(1)

Permezz ta' notifika elettronika rreġistrata fit-30 ta' Ġunju 2014, il-Portugall innotifika għajnuna għall-investiment reġjonali li huwa kien ta, soġġett għall-approvazzjoni tagħha mill-Kummissjoni, fit-30 ta' April 2014 lil Volkswagen Autoeuropa, Lda (minn hawnhekk 'il quddiem “Autoeuropa”).

(2)

Permezz ta' ittra tat-2 ta' Ottubru 2014, il-Kummissjoni infurmat lill-Portugall li hija kienet iddeċidiet li tibda l-proċedura stabbilita fl-Artikolu 108(2) tat-Trattat dwar il-Funzjonament tal-Unjoni Ewropea fir-rigward tal-għajnuna.

(3)

Id-deċiżjoni tal-Kummissjoni li tagħti bidu għall-proċedura ġiet ippubblikata f'Il-Ġurnal Uffiċjali tal-Unjoni Ewropea (2). Il-Kummissjoni stiednet lill-partijiet interessati jissottomettu l-kummenti tagħhom.

(4)

Il-Portugall issottometta kummenti dwar id-deċiżjoni ta' ftuħ fil-15 ta' Diċembru 2014 (2014/127950); kienet ipprovduta aktar informazzjoni bł-ittri tas-27 ta' Frar 2015 (2015/019588), tat-12 ta' Ġunju 2015 (2015/056315) u tas-27 ta' Lulju 2015 (2015/073908). Fid-19 ta' Mejju 2015 fil-bini ta' Autoeuropa saret laqgħa bejn is-servizzi tal-Kummissjoni, l-awtoritajiet Portugiżi u l-benefiċjarju.

(5)

Il-Kummissjoni ma rċeviet ebda kumment mingħand il-partijiet interessati.

(6)

Bl-għoti tal-għajnuna għall-investiment fl-istabbiliment eżistenti ta' Autoeuropa f'Palmela, fir-reġjun tal-Peninsula de Setubal, reġjun eliġibbli għall-għajnuna reġjonali skont l-Artikolu 107(3)(c) TFUE, b'limitu massimu standard ta' 15 % ta' għajnuna reġjonali għall-intrapriżi kbar skont il-mappa Portugiża tal-għajnuna reġjonali għall-perjodu 2007 — Ġunju 2014 (3), il-Portugall beħsiebu jkompli jiżviluppa r-reġjun ikkonċernat.

(7)

Il-benefiċjarju tal-għajnuna huwa Autoeuropa, kumpanija sussidjarja 100 % tal-Grupp Volkswagen (minn hawnhekk 'il quddiem “Grupp VW”). Il-Grupp VW ġie deskritt f'diversi deċiżjonijiet dwar għajnuna mill-Istati, l-aktar riċentement fid-deċiżjoni tal-Kummissjoni tad-9 ta' Lulju 2014 li tiftaħ l-investigazzjoni formali dwar l-għajnuna reġjonali favur AUDI HUNGARIA MOTOR Ltd. (4) li l-Kummissjoni tirreferi għaliha għal deskrizzjoni ulterjuri tal-Grupp VW.

(8)

Autoeuropa ilha attiva fir-reġjun ta' Setubal minn Ġunju 1991, tipproduċi diversi mudelli ta' karozzi tal-passiġġieri taħt il-marka VW. Autoeuropa hija kumpanija kbira. La l-Grupp VW u lanqas Euroeuropa ma jistgħu jitqiesu bħala kumpanija f'diffikultà skont it-tifsira tal-linji gwida Komunitarji dwar l-għajnuna mill-Istat għas-salvataġġ u r-ristrutturar ta' kumpaniji f'diffikultà (5) fis-seħħ fiż-żmien tan-notifika.

(9)

Il-proġett ta' investiment jikkonsisti fl-introduzzjoni ta' teknoloġija ġdida ta' produzzjoni, imsejħa “Modularer Querbaukasten” (minn hawnhekk 'il quddiem “MQB”) li tieħu post il-produzzjoni tradizzjonali bbażata fuq pjattaforma. Din it-teknoloġija ġdida ta' produzzjoni tippermetti flessibbiltà kbira fil-produzzjoni ta' mudelli ta' karozzi tal-passiġġieri u r-realizzazzjoni ta' effetti maġġuri ta' sinerġija fil-produzzjoni tagħhom. Il-Kummissjoni tirreferi għad-deċiżjoni tagħha tat-13 ta' Lulju 2011 li tiftaħ investigazzjoni formali dwar l-għajnuna reġjonali favur Volkswagen Sachsen (6) għal deskrizzjoni aktar dettaljata tat-teknoloġija.

(10)

L-investiment f'Palmela jippermetti lil Autoeuropa li tipproduċi karozzi tal-passiġġieri li jappartjenu għal tliet segmenti differenti tas-suq tal-karozzi tal-passiġġieri definiti skont il-klassifikazzjoni ta' POLK (7), jiġifieri s-segment A0, is-segment A u s-segment B. Fil-preżent, il-Grupp VW beħsiebu jipproduċi fuq il-linja ta' produzzjoni l-ġdida SUV li tappartjeni għas-segment A0, u karozza tal-passiġġieri li għadha ma ġietx definita b'mod sħiħ li tappartjeni għas-segment […] (*1), li għandha tieħu post il-mudell attwali bbażat fuq pjattaforma tas-segment […] ta' Autoeuropa. Il-Grupp VW ma eskludiex il-possibbiltà li jibda l-produzzjoni ta' karozza tal-passiġġieri li tappartjeni għas-segment B fi żmien ħames snin wara t-tlestija tal-investiment. Il-kapaċità globali maħluqa bl-investiment tammonta għal [140 000-160 000] karozza fis-sena, li minnha, abbażi tal-pjanijiet preżenti, kapaċità ta' [80 000-100 000] hija ddedikata għall-produzzjoni tal-SUV A0 u kapaċità ta' [50 000-60 000] hija indikata għall-mudell tas-segment […].

(11)

L-investiment beda fis-26 ta' Ġunju 2014, u huwa previst li jitlesta fil-biċċa l-kbira tiegħu sa Diċembru 2018. Il-produzzjoni sħiħa hija ppjanata għall-aħħar tal-2018.

(12)

Skont il-kuntratt ta' investiment u għajnuna ffirmat bejn il-Portugall u l-Grupp VW u s-sottomissjoni tal-Portugall tat-28 ta' Lulju 2014, l-investiment jinvolvi nefqa eliġibbli ta' EUR 672,9 miljun għat-tagħmir u x-xogħlijiet ta' infrastruttura (bini) li se tkun imġarrba bejn l-2014 u l-2019. Madwar kwart ta' dik in-nefqa se jkun għall-għodod destinati għall-fornituri, jiġifieri assi kapitali ffinanzjati minn Autoeuropa li mhumiex se jintużaw fl-istabbiliment ta' Autoeuropa f'Palmela, iżda se jitpoġġew disponibbli minn Autoeuropa għall-fornituri tagħha, sabiex jintużaw fl-istabbilimenti tal-fornituri għall-produzzjoni ta' partijiet u komponenti għall-Grupp VW. Dawn l-assi, għalkemm se jiffurmaw parti integrali mill-istokk produttiv tal-fornituri, se jibqgħu proprjetà tal-Grupp VW.

(13)

In-nefqa tirreferi esklussivament għal assi tanġibbli ġodda. It-tabella ta' hawn taħt derivata mill-kuntratt ta' investiment tqassam in-nefqa eliġibbli ppjanata skont it-tip u s-sena.

Tabella 1

Tqassim tan-nefqa eliġibbli f'miljuni ta' EUR — Kuntratt ta' investiment

(14)

Dan it-tqassim tal-ispejjeż li huwa bbażat fuq l-informazzjoni fil-kuntratt ta' investiment huwa differenti mit-tqassim tal-ispejjeż fl-iskeda supplimentari mehmuża man-notifika. Fl-iskeda supplimentari, l-awtoritajiet Portugiżi spjegaw li l-Grupp VW baxxa l-ispejjeż ta' investiment totali ta' EUR 672,95 miljun speċifikati fil-kuntratt ta' investiment għal EUR 623,85 miljun. It-tqassim li jirriżulta mill-iskeda supplimentari huwa mogħti fit-tabella ta' hawn taħt.

Tabella 2

Tqassim tan-nefqa eliġibbli f'miljun EUR — Skeda supplimentari

(15)

Il-bażi ġuridika nazzjonali għall-għoti tal-għajnuna hija l-Ordni Amministrattiv Nru 287/2007, tas-17 ta' Awwissu, kif emendat bl-Ordni Amministrattiv Nru 65/2009, tal-20 ta' Marzu li japprova l-qafas nazzjonali tal-inċentivi għall-investiment fin-negozju u l-Ordinanza Nru 1464/2007, tal-15 ta' Novembru, kif emendata bl-Ordinanza 1103/2010, tal-25 ta' Ottubru li toħloq u tirregola l-iskema ta' għajnuna “Sistema de Incentivos a Inovação”.

(16)

Il-Portugall ta l-għajnuna, soġġetta għall-approvazzjoni tal-Kummissjoni, b'applikazzjoni tal-iskema ta' għajnuna tiegħu “Sistema de Incentivos a Inovação”. Din l-iskema ta' għajnuna kienet eżentata kollha b'applikazzjoni tar-Regolament tal-Kummissjoni (KE) Nru 800/2008 (8) (minn hawnhekk 'il quddiem “GBER 2008”), għal applikazzjonijiet għall-għajnuna taħt il-livell limitu ta' notifika stabbilit fl-Artikolu 6 tagħha.

(17)

L-għajnuna ngħatat, soġġetta għall-approvazzjoni tal-Kummissjoni, permezz ta' kuntratt ta' għajnuna u investiment iffirmat fit-30 ta' April 2014. Ix-xogħlijiet fuq l-investiment bdew fis-26 ta' Ġunju 2014, jiġifieri wara l-iffirmar tal-kuntratt.

(18)

L-għajnuna hija mogħtija fil-forma ta' għotja parzjalment rimborżabbli. Il-kuntratt ta' investiment jirreferi għal għotja rimborżabbli ta' EUR 52,49 miljun (f'valur nominali) għan-nefqa ta' investiment (inkluż l-għodod destinati għall-fornituri) ta' EUR 672,95 miljun li tiġi parzjalment trasformata f'għotja diretta jekk Autoeuropa tissodisfa ċerti parametri ta' realizzazzjoni maqbula b'mod kuntrattwali. In-notifika tindika li ppjanar aktar riċenti tal-ispejjeż mill-Grupp VW wassal għal ammont daqsxejn aktar baxx ta' nefqa ta' investiment (EUR 623,9 miljun). Meta jitqies dak l-ammont aktar baxx, l-ammont ta' għajnuna nnotifikat u l-intensità tal-għajnuna nnotifikata, fil-prezzijiet tal-2014, huma EUR 36,15 miljun u 6,03 % rispettivament. Il-Portugall jimpenja ruħu li ma huwa se jinqabeż la l-ammont ta' għajnuna nnotifikat u lanqas l-intensità tal-għajnuna nnotifikata, jekk in-nefqa eliġibbli realizzata tiddevja mill-ammont ippjanat tan-nefqa eliġibbli, kif meqjus fin-notifika u fil-kalkolu tal-ammont massimu ta' għajnuna.

(19)

Il-Portugall jikkonferma li kontribuzzjoni proprja ħielsa minn kwalunkwe appoġġ pubbliku ta' mill-anqas 25 % tan-nefqa eliġibbli se tintrefa' minn Autoeuropa/Volkswagen mir-riżorsi proprji tagħha.

(20)

Autoeuropa/Volkswagen timpenja ruħha li żżomm l-investiment matul perjodu minimu ta' ħames (5) snin wara t-tlestija tiegħu.

(21)

Fid-deċiżjoni ta' ftuħ, il-Kummissjoni esprimiet dubji dwar il-konformità tal-miżura mad-dispożizzjonijiet tal-Linji gwida dwar l-għajnuna reġjonali nazzjonali għall-perjodu 2007-2013 (9) (minn hawnhekk 'il quddiem “RAG 2007-13”) rigward in-nefqa eliġibbli, l-ammont massimu ta' għajnuna, u l-intensità massima tal-għajnuna, u għalhekk dwar il-kompatibbiltà tagħha mas-suq intern.

(22)

Il-Kummissjoni nnotat li n-nefqa eliġibbli nnotifikata kienet tinkludi l-ispejjeż għall-għodod destinati għall-fornituri, li l-Kummissjoni esprimiet dubji dwar l-eliġibbiltà tagħhom u għalhekk ma setgħetx tikkonferma li l-ammont massimu nnotifikat tal-għajnuna, li huwa kkalkulat fir-rigward tan-nefqa ta' investiment totali nnotifikata, ma jaqbiżx l-ammont massimu li jista' jiġi permess.

(23)

Barra minn hekk il-Kummissjoni nnotat li Autoeuropa rċeviet għajnuna għall-investiment għal proġett ieħor ta' investiment imwettaq fl-istess sit. Il-bidu tax-xogħlijiet fuq il-proġett l-ieħor ta' investiment kien anqas minn tliet snin qabel il-bidu tax-xogħlijiet fuq il-proġett ta' investiment preżenti. Il-proġett ta' investiment kellu l-għan li jġedded u jottimizza l-proċess tal-produzzjoni, billi jwettaq investimenti fi tliet oqsma ta' prijorità: (i) fil-qasam tat-teknoloġija tal-informatika, permezz tal-implimentazzjoni ta' programmi u l-aktar sistemi teknoloġikament avvanzati, (ii) fil-qasam taż-żebgħa interna u esterna tal-vetturi, permezz tal-awtomatizzazzjoni tal-metodu ta' applikazzjoni taż-żebgħa u (iii) fil-qasam tal-matriċi tal-istampar, li jintużaw biex jinħolqu l-forom għall-partijiet stampati. Fiż-żmien tad-deċiżjoni ta' ftuħ, il-Portugall ma kkjarifikax sa fejn dan it-titjib se jkun rilevanti u xorta jintuża f'każ li tieqaf il-manifattura bbażata fuq pjattaforma u tiġi sostitwita b'teknoloġija tal-manifattura MQB.

(24)

Fuq il-bażi tal-informazzjoni ppreżentata mill-Portugall, il-Kummissjoni ma setgħetx tifforma opinjoni definittiva dwar jekk iż-żewġ proġetti ta' investiment jiffurmawx proġett uniku ta' investiment fis-sens tal-paragrafu 60 tar-RAG 2007-13 u ddeċidiet li tivvaluta l-kwistjoni ta' jekk iż-żewġ proġetti humiex ekonomikament indiviżibbli skont it-tifsira tan-nota 55 f'qiegħ il-paġna (10) tar-RAG 2007-13 matul l-investigazzjoni formali

(25)

Barra minn hekk, il-paragrafu 68 tar-RAG 2007-13 jitlob li l-Kummissjoni tiftaħ l-investigazzjoni formali u tipproċedi għal valutazzjoni fil-fond tal-effett inċentiv, il-proporzjonalità, kif ukoll l-effetti pożittivi u negattivi tal-għajnuna, meta s-sehem mis-suq tal-benefiċjarju fis-suq tal-prodott u ġeografiku rilevanti jaqbeż 25 % qabel u wara l-investiment (minn hawnhekk 'il quddiem imsejjaħ ukoll it-“test skont il-paragrafu 68(a)”) jew meta l-kapaċità maħluqa mill-investiment taqbeż 5 % ta' suq li jkun fi tnaqqis relattiv jew assolut (minn hawnhekk 'il quddiem imsejjaħ ukoll it-“test skont il-paragrafu 68(b)”). Meta tkun meħtieġa valutazzjoni fil-fond, din se titwettaq abbażi tal-Komunikazzjoni mill-Kummissjoni rigward il-kriterji għal valutazzjoni fil-fond tal-għajnuna reġjonali għal proġetti kbar ta' investiment (11) (IDAC).

(26)

Fid-deċiżjoni ta' ftuħ, il-Kummissjoni ħalliet id-definizzjoni eżatta tas-suq rilevanti tal-prodott miftuħa u qieset id-definizzjonijiet alternattivi plawżibbli kollha tas-suq, inkluż b'mod partikolari l-aktar segmentazzjoni dejqa li għaliha hemm dejta disponibbli. (12) Billi Autoeuropa se tipproduċi karozzi li jappartjenu għas-segmenti A0 u […] skont POLK, u tista' tipproduċi wkoll karozzi li jappartjenu għas-segment B skont POLK, il-Kummissjoni qieset li dawn is-segmenti individwali u għall-SUVs anki s-segment SUV-B skont Global Insight (13), kif ukoll is-segment magħqud (A0 sa B) skont POLK għandhom kollha jitqiesu bħala swieq plawżibbli rilevanti għal dan il-każ.

(27)

Il-paragrafu 70 tar-RAG 2007-13 jipprovdi li għall-finijiet tat-twettiq tat-testijiet skont il-paragrafu 68, is-swieq normalment għandhom jiġu definiti fil-livell taż-ŻEE. Għall-finijiet tal-valutazzjoni tal-każ preżenti, il-Kummissjoni qieset li s-suq ġeografiku rilevanti għall-prodotti kkonċernati huwa mill-anqas iż-ŻEE kollha. L-awtoritajiet Portugiżi u Autoeuropa aċċettaw li l-Kummissjoni tapplika din id-definizzjoni ta' suq ġeografiku għall-iskopijiet ta' din in-notifika.

(28)

Matul l-investigazzjoni preliminari, l-analiżi skont il-paragrafu 68 (a) tar-RAG 2007-13 waslet għar-riżultat li l-livell limitu applikabbli ta' 25 % sehem mis-suq jinqabeż fis-segmenti A u B individwali u fis-segmenti A0, A u B kombinati (skont POLK) fiż-ŻEE fis-snin kollha kkonċernati.

(29)

Billi r-riżultat tat-test skont il-paragrafu 68(a) diġà kien jeħtieġ proċediment għall-valutazzjoni fil-fond tal-għajnuna, il-Kummissjoni qieset li ma kienx hemm bżonn li jitwettaq it-test skont il-paragrafu 68(b).

(30)

Ma kinux sottomessi kummenti minn partijiet terzi interessati.

(31)

Il-Portugall iqis l-investimenti li jammontaw għal EUR 136,3 miljun fl-għodod destinati għall-forntituri bħala eliġibbli, billi l-għodod huma parti mill-proġett innotifikat, jappartjenu għall-assi fissi ta' Autoeuropa, jinsabu f'impjant ta' fornitur f'żona megħjuna fil-Portugall, u se jinżammu hemmhekk għal mill-anqas ħames snin wara t-tlestija tal-proġett. L-awtoritajiet Portugiżi jirreferu għall-premessi 36 u 37 tad-deċiżjoni C(2002)1803 Ford España SA (14) li fihom il-Kummissjoni nnotat li n-nefqa għall-għodod destinati għall-fornituri tista' titqies bħala eliġibbli għall-għajnuna reġjonali jekk tkun imġarrba f'reġjuni megħjuna.

(32)

Qabel ma ffirmaw il-kuntratt ta' investiment f'April 2014, il-Grupp VW u Autoeuropa żviluppaw pjan ta' investiment fir-rigward tal-għodod destinati għall-fornituri li qies dawn il-kriterji ta' eliġibbiltà u assigura li l-ammont ta' EUR 136,3 miljun kien jinkludi biss nefqa għall-għodod destinati għall-fornituri li kienet tissodisfa l-kundizzjonijiet ta' hawn fuq. L-awtoritajiet Portugiżi stabbilew mekkaniżmu ta' kontroll sabiex jimmonitorjaw il-konformità mal-kundizzjonijiet ta' hawn fuq.

(33)

Fit-8 ta' Ottubru 2013 il-Portugall iffirma kuntratt ta' investiment ma' Autoeuropa dwar tliet proġetti differenti, li kull wieħed minnhom jirrappreżenta investiment inizjali mmirat għall-espansjoni tal-istabbiliment eżistenti li l-Portugall ma jqisx li jifforma proġett ta' investiment uniku fis-sens tal-paragrafu 60 tar-RAG 2007-13 mal-proġett ta' investiment innotifikat.

(34)

L-ewwel proġett kien jirrigwarda l-introduzzjoni ta' robots għall-awtomatizzazzjoni tal-proċess tal-għoti taż-żebgħa ta' ġewwa u ta' barra li tippermetti titjib fil-kwalità (omoġeneità fid-dehra ta' barra, tnaqqis fil-ħxuna taż-żebgħa, tnaqqis fl-isprej eċċessiv, tnaqqis tal-ħmieġ fil-parti ta' ġewwa) u fil-produttività kif ukoll titjib fl-ergonomija u fil-protezzjoni tal-ħaddiema u tnaqqis fil-konsum tal-materjali u fil-ħela taż-żebgħa. L-ispejjeż eliġibbli korrispondenti ammontaw għal EUR 20 miljun (15) u l-ammont tal-għajnuna kien ta' EUR 2,89 miljuni f'ekwivalenti tal-għotja grossa (EGħG).

(35)

L-awtoritajiet Portugiżi jissottolinjaw li dan l-investiment mhuwiex marbut b'mod ekonomikament indiviżibbli mal-proġett ta' investiment innotifikat. Il-proġett ta' investiment innotifikat huwa mmirat għal bidla fundamentali fil-proċess ġenerali tal-produzzjoni billi jimplimenta t-teknoloġija ta' produzzjoni MQB. Filwaqt li din teħtieġ investimenti sostanzjali b'mod partikolari fil-faċilitajiet ta' assemblaġġ, l-implimentazzjoni tat-teknoloġija MQB teħtieġ biss investimenti żgħar fil-workshop taż-żebgħa eżistenti.

(36)

Il-workshop taż-żebgħa eżistenti kien funzjonali qabel u mingħajr l-investiment fl-MQB. Bl-istess mod, il-faċilitajiet ta' assemblaġġ MQB il-ġodda huma funzjonali mingħajr l-investimenti fil-workshop taż-żebgħa, jiġifieri l-produzzjoni MQB tkun possibbli u funzjonali mingħajr l-investiment preċedenti fir-robots fil-workshop taż-żebgħa. Għalhekk, għalkemm iż-żewġ faċilitajiet huma parti minn proċess integrat ta' manifattura tal-karozzi, ma humiex marbuta mill-investimenti b'mod ekonomikament indiviżibbli.

(37)

Barra minn hekk, id-deċiżjonijiet rilevanti ta' investiment ittieħdu b'mod indipendenti (il-modernizzar tal-workshop taż-żebgħa: Awwissu 2011; l-investiment fl-MQB: Mejju 2014).

(38)

It-tieni proġett kien jirrigwarda l-workshop tal-għodod ta' Autoeuropa li jipproduċi forom u għodod għall-qtugħ ta' forom u profili għall-partijiet tal-metall tal-karozzerija. Huwa jispeċjalizza fil-produzzjoni ta' għodod għall-hoods u l-fenders tal-magni. Il-workshop tal-għodod iwassal il-prodotti tiegħu lill-fabbriki tal-Grupp VW madwar id-dinja kollha, jiġifieri mhuwiex limitat għall-forniment lil Autoeuropa. Huwa parti minn Autoeuropa, madankollu jopera b'mod awtonomu u indipendenti mill-attività prinċipali tal-fabbrika li hija l-produzzjoni tal-vetturi.

(39)

L-għan tal-investiment inizjali fil-workshop tal-għodod kien l-estensjoni tal-istabbiliment eżistenti. Biex tikseb sett ta' titjib teknoloġiku ta' impatt għoli fil-kwalità tal-produzzjoni, Autoeuropa akkwistat tagħmir ġdid għall-għodod għall-qtuħ ta' forom u profili fil-metall biex tippermetti l-kostruzzjoni ta' għodod b'livelli ogħla ta' kwalità u biex iżżid il-volum tal-produzzjoni tal-workshop tal-għodod. L-investiment eliġibbli kien ta' EUR 12,7-il miljun (valur skontat ta' EUR 12,66-il miljun) u l-ammont ta' għajnuna kien ta' EUR 1,84 miljun f'EGħG.

(40)

Billi l-workshop tal-għodod jiffunzjona b'mod indipendenti mill-proċess ta' manifattura tal-karozzi MQB, jinsab fl-istess żona industrijali iżda mhux fuq l-istess plott ta' art bħas-sit tal-manifattura tal-karozzi u d-deċiżjonijiet dwar l-investimenti ttieħdu b'mod indipendenti minn xulxin (għall-immodernizzar tal-workshop tal-għodod fl-2011 u għall-investiment fl-MQB f'Mejju 2014), l-awtoritajiet Portugiżi jqisu li l-investiment fil-workshop tal-għodod ma huwiex marbut b'mod ekonomikament indiviżibbli mal-proġett ta' investiment innotifikat.

(41)

It-tielet proġett kien jirrigwarda investimenti fil-ħardwer tal-IT li żdiedu f'kombinazzjoni ma' applikazzjonijiet ġodda ta' softwer għas-sigurtà tal-IT u wasslu għal produzzjoni aktar stabbli fi ħdan il-produzzjoni tal-karozzi. Il-produzzjoni tal-karozzi tiddependi ħafna fuq sistemi tal-IT li jaħdmu b'mod affidabbli u mingħajr problemi, billi l-konfigurazzjoni ta' kull karozza (tip ta' magna, gearbox, kulur, eċċ.) tiddaħħal fil-proċess ta' produzzjoni permezz tan-netwerk tad-dejta tal-grupp. L-investiment eliġibbli kien ta' EUR 5,5 miljun (valur skontat ta' EUR 5,5 miljun) u l-ammont ta' għajnuna kien ta' EUR 0,79 miljun f'EGħG.

(42)

L-awtoritajiet Portugiżi jqisu dan l-investiment tal-2011 fl-IT bħala mhux marbut b'mod ekonomikament indiviżibbli mal-proġett ta' investiment innotifikat. It-teknoloġija ġdida ta' produzzjoni MQB hija possibbli u funzjonali mingħajr l-investiment ta' qabel fis-sigurtà tal-IT minħabba li l-applikazzjonijiet kollha li jappoġġaw u jikkontrollaw il-produzzjoni MQB kienu jaħdmu l-istess mingħajr dan l-investiment ta' qabel. L-investiment fl-IT kien funzjonali qabel u mingħajr l-investiment fl-MQB.

(43)

Barra minn hekk, id-deċiżjonijiet ta' investiment ittieħdu b'mod indipendenti minn xulxin, għall-investiment fil-qasam tal-IT fl-2011 u għall-investiment fl-MQB f'Mejju 2014.

(44)

Il-Portugall ipprovda l-informazzjoni neċessarja sabiex titwettaq valutazzjoni fil-fond.

(45)

Il-Portugall beħsiebu jkompli jiżviluppa r-reġjun ikkonċernat. L-investiment għandu joħloq 500 impjieg dirett ġdid, u jassigura, fuq perjodu fit-tul, iż-żamma ta' 3 339 impjieg eżistenti.

(46)

Il-proġett innotifikat se jżid b'mod sostanzjali l-kwalifika u l-ħiliet tal-impjegati tal-benefiċjarju, u hekk iżid l-impjegabbilità tagħhom fi ħdan u barra l-Grupp VW u l-Portugall, u jżid il-bażi tal-ħiliet reġjonali. Huma ppjanati azzjonijiet speċifiċi ta' taħriġ. Dan it-taħriġ vokazzjonali għandu wkoll effett pożittiv fuq it-trasferiment tal-għarfien prinċipalment fi ħdan ir-reġjun tal-Peniżola ta' Setubal.

(47)

Il-proġett ta' investiment se joħloq aktar opportunitajiet ta' negozju għall-fornituri ta' Autoeuropa. Skont studju taċ-Ċentru tar-Riċerka Awtomobilistika, in-numru totali ta' impjiegi maħluqa b'riżultat ta' impjieg wieħed maħluq fl-industrija awtomobilistika jammonta għal 2,5 impjiegi ġodda għand il-fornituri u 2,2 impjiegi ġodda f'kumpaniji oħra, maħluqa b'riżultat tal-infiq tal-impjegati tal-fornituri fil-Portugall. Il-Portugall għalhekk jistenna li l-investiment se jwassal għall-ħolqien ta' 2 350 impjieg indirett, minbarra l-500 impjieg dirett ġdid maħluqa.

(48)

Barra minn hekk, l-awtoritajiet Portugiżi jenfasizzaw l-aspetti kwalitattivi tal-effetti reġjonali pożittivi tal-proġett ta' investiment. Il-proġett ta' investiment se jikkontribwixxi għall-iżvilupp tar-reġjun tal-Peniżola ta' Setubal billi jattira investimenti minn fornituri industrijali lejn ir-reġjun, jinvolvi t-trasferiment tat-teknoloġija (effett konsegwenzjali tal-għarfien) u jiġbor flimkien impriżi fl-istess industrija, li jippermetti lill-impjanti individwali li jispeċjalizzaw aktar u jwassal għal żieda fl-effiċjenza.

(49)

Barra minn hekk, il-benefiċjarju kien mistieden jipparteċipa f'diversi proġetti flimkien ma' universitajiet ewlenin, kemm għall-iżvilupp tal-inġinerija tal-manifattura kif ukoll għal aspetti relatati mal-ergonomija.

(50)

Il-Portugall jinnota li fid-deċiżjoni dwar Porsche Leipzig (16) il-Kummissjoni diġà aċċettat li l-għajnuna mill-Istat hija mezz xieraq sabiex jiġi promoss l-iżvilupp reġjonali tar-reġjuni li huma żvantaġġati meta mqabbla mal-medja ta' reġjuni oħra fl-Istat Membru. Dan l-argument japplika bl-istess mod għall-għajnuna nnotifikata għall-investiment fir-reġjun tal-Peninsula de Setubal.

(51)

Ir-reġjun tal-Peninsula de Setubal jagħmel parti mir-reġjun ta' Lisboa e Vale do Tejo, li jinkludi ż-żona ta' Lisbona u huwa l-aktar reġjun Portugiż żviluppat. Madankollu, jekk il-Peninsula de Setubal titqies waħedha, din tista' tiġi kklassifikata bħala reġjun “a” billi l-PDG tagħha per capita jvarja bejn 45 % u 47 % tal-medja tal-UE fil-perjodu 2006-2010 (li kien il-perjodu użat għad-definizzjoni tal-mapep nazzjonali tal-għajnuna reġjonali mill-Istat għall-perjodu 2014-2020).

(52)

Meta mqabbel mal-medja Portugiża, il-PDG per capita fil-Peninsula de Setubal kien madwar 75 % għall-aħħar tliet snin.

Tabella 3

PDG per capita  (17) meta mqabbel mal-medja Portugiża (EUR)

(53)

Għalhekk il-Portugall iħoss li l-għajnuna nnotifikata hija strument xieraq sabiex jittejjeb l-iżvilupp reġjonali tal-Peninsula de Setubal.

(54)

Il-Portugall jipprovdi informazzjoni sabiex jipprova li l-għajnuna taqa' taħt ix-xenarju 2 tal-IDAC billi tat inċentiv lill-benefiċjarju sabiex iwettaq l-investiment fl-impjant ta' Setubal minflok fl-impjant ta' [post 1] (żona mhux megħjuna fiż-ŻEE) fejn kien isir l-investiment fin-nuqqas tal-għajnuna. B'mod partikolari, il-Portugall jipprovdi dettalji dwar il-proċess multistadju tat-teħid ta' deċiżjonijiet u dwar l-aspetti finanzjarji tax-xenarju kontrofattwali, li t-tnejn huma deskritti hawn taħt.

(55)

Fil-Grupp VW, id-deċiżjonijiet ta' investiment jiġu ppreparati fi proċess deċiżjonali multistadju li fih dawk li jieħdu d-deċiżjonijiet janalizzaw diversi siti fi proċess ta' tqabbil kompetittiv. Il-fażijiet prinċipali huma: (1) Ippjanar tal-Bejgħ fuq perjodu fit-tul (LAP) u sessjonijiet ta' ppjanar, (2) Żvilupp tal-prodott, deċiżjoni dwar il-prodott u preselezzjoni tas-sit u (3) Deċiżjoni dwar l-investiment u l-post.

(56)

Id-deċiżjonijiet fir-rigward tal-proġett ta' investiment innotifikat segwew dan il-proċess ġenerali. Madankollu, billi kienu jirrigwardaw proġett ta' investiment tal-marka Volkswagen, id-deċiżjonijiet rilevanti ttieħdu direttament mill-organi tal-marka Volkswagen u ma kien hemm l-ebda deċiżjoni addizzjonali fil-livell tal-grupp, minħabba li l-kompożizzjoni tal-organi tal-grupp hija fil-biċċa l-kbira l-istess bħal dik tal-marka Volkswagen.

(57)

L-introduzzjoni ta' prodotti ġodda fi ħdan il-Grupp VW issir abbażi tal-hekk imsejjaħ proċess ta' ħolqien tal-prodott (PEP) li jvarja mill-ippjanar tal-prodott sal-bidu tal-produzzjoni (SOP). Dan il-PEP huwa magħmul minn erba' fażijiet prinċipali kif jista' jidher mid-dijagramma ta' hawn taħt:

(…)

Investiment fuq l-implimentazzjoni tal-proġett

Sessjonijiet ta’ ppjanar ta’ LAP

Deċiżjoni dwar il-prodott/Għażla minn qabel tas-sit

Deċiżjoni fuq l-investiment u s-sit tal-produzzjoni

SOP

(58)

Il-punt tat-tluq huwa l-fażi tal-Ippjanar tal-Bejgħ fuq Perjodu fit-Tul (LAP) li fiha jiġu analizzati l-previżjonijiet tal-iżvilupp tas-suq u tad-domanda potenzjali kif ukoll il-varjazzjonijiet fis-suq. Il-LAP jiskeda l-iżviluppi tal-prodott għal […] snin 'il quddiem u jidentifika liema kapaċitajiet addizzjonali ta' produzzjoni jridu jinbnew, jew liema aġġustamenti għall-kapaċitajiet eżistenti jkunu neċessarji. Il-LAP huwa rifless mis-sessjonijiet ta' ppjanar annwali (PR), li jikkonkludi l-Bord Superviżorju tal-Grupp u li jinkludi l-qafas finanzjarju tal-investimenti skedati. Ir-riżultat tal-fażi tal-LAP hija proposta għat-tnedija ta' prodott(i) ġdid/ġodda, iżda tkun għadha mhijiex deċiżjoni dwar l-iżvilupp tal-prodott(i), l-investiment jew il-post.

(59)

Rigward il-proġett innotifikat, is-sessjoni ta' ppjanar 61 fl-20xx stabbiliet [140 000-160 000] unità fis-sena bħala potenzjal ta' bejgħ realistiku għall-prodotti ġodda fis-segmenti A0 SUV u […] ([…]). L-ippjanar tal-produzzjoni identifika l-ħtieġa li jinħolqu kapaċitajiet korrispondenti ta' produzzjoni. Fl-istess ħin, il-kombinazzjoni tal-volumi tal-A0 SUV u […] għandha tissodisfa l-kundizzjonijiet ta' qafas għall-istrateġija dwar l-MQB.

(60)

Ir-riżultat ta' din il-fażi kien pakkett ta' investiment fl-MQB ta' [140 000-160 000] A0 SUV u […] fis-sena għall-marka Volkswagen bid-dati ppjanati ta' bidu tal-produzzjoni ta' Awwissu 2016 għall-A0 SUV u ta' Novembru 2017 għall-[…].

(61)

Matul din il-fażi, diversi dipartimenti ċentrali tal-Grupp VW u s-siti tal-produzzjoni kkonċernati jaħdmu flimkien sabiex jippreparaw kemm id-deċiżjoni dwar il-prodott kif ukoll il-preselezzjoni tas-sit. Id-dipartiment ta' kontroll jieħu r-rwol ċentrali u ta' konsolidament matul din il-fażi.

(62)

L-ewwel pass f'din it-tieni fażi huwa l-proċess tal-iżvilupp tal-prodott, li skont ir-regoli interni tal-benefiċjarju dejjem jibda mill-anqas […] xhur qabel id-data prevista tal-bidu tal-produzzjoni, fil-każ tal-proġett innotifikat, f'Awwissu 2012 (l-ewwel SOP[…]).

(63)

Id-deċiżjoni dwar il-prodott, jiġifieri d-deċiżjoni għall-produzzjoni ta' prodott propost fil-LAP, teħtieġ li l-iżvilupp tal-prodott jilħaq mira predefinita ta' fattibbiltà. Id-dħul mistenni ġġenerat mill-prodott il-ġdid jiġi mqabbel mal-ispejjeż meħtieġa tal-produzzjoni (inkluż l-investiment). Sabiex tiġi determinata l-ispiża mistennija tal-produzzjoni, l-ewwel jiġi stabbilit b'mod ipotetiku post partikolari bħala suppożizzjoni għall-ippjanar (suppożizzjoni dwar il-post). Is-suppożizzjoni dwar il-post tintuża sabiex tiġi determinata l-ewwel struttura tal-ispejjeż u qafas għall-proġett. Din ma twassalx għal stabbiliment minn qabel ta' sit speċifiku tal-produzzjoni, iżda tiżviluppa bażi meħtieġa għall-valutazzjoni tal-ispejjeż mistennija tal-produzzjoni.

(64)

Fil-każ ta' prodott suċċessur għal produzzjoni li tkun għaddejja, is-sit tal-produzzjoni attwali tal-prodott normalment jintgħażel bħala s-suppożizzjoni dwar is-sit; għal prodott kompletament ġdid (mingħajr predeċessur) is-suppożizzjoni dwar is-sit normalment tkun ibbażata fuq l-indikaturi tal-prestazzjoni, jiġifieri l-post bl-aħjar ċifri ta' prestazzjoni jintgħażel bħala l-ewwel ipoteżi. Fil-prattika, jiġu kkunsidrati wkoll kriterji addizzjonali, bħall-kapaċitajiet liberi jew l-istrutturi xierqa.

(65)

Fil-każ tal-proġett innotifikat, ma ġiex ikkunsidrat investiment f'żona ġdida billi pakkett ta' investiment ta' [140 000-160 000] karozza li jaqgħu f'segment ta' prezzijiet tas-suq […] huwa żgħir wisq sabiex irendi l-investiment f'żona ġdida wieħed vijabbli. Jekk il-valutazzjoni tal-post ma tirrigwardax investiment f'żona ġdida, iż-żewġ kriterji ewlenin sabiex jiġu identifikati postijiet xierqa huma jekk jistgħux jiġu installati kapaċitajiet addizzjonali f'impjant eżistenti, u jekk il-faċilitajiet eżistenti f'dak is-sit humiex kompatibbli mal-proġett ippjanat, eż. jekk il-qisien tal-workshop taż-żebgħa eżistenti humiex adatti wkoll għall-investiment ġdid ippjanat, eċċ.

(66)

L-applikazzjoni ta' dawn il-kriterji identifikat erba' postijiet possibbli ([is-sit 1 f'żona mhux megħjuna fiż-ŻEE], Setubal, [is-sit 2 barra ż-ŻEE] u [is-sit 3 f'żona mhux megħjuna fiż-ŻEE]) li għalihom il-Portugall ipprovda informazzjoni tal-kumpanija, minn Lulju 2012, dwar l-ewwel kalkoli komparattivi tal-ispejjeż tal-produzzjoni għal kull karozza magħmula mill-kontroll tal-marka Volkswagen ([Kontroll tal-Grupp]). Dawn il-kalkoli kienu jinkludu l-volumi ppjanati tal-bejgħ fis-segment A0 SUV u s-segment […] u kienu jkopru wkoll il-volumi ppjanati tal-bejgħ għall-[mudell predefinit], li l-produzzjoni tiegħu kienet b'mod eċċezzjonali predefinita għal [is-sit 1 f'żona mhux megħjuna fiż-ŻEE]. Kienu kkunsidrati tliet alternattivi differenti għall-assenjazzjoni tal-volumi ta' produzzjoni previsti tas-segment A0 SUV, is-segment […] u l-[mudell predefinit] għall-erba' postijiet, u għal kull alternattiva, il-[Kontroll tal-Grupp] wettaq kalkoli preliminari tal-ispejjeż tal-produzzjoni u tal-ispejjeż tal-investiment.

(67)

Fi stadju aktar avvanzat tal-proċess tal-ippjanar, [is-sit 2 barra ż-ŻEE] u [is-sit 3 f'żona mhux megħjuna fiż-ŻEE] kienu esklużi bħala postijiet possibbli, billi kienu kkaratterizzati minn spejjeż għoljin ta' loġistika u tal-persunal rispettivament. Fi kwalunkwe każ, minħabba deċiżjonijiet preċedenti sabiex il-produzzjoni tal-[mudell predefinit] issir fi [is-sit 1 f'żona mhux megħjuna fiż-ŻEE] u fi [is-sit 2 barra ż-ŻEE], u biex il-[…] u […] jiġu manifatturati fi [is-sit 3 f'żona mhux megħjuna fiż-ŻEE], fl-2014 (meta saru aktar kalkoli komparattivi mill-[Kontrol tal-Grupp]), la [is-sit 2 barra ż-ŻEE] u lanqas [is-sit 3 f'żona mhux megħjuna fiż-ŻEE] ma kien fadlilhom kapaċitajiet żejda. Għalhekk, kienet valutata kombinazzjoni tal-volumi ta' A0 SUV u […] għal Setubal u għal [is-sit 1 f'żona mhux megħjuna fiż-ŻEE] biss.

(68)

Fid-dawl ta' dan ta' hawn fuq, il-[Kontroll tal-Grupp] ipprepara d-deċiżjoni dwar il-prodott b'Setubal bħala l-aħjar post għall-proġett. Il-Portugall ipprovda evidenza li fl-10 ta' Marzu 2014 il-kumitat għall-Prodotti tal-marka Volkswagen (Volkswagen Ausschuss Produkte, VAP) ħa d-deċiżjoni dwar il-prodott u kkonferma lil Setubal bħala l-aħjar post għall-proġett. L-evidenza ppreżentata mill-Portugall turi li f'dan l-istadju kien ikkunsidrat ammont ta' għajnuna possibbli mill-Istat li kien ilaħħaq sa EUR 36 miljun.

(69)

Ladarba tittieħed id-deċiżjoni dwar il-prodott, il-pass li jmiss ikun l-għażla tal-aktar post xieraq għall-proġett. Id-dipartiment ta' kontroll ġeneralment jibda mis-siti ta' produzzjoni kollha ta' Volkswagen u jnaqqas din il-lista għal dawk is-siti li jidhru adatti għall-investiment. Bħala riżultat tal-proċess tal-PEP, jiġu speċifikati x-xenarji ta' investiment u ta' produzzjoni għal kull sit realistiku u dawn jiġu ppreżentati fil-qosor f'dokument ta' deċiżjoni. Fuq il-bażi ta' rakkomandazzjoni speċifika dwar il-post u l-investiment, il-kumitat għall-investimenti tal-marka Volkswagen (Volkswagen Ausschuss Investitionen, VAI) irid jiddeċiedi jekk il-proġett isirx jew le.

(70)

Kif spjegat, il-lista tas-siti realistiċi f'dan l-istadju tnaqqset għal [is-sit 1 f'żona mhux megħjuna fiż-ŻEE] u Setubal. Għal dawn iż-żewġ siti, kienu stabbiliti u mqabbla l-ispejjeż speċifiċi tal-produzzjoni attribwibbli għall-post. Dawn l-ispejjeż speċifiċi għall-post jikkonsistu mill-ispejjeż meħtieġa ta' investiment u l-ispejjeż mistennija tal-produzzjoni matul perjodu referenzjarju. Il-Portugall issottometta dokumenti kontemporanji ġenwini tal-kumpanija, ippreparati mill-[Kontroll tal-grupp] u […] (l-Unità għall-Għajnuna mill-Istat tal-grupp), u datati d-9 ta' Mejju 2014 bħala evidenza ta' analiżi kontrofattwali li kkonfrontat [is-sit 1 f'żona mhux megħjuna fiż-ŻEE] u Setubal bħala postijiet potenzjali. Il-Portugall spjega li filwaqt li l-impjant fi [is-sit 1 f'żona mhux megħjuna fiż-ŻEE] kellu valuri ta' prestazzjoni daqsxejn aħjar, l-impjant ta' Setubal mar tajjeb bil-possibbiltà li jibbenefika minn għajnuna għall-investiment reġjonali. Abbażi ta' din l-analiżi kontrofattwali (18), il-[Kontroll tal-Grupp] issottometta rakkomandazzjoni għal deċiżjoni lill-VAI fejn ippropona lil Setubal bħala s-sit għall-investiment.

(71)

Id-deċiżjonijiet ta' investiment u dwar il-post, li kkonfermaw lil Setubal, ittieħdu mill-VAI fit-28 ta' Mejju 2014 u fis-26 ta' Ġunju 2014. (19) Il-Portugall ipprovda l-kopja tal-minuti tal-laqgħat rilevanti fejn kienu adottati dawn id-deċiżjonijiet. Meta jitqiesu l-kalkoli komparattivi kif ukoll l-għajnuna reġjonali fl-ammont ta' EUR 37,96 miljun f'valur nominali (valur skontat ta' EUR 33,4 miljun) (20), iż-żewġ deċiżjonijiet japprovaw il-proġett ta' investiment fl-MQB b'volum ta' investiment ta' EUR 624 miljun. Barra minn hekk, l-ewwel deċiżjoni tikkonċedi l-ewwel segment baġitarju sabiex jiġi liberat spazju fil-fabbrika għall-ewwel investimenti, u t-tieni deċiżjoni awtorizzat il-biċċa l-kbira tan-nefqa għall-investiment.

(72)

Il-Portugall jinnota li l-kalkoli li ntużaw sabiex jintwera l-effett ta' inċentiv jistgħu jintużaw ukoll bħala bażi sabiex tiġi valutata l-proporzjonalità tal-għajnuna.

(73)

Il-kalkolu finali użat mill-Portugall biex juri l-effett ta' inċentiv juri żvantaġġ finanzjarju nett ta' Setubal meta mqabbel ma' [is-sit 1 f'żona mhux megħjuna fiż-ŻEE] ta' EUR 48 miljun. Anki bl-għajnuna, Setubal huwa EUR 14,6-il miljun (valur skontat) aktar għali minn [is-sit 1 f'żona mhux megħjuna fiż-ŻEE] (żvantaġġ finanzjarju li minnu titnaqqas l-għajnuna kkunsidrata fl-analiżi kontrofattwali; jiġifieri EUR 48 miljun — EUR 33,4 miljun).

(74)

Il-Portugall għalhekk jargumenta li, billi l-għajnuna ma tikkumpensax b'mod sħiħ l-iżvantaġġ tas-sit ta' Setubal, ma hemm l-ebda kumpens eċċessiv. Għaldaqstant l-għajnuna hija proporzjonata.

(75)

Il-Portugall jirrimarka li fid-deċiżjoni tiegħu dwar is-sit, il-VAI ma qiesx biss konsiderazzjonijiet finanzjarji, iżda wkoll kriterji kwalitattivi mhux kwantifikabbli bħar-raġunijiet ta' responsabbiltà soċjali jew il-possibbiltà li jiġi evitat it-trasferiment tal-produzzjoni lejn siti oħra fi żminijiet ta' qċaċet tal-produzzjoni.

(76)

Il-Portugall jenfasizza li l-għajnuna reġjonali sservi biss biex tikkumpensal-iżvantaġġ nett tas-sit f'Setubal. L-għajnuna hija proporzjonata u ma huwa se jkollha l-ebda effett fuq il-kompetizzjoni billi l-proġett ta' investiment, u l-effetti konsegwenti tiegħu fuq il-kompetizzjoni u l-kummerċ, kienu se jseħħu fi kwalunkwe każ. Il-proġett ta' investiment ma kienx isir f'reġjun megħjun ieħor bl-istess limitu jew ogħla tal-intensità tal-għajnuna, billi investiment f'żona ġdida ma kienx ikun vijabbli, u l-unika alternattiva plawżibbli mhijiex reġjun megħjun. Għalhekk, l-għajnuna ma għandha l-ebda effett kontra l-koeżjoni li jmur kontra l-istess l-ħsieb tal-għajnuna reġjonali.

(77)

L-appoġġ finanzjarju fil-forma ta' għotja rimborżabbli se jingħata mill-awtoritajiet Portugiżi u huwa ffinanzjat mill-baġit ġenerali tal-Istat. L-appoġġ għalhekk huwa mogħti minn Stat Membru u permezz ta' riżorsi tal-Istat fis-sens tal-Artikolu 107(1) tat-TFUE.

(78)

Billi l-għajnuna hija mogħtija lil kumpanija unika, Autoeuropa, il-miżura hija selettiva.

(79)

L-appoġġ finanzjarju se jingħata għal investiment fis-settur tal-karozzi, li huwa soġġett għal kummerċ intensiv bejn l-Istati Membri, u se jissostitwixxi parzjalment il-provvisti ta' oġġetti intermedji minn Stati Membri oħra. Għalhekk, il-miżura taffettwa l-kummerċ bejn l-Istati Membri.

(80)

L-aġevolar ta' Autoeuropa u l-produzzjoni tagħha mill-awtoritajiet Portugiżi jfisser li l-kompetizzjoni tiġi mfixkla jew ikun hemm it-theddida li tiġi mfixkla.

(81)

Konsegwentament, il-Kummissjoni tqis li l-miżura notifikata tikkostitwixxi għajnuna mill-Istat lil Autoeuropa skont it-tifsira tal-Artikolu 107(1) TFUE.

(82)

Billi taw l-għajnuna soġġetta għall-approvazzjoni tal-Kummissjoni u nnotifikaw il-miżura ta' għajnuna qabel daħħluha fis-seħħ, l-awtoritajiet Portugiżi rrispettaw l-obbligi tagħhom skont l-Artikolu 108(3) TFUE, billi n-notifika ta' għajnuna individwali li taqbeż ċertu ammont hija meħtieġa mill-GBER 2008. Fil-fatt, l-għajnuna għall-proġett ta' investiment hija notifikabbli individwalment skont it-tifsira tal-paragrafu 68 tar-RAG 2007-13 u l-GBER 2008, billi l-ammont ta' għajnuna previst ta' EUR 36,15 miljun fil-valur preżenti jaqbeż il-livell limitu ta' EUR 11,25-il miljun għal notifika individwali applikabbli fir-reġjun ikkonċernat skont il-mappa tal-għajnuna reġjonali applikabbli mill-2007 sa Ġunju tal-2014.

(83)

L-għan tal-għajnuna huwa li tippromwovi l-iżvilupp reġjonali. Billi l-kuntratt ta' għajnuna u investiment ġie ffirmat f'April 2014, soġġett biss għall-approvazzjoni tal-Kummissjoni, il-Kummissjoni tqis li skont il-paragrafu 188 tar-RAG 2014-20, l-għajnuna ngħatat qabel Lulju 2014 u għalhekk trid tiġi valutata abbażi tar-RAG 2007-13, u b'mod partikolari d-dispożizzjonijiet tagħha rigward l-għajnuna għall-investiment reġjonali għal proġetti kbar ta' investiment, stabbiliti fil-paragrafu 68.

(84)

Il-Kummissjoni trid twettaq il-valutazzjoni tagħha fi tliet passi:

(85)

Il-Kummissjoni diġà stabbiliet fid-deċiżjoni ta' ftuħ li l-għajnuna tissodisfa parti mill-kriterji ġenerali ta' kompatibbiltà għar-RAG 2007-13. L-investigazzjoni formali ma żvelat l-ebda element li jqajjem dubji dwar din il-valutazzjoni. Il-Kummissjoni tinnota b'mod partikolari dan li ġej:

(86)

Madankollu, fid-deċiżjoni ta' ftuħ, il-Kummissjoni qajmet dubji dwar l-eliġibbiltà tal-ispejjeż għall-għodod destinati għall-fornituri. Għalhekk, u billi ma setgħetx tifforma opinjoni definittiva dwar jekk il-proġett notifikat u proġett aktar bikri ta' investiment imwettaq fl-istess sit kinux jiffurmaw proġett uniku ta' investiment skont it-tifsira tal-paragrafu 60 tar-RAG 2007-13, il-Kummissjoni ma setgħetx tistabbilixxi jekk l-intensità tal-għajnuna notifikata qabżitx il-massimu permissibbli, u għalhekk esprimiet dubji wkoll rigward ir-rispett tal-limitu massimu applikabbli tal-għajnuna reġjonali.

(87)

Fil-kawża C34/2001 il-Kummissjoni ċċarat li l-ispejjeż tal-għodod destinati għall-fornituri ma jistgħux jitqiesu bħala spejjeż eliġibbli, sakemm ma jkunux imġarrba f'żoni megħjuna tal-Istat Membru kkonċernat. (22) Il-Kummissjoni tinnota (ara l-premessi 31 u 32 hawn fuq) li l-investimenti kollha fl-għodod destinati għall-fornituri li jammontaw għal EUR 136,3 miljun se jissodisfaw il-kriterji standard ta' kompatibbiltà tar-RAG billi se jissodisfaw ċerti kundizzjonijiet bħal: l-għodod huma parti mill-proġett innotifikat u jappartjenu għall-assi fissi ta' Autoeuropa, jinsabu f'impjant ta' fornitur f'żona megħjuna fil-Portugall, u se jinżammu fil-Portugall f'żona megħjuna għal mill-anqas ħames snin wara t-tlestija tal-proġett. Barra minn hekk, iż-żoni megħjuna tal-Portugall fejn se jkun hemm l-għodod destinati għall-fornituri għandhom l-istess intensitajiet massimi tal-għajnuna jew ogħla miż-żona ta' Palmela. Kienu stabbiliti mekkaniżmi ta' monitoraġġ li jassiguraw li ma tingħata l-ebda għajnuna għal għodod destinati għall-fornituri li ma jikkonformax mal-kundizzjonijiet ta' hawn fuq.

(88)

B'konformità mal-prassi preċedenti tagħha fil-kawża C34/2001, il-Kummissjoni għalhekk tqis li l-ispejjeż tal-għodod destinati għall-fornituri li jirriżultaw f'żoni megħjunin tal-Portugall u li jammontaw għal EUR 136,3 miljun jistgħu jitqiesu bħala spejjeż eliġibbli skont it-Taqsimiet 4.1 u 4.2 tar-RAG 2007-13.

(89)

Il-Kummissjoni analizzat il-karattru possibbli ta' proġett uniku ta' investiment tat-tliet proġetti preċedenti mwettqa minn Autoeuropa fl-istess sit.

(90)

Il-proġett kien jikkonsisti fl-akkwiżizzjoni ta' robots ġodda għall-workshop taż-żebgħa li wasslet għal titjib f'termini ta' kwalità, iżda wkoll fl-ergonomija u l-protezzjoni tal-ħaddiema, fil-protezzjoni tal-ambjent u l-iffrankar tar-riżorsi u fil-produttività. Il-Kummissjoni tqis li dawn l-investimenti kienu neċessarji f'dak iż-żmien sabiex jittejbu l-kundizzjonijiet tax-xogħol fil-workshop taż-żebgħa u għalhekk ma sarux bi preparazzjoni għall-proġett innotifikat.

(91)

Il-Kummissjoni tqis li l-investiment fl-awtomatizzazzjoni tal-proċess tal-għoti taż-żebgħa ta' ġewwa u ta' barra fil-workshop taż-żebgħa u l-proġett ta' investiment innotifikat juru differenzi tekniċi u funzjonali u d-deċiżjonijiet ta' investiment ittieħdu b'mod indipendenti minn xulxin. Għalhekk il-Kummissjoni tqis li l-investiment inizjali fil-workshop taż-żebgħa mhuwiex marbut b'mod ekonomikament indiviżibbli mal-proġett ta' investiment innotifikat u għaldaqstant, iż-żewġ investimenti ma jiffurmawx proġett uniku ta' investiment fis-sens tal-paragrafu 60 tar-RAG 2007-13.

(92)

Il-workshop tal-għodod ta' Autoeuropa jipproduċi forom u għodod għall-qtugħ ta' forom u profili għall-partijiet tal-metall tal-karozzerija. Huwa jispeċjalizza fil-produzzjoni ta' għodod għall-hoods u l-fenders tal-magni. Il-workshop tal-għodod iwassal il-prodotti tiegħu lill-fabbriki tal-Grupp VW madwar id-dinja kollha, jiġifieri mhuwiex limitat għall-forniment lil Autoeuropa. Huwa parti minn Autoeuropa, madankollu l-attività tiegħu hija awtonoma u indipendenti mill-attività prinċipali tal-fabbrika li hija l-produzzjoni ta' vetturi.

(93)

Il-proġett kien jirrigwarda l-akkwiżizzjoni ta' għodod ġodda għall-qtuħ ta' forom u profili fil-metall biex tippermetti l-kostruzzjoni ta' għodod b'livelli ogħla ta' kwalità u biex iżżid il-volum tal-produzzjoni tal-workshop tal-għodod. Il-workshop tal-għodod jipproduċi forom u għodod għall-qtugħ ta' forom u profili għall-Grupp VW kollu, ma jinsabx fl-istess plott ta' art bħall-investiment innotifikat u jaħdem b'mod indipendenti mill-fabbrika tal-manifattura tal-karozzi. Barra minn hekk, id-deċiżjonijiet ta' investiment għall-modernizzar tal-workshop tal-għodod u għall-proġett innotifikat ittieħdu indipendentement minn xulxin. Għalhekk il-Kummissjoni tqis li l-investiment inizjali fil-workshop tal-għodod mhuwiex marbut b'mod ekonomikament indiviżibbli mal-proġett ta' investiment innotifikat u għaldaqstant, iż-żewġ investimenti ma jiffurmawx proġett ta' investiment uniku fis-sens tal-paragrafu 60 tar-RAG 2007-13.

(94)

Il-proġett kien jirrigwarda l-akkwiżizzjoni ta' tagħmir ġdid tal-IT b'applikazzjonijiet ġodda ta' softwer għal sigurtà stabbli tal-IT bil-għan li jiżdiedu l-istabilità u l-produttività tal-produzzjoni tal-karozzi. L-investiment fil-qasam tal-IT ma għandux rabtiet strateġiċi u tekniċi mal-proġett innotifikat li jorbtuhom b'mod ekonomikament indiviżibbli. Barra minn hekk, id-deċiżjonijiet ta' investiment għall-proġett tal-IT u għall-proġett innotifikat ittieħdu indipendentement minn xulxin. Għalhekk il-Kummissjoni tqis li ż-żewġ proġetti ta' investiment ma jiffurmawx proġett uniku ta' investiment fis-sens tal-paragrafu 60 tar-RAG 2007-13.

(95)

Fid-dawl ta' dan ta' hawn fuq, il-Kummissjoni tqis li l-ispejjeż tal-għodod destinati għall-fornituri li jammontaw għal EUR 136,3 miljun jistgħu jitqiesu bħala nefqa eliġibbli taħt il-proġett innotifikat, filwaqt li l-investimenti ta' qabel ma jridux jiġu kkunsidrati. L-ammont ta' spejjeż eliġibbli li jrid jiġi kkunsidrat għall-kalkolu tal-intensità massima permissibbli tal-għajnuna huwa EUR 623,9 miljun (EUR 599,6 miljun f'valur skontat) kif jidher fit-Tabella 2 ta' din id-Deċiżjoni. Bl-applikazzjoni tal-mekkaniżmu ta' tnaqqis stabbilit fil-paragrafu 67 tar-RAG 2007-13, in-nefqa eliġibbli mġarrba twassal għal intensità massima permissibbli tal-għajnuna ta' 6,13 % EGħG għall-proġett.

(96)

Billi l-intensità tal-għajnuna proposta (EUR 36,15 miljun fil-valur preżenti, intensità tal-għajnuna ta' 6,03 %) ma taqbiżx l-intensità massima permessa tal-għajnuna, u l-għajnuna notifikata ma għandhiex tiġi kombinata ma' aktar għajnuna għall-investiment reġjonali, l-intensità tal-għajnuna proposta għall-proġett tikkonforma mar-RAG 2007-13.

(97)

Fid-dawl ta' dawn il-konsiderazzjonijiet, u billi ma kienet sottomessal-ebda informazzjoni li tista' taffettwa l-konklużjonijiet tal-Kummissjoni fid-deċiżjoni ta' ftuħ dwar ir-rispett tal-kriterji standard ta' kompatibbiltà msemmija fil-premessa 85, il-Kummissjoni tqis li l-kriterji standard ta' kompatibbiltà tar-RAG 2007-13 ġew issodisfati.

(98)

Il-Kummissjoni trid twettaq valutazzjoni fil-fond bħala parti mill-investigazzjoni formali sakemm ma tkunx tista' tistabbilixxi mingħajr dubju fi ħdan dik il-proċedura li l-livelli limitu għal valutazzjoni fil-fond stabbiliti fit-testijiet skont il-paragrafi 68(a) u (b) ma ġewx maqbuża. (23) Biex twettaq it-testijiet rilevanti, il-Kummissjoni l-ewwel trid tistabbilixxi definizzjonijiet xierqa tas-suq tal-prodott u ġeografiku.

(99)

Fil-premessa 45 tad-deċiżjoni ta' ftuħ tagħha, il-Kummissjoni qieset li għall-finijiet tal-paragrafu 68 tar-RAG 2007-13, il-prodotti kkonċernati mill-proġett ta' investiment huma karozzi tal-passiġġieri li jappartjenu għas-segmenti tas-suq A0, A, u B skont is-segmentazzjoni minn POLK.

(100)

Il-Kummissjoni ħalliet id-definizzjoni eżatta tas-suq rilevanti tal-prodott miftuħa u qieset id-definizzjonijiet alternattivi plawżibbli kollha tas-suq, inkluż b'mod partikolari l-aktar segmentazzjoni dejqa li għaliha hemm dejta disponibbli.

(101)

Il-prassi li tintuża l-aktar definizzjoni dejqa tas-suq ibbażata fuq segmenti individwali fl-industrija tal-karozzi għandha bażi soda f'deċiżjonijiet komparabbli, inklużi deċiżjonijiet finali (24).

(102)

Din il-prassi hija bbażata fuq l-idea li l-kompetituri fis-segmenti kollha tas-suq, inkluż l-iżgħar segment possibbli, jixirqilhom protezzjoni minn atturi b'pożizzjoni dominanti.

(103)

Hija bbażata wkoll fuq konsiderazzjonijiet ekonomiċi rilevanti għall-kompetizzjoni. B'mod aktar speċifiku, dan l-approċċ huwa bbażat fuq it-teorija li tkun teżisti sostitwibbiltà tad-domanda bejn żewġ prodotti jekk dawn jitqiesu bħala sostituti mill-konsumaturi fid-dawl tal-karatteristiċi, il-prezz u l-użu maħsub tagħhom. Permezz tal-prassi tagħha li teżamina l-ishma tas-suq anki fl-iżgħar segment possibbli tas-suq tal-karozzi li għalih tkun disponibbli informazzjoni, il-Kummissjoni ssegwi eżattament din il-loġika, jiġifieri hija tqis li s-sostitwibbiltà fid-dawl tal-prezz, il-karatteristiċi u l-użu maħsub hija l-aktar b'saħħitha bejn prodotti li jappartjenu għall-istess segment. F'dan is-sens, l-applikazzjoni tal-idjaq segment possibbli tas-suq bħala suq plawżibbli tirrifletti l-loġika tal-punt 28 tal-Linji gwida dwar Amalgamazzjonijiet Orizzontali li jsostni li “Prodotti jistgħu jiġu differenzati f'suq rilevanti b'mod li ċertu prodotti huma sostituti eqreb minn oħra. Aktar ma l-grad ta' sostituzzjoni bejn il-prodotti tad-ditti magħquda jkun għoli, aktar id-ditti magħquda jżidu il-prezzijiet b'mod sinjifikattiv. […] L-inċentiv tad-ditta magħquda li tgħolli l-prezzijiet x'aktarx hija aktar ristretta meta ditti rivali jipproduċu sostituti li huma qrib għall-prodotti tad-ditti magħquda milli meta huma joffru sostituti li huma inqas fil-qrib”.

(104)

Din hija r-raġuni wkoll għaliex il-karozzi konvenzjonali tradizzjonalment jinqasmu f'segmenti, u r-raġuni għaliex l-industrija awtomobilistika tassenja mudelli għad-diversi segmenti magħrufin sewwa. Din hija l-konsiderazzjoni li xprunat il-prassi tal-Kummissjoni fid-definizzjoni tas-suq rilevanti f'każi awtomobilistiċi anki f'termini tas-segmenti individwali u din hija r-raġuni għaliex l-Istati Membri ppreżentaw l-argumenti relatati mas-suq rilevanti f'dan il-każ kif ukoll f'każijiet oħra fl-imgħoddi f'termini tas-segmenti individwali.

(105)

Billi Autoeuropa se tipproduċi karozzi li jappartjenu għas-segmenti A0 u […] skont POLK, u tista' tipproduċi wkoll karozzi li jappartjenu għas-segment B skont POLK, il-Kummissjoni qieset li dawn is-segmenti individwali u għall-SUVs anki s-segment SUV-B skont Global Insight, kif ukoll is-segment magħqud (A0 sa B) skont POLK għandhom kollha jitqiesu bħala swieq plawżibbli rilevanti għal dan il-każ.

(106)

Il-Kummissjoni qieset li s-suq ġeografiku rilevanti għall-prodotti kkonċernati huwa mill-anqas iż-ŻEE kollha. L-awtoritajiet Portugiżi u Autoeuropa aċċettaw li l-Kummissjoni tapplika din id-definizzjoni ta' suq ġeografiku għall-iskopijiet ta' din in-notifika. (25)

(107)

Fid-dawl ta' dan ta' hawn fuq, u billi matul l-investigazzjoni formali l-Kummissjoni ma rċeviet l-ebda informazzjoni addizzjonali li turi li hija għandha timmodifika l-konklużjonijiet tagħha mid-deċiżjoni ta' ftuħ, il-Kummissjoni żżomm il-valutazzjoni tagħha fir-rigward tad-definizzjonijiet tas-suq tal-prodott u ġeografiku.

(108)

Il-Kummissjoni wettqet it-test stabbilit fil-punt 68(a) tar-RAG 2007-13 fis-swieq plawżibbli kollha tal-prodott u ġeografiċi sabiex tivverifika jekk is-sehem mis-suq tal-benefiċjarju jaqbiżx 25 % qabel u wara l-investiment.

(109)

Minħabba l-fatt li ma setax jiġi stabbilit suq rilevanti uniku tal-prodott u ġeografiku, kellhom jiġu kkunsidrati r-riżultati tas-swieq kollha plawżibbli. Is-sehem mis-suq tal-Grupp VW fis-segmenti individwali A u B u fis-segmenti kombinati A0, A u B (skont POLK) fiż-ŻEE jammonta għal aktar minn 25 % fis-snin kollha bejn l-2013 u l-2019. Il-Kummissjoni għalhekk tikkonkludi li l-livell limitu stabbilit fil-paragrafu 68(a) huwa maqbuż.

(110)

Billi r-riżultat tat-test skont il-paragrafu 68(a) diġà jeħtieġ proċediment għall-valutazzjoni fil-fond tal-għajnuna, mhuwiex meħtieġ li jitwettaq it-test skont il-paragrafu 68(b).

(111)

Fid-dawl ta' dan ta' hawn fuq, il-Kummissjoni tiddeċiedi li l-livell limitu rilevanti tat-test skont il-paragrafu 68 (a) inqabeż. Il-Kummissjoni għalhekk tiddeċiedi li twettaq verifika dettaljata, wara l-ftuħ tal-proċedura prevista fl-Artikolu 108(2) TFUE, li l-għajnuna hija neċessarja sabiex tipprovdi effett ta' inċentiv għall-investiment u li l-benefiċċji tal-miżura ta' għajnuna huma akbar mid-distorsjoni li tirriżulta tal-kompetizzjoni u l-effetti fuq il-kummerċ bejn l-Istati Membri.

(112)

Il-valutazzjoni fil-fond hija mwettqa abbażi tal-IDAC.

(113)

Il-paragrafu 12 tal-IDAC jitlob li l-Istati Membri jissostanzjaw il-kontribut tal-proġett ta' investiment għall-iżvilupp tar-reġjun ikkonċernat. Il-Kummissjoni tieħu nota tal-effetti reġjonali pożittivi tal-investiment, kif ippreżentati mill-Portugall (ara l-premessi 45 sa 49 aktar 'il fuq) u tqis li b'mod partikolari l-effetti tal-ħolqien ta' impjiegi diretti u indiretti, l-impjantazzjoni ta' fornituri addizzjonali fir-reġjun, it-trasferiment tal-għarfien fir-reġjun, u t-titjib tal-bażi tal-ħiliet reġjonali jirrappreżentaw kontribut sinifikanti għall-iżvilupp tar-reġjun u għall-kisba tal-objettiv ta' koeżjoni tal-UE.

(114)

Il-paragrafi 17 u 18 tal-IDAC jissottolinjaw li l-għajnuna mill-Istat fil-forma ta' għajnuna għall-investiment inizjali hija biss wieħed mill-mezzi sabiex jingħelbu l-fallimenti tas-suq u jiġi promoss l-iżvilupp ekonomiku f'reġjuni żvantaġġati. L-għajnuna tikkostitwixxi strument xieraq billi tipprovdi vantaġġ speċifiku meta mqabbel ma' miżuri oħra ta' politika. Skont il-paragrafu 18 tal-IDAC, huma biss “miżuri li għalihom l-Istat Membru kkunsidra għażliet politiċi oħra, u li għalihom huma stabbiliti l-vantaġġi tal-użu ta' strument selettiv bħal ma hija l-għajnuna mill-Istat għal kumpanija speċifika, huma kkunsidrati bħala li jikkostitwixxu strument xieraq.”

(115)

Il-Portugall iġġustifika (ara l-premessi 51 u 52 aktar 'il fuq) l-adegwatezza tal-istrument ta' għajnuna bis-sitwazzjoni ekonomika fir-reġjun tal-Peninsula de Setubal, billi pprova li r-reġjun huwa żvantaġġat meta mqabbel mal-medja nazzjonali: matul il-perjodu 2011-2013, il-PDG per capita reġjonali kien madwar 75 % tal-medja Portugiża.

(116)

Fid-dawl tas-sitwazzjoni soċjoekonomika tar-reġjun tal-Peninsula de Setubal, kif ikkonfermat mill-istatus tiegħu bħala reġjun eliġibbli għall-għajnuna reġjonali skont l-Artikolu 107(3)(c) TFUE b'limitu massimu tal-intensità tal-għajnuna ta' 15 %, u b'konformità mal-prattika f'każijiet preċedenti (eż. id-deċiżjoni dwar Dell Poland (26) u d-deċiżjoni dwar Porsche (27)), il-Kummissjoni taċċetta li l-għoti tal-għajnuna mill-Istat huwa strument xieraq sabiex jintlaħaq l-objettiv ta' żvilupp reġjonali fir-reġjun ikkonċernat.

(117)

Il-paragrafu 20 tal-IDAC jitlob li jeħtieġ li jiġu ssodisfati l-kundizzjonijiet formali ta' effett ta' inċentiv kif stabbiliti fil-paragrafu 38 tar-RAG 2007-13. Fit-Taqsima 5.5 aktar 'il fuq, il-Kummissjoni vverifikat li dan huwa l-każ għall-proġett innotifikat. Dwar l-effett sostantiv ta' inċentiv, l-IDAC jitlob li l-Kummissjoni tivverifika fid-dettall li l-għajnuna hija neċessarja biex tibdel l-imġiba tal-benefiċjarju, sabiex iwettaq investiment (addizzjonali) fir-reġjun megħjun ikkonċernat. Il-paragrafu 22 tal-IDAC isostni li l-effett ta' inċentiv jista' jiġi ppruvat f'żewġ xenarji possibbli: fin-nuqqas tal-għajnuna, ma jsir l-ebda investiment billi mingħajr l-għajnuna, l-investiment ma jkunx profittabbli għall-kumpanija fl-ebda post (xenarju 1); fin-nuqqas tal-għajnuna, l-investiment kieku jsir f'post ieħor (xenarju 2).

(118)

L-IDAC jitlob li l-Istat Membru juri l-eżistenza tal-effett ta' inċentiv tal-għajnuna u jipprovdi evidenza ċara li l-għajnuna effettivament kellha impatt fuq l-għażla tal-investiment jew fuq l-għażla tal-post. Għaldaqstant huwa jpoġġi l-oneru tal-provi rigward l-eżistenza ta' effett ta' inċentiv fuq l-Istat Membru. F'dan il-kuntest, l-Istat Membru huwa meħtieġ ukoll li jagħti deskrizzjoni komprensiva tax-xenarju kontrofattwali li fih ma tingħata l-ebda għajnuna lill-benefiċjarju. Ix-xenarju kontrofattwali jrid jitqies bħala realistiku mill-Kummissjoni.

(119)

L-awtoritajiet Portugiżi sostnew (ara l-premessa 54 hawn fuq) li l-għajnuna lil Autoeuropa taqa' taħt ix-xenarju 2 u ppreżentaw xenarju kontrofattwali li kien jirrifletti l-ippjanar konkret tal-investiment u l-post għall-proġett innotifikat li kkunsidra bħala post alternattiv impjant fi [is-sit 1 f'żona mhux megħjuna fiż-ŻEE], […].

(120)

Il-paragrafu 25 tal-IDAC jindika li l-Istat Membru jista' jagħti prova tal-effett ta' inċentiv tal-għajnuna għal sitwazzjoni tax-xenarju 2 billi jipprovdi dokumenti tal-kumpanija li juru li jkun sar tqabbil bejn l-ispejjeż u l-benefiċċji tal-allokazzjoni fir-reġjun megħjun magħżul għall-investiment ma' post alternattiv. L-Istat Membru huwa mistieden jibbaża fuq rapporti finanzjarji, pjanijiet tan-negozju u dokumenti interni li jelaboraw fuq diversi xenarji ta' investiment.

(121)

Il-Portugall ipprovda (ara l-premessi 68, 70 u 71 aktar 'il fuq) evidenza kontemporanja u ġenwina li tiddokumenta l-proċess multistadju tat-teħid ta' deċiżjonijiet tal-Grupp VW, u għall-proġett innotifikat, tal-Marka Volkswagen, l-ewwel nett rigward id-deċiżjoni dwar il-prodott u mbagħad id-deċiżjoni ta' investiment u dwar il-post.

(122)

Din id-dokumentazzjoni turi li wara li ġie stabbilit il-potenzjal tal-bejgħ għal prodotti ġodda fis-segmenti A0 SUV u […] ([…]) fl-2012 fis-sessjoni ta' ppjanar 61, id-dipartiment tal-kontroll [Kontroll tal-Grupp] f'Lulju 2012 inizjalment identifika erba' għażliet għall-post tal-produzzjoni: Setubal, [is-sit 1 f'żona mhux megħjuna fiż-ŻEE], [is-sit 2 barra ż-ŻEE] u [is-sit 3 f'żona mhux megħjuna fiż-ŻEE] billi applika żewġ kriterji prinċipali: jekk jistgħux jiġu installati kapaċitajiet addizzjonali f'impjant eżistenti u jekk il-faċilitajiet eżistenti humiex kompatibbli mal-investiment ippjanat. Il-kalkoli mwettqa mill-[Kontroll tal-Grupp] kienu jinkludu wkoll il-volum tal-bejgħ tal-[mudell predefinit] li kellu SOP fi żmien simili. Kienu żviluppati tliet alternattivi bil-volumi maqsumin bejn l-erba' siti. Għal kull alternattiva, kienu kkalkulati l-ispejjeż tal-produzzjoni għal kull karozza u r-riżultat ta' dawn il-kalkoli wera li f'dak iż-żmien l-aħjar alternattiva kienet tkun li l-volumi tal-[mudell predefinit] u tal-A0 SUV jiġu kombinati fi [is-sit 1 f'żona mhux megħjuna fiż-ŻEE] u li l-volumi ġodda f'Setubal jiġu limitati għas-segment […].

(123)

Fil-proċess ta' ppjanar aktar wara, id-dipartiment tal-kontroll iddeċieda li jeskludi [is-sit 3 f'żona mhux megħjuna fiż-ŻEE] minħabba żvantaġġi fl-ispejjeż tal-persunal u [is-sit 2 barra ż-ŻEE] minħabba żvantaġġi fl-ispejjeż loġistiċi u għalhekk żamm biss [is-sit 1 f'żona mhux megħjuna fiż-ŻEE] bħala sit alternattiv vijabbli għal Setubal.

(124)

Il-Kummissjoni tinnota li f'Jannar 2014 Volkswagen iddeċidiet li tilloka l-produzzjoni tal-[mudell predefinit] fi [is-sit 1 f'żona mhux megħjuna fiż-ŻEE] u fi [is-sit 2 barra ż-ŻEE], fejn diġà kien prodott il-mudell ta' qabel. Il-Portugall ipprovda evidenza sabiex jipprova li anki wara li ttieħdet id-deċiżjoni dwar il-[mudell predefinit], [is-sit 1 f'żona mhux megħjuna fiż-ŻEE] baqa' xenarju realistiku għall-investiment innotifikat. Id-dokumenti pprovduti jippermettu lill-Kummissjoni li tikkonkludi li f'Marzu 2014 meta ttieħdet id-deċiżjoni dwar il-prodott mill-VAP, [is-sit 1 f'żona mhux megħjuna fiż-ŻEE] kellu kapaċità suffiċjenti sabiex jakkomoda l-ħtiġijiet tal-proġett innotifikat. Dan huwa appoġġat ulterjorment mid-deċiżjoni tal-Grupp VW ta' Marzu 2015 li tipproduċi fi [is-sit 1 f'żona mhux megħjuna fiż-ŻEE] mudell ieħor b'kapaċità ta' produzzjoni annwali simili bħall-proġett innotifikat.

(125)

Barra minn hekk, il-Kummissjoni vverifikat li l-ispejjeż rilevanti kollha relatati max-xiftijiet addizzjonali meħtieġa fi [is-sit 1 f'żona mhux megħjuna fiż-ŻEE] sabiex ilaħħqu mal-kapaċità addizzjonali meħtieġa għall-proġett innotifikat kienu kkunsidrati fix-xenarju kontrofattwali. Barra minn hekk, hija tieħu nota tal-argument tal-Portugall li kieku Setubal ma ntgħażilx bħala s-sit għall-proġett innotifikat, Autoeuropa jista' jkun li kien ikollha tagħlaq tal-anqas partijiet ewlenin tal-impjant. Il-Kummissjoni vverifikat li fix-xenarju kontrofattwali ġew ikkunsidrati kemm l-ispejjeż għat-tkeċċija tal-impjegati f'Setubal kif ukoll l-ispejjeż għar-rimborż tal-għajnuna mill-Istat mogħtija fil-proġetti ta' investiment preċedenti msemmija fit-Taqsima 4.2.

(126)

Il-Kummissjoni hija sodisfatta wkoll li l-kalkoli tal-investiment u l-ispejjeż tal-produzzjoni fiż-żewġ siti użati fix-xenarju kontrofattwali huma preċiżi u huma bbażati fuq dejta kredibbli pprovduta mill-fabbriki jew fuq suppożizzjonijiet kredibbli.

(127)

Kif deskritt fil-premessa 70 u fl-Anness I ta' din id-deċiżjoni, l-istimi għall-ispejjeż tal-produzzjoni attribwibbli għas-sit, li jinkludu l-ispejjeż tal-produzzjoni u l-ispejjeż tal-investiment, irriżultaw fi żvantaġġ, f'termini ta' spejjeż, ta' EUR 90 miljun f'valur nominali għal Setubal meta mqabbel ma' [is-sit 1 f'żona mhux megħjuna fiż-ŻEE]. Sabiex tnaqqas l-iżvantaġġ f'termini ta' spejjeż, ta' Setubal, u fid-dawl tad-deċiżjoni formali li jmiss tal-VAI dwar il-lokalizzazzjoni tal-proġett ta' investiment, wara li ttieħdet id-deċiżjoni dwar il-prodott mill-VAP fl-10 ta' Marzu 2014, Autoeuropa introduċiet applikazzjoni għall-għajnuna fil-31 ta' Marzu 2014.

(128)

Fit-28 ta' Mejju 2014 u fis-26 ta' Ġunju 2014, il-VAI ddeċieda li l-investiment innotifikat jagħmlu f'Setubal. Kif dokumentat mill-minuti tal-laqgħat tal-VAI, din id-deċiżjoni kienet adottata espliċitament soġġetta għad-disponibbiltà tal-għajnuna mill-Istat. Ix-xogħlijiet fuq il-proġett bdew fis-26 ta' Ġunju 2014.

(129)

Il-Kummissjoni diġà stabbiliet aktar 'il fuq (ara l-premessa 85) li skont il-paragrafu 20 tal-IDAC, ir-rekwiżiti formali għal effett ta' inċentiv, stabbiliti fil-paragrafu 38 tar-RAG 2007-13, kienu ssodisfati. Barra minn hekk, l-awtoritajiet Portugiżi pprovdew evidenza ċara li l-għajnuna effettivament kellha impatt fuq l-għażla tas-sit tal-investiment, billi d-deċiżjoni tal-Grupp VW li l-proġett innotifikat tagħmlu f'Setubal ittieħdet biss wara l-iffirmar tal-kuntratt ta' investiment (28) li kkonferma li l-proġett ta' investiment ikun eliġibbli għal għajnuna mill-Istat. B'konformità mal-paragrafi 23 u 25 tal-IDAC, il-Kummissjoni tqis li x-xenarju kontrofattwali ppreżentat mill-Portugall huwa realistiku u appoġġat b'evidenza ġenwina u kontemporanja li tipprova li l-għajnuna għandha effett reali (sostantiv) ta' inċentiv: billi naqqset id-differenza fil-vijabilità bejn iż-żewġ siti favur Setubal, l-għajnuna kkontribwiet sabiex tinbidel id-deċiżjoni dwar il-post tal-kumpanija benefiċjarja. Mingħajr l-għajnuna, l-investiment ma kienx isir f'Setubal.

(130)

Il-paragrafu 29 tal-IDAC jitlob li biex l-għajnuna tkun proporzjonali, l-ammont u l-intensità tal-għajnuna jridu jkunu limitati għall-minimu meħtieġ biex l-investiment isir fir-reġjun megħjun.

(131)

B'mod ġenerali, l-għajnuna reġjonali titqies li tkun proporzjonali mal-gravità tal-problemi li jaffettwaw ir-reġjuni megħjuna jekk tirrispetta l-limitu massimu applikabbli tal-għajnuna reġjonali, inkluż it-tnaqqis progressiv awtomatiku tal-limitu massimu tal-għajnuna reġjonali għal proġetti kbar ta' investiment (li diġà huwa parti mill-mappa applikabbli tal-għajnuna reġjonali). L-intensità tal-għajnuna applikata f'dan il-każ mhijiex ogħla mil-limiti massimi tal-għajnuna reġjonali korretti bil-mekkaniżmu ta' tnaqqis, kif diġà kien stabbilit fil-premessa 96.

(132)

Minbarra l-prinċipju ġenerali ta' proporzjonalità kontenut fir-RAG 2007-13, l-IDAC jitlob li titwettaq valutazzjoni aktar dettaljata. Taħt ix-xenarju 2 tal-IDAC, l-għajnuna titqies proporzjonata jekk tkun daqs id-differenza bejn l-ispejjeż netti għall-benefiċjarju sabiex jinvesti fir-reġjun megħjun u l-ispejjeż netti sabiex jinvesti fis-sit alternattiv.

(133)

Id-dokumentazzjoni ppreżentata mill-Portugall (ara l-premessi 68, 70 u 71 hawn fuq) tipprova li l-għajnuna kienet limitata għall-ammont neċessarju, minħabba li ma taqbiżx id-differenza fl-ispejjeż bejn it-tqegħid tal-investiment f'Setubal u fi […]. Il-kalkolu magħmul fiż-żmien tal-analiżi kontrofattwali (u bbażat fuq dokumenti mfasslin kontemporanjament mad-deċiżjoni ta' investiment) juri li anki bl-għajnuna, Setubal kien EUR 14,6-il miljun aktar għali fil-valur skontat minn [is-sit 1 f'żona mhux megħjuna fiż-ŻEE]. Il-Kummissjoni tinnota li l-iżvantaġġ li jifdal f'termini ta' spejjeż kien meqjus bħala aċċettabbli minħabba ċerti aspetti kwalitattivi, bħar-raġunijiet ta' responsabbiltà soċjali (mingħajr l-investiment, Autoeuropa kien ikollha tagħlaq partijiet ewlenin tal-impjant f'Setubal) jew il-possibbiltà li Setubal ikopri qċaċet tal-produzzjoni mingħajr l-ebda appoġġ minn impjanti oħra, filwaqt li [is-sit 1 f'żona mhux megħjuna fiż-ŻEE] ikollu jittrasferixxi parti mill-produzzjoni lejn [is-sit barra miż-ŻEE]. Jekk il-kalkolu jsir billi jitqies l-ammont skontat ta' għajnuna nnotifikata ta' EUR 36,15 miljun (29), l-iżvantaġġ tas-sit ta' Setubal xorta jkun ta' EUR 11,85-il miljun (EUR 48 miljun — EUR 36,15-il miljun).

(134)

Billi l-għajnuna hija limitata għall-ammont meħtieġ sabiex jikkumpensa għall-ispejjeż netti addizzjonali biex il-proġett ta' investiment isir f'Setubal, meta mqabbel mas-sit alternattiv [is-sit 1 f'żona mhux megħjuna fiż-ŻEE], il-Kummissjoni tqis li l-proporzjonalità tal-għajnuna fiż-żmien tad-deċiżjoni dwar is-sit ġiet murija.

(135)

Il-paragrafu 40 tal-IDAC isostni li “jekk l-analiżi kontrofattwali tissuġġerixxi li mingħajr l-għajnuna, l-investiment xorta waħda kien jitwettaq, kien x'kien il-każ, ukoll jekk possibbilment minn lokalità oħra (it-tieni xenarju), u jekk l-għajnuna tkun proporzjonali, l-indikazzjonijiet possibbli ta' deformazzjonijiet bħal ma huma sehem qawwi tas-suq u żieda fil-kapaċità f'suq li l-prestazzjoni tiegħu hija inqas mil-livell standard, għandhom, fil-prinċipju, ikunu l-istess, irrispettivament mill-għajnuna”.

(136)

Mingħajr l-għajnuna nnotifikata, l-investiment kien isir f'sit ieħor fi ħdan iż-ŻEE, u kien iwassal għall-istess livell ta' tfixkil tal-kompetizzjoni (jiġifieri x-xenarju 2). Billi l-għajnuna hija limitata għall-minimu neċessarju sabiex jiġu paċuti l-ispejjeż addizzjonali li jirriżultaw mill-iżvantaġġi reġjonali ta' reġjun megħjun, hija ma għandhiex effetti negattivi mhux xierqa fuq il-kompetizzjoni, bħas-soppressjoni tal-investiment privat.

(137)

Skont il-paragrafu 50 tal-IDAC, minħabba l-ispeċifiċità ġeografika tagħha, l-effetti negattivi potenzjali tal-post marbuta mal-għajnuna reġjonali diġà huma rikonoxxuti u ristretti sa ċertu punt mir-RAG u l-mapep tal-għajnuna reġjonali, li jiddefinixxu b'mod eżawrjenti ż-żoni eliġibbli sabiex jingħataw għajnuna reġjonali, b'kont meħud tal-objettivi tal-politika ta' ekwità u koeżjoni, u l-intensitajiet tal-għajnuna eliġibbli. Madankollu, skont il-paragrafu 53 tal-IDAC, jekk, mingħajr l-għajnuna, l-investiment kien isir f'reġjun aktar fqir (aktar żvantaġġi reġjonali — intensità massima ogħla tal-għajnuna reġjonali) jew f'reġjun li jkun meqjus li għandu l-istess żvantaġġi reġjonali bħar-reġjun fil-mira (l-istess intensità massima tal-għajnuna reġjonali), dan jikkostitwixxi effett negattiv fuq il-kummerċ u element negattiv fit-test ġenerali tal-ibbilanċjar li mhuwiex probabbli li jiġi kkumpensat b'xi element pożittiv, minħabba li jmur kontra l-istess ħsieb tal-għajnuna reġjonali.

(138)

Fil-każ tal-proġett innotifikat, ma ġiex ikkunsidrat investiment f'żona ġdida billi pakkett ta' investiment ta' [140 000-160 000] karozza li jaqgħu f'segment ta' prezzijiet tas-suq […] huwa żgħir wisq sabiex irendi l-investiment f'żona ġdida wieħed vijabbli. Bl-applikazzjoni ta' żewġ kriterji, il-kapaċitajiet addizzjonali eżistenti u faċilitajiet kompatibbli mal-proġett ippjanat, l-uniċi siti alternattivi inizjali kienu limitati għal [is-sit 1] (żona mhux megħjuna fi [iż-ŻEE]), [is-sit 2] ([barra ż-ŻEE]) u [is-sit 3] ([żona mhux megħjuna fiż-ŻEE); [is-sit 2 barra ż-ŻEE] u [is-sit 3 f'żona mhux megħjuna fiż-ŻEE] kienu fi stadju aktar tard esklużi minħabba li kienu kkaratterizzati minn spejjeż għoljin tal-loġistika u tal-persunal rispettivament.

(139)

Għalhekk, il-Kummissjoni tikkonkludi li ma hemm l-ebda indikazzjoni li l-investiment kien isir f'reġjun megħjun ieħor bl-istess limitu massimu jew ogħla tal-intensità tal-għajnuna: għaldaqstant il-Kummissjoni tqis li l-għajnuna ma għandha l-ebda effett kontra l-koeżjoni li jmur kontra l-istess ħsieb tal-għajnuna reġjonali u l-għajnuna ma għandha l-ebda effett negattiv mhux xieraq fuq il-kummerċ.

(140)

Wara li ġie stabbilit li l-għajnuna tipprovdi inċentiv għat-twettiq tal-investiment fir-reġjun ikkonċernat u hija proporzjonata, huwa neċessarju bbilanċjar tal-effetti pożittivi tal-għajnuna mal-effetti negattivi tagħha.

(141)

Il-valutazzjoni kkonfermat li l-miżura ta' għajnuna għandha effett ta' inċentiv sabiex tattira investiment li joffri kontribut importanti għall-iżvilupp reġjonali ta' reġjun żvantaġġat li huwa eliġibbli għall-għajnuna reġjonali skont l-Artikolu 107(3)(c) TFUE, mingħajr ma ċċaħħad mill-investiment l-ebda reġjun bl-istess limitu massimu jew ogħla tal-intensità tal-għajnuna (l-ebda effett kontra l-koeżjoni). Il-Kummissjoni tqis li l-attirar ta' investiment lejn reġjun aktar fqir huwa aktar ta' benefiċċju għall-koeżjoni fi ħdan l-Unjoni milli kieku l-istess investiment sar f'reġjun aktar żviluppat. Kif iddikjarat fil-paragrafu 53 tal-IDAC, il-Kummissjoni tqis li “l-effetti pożittivi tal-għajnuna reġjonali li tikkumpensa biss għad-differenza tal-ispejjeż netti relattivi għal post alternattiv ta' investiment aktar żviluppat […] ikunu normalment ikkunsidrati, skont it-test ta' bilanċ, bħala li jissuperaw l-effetti negattivi fil-post alternattiv għall-investiment il-ġdid”.

(142)

Fid-dawl ta' dan ta' hawn fuq, il-Kummissjoni ssib li, billi l-għajnuna hija proporzjonali għad-differenza fl-ispejjeż netti għat-twettiq tal-investiment fil-post magħżul, meta mqabbel ma' post alternattiv aktar żviluppat, l-effetti pożittivi tal-għajnuna, f'termini tal-għan u l-adegwatezza tagħha, kif murija hawn fuq, jegħlbu l-effetti negattivi fil-post alternattiv.

(143)

Skont il-paragrafu 68 tar-RAG 2007-13, u fid-dawl tal-valutazzjoni fil-fond imwettqa abbażi tal-IDAC, il-Kummissjoni tikkonkludi li l-għajnuna hija neċessarja sabiex tipprovdi effett ta' inċentiv għall-investiment u li l-benefiċċji tal-miżura ta' għajnuna huma akbar mid-distorsjoni li tirriżulta tal-kompetizzjoni u l-effetti fuq il-kummerċ bejn l-Istati Membri.

(144)

Il-Kummissjoni tikkonkludi li l-għajnuna proposta għall-investiment reġjonali favur Volkswagen Autoeuropa, Lda mogħtija fit-30 ta' April 2014 soġġetta biss għall-approvazzjoni tal-Kummissjoni tissodisfa l-kundizzjonijiet kollha stabbiliti fir-RAG 2007-13 u fl-IDAC u għalhekk tista' titqies bħala kompatibbli mas-suq intern skont l-Artikolu 107(3)(c) TFUE.

(145)

Il-Kummissjoni tfakkar li skont il-premessa 16 tad-deċiżjoni ta' ftuħ, il-Portugall impenja ruħu li ma huwa se jinqabeż la l-ammont tal-għajnuna nnotifikat u lanqas l-intensità tal-għajnuna nnotifikata, jekk in-nefqa eliġibbli realizzata tiddevja mill-ammont ippjanat tan-nefqa eliġibbli, kif meqjus fin-notifika u fil-kalkolu tal-ammont massimu ta' għajnuna. Il-Portugall intrabat ukoll li jissottometti lill-Kummissjoni kull ħames snin, li jibdew mill-approvazzjoni tal-għajnuna mill-Kummissjoni, rapport intermedju (li jinkludi informazzjoni dwar l-ammonti li jkunu qegħdin jitħallsu u dwar kwalunkwe proġett ta' investiment ieħor mibdi fl-istess stabbiliment/impjant) u fi żmien sitt xhur wara l-pagament tal-aħħar segment tal-għajnuna, skont l-iskeda tal-pagamenti nnotifikata, rapport finali dettaljat,