6.2.2016   

MT

Il-Ġurnal Uffiċjali tal-Unjoni Ewropea

L 31/70

(1)

Fil-15 ta' April 2015, il-manifattur Toyota Motor Europe NV/SA (l-“applikant”) ressaq applikazzjoni għall-approvazzjoni ta' sistema ta' illuminazzjoni esterna effiċjenti li tuża dijodi li jemettu d-dawl (LEDs) bħala teknoloġija innovattiva. Il-kompletezza ta' dik l-applikazzjoni ġiet ivvalutata skont l-Artikolu 4 tar-Regolament ta' Implimentazzjoni tal-Kummissjoni (UE) Nru 725/2011 (2). Il-Kummissjoni sabet li fl-applikazzjoni oriġinali tħalliet barra ċerta informazzjoni rilevanti u talbet lill-applikant jipprovdiha. L-applikant ipprovda l-informazzjoni mitluba fis-26 ta' Mejju 2015. L-applikazzjoni tqieset kompluta u l-perjodu biex il-Kummissjoni tagħmel valutazzjoni tal-applikazzjoni beda l-għada ta' meta waslet uffiċjalment l-informazzjoni kompluta, jiġifieri fis-27 ta' Mejju 2015.

(2)

L-applikazzjoni kienet ġiet ivvalutata skont l-Artikolu 12 tar-Regolament (KE) Nru 443/2009, skont ir-Regolament ta' Implimentazzjoni tal-Kummissjoni (UE) Nru 725/2011 u skont il-Linji Gwida Tekniċi għat-tħejjija ta' applikazzjonijiet għall-approvazzjoni ta' teknoloġiji innovattivi skont ir-Regolament (KE) Nru 443/2009 (il-verżjoni tal-Linji Gwida Tekniċi ta' Frar tal-2013) (3).

(3)

L-applikazzjoni tirreferi għal sistema ta' illuminazzjoni esterna effiċjenti li tinkludi l-fanal ta' quddiem tar-raġġi baxxi, il-fanal ta' quddiem tar-raġġi għoljin u l-fanali ta' quddiem, il-fanali ta' quddiem kontra ċ-ċpar, il-fanali ta' wara kontra ċ-ċpar, id-dwal tal-indikaturi ta' quddiem, id-dwal tal-indikaturi ta' wara, id-dwal tal-pjanċi u d-dwal tar-rivers mgħammra b'LEDs.

(4)

Il-Kummissjoni tqis li l-informazzjoni pprovduta fl-applikazzjoni turi li ġew issodisfati l-kundizzjonijiet u l-kriterji msemmija fl-Artikolu 12 tar-Regolament (KE) Nru 443/2009 u fl-Artikoli 2 u 4 tar-Regolament ta' Implimentazzjoni (UE) Nru 725/2011.

(5)

L-applikant wera li l-użu tal-LEDs fil-fanal ta' quddiem tar-raġġi baxxi, fil-fanal ta' quddiem tar-raġġi għoljin, fil-fanali ta' quddiem, fil-fanal ta' quddiem kontra ċ-ċpar, fil-fanal ta' wara kontra ċ-ċpar, fid-dwal tal-indikaturi ta' quddiem, fid-dwal tal-indikaturi ta' wara, fid-dwal tal-pjanċi u fid-dwal tar-rivers ma jaqbiżx it-3 % tal-karozzi l-ġodda tal-passiġġieri li ġew irreġistrati fis-sena ta' referenza 2009. B'appoġġ ta' dan, l-applikant irrefera għal-Linji Gwida Tekniċi, li jagħtu taqsira tar-rapport CLEPA LIGHT Sight Safety. L-applikant uża funzjonijiet predefiniti u data fuq medja ta' żmien f'konformità mal-approċċ simplifikat speċifikat fil-Linji Gwida Tekniċi (il-verżjoni ta' Frar tal-2013).

(6)

Skont l-approċċ simplifikat deskritt fil-Linji Gwida Tekniċi, l-applikant uża illuminazzjoni tal-aloġenu bħala teknoloġija bażi biex juri l-kapaċità ta' tnaqqis ta' CO2 tas-sistema ta' illuminazzjoni esterna effiċjenti billi jintużaw LEDs fil-fanal ta' quddiem tar-raġġi baxxi, fil-fanal ta' quddiem tar-raġġi għoljin, fil-fanali ta' quddiem, fil-fanali ta' quddiem kontra ċ-ċpar, fil-fanali ta' wara kontra ċ-ċpar, fid-dwal tal-indikaturi ta' quddiem, fid-dwal tal-indikaturi ta' wara, fid-dwal tal-pjanċi u fid-dwal tar-rivers.

(7)

L-applikant ipprovda metodoloġija għall-ittestjar tat-tnaqqis ta' CO2 li tinkludi formoli li huma konsistenti mal-formoli deskritti fil-Linji Gwida Tekniċi għall-approċċ simplifikat fir-rigward tal-funzjonijiet ta' illuminazzjoni. Il-Kummissjoni tqis li l-metodoloġija tal-ittestjar se tipprovdi riżultati tal-ittestjar li jkunu verifikabbli, ripetibbli u komparabbli u li b'mod realistiku din kapaċi turi b'sinifikanza statistika qawwija, il-benefiċċji tat-teknoloġija innovattiva f'termini tal-emissjonijiet ta' CO2 f'konformità mal-Artikolu 6 tar-Regolament ta' Implimentazzjoni (UE) Nru 725/2011.

(8)

F'dan l-isfond, il-Kummissjoni tqis li l-applikant wera b'mod sodisfaċenti li t-tnaqqis fl-emissjonijiet li nkiseb permezz tas-sistema ta' illuminazzjoni esterna effiċjenti li tinkludi l-fanali ta' quddiem tar-raġġi baxxi, il-fanali ta' quddiem tar-raġġi għoljin, il-fanali ta' quddiem, il-fanali ta' quddiem kontra ċ-ċpar, il-fanali ta' wara kontra ċ-ċpar u d-dwal tal-pjanċi huwa mill-anqas 1 g CO2/km. Għalhekk għandu jiġi konkluż li sistema ta' illuminazzjoni esterna effiċjenti li tinkludi mhux biss dawk il-fanali iżda wkoll id-dwal tal-indikaturi ta' quddiem, id-dwal tal-indikaturi ta' wara u d-dwal tar-rivers mgħammra b'LEDs jew taħlita xierqa oħra ta' dawk id-dwal tista' tikseb tnaqqis ta' CO2 ta' mill-inqas 1gCO2/km.

(9)

Billi l-attivazzjoni tal-illuminazzjoni esterna mhix meħtieġa għat-test tal-approvazzjoni tat-tip tal-emissjonijiet ta' CO2 imsemmija fir-Regolament (KE) Nru 715/2007 tal-Parlament Ewropew u tal-Kunsill (4) u fir-Regolament tal-Kummissjoni (KE) Nru 692/2008 (5), il-Kummissjoni hija sodisfatta li l-funzjonijiet ta' illuminazzjoni konċernati mhumiex koperti miċ-ċiklu tat-test standard.

(10)

L-attivazzjoni tal-funzjonijiet ta' illuminazzjoni konċernati hija obbligatorja biex ikun żgurat it-tħaddim tal-vettura mingħajr periklu u għalhekk ma tiddependix fuq l-għażla tas-sewwieq. Abbażi ta' dan il-Kummissjoni hi tal-fehma li l-manifattur għandu jitqies responsabbli għat-tnaqqis tal-emissjoni ta' CO2 minħabba l-użu tat-teknoloġija innovattiva.

(11)

Il-Kummissjoni tqis li r-rapport ta' verifika tħejja mill-Aġenzija taċ-Ċertifikazzjoni tal-Vetturi (VCA), li huwa korp indipendenti u ċertifikat, u li r-rapport jappoġġa s-sejbiet stipulati fl-applikazzjoni.

(12)

F'dan l-isfond, il-Kummissjoni tqis li ma għandha tagħmel l-ebda oġġezzjoni fir-rigward tal-approvazzjoni tat-teknoloġija innovattiva inkwistjoni.

(13)

Skont l-Artikolu 11(1) tar-Regolament ta' Implimentazzjoni tal-Kummissjoni (UE) Nru 725/2011, kull manifattur li jixtieq jibbenefika minn tnaqqis tal-emissjonijiet medji speċifiċi tas-CO2 tiegħu sabiex jilħaq il-mira tal-emissjonijiet tiegħu bl-iffrankar ta' CO2 li jiġi mill-użu tat-teknoloġija innovattiva approvata b'din id-Deċiżjoni, għandu jirreferi għal din id-Deċiżjoni fl-applikazzjoni tiegħu għal ċertifikat tal-approvazzjoni tat-tip tal-KE għall-vetturi konċernati.

(14)

Bil-għan li jiġi stabbilit il-kodiċi ġenerali tal-ekoinnovazzjoni li jrid jintuża fid-dokumenti tal-approvazzjoni tat-tip rilevanti skont l-Annessi I, VIII u IX tad-Direttiva 2007/46/KE tal-Parlament Ewropew u tal-Kunsill (6), għandu jiġi speċifikat il-kodiċi individwali li jrid jintuża għat-teknoloġija innovattiva approvata permezz ta' din id-Deċiżjoni ta' Implimentazzjoni.