EUR-Lex Access to European Union law
This document is an excerpt from the EUR-Lex website
Document 32016R0960
Commission Delegated Regulation (EU) 2016/960 of 17 May 2016 supplementing Regulation (EU) No 596/2014 of the European Parliament and of the Council with regard to regulatory technical standards for the appropriate arrangements, systems and procedures for disclosing market participants conducting market soundings (Text with EEA relevance)
Regolament Delegat tal-Kummissjoni (UE) 2016/960 tas-17 ta' Mejju 2016 li jissupplimenta r-Regolament (UE) Nru 596/2014 tal-Parlament Ewropew u tal-Kunsill fir-rigward tal-istandards tekniċi regolatorji dwar arranġamenti, sistemi u proċeduri xierqa għal parteċipanti fis-suq li jiddivulgaw li jwettqu sondaġġi tas-suq (Test b'rilevanza għaż-ŻEE)
Regolament Delegat tal-Kummissjoni (UE) 2016/960 tas-17 ta' Mejju 2016 li jissupplimenta r-Regolament (UE) Nru 596/2014 tal-Parlament Ewropew u tal-Kunsill fir-rigward tal-istandards tekniċi regolatorji dwar arranġamenti, sistemi u proċeduri xierqa għal parteċipanti fis-suq li jiddivulgaw li jwettqu sondaġġi tas-suq (Test b'rilevanza għaż-ŻEE)
C/2016/2859
ĠU L 160, 17.6.2016, p. 29–33
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
17.6.2016 |
MT |
Il-Ġurnal Uffiċjali tal-Unjoni Ewropea |
L 160/29 |
REGOLAMENT DELEGAT TAL-KUMMISSJONI (UE) 2016/960
tas-17 ta' Mejju 2016
li jissupplimenta r-Regolament (UE) Nru 596/2014 tal-Parlament Ewropew u tal-Kunsill fir-rigward tal-istandards tekniċi regolatorji dwar arranġamenti, sistemi u proċeduri xierqa għal parteċipanti fis-suq li jiddivulgaw li jwettqu sondaġġi tas-suq
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Ir-Regolament (UE) Nru 596/2014 tal-Parlament Ewropew u tal-Kunsill tas-16 ta' April 2014 dwar l-abbuż tas-suq (Regolament dwar l-abbuż tas-suq) u li jħassar id-Direttiva 2003/6/KE tal-Parlament Ewropew u tal-Kunsill u d-Direttivi tal-Kummissjoni 2003/124/KE, 2003/125/KE u 2004/72/KE (1), u b'mod partikolari t-tielet subparagrafu tal-Artikolu 11(9) tiegħu,
Billi:
(1) |
Huma meħtieġa arranġamenti, proċeduri u rekwiżiti ta' żamma tar-rekords xierqa sabiex jiġi żgurat li l-attivitajiet ta' sondaġġ tas-suq jiġu mmaniġġjati u kkontrollati b'mod effettiv. Bħala parti mill-arranġamenti xierqa, il-parteċipanti fis-suq li jagħmlu divulgazzjonijiet għandhom jistabbilixxu proċeduri li jiddeskrivu l-mod li bih jitwettqu s-sondaġġi tas-suq. Dawn il-proċeduri għandhom jistabbilixxu sett standard ta' informazzjoni li trid tiġi pprovduta u mitluba mill-persuni li jirċievu s-sondaġġ tas-suq, filwaqt li jiġi żgurat li l-ebda informazzjoni potenzjalment sensittiva mhux neċessarja ma tiġi mxerrda u li l-persuni kollha li jirċievu s-sondaġġ tas-suq jirċievu l-istess livell ta' informazzjoni. |
(2) |
Huwa neċessarju li tiġi pprovduta ċertezza dwar il-kontenut tal-informazzjoni kkomunikata waqt is-sondaġġi tas-suq. Għalhekk, meta s-sondaġġi tas-suq jitwettqu bit-telefon u l-parteċipant fis-suq li jagħmel id-divulgazzjoni jkollu aċċess għal linji tat-telefon irreġistrati, il-parteċipant fis-suq li jagħmel id-divulgazzjoni għandu juża dawn il-linji. Fejn is-sondaġġi tas-suq jitwettqu permezz ta' mezzi oħrajn, iżda mhux permezz ta' linji tat-telefon irreġistrati, reġistri tal-komunikazzjonijiet tas-sondaġġ tas-suq għandhom jinżammu fil-forma ta' reġistrazzjonijiet awdjo jew ta' filmati jew f'forma miktuba. Għal raġunijiet ta' protezzjoni tad-dejta personali, meta s-sondaġġ tas-suq isir minn linji tat-telefon irreġistrati jew tintuża reġistrazzjoni awdjo jew ta' filmati, għandu jinkiseb il-kunsens għar-reġistrazzjoni mill-persuna li tirċievi s-sondaġġ tas-suq. |
(3) |
Sabiex jiġi ffaċilitat it-twettiq ta' investigazzjonijiet mill-awtoritajiet kompetenti dwar suspett ta' abbuż tas-suq, il-parteċipanti tas-suq li jagħmlu d-divulgazzjoni għandhom iżommu, għal kull sondaġġ tas-suq, rekord tal-persuni li jirċievu s-sondaġġ tas-suq. |
(4) |
Sabiex jiġi mminimizzat ir-riskju ta' divulgazzjoni mhux xierqa ta' informazzjoni privileġġata, parteċipant fis-suq li jagħmel divulgazzjoni għandu jżomm rekord tal-investituri potenzjali li jkunu infurmawh li mhumiex lesti li jirċievu sondaġġi tas-suq. L-investituri potenzjali għandhom ikunu jistgħu jesprimu x-xewqa tagħhom li ma jirċevux sondaġġi tas-suq fir-rigward tat-tranżazzjonijiet potenzjali kollha jew biss ċerti tipi ta' tranżazzjonijiet. |
(5) |
Meta jkunu qed iwettqu sondaġġ tas-suq, il-parteċipanti tas-suq li jagħmlu d-divulgazzjoni għandhom ikunu jistgħu jibbenefikaw minn preżunzjoni li informazzjoni privileġġata hija divulgata fl-eżerċizzju normali tal-impjieg, professjoni jew dmirijiet ta' persuna għall-finijiet tal-Artikolu 10(1) tar-Regolament (UE) Nru 596/2014. F'dan ir-rigward, il-parteċipant tas-suq li jagħmel id-divulgazzjoni għandu jitqies li qed jaġixxi fil-kors normali tal-impjieg, professjoni jew dmirijiet tiegħu biss safejn ikun jikkonforma mar-rekwiżiti kollha, inklużi r-rekwiżiti taż-żamma tar-rekords kif stabbiliti fl-Artikolu 11 tar-Regolament (UE) Nru 596/2014 u f'dan ir-Regolament. |
(6) |
Billi valutazzjoni ta' x'jikkostitwixxi informazzjoni privileġġata, li ssir skont l-Artikolu 11(3) tar-Regolament (UE) Nru 596/2014, tista' tkun kumplessa, il-parteċipant fis-suq li jagħmel id-divulgazzjoni għandu jżomm rekords tas-sondaġġi tas-suq kollha, inklużi dawk li huma kkunsidrati mill-parteċipant fis-suq li jagħmel id-divulgazzjoni li ma jinvolvux id-divulgazzjoni ta' informazzjoni privileġġata. Dawn ir-rekords jgħinu lill-parteċipanti fis-suq li jagħmlu d-divulgazzjoni sabiex jagħtu prova ta' kondotta xierqa lill-awtoritajiet kompetenti, b'mod partikolari meta n-natura ta' din l-informazzjoni tinbidel wara s-sondaġġ tas-suq jew fejn l-awtorità kompetenti tkun tixtieq tirrevedi l-proċess ta' kategorizzazzjoni tal-informazzjoni. |
(7) |
Dan ir-Regolament huwa bbażat fuq l-abbozz tal-istandards tekniċi regolatorji sottomess mill-Awtorità Ewropea tat-Titoli u s-Swieq lill-Kummissjoni. |
(8) |
L-Awtorità Ewropea tat-Titoli u s-Swieq wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqu huwa bbażat dan ir-Regolament, analizzat il-kosti u l-benefiċċji potenzjali relatati u talbet l-opinjoni tal-Grupp tal-Partijiet Ikkonċernati tal-Assigurazzjoni stabbilit skont l-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (2). |
(9) |
Sabiex ikun żgurat il-funzjonament bla xkiel tas-swieq finanzjarji, huwa meħtieġ li dan ir-Regolament jidħol fis-seħħ b'urġenza u li d-dispożizzjonijiet stabbiliti f'dan ir-Regolament japplikaw mill-istess data bħal dawk stabbiliti fir-Regolament (UE) Nru 596/2014, |
ADOTTAT DAN IR-REGOLAMENT:
Artikolu 1
Rekwiżiti ġenerali
Parteċipant fis-suq li jagħmlu divulgazzoni għandhom jiżguraw li l-arranġamenti u l-proċeduri li jistabbilixxu biex jikkonformaw mal-paragrafi 4, 5, 6 u 8 tal-Artikolu 11 tar-Regolament (UE) Nru 596/2014 jiġu riveduti u aġġornati fuq bażi regolari meta jkun meħtieġ.
Artikolu 2
Proċeduri għall-finijiet tat-twettiq ta' sondaġġi tas-suq
1. Il-parteċipanti fis-suq li jagħmlu divulgazzjonijiet għandhom jistabbilixxu proċeduri li jiddeskrivu l-mod li bih jitwettqu s-sondaġġi tas-suq.
Il-parteċipanti fis-suq li jagħmlu divulgazzjonijiet jistgħu jikkomunikaw informazzjoni għall-finijiet ta' sondaġġ tas-suq lill-persuni li jirċievu s-sondaġġ tas-suq bil-fomm, f'laqgħat fiżiċi, telefonati awdjo jew vidjow, jew bil-miktub, permezz ta' ittra, faks jew komunikazzjonijiet elettroniċi.
2. Il-parteċipanti fis-suq li jagħmlu divulgazzjonijiet għandhom jistabbilixxu proċeduri għat-twettiq ta' sondaġġi tas-suq bit-telefon li jiżguraw li linji tat-telefon irreġistrati jiġu użati fejn il-parteċipant fis-suq li jagħmel id-divulgazzjoni jkollu aċċess għal dawn il-linji u l-persuni li jirċievu s-sondaġġ tas-suq ikunu taw il-kunsens tagħhom għar-reġistrazzjoni tal-konverżazzjoni.
3. Il-proċeduri msemmija fil-paragrafi 1 u 2 għandhom jiżguraw li persuni li jaħdmu għal parteċipant fis-suq li jagħmel divulgazzjoni b'kuntratt ta' impjieg jew b'xi mod ieħor jużaw biss tagħmir ipprovdut mill-parteċipant fis-suq li jagħmel id-divulgazzjoni meta jibagħtu u jirċievu telefonati u komunikazzjonijiet elettroniċi għal skopijiet ta' sondaġġi tas-suq.
Artikolu 3
Ġabra standard ta' informazzjoni għall-komunikazzjonijiet lil persuni li jirċievu s-sondaġġ tas-suq
1. Parteċipanti fis-suq li jagħmlu divulgazzjoni għandu jkollhom fis-seħħ proċeduri għall-iskambju ta' sett standard ta' informazzjoni mal-persuni li jirċievu s-sondaġġ tas-suq waqt is-sondaġġi tas-suq, f'sekwenza predeterminata.
2. Is-sett standard ta' informazzjoni msemmi fil-paragrafu 1 għandu jiġu ddeterminat mill-parteċipant fis-suq li jagħmel id-divulgazzjoni għal kull sondaġġ tas-suq, qabel iwettaq dan is-sondaġġ tas-suq. Il-parteċipant fis-suq li jagħmel divulgazzjoni għandu juża dan is-sett standard ta' informazzjoni mal-persuni kollha li jirċievu dan is-sondaġġ tas-suq.
3. Meta l-parteċipanti fis-suq li jagħmlu d-divulgazzjoni jqisu li s-sondaġġ tas-suq ikun jinvolvi d-divulgazzjoni ta' informazzjoni privileġġata, is-sett standard ta' informazzjoni msemmi fil-paragrafu 1 għandu jinkludi u jkun limitat għal dan li ġej, fl-ordni segwenti:
(a) |
dikjarazzjoni li tiċċara li l-komunikazzjoni tkun qed isseħħ għall-finijiet ta' sondaġġ tas-suq; |
(b) |
meta s-sondaġġ tas-suq jitwettaq permezz ta' linji tat-telefon irreġistrati, jew tintuża reġistrazzjoni awdjo jew ta' filmati, dikjarazzjoni li tindika li l-konverżazzjoni tkun irreġistrata u l-kunsens min-naħa tal-persuna li tirċievi s-sondaġġ tas-suq biex tiġi rreġistrata; |
(c) |
talba għal konferma, u l-għoti ta' tali konferma, mingħand il-persuna kkuntattjata li l-parteċipant fis-suq li jkun qed jagħmel id-divulgazzjoni jkun qed jikkomunika mal-persuna inkarigata mill-investitur potenzjali biex tirċievi s-sondaġġ tas-suq u t-tweġiba għal dik it-talba; |
(d) |
dikjarazzjoni li tiċċara li, jekk il-persuna kkuntattjata taqbel li tirċievi s-sondaġġ tas-suq, dik il-persuna tkun se tirċievi informazzjoni li l-parteċipant fis-suq li jagħmel id-divulgazzjoni jkun iqis li tkun informazzjoni privileġġata u referenza għall-obbligu stabbilit fl-Artikolu 11(7) tar-Regolament (UE) Nru 596/2014; |
(e) |
fejn ikun possibbli, stima ta' meta l-informazzjoni ma tkunx se tibqa' aktar informazzjoni privileġġata, il-fatturi li jistgħu jibdlu dik l-istima u, f'kull każ, tagħrif dwar il-mod li bih il-persuna li tirċievi s-sondaġġ tas-suq tkun se tiġi infurmata b'kull bidla f'dik l-istima; |
(f) |
dikjarazzjoni li tinforma lill-persuna li tirċievi s-sondaġġ tas-suq dwar l-obbligi stabbiliti fl-Artikolu 11(5), is-subparagrafu 1, il-punti (b), (c) u (d) tar-Regolament (UE) Nru 596/2014; |
(g) |
talba għall-kunsens tal-persuna li tirċievi s-sondaġġ tas-suq biex tirċievi informazzjoni privileġġata, kif imsemmi fl-Artikolu 11(5), is-subparagrafu 1, il-punt (a) tar-Regolament (UE) Nru 596/2014, u t-tweġiba għal dik it-talba; |
(h) |
meta l-kunsens meħtieġ skont il-punt (g) jingħata, l-informazzjoni li tiġi ddivulgata għall-finijiet tas-sondaġġ tas-suq, fejn tiġi identifikata l-informazzjoni li l-parteċipant fis-suq li jagħmel id-divulgazzjoni jqis li hija informazzjoni privileġġata. |
4. Meta l-parteċipant fis-suq li jagħmel id-divulgazzjoni jqis li s-sondaġġ tas-suq ma jkunx se jinvolvi d-divulgazzjoni ta' informazzjoni privileġġata, is-sett standard ta' informazzjoni msemmi fil-paragrafu 1 għandu jinkludi u jkun limitat għal dan li ġej, fl-ordni segwenti:
(a) |
dikjarazzjoni li tiċċara li l-komunikazzjoni tkun qed isseħħ għall-finijiet ta' sondaġġ tas-suq; |
(b) |
meta s-sondaġġ tas-suq jitwettaq permezz ta' linji tat-telefon irreġistrati, jew tintuża reġistrazzjoni awdjo jew ta' filmati, dikjarazzjoni li tindika li l-konverżazzjoni tkun qed tiġi rreġistrata u l-kunsens min-naħa tal-persuna li tirċievi s-sondaġġ tas-suq biex tiġi rreġistrata; |
(c) |
talba għal konferma, u l-għoti ta' tali konferma, mingħand il-persuna kkuntattjata li l-parteċipant fis-suq li jkun qed jagħmel id-divulgazzjoni jkun qed jikkomunika mal-persuna inkarigata mill-investitur potenzjali biex tirċievi s-sondaġġ tas-suq u t-tweġiba għal dik it-talba; |
(d) |
dikjarazzjoni li tiċċara li, jekk il-persuna kkuntattjata taqbel li tirċievi s-sondaġġ tas-suq, dik il-persuna tkun se tirċievi informazzjoni li l-parteċipant fis-suq li jagħmel id-divulgazzjoni jkun iqis li ma tkunx informazzjoni privileġġata u referenza għall-obbligu stabbilit fl-Artikolu 11(7) tar-Regolament (UE) Nru 596/2014; |
(e) |
talba għall-kunsens tal-persuna li tirċievi s-sondaġġ tas-suq biex isir is-sondaġġ tas-suq, u t-tweġiba għal dik it-talba; |
(f) |
meta l-kunsens meħtieġ skont il-punt (e) jingħata, l-informazzjoni li tkun qed tiġi divulgata għall-finijiet tas-sondaġġ tas-suq. |
5. Il-parteċipant fis-suq li jagħmel id-divulgazzjoni għandu jiżgura li l-istess livell ta' informazzjoni jiġi kkomunikat lil kull persuna li tirċievi s-sondaġġ tas-suq b'rabta mal-istess sondaġġ tas-suq.
Artikolu 4
Dejta dwar persuni li jirċievu s-sondaġġ tas-suq
1. Għal kull sondaġġ tas-suq, il-parteċipant fis-suq li jagħmel id-divulgazzjoni għandu jfassal lista li jkun fiha l-informazzjoni li ġejja:
(a) |
l-ismijiet tal-persuni fiżiċi u ġuridiċi kollha li lilhom tkun ġiet divulgata informazzjoni matul is-sondaġġ tas-suq; |
(b) |
id-data u l-ħin ta' kull komunikazzjoni ta' informazzjoni li tkun seħħet matul jew wara s-sondaġġ tas-suq; |
(c) |
id-dettalji ta' kuntatt tal-persuni li jirċievu s-sondaġġ tas-suq użati għall-finijiet tas-sondaġġ tas-suq. |
2. Parteċipant fis-suq li jagħmel divulgazzjoni għandu jfassal lista ta' kull investitur potenzjali li infurmah li ma jixtieqx li jirċievi sondaġġi tas-suq, jew fir-rigward tat-tranżazzjonijiet potenzjali kollha jew fir-rigward ta' tipi partikolari ta' tranżazzjonijiet potenzjali. Il-parteċipant fis-suq li jagħmel divulgazzjoni għandu jżomm lura milli jikkomunika informazzjoni għal skopijiet ta' sondaġġi tas-suq lil dawn l-investituri potenzjali.
Artikolu 5
Proċedura għan-notifika meta l-informazzjoni ma tkunx għada informazzjoni privileġġata
Meta l-parteċipanti tas-suq li jagħmlu divulgazzjoni jevalwaw kif imsemmi fl-Artikolu 11(6) tar-Regolament (UE) Nru 596/2014, li l-informazzjoni privileġġata divulgata matul sondaġġ tas-suq ma tkunx għadha informazzjoni privileġġata, għandhom jipprovdu lill-persuna li tkun irċeviet is-sondaġġ tas-suq bl-informazzjoni li ġejja:
(a) |
l-identità tal-parteċipant fis-suq li jagħmel id-divulgazzjoni; |
(b) |
identifikazzjoni tat-tranżazzjoni suġġetta għas-sondaġġ tas-suq; |
(c) |
id-data u l-ħin tas-sondaġġ tas-suq; |
(d) |
il-fatt li l-informazzjoni divulgata ma kenitx għadha aktar informazzjoni privileġġata; |
(e) |
id-data li fiha l-informazzjoni ma baqgħetx aktar informazzjoni privileġġata. |
Artikolu 6
Rekwiżiti ta' żamma tar-rekords
1. Parteċipant fis-suq li jagħmel divulgazzjoni għandu jiżgura li rekords ta' dan li ġej jinżammu fuq mezz li jservi fit-tul li jiżgura l-aċċessibbiltà u l-leġġibbiltà tagħhom matul il-perjodu ta' żamma stipulat fl-Artikolu 11(8) tar-Regolament (UE) Nru 596/2014:
(a) |
il-proċedura li hemm referenza għaliha fl-Artikoli 1 u 2; |
(b) |
is-sett standard ta' informazzjoni stabbilit għal kull sondaġġ tas-suq f'konformità mal-Artikolu 3; |
(c) |
id-dejta dwar persuni li jirċievu s-sondaġġ tas-suq imsemmi fl-Artikolu 4; |
(d) |
il-komunikazzjonijiet kollha ta' informazzjoni li saru bejn il-parteċipant fis-suq li jagħmel id-divulgazzjoni u l-persuni kollha li jirċievu s-sondaġġ tas-suq għall-finijiet tas-sondaġġ tas-suq, inkluż kull dokument ipprovdut mill-parteċipant fis-suq li jagħmel id-divulgazzjoni lill-persuni li jirċievu s-sondaġġ tas-suq; |
(e) |
l-informazzjoni li tkun wasslet għall-valutazzjoni li l-informazzjoni kkomunikata matul is-sondaġġ tas-suq ma tkunx għadha informazzjoni privileġġata u n-notifiki rilevanti msemmija fl-Artikolu 5. |
2. Għall-finijiet tal-Artikolu 6(1)(d), il-parteċipant fis-suq li jagħmel id-divulgazzjoni għandu jżomm:
(a) |
fejn il-komunikazzjoni ta' informazzjoni tkun saret bit-telefon fuq linji rreġistrati, reġistrazzjonijiet ta' konverżazzjonijiet telefoniċi sakemm il-persuni li lilhom tiġi kkomunikata l-informazzjoni jkunu taw il-kunsens tagħhom għal tali reġistrazzjoni; |
(b) |
fejn il-komunikazzjoni ta' informazzjoni tkun saret bil-miktub, kopja tal-korrispondenza; |
(c) |
fejn il-komunikazzjoni ta' informazzjoni tkun saret matul laqgħat irreġistrati bil-vidjow jew bl-awdjo, ir-reġistrazzjonijiet ta' dawk il-laqgħat sakemm il-persuni li lilhom tiġi kkomunikata l-informazzjoni jkunu taw il-kunsens tagħhom għal tali reġistrazzjoni; |
(d) |
fejn il-komunikazzjoni ta' informazzjoni tkun saret matul laqgħat jew konverżazzjonijiet telefoniċi mhux irrekordjati, il-minuti jew in-noti bil-miktub tal-imsemmija laqgħat jew konverżazzjonijiet telefoniċi. |
3. Il-minuti jew noti bil-miktub imsemmija fil-paragrafu 2(d), għandhom jitfasslu mill-parteċipant fis-suq li jagħmel id-divulgazzjoni u jkunu debitament iffirmati kemm mill-parteċipant fis-suq li jagħmel id-divulgazzjoni kif ukoll mill-persuna li tirċievi s-sondaġġ tas-suq u għandhom jinkludu:
(a) |
id-data u l-ħin tal-laqgħa jew konverżazzjoni telefonika u l-identità tal-parteċipanti; |
(b) |
id-dettalji tal-informazzjoni relatata mas-sondaġġ tas-suq li ġew skambjati bejn il-parteċipant fis-suq li jagħmel id-divulgazzjoni u l-persuna li tirċievi s-sondaġġ tas-suq matul is-sondaġġ tas-suq, inkluża l-informazzjoni mogħtija lill-persuna li tirċievi s-sondaġġ tas-suq u mitluba mingħand il-persuna li tirċievi s-sondaġġ tas-suq skont is-sett standard ta' informazzjoni msemmi fl-Artikolu 3; |
(c) |
kull dokument u materjal ipprovdut mill-parteċipant fis-suq li li jagħmel id-divulgazzjoni lill-persuna li tirċievi s-sondaġġ tas-suq matul is-sondaġġ tas-suq. |
Meta l-parteċipant fis-suq li jagħmel id-divulgazzjoni u l-persuna li tirċievi s-sondaġġ tas-suq ma jkunux qablu fi żmien ħamest ijiem tax-xogħol wara s-sondaġġ tas-suq dwar il-kontenut tal-minuti jew noti bil-miktub, il-parteċipant fis-suq li jagħmel id-divulgazzjoni għandu jirreġistra kemm verżjoni tal-minuti jew noti bil-miktub iffirmata mill-parteċipant fis-suq li jagħmel id-divulgazzjoni kif ukoll verżjoni tagħhom iffirmata mill-persuna li tkun irċeviet is-sondaġġ tas-suq.
Meta l-persuna li tirċievi s-sondaġġ tas-suq ma tkunx ipprovdiet lill-parteċipant fis-suq li jagħmel id-divulgazzjoni b'verżjoni ffirmata tal-minuti jew noti bil-miktub fi żmien ħamest ijiem tax-xogħol wara s-sondaġġ tas-suq, il-parteċipant fis-suq li jagħmel id-divulgazzjoni għandu jżomm kopja tal-verżjoni bil-miktub tal-minuti jew in-noti ffirmati mill-parteċipant fis-suq li jagħmel id-divulgazzjoni.
4. Ir-rekords imsemmija fil-paragrafi 1, 2 u 3 għandhom jitqiegħdu għad-dispożizzjoni tal-awtorità kompetenti fuq talba tagħha.
Artikolu 7
Dħul fis-seħħ
Dan ir-Regolament jidħol fis-seħħ l-għada tal-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Jibda japplika mit-3 ta' Lulju 2016.
Dan ir-Regolament jorbot fl-intier tiegħu u japplika direttament fl-Istati Membri kollha.
Magħmula fi Brussell, is-17 ta' Mejju 2016.
Għall-Kummissjoni
Il-President
Jean-Claude JUNCKER
(1) ĠU L 173, 12.6.2014, p. 1.
(2) Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).