16.11.2016   

MT

Il-Ġurnal Uffiċjali tal-Unjoni Ewropea

L 308/62

(1)

Id-Direttiva 2000/29/KE tipprevedi miżuri protettivi kontra l-introduzzjoni ta' organiżmi li huma perikolużi għall-pjanti jew għall-prodotti tal-pjanti fl-Unjoni minn pajjiżi terzi. L-Artikolu 1 tad-Deċiżjoni ta' Implimentazzjoni tal-Kummissjoni 2013/780/UE (2) jipprevedi deroga mill-miżuri protettivi tad-Direttiva 2000/29/KE u jawtorizza lill-Istati Membri jippermettu l-introduzzjoni fit-territorju tagħhom ta' injam isserrat mingħajr qoxra tal-Quercus L., tal-Platanus L. u tal-Acer saccharum Marsh., li joriġina mill-Istati Uniti tal-Amerka, mingħajr ma jkollu miegħu ċertifikat fitosanitarju, sat-30 ta' Novembru 2016, dejjem jekk dan l-injam jikkonforma mal-kundizzjonijiet stipulati fl-Anness ta' dik id-Deċiżjoni ta' Implimentazzjoni.

(2)

Id-Deċiżjoni ta' Implimentazzjoni tal-Kummissjoni (UE) 2015/893 (3) tistipula r-rekwiżiti għall-introduzzjoni fl-Unjoni ta' injam isserrat mingħajr qoxra tal-Platanus L. u tal-Acer spp. li joriġina minn pajjiżi terzi. Huwa meqjus li dawk ir-rekwiżiti huma meħtieġa għall-protezzjoni fitosanitarja tat-territorju tal-Unjoni mill-organiżmu Anoplophora glabripennis (Motschulsky) u ma jista' jkun hemm ebda deroga minn dan li tista' tiġi ġġustifikata. Għaldaqstant, dawk l-ispeċijiet ta' injam isserrat mingħajr qoxra ma għandhomx jibqgħu suġġetti tad-deroga prevista fid-Deċiżjoni ta' Implimentazzjoni 2013/780/UE.

(3)

Fid-dawl tal-informazzjoni li jibagħtu perjodikament l-Istati Membri lill-Kummissjoni, wieħed jista' jikkonkludi li l-applikazzjoni tal-kundizzjonijiet speċifiċi stipulati fl-Anness tad-Deċiżjoni ta' Implimentazzjoni 2013/780/UE hija biżżejjed biex timpedixxi l-introduzzjoni ta' organiżmi ta' ħsara fl-Unjoni. L-Istati Membri għandhom jibqgħu japplikaw dawk il-kundizzjonijiet rigward l-injam isserrat mingħajr qoxra tal-Quercus L. li joriġina mill-Istati Uniti tal-Amerka. Il-valutazzjoni tal-informazzjoni teknika li tressqet mill-Istati Uniti turi li l-Programm ta' Ċertifikazzjoni tat-Tnixxif fil-Fran ta' Injam Iebes Isserrat (Kiln Drying Hardwood Lumber Certificate (“Certificate of Kiln Drying”)), imsemmi fl-Artikolu 2(3) tad-Deċiżjoni ta' Implimentazzjoni 2013/780/UE, qiegħed jaħdem b'mod effikaċi.

(4)

Għalhekk, l-awtorizzazzjoni tad-deroga dwar l-injam isserrat mingħajr qoxra tal-Quercus L. li joriġina mill-Istati Uniti tal-Amerka għandha tiġi estiża sal-31 ta' Diċembru 2026 biex ikun evitat kull tfixkil bla bżonn tan-negozju ta' dak l-injam.

(5)

Għalhekk, id-Deċiżjoni ta' Implimentazzjoni 2013/780/UE għandha tiġi emendata skont dan.

(6)

Il-miżuri previsti f'din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

L-Artikolu 1 jinbidel b'dan li ġej:

“B'deroga mill-Artikolu 13(1)(ii) tad-Direttiva 2000/29/KE, l-Istati Membri għandhom ikunu awtorizzati biex jippermettu l-introduzzjoni fit-territorju tagħhom tal-injam isserrat mingħajr qoxra ta' Quercus L. li joriġina mill-Istati Uniti tal-Amerka u li hu kopert mill-kodiċi NM u d-deskrizzjonijiet stabbiliti fit-Taqsima I(6) tal-Parti B tal-Anness V ta' dik id-Direttiva, mingħajr ma jkollu miegħu ċertifikat fitosanitarju, dejjem jekk dan l-injam jikkonforma mal-kundizzjonijiet stipulati fl-Anness ta' din id-Deċiżjoni.”

(2)

Fl-Artikolu 3 id-data tat-“30 ta' Novembru 2016” hija sostitwita bil-“31 ta' Diċembru 2026”.