This document is an excerpt from the EUR-Lex website
Document 32016D1623
Council Decision (EU) 2016/1623 of 1 June 2016 on the signing, on behalf of the European Union and provisional application of the Economic Partnership Agreement between the European Union and its Member States, of the one part, and the SADC EPA States, of the other part
Deċiżjoni tal-Kunsill (UE) 2016/1623 tal-1 ta' Ġunju 2016 dwar l-iffirmar, f'isem l-Unjoni Ewropea, u l-applikazzjoni provviżorja ta' Ftehim ta' Sħubija Ekonomika bejn l-Unjoni Ewropea u l-Istati Membri tagħha, min-naħa l-waħda, u l-Istati EPA SADC, min-naħa l-oħra
Deċiżjoni tal-Kunsill (UE) 2016/1623 tal-1 ta' Ġunju 2016 dwar l-iffirmar, f'isem l-Unjoni Ewropea, u l-applikazzjoni provviżorja ta' Ftehim ta' Sħubija Ekonomika bejn l-Unjoni Ewropea u l-Istati Membri tagħha, min-naħa l-waħda, u l-Istati EPA SADC, min-naħa l-oħra
ĠU L 250, 16.9.2016, p. 1–2
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
ELI: http://data.europa.eu/eli/dec/2016/1623/oj
|
16.9.2016 |
MT |
Il-Ġurnal Uffiċjali tal-Unjoni Ewropea |
L 250/1 |
DEĊIŻJONI TAL-KUNSILL (UE) 2016/1623
tal-1 ta' Ġunju 2016
dwar l-iffirmar, f'isem l-Unjoni Ewropea, u l-applikazzjoni provviżorja ta' Ftehim ta' Sħubija Ekonomika bejn l-Unjoni Ewropea u l-Istati Membri tagħha, min-naħa l-waħda, u l-Istati EPA SADC, min-naħa l-oħra
IL-KUNSILL TAL-UNJONI EWROPEA,
Wara li kkunsidra t-Trattat dwaril-Funzjonament tal-Unjoni Ewropea, u b'mod partikolari l-Artikoli 207(3) u (4) u 209(2), flimkien mal-Artikolu 218(5) tiegħu,
Wara li kkunsidra l-proposta mill-Kummissjoni Ewropea,
Billi:
|
(1) |
Fit-12 ta' Ġunju 2002, il-Kunsill awtorizza lill-Kummissjoni tiftaħ negozjati għal Ftehimiet ta' Sħubija Ekonomika mal-Grupp tal-Istati Afrikani, tal-Karibew u tal-Paċifiku. |
|
(2) |
In-negozjati ġew konklużi u l-Ftehim ta' Sħubija Ekonomika bejn l-Unjoni Ewropea u l-Istati Membri tagħha, min-naħa l-waħda, u l-Istati EPA SADC (il-Botswana, il-Lesoto, il-Mozambique, in-Namibja, is-Swaziland u l-Afrika t'Isfel) min-naħa l-oħra (“il-Ftehim”), ġie inizjalat fil-15 ta' Lulju 2014. |
|
(3) |
Il-Ftehim ta' Sħubija bejn il-membri tal-Grupp tal-Istati Afrikani, tal-Karibew u tal-Paċifiku min-naħa l-waħda, u l-Komunità Ewropea u l-Istati Membri tagħha min-naħa l-oħra, iffirmat f'Kotonù fit-23 ta' Ġunju 2000, jirrikjedi li jiġu konklużi Ftehimiet ta' Sħubija Ekonomika kompatibbli mad-WTO. |
|
(4) |
L-Artikolu 113(3) tal-Ftehim jipprevedi l-applikazzjoni provviżorja tiegħu mill-Unjoni u mill-Istati EPA SADC sakemm dan jidħol fis-seħħ. |
|
(5) |
Il-Ftehim għandu jiġi ffirmat f'isem l-Unjoni u għandu jiġi applikat, għal dak li jirrigwarda l-elementi li jaqgħu taħt il-kompetenza tal-Unjoni, fuq bażi provviżorja, sakemm jitlestew il-proċeduri li jikkonkluduh, |
ADOTTA DIN ID-DEĊIŻJONI:
Artikolu 1
1. L-iffirmar f'isem l-Unjoni tal-Ftehim ta' Sħubija Ekonomika bejn l-Unjoni Ewropea u l-Istati Membri tagħha, min-naħa l-waħda, u l-Istati EPA SADC min-naħa l-oħra, huwa b'dan awtorizzat f'isem l-Unjoni, soġġett għall-konklużjoni ta' dan il-Ftehim.
2. It-test tal-Ftehim huwa mehmuż ma' din id-Deċiżjoni.
Artikolu 2
Il-President tal-Kunsill huwa b'dan awtorizzat jinnomina lill-persuna jew persuni bis-setgħa li jiffirmaw il-Ftehim f'isem l-Unjoni.
Artikolu 3
1. Fir-rigward ta' dawk l-elementi li jaqgħu fil-kompetenza tal-Unjoni, il-Ftehim għandu jiġi applikat mill-Unjoni fuq bażi provviżorja kif previst fl-Artikolu 113(3) tiegħu, sakemm jitlestew il-proċeduri li jikkonkluduh. Dan ma jippreġudikax id-distribuzzjoni tal-kompetenzi bejn l-Unjoni u l-Istati Membri tagħha f'konformità mat-Trattati.
2. L-Artikolu 12(4) tal-Ftehim ma għandux jiġi applikat b'mod provviżorju mill-Unjoni.
3. Il-Kummissjoni għandha tippubblika avviż li jindika d-data tal-applikazzjoni provviżorja tal-Ftehim.
Artikolu 4
Il-Ftehim ma għandux jiġi interpretat fis-sens li jagħti xi drittijiet jew jimponi xi obbligi li jistgħu jiġu invokati direttament quddiem il-qrati jew it-tribunali tal-Unjoni jew tal-Istati Membri.
Artikolu 5
Din id-Deċiżjoni għandha tidħol fis-seħħ fil-jum tal-adozzjoni tagħha.
Magħmul fi Brussell, l-1 ta' Ġunju 2016.
Għall-Kunsill
Il-President
A.G. KOENDERS