-imsemmija attivitajiet. Għalhekk, il-Kummissjoni tasal għall-fehma li l-miżuri li qed jiġu vvalutati għandhom il-potenzjal li jfixklu jew jheddu li jfixklu l-kompetizzjoni u jaffettwaw il-kummerċ bejn l-Istati Membri.

(90)

Għar-raġunijiet imsemmija hawn fuq, il-Kummissjoni tikkonkludi li l-miżuri 1, 2, 3 u 4 kienu jinvolvu għajnuna mill-Istat mogħtija lil Valencia CF (il-miżura 1 u 4), lil Hercules CF (il-miżura 2) u lil Elche CF (il-miżura 3).

(91)

Fl-Avviż ta' Garanzija tal-2008 il-Kummissjoni stabbilixxiet il-prinċipji ġenerali għall-kalkolu tal-element ta' għajnuna f'garanziji.

(92)

Il-Kummissjoni tinnota li l-miżuri taħt skrutinju ppermettew lill-benefiċjarji biex ikomplu joperaw b'tali mod li, għall-kuntrarju ta' kompetituri oħra b'diffikultajiet finanzjarji, dawk il-benefiċjarji ma kellhomx jiffaċċjaw il-konsegwenzi negattivi li normalment jirriżultaw mir-riżultati finanzjarji tagħhom.

(93)

Skont it-taqsima 4.2 tal-Avviż ta' Garanzija tal-2008, il-Kummissjoni tqis li, għal kull garanzija, l-ammont ta' għajnuna huwa ugwali għall-element ta' sussidju tal-garanzija, jiġifieri l-ammont li jirriżulta mid-differenza bejn, minn naħa waħda, ir-rata tal-imgħax tas-self li tkun ġiet applikata fil-fatt bis-saħħa tal-garanzija tal-Istat flimkien mat-tariffa tal-garanzija u, min-naħa l-oħra, ir-rata tal-imgħax li kieku kienet tiġi applikata għal self mingħajr garanzija tal-Istat. Il-Kummissjoni tinnota li minħabba l-għadd limitat ta' osservazzjonijiet ta' tranżazzjonijiet simili fis-suq, dan il-parametru referenzjarju mhuwiex se jipprovdi tqabbil sinifikanti. Għalhekk il-Kummissjoni se tuża r-rata referenzjali rilevanti (26), li hija ta' 1 000 punt bażi fid-dawl tad-diffikultajiet tat-tliet klabbs tal-futbol u l-valur baxx ħafna tat-titoli tas-self, flimkien ma' 124-149 punt bażi bħala r-rati bażi ta' Spanja fiż-żmien tal-miżuri ta' għajnuna. Tabilħaqq, kull selfa kienet titolizzata b'rahan fuq l-ishma akkwistati fil-klabbs. Madankollu, dawn tal-aħħar kienu f'diffikultà, jiġifieri kienu qed iwettqu operazzjonijiet li jwasslu għal telf, u ma kien hemm l-ebda pjan ta' vijabbiltà kredibbli fis-seħħ biex juri li dawk l-operazzjonijiet kienu sejrin jispiċċaw jagħmlu l-qligħ għall-azzjonisti tagħhom. Għalhekk it-telf ta' dawk il-klabbs kien inkluż fil-valur tal-ishma tal-istess klabbs, u għalhekk il-valur ta' dawk l-ishma bħala titolu ta' self kien viċin iż-żero. Abbażi tal-kalkoli tal-Kummissjoni, l-ammont tal-għajnuna fil-miżuri li qed jiġu vvalutati huwa ta' EUR 20,381 miljun fil-każ ta' Valencia CF (EUR 19,193 miljun taħt il-miżura 1 flimkien ma' EUR 1,188 miljun taħt il-miżura 4), ta' EUR 6,143 miljun fil-każ ta' Hercules CF u ta' EUR 3,688 miljun fil-każ ta' Elche CF. Il-kalkoli tal-Kummissjoni huma kif ġej:

(94)

Abbażi ta' dan ta' hawn fuq, l-element totali ta' għajnuna fil-miżuri 1, 2, 3 u 4 jammonta għal EUR 30,212 miljun.

(95)

Fundacion Valencia jsostni li, jekk jiġi determinat li l-garanzija inkwistjoni tinvolvi xi element ta' għajnuna mill-Istat, fil-valutazzjoni tagħha l-Kummissjoni għandha tqis ukoll il-perjodi ta' sospensjoni jew ta' invalidità tal-garanzija bħala riżultat tad-diversi proċedimenti legali mnedija fi Spanja (ara l-premessa 46(h)). Il-Kummissjoni ma tistax taċċetta din id-dikjarazzjoni peress li qabel il-bejgħ tal-ishma f'Valencia CF ma kienet saret l-ebda kanċellazzjoni irriversibbli tal-garanzija u l-ebda ħlas lura sussegwenti tas-self sottostanti u għalhekk il-vantaġġ mogħti permezz tal-garanzija baqa' fis-seħħ matul il-perjodu bejn l-għoti tal-garanzija u l-kanċellazzjoni tal-garanzija wara l-bejgħ tal-ishma f'Valenzja CF.

(96)

L-Artikolu 108(3) tat-TFUE jiddikjara li Stat Membru ma għandux idaħħal miżura ta' għajnuna fis-seħħ qabel ma l-Kummissjoni tkun adottat deċiżjoni li tawtorizza din il-miżura. Il-Kummissjoni tosserva li l-miżuri identifikati kienu ngħataw bi ksur tan-notifika u tal-obbligi ta' sospensjoni stabbiliti mill-Artikolu 108(3) tat-TFUE. Għalhekk, il-Kummissjoni tqis li l-miżuri 1, 2, 3 u 4 jikkwalifikaw bħala għajnuna illegali mill-Istat.

(97)

Il-Kummissjoni għandha tivvaluta jekk il-miżuri ta' għajnuna identifikati hawn fuq jistgħux jitqiesu kompatibbli mas-suq intern. Skont il-ġurisprudenza tal-Qrati tal-Unjoni, huwa l-kompitu tal-Istat Membru li jinvoka raġunijiet possibbli ta' kompatibbiltà u li juri li l-kundizzjonijiet għal tali kompatibbiltà huma ssodisfati. (29)

(98)

Il-Kummissjoni tinnota li Spanja (jew kull parti interessata) ma pprovdietx kummenti dwar il-kompatibbiltà tal-miżuri 2, 3 u 4 mas-suq intern abbażi tal-Artikolu 107(3)(c) tat-TFUE jew fuq xi bażi oħra.

(99)

Valencia CF jargumenta li l-miżura 1 tkun kompatibbli mal-qafas Komunitarju Temporanju tal-2009 għal miżuri ta' għajnuna mill-Istat biex isostnu l-aċċess għal finanzjament fil-kriżi ekonomika u finanzjarja attwali (30) (“Il-Qafas Temporanju tal-2009”) li ġie adottat biex jiġu indirizzati defiċjenzi li jirriżultaw mill-kriżi ekonomika u finanzjarja li bdiet f'Ottubru 2008. Madankollu, il-Kummissjoni tinnota li d-diffikultajiet ta' Valencia CF kienu bdew qabel il-kriżi finanzjarja, saħansitra fis-sena fiskali li għalqet f'Ġunju 2007 (ara t-Tabella 1 hawn fuq), filwaqt li l-Qafas Temporanju tal-2009 kellu l-għan li jindirizza l-problemi li nqalgħu fil-kuntest tal-kriżi. Tabilħaqq, skont il-punt (i) tat-Taqsima 4.3.2 tal-Qafas Temporanju, “l-għajnuna tapplika biss għal impriżi li ma kinux f'diffikultà fl-1 ta' Lulju 2008; tista' tingħata lil impriżi li ma kinux f'diffikultà f'dik id-data iżda li ltaqgħu mad-diffikultà wara b'riżultat tal-kriżi globali finanzjarja u ekonomika.” Peress li Valencia CF kien ilu f'diffikultà minn Ġunju 2007, il-Kummissjoni tqis li l-Qafas Temporanju tal-2009 ma japplikax għall-miżuri favur Valencia CF.

(100)

Il-Kummissjoni se tivvaluta jekk il-miżuri ta' għajnuna jistgħux jitqiesu bħala kompatibbli skont l-Artikolu 107(3)(c) tat-TFUE li jippermetti għajnuna maħsuba sabiex tiffaċilita l-iżvilupp ta' ċerti attivitajiet ekonomiċi, sakemm dik l-għajnuna ma tfixkilx il-kundizzjonijiet tal-kummerċ sa grad li jkun kuntrarju għall-interess komuni.

(101)

Fil-valutazzjoni tagħha tal-kunċett ta' “żvilupp ta' attivitajiet ekonomiċi” fis-settur sportiv, il-Kummissjoni tieħu kont dovut tal-Artikolu 165(1) tat-TFUE u l-aħħar indent tal-Artikolu 165(2) tat-TFUE li jipprovdu li l-Unjoni għandha tikkontribwixxi għall-promozzjoni ta' kwistjonijiet sportivi Ewropej, filwaqt li tqis in-natura speċifika tal-isport, l-istrutturi tiegħu bbażati fuq attività volontarja u l-funzjoni soċjali u edukattiva tiegħu.

(102)

Fil-kummenti tagħha ppreżentati matul il-proċedura ta' investigazzjoni formali, l-LFP issostni li l-attivitajiet sportivi li jsiru mill-klabbs professjonali tal-isport jaqdu funzjoni ta' servizz pubbliku, u tistabbilixxi li skont l-Artikolu 106(2) tat-TFUE, l-applikazzjoni tar-regoli dwar il-kompetizzjoni għal dawn il-klabbs ma għandhiex tfixkel it-twettiq tal-kompiti partikolari assenjati lilhom. Il-Kummissjoni tinnota li l-miżuri inkwistjoni kienu jappoġġjaw attivitajiet marbuta mal-futbol professjonali aktar milli l-isport amatorjali. Is-servizzi tal-futbol professjonali huma fornuti mill-forzi tas-suq u għalhekk ma hemmx bżonn li l-Istat jattribwixxi obbligi ta' servizz pubbliku għall-provvista ta' tali servizzi. Fl-istess ħin, il-Kummissjoni tinnota li ma ntweriex li s-servizzi ta' Valencia CF kienu ġew attribwiti lilu mill-awtoritajiet Spanjoli b'mod li huwa kompatibbli mal-Artikolu 106(2) tat-TFUE, jiġifieri permezz ta' att li jiddefinixxi b'mod ċar is-servizz pubbliku, it-tul tiegħu jew, il-kumpens relevanti u l-kalkolu tiegħu. Abbażi ta' dan ta' hawn fuq, il-Kummissjoni ma taċċettax li l-miżuri inkwistjoni favur Valencia CF jistgħu jkunu kompatibbli skont l-Artikolu 106(2) tat-TFUE.

(103)

Għall-valutazzjoni tagħha tal-miżuri ta' għajnuna skont l-Artikolu 107(3)(c) tat-TFUE, il-Kummissjoni ħarġet għadd ta' Regolamenti, Oqfsa, Linji Gwida u Komunikazzjonijiet li jittrattaw il-forom ta' għajnuna u l-għanijiet orizzontali jew settorjali li għalihom tingħata għajnuna.

(104)

Fid-dawl tan-natura tal-miżuri inkwistjoni u tal-fatt li l-klabbs tal-futbol inkwistjoni kienu qegħdin jiffaċċjaw diffikultajiet finanzjarji meta ngħatat l-għajnuna u li l-għajnuna ġiet mogħtija bl-għan li jiġu indirizzati dawn id-diffikultajiet, il-Kummissjoni se tivvaluta jekk jistgħux japplikaw il-kriterji stabbiliti fil-Linji gwida R&R tal-2004, peress li dawn tal-aħħar kienu fis-seħħ fiż-żmien meta ngħataw il-miżuri ta' għajnuna inkwistjoni (fl-2009, fl-2010 u fl-2011) u skont il-Linji Gwida, it-tliet klabbs tal-futbol jikkwalifikaw bħala impriżi f'diffikultà. F'dan ir-rigward, Spanja tqis li jekk il-Kummissjoni kellha ssib għajnuna mill-Istat fil-miżuri 1 u 4 din tkun kompatibbli mas-suq intern abbażi tal-Artikolu 107(3)(c) tat-TFUE, u b'mod partikolari bħala għajnuna għar-ristrutturar skont il-Linji Gwida R&R tal-2004.

(105)

Kif se jiġi spjegat hawn isfel, il-Kummissjoni tinnota li l-miżuri ta' għajnuna taħt skrutinju ma jistgħux jitqiesu bħala għajnuna kompatibbli skont il-Linji Gwida R&R tal-2004, minħabba li l-kundizzjonijiet u l-prinċipji ta' dawn tal-aħħar mhumiex issodisfati.

(106)

Skont il-punt 34 tal-Linji Gwida R&R tal-2004, l-għoti ta' għajnuna għar-ristrutturar għandha tkun kondizzjonali fuq l-implimentazzjoni ta' pjan ta' ristrutturar, li għandu jkun approvat mill-Kummissjoni fil-każijiet kollha ta' għajnuna individwali. Il-punt 35 jispjega li l-pjan ta' ristrutturar, li d-durata tiegħu trid tkun l-iqsar possibbli, jrid jirrestawra l-vijabbiltà fit-tul tal-impriża fi żmien raġonevoli u abbażi ta' suppożizzjonijiet realistiċi rigward il-kundizzjonijiet operatorji futuri.

(107)

Skont il-punt 36 tal-Linji Gwida R&R tal-2004, il-pjan ta' ristrutturar irid jiddeskrivi ċ-ċirkostanzi li wasslu għad-diffikultajiet tal-kumpanija u jqis l-istat preżenti u l-prospetti futuri tas-suq fl-aħjar xenarju, fl-agħar xenarju u fix-xenarju bażi.

(108)

Il-pjan għandu jipprovdi għal bidla totali li sejra tippermetti lill-kumpanija, wara li ttemm ir-ristrutturar tagħha, tkopri l-ispejjeż kollha tagħha inklużi d-deprezzament u t-tariffi finanzjarji. Ir-redditu mistenni fuq il-kapital għandu jkun għoli biżżejjed biex jippermetti lid-ditta ristrutturata tikkompeti fis-suq bil-mertu proprju tagħha (punt 37).

(109)

Matul il-proċedura ta' investigazzjoni formali, Spanja rrilevat li d-deċiżjoni dwar l-għoti tal-miżura 1 lil Fundacion Valencia kienet ibbażata fuq pjan ta' vijabbiltà ta' Mejju 2009.

(110)

Il-Kummissjoni tinnota li dan il-pjan ta' vijabbiltà ma jinkludix xenarji li jirriflettu l-aħjar xenarju, l-agħar xenarju u x-xenarju bażi jew analiżi tar-riskji li jista' jkollhom impatt fuq ir-ristrutturar ta' Valencia CF, bħal pereżempju l-effett tal-pjazzamenti differenti possibbli tal-klabb fil-klassifika finali tal-kampjonati, tibdil fil-prezzijiet fis-suq tal-proprjetà immobbli, fis-suq tal-isponsorizzar jew fis-suq tax-xandir, riskji potenzjali dwar il-kapaċità tal-partitarji li jħallsu biljetti staġjonali jew biljetti għal logħba waħda, riskji ta' korriment tal-plejers, tibdil fis-suq ta' trasferimenti tal-plejers eċċ.

(111)

Barra minn hekk, ir-riżultati finanzjarji previsti mill-pjan ta' vijabbiltà kienu taħt livell li jista' jitqies bħala adegwat għar-restawr tal-vijabbiltà fit-tul ta' Valencia CF. Tabilħaqq, kif intwera fit-Tabella 6 hawn fuq, il-pjan ta' vijabbiltà tal-2009 ippreżenta telf operattiv sas-sena fiskali li għalqet f'Ġunju 2013, jiġifieri fl-erba' snin wara l-għoti tal-garanzija tal-Istat tal-2009. Barra minn hekk, il-profitti operattivi previsti għas-snin fiskali li jagħlqu f'Ġunju 2014 u f'Ġunju 2015 kienu f'marġni operattivi baxxi ħafna, ta' 1 % u ta' 4 % rispettivament. Fl-aħħar nett, f'dak li jirrigwarda l-Qligħ Qabel it-Taxxa previst tal-klabb sas-sena ekonomika li tagħlaq f'Ġunju 2015, tapplika l-istess analiżi bħal fil-każ tal-introjtu operatorju hawn fuq, fejn ir-riżultati konsiderevolment għoljin ta' EUR 50,5 miljuni fis-sena fiskali li għalqet f'Ġunju 2011 u ta' EUR 154,8 miljun f'Ġunju 2012 mhumiex rappreżentattivi tal-prestazzjoni finanzjarja tal-klabb iżda jikkostitwixxu riżultati straordinarji li jirriżultaw mill-bejgħ ta' plottijiet ta' art.

(112)

Abbażi ta' dan ta' hawn fuq, fir-rigward tar-ritorn għall-vijabbiltà, il-Kummissjoni tasal għall-konklużjoni li l-impatt tal-miżuri differenti mhuwiex debitament ikkwantifikat u x-xenarji differenti ma jipprevedux vijabbiltà f'livelli adegwati. Għalhekk, il-Kummissjoni tqis li l-pjan ta' vijabbiltà, anki kieku kellu jitqies bħala pjan ta' ristrutturar ġenwin fis-sens tal-Linji Gwida R&R tal-2004, mhuwiex komplet sabiex jippermetti lil Valencia CF li jerġa' jakkwista l-vijabbiltà fit-tul tiegħu fuq perjodu ta' żmien raġonevoli.

(113)

Fir-rigward ta' Hercules CF u Elche CF, il-Kummissjoni tinnota li ma ġie ppreżentat ebda pjan marbut mal-vijabbiltà ta' ebda wieħed minn dawk iż-żewġ klabbs, u għalhekk anki fil-każ ta' dawk iż-żewġ klabbs il-punt 34 tal-Linji Gwida R&R tal-2004 mhuwiex issodisfat.

(114)

Skont il-punt 38 tal-Linji Gwida R&R tal-2004, għandhom jittieħdu miżuri ta' kumpens sabiex jiġi żgurat li kemm jista' jkun jitnaqqsu l-effetti negattivi fuq il-kundizzjonijiet tal-kummerċ. Dawn il-miżuri jistgħu jinkludu l-iżvestiment tal-assi, it-tnaqqis fil-kapaċità jew fil-preżenza fis-suq u t-tnaqqis ta' ostakli għad-dħul fis-swieq ikkonċernati (punt 39).

(115)

F'dan ir-rigward, il-bejgħ ta' assi użati f'attivitajiet li jagħmlu telf li xorta jkunu meħtieġa sabiex titreġġa' lura l-vijabbiltà mhux sejjer jiġi kkunsidrat bħala tnaqqis tal-kapaċità jew tal-preżenza fis-suq għall-finijiet tal-valutazzjoni tal-miżuri ta' kumpens (punt 40).

(116)

Bħala miżuri ta' kumpens għal Valencia CF Spanja tipproponi l-bejgħ tal-aktar plejers ta' valur tal-klabb (ara l-premessa 41 hawn fuq). Madankollu, il-Kummissjoni tinnota li l-plejers mibjugħa kienu qegħdin jintużaw fl-attività tal-klabb li kienet qiegħda tagħmel telf, jiġifieri l-parteċipazzjoni f'kompetizzjonijiet tal-futbol, u għalhekk dan il-bejgħ ma jistax jitqies li kien qiegħed jikkawża tnaqqis fil-kapaċità jew fil-prestazzjoni fl-oqsma profitabbli ta' attività ta' Valencia. Barra minn hekk, il-Kummissjoni tinnota li l-bejgħ tal-plejers imsemmija hawn fuq kien pjuttost meħtieġ bħala miżura ta' ristrutturar għall-vijabbiltà ta' Valencia CF, kif ġie implikat ukoll fil-pjan ta' vijabbiltà tal-2009 ta' dan tal-aħħar. Tabilħaqq, dan il-bejgħ kien meħtieġ sabiex il-klabb jirkupra, permezz taż-żieda fid-dħul u t-tnaqqis tal-ispejjeż għoljin ta' plejers għaljin. Anki jekk finalment dak il-bejgħ seta' jkun ta' benefiċċju għal kompetitur, l-għan ewlieni tiegħu kien li jippermetti l-irkupru ta' Valencia. Għalhekk ma jistax jitqies bħala li kien qiegħed jipprovdi xi benefiċċju għall-kompetituri ta' Valencia CF.

(117)

F'dan l-isfond, il-Kummissjoni tqis li skont il-Linji Gwidi R&R tal-2004 il-miżuri ta' kumpens proposti minn Spanja mhumiex biżżejjed sabiex jiġi żgurat li kemm jista' jkun jiġu minimizzati l-effetti negattivi fuq il-kundizzjonijiet tal-kummerċ li jirriżultaw mill-għoti ta' għajnuna lil Valencia CF.

(118)

Fir-rigward ta' Hercules CF u Elche CF, il-Kummissjoni tinnota li ma ġiet ippreżentata ebda miżura ta' kumpens marbuta ma' xi wieħed minn dawk iż-żewġ klabbs, u għalhekk anki fil-każ ta' dawk iż-żewġ klabbs il-punt 38 tal-Linji Gwida R&R tal-2004 mhuwiex issodisfat.

(119)

Skont il-punt 43 tal-Linji Gwida R&R tal-2004, sabiex l-ammont ta' għajnuna jiġi limitat għall-minimu strett tal-kost għar-ristrutturar neċessarji, hemm bżonn ta' kontribuzzjoni sinifikanti għar-ristrutturar mir-riżorsi proprji tal-benefiċjarju. Dan jista' jinkludi l-bejgħ ta' assi li mhumiex essenzjali għas-sopravivenza tad-ditta, jew finanzjament estern bil-kundizzjonijiet tas-suq.

(120)

Il-kontribuzzjoni proprja għandha tkun reali, jiġifieri attwali, u teskludi l-profitti futuri kollha bħall-fluss tal-flus (punt 43 tal-Linji Gwida R&R tal-2004). Inerentement, il-kontribuzzjoni proprja ma għandha tinkludi ebda għajnuna ulterjuri mill-Istat. Għal ditti kbar bħal Valencia CF (31), il-Kummissjoni ġeneralment tikkunsidra li kontribuzzjoni ta' mill-inqas 50 % tal-kost għar-ristrutturar tkun xierqa. Madankollu, f'ċirkostanzi eċċezzjonali u f'każijiet ta' diffikultajiet partikolari, il-Kummissjoni tista' taċċetta kontribuzzjoni aktar baxxa (il-punt 44 tal-Linji Gwida R&R tal-2004).

(121)

Fid-dawl tal-ammont totali taż-żieda fil-kapital tal-2009 ta' EUR 92,4 miljuni ta' Valencia CF, li jista' jitqies bħala l-kost għar-ristrutturar tiegħu, Spanja tipproponi li l-parteċipazzjonijiet privati fih li laħħqu t-EUR 18,8 miljuni jitqiesu bħala kontribuzzjoni proprja. Madankollu, il-Kummissjoni tinnota li dawk il-parteċipazzjonijiet privati kienu ugwali għal 20 % tal-kost totali għar-ristrutturar. Fuq din il-bażi, il-Kummissjoni tqis li l-parteċipazzjonijiet privati fiż-żieda fil-kapital tal-2009 ta' Valencia CF mhumiex biżżejjed biex jiġu aċċettati bħala kontribuzzjoni proprja.

(122)

Fir-rigward ta' Hercules CF u Elche CF, il-Kummissjoni tinnota li l-miżuri 2 u 3 kienu jikkostitwixxu 100 % tas-sorsi finanzjarji tal-injezzjonijiet ta' kapital rispettivi f'dawk il-klabbs, u għalhekk ma kien hemm ebda parteċipazzjoni privata f'dawk il-miżuri.

(123)

Għalhekk, il-Kummissjoni tqis li r-rekwiżiti tal-punt 43 tal-Linji Gwida R&R tal-2004 ma ġewx issodisfati.

(124)

Fl-aħħar nett, l-għajnuna għandha tirrispetta l-punt 72 tal-Linji Gwida R&R tal-2004, li jipprevedi li kumpanija li matul l-aħħar għax snin tkun irċeviet għajnuna għas-salvataġġ u għar-ristrutturar mhijiex eliġibbli għal għajnuna għas-salvataġġ u għar-ristrutturar (il-prinċipju “tal-ewwel u l-aħħar darba”). Fir-rigward ta' Valencia CF, li bbenefika mill-miżuri 1 u 4, Spanja ssostni li l-miżura 4 hija sempliċiment żieda tal-garanzija eżistenti b'EUR 6 miljuni, u għalhekk ma tistax titqies bħala garanzija ġdida u għajnuna ġdida mill-Istat lil Valencia CF. Madankollu, il-Kummissjoni tinnota li ż-żieda tal-2010 tal-garanzija eżistenti tal-Istat tal-2009 imsemmija hawn fuq ma kinitx prevista jew ipprogrammata mill-bidu, meta ngħatat il-garanzija tal-Istat tal-2009, iżda kellha karattru ad hoc peress li ngħatat sabiex jiġi kopert il-pagament ta' mgħax inadempjenti tas-26 ta' Awwissu 2010 tas-self garantit (ara l-premessa 10 aktar 'il fuq). Għalhekk il-Kummissjoni tqis li miżura 4 tikkostitwixxi garanzija ġdida tal-Istat favur Valencia CF u hija separata mill-miżura 1. Peress li fuq perjodu ta' 10 snin Valencia CF bbenefika darbtejn minn għajnuna għar-ristrutturar, jiġifieri fl-2009 u fl-2010, meta irċieva l-garanzija tal-Istat tal-2009 u ż-żieda tal-2010 tal-garanzija preċedenti (2009), il-Kummissjoni tikkonkludi li l-prinċipju “tal-ewwel u l-aħħar darba” ma ġiex rispettat fir-rigward tal-miżura 4, mogħtija favur Valencia CF.

(125)

Fid-dawl ta' dan ta' hawn fuq, il-Kummissjoni ssib li l-garanzija tal-Istat tal-2009 u ż-żieda tagħha tal-2010 favur Valencia CF, il-garanzija tal-Istat tal-2011 favur Hercules CF u l-garanzija tal-Istat tal-2011 favur Elche CF kienu ngħataw bi ksur tal-Artikolu 108(3) tat-TFUE. Il-Kummissjoni tqis ukoll li l-miżuri ma jissodisfawx il-kundizzjonijiet meħtieġa mil-Linji Gwida R&R tal-2004. Għalhekk, il-Kummissjoni tqis li l-għajnuna mhijiex kompatibbli mas-suq intern.

(126)

Skont it-TFUE u l-ġurisprudenza stabbilita tal-Qorti, il-Kummissjoni hija kompetenti biex tiddeċiedi li l-Istat Membru kkonċernat irid jabolixxi jew jimmodifika l-għajnuna meta tkun sabet li din tkun inkompatibbli mas-suq intern. (32) Il-Qorti sostniet ukoll b'mod konsistenti li l-obbligu fuq Stat Membru li jannulla għajnuna meqjusa mill-Kummissjoni bħala inkompatibbli mas-suq intern huwa mfassal biex jistabbilixxi mill-ġdid is-sitwazzjoni kif kienet qabel. (33) F'dan il-kuntest, il-Qorti ddeċidiet li dan l-objettiv jintlaħaq ladarba l-benefiċjarju jkun ħallas lura l-ammonti mogħtija bħala għajnuna illegali, b'hekk jitlef il-vantaġġ li kellu qabel fuq il-kompetituri tiegħu fis-suq, u terġa' tiġi restawrata s-sitwazzjoni ta' qabel il-ħlas tal-għajnuna (34).

(127)

F'konformità mal-każistika, l-Artikolu 16(1) tar-Regolament tal-Kunsill (UE) 2015/1589 (35) stabbilixxa li “fejn jittieħdu deċiżjonijiet negattivi f'każijiet ta' għajnuna kontra l-liġi, il-Kummissjoni għandha tiddeċiedi li l-Istat Membru kkonċernat għandu jieħu l-miżuri kollha meħtieġa biex jirkupra l-għajnuna mill-benefiċjarju […].”

(128)

Għalhekk, minħabba li l-miżuri inkwistjoni ma kinux ġew notifikati lill-Kummissjoni bi ksur tal-Artikolu 108 tat-TFUE u, għaldaqstant, għandhom jitqiesu bħala illegali u inkompatibbli mas-suq intern, iridu jiġu irkuprati sabiex terġa' tiġi stabbilita s-sitwazzjoni li kienet teżisti fis-suq qabel ma ngħataw. Jenħtieġ li l-irkupru jkopri ż-żmien minn meta l-benefiċjarju rċieva l-vantaġġ, jiġifieri meta l-għajnuniet tqiegħdu għad-dispożizzjoni tal-benefiċjarju, sal-irkupru effettiv, u l-ammonti li għandhom jiġu rkuprati jenħtieġ li jinkludu l-imgħax sal-irkupru effettiv.

(129)

Il-Kummissjoni tinnota li Valencia CF irrileva li (ara l-premessa 41 l-ittra (b) hawn fuq), peress li s-sjieda ta' Valencia CF kienet ġiet trasferita fil-kuntest ta' proċedura ta' offerti kompetittiva u miftuħa, l-element ta' għajnuna (jekk jeżisti) kien ikun rifless fil-prezz tas-suq u inkluż fil-prezz tax-xiri u li għalhekk huwa l-bejjiegħ tal-ishma li jżomm il-benefiċċju tal-għajnuna. Skont Valencia CF, fid-dawl ta' dan ta' hawn fuq, l-ammont tal-għajnuna tal-garanzija tal-Istat irid jiġi rkuprat mingħand il-bejjiegħ Fundacion Valencia.

(130)

Il-Kummissjoni tqis li, kif spjegat fil-premessi (47)-(48) hawn fuq, peress li finalment kien il-klabb li bbenefika mill-miżuri 1 u 4, mal-bejgħ tal-2014, l-għajnuna ġiet trasferita wkoll lill-proprjetarju l-ġdid ta' Valencia CF.

(131)

Il-Kummissjoni tinnota li attwalment Elche CF u Hercules CF huma soġġetti għal proċedimenti kollettivi ta' insolvenza (ara l-premessi 18 u 20 hawn fuq). F'konformità ma' ġurisprudenza stabbilita sew, il-fatt li benefiċjarju huwa insolventi jew soġġett għal proċeduri ta' falliment ma għandu l-ebda effett fuq l-obbligu tiegħu li jħallas lura għajnuna illegali u inkompatibbli (36).

(132)

Il-Kummissjoni tikkonkludi li Spanja implimentat b'mod illegali għajnuna għas-somma ta' EUR 30,212 miljun bi ksur tal-Artikolu 108(3) tat-TFUE, fil-forma ta':

(133)

Il-Kummissjoni tikkonkludi li Spanja ma tatx għajnuna ġdida permezz tal-ħlas tal-2013 ta' EUR 4,9 miljuni tal-garanziji tal-Istat mogħtija minn IVF favur Valencia CF.

(134)

L-għajnuna mhijiex kompatibbli mas-suq intern peress li ma tistax tiġi awtorizzata bħala għajnuna għar-ristrutturar jew bħala xi tip ieħor ta' għajnuna.

(135)

L-ammonti li għandhom jiġu rkuprati huma EUR 20,381 miljun mingħand Valencia CF, EUR 6,143 miljun mingħand Hercules CF u EUR 3,688 miljun mingħand Elche CF.

Miżura 1

Il-garanzija tal-Istat mogħtija minn IVF fil-5 ta' Novembru 2009 għal self bankarju lil Fundación Valencia għas-sottoskrizzjoni ta' ishma f'Valencia CF, fil-kuntest taż-żieda fil-kapital minn Valencia CF, fl-ammont ta' EUR 19,193 miljun.

Miżura 2

Il-garanzija tal-Istat mogħtija minn IVF fis-26 ta' Lulju 2010 għal self bankarju lil Fundación Hercules għas-sottoskrizzjoni ta' ishma f'Hercules CF, fil-kuntest taż-żieda fil-kapital minn Hercules CF, fl-ammont ta' EUR 6,143 miljun.

Miżura 3

Il-garanzija tal-Istat mogħtija minn IVF fis-17 ta' Frar 2011 għal żewġ kuntratti ta' self bankarju lil Fundación Elche għas-sottoskrizzjoni ta' ishma f'Elche CF, fil-kuntest taż-żieda fil-kapital minn Elche CF, fl-ammont ta' EUR 3,688 miljun.

Miżura 4

Iż-żieda mogħtija minn IVF fl-10 ta' Novembru 2010 lil Fundación Valencia, fl-ammont ta' EUR 1,188 miljun għall-ħlas ta' kapital, imgħax u spejjeż mhux imħallsa tas-self garantit bil-miżura 1.

(a)

l-ammont totali (il-kapital u l-imgħaxijiet ta' rkupru) li għandu jiġi rkuprat minn kull benefiċjarju;

(b)

deskrizzjoni dettaljata tal-miżuri li diġà ttieħdu u li huma ppjanati sabiex jikkonformaw ma' din id-Deċiżjoni;

(c)

dokumenti li juru li l-benefiċjarji ġew ordnati jħallsu lura l-għajnuna.