2.4.2016   

MT

Il-Ġurnal Uffiċjali tal-Unjoni Ewropea

L 87/1

(1)

L-Anness II tar-Regolament (KE) Nru 1333/2008 jistabbilixxi lista tal-Unjoni ta' addittivi tal-ikel approvati għall-użu fl-ikel u l-kundizzjonijiet tal-użu tagħhom.

(2)

Din il-lista tista' tiġi aġġornata skont il-proċedura komuni msemmija fl-Artikolu 3(1) tar-Regolament (KE) Nru 1331/2008 tal-Parlament Ewropew u tal-Kunsill (2), jew bl-inizjattiva tal-Kummissjoni jew inkella wara talba.

(3)

Fil-25 ta' Marzu 2013 tressqet talba għall-awtorizzazzjoni tal-użu tal-glikosidi tal-istevjol (E 960) bħala sustanza li żżid il-ħlewwa f'ċertu xarbiet b'enerġija mnaqqsa jew mingħajr zokkor miżjud, jiġifieri xarbiet fil-kategorija tal-ikel “Oħrajn” 14.1.5.2 tal-Anness II tar-Regolament (KE) Nru 1333/2008. Sussegwentement l-applikazzjoni saret disponibbli għall-Istati Membri skont l-Artikolu 4 tar-Regolament (KE) Nru 1331/2008.

(4)

Il-glikosidi tal-istevjol huma kostitwenti b'togħma ħelwa mingħajr kaloriji u jistgħu jintużaw biex jieħdu post iz-zokkor kaloriku f'ċertu xarbiet, biex b'hekk jitnaqqas il-kontenut kaloriku ta' dawk il-prodotti. Konsegwentement, il-glikosidi tal-istevjol jagħtu ħlewwa li dawn ix-xarbiet mingħajr ma jżidu kaloriji mal-prodott finali, u b'hekk il-konsumaturi jistgħu jiġu offruti prodotti b'enerġija mnaqqsa jew mingħajr zokkor miżjud, f'konformità mal-Artikolu 7 tar-Regolament (KE) Nru 1333/2008.

(5)

Skont l-Artikolu 3(2) tar-Regolament (KE) Nru 1331/2008, il-Kummissjoni għandha titlob l-opinjoni tal-Awtorità Ewropea dwar is-Sigurtà fl-Ikel (l-“Awtorità”) sabiex taġġorna l-lista tal-Unjoni ta' addittivi tal-ikel imniżżla fl-Anness II tar-Regolament (KE) Nru 1333/2008.

(6)

Fl-2010, l-Awtorità adottat opinjoni xjentifika (3) dwar is-sikurezza tal-glikosidi tal-istevjol għall-użi proposti bħala addittiv tal-ikel (E 960) u stabbiliet Doża Aċċettabbli ta' Kuljum (ADI) ta' 4 mg/kg ta' piż tal-ġisem/jum, espressa bħala ekwivalenti tal-istevjol. Fid-dawl tal-estensjoni proposta ta' użi bħala addittiv tal-ikel, l-Awtorità rrevediet il-valutazzjoni tal-esponiment għall-glikosidi tal-istevjol u esprimiet l-opinjonijiet tagħha fit-2 ta' Mejju 2014 (4) u fit-30 ta' Ġunju 2015 (5). Fir-rigward ta' dawk l-estensjonijiet ta' użi, l-Awtorità kkonkludiet li l-istimi tal-esponiment huma inqas mill-ADI għall-gruppi tal-età kollha, ħlief għat-trabi li jkunu telqu jimxu tal-ogħla firxa tal-istimi ta' livell għoli (il-95 perċentil), f'pajjiż wieħed. Il-kalkoli tal-esponiment, li saru minn Rijksinstituut voor Volksgezondheid en Milieu, urew li l-estensjoni proposta tal-użu ma taffettwax il-95 perċentil ta' esponiment fit-tfal żgħar ta' bejn is-sentejn u s-sitt snin fin-Netherlands u li xorb mhux alkoħoliku u prodotti tal-ħalib iffermentat b'togħmiet miżjuda baqgħu l-kontributuri ewlenin għall-esponiment għall-glikosidi tal-istevjol f'dak il-grupp ta' età.

(7)

Meta wieħed iqis li s-sottokategorija tal-ikel 14.1.5.2 tkopri prodotti li m'humiex maħsuba biex jiġu kkunsmati minn tfal żgħar (minn 12-il xahar sa 35 xahar), l-użi proposti u l-livelli tal-użu tal-glikosidi tal-istevjol (E 960) bħala sustanza li tagħti l-ħlewwa mhumiex ta' tħassib għas-siġurtà.

(8)

Għalhekk, huwa xieraq li jkun awtorizzat l-użu tal-glikosidi tal-istevjol (E 960) bħala sustanza li żżid il-ħlewwa fix-xorb b'valuri enerġetiċi mnaqqsa jew mingħajr zokkor miżjud fis-subkategorija tal-ikel 14.1.5.2 “Oħrajn”: kafè, te u xarbiet magħmula minn infużjonijiet erbali (b'livell massimu ta' 30 mg/l), kafè istantanju bit-togħma u prodotti tal-kappuċċino istantanju (b'livell massimu ta' 30 mg/l) u xarbiet ibbażati fuq ix-xgħir (malt) u bit-togħma taċ-ċikkulata/kappuċċino (b'livell massimu ta' 20 mg/l).

(9)

Għaldaqstant, l-Anness II tar-Regolament (KE) Nru 1333/2008 għandu jiġi emendat skont dan.

(10)

Il-miżuri previsti f'dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,